(1)

I litreacha dar dáta an 28 Iúil 2008, an 20 , an 22 agus an 23 Meán Fómhair 2008, an 1 agus an 21 Deireadh Fómhair 2008, agus an 20 Samhain 2008, rinne roinnt saoránach gearán leis an gCoimisiún maidir le buntáistí a líomhnaítear a deonaíodh don aerlíne Ryanair ag aerfort La Rochelle-Île de Ré (‘an t-aerfort’), agus maidir le ranníocaíochtaí airgeadais a líomhnaítear a fuair an t-aerfort. Tagraíodh sna gearáin don tuarascáil ar thorthaí deiridh Chúirt Iniúchóirí Réigiúnach Poitou-Charentes (‘CRC’) an 13 Bealtaine 2008 (‘tuarascáil CRC’) maidir le bainistíocht Chomhlachas Tráchtála agus Tionscail La Rochelle (‘CCI’).

(2)

Le litir dar dáta an 17 Márta 2009, sheol an Coimisiún leagan neamhrúnda de na gearáin chuig údaráis na Fraince agus d’iarr sé orthu a mbarúlacha a thabhairt maidir leis na bearta atá i gceist. Sheol an Coimisiún an litir sin arís an 25 Bealtaine 2011. I litir dar dáta an 20 Meitheamh 2011, d’iarr údaráis na Fraince síneadh ar an sprioc-am chun freagra a thabhairt go dtí an 26 Iúil 2011, agus thoiligh an Coimisiún leis sin i litir dar dáta an 21 Meitheamh 2011. D’iarr údaráis na Fraince síneadh breise ar an sprioc-am go dtí an 26 Lúnasa 2011, agus thoiligh an Coimisiún leis sin ina litir ar an 28 Iúil 2011. Sheol údaráis na Fraince na freagraí a iarradh ar deireadh i litir dar dáta an 30 Lúnasa 2011.

(3)

I litir dar dáta an 11 Aibreán 2011, d’iarr an Coimisiún faisnéis bhreise ar Ryanair, a d’fhreagair i litir dar dáta an 22 Iúil 2011. Sheol an Coimisiún na barúlacha sin ar aghaidh chuig an bhFrainc chun a barúlacha a fháil ina leith i litir dar dáta an 14 Deireadh Fómhair 2011. Ní bhfuarthas aon fhreagra, agus sheol an Coimisiún meabhrúchán an 16 Samhain 2011. I litir dar dáta an 21 Samhain 2011, chuir údaráis na Fraince an Coimisiún ar an eolas nár mhian leo aon fhreagra a thabhairt ar bharúlacha Ryanair.

(4)

I litir dar dáta an 8 Feabhra 2012, chuir an Coimisiún an Fhrainc ar an eolas faoina chinneadh (‘an cinneadh tosaigh’) chun tús a chur leis an nós imeachta a leagtar síos in Airteagal 108(2) den Chonradh ar Fheidhmiú an Aontais Eorpaigh (CFAE) maidir leis an gcabhair a d’fhéadfadh a bheith deonaithe ag CCI do na haerlínte Ryanair, Jet2, Flybe, Aer Arann, easyJet agus Buzz.

(5)

I litir dar dáta an 22 Feabhra 2012, d’iarr an Coimisiún ar an bhFrainc tuilleadh faisnéise a sholáthar. I litir dar dáta an 12 Márta 2012, d’iarr an Fhrainc síneadh breise ar an sprioc-am chun freagra a thabhairt ar na hiarrataí ar fhaisnéis bhreise a rinneadh sa chinneadh tosaigh agus sa litir dar dáta an 22 Feabhra 2012. An 13 Aibreán 2012, sheol an Fhrainc isteach a barúlacha mar aon leis an bhfaisnéis agus na doiciméid a d’iarr an Coimisiún sa chinneadh tosaigh. Toisc go raibh faisnéis áirithe in easnamh, sheol an Coimisiún meabhrúchán chuig an bhFrainc i litir dar dáta an 19 Aibreán 2012. Sheol údaráis na Fraince a bhfreagraí isteach ar deireadh i litir dar dáta an 27 Aibreán 2012.

(6)

An 16 Aibreán 2012, rinne Ryanair a bharúlacha ar chásanna eile a bhain leis a sheoladh chuig an gCoimisiún agus d’iarr ar an gCoimisiún a bharúlacha a chur san áireamh le haghaidh na gcásanna státchabhrach go léir a bhain le Ryanair.

(7)

Foilsíodh cinneadh an Choimisiúin in Iris Oifigiúil an Aontais Eorpaigh (3) an 4 Bealtaine 2012. D’iarr an Coimisiún ar pháirtithe leasmhara a mbarúlacha a thabhairt faoi na bearta i gceist laistigh de 1 mhí amháin tar éis an dáta foilsithe.

(8)

I litir dar dáta an 16 Iúil 2012, d’iarr an Coimisiún arís ar an bhFrainc tuilleadh faisnéise a sholáthar. D’fhreagair an Fhrainc i litir dar dáta an 16 Lúnasa 2012 (agus sa cheartúchán a ghabhann leis dar dáta an 5 Meán Fómhair 2012).

(9)

Fuair an Coimisiún tuairimí ó pháirtithe leasmhara. Chuir CCI a bharúlacha isteach an 24 Iúil 2012. Chuir Airport Marketing Services (‘AMS’), fochuideachta de chuid Ryanair, a bharúlacha isteach an 1 Meitheamh 2012. Thairis sin, an 1 Meitheamh 2012, an 3 Meitheamh 2013, an 3 Feabhra 2014 agus an 10 Aibreán 2015, rinne Ryanair sraith barúlacha agus tuarascálacha ar anailís eacnamaíoch a d’ullmhaigh gnóthas sainchomhairleoireachta anailíse eacnamaíche (Oxera) a chur isteach.

(10)

Fuair an Coimisiún barúlacha freisin ó roinnt páirtithe leasmhara eile, lena n-áirítear eintitis phoiblí (4), gnóthais (5), comhlachais (6) agus daoine aonair.

(11)

Ina theannta sin, thíolaic Ryanair sraith tuairimí ginearálta agus coiteann do roinnt cásanna a bhaineann le státchabhair, arna oscailt ag an gCoimisiún agus a bhaineann leis, i litreacha dar dáta an 11 Aibreán 2013, an 23 Nollaig 2013, an 9 agus an 31 Eanáir 2014, an 7 Feabhra 2014, an 28 Márta 2014, an 27 Eanáir 2015, an 7 Nollaig 2015 agus an 1 Aibreán 2019. An 15 agus an 29 Meán Fómhair 2014, rinne Ryanair roinnt tuarascálacha anailíse eacnamaíche arna n-ullmhú ag Oxera a chur isteach freisin a bhain le roinnt cásanna státchabhrach a bhain le Ryanair.

(12)

I litreacha dar dáta an 15 Meitheamh 2012, an 3 Bealtaine 2013, an 9 agus an 23 Eanáir 2014, an 4 Feabhra 2014, an 2 Iúil 2014, an 12 Meán Fómhair 2014, an 19 Bealtaine 2015, an 16 Nollaig 2015 agus an 17 Bealtaine 2019, sheol an Coimisiún na barúlacha a thug páirtithe leasmhara chuig an bhFrainc. Thug an Coimisiún deis don Fhrainc freagra a thabhairt ar na barúlacha sin. D’fhreagair an Fhrainc na litreacha sin an 13 Iúil 2012, an 25 Iúil 2012, an 29 Eanáir 2014, an 23 Bealtaine 2014, an 18 Nollaig 2015 agus an 24 Meitheamh 2019. Ina litir dar dáta an 13 Iúil 2012, chuir an Fhrainc an Coimisiún ar an eolas nár éiligh na barúlacha a bhí faighte aon tuairim uaithi féin taobh amuigh díobh siúd a bhí tarchurtha cheana féin aici i gcomhthéacs an cháis a bhaineann le haerfort Marseille Provence (7). Ina theannta sin, i litreacha dar dáta an 25 Iúil 2012, an 29 Eanáir 2014, an 23 Bealtaine 2014 agus an 18 Nollaig 2015, chuir an Fhrainc an Coimisiún ar an eolas nár mhian léi aon bharúil a thíolacadh mar fhreagra ar bharúlacha tríú páirtithe.

(13)

Sheol an Coimisiún litreacha chuig an bhFrainc agus chuig na tríú páirtithe a sheol barúlacha isteach cheana féin chun iad a chur ar an eolas go raibh sé beartaithe aige measúnú a dhéanamh ar chomhoiriúnacht na mbeart cabhrach i gceist leis an margadh inmheánach bunaithe ar Threoirlínte an Aontais Eorpaigh maidir le státchabhair d’aerfoirt agus d’aerlínte (8) (‘Treoirlínte 2014’). D’iarr an Coimisiún ar fhaighteoirí na litreacha sin aon bharúil a bheadh acu ar an ábhar seo a chur isteach. Ina theannta sin, an 15 Aibreán 2014, foilsíodh fógra in Iris Oifigiúil an Aontais Eorpaigh (9) ag tabhairt cuireadh don Fhrainc agus do thríú páirtithe leasmhara a mbarúlacha ar an ábhar seo a chur isteach.

(14)

Thíolaic an Fhrainc a tuairimí ar Threoirlínte 2014 an 19 Márta 2014.

(15)

Fuair an Coimisiún barúlacha ó CCI (11 Meitheamh 2014), Communauté d’Agglomération de La Rochelle [Coiste Chiertleán Uirbeach La Rochelle] (6 Meitheamh 2014), Union Départementale des Offices du Tourisme et des Syndicats d’Initiative (UDOTSI) [Comhlachas Oifigí Turasóireachta Charente-Maritime] (13 Bealtaine 2014), CCI Angoulême (7 Bealtaine 2014), Irium Holding Group SAS (2 Bealtaine 2014), Groupe Cafés Merling (30 Aibreán 2014) agus an ENR Transport & Environnement, eagraíocht neamhrialtasach (13 Bealtaine 2014). Seoladh na barúlacha éagsúla ar aghaidh chuig an bhFrainc i litir dar dáta an 2 Iúil 2014, ach níor mhian leis an bhFrainc aon fhreagra a thabhairt.

(16)

I litir dar dáta an 19 Bealtaine 2015, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litreacha dar dáta an 4 Lúnasa 2015, an 18 Samhain 2015, an 4 Nollaig 2015 agus an 14 Márta 2016.

(17)

I litir dar dáta an 18 Samhain 2016, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litreacha dar dáta an 20 Nollaig 2016, an 15 Feabhra 2017, an 11 Iúil 2017 agus an 20 Iúil 2017.

(18)

I litir dar dáta an 29 Márta 2017, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litir dar dáta an 18 Lúnasa 2017.

(19)

I litir dar dáta an 19 Bealtaine 2017, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litreacha dar dáta an 18 Lúnasa 2017 agus an 15 Samhain 2017.

(20)

I litir dar dáta an 18 Lúnasa 2017, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litir dar dáta an 16 Aibreán 2018.

(21)

I litir dar dáta an 5 Nollaig 2017, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litir dar dáta an 16 Feabhra 2018.

(22)

I litir dar dáta an 9 Aibreán 2019, d’iarr an Coimisiún ar an bhFrainc tuilleadh faisnéise a sholáthar. D’fhreagair an Fhrainc i litir dar dáta an 21 Meitheamh 2019.

(23)

Tá aerfort La Rochelle-Île de Ré lonnaithe in La Rochelle, i Roinn Charente-Maritime sa Fhrainc, 5 km siar ó thuaidh ó La Rochelle agus 2 km ó dhroichead Île de Ré. Tá an t-aerfort ar oscailt do thrácht tráchtála náisiúnta agus idirnáisiúnta.

(24)

Ghlac Stát na Fraince, cathair La Rochelle agus CCI cinneadh aerfort a oscailt in 1936. Tháinig an cinneadh sin faoin raon feidhme arna cheadú faoi Dhlí an 20 Meitheamh 1933 lena leasaítear Dlí an 9 Aibreán 1898 maidir le comhlachais tráchtála. Sonraíodh i nDlí an 9 Aibreán 1898 maidir le comhlachais tráchtála, ina fhoclaíocht i dtosach báire, go bhféadfaí ‘comhlachais tráchtála agus tionscail a dhearbhú mar shealbhóirí lamháltais le haghaidh oibreacha poiblí nó seirbhísí poiblí a chur ar a n-iontaoibh, go háirithe seirbhísí a bhaineann le calafoirt agus le huiscebhealaí’. Cuireadh síneadh leis an bhforáil sin chun aerfoirt a chuimsiú le Dlí an 20 Meitheamh 1933. Osclaíodh an t-aeradróm in 1939.

(25)

Tá príomh-rúidbhealach an aerfoirt 2 255 mhéadar ar fhad agus 45 mhéadar ar leithead. Measann an Fhrainc gurb é 700 000 paisinéir uas-acmhainneacht bhliantúil theoiriciúil an aerfoirt.

(26)

Tá an t-aerfort á oibriú ag CCI, agus is é CCI úinéir an aerfoirt freisin. Tá cuntais na ‘rannóige aerfoirt’ (‘rannóg aerfoirt’ nó CCI-Aerfort’) ar leithligh ó chuntais rannóg ghinearálta CCI (‘rannóg ghinearálta CCI’) (10).

(27)

Tá forbhreathnú ar an trácht paisinéirí ag aerfort La Rochelle le roinnt blianta anuas le fáil i dTábla 3 thíos. I gcomhréir le pointe 15 de Threoirlínte an Chomhphobail 2005 maidir le haerfoirt a mhaoiniú agus státchabhair nuathionscanta le haghaidh aerlínte a imíonn ó aerfoirt réigiúnacha (11) (‘Treoirlínte 2005’), is aerfort chatagóir D é aerfort La Rochelle, i.e. ‘aerfort réigiúnach beag’.

(28)

Le linn na tréimhse atá faoi imscrúdú, ba iad aerlínte ísealchostais, mar atá Ryanair, Airlinair (a athainmníodh mar Hop in 2013), Flybe, easyJet, Jet2 agus Buzz, ba mhó a d’úsáid an t-aerfort. Oibrítear na bealaí ar bhonn bliantúil nó séasúrach, nó ar bhonn níos ad hoc le haghaidh cairteitiltí. Úsáidtear an t-aerfort freisin le haghaidh eitiltí fóillíochta, eitiltí míleata, agus eitiltí seirbhíse oifigiúla.

(29)

De réir na Fraince, is iad seo a leanas na bealaí a bhí á n-oibriú le linn na tréimhse a chumhdaítear leis an nós imeachta imscrúdaithe foirmiúil:

Tábla 1

Aerthrácht a oibríodh ag aerfort La Rochelle ó 2001 go 2006

Tábla 2

Aerthrácht a oibríodh ag aerfort La Rochelle ó 2007 go 2011

(30)

Léirítear i dTábla thíos an líon iomlán paisinéirí isteach agus amach a bhain úsáid as an aerfort idir 2000 agus 2012.

Tábla 3

Trácht agus gluaiseachtaí ag aerfort La Rochelle

(31)

Na bearta atá faoi réir an nós imeachta imscrúdaithe fhoirmiúil, baineann siad leis na nithe seo a leanas:

(32)

Idir 2001 agus 2011, mhaoinigh na húdaráis phoiblí tascanna sainchúraim phoiblí éagsúla a rinne aerfort La Rochelle maidir le sábháilteacht agus slándáil (féach Tábla 4 thíos). Tagann an cistiú sin faoi raon feidhme an nós imeachta imscrúdaithe fhoirmiúil.

(33)

De réir na Fraince, cumhdaítear leis an gcistiú sin costas na dtascanna sainchúraim phoiblí a bhfuil an fhreagracht ar oibreoirí an aerfoirt iad a chur chun feidhme agus a bhfuil an fhreagracht ar an stát íoc astu. Baineann an cistiú leis an gcóras ginearálta chun tascanna sainchúraim phoiblí a mhaoiniú in aerfoirt na Fraince mar a bhunaítear sa dlí náisiúnta. Bunaítear an córas sin ar thobhach cánach – an cháin aerfoirt – agus ionstraim mhaoinithe bhreise. Maidir leis an gcúlra leis na hionstraimí sin agus na rialacha lena rialaítear iad, agus na tascanna a mhaoinítear leo, tugadh tuairisc orthu sin cheana féin i roinnt cinntí le déanaí ón gCoimisiún (12). Mar sin féin, is mian leis an gCoimisiún na gnéithe seo a leanas a chur i dtábhacht, ar gnéithe iad is gá a chur san áireamh agus na bearta a chumhdaítear leis an gCinneadh seo á scrúdú.

(34)

De réir dlí, cuirtear tascanna sábháilteachta agus slándála aerfoirt ar iontaoibh oibreoirí aerfoirt (13). Déanann siad an gníomh is gá de bhun dhlí an Aontais agus an dlí náisiúnta agus cumhdaíonn siad na costais ghaolmhara. Aisíoctar ina dhiaidh sin iad tríd an gcáin aerfoirt, a gcuirtear an t-ioncam uaithi i leataobh go heisiach chun costas na dtascanna leasa ghinearálta a bhaineann le sábháilteacht agus slándáil a chumhdach.

(35)

Na prionsabail lena rialaítear oibriú na hionstraime maoinithe sin agus na catagóirí caiteachais is féidir a chumhdach, leagtar amach iad go mionsonraithe in dhá théacs tagartha (14). Bíonn an cháin aerfoirt á bailiú ag eintitis phoiblí nó phríobháideacha a oibríonn aeradróim inar taifeadadh, sa bhliain féilire deiridh dá bhfuil figiúirí ar fáil, líon paisinéirí (a chuaigh ar bord nó a thuirling) os cionn 5 000 aonad tráchta (aon aonad tráchta amháin = aon phaisinéir nó 100 kg de phost nó de lasta).

(36)

I gcomhréir le hAirteagal 1609 quatervicies den Chód Cánach Ginearálta, ‘ag gach aeradróm, déanfar an t-ioncam ón gcáin a shannadh chun seirbhísí comhraicthe dóiteáin agus seirbhísí tarrthála, cosc ar ghuaiseacha don fhiadhúlra, bearta slándála agus bearta cosanta comhshaoil a chistiú. Úsáidfear céatadán den ioncam cánach, a shocraítear gach bliain trí bhíthin ordú [idir-aireachta], chun trealamh uathoibríoch rialaithe teorann ina n-úsáidtear sainaithint bhithmhéadrach agus a shuiteáiltear in aerfoirt a chistiú. Socrófar méid an tobhaigh ar bhonn riachtanais mhaoinithe gach aerfoirt, agus tabharfar aird ar leith ar na seirbhísí a sholáthraítear chun na rialacháin i bhfeidhm a chomhlíonadh agus ar an treocht a bhfuil coinne leis ó thaobh figiúirí tráchta, costas agus ioncam eile an oibreora de’.

(37)

Dá bhrí sin, socraítear méid an tobhaigh gach bliain le haghaidh gach aerfoirt ar leith bunaithe ar na costais sábháilteachta agus slándála atá le cumhdach. Chuige sin, déanann oibreoirí aeradróim ráiteas bliantúil de chostais agus figiúirí tráchta a tharraingt suas. Seoltar na ráitis sin chuig an údarás áitiúil um shábháilteacht na heitlíochta sibhialta, arb é a dhéanann iad a sheiceáil agus a fhormheas i gcomhréir leis an reachtaíocht atá i bhfeidhm. Is é Údarás Eitlíochta Sibhialta na Fraince (Direction générale de l’aviation civile) a ríomhann méid an tobhaigh, agus déanann an t-údarás seiceáil bhreise ar na figiúirí dearbhaithe go léir, agus na torthaí carnacha ó bhlianta roimhe sin á gcur san áireamh. Déantar méid an tobhaigh a leagan síos in ordú idir-aireachta a fhoilsítear in iris oifigiúil na Fraince.

(38)

Thairis sin, leagtar síos le hAirteagal 1609 quatervicies den Chód Cánach Ginearálta go bhféadfadh Údarás Eitlíochta Sibhialta na Fraince seiceálacha a dhéanamh ar na figiúirí a dhearbhaíonn na hoibreoirí aerfoirt.

(39)

Leagadh amach na rialacha chun an próiseas sin a bhainistiú i gCiorclán i dtosach agus, ó 2010, is iad na rialacha is infheidhme na rialacha a leagtar síos in Ordú Idiraireachta an 30 Nollaig 2009 maidir leis na socruithe chun ráitis ó oibreoirí aeradróim a eisiúint chun méid an tobhaigh paisinéara faoin gcáin aerfoirt a bhunú. Cuirtear na rialacha i bhfeidhm ar an gcaoi chéanna ar na haerfoirt go léir sa Fhrainc.

(40)

Anuas ar an gcáin aerfoirt, fuair oibreoir aerfort La Rochelle fóirdheontais stáit freisin tríd an gCiste Idirghabhála le haghaidh Aerfort agus Aeriompair (‘FIATA’). Dearadh FIATA chun an t-ioncam ón gcáin aerfoirt a fhorlíonadh, mar ní leor an t-ioncam sin go minic i gcás aerfoirt lena mbaineann trácht íseal toisc nach féidir leo tobhach ró-ard a ghearradh ar na húsáideoirí. In 2008, chuir an Stát formhuirear ar an gcáin aerfoirt in ionad FIATA, agus dá bhrí sin is airde méid an tobhaigh ná mar is gá chun na costais sábháilteachta agus slándála a chumhdach ag aerfoirt áirithe. Cruthaítear barrachas ar an gcaoi sin, agus déantar é sin a athdháileadh ar na haerfoirt is lú chun a n-ioncam ón gcáin ioncaim a fhorlíonadh.

(41)

Maidir leis an nós imeachta rialúcháin a leagtar amach thuas, sheol an Fhrainc forbhreathnú chuig an gCoimisiún ar na fóirdheontais go léir a deonaíodh d’aerfort La Rochelle trí acmhainní stáit le haghaidh tascanna sainchúraim phoiblí. Leagtar na fóirdheontais sin amach i dTábla thíos:

Tábla 4

Costais a bhaineann le tascanna sainchúraim phoiblí (sábháilteacht agus slándáil) agus fóirdheontais a íoctar leis an aerfort le haghaidh na dtascanna sin

(42)

Soláthraíonn rannóg ghinearálta CCI seirbhísí atá coiteann dá rannóga éagsúla, lena n-áirítear an rannóg aerfoirt, go háirithe seirbhísí cuntasaíochta, TF agus acmhainní daonna. Léirítear sa Tábla thíos na seirbhísí ar shonraisc a sheol CCI chuig aerfort La Rochelle.

Tábla 5

Méideanna arna sonrascadh ag rannóg ghinearálta CCI dá rannóg aerfoirt le linn na tréimhse faoi imscrúdú

(43)

Shoiléirigh údaráis na Fraince na pointí seo a leanas maidir leis na seirbhísí a sholáthraíonn CCI d’aerfort La Rochelle.

(44)

Thairis sin, thug údaráis na Fraince le fios gur chnapshuimeanna a bhí ar na sonraisc idir 2001 agus 2005. Tugadh isteach an chéad eochair leithdháilte in 2006, agus rinneadh na heochracha leithdháilte a bheachtú ina dhiaidh sin le haghaidh na tréimhse 2007-2012. Modh is ea eochair leithdháilte chun costais a leithdháileadh de réir cion nó céatadán seasta ag brath ar chineál an chostais indírigh chun an chionroinnt a bhaineann le réimse gnó ar leith (agus/nó seirbhís) a chinneadh. Nuair a úsáidtear eochracha leithdháilte, glactar leis gur ann do ghaol comhréireach idir an costas agus an tseirbhís a sholáthraítear. Na heochracha leithdháilte a léirítear sa Tábla, tá siad bunaithe ar shé chritéar éagsúla ag brath ar an tseirbhís arna soláthar ag rannóg ghinearálta CCI don aerfort. Bunaítear eochracha leithdháilte ar thoimhdí, gan beann ar an réimse ina n-úsáidtear iad. Mar thoradh air sin, sa chás áirithe seo, mura féidir a léiriú gur neamhréalaíoch na tosca a roghnaíodh nó na teicnící ríofa a úsáideadh le haghaidh na n-eochracha nó bhí locht mór orthu, ní féidir a mheas go bhfuil na heochracha mícheart nó measta faoi bhun luacha. Dheimhnigh údaráis na Fraince gurb oibiachtúil agus ábhartha na critéir a úsáidtear mar bhonn le haghaidh na n-eochracha leithdháilte.

(45)

Ar deireadh, shonraigh údaráis na Fraince na méideanna a sonrascadh chomh maith leis na treochtaí i bhfigiúirí tráchta paisinéirí idir 2001 agus 2012.

(46)

Idir an 1 Eanáir 2002 agus an 30 Meitheamh 2006, chabhraigh Stiúrthóir aerfort La Rochelle agus rúnaí chun aerfort Rochefort/Saint-Agnant (‘aerfort Rochefort’) a bhainistiú agus a oibriú faoi chomhaontú seirbhísí a tugadh i gcrích i gcomhpháirtíocht le Comhlachas Tráchtála agus Tionscail Rochefort (15). Roghnaíodh CCI La Rochelle chun aerfort Rochefort a bhainistiú an 11 Iúil 2001 tar éis nós imeachta iomaíoch tairisceana.

(47)

Ba é ábhar an chomhaontaithe seirbhísí bainistíocht agus oibriú aerfort Rochefort, agus cumhdaíodh gnéithe amhail seirbhísí riaracháin ghinearálta, seirbhísí a bhaineann le hoibreacha agus soláthar trealaimh, agus seirbhísí le haghaidh úsáideoirí.

(48)

Le linn thréimhse iomlán an chomhaontaithe (2002-2006), ba é EUR 991 235 costas iomlán na seirbhísí a soláthraíodh (16). Fuair CCI La Rochelle EUR 293 264 as na seirbhísí sin.

(49)

Ó 2001 go 2012, rinne rannóg ghinearálta CCI réamhíocaíochtaí in-aisíoctha leis an aerfort ar mhéid carnach iomlán EUR 7 061 199. Deonaíodh na hairleacain in-aisíoctha sin gan aon cheanglas maidir le toradh ar chaipiteal. De réir na Fraince, is iasachtaí iad agus ní mór don aerfort iad a aisíoc. Taifeadtar na hairleacain mar shócmhainní ar chlár comhardaithe rannóg ghinearálta CCI agus mar dhliteanais ar chlár comhardaithe an aerfoirt, agus úsáideann CCI sealúchas réadmhaoine an aerfoirt mar chomhthaobhacht chun aisghabháil na n-iasachtaí a ráthú.

(50)

Shonraigh údaráis na Fraince gurbh é cuspóir na n-airleacan in-aisíoctha an leachtacht ba ghá a sholáthar don aerfort chun tionscadail infheistíochta a bhaineann le bonneagar a sheoladh, ar thaobh amháin, agus, ar an taobh eile, an buiséad a chomhardú agus dá bhrí sin easnamh oibriúcháin an aerfoirt a chumhdach – go sealadach ó tharla gur réamhíocaíochtaí a bhí iontu.

(51)

Fuair CCI fóirdheontais ó Réigiún Poitou-Charentes, Roinn Charente-Maritime agus Coiste Bailecheantair La Rochelle chun rannchuidiú le bearta bolscaireachta arna gcur chun feidhme ag aerfort La Rochelle. Tá forbhreathnú ar na fóirdheontais éagsúla sin le fáil i dTábla 7 thíos.

Tábla 7

Ranníocaíochtaí airgeadais a raibh coinne leo agus a d’íoc na húdaráis áitiúla iarbhír i dtreo na mbeart bolscaireachta arna gcur chun feidhme ag aerfort La Rochelle

(52)

Íocadh na ranníocaíochtaí sin faoi chomhaontuithe idir CCI de pháirt agus Roinn Charente-Maritime, Coiste Bailecheantair La Rochelle agus Réigiún Poitou-Charentes den pháirt eile.

(53)

Níorbh fhéidir le húdaráis na Fraince a sholáthar don Choimisiún ach dhá chomhaontú a tugadh i gcrích in 2010: comhaontú amháin a rinneadh le Roinn Charente-Maritime agus comhaontú eile a rinneadh le Coiste Bailecheantair La Rochelle (18).

(54)

Faoin dá chomhaontú ó 2010, gheall Roinn Charente-Maritime agus Coiste Bailecheantair La Rochelle maoiniú a dhéanamh ar chuid de na ‘bearta bolscaireachta a raibh sé i gceist ag CCI iad a sheoladh chun díriú ar thurasóirí eachtracha agus go háirithe na margaí i Londain, i mBaile Átha Cliath, in Osló agus sa Bhruiséil, ó tharla go bhfuil bealaí chun na gcathracha sin á n-oibriú’ (19). Mar sin féin, ní shonraítear sna comhaontuithe sin an cineál beart bolscaireachta atá le cur chun feidhme ag CCI ná ag na soláthraithe seirbhíse. Go háirithe, ní luaitear sna comhaontuithe gur aerlínte nó fochuideachtaí dá gcuid a bheidh sna soláthraithe seirbhíse.

(55)

Idir 2001 agus 2005, dheonaigh roinnt údaráis áitiúla agus Ciste Forbraíochta Réigiúnaí na hEorpa (CFRE) fóirdheontais d’aerfort La Rochelle (‘deontais infheistíochta’) chun infheistíochtaí éagsúla a mhaoiniú ar luach thart ar EUR 3 mhilliún san iomlán (féach Tábla 8 thíos):

(56)

Maoiníodh roinnt infheistíochtaí leis na deontais sin, ar a n-áirítear:

(57)

Shonraigh údaráis na Fraince freisin go raibh na hinfheistíochtaí beartaithe go háirithe lena áirithiú go bhféadfaí na haerárthaí a bhíonn in úsáid go coitianta ag aerlínte Eorpacha (B737, A320) a oibriú go sábháilte tríd an rúidbhealach a leathnú go 45 mhéadar ar leithead (bhí La Rochelle ar cheann de líon beag aerfort tráchtála lenar bhain rúidbhealach 30 méadar ar leithead), fad 115 mhéadar siar a chur leis an rúidbhealach (chun dul i ngleic go pointe áirithe leis le tionchar na tairsí díláithrithe ar an bhfad don tuirlingt), agus na bealaí innlithe agus na naprúin a oiriúnú le go bhféadfaí aerárthaí a bhogadh go sábháilte. Thairis sin, mar thoradh ar infheistíochtaí áirithe, cuireadh ar a chumas don aerfort a cheanglais cosanta comhshaoil a chomhlíonadh (an Dlí maidir le hUisce).

(58)

Shonraigh údaráis na Fraince nach bhfuair aerfort La Rochelle aon deontas chun maoiniú a dhéanamh ar thógáil carrchlóis ar tháille in 2006 agus ar leathnú an charrchlóis sin in 2008.

(59)

Tá forbhreathnú i dTábla 8 thíos ar na bearta infheistíochta go léir a ndearnadh deontais infheistíochta lena n-aghaidh.

(60)

De réir údaráis na Fraince, an chuid sin de na hinfheistíochtaí nár cumhdaíodh le deontais, ba é CCI, úinéir agus oibreoir an aerfoirt, a mhaoinigh í.

Tábla 8

Forbhreathnú ar na bearta go léir a ndearnadh deontais infheistíochta lena n-aghaidh

(61)

De réir na Fraince, maidir leis na seirbhísí aerfoirt go léir arna soláthar ag oibreoir an aerfoirt d’úsáideoirí éagsúla an aerfoirt, déantar na seirbhísí sin a phraghsáil i gcomhréir lena scála muirear ar sheirbhísí aerfoirt. Cuirtear gach muirear beartaithe faoi bhráid an Choiste Chomhairligh Eacnamaíoch (‘Cocoeco’) chun a thuairim a fháil, rud a fhágann gur féidir dul i gcomhairle le húsáideoirí an aerfoirt maidir leis na muirir atá i bhfeidhm (aerlínte, ceardchumainn, cuideachtaí a ghabhann d’obair san aer, comhlachais). Ar an gcaoi sin, de réir na Fraince, cuirtear méaduithe ar mhuirir sheach-aerloingseoireachta faoi bhráid Cocoeco gach bliain. Déantar gach muirear a bheartaíonn an t-oibreoir, mar aon le tuairim Cocoeco, a chur faoi bhráid Mhaor na Roinne freisin sula dtagann sé i bhfeidhm.

(62)

Rinne an Fhrainc na scálaí muirear le haghaidh seirbhísí aerfoirt a bhí i bhfeidhm ó 2001 go 2013 a sheoladh chuig an gCoimisiún. Ina theannta sin, rinne an Fhrainc na tuairimí go léir a d’eisigh Cocoeco idir 2001 agus 2013, seachas tuairimí ó 2005 mar níorbh ann d’aon chruinniú de Cocoeco an bhliain sin, a sheoladh chuig an gCoimisiúin.

(63)

Shonraigh an Fhrainc freisin gurb iad aerlínte a íocann an muirear soilsithe rúidbhealaigh ag brath ar cé acu atá nó nach bhfuil feidhm ag na rialacha eitlíochta sibhialta lena rialaítear gluaiseachtaí san oíche nó le linn drochaimsire (sna cásanna sin, is í an tseirbhís aerloingseoireachta atá freagrach as a chinneadh cibé acu is gá nó nach gá an soilsiú a úsáid) nó má iarrann an píolóta an soilsiú. De réir údaráis na Fraince, is í seirbhís aerloingseoireachta La Rochelle a sholáthraíonn an fhaisnéis is gá maidir le cibé acu a úsáideadh nó nár úsáideadh soilsiú le linn gluaiseacht aerárthaigh, agus ar an gcaoi sin is féidir leis an oibreoir an méid sin a chur ar shonrasc don aerlíne.

(64)

Sonraíonn an Fhrainc go bhfaigheann an t-aerfort na muirir sheach-aerloingseoireachta seo a leanas: (i) muirir ar áitiú maoine atá faoi úinéireacht an stáit (cuid sheasta agus cuid athraitheach bunaithe ar an láimhdeachas a ghintear) le haghaidh na ngníomhaíochtaí seo a leanas: carrchlóis, cuideachtaí fruilithe gluaisteán, haingir d’aerárthaí, bialann, siopaí, fógraíocht; agus (ii) seirbhísí éagsúla a sholáthraítear ar tháille.

(65)

Cumhdaítear le himscrúdú an Choimisiúin na comhaontuithe lena rialaítear íocaíocht ar sheirbhísí arna soláthar ag an aerfort le haghaidh ghníomhaíochtaí aerloingseoireachta na n-aerlínte (‘comhaontuithe seirbhísí aerfoirt’) agus na comhaontuithe lena rialaítear íocaíocht ar sheirbhísí margaíochta arna soláthar ag na haerlínte don aerfort (‘comhaontuithe seirbhísí margaíochta’) a rinne CCI agus na haerlínte ó 2001 go dtí gur seoladh an nós imeachta imscrúdaithe foirmiúil an 8 Feabhra 2012.

(66)

Rinne an Coimisiún scrúdú ar na comhaontuithe muirear aerfoirt agus ar na comhaontuithe seirbhísí margaíochta a rinne CCI agus na haerlínte seo a leanas: Ryanair/AMS, Jet2, Flybe, Aer Arann, Buzz agus easyJet.

(67)

De réir na Fraince, tá sa tábla seo a leanas na comhaontuithe go léir arna dtabhairt i gcrích ag CCI le Ryanair agus AMS le linn na tréimhse faoi imscrúdú:

Tábla 9

Liosta comhaontuithe a rinne CCI agus Ryanair/AMS

(68)

Mar a léirítear i dTábla 9, rinne CCI agus Ryanair roinnt comhaontuithe a thabhairt i gcrích lenar leagadh amach muirir aerfoirt agus muirir ar sheirbhísí láimhseála ar an talamh le linn na tréimhse faoi imscrúdú.

(69)

Maidir leis na comhaontuithe seirbhísí aerfoirt a chumhdaítear sa roinn seo, shonraigh an Fhrainc an méid seo a leanas:

(70)

Is léir dá bhrí sin ón ngrinnscrúdú ar na comhaontuithe sin, maidir leis na muirir aerfoirt a cuireadh i bhfeidhm ar Ryanair faoi gach comhaontú, go gcomhfhreagraíonn siad don chárta rátaí ginearálta a d’fhormheas Cocoeco.

(71)

Leis an gcéad chomhaontú seo, a shínigh CCI agus Ryanair an 10 Nollaig 2003, agus a raibh feidhm chúlghabhálach leis ar feadh tréimhse 3 bliana ón 1 Bealtaine 2003, leagadh amach méid na muirear aerfoirt ab infheidhme maidir le Ryanair. Faoin gcomhaontú, ghlac Ryanair air féin bealach laethúil a oibriú idir aerfort La Rochelle agus aerfort Stansted Londan agus b’fhéidir aon bhealach amháin nó roinnt bealaí go haerfort Charleroi na Bruiséile, aerfort Frankfurt Hahn, nó go dtí aon aerfort eile, a sheoladh ar choinníoll gur chuir na bealaí i gceist ar a chumas do Ryanair oibriú amach as aerfort La Rochelle ar feadh 340 lá sa bhliain ar a laghad i ngach bliain a cumhdaíodh leis an gcomhaontú.

(72)

Faoi Airteagal 2(b) de Chomhaontú Uimh. 1 an 10 Nollaig 2003, ceanglaíodh ar Ryanair freisin muirear ar sheirbhísí láimhseála ar an talamh dar luach EUR […] a íoc as gach aerárthach BAe 146-300, EUR […] as gach Boeing 737-300 agus EUR […] as gach Boeing 737-800. D’áitigh an Fhrainc ar dtús ina litir ón 30 Lúnasa 2011 nach soláthraíonn CCI, lasmuigh d’athbhreoslú, ‘aon seirbhís eile láimhseála ar an talamh’ agus go ndéanann úsáideoirí ‘conarthaí a thabhairt i gcrích go díreach le tríú páirtí príobháideach maidir le seirbhísí láimhseála ar an talamh’. Ina fhreagra dar dáta an 12 Aibreán 2012, mhínigh an Fhrainc leis sin nár ghníomhaigh CCI ach mar idirghabhálaí idir Ryanair agus Atlantica, an chuideachta seirbhísí láimhseála ar an talamh. De réir CCI, níor sonraíodh sa chomhaontú seirbhísí aerfoirt an 10 Nollaig 2003 idir CCI agus Ryanair ach an phraghsáil a leag Atlantica amach. Sonraíonn an Fhrainc agus CCI gur dhéileáil Ryanair le Atlantica go díreach ó 2007 i leith. Aistríodh an fhreagracht sin chuig Atlantica faoin gcomhaontú seirbhísí láimhseála ar an talamh an 1 Feabhra 2007, inar coinníodh an muirear a leagadh amach sa chomhaontú roimhe sin maidir le seirbhísí láimhseála ar an talamh le haghaidh aerárthaí Boeing 737-800 de chuid Ryanair.

(73)

Thug CCI agus Ryanair an comhaontú seo i gcrích an 1 Bealtaine 2006 ar feadh tréimhse 3 bliana. Faoin gcomhaontú, ghlac Ryanair air féin bealach a oibriú idir La Rochelle agus aerfort Stansted Londan lena nginfí trácht paisinéirí 95 000 paisinéir sa bhliain ar a laghad.

(74)

Thug CCI agus Ryanair an comhaontú seo i gcrích an 1 Bealtaine 2006 ar feadh tréimhse 3 bliana. Faoin gcomhaontú, ghlac Ryanair air féin bealach a oibriú idir La Rochelle agus Baile Átha Cliath lena nginfí trácht paisinéirí 45 000 paisinéir sa bhliain ar a laghad.

(75)

Cuireadh an comhaontú seo go hintuigthe in ionad Chomhaontú 2 agus thug CCI agus Ryanair i gcrích é an 1 Feabhra 2007, agus chuaigh sé in éag an 30 Aibreán 2009. Faoin gcomhaontú, ghlac Ryanair air féin bealach laethúil a oibriú idir aerfort La Rochelle agus aerfort Stansted Londan agus b’fhéidir aon bhealach amháin nó roinnt bealaí go haerfort Charleroi na Bruiséile, aerfort Frankfurt Hahn, nó go dtí aon aerfort eile, a sheoladh. Ghlac sé air féin freisin oibriú amach as aerfort La Rochelle ar feadh 340 lá sa bhliain ar a laghad i ngach bliain a cumhdaíodh leis an gcomhaontú. Ón 1 Feabhra 2007 i leith, sholáthair Atlantica seirbhísí láimhseála ar an talamh do Ryanair faoin gcomhaontú seirbhísí láimhseála ar an talamh dá dtagraítear in aithris 71.

(76)

Thug CCI agus Ryanair an comhaontú seo i gcrích an 13 Eanáir 2010, agus bhí feidhm chúlghabhálach leis ón 1 Bealtaine 2009 ar feadh tréimhse 3 bliana. Faoin gcomhaontú, ghlac Ryanair air féin bealach laethúil a oibriú idir aerfort La Rochelle agus aerfort Stansted Londan, Baile Átha Cliath agus aerfort Charleroi na Bruiséile agus b’fhéidir aon bhealach amháin nó roinnt bealaí chuig aon aerfort eile ar a bhfreastalaíonn Ryanair a sheoladh.

(77)

Leasaíodh an comhaontú seo faoi dhó leis an dá leasú a leagtar amach thíos:

(78)

Leis an leasú seo ar Chomhaontú 5 an 13 Eanáir 2010, a bhí i bhfeidhm go dtí an 31 Márta 2013, leagtar amach na bealaí atá le hoibriú ag Ryanair ó aerfort La Rochelle ag tosú i séasúr an tsamhraidh, 2010, ar na téarmaí seo a leanas:

(79)

Rinneadh forlíonadh leis an leasú seo ar Chomhaontú 5 an 13 Eanáir 2010.

(80)

Leis an leasú seo ar Chomhaontú 5 an 13 Eanáir 2010, ghlac Ryanair air féin bealach sa samhradh amháin a oibriú chuig Porto ag tosú i séasúr an tsamhraidh, 2011, lenar bhain trácht íosta 17 000 paisinéir (isteach agus amach) le haghaidh gach bliana iomláine.

(81)

Mar a léirítear i dTábla 9, thug CCI roinnt comhaontuithe margaíochta i gcrích freisin. Idir 2003 agus 2006, thug CCI na comhaontuithe sin i gcrích le Ryanair; ó 2006 i leith, tugadh i gcrích iad le AMS, fochuideachta ar lánúinéireacht de chuid Ryanair.

(82)

Tugadh comhaontú i gcrích an 1 Nollaig 2003 idir CCI agus Ryanair, agus bhí feidhm chúlghabhálach leis ón 1 Bealtaine 2003 go dtí an 31 Nollaig 2003. Ghlac Ryanair air féin bealach laethúil a oibriú idir aerfort La Rochelle agus aerfort Stansted Londan ón 1 Bealtaine 2003 agus b’fhéidir aon bhealach amháin nó roinnt bealaí breise go haerfort Frankfurt Hahn, aerfort Charleroi na Bruiséile, nó go dtí aon aerfort eile, a sheoladh, agus iad a oibriú ar feadh 340 lá sa bhliain ar a laghad.

(83)

Faoin gcomhaontú sin, ghlac Ryanair air féin trí nasc gréasáin le suíomhanna gréasáin turasóireachta a bhaineann le réigiún La Rochelle a chur ar taispeáint ar a shuíomh gréasáin féin, agus feachtas a sheoladh chun a bhealaí go haerfort La Rochelle a chur chun cinn.

(84)

D’íoc CCI EUR […] le Ryanair:

(85)

Tugadh comhaontú i gcrích idir CCI agus Ryanair an 3 Meitheamh 2004 lenar cumhdaíodh an tréimhse ón 1 Eanáir 2004 go dtí an 30 Aibreán 2006. Ghlac Ryanair air féin bealach laethúil a oibriú idir aerfort La Rochelle agus aerfort Stansted Londan ón 1 Eanáir 2004 agus b’fhéidir aon bhealach amháin nó roinnt bealaí breise go haerfort Frankfurt Hahn, aerfort Charleroi na Bruiséile, nó go dtí aon aerfort eile, a sheoladh, agus oibriú ar feadh 340 lá sa bhliain ar a laghad. Thiomnaigh Ryanair freisin do lódfhachtóir 60 % ar a laghad le haghaidh a chuid eitiltí.

(86)

Faoin gcomhaontú sin, ghlac Ryanair air féin naisc ghréasáin le suíomhanna gréasáin turasóireachta a bhaineann le réigiún La Rochelle a chur ar taispeáint ar a shuíomh gréasáin féin.

(87)

D’íoc CCI EUR […] in aghaidh na bliana le Ryanair, agus thiocfadh laghdú ar an méid sin dá mba rud é nach n-éireodh le Ryanair a spriocanna ó thaobh lódfhachtóra de a bhaint amach. Dhéanfaí an méid sin a athríomh ansin bunaithe ar an líon paisinéirí arna iompar. Bhí na híocaíochtaí le déanamh in aghaidh na ráithe agus dhéanfaí aon ró-íocaíocht a fhritháireamh an bhliain dár gcionn.

(88)

Ní bhfuair an Coimisiún aon doiciméad inar léiríodh an méid cruinn a d’íoc CCI le Ryanair le haghaidh an 2 bhliain ina dhiaidh sin.

(89)

Tugadh comhaontú 3 bliana i gcrích an 1 Aibreán 2006 idir CCI agus AMS agus tháinig an comhaontú i bhfeidhm an 1 Bealtaine 2006. Tá nasc idir an comhaontú sin agus gealltanas Ryanair bealach a oibriú idir La Rochelle agus aerfort Stansted Londan ar a n-iomprófaí 95 000 paisinéir sa bhliain ar a laghad.

(90)

Faoin gcomhaontú sin, ghlac AMS air féin seirbhísí margaíochta éagsúla a sholáthar ar an suíomh gréasáin www.ryanair.com ar shuim EUR […] sa bhliain, nó EUR […] sa mhí. Áiríodh orthu sin:

(91)

D’fhéadfaí seirbhísí breise a chomhaontú idir na páirtithe. Dhéanfaí CCI íocaíochtaí míosúla ar na seirbhísí sin ar bhonn sonraisc a sheolfadh AMS.

(92)

Tugadh Comhaontú D i gcrích an 1 Aibreán 2006 idir CCI agus AMS lenar cumhdaíodh tréimhse 3 bliana agus tháinig an comhaontú i bhfeidhm an 1 Bealtaine 2006. Tá nasc idir an comhaontú sin agus gealltanas Ryanair bealach a oibriú idir La Rochelle agus Baile Átha Cliath ar a n-iomprófaí 45 000 paisinéir sa bhliain ar a laghad.

(93)

Faoin gcomhaontú sin, ghlac AMS air féin nasc le suíomh gréasáin arna dhearadh ag CCI a chur ar taispeáint ar shuíomh gréasáin Ryanair, www.ryanair.com, ar feadh 212 lá sa bhliain ar shuim EUR […] sa bhliain, nó EUR […] sa mhí. D’fhéadfaí seirbhísí breise a chomhaontú idir na páirtithe. Dhéanfaí CCI íocaíochtaí míosúla ar na seirbhísí sin ar bhonn sonraisc a sheolfadh AMS.

(94)

Leasaíodh Comhaontú D an 1 Meitheamh 2007 le leasú (Comhaontú E) lena ndearnadh athruithe ar na seirbhísí margaíochta le haghaidh 2007: Ghlac AMS air féin nasc le suíomh gréasáin arna dhearadh ag CCI a chur ar taispeáint ar shuíomh gréasáin Ryanair ar feadh 45 lá idir Meitheamh agus Meán Fómhair 2007 seachas 212 lá sa bhliain ar shuim EUR […].

(95)

Shínigh CCI-Aerfort Comhaontú F an 21 Meán Fómhair 2007 a bhain le seirbhísí margaíochta le haghaidh shuíomh gréasáin Ryanair sa Ríocht Aontaithe. Leasaíodh Comhaontú C le Comhaontú F agus rinneadh foráil ann maidir le seirbhísí margaíochta de bhreis orthu sin a sceidealaíodh cheana féin, mar atá cúig ríomhphost bolscaireachta sa bhreis a sheoladh i ngeimhreadh 2007/2008 chuig an 255 000 Béarlóir atá liostáilte ar liosta seachadta Ryanair. EUR […] an costas a bheadh ar na seirbhísí breise sin.

(96)

Tugadh comhaontú 3 bliana i gcrích an 17 Meán Fómhair 2009 idir CCI agus AMS agus bhí feidhm chúlghabhálach aige ón 1 Eanáir 2009. Tá nasc idir an comhaontú sin agus gealltanas Ryanair bealach a oibriú idir La Rochelle agus aerfort Stansted Londan ar a n-iomprófaí 53 000 paisinéir sa bhliain ar a laghad.

(97)

Faoin gcomhaontú sin, ghlac AMS air féin seirbhísí margaíochta éagsúla a sholáthar ar shuim EUR […] sa bhliain. Áiríodh orthu sin:

(98)

Ba é EUR […] an costas iomlán ar na seirbhísí sin, agus tugadh lascaine air sin. D’fhéadfaí seirbhísí breise a chomhaontú idir na páirtithe.

(99)

Tugadh comhaontú 3 bliana i gcrích an 17 Meán Fómhair 2009 idir CCI agus AMS agus bhí feidhm chúlghabhálach aige ón 1 Eanáir 2009 (Comhaontú H). Tá nasc idir an comhaontú sin agus gealltanas Ryanair bealach a oibriú idir La Rochelle agus aerfort Charleroi na Bruiséile ar a n-iomprófaí 9 000 paisinéir ar a laghad sa chéad bhliain agus 16 000 paisinéir ar a laghad sa 2 bhliain ina dhiaidh sin.

(100)

Faoin gcomhaontú sin, ghlac AMS air féin nasc arna ainmniú ag CCI a chur ar taispeáint ar leathanach baile Ryanair (www.ryanair.com) san Ísiltír/sa Bheilg (21) ar feadh 95 lá sa chéad bhliain agus 160 lá sa 2 bhliain ina dhiaidh sin. EUR […] agus EUR […] an costas a bhí ar na seirbhísí sin faoi seach, agus muirearaíodh EUR […] sa chéad bhliain agus EUR […] sna blianta ina dhiaidh sin do CCI. D’fhéadfaí seirbhísí breise a chomhaontú idir na páirtithe.

(101)

Leasaíodh an comhaontú sin an lá céanna le Comhaontú J, ar dá bhua a ghlac AMS air féin nasc leis an suíomh gréasáin arna ainmniú ag CCI a chur ar taispeáint ar leathanach baile Ryanair, www.ryanair.com, san Ísiltír/sa Bheilg le haghaidh 10 lá bhreise in 2009. EUR […] an costas a bheadh ar an tseirbhís bhreise sin.

(102)

Tugadh comhaontú eile 3 bliana i gcrích an 17 Meán Fómhair 2009 idir CCI agus AMS agus bhí feidhm chúlghabhálach aige ón 1 Eanáir 2009 (Comhaontú I). Tá nasc idir an comhaontú sin agus gealltanas Ryanair bealach a oibriú idir La Rochelle agus Baile Átha Cliath ar a n-iomprófaí 17 000 paisinéir sa bhliain ar a laghad.

(103)

Faoin gcomhaontú sin, ghlac AMS air féin nasc le suíomh gréasáin arna ainmniú ag CCI a chur ar taispeáint ar leathanach baile shuíomh gréasáin Ryanair, www.ryanair.com, in Éirinn ar feadh 200 lá. EUR […] an muirear a bhí ar an tseirbhís sin, a bhí le sonrascadh le CCI ar chostas bliantúil EUR […]. D’fhéadfaí seirbhísí breise a chomhaontú idir na páirtithe.

(104)

Tugadh comhaontú 3 bliana i gcrích idir CCI agus AMS an 25 Feabhra 2010 agus tháinig an comhaontú i bhfeidhm an 31 Márta 2010 (Comhaontú K). Cuireadh an comhaontú sin in ionad an chomhaontaithe a bhí ann roimhe idir na páirtithe agus chealaigh sé an comhaontú roimhe sin.

(105)

Tugadh trí chomhaontú i gcrích in 2009 maidir le seirbhísí margaíochta agus cumhdaíodh leo gach ceann de na margaí ina raibh bearta bolscaireachta beartaithe, mar atá an Ríocht Aontaithe, Éire agus an Bheilg. Mar sin féin, thug na páirtithe comhaontú aonair i gcrích in 2010 le haghaidh na dtrí mhargadh sin.

(106)

Baineann an comhaontú seo leis an oibriú a dhéanann Ryanair ar bhealaí lena nasctar aerfort La Rochelle leis an Ríocht Aontaithe, le hÉirinn, leis an mBeilg agus leis an Iorua (is bealach nua é an bealach deiridh sin).Cé nach bhfuil aon cheanglas sa chomhaontú i dtéarmaí an lín paisinéirí nó na minicíochta eitiltí, leagtar síos ann, i gcás laghdú ar an minicíocht nó cealú ceann de na bealaí i gceist, go ndéanfaí an pacáiste seirbhísí margaíochta a mhodhnú dá réir.

(107)

Faoin gcomhaontú sin, ghlac AMS air féin seirbhísí margaíochta éagsúla a sholáthar ar shuim EUR […] sa bhliain. Áiríodh orthu sin:

(108)

D’fhéadfaí seirbhísí breise a chomhaontú idir na páirtithe.

(109)

Leasaíodh an comhaontú seo leis na trí leasú a leagtar amach thíos:

(110)

An chéad leasú ar Chomhaontú K an 25 Feabhra 2010, síníodh an 23 Meitheamh 2010 é. Tá nasc idir an leasú sin agus gealltanas Ryanair bealach a oibriú idir La Rochelle agus Corcaigh. Faoin gcomhaontú sin, ghlac AMS air féin síneadh suas le 70 lá a chur leis an tréimhse ina mbeidh nasc le suíomh gréasáin arna roghnú ag CCI curtha ar taispeáint ar shuíomh gréasáin Ryanair, www.ryanair.com, ar shuim EUR […].

(111)

Faoin gcomhaontú sin a síníodh an 11 Feabhra 2011, ghlac AMS air féin seirbhísí margaíochta éagsúla a sholáthar ar shuim EUR […], lena sonrascadh ar chostas bliantúil EUR […]. Áiríodh orthu sin:

(112)

An tríú leasú ar Chomhaontú K an 25 Feabhra 2010, síníodh é in 2011. Faoin gcomhaontú sin, ghlac AMS air féin seirbhísí margaíochta éagsúla a sholáthar ar shuim EUR […], le sonrascadh ar chostas EUR […] sa chéad bhliain agus EUR […] sa dara bliain.

(113)

Ba iad seo a leanas na seirbhísí sa chéad bhliain (ón 31 Márta 2011 go dtí an 31 Deireadh Fómhair 2011):

(114)

Ba iad seo a leanas na seirbhísí sa dara bliain (ón 31 Márta 2012 go dtí an 31 Deireadh Fómhair 2012):

(115)

I gcinneadh an 27 Márta 2008 maidir le muirir a cuireadh faoi bhráid Cocoeco, leagtar amach dreasachtaí chun bealaí sceidealaithe nua a sheoladh. Sa chinneadh praghsála sin, déantar foráil maidir le lascainí céimlaghdaitheacha ar mhuirir aerloingseoireachta, atá teoranta do 3 bliana i gcás seoladh bealaí nua nó oibriú leanúnach bealaí atá ann cheana i rith shéasúr sceidealaithe an gheimhridh. Leagtar amach sa chinneadh praghsála na coinníollacha chun na lascainí sin a dheonú:

(116)

Na lascainí atá ar fáil faoi na bearta dreasachta sin, leagtar amach iad i dTábla 10 thíos.

Tábla 10

Lascainí ar mhuirir aerfoirt dá ndéantar foráil faoi chinneadh praghsála an 27 Márta 2008

(117)

An 4 Iúil 2008, thug CCI comhaontú maidir le muirir aerfoirt i gcrích leis an aerlíne Jet2 lenar cumhdaíodh tréimhse 3 bliana agus a raibh feidhm chúlghabhálach aige ón 12 Bealtaine 2008 maidir le seirbhísí go Dún Éideann agus Leeds (23).

(118)

Déantar foráil sa chomhaontú sin freisin maidir le deonú lascainí móra ar mhuirir aerfoirt, a chomhfhreagraíonn dóibh siúd a leagtar amach i dTábla 10. Thiomnaigh Jet2 do 2 000 suíochán ar a laghad a chur ar fáil le haghaidh gach séasúir, agus laghdófaí na lascainí go 5 % an bhliain dár gcionn mura ndéanfaí é sin.

(119)

Faoin gcomhaontú sin, dhéanfadh CCI ‘ranníocaíocht chun tacú le margaíocht’ dar luach EUR […] i mbliain 1 (2008), agus d’íocfadh sé ranníocaíocht mhargaíochta i mblianta 2 agus 3 (2009 agus 2010 go teoiriciúil), agus dhéanfaí méid na ranníocaíochta sin a choigeartú ‘ar bhonn an sceidil eitiltí’. Faoin gcomhaontú, d’fhéadfaí méid na ranníocaíochta margaíochta a choigeartú trí bhíthin leasú bunaithe ar an lódfhachtóir arna bhaint amach agus ar fhorbairtí maidir leis an sceideal eitiltí. Le go n-íocfaí an ranníocaíocht, sonraítear sa chomhaontú go raibh ceangal ar Jet2 sonrasc a chur isteach agus doiciméid tacaíochta ag gabháil leis (plean margaíochta, sonraisc ar ghníomhaíochtaí bolscaireachta a rinneadh). Thairis sin, le bheith incháilithe ar an gcabhair, ghlac Jet2 air féin 2 000 suíochán ar a laghad in aghaidh an bhealaigh a chur ar fáil le haghaidh gach séasúir earraigh/samhraidh de IATA. Faoin gcomhaontú, ní bheadh Jet2 incháilithe ar an ranníocaíocht mhargaíochta don bhliain chomhfhreagrach a fháil dá mba rud é nár baineadh amach an líon suíochán dá dtagraítear thuas le linn na tréimhse i gceist.

(120)

Ina litir dar dáta an 30 Lúnasa 2011, chuir an Fhrainc an Coimisiún ar an eolas gur íoc CCI suim EUR […] in 2008 agus 2009, ach nár íoc CCI aon rud le Jet2 in 2010.

(121)

Cumhdaítear le himscrúdú an Choimisiúin na comhaontuithe maidir le muirir aerfoirt idir CCI agus Flybe agus Aer Arann:

(122)

Déantar foráil sa dá chomhaontú sin maidir le deonú lascainí móra ar mhuirir aerfoirt, a chomhfhreagraíonn dóibh siúd a leagtar amach i dTábla 10. Faoin dá chomhaontú, thiomnaigh na haerlínte do 2 000 suíochán ar a laghad a chur ar fáil le haghaidh gach séasúir, agus laghdófaí na lascainí go 5 % an bhliain dár gcionn mura ndéanfaí é sin.

(123)

De réir na Fraince, deonaíodh na lascainí i gcomhréir leis na coinníollacha a leagtar amach sa chinneadh praghsála maidir le muirir an 27 Márta 2008.

(124)

De réir thuarascáil CRC, sheol Buzz, fochuideachta de chuid KLM, an chéad bhealach ísealchostais idir La Rochelle agus aerfort Stansted Londan thiar in earrach 2001 (24). Sonraítear i dtuarascáil CRC go raibh Buzz faoi réir muirir aerfoirt i gcomhréir leis na cártaí rátaí i bhfeidhm ag an am. Sonraítear freisin i dtuarascáil CRC gur thairbhigh Buzz de bhearta bolscaireachta agus de chaiteachas cumarsáide a raibh EUR 59 068,51 san iomlán i gceist leo in 2001 agus 2002. Ar deireadh, sonraítear i dtuarascáil CRC gur ghlac Ryanair an bealach sin ar láimh go héifeachtach in 2003, agus sheol CRC sonrasc chuig Ryanair le haghaidh a chuid seirbhísí faoi na coinníollacha céanna a bhí i bhfeidhm maidir le Buzz go dtí deireadh na bliana.

(125)

Cuireann an Fhrainc in iúl go ndearnadh aon chomhaontú amháin, comhaontú an 8 Samhain 2002, le Buzz. Maidir le comhaontú seirbhísí aerfoirt an 8 Samhain 2002 idir CCI agus Buzz, baineann sé leis na seirbhísí sceidealaithe arna n-oibriú ag Buzz chuig aerfort La Rochelle agus leis na coinníollacha maidir le húsáid an bhonneagair, lenar cumhdaíodh tréimhse 3 bliana.

(126)

Maidir leis na bearta bolscaireachta agus leis an gcaiteachas cumarsáide a bhaineann le Buzz dá dtagraítear i dtuarascáil CRC, cuireann an Fhrainc in iúl freisin go mbaineann siad le gníomhaíochtaí cumarsáide a tugadh i gcrích le Maison de la France seachas le Buzz. Ar an gcaoi sin, de réir CCI, ní dhearnadh aon íocaíocht mhargaíochta le Buzz.

(127)

Luaitear i dtuarascáil CRC gur ‘iarr easyJet EUR […] mar thacaíocht mhargaíochta’ le haghaidh an bhealaigh go Briostó in 2006, agus líomhnaítear go raibh an tacaíocht sin, tráth a cuireadh an tuarascáil i gcrích, faoi réir comhaontú briathartha.

(128)

Cuireann an Fhrainc in iúl freisin, contrártha leis an bhfaisnéis atá i dtuarascáil CRC, nach bhfuair easyJet aon mhaoiniú le haghaidh seirbhísí margaíochta ná fógraíochta. De réir na Fraince, bíodh is gur pléadh féidearthacht na ranníocaíochta sin go neamhfhoirmiúil le linn na caibidlíochta idir an t-aerfort agus easyJet, níor tugadh é sin chun críche riamh agus dá bhrí sin níor tugadh aon chomhaontú maidir le tacaíocht mhargaíochta i gcrích le easyJet.

(129)

Mheas an Coimisiún gur ghá an nós imeachta imscrúdaithe foirmiúil a thionscnamh, ar thaobh amháin, chun féachaint ar na ranníocaíochtaí airgeadais go léir a rinne na húdaráis phoiblí agus na comhlachtaí poiblí éagsúla go léir le CCI, oibreoir aerfort La Rochelle, idir 2001 agus dáta an chinnidh tosaigh, a dtugtar tuairisc orthu i roinn 3.1, agus, ar an taobh eile, chun measúnú a dhéanamh ar chabhair a d’fhéadfadh a bheith deonaithe do na haerlínte faoi na comhaontuithe go léir idir CCI agus na haerlínte, a dtugtar tuairisc orthu i roinn 3.2.2, idir 2001 agus dáta an chinnidh tosaigh (8 Feabhra 2012).

(130)

Tar éis dó anailís a dhéanamh ar na ranníocaíochtaí airgeadais a rinneadh le CCI, oibreoir aerfort La Rochelle, chuir an Coimisiún a thuairim in iúl maidir le cabhair a d’fhéadfadh a bheith ann de réir bhrí Airteagal 107(1) CFAE agus an t-amhras a bhí air maidir le comhoiriúnacht aon chabhrach leis an margadh inmheánach, de réir bhrí Airteagal 107(3)(c) CFAE.

(131)

Shonraigh údaráis na Fraince gurbh é ba chuspóir le cuid den mhaoiniú a dheonaigh an stát costais tascanna sainchúraim phoiblí a chumhdach nár ghníomhaíocht eacnamaíoch de réir bhrí Airteagal 107(1) CFAE iad. Mar sin féin, ní féidir maoiniú den sórt sin a úsáid ach amháin chun na costais a eascraíonn as na tascanna sin a chumhdach, agus ní féidir é a leithdháileadh ar ghníomhaíochtaí eacnamaíocha eile (25). Mheas an Coimisiún nach raibh a dhóthain faisnéise aige ar chineál beacht chostais na dtascanna sainchúraim phoiblí agus nárbh fhéidir leis ach an oiread a chur as an áireamh gur thairbhigh an t-aerfort de na costais sin a bheith cumhdaithe.

(132)

Shonraigh an Fhrainc freisin nár bhuntáiste de réir bhrí Airteagal 107(1) CFAE a bhí sa mhaoiniú i gceist. Measann an Fhrainc freisin gur seirbhís lena ngabhann leas eacnamaíoch ginearálta é bainistíocht aerfort La Rochelle ar an iomlán. Dá bhrí sin, d’fhéach an Coimisiún ar na bearta tacaíochta airgeadais le haghaidh CCI i bhfianaise chásdlí Altmark (26). Mheas an Coimisiún nár léirigh an Fhrainc gur comhlíonadh aon cheann de na ceithre choinníoll a leagtar amach i mbreithiúnas Altmark; ní mór na critéir sin a chomhlíonadh chun a chur as an áireamh gur ann do bhuntáiste agus costais a eascraíonn as seirbhís lena ngabhann leas eacnamaíoch ginearálta á gcúiteamh.

(133)

Maidir le comhoiriúnacht na ranníocaíochtaí airgeadais a rinneadh le CCI i bhfianaise phrionsabal oibreoir an gheilleagair margaidh, níorbh fhéidir leis an gCoimisiún a chur as an áireamh gur bhronn na ranníocaíochtaí airgeadais i gceist buntáiste roghnaitheach ar CCI le linn na tréimhse iomláine a chumhdaítear leis an gCinneadh. Dá dhroim sin, níorbh fhéidir leis a chur as an áireamh gur státchabhair a bhí sna bearta sin.

(134)

Shonraigh an Coimisiún nach raibh aon fhianaise aige lena gcuirfí ar a chumas dó a mheas gur bhrabúsach ó thaobh airgeadais de na fóirdheontais bhonneagair ó chomhlachtaí poiblí nó gurbh ann d’aon choinne le toradh airgeadais.

(135)

Maidir leis an bhfóirdheontas chun tascanna sainchúraim phoiblí a mhaoiniú, bhí amhras ar an gCoimisiún, mar a míníodh thuas, maidir le cineál beacht na gcostas a d’íoc an Stát agus a bhaineann, de réir údaráis na Fraince, le feidhmiú cumhachtaí údaráis phoiblí.

(136)

Mheas an Coimisiún, agus a mheasúnú á bhunú ar thuarascáil CRC, maidir le haistrithe airgeadais áirithe a rinneadh idir cuntais rannóg ghinearálta CCI agus cuntais a rannóige aerfoirt, nár léir go ndearnadh na haistrithe sin mar idirbhearta tráchtála, agus mar idirbhearta tráchtála amháin.

(137)

Ar an gcéad dul síos, dhealródh sé go ndearna rannóg ghinearálta CCI sonrascadh ró-íseal ar chuid de na seirbhísí a sholáthair sí don aerfort, mar ní léirítear fíorchostas na seirbhísí sin i gcuntais an aerfoirt. Níor chuir an Coimisiún as an áireamh go bhféadfadh sé gur chun an caillteanas a thabhaigh an t-aerfort idir 2001 agus 2006 a mhaolú a rinneadh an sonrascadh ró-íseal líomhnaithe.

(138)

Ansin, dealraíonn sé gur maoiníodh oibriú an aerfoirt trí bhíthin airleacain in-aisíoctha, arna n-íoc ó bhuiséad ginearálta CCI lena gcuntais aerfoirt, agus dealraíonn sé gur acmhainní airgeadais arna ndeonú ar chostas nialasach atá iontu sin.

(139)

Mheas an Coimisiún freisin gur dhealraigh sé gur mhó na méideanna a íocadh le CCI ar bhainistíocht agus ar oibriú aerfort Rochefort ná a mbeadh coinne leis faoi ghnáthdhálaí an mhargaidh, i bhfianaise na heaspa tráchta ag an aerfort.

(140)

Thairis sin, as an méid a fuair aerfort La Rochelle as soláthar na seirbhísí sin, níor chumhdaigh EUR 40 000 na costais a thabhaigh CCI chun na seirbhísí a sholáthar, ach ‘táille soláthraí seirbhíse’ a bhí ann atá cothrom le meánráta 16 % den mhéid iomlán a sonrascadh le haghaidh na seirbhísí sin.

(141)

Maidir leis na ranníocaíochtaí airgeadais i dtreo oibriú bealaí áirithe a d’íoc údaráis phoiblí éagsúla le CCI, cheistigh an Coimisiún cibé acu ar íocaíochtaí leis an aerfort a bhí sna bearta sin, ó tharla go ndeachaigh na híocaíochtaí trí chuntais an aerfoirt, nó ar chabhair leis na haerlínte i gceist a bhí iontu.

(142)

Chuir an Coimisiún Treoirlínte 2005 i bhfeidhm chun measúnú a dhéanamh ar chomhoiriúnacht na mbeart infheistíochta leis an margadh inmheánach (27). Mheas an Coimisiún nach raibh an fhaisnéis go léir aige a bhí de dhíth air chun measúnú a dhéanamh ar chomhoiriúnacht na mbeart i gceist de réir na gcritéar i dTreoirlínte 2005.

(143)

Bhí amhras ar an gCoimisiún freisin maidir lena comhoiriúnaí a bhí an róchúiteamh féideartha ar thascanna sainchúraim phoiblí agus an deonú féideartha cabhrach oibriúcháin le CCI ó thaobh an mhargaidh inmheánaigh de.

(144)

Maidir leis an measúnú ar na bearta i bhfabhar na n-aerlínte, chuir an Coimisiún a thuairim in iúl freisin maidir le cabhair a d’fhéadfadh a bheith ann de réir bhrí Airteagal 107(1) CFAE agus an t-amhras a bhí air maidir le comhoiriúnacht na cabhrach sin leis an margadh inmheánach, de réir bhrí Airteagal 107(3)(c) CFAE.

(145)

Rinne an Coimisiún measúnú ar bhuntáiste roghnaitheach a bheith sna comhaontuithe a tugadh i gcrích leis na haerlínte trí scrúdú a dhéanamh ar cé acu, in imthosca comhchosúla, a bheadh nó nach mbeadh comhaontuithe tráchtála comhchosúil leo siúd a thug CCI i gcrích déanta ag oibreoir aerfoirt príobháideach agus é ag oibriú faoi ghnáthdhálaí eacnamaíocha margaidh.

(146)

Ar dtús, thug an Coimisiún faoi deara, le linn na tréimhse faoi imscrúdú, go raibh caillteanas i gceist le hoibríocht an aerfoirt i ngach bliain airgeadais agus, de réir thuarascáil CRC (28), go ndearnadh idirdhealú idir na haerlínte difriúla leis na muirir a chuir an t-aerfort i bhfeidhm (29). Ar na cúiseanna sin uile, tá amhras ar an gCoimisiún cé acu a ghníomhaigh nó nár ghníomhaigh an t-aerfort mar infheisteoir stuama ina dhéileálacha tráchtála leis na haerlínte a fhreastalaíonn ar aerfort La Rochelle.

(147)

Chun a chinneadh ar ghníomhaigh oibreoir an aerfoirt mar infheisteoir stuama i ngeilleagar an mhargaidh agus ionchas na mbrabús á spreagadh (30), mheas an Coimisiún nár mhór measúnú a dhéanamh ar na comhaontuithe a tugadh i gcrích le haghaidh gach tréimhse a bhí i gceist, ag breathnú ar an tráth a síníodh iad.

(148)

Mheas an Coimisiún nár mhór measúnú a dhéanamh ar na comhaontuithe seirbhísí aerfoirt agus na comhaontuithe seirbhísí margaíochta in éineacht le chéile, toisc go raibh Ryanair agus AMS ina dtairbhí aonair de na bearta a bhí i gceist. Thairis sin, mheas an Coimisiún go raibh síniú na gcomhaontuithe seirbhísí margaíochta coinníollach ar na comhaontuithe seirbhísí aerfoirt a bheith á dtabhairt i gcrích, agus gurbh é an t-aon tairbhe lena raibh coinne ó na comhaontuithe seirbhísí margaíochta go dtiocfadh méadú ar an líon paisinéirí de chuid Ryanair a bheadh ag úsáid an aerfoirt.

(149)

Chuir an Coimisiún amhras in iúl maidir le cé acu a d’iompair nó nár iompair oibreoir an aerfoirt, trí na comhaontuithe seirbhísí aerfoirt agus na comhaontuithe seirbhísí margaíochta a shíniú, mar oibreoir stuama i ngeilleagar an mhargaidh a raibh beartas struchtúrach á shaothrú aige, bíodh an beartas sin ina bheartas ginearálta nó de réir earnála, agus maidir le cé acu a spreag nó nár spreag ionchas na mbrabús sa mheántéarma agus san fhadtéarma é. Thug an Coimisiún dá aire nach raibh aon staidéar margaidh agus/ná plean gnó a bhain leis na comhaontuithe éagsúla a síníodh le Ryanair/AMS agus lenar soláthraíodh an bonn cirt eacnamaíoch le cinneadh an aerfoirt gealltanais den sórt sin a dhéanamh le Ryanair/AMS.

(150)

De réir na Fraince, ba iad na tairbhí a thabharfadh na comhaontuithe don saol gnó agus turasóireachta sa réigiún an réasúnaíocht eacnamaíoch leis na comhaontuithe sin a thabhairt i gcrích. Mar sin féin, chuir an Coimisiún in iúl nárbh fhéidir breithnithe ó thaobh na forbartha réigiúnaí a chur san áireamh chun críocha thástáil an infheisteora stuama (31).

(151)

Bhí amhras ar an gCoimisiún faoi na muirir aerfoirt a cuireadh i bhfeidhm maidir le Ryanair, agus aird ar leith á tabhairt ar an gcomhaontú a síníodh an 10 Nollaig 2003, lenar deonaíodh díolúine do Ryanair ón muirear soilsithe rúidbhealaigh.

(152)

Thug an Coimisiún faoi deara go raibh baint ag eintitis phoiblí éagsúla le costas na gcomhaontuithe seirbhísí margaíochta a mhaoiniú. Mheas sé dá bhrí sin cé acu a bhí nó nach raibh sé iomchuí measúnú a dhéanamh ar iompar an aerfoirt i gcomhpháirt le hiompar an Stáit nó ar iompar na n-údarás poiblí eile a dhéanann maoirseacht ar oibreoir an aerfoirt nó a bhfuil baint acu i maoiniú oibreoir an aerfoirt.

(153)

Cheistigh an Coimisiún freisin cé acu a bhí nó nach raibh na seirbhísí láimhseála ar an talamh, a cumhdaíodh leis na comhaontuithe leantacha le Ryanair, go háirithe an comhaontú seirbhísí láimhseála ar an talamh idir Ryanair agus CCI an 10 Nollaig 2003, ann le fírinne. Ina fhreagra dar dáta an 30 Lúnasa 2011, luaigh an Fhrainc nár sholáthair CCI aon seirbhís láimhseála ar an talamh.

(154)

Ar na cúiseanna sin uile, mheas an Coimisiún go raibh amhras air maidir le cé acu a ghníomhaigh nó nár ghníomhaigh an t-aerfort agus na heintitis phoiblí a ranníoc nó a bhí ag ranníoc le costais oibriúcháin Ryanair mar infheisteoir stuama i ngeilleagar an mhargaidh trí na comhaontuithe atá faoi imscrúdú a thabhairt i gcrích.

(155)

Thug an Coimisiún faoi deara maidir leis na comhaontuithe a síníodh leis na haerlínte Jet2, Flybe agus Aer Arann, gur eascair lascainí substaintiúla ar mhuirir astu (32) agus, de réir na Fraince, gur cuireadh na lascainí sin i bhfeidhm ar bhealach neamh-idirdhealaitheach maidir leis na haerlínte uile a chomhlíon na critéir a leagtar amach sa chinneadh maidir le praghsáil an 27 Márta 2008 (féach roinn 3.3.2.2).

(156)

Mar sin féin, thug an Coimisiún dá aire, mar a luaigh an Fhrainc, go raibh caillteanas á dhéanamh ag an aerfort le linn na tréimhse faoi imscrúdú. Ríomhadh brabúsacht na ndreasachtaí sin ar bhonn na gcostas oibriúcháin measta, rud lenar baineadh de na haerlínte an oibleagáid chun ranníoc le maoiniú an bhonneagair a bhí á úsáid. Mheas an Coimisiún dá bhrí sin gur dhócha go mbainfeadh na dreasachtaí sin ioncam oibriúcháin den aerfort a bhí ríthábhachtach chun a inmharthanacht airgeadais a áirithiú.

(157)

Mar fhreagairt ar iarraidh ar fhaisnéis bhreise, thagair an Fhrainc do mhéideanna a íocadh le Jet2 in 2009 a raibh EUR […] san iomlán i gceist leo le haghaidh a chuid seirbhísí margaíochta. Thairis sin, luaitear i dtuarascáil CRC ‘gur iarr easyJet EUR […] mar thacaíocht margaíochta’ le haghaidh an bhealaigh go Briostó in 2006 (33), agus gur thairbhigh Buzz de bhearta bolscaireachta agus de chaiteachas cumarsáide dar luach EUR 59 068,51 san iomlán in 2001 agus 2002.

(158)

Mheas an Coimisiún nach raibh dóthain faisnéise ar fáil dó lenar taispeánadh nár chabhair iad na méideanna a íocadh, ná go ndearnadh na híocaíochtaí de réir phrionsabal an infheisteora stuama agus gur chomhfhreagair na seirbhísí margaíochta, a tugadh mar mhalairt ar na híocaíochtaí sin, do na méideanna a íocadh.

(159)

Mheas an Coimisiún gur cheart measúnú a dhéanamh ar chomhoiriúnacht na mbeart a deonaíodh tar éis fhoilsiú Threoirlínte 2005 i bhfianaise na dTreoirlínte sin, agus gur cheart measúnú a dhéanamh ar chomhoiriúnacht na mbeart a deonaíodh roimh fhoilsiú na dTreoirlínte i gcomhréir le cleachtas cinnteoireachta an Choimisiúin an tráth a deonaíodh na bearta. Mar sin féin, thug an Coimisiún faoi deara freisin, trí Threoirlínte 2005 a ghlacadh, gur chomhdhlúthaigh sé a chleachtas cinnteoireachta maidir le measúnú a dhéanamh ar chomhoiriúnacht na cabhrach arna deonú d’oibreoirí aerfoirt agus gurbh infheidhme na critéir a leagtar amach sna Treoirlínte maidir le bearta a deonaíodh sular foilsíodh na Treoirlínte freisin.

(160)

Mheas an Coimisiún, i bhfianaise na faisnéise a bhí ar fáil dó, go raibh amhras fós air maidir le comhoiriúnacht na mbeart i bhfabhar na n-aerlínte leis an margadh inmheánach.

(161)

Fuair an Coimisiún barúlacha ó na páirtithe leasmhara seo a leanas:

(162)

Tagann na barúlacha a rinne CCI tar éis na mbarúlacha sin a sheol an Fhrainc an 12 Aibreán 2012, agus sholáthair CCI faisnéis bhreise i leith na mbarúlacha de chuid na Fraince.

(163)

Ar dtús, measann CCI nár dhócha go ndéanfadh na bearta a scrúdaigh an Coimisiún difear don iomaíocht, ós rud é nár thairg ceachtar den dá aerfort atá lonnaithe sa cheantar le haghaidh aerfort La Rochelle (Rochefort/Saint-Aignan agus Niort) eitiltí tráchtála. Ní aontaíonn CCI leis an dearbhú go bhfuil aerfort Angoulême sa cheantar céanna agus atá aerfort La Rochelle, ós rud é go bhfuil sé lonnaithe 2 uair an chloig ar shiúl uaidh le gluaisteán.

(164)

Maidir le cabhair infheistíochta, measann CCI gur cuireadh cuid den chabhair infheistíochta atá faoi imscrúdú in áirithe le haghaidh tascanna sainchúraim phoiblí a bhaineann le sábháilteacht agus slándáil agus nach Státchabhair í dá thoradh sin. Tá feidhm aige sin maidir leis na tascanna agus leis an mbonneagar a mhaoinítear leis an muirear slándála agus leis an mbonneagar a úsáidtear le haghaidh na ngníomhaíochtaí neamheacnamaíocha seo a leanas: seicphointe slándála/scagtha, seiceálacha custaim agus an haingear ina soláthraítear spás páirceála le haghaidh trí fheithicil chomhraicthe dóiteáin.

(165)

Measann CCI freisin go bhfuil seirbhís lena ngabhann leas eacnamaíoch ginearálta (‘SGEI’) curtha ar a iontaoibh. Faoi Airteagal L.170-1 den Chód Tráchtála, cuirtear forbairt eacnamaíoch, tarraingteacht agus pleanáil spásúil an limistéir ar iontaoibh CCI, agus rannchuidíonn bainistíocht an aerfoirt ar a chríoch leis na haidhmeanna sin a bhaint amach. Cuireann CCI an fíoras i dtábhacht go bhfuil La Rochelle ar an iargúil. Is é an t-aon cheirtleán uirbeach de chuid na Fraince é a bhfuil breis agus 150 000 áitritheoir ann nach bhfreastalaíonn mótarbhealach air. Ina theannta sin, níl nasc iarnróid ardluais aige, ná níl aon phlean ann go dtógfar nasc den sórt sin, agus tógann sé breis agus 3 uair an chloig Páras a shroicheadh leis an traein faoi láthair.

(166)

Ina mhalairt de chás, measann CCI gur cheart a mheas gur cabhair chomhoiriúnach é maoiniú an bhonneagair i bhfianaise chleachtais an Choimisiúin idir 2000 agus 2005 agus i bhfianaise Threoirlínte 2005.

(167)

A mhéid a bhaineann le sonrascadh ró-íseal ar sheirbhísí arna soláthar ag rannóg ghinearálta CCI do CCI-Aerfort, cuireann CCI i dtábhacht go gcomhthiomsaítear soláthar na seirbhísí atá i gceist le haghaidh rannóga éagsúla CCI agus gur de chineál struchtúrach iad na seirbhísí (cuntasaíocht, TF, acmhainní daonna), agus go ndáiltear a gcostas i measc rannóga uile CCI. Bheadh coinne leis dá bhrí sin nach bhfuil loighic thráchtála mar bhonn taca faoi shonrascadh na seirbhísí agus go bhfuil na méideanna arna sonrascadh níos ísle ná a bheidís le haghaidh eagraíocht sheachtrach. De réir CCI, tá sé sin i gcomhréir le cásdlí na Cúirte, a ghlacann leis nach leanann soláthar na seirbhísí d’eintitis laistigh den líonra céanna cur chuige tráchtála amháin i gcónaí (34).

(168)

Maidir le róshonrasc na seirbhísí arna soláthar d’aerfort Rochefort/Saint-Agnant, is é tuairim CCI nach sonrascadh breise atá sna méideanna a chonspóidtear, fiú cé gur mhó an trácht ná an líon eitiltí a leagtar amach sna sonraíochtaí le haghaidh na seirbhísí.

(169)

A mhéid a bhaineann leis na hairleacain in-aisíoctha, áitíonn CCI nach féidir iad a mheas mar fhóirdheontais, ós rud é gurb iasachtaí iad a gceanglaítear ar an aerfort iad a aisíoc. Is amhlaidh gur mhaoiniú iad na hairleacain a aistríodh ó aon cheannteideal buiséid inmheánaigh amháin de chuid CCI chuig ceannteideal buiséid inmheánaigh eile, rud a mhíníonn an fáth nár muirearaíodh aon ús. Thairis sin, measann CCI gur ghníomhaigh sé mar a dhéanfadh oibreoir príobháideach trí aghaidh a thabhairt ar riachtanais leachtachta a aerfoirt.

(170)

Dá bhrí sin, is é tuairim CCI, fiú dá mba rud é go measfadh an Coimisiún gur Státchabhair é an maoiniú le haghaidh oibríochtaí, gur cheart a mheas gur chabhair chomhoiriúnach an maoiniú sin bunaithe ar Threoirlínte 2014.

(171)

A mhéid a bhaineann leis na comhaontuithe idir an t-aerfort agus na haerlínte, ar dtús, measann CCI nach féidir na comhaontuithe a mheas mar chomhaontuithe atá inchurtha i leith an Stáit ar bhonn na gcritéar a leagtar amach i mbreithiúnas Stardust (35).

(172)

Measann CCI freisin nár sháraigh an praghas a d’íoc an t-aerfort ina chomhaontuithe seirbhísí margaíochta praghas an mhargaidh. Tugann sé faoi deara go háirithe go raibh an praghas a d’íoc aerfort La Rochelle as a chuid seirbhísí margaíochta i gcomhréir le praghas an mhargaidh, nó faoina bhun fiú, agus go raibh sé bunaithe ar an gcárta rátaí atá ar fáil ar shuíomh gréasáin AMS.

(173)

Measann CCI gur tugadh na comhaontuithe le AMS i gcrích agus an bhrabúsacht á saothrú, toisc go gcuirfí feabhas ar tharraingt an aerfoirt agus ar a chaidreamh foriomlán le Ryanair leis na comhaontuithe. Is é tuairim CCI maidir le plean gnó 2003-2018, lenar cuireadh san áireamh costais mhargaíochta chun measúnú a dhéanamh ar chaidreamh an aerfoirt le Ryanair, go dtaispeánann an plean go raibh ionchas fadtéarmach leis an mbrabúsacht ann.

(174)

Maidir leis na muirir aerfoirt a d’íoc na haerlínte éagsúla, cuireann CCI in iúl go mínítear díolúine Ryanair ón muirear soilsithe leis an bhfíoras nach n-oibríonn an aerlíne ach eitiltí le linn an lae, rud a chiallaíonn nach mbíonn gá le soilsiú.

(175)

A mhéid a bhaineann leis na lascainí ar mhuirir aerfoirt a deonaíodh d’aerlínte áirithe, measann CCI gurbh é an t-aon aidhm amháin a bhí leis na lascainí go seolfaí bealaí nua agus go raibh na lascainí teoranta ó thaobh ama de agus neamh-idirdhealaitheach. Thairis sin, tugann sé faoi deara go raibh tionchar dearfach ag na muirir aerfoirt ar bhrabúsacht an aerfoirt.

(176)

A mhéid a bhaineann leis na méideanna a íocadh le Jet2 ar sheirbhísí margaíochta, cuireann CCI an réasúnaíocht chéanna i bhfeidhm agus a leagtar amach thuas i leith Ryanair agus AMS. Cuireann CCI in iúl, contrártha leis na maímh a rinne CRC ina thuarascáil, nach bhfuair easyJet aon luach saothair as seirbhísí margaíochta.

(177)

Maidir leis na ranníocaíochtaí airgeadais a rinne eintitis phoiblí i dtreo oibriú na mbealaí eitilte, ní aontaíonn CCI leis an tuairim gur cuireadh maoiniú comhaontuithe margaíochta ó údaráis áitiúil san áireamh i bplean gnó an aerfoirt. Ina thuairimsean, chláraigh na húdaráis áitiúla atá i gceist na comhaontuithe seirbhísí margaíochta sin i gcomhthéacs na dtascanna leasa ghinearálta dá gcuid chun a limistéar áitiúil a chur chun cinn.

(178)

Ní aontaíonn Ryanair le hanailís an Choimisiúin sa chinneadh tosaigh. Measann Ryanair gur cheart don Choimisiún an modh comparáideach a úsáid agus tástáil an infheisteora stuama á déanamh. Sholáthair Ryanair roinnt staidéir airgeadais freisin bunaithe ar an modh comparáideach agus é d’aidhm acu a léiriú go raibh na comhaontuithe seirbhísí aerfoirt a tugadh i gcrích idir Ryanair agus aerfort La Rochelle i gcomhréir le prionsabal oibreoir an gheilleagair margaidh.

(179)

Cáineann Ryanair cinneadh an Choimisiúin freisin chun measúnú a dhéanamh ar na comhaontuithe le Ryanair agus AMS i gcomhpháirt le chéile. Diúltaíonn Ryanair an tuairim freisin go raibh na bearta a chuir CCI chun feidhme inchurtha i leith an Stáit nó gur bhain úsáid acmhainní Stáit leo.

(180)

Ina theannta sin, sholáthair Ryanair staidéar eacnamaíoch lenar féachadh a léiriú go raibh na comhaontuithe a shínigh Ryanair le haerfort La Rochelle i gcomhréir le prionsabal oibreoir an gheilleagair mhargaidh agus úsáid á baint as an modh anailíse brabúsachta incrimintí ex ante. De réir an staidéir sin, níor cheart an anailís a theorannú do ré iarbhír na gcomhaontuithe ach ba cheart a ré theoiriciúil a chur san áireamh freisin, agus aon rogha chun síneadh a chur leis na comhaontuithe, dá ndéantar foráil sna comhaontuithe féin, á cur san áireamh. Tá an staidéar bunaithe ar na meánathruithe ar fhigiúirí tráchta Ryanair ag roinnt aerfort eile a n-oibríonn sé eitiltí uathu.

(181)

Measann Ryanair freisin go bhfuil praghsanna AMS i gcomhréir le praghsanna an mhargaidh agus go bhfuil an cinneadh ag aerfort poiblí chun seirbhísí AMS a cheannach i gcomhréir le tástáil an oibreora sa gheilleagar margaidh.

(182)

Sholáthair Ryanair tuarascáil eacnamaíoch freisin lenar féachadh a léiriú go raibh na comhaontuithe a tugadh i gcrích le Ryanair agus AMS i gcomhréir le prionsabal oibreoir an gheilleagair margaidh agus anailís á déanamh orthu in éineacht le chéile (cur chuige a chonspóideann Ryanair).

(183)

Ar deireadh, cáineann Ryanair an measúnú a rinne an Coimisiún ar na comhaontuithe seirbhísí margaíochta le AMS inarbh é an t-aon luach amháin a bhaineann leo méadú ionchasach ar an líon paisinéirí a thaistealaíonn le Ryanair agus na comhaontuithe i bhfeidhm, rud nach dtugann aon luach intreach dóibh tar éis dóibh dul in éag. De réir Ryanair, gineann na comhaontuithe seirbhísí aerfoirt agus na comhaontuithe seirbhísí margaíochta ioncam incriminteach agus iad i bhfeidhm agus luach deiridh tar éis dóibh dul in éag. Is é an luach intreach a bhaineann leis na comhaontuithe seirbhísí margaíochta go dtiocfaidh méadú ar an trácht chuig an aerfort tar éis dóibh dul in éag, de thoradh cáil fheabhsaithe a bheith air.

(184)

Ní aontaíonn AMS le hanailís an Choimisiúin ach oiread. Ar an gcéad dul síos, measann AMS nach bhfuil na tairbhí lena bhfuil coinne ó na comhaontuithe seirbhísí margaíochta dá chuid le haghaidh aerfort teoranta go díreach do mhéadú ar an líon paisinéirí a thaistealaíonn le Ryanair agus dó sin amháin. De réir AMS, cuairteoirí chuig suíomh gréasáin Ryanair ar dócha go mbeidh tionchar ag a chuid fógraíochta orthu, ní custaiméirí Ryanair iad go heisiach agus is dócha go dtaistealóidh siad le haerlínte eile chomh maith céanna. Tugann AMS faoi deara freisin maidir le comhaontú seirbhísí margaíochta a bheith idir aerfort ar leith agus Ryanair, nach mbíonn tionchar aige sin ar lódfhachtóir na n-aerárthaí dá chuid a oibríonn amach as an aerfort sin.

(185)

Ní aontaíonn AMS ach oiread le cinneadh an Choimisiúin chun measúnú a dhéanamh ar na comhaontuithe le Ryanair agus AMS i gcomhpháirt le chéile. Ar deireadh, míníonn AMS go gcuireann fógraíocht ar shuíomh gréasáin Ryanair ar chumas d’aerfoirt tuilleadh paisinéirí isteach a mhealladh, ar paisinéirí iad is dóchúla a chaithfidh airgead ná paisinéirí amach, agus a ioncam seach-aerloingseoireachta é a mhéadú dá réir.

(186)

Chuir roinnt daoine aonair agus an comhlachas Envol Vert an Coimisiún ar an eolas gur thacaigh siad leis an nós imeachta a seoladh agus gur shéan siad na fóirdheontais a fuair Ryanair. Cheistigh roinnt daoine aonair fíormhéid na dtairbhí eacnamaíocha a ghin aerfort La Rochelle.

(187)

Cuireann na páirtithe leasmhara eile uile i dtábhacht an rannchuidiú a rinne aerfort La Rochelle d’fhorbairt na turasóireachta agus an gheilleagair sa limistéar. Cuireann siad i dtábhacht go mbeadh tionchar dochrach ann dá ndúnfaí an t-aerfort, go háirithe, i gcás páirtithe leasmhara áirithe, maidir lena ngníomhaíocht eacnamaíoch féin.

(188)

Tarraingíonn CCI Angoulême anuas easnamh na hiomaíochta idir aerfoirt Angoulême agus La Rochelle.

(189)

Chuir CCI Poitou-Charentes a thacaíocht in iúl leis an rún ó Pharlaimint na hEorpa (36) maidir le todhchaí na n-aerfort réigiúnach agus na n-aersheirbhísí san Aontas Eorpach lena bhféachtar leis an ról atá ag aerfoirt réigiúnacha i bhforbairt geilleagar áitiúil a aithint.

(190)

Cuireann Réigiún Poitou-Charentes i dtábhacht nár íoc sé aon fhóirdheontas díreach leis an aerfort, ach le CCI amháin, chun a chur ar chumas dó a thascanna a dhéanamh go rathúil.

(191)

Measann UDOTSI go bhfuil sé ríthábhachtach cistiú a choinneáil ar bun lena gcuirtear ar chumas do na haerlínte a fhaigheann an cistiú sin a ngníomhaíochtaí a shaothrú agus a leathnú ag aerfort La Rochelle. Tugann UDOTSI faoi deara go dtitfeadh an leibhéal turasóireachta in Charente-Maritime de thoradh laghdú ar mhaoiniú, rud ag a mbeadh tionchar diúltach ar an ngeilleagar áitiúil.

(192)

Tugann Coiste Bailecheantair La Rochelle agus Roinn Charente-Maritime faoi deara go raibh na ranníocaíochtaí a thug siad do na feachtais mhargaíochta a rinneadh faoi na comhaontuithe margaíochta a tugadh i gcrích le CCI laistigh dá sainchúram agus i gcomhréir lena misean chun a limistéar áitiúil a chur chun cinn. Tugann an Coiste Bailecheantair faoi deara go ndeachaigh sé i gcomhar le CCI faoi chomhaontú margaíochta ginearálta lenar cuireadh ar a chumas tairbhiú de laghdú ar na rátaí a mhuirearaigh AMS. Ar deireadh, tugann an Coiste Bailecheantair faoi deara nach bhfuil aon leas díreach aige i mbainistíocht aerfort La Rochelle agus go measann sé dá bhrí sin nár cheart a rannpháirtíocht airgeadais a chuimsiú i bplean gnó an aerfoirt.

(193)

Áitíonn an Fhrainc gur seirbhísí leasa ghinearálta iad gníomhaíochtaí uile an aerfoirt (lena n-áirítear gníomhaíochtaí eitlíochta tráchtála), go háirithe forbairt ar gheilleagar agus turasóireacht an réigiúin, sa mhéid nach féidir aon mhéid arna dheonú d’oibreoirí an aerfoirt a mheas mar Státchabhair.

(194)

Níl an Fhrainc ar aon tuairim leis an gCoimisiún (37) i dtaca le hinfheidhmeacht chásdlí Aéroports de Paris (38) maidir leis na bearta tacaíochta bonneagair a deonaíodh roimh fhoilsiú Threoirlínte 2005. Measann sé gur cheart Treoirlínte 1994 (39) a chur i bhfeidhm, go háirithe pointe 12 díobh, ar dá mbua nach bhfuil cabhair bhonneagair faoi réir rialú Státchabhrach ón gCoimisiún. De réir na Fraince, maidir leis an bpointe lenar imíodh ón gcásdlí roimhe i mbreithiúnas Aéroports de Paris, inar sainaithníodh na gníomhaíochtaí le haerfort a bhainistiú agus a fheidhmiú mar ghníomhaíochtaí eacnamaíocha, bhain an pointe úd le mol mór Eorpach agus le saincheist dhlíthiúil nach raibh nasctha le maoiniú aerfoirt, agus nárbh fhéidir a mheas dá bhrí sin mar bhreithiúnas a bhí ceangailteach go díreach ar na Ballstáit maidir le maoiniú bonneagair aerfoirt, agus sa bhreis air sin, gur tugadh le fios go soiléir leis an aon téacs amháin a bhí i bhfeidhm an tráth sin, Treoirlínte 1994, gur bearta de bheartas eacnamaíoch ginearálta iad tionscadail bonneagair aerfoirt, atá lasmuigh de raon feidhme an rialaithe Státchabhrach. Thairis sin, measann an Fhrainc go raibh cleachtas an Choimisiúin i gcomhréir le Treoirlínte 1994 (40). I bhfianaise na héiginnteachta dlíthiúla sin, measann an Fhrainc gur ghníomhaigh sí i gcomhréir leis an aon doiciméad amháin ag a raibh feidhm dhlíthiúil an tráth sin, is é sin, Treoirlínte 1994.

(195)

Thairis sin, measann an Fhrainc nach dócha go ndéanfadh aon cheann de na bearta infheistíochta is ábhar díospóide difear don iomaíocht agus gur cheart iad a eisiamh ó raon feidhme imscrúdú an Choimisiúin dá bhrí sin.

(196)

De réir na Fraince, tá na hinfheistíochtaí i gcomhréir le prionsabal an infheisteora stuama i ngeilleagar an mhargaidh. Sonraíonn an Fhrainc go bhfuil bonn cirt leis na bearta infheistíochta éagsúla i ngeall ar fhadhbanna fadtéarmacha an aerfoirt maidir le hacmhainneacht neamh-leordhóthanach seirbhísí láimhseála. De réir na Fraince, chinn CCI aghaidh a thabhairt ar na srianta sin trí infheistíocht a dhéanamh in acmhainneacht seirbhísí láimhseála an aerfoirt a mhéadú. Áitíonn an Fhrainc gur le torthaí na staidéar réamhaisnéise agus na bpleananna gnó a tarraingíodh suas ex ante in 2000, 2002 agus 2008 a cinneadh na cinntí infheistíochta éagsúla go córasach. Bunaithe ar na staidéir sin, measann an Fhrainc gur ghníomhaigh CCI ar bhonn toimhdí réasúnacha agus é ag roghnú, trí chinneadh an 21 Feabhra 2003, cistiú a lorg ó na húdaráis phoiblí éagsúla dá dtagraítear thuas.

(197)

Measann an Fhrainc go raibh a infheistíochtaí teoranta agus, ó thaobh cúrsaí airgeadais de, go raibh cur chuige an aerfoirt iontach meáite i gcónaí agus infheistíochtaí á ndéanamh aige, toisc gur fhan sé go raibh pointe a sháithiúcháin bainte amach sular chinn sé obair a dhéanamh a tháinig chun bheith ríthábhachtach.

(198)

Ina mhalairt de chás, measann an Fhrainc, dá measfadh an Coimisiún gur Státchabhair iad na bearta atá faoi imscrúdú, gur cheart dó a mheas go bhfuil siad comhoiriúnach leis an margadh inmheánach, toisc gur deonaíodh na bearta chun tascanna lena ngabhann leas eacnamaíoch ginearálta a fheidhmiú, ar tascanna iad a chomhlíonann na coinníollacha a leagtar síos in Airteagal 106(2) CFAE. Is é tuairim údaráis na Fraince go bhféadfaí a mheas gur seirbhís lena ngabhann leas eacnamaíoch ginearálta é aerfort La Rochelle ar an iomlán ós rud é gurb iad a phríomh-thascanna a áirithiú go mbíonn an limistéar ar a bhfreastalaíonn sé inrochtana agus an fhorbairt shóisialta agus eacnamaíoch a chumasú agus an turasóireacht a spreagadh.

(199)

Ina mhalairt de chás sa bhreis air sin, áitíonn an Fhrainc go bhfuil an chabhair bhonneagair comhoiriúnach leis an margadh inmheánach faoi Threoirlínte 2005.

(200)

Ar an gcéad dul síos, measann an Fhrainc gur tascanna laistigh de shainchúram údaráis phoiblí iad seirbhísí comhraic dóiteáin aerárthaí agus seirbhísí coiscthe ar ghuaiseacha don fhiadhúlra atá fíor-riachtanach le haghaidh na sábháilteachta aerfoirt agus gur cheart iad a eisiamh ó raon feidhme imscrúdú an Choimisiúin maidir le haerfort La Rochelle dá bhrí sin.

(201)

Sonraíonn an Fhrainc freisin nach dócha go ndéanfaidh an maoiniú a deonaíodh d’aerfort La Rochelle difear don iomaíocht de réir bhrí Airteagal 107(1) CFAE agus dá réir sin nach Státchabhair iad na bearta ar a ndearnadh measúnú.

(202)

Ina mhalairt de chás, measann an Fhrainc, dá measfadh an Coimisiún gur Státchabhair iad na bearta atá faoi imscrúdú, gur cheart dó a mheas go bhfuil siad comhoiriúnach leis an margadh inmheánach i bhfianaise Threoirlínte 2014.

(203)

Tugann an Fhrainc faoi deara go raibh an scéim lascainí ag a raibh feidhm maidir le Jet2, Flybe agus Aer Arann céimlaghdaitheach, go raibh teorainn ama léi agus gur cuireadh i bhfeidhm í maidir le haon aerlíne a chomhlíon na coinníollacha a leagtar amach sa chinneadh ó CCI maidir le muirir an 27 Márta 2008, lenar bunaíodh an scéim.

(204)

De réir na Fraince, ní cabhair de réir bhrí Airteagal 107(1) CFAE é an cineál lascaine sin, ar a bhfuil rochtain ag cách agus a dheonaítear ar feadh tréimhse theoranta, ós rud é nach beart roghnaitheach é agus nach ndéanann sé difear don iomaíocht.

(205)

Tugann an Fhrainc faoi deara gur gá d’aerfoirt réigiúnacha atá ag fás a gcuid seirbhísí agus a réigiún a chur chun cinn trí fheachtais mhargaíochta chun líon a bpaisinéirí a mhéadú.

(206)

Thairis sin, tugann an Fhrainc faoi deara, i gcomhréir le cleachtas an Choimisiúin, má íoctar as seirbhís ar phraghas an mhargaidh, nach féidir a chinneadh go raibh Státchabhair i gceist.

(207)

Cuireann an Fhrainc i dtábhacht a chasta a bhíonn sé measúnú a dhéanamh ar phraghas margaidh na seirbhísí margaíochta, measúnú nach mór a chur san áireamh leis cineál beacht na seirbhíse a sholáthraítear, socruithe maidir formhaoirseacht uirthi, tionchar na seirbhíse ar thrácht agus na tairbhí a ghintear. Ba mhaith le húdaráis na Fraince go mbeadh na cleachtais sin faoi réir measúnú cuimsitheach, chun nach gcuirfear aerfoirt áirithe faoi mhíbhuntáiste i gcomparáid le haerfoirt eile.

(208)

Tá údaráis na Fraince ar aon tuairim leis an gCoimisiún, a leagtar a thuairim úd amach in aithrisí 205 agus 214 den chinneadh tosaigh, maidir leis an ngá le measúnú comhpháirteach ar na comhaontuithe seirbhísí aerfoirt agus na comhaontuithe seirbhísí margaíochta, mar aon le cur chuige comhpháirteach i leith na n-údarás poiblí éagsúil agus CCI i dtaca leis na comhaontuithe seirbhísí margaíochta a mhaoiniú.

(209)

Measann an Fhrainc nach bhfuil sí in ann a chruthú go gcomhlíonann na comhaontuithe margaíochta a tugadh i gcrích le Ryanair/AMS prionsabal an infheisteora phríobháidigh i ngeilleagar an mhargaidh, ós rud é go bhfuil aon bhreithniú ó thaobh na forbartha réigiúnaí eisiata ón bprionsabal sin, ach gurb amhlaidh gur ar bhreithnithe ó thaobh na forbartha réigiúnaí de a bunaíodh an cinneadh a rinne na húdaráis áitiúla agus réigiúnacha éagsúla chun páirt a ghlacadh i maoiniú na gcomhaontuithe sin. Thairis sin, measann an Fhrainc nach bhfuil tástáil an infheisteora phríobháidigh i ngeilleagar an mhargaidh oiriúnach go maith d’aerfoirt a dtagann líon is lú ná 1 mhilliún paisinéir in aghaidh na bliana chucu, agus ar gá dóibh gnéithe seachas a mbrabúsacht féin a mheas.

(210)

Cuireann an Fhrainc i dtábhacht tionchar dearfach ghníomhaíochtaí an aerfoirt ar an bhforbairt réigiúnach agus measann sí dá bhrí sin gur nádúrtha an rud é go mbaineann na húdaráis áitiúla agus réigiúnacha, a dhéanann a ndícheall chun an geilleagar agus an turasóireacht ina gcríoch a fhorbairt, úsáid as seirbhísí a chuireann ar a gcumas í a chur chun cinn agus turasóirí a mhealladh.

(211)

Tugann an Fhrainc na tairbhí eacnamaíocha a ghineann an t-aerfort faoi deara. Mar shampla, in 2010, chaith paisinéirí a d’úsáid aerlínte ísealchostais chun eitilt chun aerfort La Rochelle thart faoi EUR […] 30 milliún.

(212)

Ó thaobh CCI de, tugann údaráis na Fraince an bonn cirt seo a leanas leis na seirbhísí margaíochta a úsáid: ‘a mhéid a bhaineann leis na breithnithe a d’fhág gur thug CCI na comhaontuithe atá faoi imscrúdú i gcrích, deis chun custaiméirí breise a mhealladh ab ea an fhéidearthacht chun fógráin faoi aerfort La Rochelle agus faoina réigiún, agus faoi na cinn scríbe uile ar a bhfreastalaíonn an t-aerfort chomh maith, a chur ar shuíomh gréasáin ag a mbíonn an oiread cuairteoirí agus a bhíonn ag suíomh gréasáin Ryanair, agus ba nádúrtha an rud é gur thapaigh CCI an deis sin agus é de mhian leis trácht agus ioncaim an aerfoirt dá bhrí sin a mhéadú’. Cuireann an Fhrainc leis sin á rá ‘ó thaobh aerfort La Rochelle féin de, d’éirigh lena straitéis tacaíochta margaíochta ós rud é gur tháinig méadú géar ar an líon paisinéirí le linn na tréimhse, rud a d’fhág gur tháinig méadú seasta ar mhuirir aerfoirt agus ar ioncaim sheach-aerloingseoireachta iad ...’.

(213)

A mhéid a bhaineann leis na méideanna a íocadh le Jet2 ar sheirbhísí margaíochta, cuireann údaráis na Fraince an réasúnaíocht chéanna i bhfeidhm agus a leagtar amach thuas i leith Ryanair/AMS.

(214)

Cuireann an Fhrainc in iúl freisin, contrártha leis an bhfaisnéis atá i dtuarascáil CRC ó 2008 agus a cuimsíodh in aithris 39 den chinneadh tosaigh ón gCoimisiún, nach bhfuair easyJet aon mhaoiniú le haghaidh seirbhísí margaíochta ná fógraíochta.

(215)

Sa chuid seo, déanfaidh an Coimisiún measúnú ar na bearta tacaíochta airgeadais éagsúla a deonaíodh don aerfort, ar a dtugtar tuairisc i Roinn 3.1.

(216)

Faoi Airteagal 107(1) CFAE, aon chabhair arna deonú ag Ballstát nó arna deonú trí bhíthin acmhainní Stáit i bhfoirm ar bith, agus a bhéarfaidh nó is baolach a bhéarfadh saobhadh ar iomaíocht trí thaobhú le gnóthais áirithe nó le táirgeadh earraí áirithe, tá sí neamh-chomhoiriúnach leis an gConradh, sa mhéid go dtéann sí i gcion ar an trádáil idir Ballstáit.

(217)

Dá n-aicmeofaí beart mar Státchabhair, dá bhrí sin, ní foláir na critéir uile seo a leanas a chomhlíonadh:

(218)

Mar a d’athdhearbhaigh an Coimisiún i dTreoirlínte 2014 (41), ó dháta an bhreithiúnais in Aéroports de Paris (12 Nollaig 2000) (42), ní mór oibriú agus tógáil bonneagair aerfoirt a mheas mar nithe a thagann faoi raon an rialaithe Státchabhrach. Os a choinne sin, i ngeall ar an éiginnteacht a bhí ann roimh an dáta sin, d’fhéadfadh údaráis phoiblí a mheas go dlisteanach an tráth sin nár Státchabhair é bonneagar aerfoirt a mhaoiniú agus, dá réir sin, nár ghá fógra a thabhairt faoi bhearta den sórt sin don Choimisiún. Fágann sé sin nach féidir leis an gCoimisiún amhras a chur in iúl, ar bhonn na rialacha Státchabhrach, faoi bhearta maoiniúcháin a deonaíodh roimh an 12 Nollaig 2000.

(219)

Sa chás seo, rinneadh na deontais infheistíochta tar éis an 12 Nollaig 2000, mar ab amhlaidh i gcás na cabhrach oibriúcháin ionchasaí, a gcumhdaíonn an scrúdú uirthi sin an tréimhse ón 1 Eanáir 2001. Ní féidir le húdaráis na Fraince brath ar an éiginnteacht dhlíthiúil dá bhrí sin a mhéid a bhaineann le gníomhaíocht aerfort La Rochelle a aicmiú mar ghníomhaíocht neamheacnamaíoch, ós rud é go ndearnadh na bearta atá i gceist tar éis an 12 Nollaig 2000.

(220)

É sin ráite, mar a cuireadh in iúl i dTreoirlínte 2014, ní gá gur gníomhaíochtaí de chineál eacnamaíoch gníomhaíochtaí uile aerfoirt (43). Na gníomhaíochtaí a thagann i bprionsabal faoi fhreagracht an Stáit i bhfeidhmiú a chumhachtaí oifigiúla mar údarás poiblí agus, ní de chineál eacnamaíoch iad, agus ní thagann siad go ginearálta faoi raon feidhme na rialacha maidir le Státchabhair.

(221)

Úsáideadh na deontais infheistíochta a rinneadh in 2001 agus 2005 (féach Tábla 8) go háirithe chun infheistíochtaí a mhaoiniú arbh infheistíochtaí iad a bhain leis an halla imeachta agus teachta, an rúidbhealach, an bealach innlithe agus na stadanna le haghaidh aerárthaí. Is é CCI a oibríonn an bonneagar agus an trealamh sin ar bhonn tráchtála, agus is é oibreoir an aerfoirt é agus an t-eintiteas a ghearrann muirear ar úsáideoirí le haghaidh chostas na sócmhainní sin. Tá na hinfheistíochtaí sin ina ndlúthchuid de ghníomhaíocht tráchtála an aerfoirt dá bhrí sin. Bhí na deontais infheistíochta a rinneadh idir 2001 agus 2005 chun tairbhe na ngníomhaíochtaí eacnamaíocha dá réir sin.

(222)

Maidir le coincheapa an ghnóthais agus na gníomhaíochta eacnamaíche, is éard ba príomhchuspóir le maoiniú an bhonneagair aerfoirt sin agus na cabhrach oibriúcháin ionchasaí dá bhrí sin gníomhaíocht eacnamaíoch oibriú tráchtála an aerfoirt dá raibh CCI ag gabháil a mhaoiniú agus tá an maoiniú sin faoi raon feidhme na rialacha maidir le Státchabhair dá bhrí sin.

(223)

Mar a thaispeántar i dTábla 4, cumhdaítear leis an nós imeachta imscrúdaithe foirmiúil fóirdheontais (go háirithe ó FIATA) lenar maoiníodh infheistíochtaí éagsúla a bhain leis an tslándáil, mar atá, saoráidí agus feistí chun bagáiste boilg a scagadh, rochtain ar an limistéar srianta a rialú, agus daoine agus bagáiste cábáin a scagadh. Is é an tsábháilteacht a mhéadú ab aidhm do na hinfheistíochtaí freisin, toisc gur ceannaíodh feithiclí le haghaidh na seirbhíse dóiteáin agus sábháilteachta aerárthaí. Deonaíodh na fóirdheontais éagsúla sin faoin gcóras ginearálta chun tascanna sainchúraim phoiblí a mhaoiniú in aerfoirt na Fraince, ar a dtugtar tuairisc in aithrisí 32 et seq.

(224)

Mar a cuireadh in iúl le Treoirlínte 2014 ón gCoimisiún, dhearbhaigh an Chúirt Bhreithiúnais nach de chineál eacnamaíoch iad gníomhaíochtaí a bhíonn faoi fhreagracht an Stáit de ghnáth i bhfeidhmiú a chumhachtaí oifigiúla mar údarás poiblí agus nach bhfuil siad faoi raon feidhme na rialacha maidir le Státchabhair i gcoitinne (44). De réir Threoirlínte 2014, gníomhaíochtaí cosúil le rialú aerthráchta, na póilíní, custaim, comhrac dóiteáin ar aerárthaí, gníomhaíochtaí is gá chun an eitlíocht shibhialta a chosaint ar ghníomhartha trasnaíochta neamhdhleathacha, agus infheistíocht i ndáil leis an mbonneagar agus trealamh is gá chun gníomhaíochtaí den sórt sin a dhéanamh, meastar go ginearálta fúthu nach gníomhaíochtaí de chineál eacnamaíoch iad (45).

(225)

Sonraítear i dTreoirlínte 2014 freisin, chun nach n-aicmeofar mar Státchabhair é, ba cheart maoiniú poiblí na ngníomhaíochtaí neamheacnamaíocha sin a theorannú go docht agus gan déanamh leo ach na costais a chúiteamh a eascraíonn as na ngníomhaíochtaí sin, agus ní fhéadfaidh idirdhealú míchuí idir aerfoirt tarlú dá dtoradh. Sonraítear leis na Treoirlínte maidir leis an dara coinníoll sin, i gcás inar gnách faoi ordú dlíthiúil ar leith nach mór d’aerfoirt shibhialta costais áirithe a bhaineann go dlúth le hoibriú na n-aerfort sin a iompar, ach nach mbíonn ar aerfoirt shibhialta eile déanamh amhlaidh, go bhféadfaí buntáiste a dheonú do na haerfoirt shibhialta eile sin, gan beann ar cé acu a bhaineann nó nach mbaineann na costais sin le gníomhaíocht a mheastar a bheith de chineál neamheacnamaíoch i gcoitinne (46).

(226)

Na gníomhaíochtaí a mhaoinítear leis an gcóras ginearálta chun tascanna sainchúraim phoiblí a mhaoiniú in aerfoirt na Fraince, ar a dtugtar tuairisc in aithrisí 32 et seq., baineann siad leis an eitlíocht shibhialta a choimirciú in aghaidh gníomhaíochtaí trasnaíochta neamhdhleathaí (47), tascanna na bpóilíní (48), tarrtháil agus comhrac dóiteáin aerárthaí (49), sábháilteacht aerthráchta (50), agus an comhshaol nádúrtha agus timpeallacht dhaonna a chosaint (51). Is féidir na gníomhaíochtaí sin a mheas go dlisteanach mar ghníomhaíochtaí a thagann faoi fhreagracht an Stáit i bhfeidhmiú a chumhachtaí oifigiúla mar údarás poiblí. Dá dheasca sin, is go dlisteanach a fhéadfaidh an Fhrainc na tascanna sin a mheas mar thascanna ‘atá faoin sainchúram poiblí’, i bhfocail eile, mar thascanna neamheacnamaíocha, faoi na rialacha maidir le Státchabhair. Féadfaidh an Fhrainc foráil a dhéanamh dá bhrí sin maidir le maoiniú poiblí chun na costais a thabhaigh oibreoirí aerfoirt agus na tascanna sin á ndéanamh acu a chúiteamh, a mhéid a chuirtear na tascanna sin ar a n-iontaoibh leis an dlí náisiúnta agus ar choinníoll nach n-eascraíonn an róchúiteamh ná an t-idirdhealú idir aerfoirt as an maoiniú sin.

(227)

Is léir ón tuairisc in aithrisí 32 et seq go bhfuil an córas a leagtar síos le dlí na Fraince bunaithe ar shásraí dochta um rialú costais, idir ex ante agus ex post, rud lena n-áirithítear nach bhfaigheann na hoibreoirí aerfoirt, tríd an gcáin aerfoirt agus an ionstraim mhaoinithe bhreise, ach na méideanna sin is gá chun na costais a chumhdach agus iad sin amháin go docht.

(228)

Thairis sin, ós rud é go bhfuil feidhm ag an gcóras sin maidir le haerfoirt shibhialta uile na Fraince i dtéarmaí na gcineálacha taisc as a n-eascraíonn cúiteamh mar aon leis na sásraí maoiniúcháin, comhlíontar an coinníoll maidir le neamh-idirdhealú. Cé go gcuirtear feidhmiú na dtascanna sainchúraim phoiblí ar iontaoibh bainisteoirí aerfoirt le reachtaíocht na Fraince, cuirtear an fhreagracht as na tascanna sin a mhaoiniú ar an Stát seachas ar na bainisteoirí aerfoirt, leis an reachtaíocht chéanna. Dá réir sin, ní fhágann an cúiteamh ó chistí poiblí as na costais a bhaineann leis na tascanna sin a fheidhmiú go maolaítear costais ar cheart do bhainisteoirí aerfoirt iad a iompar de ghnáth faoi chóras dlíthiúil na Fraince.

(229)

Cuireadh an córas náisiúnta sin i bhfeidhm maidir le haerfort La Rochelle ó thús na tréimhse atá faoi imscrúdú. Dá thoradh sin, ní Státchabhair i bhfabhar an aerfoirt é an maoiniú a fuarthas faoin gcóras sin.

(230)

Tá fóirdheontais deonaithe ag na húdaráis áitiúla agus ag na húdaráis phoiblí seo a leanas d’oibreoir aerfort La Rochelle: Stát na Fraince, Réigiún Poitou-Charentes, Roinn Charente-Maritime, Coiste Bailecheantair La Rochelle agus rannóg ghinearálta CCI La Rochelle.

(231)

Chun a chinneadh cé acu is acmhainní Stáit iad acmhainní na gcomhlachas tráchtála agus tionscail nó nach ea agus cé acu is inchurtha a n-úsáid i leith an Stáit nó nach ea, tugann an Coimisiún faoi deara i dtosach báire go n-aicmítear comhlachais tráchtála agus tionscail mar ‘údarás idirmheánach Stáit’ le hAirteagal L 710-1 den Chód Tráchtála. Ar dhóigh níos sonraí, is comhlachtaí poiblí faoi dhlí na Fraince iad comhlachais tráchtála agus tionscail. Sonraítear le hAirteagal L 710-1 den Chód Tráchtála atá i bhfeidhm faoi láthair ‘gur comhlachtaí poiblí faoi mhaoirseacht an Stáit agus a bhíonn á riaradh ag bainisteoirí tofa iad CCI France, na comhlachais tráchtála agus tionscail réigiúnacha, comhlachais tráchtála agus tionscail áitiúla agus grúpaí idirchomhlachais’.

(232)

Sonraítear le hAirteagal L 710-1 den Chód Tráchtála freisin tascanna na gcomhlachas tráchtála agus tionscail: ‘Rannchuideoidh líonra [na gcomhlachas tráchtála agus tionscail] agus gach bunaíocht nó seomra rannach laistigh de le forbairt eacnamaíoch, tarraingteacht agus pleanáil spásúil na críche agus leis an tacaíocht do ghnóthais agus dá gcomhlachais trí aon tasc seirbhíse poiblí a chomhlíonadh laistigh de na téarmaí a leagtar síos le foraithne mar aon le haon tasc leasa ghinearálta is gá chun na tascanna sin a chur i gcrích.

Chuige sin, féadfaidh gach bunaíocht nó comhlachas rannach sa líonra an méid seo a leanas a dhéanamh, i gcomhréir le haon phlean earnála is infheidhme:

(233)

Liosta thascanna na gcomhlachas tráchtála agus tionscail, a thugtar in Airteagal L.710-1 den Chód Tráchtála agus a luaitear thuas, taispeánann sé dá réir gurb é a raison d’être agus a bpríomhchuspóir tabhairt faoi na tascanna leasa ghinearálta a thugtar dóibh le dlí, i.e. ionadaíocht a dhéanamh ar leasanna an tionscail, na tráchtála agus seirbhísí os comhair na n-údarás poiblí go príomha, mar aon le tacú le gnólachtaí áitiúla, agus tarraingteacht agus pleanáil spásúil a réigiún a fhorbairt. Bíonn gníomhaíochtaí tráchtála agus tionscail na gcomhlachas tráchtála agus tionscail coimhdeach lena dtascanna leasa ghinearálta agus deartar iad chun cuidiú leo tabhairt faoi na tascanna sin.

(234)

Forbraíodh an reachtaíocht sin ó tarraingíodh suas in 2005 í chun a leagan reatha a fhágáil, ach níl athrú tagtha ar a prionsabail bhunúsacha. Ar an gcaoi chéanna, is ar na prionsabail chéanna a bunaíodh na rialacha a bhí i bhfeidhm sular tarraingíodh Airteagal L 710-1 den Chód Tráchtála suas. Ar feadh na tréimhse ar fad faoi imscrúdú, bhí comhlachais tráchtála agus tionscail amhail CCI fós ina gcomhlachtaí poiblí dá réir a cuireadh ar bun le dlí, a bhí á riaradh ag bainisteoirí tofa agus faoi mhaoirseacht an Stáit. Thairis sin, mar údaráis idirmheánacha de chuid an Stáit, leanadh de thascanna leasa ghinearálta a chur ar a n-iontaoibh arb éard atá iontu ionadaíocht a dhéanamh ar leasanna tionscail, tráchtála agus seirbhísí os comhair údaráis phoiblí náisiúnta agus eachtracha, ag rannchuidiú leis sin le tarraingteacht agus pleanáil spásúil na réigiún agus ag tacú le gnólachtaí.

(235)

Ba mhaith leis an gCoimisiún a chur in iúl freisin go gcuirtear na comhlachais tráchtála agus tionscail faoi mhaoirseacht ionadaithe an Stáit le hAirteagail 712-2 et seq den Chód Tráchtála. Sa cháil sin dó, bíonn rochtain ag an údarás a bhfuil maoirseacht á feidhmiú aige ar thionóil ghinearálta uile CCI agus is féidir leis míreanna a chur leis an gclár oibre. Ní mór an t-údarás maoirseachta a chur ar an eolas freisin faoi chinntí tábhachtacha áirithe a shonraítear sna rialacháin (maidir le buiséad, dul i muinín na hiasachtaíochta, ráthaíochtaí a dheonú do thríú páirtithe, aistrithe, éadálacha nó leathnuithe sealúchas airgeadais i gcuideachtaí tráchtála nó sibhialta mar shampla, etc.). Go háirithe, maidir le cinntí a bhaineann le buiséid tosaigh, nó buiséid a leasú nó buiséid a chuirtear chun feidhme, ní bhíonn siad ceangailteach ach amháin tráth a bheidh siad formheasta, fiú go hintuigthe, ag an údarás a fheidhmíonn maoirseacht.

(236)

Thairis sin, áirítear le buiséad ginearálta na gcomhlachas tráchtála agus tionscail ioncam cánach a bhailítear ó chuideachtaí a chuirtear sa chlár cuideachtaí agus trádála. Is éard a bhíonn i gceist le hacmhainní na gcomhlachas tráchtála agus tionscail dá bhrí sin ioncaim chánach go háirithe (an cháin chun costais na gcomhlachas tráchtála agus tionscail a chumhdach, a leagadh síos le hAirteagal 1600 den Chód Cánach Ginearálta), fóirdheontais nó acmhainní tráchtála a eascraíonn as gníomhaíochtaí oiliúna agus bainistíochta bonneagar iompair. Dá thoradh sin, ní bhíonn ar chomhlachais tráchtála agus tionscail brath ar a n-ioncam tráchtála amháin chun a gcostais a chumhdach. Is cosúil go gcomhthacaíonn sé sin leis an gconclúid go mbíonn gníomhaíochtaí tráchtála agus tionscail na gcomhlachas tráchtála agus tionscail coimhdeach lena dtascanna leasa ghinearálta agus go ndeartar iad chun cuidiú leo tabhairt faoi na tascanna sin.

(237)

I bhfianaise a bhfuil thuas, ní mór comhlachais tráchtála agus tionscail amhail CCI a mheas mar údaráis phoiblí agus ní mór a gcinntí uile, díreach cosúil leo siúd de chuid an rialtais náisiúnta nó na n-údarás áitiúil agus réigiúnach, a mheas mar chinntí atá ‘inchurtha i leith an Stáit’, de réir bhrí an chásdlí maidir leis an Státchabhair (52), agus gurb acmhainní Stáit iad a n-acmhainní. D’fhormhuinigh Cúirt Ghinearálta an Aontais Eorpaigh an cur chuige sin freisin i roinnt breithiúnas a bhain le cabhair a dheonaigh CCInna Nîmes, Angoulême agus Pau d’aerlínte (53).

(238)

Maidir le hacmhainní na n-údarás áitiúil a dheonaigh fóirdheontais don aerfort, mar atá Réigiún Poitou-Charentes, Roinn Charente-Maritime agus Coiste Bailecheantair La Rochelle, is acmhainní Stáit iad de réir bhrí Airteagal 107(1) CFAE (54). Thairis sin, tagann iompar na n-údarás sin, ar an mbealach céanna le bearta a dhéanann an t-údarás lárnach, faoi raon an airteagail sin, má chomhlíontar na coinníollacha a leagtar síos san fhoráil sin (55). Dá réir sin, ní mór cinntí na n-údarás áitiúil atá á n-imscrúdú sa chás seo a mheas mar chinntí atá inchurtha i leith an Stáit (sa chiall is leithne de) de réir bhrí an chásdlí maidir leis an Státchabhair.

(239)

Is é údarás comhpháirteach an aerfoirt (Syndicat Mixte de l’Aéroport), atá comhdhéanta d’údaráis áitiúla éagsúla (56), a rinne na híocaíochtaí as bainistíocht agus oibríocht aerfort Rochefort, agus is acmhainní Stáit iad freisin dá bhrí sin, a bhfuil deonú na n-acmhainní sin inchurtha i leith an Stáit.

(240)

Ba é FIATA, ciste faoi bhainistíocht an Stáit, nó faoi bhainistíocht bhuiséad an Stáit go díreach, a mhaoinigh na fóirdheontais chun na tascanna ‘sainchúraim phoiblí’ a chumhdach, agus is acmhainní Stáit iad dá bhrí sin, a bhfuil a n-úsáid inchurtha i leith an Stáit.

(241)

Is é CFRE a mhaoiníonn an fhorbairt bhonneagair go páirteach. Meastar gurb acmhainní Stáit é an maoiniú sin ós rud é go ndeonaítear faoi rialú an Bhallstáit lena mbaineann é (57). Tá sé inchurtha i leith an Stáit freisin a mhéid gurb iad údaráis na Fraince a dhéanann an cinneadh an maoiniú a úsáid.

(242)

Dá thoradh sin, tá na bearta uile i bhfabhar aerfort La Rochelle a chumhdaítear leis an imscrúdú seo inchurtha i leith an Stáit agus maoinítear trí acmhainní Stáit iad.

(243)

Chun a mheasúnú cé acu a thugtar nó nach dtugtar buntáiste do ghnóthas le beart de chuid an Stáit faoi Airteagal 107(1) CFAE, ní mór a chinneadh cé acu atá nó nach bhfuil buntáiste eacnamaíoch ag an ngnóthas atá i gceist lena gcuirtear ar chumas dó costais a sheachaint a chaithfí a íoc as a chuid acmhainní airgeadais féin de ghnáth nó cé acu atá nó nach bhfuil buntáiste aige nach mbeadh faighte aige faoi ghnáthdhálaí an mhargaidh (58). Is gá freisin a chinneadh cé acu is féidir nó nach féidir an beart atá i gceist a mheas mar chúiteamh seirbhíse poiblí a chomhlíonann coinníollacha bhreithiúnas Altmark (59).

(244)

Ní mór a fhionnadh ar dtús cé acu is féidir nó nach féidir na bearta éagsúla a bhfuil measúnú le déanamh orthu a mheas mar chúiteamh seirbhíse poiblí a deonaíodh chun fíorsheirbhís lena ngabhann leas eacnamaíoch ginearálta (SGEI) a sholáthar.

(245)

Maidir leis sin, ba cheart a mheabhrú gur rialaigh an Chúirt Bhreithiúnais i mbreithiúnas Altmark nach Státchabhair de réir bhrí Airteagal 107(1) CFAE atá i gcúiteamh seirbhíse poiblí nuair a chomhlíontar ceithre choinníoll charnacha. Ar an gcéad dul síos, ní mór oibleagáidí seirbhíse poiblí le comhlíonadh a bheith ag an ngnóthas is faighteoir le fírinne, agus ní mór na hoibleagáidí a bheith sainithe go soiléir. Ar an dara dul síos, ní mór na paraiméadair a bhunú roimh ré ar bhealach trédhearcach agus oibiachtúil, arb ar a mbonn sin a ríomhfar an cúiteamh. Ar an tríú dul síos, ní mór nach mó an cúiteamh ná an méid is gá chun cuid de na costais nó na costais uile arna dtabhú i gcomhlíonadh na n-oibleagáidí seirbhíse poiblí a chumhdach, agus na fáltais ábhartha agus brabús réasúnta as comhlíonadh na n-oibleagáidí sin á gcur san áireamh. Ar deireadh, i gcás nach roghnaítear an gnóthas atá le hoibleagáidí seirbhíse poiblí a chomhlíonadh, i gcás sonrach, de bhun nós imeachta soláthair phoiblí lena bhféadfar an tairgeoir a roghnú a bheadh in ann na seirbhísí sin a sholáthair ar an gcostas is lú don chomhphobal, ní mór leibhéal an chúitimh a ríomh ar bhonn anailís na gcostas a thabhódh gnóthas tipiciúil atá dea-eagraithe agus a ndéantar na hacmhainní ábhartha a chur ar fáil dóibh ar bhonn leordhóthanach.

(246)

Chun na coinníollacha sin a chur i bhfeidhm, is é an chéad phointe a bhíonn le scrúdú an bhfuil fíorsheirbhís lena ngabhann leas eacnamaíoch ginearálta ann.

(247)

Sa chás seo, measann an Fhrainc gur cheart bainistíocht an aerfoirt ar an iomlán a mheas mar sheirbhís lena ngabhann leas eacnamaíoch ginearálta. Maidir le hargóint na Fraince, a bhain le fíorsheirbhís lena ngabhann leas eacnamaíoch ginearálta a bheith ann le haghaidh aerfort La Rochelle ar an iomlán, bunaíodh go príomha í ar rannchuidiú an aerfoirt leis an bhforbairt eacnamaíoch áitiúil. Measann an Fhrainc gur féidir an tasc leis an aerthrácht a fhorbairt, a chuir CCI ar iontaoibh CCI-Aerfort ‘a mheas mar oibleagáid seirbhíse poiblí de réir bhrí chásdlí Altmark.’ De réir na Fraince, baineann an tasc sin le ‘forbairt eacnamaíoch agus turasóireachta an limistéir’, rud dá bhfuil riachtanach, dar léi, ‘(i) méadú ar thrácht paisinéirí, ioncam agus poist a ghiniúint don gheilleagar réigiúnach […] agus (ii) an crios fiontraíochta atá lonnaithe cóngarach don aerfort a fhorbairt’. Maidir leis an gcrios fiontraíochta sin, tagraíonn an Fhrainc do roinnt gnóthas atá bunaithe ansin agus sonraíonn, faoi Airteagal L 170-1 den Chód Tráchtála, go bhfuil ag CCI ‘tasc chun saoráidí a chur ar bun agus a oibriú, go háirithe saoráidí calafoirt agus aerfoirt’ (60).

(248)

Níl an Coimisiún ar aon tuairim leis na barúlacha sin. Chun measúnú a dhéanamh ar a mhéid is seirbhís lena ngabhann leas eacnamaíoch ginearálta é oibríocht aerfoirt, ní mór anailís a dhéanamh ar an ngá ar mhaithe leis an leas ginearálta a chomhlíontar leis an ngníomhaíocht sin.

(249)

Sonraítear le Pointe 69 de Threoirlínte 2014 ‘chun go measfar gníomhaíocht mar sheirbhís lena ngabhann leas eacnamaíoch ginearálta, ba cheart di saintréithe speisialta a léiriú i gcomparáid le gnáthghníomhaíochtaí eacnamaíocha’. De réir chásdlí na Cúirte, is seirbhís í seirbhís lena ngabhann leas eacnamaíoch ginearálta a léiríonn saintréithe speisialta i gcomparáid le saintréithe gníomhaíochtaí eacnamaíocha eile (61) agus gnóthais a gcuirtear tascanna SGEI ar a n-iontaoibh, is gnóthais iad a gcuirtear ‘tasc ar leith’ ar a n-iontaoibh (62). Tríd is tríd, tugann cur ar iontaoibh ‘tasc seirbhíse poiblí ar leith’ soláthar seirbhísí le tuiscint, nach nglacfadh gnóthas air féin dá mbeadh sé ag féachaint dá leas tráchtála féin, nó nach nglacfadh sé air féin an oiread chéanna ná faoi na coinníollacha céanna (63).

(250)

Sonraítear le Pointe 69 de Threoirlínte 2014 freisin ‘maidir leis an gcuspóir leasa ghinearálta a shaothraíonn údaráis phoiblí, nach féidir gan ach gníomhaíochtaí eacnamaíocha nó réimsí eacnamaíocha áirithe dá ndéantar foráil in Airteagal 107(3)(c) den Chonradh a bheith i gceist leo agus iad sin amháin’ (64). Ní ábhar díospóide é, trí fheabhas a chur ar inrochtaineacht réigiúin, go háirithe nuair a bhristear iargúltacht an réigiúin sin, gur féidir éifeachtaí dearfacha a bheith i gceist le haerfort don fhorbairt eacnamaíoch áitiúil. Mar sin féin, ní féidir a mheas gur critéar ábhartha, chun a shuíomh go bhfuil fíorsheirbhís lena ngabhann leas eacnamaíoch ginearálta ann, an fíoras simplí go ndéanann láithreacht agus gníomhaíocht aerfoirt poist dhíreacha agus indíreacha a ghiniúint agus gníomhaíocht gnóthas áitiúil a spreagadh.

(251)

Dá thoradh sin, rannchuidiú aerfort La Rochelle leis an bhforbairt eacnamaíoch áitiúil, arb é sin an phríomhthoisc a chuir an Fhrainc i dtábhacht mar thacaíocht lena teoiric i dtaca le fíorsheirbhís lena ngabhann leas eacnamaíoch ginearálta a bheith ann, ní toisc ábhartha ann féin an rannchuidiú sin fad a mheastar ar leithligh ó rannchuidiú an aerfoirt sin le hinrochtaineacht an réigiúin é.

(252)

Thairis sin, déantar foráil le pointe 72 de na Treoirlínte, ‘A mhéid a bhaineann le haerfoirt, measann an Coimisiún go bhfuil sé indéanta a mheas gur seirbhís lena ngabhann leas eacnamaíoch ginearálta é bainistíocht fhoriomlán aerfoirt, i gcásanna lena dtugtar bonn cirt go maith. [...] measann an Coimisiún nach féidir gurb amhlaidh an cás sin ach amháin dá mba rud é go mbeadh cuid den limistéar, ar a bhféadfadh an t-aerfort a bheith ag freastal, leithlisithe ón gcuid eile den Aontas d’uireasa an aerfoirt, a mhéid lena ndéanfaí dochar dá fhorbairt eacnamaíoch agus shóisialta. Ba cheart aird chuí a thabhairt ar mhodhanna iompair eile le measúnú den sórt sin, agus go háirithe seirbhísí iarnróid ardluais nó naisc mhuirí ar a bhfreastalaíonn báid farantóireachta’ (65).

(253)

A mhéid a bhaineann le rannchuidiú aerfort La Rochelle le hinrochtaineacht an réigiúin, ba cheart a thabhairt faoi deara go bhfuil La Rochelle nasctha, mar shampla, le Páras agus Bordeaux le seirbhísí iarnróid a thagann go minic, agus timpeall 3 uair an chloig agus 2 uair an chloig go leith i gceist leis na tréimhsí taistil faoi seach. A mhéid a bhaineann leis an ngréasán bóithre, tá La Rochelle gar do mhótarbhealaí an A837, A10 agus A83, lena nasctar le roinnt cathracha móra de chuid na Fraince é, go háirithe Bordeaux agus Nantes. I bhfianaise na faisnéise sin, ní féidir a áitiú go mbeadh cuid den limistéar, ar a bhféadfadh aerfort La Rochelle a bheith ag freastal, leithlisithe ón gcuid eile den Aontas d’uireasa an aerfoirt, a mhéid lena ndéanfaí dochar dá fhorbairt eacnamaíoch agus shóisialta.

(254)

Ar deireadh, ní thugtar aghaidh le barúlacha de chuid na Fraince ar an mbarúil sa chinneadh tosaigh lena gcuirtear amhras in iúl faoi argóint na Fraince go bhfuil fíorsheirbhís lena ngabhann leas eacnamaíoch ginearálta ann le haghaidh aerfort La Rochelle ar an iomlán. Shonraigh an Coimisiún maidir le bainistíocht aerfort La Rochelle ‘go n-áirítear léi freisin gníomhaíochtaí nach bhfuil nasctha le croí-ghníomhaíochtaí an aerfoirt go díreach, agus tógáil, maoiniú, úsáid agus ligean talún agus foirgneamh ar cíos, le haghaidh oifigí agus na stórála mar aon leis na hóstáin agus na fiontair tionscail atá lonnaithe laistigh den aerfort, chomh maith le siopaí, bialanna agus carrchlóis. Ar deireadh, cé go measann údaráis na Fraince gur oibleagáidí seirbhíse poiblí iad gníomhaíochtaí uile an aerfoirt atá i gceist, níl aon fhoráil ann maidir le cuntais ar leithligh le haghaidh an ioncaim ó ghníomhaíochtaí tráchtála.’ Trí mheas go bhfuil na gníomhaíochtaí sin, nach bhfuil nasctha go díreach le croí-ghníomhaíochtaí an aerfoirt, ina gcuid de na hoibleagáidí seirbhíse poiblí, rinne an Fhrainc neamhaird den fhíoras nach léiríonn na gníomhaíochtaí saintréithe speisialta i gcomparáid le gníomhaíochtaí eacnamaíocha eile, ná go nglacann oibreoirí eacnamaíocha lasmuigh den aerfort an oiread chéanna de na seirbhísí céanna orthu féin nó faoi na coinníollacha céanna agus a ghlacann oibreoirí eacnamaíocha laistigh den aerfort. Dá dheasca sin, trí mheas gurb oibleagáidí seirbhíse poiblí gníomhaíochtaí uile an aerfoirt, tá earráid fhollasach measúnaithe déanta ag an bhFrainc maidir le seirbhís lena ngabhann leas eacnamaíoch ginearálta a shainmhíniú.

(255)

Tugann an Coimisiún faoi deara freisin nach ndéantar idirdhealú idir croí-ghníomhaíochtaí an aerfoirt agus gníomhaíochtaí eile leis na taifid chuntasaíochta a cuireadh isteach le haghaidh an aerfoirt, go háirithe plean airgeadais 2001-2014. I gcodarsnacht leis sin, is cosúil maidir leis na heasnaimh oibriúcháin a taifeadadh le haghaidh na tréimhse faoi imscrúdú, gur fritháiríodh dá éis sin iad leis na hairleacain airgid a sholáthair rannóg ghinearálta CCI agus a chumhdaítear leis an gCinneadh seo freisin. Beartaíodh é sin chun na cuntais a chomhardú gan idirdhealú a dhéanamh idir croí-ghníomhaíochtaí an aerfoirt.

(256)

Dá thoradh sin, i bhfianaise a luaitear thuas agus na n-argóintí a chuir an Fhrainc isteach, is é tuairim an Choimisiúin go bhfuil earráid fhollasach measúnaithe déanta ag an bhFrainc agus í ag maíomh go raibh bainistíocht aerfort La Rochelle ar an iomlán ina seirbhís lena ngabhann leas eacnamaíoch ginearálta (SGEI). Go háirithe, maidir le gníomhaíocht oibreoir aerfort La Rochelle, arb é eitiltí iompar paisinéirí tráchtála a láimhseáil ag an aerfort atá i gceist léi, ní féidir í a mheas mar fhíorsheirbhís lena ngabhann leas eacnamaíoch ginearálta. Fágann sé sin dá bhrí sin, a mhéid a beartaíodh go maoineofaí oibriú ghníomhaíocht an aerfoirt ar an iomlán leis na bearta tacaíochta airgeadais éagsúla a chumhdaítear leis an measúnú seo, nach féidir na bearta sin a mheas mar chúiteamh a deonaíodh d’fhonn fíorsheirbhís lena ngabhann leas eacnamaíoch ginearálta a bhainistiú.

(257)

Thairis sin, fiú dá mba rud é go bhféadfaí gach cuid nó cuid de bhainistíocht aerfort La Rochelle a shainiú go bailí mar sheirbhís lena ngabhann leas eacnamaíoch ginearálta, ní chomhlíonfadh na bearta atá i gceist coinníollacha carnacha bhreithiúnas Altmark fós. Ní chomhlíonann siad an chéad choinníoll, ná an dara ná an ceathrú coinníoll den bhreithiúnas sin, mar a léireofar thíos i bhfianaise na teachtaireachta i dtaca le cur i bhfeidhm na rialacha Státchabhrach maidir le cúiteamh a dheonaítear chun seirbhísí lena ngabhann leas eacnamaíoch ginearálta a sholáthar (66) (‘Teachtaireacht SGEI’).

(258)

De réir bhreithiúnas Altmark, ní mór oibleagáidí seirbhíse poiblí le comhlíonadh a bheith ag an ngnóthas is faighteoir le fírinne, agus ní mór na hoibleagáidí a bheith sainithe go soiléir.

(259)

Toisc go bhfuil earráid fhollasach measúnaithe déanta ag an bhFrainc trí bhainistíocht an aerfoirt ar an iomlán a aicmiú mar sheirbhís lena ngabhann leas eacnamaíoch ginearálta agus toisc gur úsáideadh na bearta a chumhdaítear leis an imscrúdú seo chun oibríocht an aerfoirt a mhaoiniú ar an iomlán, ní chomhlíontar an chéad choinníoll a bhaineann le Altmark.

(260)

Ina theannta sin, de réir na teachtaireachta maidir le SGEI (67), chun go gcomhlíonfar an chéad choinníoll a bhaineann le Altmark, ní mór an tasc seirbhíse poiblí a bheith sannta trí bhíthin gníomh amháin nó níos mó, ag brath ar an reachtaíocht sna Ballstáit, a fhéadfaidh a bheith i bhfoirm ionstraimí reachtaíochta nó rialála nó comhaontuithe. Thairis sin, ní mór ábhar agus ré na n-oibleagáidí seirbhíse poiblí a bheith sonraithe leis an ngníomh nó sraith na ngníomhartha ar a laghad, mar aon leis an ngnóthas agus, i gcás inarb infheidhme, an chríoch lena mbaineann, an cineál atá i gceist le haon cheart eisiach nó speisialta arna shannadh don ghnóthas ag an údarás atá i gceist, na paraiméadair chun an cúiteamh a ríomh, a rialú agus athbhreithniú a dhéanamh air, agus na socruithe chun aon róchúiteamh a sheachaint agus a aisghabháil. Gníomhartha arna dtáirgeadh ag an bhFrainc a d’fhéadfadh an fheidhm sin a chomhlíonadh, níl ann díobh ach Airteagal L 170-1 den Chód Tráchtála, cinntí CCI an 21 Feabhra 2003 agus 25 Meitheamh 2004, agus an nós imeachta chun an buiséad a ghlacadh le aghaidh an aerfoirt agus a leagtar síos i gCiorclán Uimh. 111 an 30 Márta 1992 (68) (‘Ciorclán Uimh. 111’), a cheaptar le ráthaíochtaí a sholáthar chun an róchúiteamh a sheachaint.

(261)

Mar sin féin, is cosúil nach sainítear na hoibleagáidí seirbhíse poiblí go soiléir le ceann ar bith de na gníomhartha sin. Go háirithe, ní shonraítear sna gníomhartha ábhar agus ré na n-oibleagáidí seirbhíse poiblí ná na modhanna chun aon sásra um chúiteamh airgeadais a ríomh agus athbhreithniú a dhéanamh air. Dá thoradh sin, ní chomhlíonann na gníomhartha ceanglais an chéad choinníll a bhaineann le Altmark, fiú gan an fíoras, nach fíorsheirbhís lena ngabhann leas eacnamaíoch ginearálta atá i gceist leis na hoibleagáidí a forchuireadh ar CCI-Aerfort, a mheas.

(262)

Bearta eisceachtúla is ea na fóirdheontais eisceachtúla agus na hairleacain in-aisíoctha uile a fuair CCI-Aerfort, a deonaíodh ar bhonn ad hoc chun costais infheistíochta ba ghá a chumhdach agus chun easnamh oibriúcháin an aerfoirt a mhaoiniú. Níor eascair siad as paraiméadair ríomh a leagadh síos roimh ré dá bhrí sin.

(263)

Ba cheart a thabhairt faoi deara go leagtar tascanna CCI-Aerfort le haghaidh na tréimhse 2000-2012 amach ina bhunghníomhartha. Mar sin féin, ní dhearnadh foráil leis na gníomhartha sin maidir le haon sásra um chúiteamh airgeadais le haghaidh CCI, bunaithe ar pharaiméadair maidir le cúiteamh a leagadh síos roimh ré ar bhealach oibiachtúil trédhearcach.

(264)

Ná ní dhéantar foráil, maidir le haon sásra um chúiteamh airgeadais le haghaidh an oibreora, ach oiread leis an nós imeachta maidir le cúiteamh a shocrú, atá – dar leis an bhFrainc – laistigh den nós imeachta chun an buiséad a ghlacadh le haghaidh an aerfoirt, a leagtar síos i gCiorclán Uimh. 111.

(265)

Dá thoradh sin, ní chomhlíonann na bearta tacaíochta airgeadais a deonaíodh do CCI-Aerfort an dara coinníoll a bhaineann le Altmark.

(266)

Ní fhéadfaidh an cúiteamh a bheith níos mó ná an méid is gá chun na costais uile nó cuid de na costais arna dtabhú i gcomhlíonadh oibleagáidí seirbhíse poiblí a chumhdach, agus na fáltais ábhartha agus brabús réasúnach as comhlíonadh na n-oibleagáidí sin á gcur san áireamh.

(267)

Níl aon fhoráil ann go n-íocfaidh CCI cúiteamh breise as úsáid tráchtála aon bhonneagair breise arna mhaoiniú ag an réigiún.

(268)

Sonraíonn an Fhrainc go bhfuil gá leis an mbonneagar breise sin chun na tascanna seirbhíse poiblí a chomhlíonadh agus go gcuidíonn tógáil an bhonneagair le cúrsaí airgeadais an aerfoirt a chomhardú. Mar sin féin, is cosúil go bhfuil na saoráidí sin ina ndlúthchuid den ghníomhaíocht eacnamaíoch a bhaineann leis an aerfort a oibriú agus gurb é is aidhm dóibh an t-aerfort a fhorbairt go háirithe. Ní chomhlíonann na saoráidí an critéar leasa ghinearálta ar a dtugtar tuairisc thuas dá bhrí sin.

(269)

Dá thoradh sin, ní chomhlíonann an cúiteamh an tríú coinníoll a bhaineann le Altmark. Cé go bhfuil coinníollacha Altmark carnach, agus gur leormhaith gan ceann díobh a chomhlíonadh chun nach mbeidh an Coimisiún in ann a chur as an áireamh go bhfuil buntáiste d’oibreoir an aerfoirt ann, déanfaidh an Coimisiún anailís ar an gceathrú coinníoll a bhaineann le Altmark fós.

(270)

Déantar foráil leis an gceathrú coinníoll a bhaineann le deontas Altmark nach mór an cúiteamh arna dheonú a bheith de thoradh nós imeachta soláthair phoiblí lena bhfágtar gur féidir an tairgeoir a roghnú a bheidh in ann na seirbhísí sin a sholáthar ar an gcostas is ísle don phobal (an chéad fhochritéar), nó de thoradh cleachtadh tagarmharcála in éineacht le gnóthas tipiciúil, a reáchtáiltear go maith agus dá soláthraítear na hacmhainní is gá go hoiriúnach (an dara fochritéar).

(271)

Níor roghnaíodh CCI chun an t-aerfort a oibriú tar éis nós imeachta tairisceana agus níl aon fhaisnéis ag an gCoimisiún a léiríonn go bhféadfadh méideanna na mbeart tacaíochta airgeadais a fuair sé a bheith cinntithe ar bhonn anailís ar na costais a bheadh tabhaithe ag gnóthas tipiciúil, a reáchtáiltear go maith agus dá soláthraítear na hacmhainní ábhartha go hoiriúnach.

(272)

Dá thoradh sin, ní chomhlíonann na bearta tacaíochta airgeadais a deonaíodh do CCI-Aerfort an ceathrú coinníoll a bhaineann le Altmark.

(273)

Ós rud é nach gcomhlíontar na ceithre choinníoll a bhaineann le Altmark, ní féidir na bearta éagsúla i bhfabhar oibreoir an aerfoirt a mheas mar chúiteamh seirbhíse poiblí a deonaíodh chun seirbhís lena ngabhann leas eacnamaíoch ginearálta a oibriú. Ní féidir leis an gCoimisiún dá bhrí sin, ag an gcéim seo, a chur as an áireamh go bhfuil buntáiste d’oibreoir an aerfoirt ann.

(274)

A mhéid a bhaineann leis na deontais infheistíochta a raibh thart faoi EUR 3 mhilliún san iomlán i gceist leo le haghaidh halla nua imeachta agus teachta, an rúidbhealach a láidriú, a fhadú agus a leathnú, an bealach innlithe a láidriú agus a leathnú, na suíomhanna le haghaidh aerárthaí a láidriú agus síneadh a chur leo agus linn síothlúcháin a chruthú chun an t-aerfort a chur i gcomhréir leis an nGníomh maidir le hUisce, níl aon argóint curtha ar aghaidh ag an bhFrainc chun tacú leis an tuairim go bhféadfadh coinne a bheith ag na húdaráis phoiblí éagsúla a rinne na deontais sin le toradh ar a n-infheistíocht ar dhócha a shásódh oibreoir i ngeilleagar margaidh a ghníomhódh in ionad na n-údarás sin. Is cosúil ina áit sin go ndearna na húdaráis phoiblí éagsúla na deontais infheistíochta chun rannchuidiú leis an bhforbairt réigiúnach. Ghníomhaigh na húdaráis phoiblí i bhfeidhmiú a dtascanna seirbhíse poiblí dá bhrí sin.

(275)

I bhfianaise a bhfuil thuas, ní chomhlíonann na deontais infheistíochta tástáil an oibreora sa gheilleagar margaidh. Thug na deontais infheistíochta buntáiste eacnamaíoch do CCI-Aerfort dá bhrí sin. Leis na deontais sin, le fírinne, laghdaíodh na costais infheistíochta ar cheart do CCI-Aerfort iad a iompar, gan aon ionchas go bhfaighfí toradh leordhóthanach ar infheistíocht le haghaidh na n-údarás a rinne na deontais. Ina theannta sin, toisc gur thairbhigh gnóthas aonair de na buntáistí sin, is buntáistí roghnaitheacha atá iontu.

(276)

Maidir leis na hairleacain in-aisíoctha dar luach EUR 8.77 milliún san iomlán, ba cheart a thabhairt faoi deara ar dtús go bhfuil siad coibhéiseach le hiasachtaí saor ó ús a dheonaigh rannóg ghinearálta CCI do CCI-Aerfort. De réir na Fraince, ba cheart airleacan a mheas mar ranníocaíocht le cuntas reatha a dhéanfadh scairshealbhóir dá fhochuideachta. Cuireann an Fhrainc leis an méid sin á rá nach ndéanann scairshealbhóir príobháideach anailís ar an mbrabúsacht le haghaidh na n-airleacan sin ós rud é gurb iasachtaí atá iontu le fírinne a bheartaítear chun a chur ar chumas don fhochuideachta a gníomhaíochtaí a fhorbairt chun tairbhe an scairshealbhóra. Dar leis an bhFrainc, is mó is infheidhme é sin sa chás seo, ós rud é gurb aistriú airgeadais atá ann idir codanna den eintiteas dlítheanach céanna, mar atá CCI. De réir na Fraince, ní bhaineann aon riosca airgeadais leis na hairleacain sin do CCI ós rud é gur leis-sean an talamh agus an bonneagar, ar mó go mór a luach ná méid na n-airleacan (69). Ní fhéadfadh argóint den sórt sin a bheith ábhartha ach amháin dá mba rud é, trí na hairleacain sin a dheonú chun go mbeifí in ann leanúint d’oibríocht aerfort La Rochelle, go raibh ionchas ag CCI go dtiocfadh an t-aerfort chun bheith brabúsach sa mheántéarma agus san fhadtéarma, rud a d’fhágfadh ní hamháin go bhfeicfeadh CCI go n-aisíocfaí na hairleacain sin, ach freisin go bhfaigheadh CCI ‘toradh ar a infheistíocht’ lena dtabharfaí luach saothair le haghaidh an chaipitil a tiomnaíodh, trí aon bhrabús a dhéanfadh an t-aerfort.