(1)

I gcomhréir le hAirteagal 26(2) de Rialachán (AE) 2019/787, rinneadh an t-iarratas a thíolaic an Ungáir ar chlárú an ainm ‘Borzag pálinka’ a fhoilsiú in Iris Oifigiúil an Aontais Eorpaigh (2).

(2)

Ní bhfuair an Coimisiún aon fhógra freasúra, i gcomhréir le hAirteagal 27(1) de Rialachán (AE) 2019/787.

(3)

Dá bhrí sin, ba cheart an t-ainm ‘Borzag pálinka’ a chlárú mar thásc geografach,

(1)

De réir Airteagal 131(6), pointe (b), de Threoir 2013/36/AE (an Treoir maidir le Ceanglais Chaipitil), ní mór d’údaráis inniúla nó ainmnithe athbhreithniú a dhéanamh ar rátaí maolánacha na n-institiúidí eile a bhfuil tábhacht shistéamach leo (‘O-SIInna’) uair sa bhliain ar a laghad. De réir mhír 12, an dara fomhír den Airteagal sin, ní mór d’údaráis inniúla nó d’údaráis ainmnithe athbhreithniú bliantúil a dhéanamh ar shainaithint na O-SIInna a bhforchuirtear ráta maolánach den sórt sin orthu. De réir Airteagal 131(7) den Treoir sin, arna ionchorprú i gComhaontú LEE, ní mór d’údaráis inniúla nó ainmnithe fógra a thabhairt don Bhord Eorpach um Riosca Sistéamach (‘BERS’) sula ndéanfar ráta maolánach a shocrú nó a athshocrú le haghaidh O-SIIanna, agus tá BERS le fógraí den sórt sin a chur ar aghaidh gan mhoill chuig Buanchoiste Stáit CSTE, chuig an Údarás Baincéireachta Eorpach agus chuig údaráis inniúla agus ainmnithe na bPáirtithe Conarthacha in LEE lena mbaineann.

(2)

De réir Airteagal 131(15) den Treoir maidir le Ceanglais Chaipitil, i gcomhar le mír 5a, an tríú fomhír den Airteagal sin, ní mór do Bhuanchoiste Stáit CSTE bearta macrastuamachta a údarú i Stát de chuid CSTE LEE as a n-eascróidh ráta maolánach riosca shistéamaigh agus ráta maolánach OSII comhcheangailte is mó ná 5 % de mhéid na neamhchosanta ábhartha ar riosca i gcás institiúid chreidmheasa ar leith agus sraith nó foshraith neamhchosanta. De réir na nAirteagal céanna den Treoir maidir le Ceanglais Chaipitil, tá BERS le tuairim a chur ar fáil do Bhuanchoiste Stáit CSTE, laistigh de 6 seachtaine tar éis fógra dá dtagraítear in Airteagal 131(7) den Treoir maidir le Ceanglais Chaipitil a fháil, mar aon le tuairim i dtaobh an iomchuí an ráta maolánach riosca shistéamaigh agus an ráta maolánach O-SII comhcheangailte.

(3)

An 5 Samhain 2020, thug Aireacht Airgeadais na hIorua fógra do BERS, faoi Airteagal 133(11) de Threoir 2013/36/AE de réir mar is infheidhme maidir leis an Iorua agus san Iorua féin an 1 Eanáir 2020 (3), go raibh rún aici ráta maolánach riosca shistéamaigh de 4.5 % a shocrú a bheadh infheidhme maidir le hinstitiúidí creidmheasa. An 4 Nollaig 2020, ghlac BERS Moladh ón mBord Eorpach um Riosca Sistéamach an 4 Nollaig 2020 maidir leis an bhfógra ón Iorua go bhfuil rún aici ráta maolánach riosca shistéamaigh a shocrú i gcomhréir le hAirteagal 133 de Threoir (AE) 2013/36/AE (ESRB/2020/14), ar moladh é inar mhol sé gur cheart a mheas go bhfuil an ráta maolánach riosca shistéamaigh atá beartaithe agus atá le cur i bhfeidhm san Iorua cuí, oiriúnach, comhréireach, éifeachtach agus éifeachtúil i ndáil leis an riosca a bhfuil Aireacht Airgeadais na hIorua ag díriú air. An 4 Nollaig 2020, ghlac Buanchoiste Stáit CSTE Moladh Uimh. 1/2020/SC ó Bhuanchoiste Stáit CSTE nár mhol sé aon athrú ann ar an mbeart faoina dtugtar fógra, agus an moladh thuasluaite ó BERS á chur san áireamh.

(4)

An 30 Meán Fómhair 2022 chuir Aireacht Airgeadais na hIorua fógra foirmiúil chuig BERS maidir lena rún é a chur de cheangal ar institiúidí áirithe maolán O-SII de chaipiteal Ghnáthchothromas Leibhéal 1 a choinneáil, i gcomhréir le hAirteagal 131 den Treoir maidir le Ceanglais Chaipitil. D’admhaigh Rúnaíocht BERS go bhfuarthas an fógra an 4 Deireadh Fómhair 2022 agus chuir sí ar aghaidh é chuig Buanchoiste Stáit CSTE an 27 Deireadh Fómhair 2022 i gcomhréir le hAirteagal 131(5a) den Treoir maidir le Ceanglais Chaipitil.

(5)

Beidh feidhm ag an maolán O-SII faoina dtugtar fógra maidir le trí institiúid creidmheasa intíre, agus tá ceann amháin acu sin ina fhochuideachta a bhfuil a máthaireintiteas bunaithe i dtír eile de chuid an Limistéir Eorpaigh Eacnamaíoch. Beidh dhá cheann de na hinstitiúidí creidmheasa faoi réir maolán O-SII 1 % agus beidh ceann amháin acu faoi réir maolán 2 %.

(6)

Tá na hinstitiúidí creidmheasa aitheanta ag Aireacht Airgeadais na hIorua mar O-SIInna de bhun na gcritéar seo a leanas: (i) iomlán na sócmhainní mar sciar d’olltáirgeacht intíre (OTI) na hIorua agus/nó (ii) iasachtaí don earnáil neamhairgeadais phríobháideach mar sciar d’iomlán na n-iasachtaí don earnáil neamhairgeadais phríobháideach san Iorua. Liostaítear na critéir sin mar tháscairí roghnacha in Iarscríbhinn 2 a ghabhann leis na treoirlínte ón Údarás Baincéireachta Eorpach maidir leis na critéir chun coinníollacha chur i bhfeidhm Airteagal 131(3) de CRD a chinneadh i ndáil le measúnú a dhéanamh ar O-SIInna (4).

(7)

Ós rud é go mbeidh ráta maoláin is mó ná 5 % ann mar thoradh ar an maolán 4,5 % um riosca sistéamach agus ar na maoláin O-SII atá beartaithe, an 15 Samhain 2022 sholáthair BERS tuairim do Bhuanchoiste Stáit CSTE maidir leis an mbeart atá beartaithe.

(8)

Sa tuairim uaidh, agus sa Nóta Measúnaithe a ghabhann leis, déanann BERS athbhreithniú ar na rioscaí a dtugtar aghaidh orthu tríd an mbeart atá beartaithe agus measann sé go n-eascraíonn na rioscaí is cúis le hathshocrú an mhaoláin O-SII as an ról an-tábhachtach atá ag institiúidí a bhfuil tábhacht shistéamach leo i ngeilleagar na hIorua.

(9)

Measann BERS go bhfuil na maoláin O-SII, éifeachtach agus comhréireach, agus é á chur san áireamh go bhfuil siad carnach maidir leis an maolán um riosca sistéamach. I ndáil leis sin, cuireann BERS san áireamh go bhfuil na maoláin O-SII carnach maidir leis an maolán um riosca sistéamach. Tugann sé dá aire gurb é is aidhm do na maoláin O-SII cur le hacmhainn ionsúcháin caillteanais na n-institiúidí is tábhachtaí san Iorua agus, ar an gcaoi sin, na rioscaí cobhsaíochta airgeadais a eascraíonn as na hinstitiúidí sin a bhfuil deacrachtaí acu a laghdú. I bhfianaise a thábhachtaí atá institiúidí a bhfuil tábhacht shistéamach ag baint leo i gcóras airgeadais na hIorua mar gheall ar a méid i gcoibhneas le méid gheilleagar na hIorua agus a sciartha den mhargadh in iasachtaí don earnáil neamhairgeadais phríobháideach, measann BERS go bhfuil an beart comhréireach.

(10)

Cé go dtugann BERS dá aire gur cosúil go bhfuil forluí idir roinnt de na rioscaí a dtugann an maolán um riosca sistéamach aghaidh orthu agus an t-údar atá leis an maolán O-SII a shocrú, tagann sé ar an gconclúid go bhfuil an beart atá beartaithe iomchuí chun aghaidh a thabhairt ar na rioscaí sainaitheanta, nach bhfuil éifeachtaí díobhálacha díréireacha ag baint leis ar chobhsaíocht airgeadais na hIorua ná ar chobhsaíocht airgeadais LEE agus nach meastar go gcruthóidh sé constaic ar fheidhmiú cuí an mhargaidh inmheánaigh. Mar sin féin, tugann BERS dá aire go bhfuil táscairí sna treoirlínte ó ÚBE maidir leis an ábhar sin seachas na táscairí sin a bhaineann le méid — mar atá in úsáid ag údaráis na hIorua — a bhféadfadh impleachtaí a bheith acu do chómhalartú an mhaoláin um riosca sistéamach. Go deimhin, tugann Buanchoiste Stáit CSTE dá aire go gcuimsítear sna treoirlínte ó ÚBE maidir le O-SIInna a shainaithint táscairí a bhaineann le tábhacht don gheilleagar, tábhacht na ngníomhaíochtaí trasteorann, agus idirnascthacht leis an gcóras airgeadais. Tá forluí páirteach ag na táscairí sin leis na táscairí a úsáideann Aireacht Airgeadais na hIorua chun bonn cirt a thabhairt don mhaolán um riosca sistéamach. Tugann BERS le fios freisin gur chuir údaráis na hIorua i dtábhacht gur cuireadh na ceanglais O-SII san áireamh i gcalabrú an mhaoláin um riosca sistéamach.

(11)

Tar éis do Bhuanchoiste Stáit CSTE scrúdú a dhéanamh ar an bhfógra ó Aireacht Airgeadais na hIorua an 30 Meán Fómhair 2022 agus an tuairim ó BERS á cur san áireamh, maidir le comhcheangal an ráta mhaolánaigh O-SII faoina dtugtar fógra do na hinstitiúidí creidmheasa lena mbaineann leis an maolán um riosca sistéamach atá i bhfeidhm maidir leis na neamhchosaintí agus na hinstitiúidí creidmheasa lena mbaineann, measann sé nach bhfuil éifeachtaí díobhálacha díréireacha i gceist an méid sin ar chóras airgeadais Páirtithe Conarthacha eile de chuid LEE ina iomláine nó ar chuid den chóras airgeadais sin, nó ar chóras airgeadais LEE ina iomláine, rud a chruthaíonn constaic ar fheidhmiú cuí an mhargaidh inmheánaigh.