(1)

Ó glacadh Rialachán (AE) 2021/241 ó Pharlaimint na hEorpa agus ón gComhairle (4) lena mbunaítear an tSaoráid Téarnaimh agus Athléimneachta (“an tSaoráid”), bhí tionchar mór ag imeachtaí geopholaitiúla nach bhfacthas a macasamhail riamh roimhe a spreagadh le cogadh foghach na Rúise i gcoinne na hÚcráine agus ag an mbealach ar ghéaraigh siad iarmhairtí ghearchéim COVID-19 go díreach agus go hindíreach, ar shochaí agus ar gheilleagar an Aontais, ar a dhaoine agus ar a chomhtháthú eacnamaíoch, sóisialta agus críochach. Go háirithe, tá sé níos soiléire ná riamh go bhfuil slándáil fuinnimh agus neamhspleáchas fuinnimh an Aontais fíor-riachtanach chun téarnamh rathúil inbhuanaithe cuimsitheach ó ghéarchéim COVID-19 a bhaint amach, mar is gnéithe móra iad freisin a chuireann le hathléimneacht gheilleagar an Aontais.

(2)

Mar gheall ar na naisc dhíreacha idir téarnamh inbhuanaithe, cur le hathléimneacht an Aontais agus slándáil fuinnimh an Aontais, laghdú ar spleáchas ar bhreoslaí iontaise, go háirithe ón Rúis, agus ról an Aontais in aistriú cóir agus cuimsitheach, is ionstraim dhea-oiriúnach í an tSaoráid chun rannchuidiú le freagairt an Aontais ar na dúshláin sin atá ag teacht chun cinn. Is amhlaidh atá freisin i bhfianaise reachtaíocht aeráide agus chomhshaoil an Aontais agus ghealltanais idirnáisiúnta an Aontais, agus go háirithe Comhaontú Pharás a glacadh faoi Chreat-Choinbhinsiún na Náisiún Aontaithe ar an Athrú Aeráide (5).

(3)

I nDearbhú Versailles an 10 agus 11 Márta 2022, d’iarr na Ceannairí Stáit agus Rialtais ar an gCoimisiún plean REPowerEU a mholadh faoi dheireadh mhí na Bealtaine an bhliain chéanna chun deireadh a chur de réir a chéile le spleáchas an Aontais ar allmhairiú breosla iontaise ón Rúis, a athdhearbhaíodh an cuireadh sin sna Conclúidí ón gComhairle Eorpach an 24 agus 25 Márta 2022. Ba cheart an sprioc sin a bhaint amach i bhfad roimh 2030 ar bhealach atá comhsheasmhach leis an gComhaontú Glas don Eoraip, a leagtar amach sa Teachtaireacht ón gCoimisiún an 11 Nollaig 2019, agus leis na cuspóirí aeráide do 2030 agus do 2050 a chumhdaítear le Rialachán (AE) 2021/1119 ó Pharlaimint na hEorpa agus ón gComhairle (6).

(4)

Ba cheart feabhas a chur ar chumas na Saoráide tacú le hathchóirithe agus le hinfheistíochtaí atá tiomanta do sholáthairtí fuinnimh a éagsúlú, go háirithe breoslaí iontaise, agus chun athléimneacht, slándáil agus inbhuanaitheacht chóras fuinnimh an Aontais a mhéadú, rud a chuirfeadh le hinacmhainneacht fuinnimh agus, ar an gcaoi sin, a neartódh neamhspleáchas straitéiseach an Aontais in éineacht le geilleagar oscailte. Chun na cuspóirí sin a bhaint amach, ní mór don Aontas éifeachtúlacht fuinnimh agus iontaofacht agus athléimneacht na ngréasán tarchurtha agus dáileacháin a mhéadú, chun solúbthacht an chórais a chur chun cinn, chun plódú a íoslaghdú, lena n-áirítear trí bhíthin acmhainneacht mhéadaithe stórála eangaí agus leictreachais, chun digitiú a chur chun cinn, agus chun slabhraí soláthair athléimneacha, cibearshlándáil agus cosaint agus oiriúnú aeráide an bhonneagair uile a áirithiú, agus spleáchais straitéiseacha fuinnimh á laghdú ag an am céanna.

(5)

Chun comhlántacht, comhsheasmhacht agus comhleanúnachas na mbeartas agus na ngníomhaíochtaí arna ndéanamh ag an Aontas agus ag na Ballstáit a uasmhéadú chun neamhspleáchas, slándáil agus inbhuanaitheacht sholáthar fuinnimh an Aontais a chothú, ba cheart na hathchóirithe agus na hinfheistíochtaí sin a bhaineann le fuinneamh a bhunú trí “caibidil REPowerEU” thiomnaithe de na pleananna téarnaimh agus athléimneachta.

(6)

Leis an aistriú éifeachtach i dtreo fuinneamh glas agus laghdú tapa ar an spleáchas ar fhuinneamh breosla iontaise ar bhealach cuimsitheach, éilítear bearta chun borradh a chur faoin éifeachtúlacht fuinnimh agus faoin gcoigilteas fuinnimh i bhfoirgnimh agus sa bhonneagar criticiúil fuinnimh gaolmhar agus chun tionscail a dhícharbónú ar bhealach níos tapúla. Tá sé ríthábhachtach an infheistíocht i mbearta éifeachtúlachta fuinnimh a mhéadú go tapa, amhail réitigh téimh agus fuaraithe inbhuanaithe éifeachtúla a ghlacadh, ar bealach éifeachtach iad chun aghaidh a thabhairt ar chuid de na dúshláin is práinní a bhaineann leis an soláthar fuinnimh agus leis an gcostas fuinnimh. Dá bhrí sin, ba cheart tacaíocht a thabhairt freisin d’athchóirithe agus d’infheistíochtaí lena méadaítear éifeachtúlacht fuinnimh, lena ndícharbónaítear an tionsclaíocht – lena n-áirítear trí úsáid a bhaint as breoslaí ísealcharbóin, amhail hidrigin ísealcharbóin agus trí hidrigin in-athnuaite agus breoslaí in-athnuaite eile de thionscnamh neamhbhitheolaíoch a ghlacadh, agus coigilteas fuinnimh gheilleagair na mBallstát a mhéadú, i gcomhréir le spriocanna fuinnimh agus aeráide agus creat dlíthiúil an Aontais. Ba cheart don Choimisiún, go háirithe, na Ballstáit a spreagadh chun bearta lena dtacaítear le dícharbónú na tionsclaíochta a áireamh ina gcaibidlí REPowerEU.

(7)

Táthar ag súil go dtiocfaidh laghdú ar spleáchas foriomlán fuinnimh an Aontais mar thoradh ar chéimniú amach an spleáchais ar allmhairí breosla iontaise ón Rúis. Leis na caibidlí REPowerEU ba cheart rannchuidiú le neamhspleáchas straitéiseach an Aontais a mhéadú agus a neartú gan a spleáchas ar allmhairí amhábhar ó thríú tíortha a mhéadú an iomarca.

(8)

Agus na pleananna téarnaimh agus athléimneachta mar aon le caibidlí REPowerEU á n-ullmhú, ba cheart do na Ballstáit a mbeartais eacnamaíocha a chomhordú ar bhealach a mbainfear amach na cuspóirí maidir le comhtháthú eacnamaíoch, sóisialta agus críochach a leagtar amach in Airteagal 174 den Chonradh, arb é is aidhm dóibh na héagothromaíochtaí idir leibhéil forbartha na réigiún éagsúil agus cúlmhaireacht na réigiún is mídheisiúla a laghdú, agus aird ar leith á tabhairt ar limistéir agus oileáin atá iargúlta, forimeallach agus scoite amach, agus a bhfuil srianta breise ag baint leo cheana féin.

(9)

Chun raon feidhme fhreagairt an Aontais a uasmhéadú, ba cheart a cheangal ar na Ballstáit uile a mbeidh plean téarnaimh agus athléimneachta á thíolacadh acu tar éis theacht i bhfeidhm an Rialacháin seo,ina n-iarrtar úsáid a bhaint as cistiú breise i bhfoirm iasachtaí, nó, i gcomhréir le rialacha nua atá le bunú faoin Rialachán leasaitheach seo, ó lamháltais ón gcóras trádála astaíochtaí a chur ar ceant faoi Threoir 2003/87/CE ó Pharlaimint na hEorpa agus ón gComhairle (7) nó ó aistrithe ó Chúlchiste Coigeartaithe Brexit arna bhunú le Rialachán (AE) 2021/1755 ó Pharlaimint na hEorpa agus ón gComhairle (8) caibidil REPowerEU a áireamh ina bplean téarnaimh agus athléimneachta. I gcomhréir leis an bhféidearthacht atá ann cheana, faoi Rialachán (AE) 2021/241,) dréachtphlean téarnaimh agus athléimneachta a thíolacadh, agus chun a áirithiú go n-ullmhófar caibidlí REPowerEU go cuí, féadfaidh na Ballstáit dréachtchaibidil REPowerEU a thíolacadh sula gcuirfear plean modhnaithe téarnaimh agus athléimneachta isteach. Ba cheart ualach riaracháin míchuí a sheachaint.

(10)

Ba cheart go n-áireofaí i gcaibidlí REPowerEU athchóirithe agus infheistíochtaí nua, ón 1 Feabhra 2022 ar aghaidh, a rannchuidíonn le cuspóirí REPowerEU agus a théann i ngleic leis an ngéarchéim de bharr imeachtaí geopholaitiúla a tharla le déanaí. Mar sin féin, is féidir bearta a áirítear sna cinntí cur chun feidhme ón gComhairle a glacadh cheana féin a rannchuidíonn le cuspóirí REPowerEU a áireamh i gcaibidil REPowerEU, más rud é, tar éis an ranníocaíocht uasta airgeadais a nuashonrú, go mbeidh an Ballstát lena mbaineann faoi réir laghdú ar a ranníocaíocht uasta airgeadais. Sa chás sin, ba cheart an Ballstát a bheith in ann bearta den sórt sin a chur san áireamh ina chaibidil REPowerEU suas le méid na gcostas measta is comhionann leis an laghdú ar an ranníocaíocht uasta airgeadais.

(11)

Ba cheart Ballstát a bheith in ann an chuid uas-scálaithe de bhearta a áirítear sa chinneadh cur chun feidhme ón gComhairle a glacadh cheana a áireamh ina chaibidil REPowerEU, mar aon leis na garspriocanna agus na spriocanna comhfhreagracha. Ba cheart a thabhairt isteach leis an méadú sin feabhas substainteach ar leibhéal uaillmhéine na mbeart, mar a léirítear i ndearadh nó i leibhéal na ngarspriocanna agus na spriocanna comhfhreagracha, agus ag an am céanna, cur leis na bearta a áirítear sa chinneadh cur chun feidhme ón gComhairle a glacadh cheana.

(12)

Ba cheart do Bhallstát a chaibidil REPowerEU a chur isteach i bhfoirm aguisín a ghabhann lena phlean téarnaimh agus athléimneachta. Ba cheart míniú a bheith i gcaibidil REPowerEU ar an gcaoi a bhfuil na bearta a áirítear inti comhleanúnach le hiarrachtaí an Bhallstáit lena mbaineann cuspóirí REPowerEU a bhaint amach, agus na bearta a áirítear sna cinntí cur chun feidhme ón gComhairle a glacadh cheana á gcur san áireamh, chomh maith le míniú ar rannchuidiú foriomlán na mbeart sin agus ar bhearta comhlántacha nó tionlacain náisiúnta eile arna maoiniú ag an Aontas le cuspóirí REPowerEU.

(13)

Ba cheart caibidlí REPowerEU, inter alia, a bheith ag rannchuidiú le sciar na bhfuinneamh inbhuanaithe agus inathnuaite sa mheascán fuinnimh a mhéadú agus le haghaidh a thabhairt ar scrogaill sa bhonneagar fuinnimh. A mhéid a bhaineann le bonneagar gáis nádúrtha, ba cheart tógáil le hathchóirithe agus infheistíochtaí i gcaibidlí REPowerEU chun an soláthar a éagsúlú ón Rúis ar na riachtanais atá sainaitheanta faoi láthair tríd an measúnú arna dhéanamh agus arna chomhaontú ag an Líonra Eorpach d’Oibreoirí Córais Tarchurtha Gáis, a bunaíodh de mheon na dlúthpháirtíochta a mhéid a bhaineann le slándáil an tsoláthair, agus riachtanais slándála fuinnimh straitéisí an Bhallstáit lena mbaineann agus na bearta ullmhachta treisithe, lena n-áirítear stóráil fuinnimh, a rinneadh chun iad féin a chur in oiriúint do bhagairtí nua geopholaitiúla a chur san áireamh, gan an bonn a bhaint den rannchuidiú fadtéarmach leis an aistriú glas.

(14)

Ba cheart critéar iomchuí measúnaithe a chur isteach mar bhonn chun go ndéanfaidh an Coimisiún measúnú ar athchóirithe agus ar infheistíochtaí sna caibidlí REPowerEU agus chun go n-áiritheoidh sé go mbeidh athchóirithe agus infheistíochtaí sin oiriúnach chun na cuspóirí sonracha REPowerEU a bhaint amach. Ba cheart rátáil A a bheith ag teastáil faoin gcritéar measúnaithe nua sin le go ndéanfaidh an Coimisiún measúnú dearfach ar an bplean téarnaimh agus athléimneachta ábhartha.

(15)

Ní leor infheistíochtaí i mbonneagar agus i dteicneolaíochtaí amháin chun a áirithiú go laghdófar spleáchas ar bhreoslaí iontaise i bhfianaise na n-easnamh lucht saothair agus scileanna atá ann faoi láthair. Sa chomhthéacs sin, is féidir acmhainní a thiomnú cheana féin d’athsciliú agus d’uas-sciliú daoine, chun tuilleadh scileanna glasa a thabhairt don lucht saothair mar aon le hacmhainní a thiomnú don taighde agus forbairt réiteach nuálach a bhaineann leis an aistriú glas. Moltar do na Ballstáit tuilleadh infheistíochta a dhéanamh in athsciliú agus uas-sciliú, go háirithe le haghaidh scileanna agus teicneolaíochtaí digiteacha gaolmhara agus glasa chun a áirithiú nach bhfágfar aon duine ar lár le linn an aistrithe ghlais. I gcás ina n-áiríonn Ballstát ina chaibidil REPowerEU bearta a bhaineann le hathsciliú agus uas-sciliú daoine, ba cheart don Choimisiún a mheas cé acu an bhfuil bearta den sórt sin ag cur go mór le hathcháiliú an lucht saothair i dtreo scileanna glasa agus scileanna digiteacha gaolmhara.

(16)

I bhfianaise thionchar eacnamaíoch agus sóisialta na géarchéime fuinnimh atá ann faoi láthair, ina bhfuil praghsanna arda fuinnimh ag géarú thionchar ghéarchéim COVID-19, trí ualach airgeadais na dtomhaltóirí a mhéadú tuilleadh, go háirithe i gcás na dtomhaltóirí is leochailí, lena n-áirítear teaghlaigh a bhfuil ioncam íseal acu nó cuideachtaí leochaileacha lena n-áirítear micrifhiontair, agus i gcás fiontair bheaga agus mheánmhéide, agus mar aitheantas do phrionsabail Cholún Eorpach na gCeart Sóisialta, ba cheart é a bheith indéanta bearta a áireamh i gcaibidlí REPowerEU freisin chun cabhrú le haghaidh a thabhairt go struchtúrach ar chásanna bochtaineachta fuinnimh, trí athchóirithe agus infheistíochtaí fadtéarmacha. Le hathchóirithe agus infheistíochtaí a bhfuil sé mar aidhm acu dul i ngleic leis an mbochtaineacht fuinnimh, ba cheart leibhéal níos airde tacaíochta airgeadais a sholáthar do scéimeanna éifeachtúlachta fuinnimh, lena n-áirítear trí ionstraimí airgeadais tiomnaithe, beartais agus scéimeanna fuinnimh ghlain chun an t-éileamh ar fhuinneamh a laghdú do na teaghlaigh agus do chuideachtaí lena n-áirítear micrifhiontair, fiontair bheaga agus mheánmhéide a bhfuil deacrachtaí móra acu mar gheall ar bhillí arda fuinnimh.

(17)

Ba cheart bearta laghdaithe éilimh fuinnimh arna ndéanamh ag na Ballstáit a bheith mar dhreasacht d’infheistíochtaí i gcoigilteas fuinnimh.

(18)

Ba cheart cur i bhfeidhm córais nua maidir le caibidlí REPowerEU a bheith gan dochar do gach ceanglas dlíthiúil eile faoi Rialachán (AE) 2021/241, mura bhforáiltear a mhalairt.

(19)

Leis an bplean téarnaimh agus athléimneachta, lena n-áirítear caibidil REPowerEU, ba cheart rannchuidiú le haghaidh a thabhairt go héifeachtach ar na dúshláin ar fad nó ar fho-thacar suntasach de na dúshláin arna sainaithint sna moltaí tír-shonracha, lena n-áirítear na moltaí tír-shonracha arna nglacadh faoi thimthriall Sheimeastar Eorpach 2022 ina ndéantar tagairt inter alia do na dúshláin fuinnimh atá roimh na Ballstáit.

(20)

Tá infheistíochtaí suntasacha digiteacha i gceist le haistriú éifeachtach i dtreo fuinneamh glas agus le laghdú ar spleáchas ar fhuinneamh. I bhfianaise Rialachán (AE) 2021/241, ba cheart do na Ballstáit míniú a thabhairt ar an gcaoi a bhfuiltear ag súil leis go rannchuideoidh na bearta sa phlean téarnaimh agus athléimneachta, lena n-áirítear iad siúd i gcaibidil REPowerEU, leis an aistriú digiteach agus le haghaidh a thabhairt ar na dúshláin a eascraíonn as agus an dtugann siad cuntas ar an méid a chuireann siad leis an sprioc dhigiteach bunaithe ar an modheolaíocht le haghaidh clibeáil dhigiteach. Mar sin féin, i bhfianaise phráinn agus thábhacht na ndúshlán fuinnimh atá roimh an Aontas gan fasach, níor cheart athchóirithe agus infheistíochtaí i gcaibidil REPowerEU a chur san áireamh agus leithdháileadh iomlán an phlean á ríomh chun críche an ceanglas maidir le sprioc dhigiteach a leagtar amach i Rialachán (AE) 2021/241 a chur i bhfeidhm. Mar sin féin, ba cheart do na Ballstáit féachaint le bearta a chur san áireamh i gcaibidlí REPowerEU, a mhéid is féidir, ar bearta iad lena rannchuidítear leis an sprioc dhigiteach bunaithe ar na modheolaíochta le haghaidh clibeáil dhigiteach.

(21)

Tá nósanna imeachta fada riaracháin ar chuid de na príomhbhacainní ar fhuinnimh in-athnuaite a imscaradh. Áirítear ar na bacainní sin castacht na rialacha is infheidhme maidir le suíomhanna a roghnú agus údaruithe riaracháin le haghaidh na dtionscadal, castacht agus fad an mheasúnaithe ar thionchar comhshaoil na dtionscadal, saincheisteanna nasctha leis an eangach, agus srianta foirne na n-údarás deonaithe ceadanna nó oibreoirí eangaí. Is gá na próisis riaracháin deonaithe ceadanna le haghaidh foinsí inathnuaite fuinnimh agus bonneagar eangaí cumhachta gaolmhar a shimpliú a thuilleadh agus dlús a chur leo chun a áirithiú go mbainfidh an tAontas a spriocanna fuinnimh agus aeráide amach. Rinneadh moltaí do na Ballstáit i gcomhthéacs Sheimeastar Eorpach 2022 chun dlús a chur le himscaradh fuinnimh in-athnuaite. Mar a fógraíodh i dteachtaireacht ón gCoimisiún an 18 Bealtaine 2022 dar teideal “Plean REPowerEU”, mhol an Coimisiún leasú a dhéanamh ar Threoir (AE) 2018/2001 ó Pharlaimint na hEorpa agus ón gComhairle (9) maidir le fuinneamh ó fhoinsí inathnuaite, arb é is aidhm di próiseas deonaithe ceadaithe níos tapúla a bhunú d’fhoinsí fuinnimh in-athnuaite. Ina theannta sin, le Rialachán (AE) 2022/2577 ón gComhairle (10), lena leagtar síos creat chun dlús a chur le himscaradh fuinnimh in-athnuaite, tugadh isteach rialacha éigeandála sealadacha.

(22)

De bhun Airteagal 18(4), pointe (q), de Rialachán (AE) 2021/241, ba cheart do na Ballstáit achoimre ar an bpróiseas comhairliúcháin, a dhéantar i gcomhréir le creataí dlíthiúla náisiúnta, a sholáthar d’údaráis áitiúla agus réigiúnacha, comhpháirtithe sóisialta agus páirtithe leasmhara ábhartha eile a bhaineann le cur chun feidhme a bpleananna téarnaimh agus athléimneachta. Ba cheart an comhairliúchán sin a chomhlánú chun aghaidh a thabhairt ar athchóirithe agus infheistíochtaí atá le cur san áireamh i gcaibidil REPowerEU a d’fhéadfadh a bheith ann, ar bhealach lena dtugtar dóthain ama do pháirtithe leasmhara freagairt agus ag an am céanna fós a áirithiú go gcuirfidh an Ballstát lena mbaineann bailchríoch tapa ar chaibidil REPowerEU. San achoimre nuashonraithe, ba cheart a leagan amach na páirtithe leasmhara a ndeachthas i gcomhairle leo, ba cheart toradh an chomhairliúcháin chomhlántaigh a mhíniú inti agus ba cheart breac-chuntas a thabhairt ar an gcaoi ar léiríodh an t-ionchur a fuarthas ó na páirtithe leasmhara i gcaibidlí REPowerEU.

(23)

Tá cur i bhfeidhm an phrionsabail “gan dochar suntasach a dhéanamh” de réir bhrí Airteagal 17 de Rialachán (AE) 2020/852 ó Pharlaimint na hEorpa agus ón gComhairle (11) (an prionsabal “gan dochar suntasach a dhéanamh”) bunriachtanach chun a áirithiú go gcuirfear chun feidhme ar bhealach inbhuanaithe na hathchóirithe agus na hinfheistíochtaí a dhéantar mar chuid den téarnamh ó ghéarchéim COVID-19. Ba cheart go leanfadh sé d’fheidhm a bheith aige maidir leis na hathchóirithe agus na hinfheistíochtaí a dtacaíonn an tSaoráid leo, agus díolúine spriocdhírithe amháin ann chun ábhair imní láithreacha an Aontais maidir le slándáil fuinnimh a chosaint. I bhfianaise an chuspóra maidir le soláthairtí fuinnimh a éagsúlú ó sholáthróirí Rúiseacha, ba cheart do na hathchóirithe agus na hinfheistíochtaí is gá, a leagtar amach i gcaibidlí REPowerEU, chun feabhas a chur ar an mbonneagar fuinnimh agus ar na saoráidí fuinnimh chun freastal ar riachtanais láithreacha maidir le slándáil an tsoláthair le haghaidh gáis a bheith incháilithe le haghaidh tacaíocht airgeadais faoin tSaoráid fiú mura gcomhlíonann siad an prionsabal “gan dochar suntasach a dhéanamh”. De ghnáth, eisiatar bonneagar agus saoráidí ola ó chaibidil REPowerEU. De mhaolú air sin, maidir le Ballstát a bhí faoi réir an mhaolaithe eisceachtúil shealadaigh in Airteagal 3m(4) de Rialachán (AE) Uimh. 833/2014 ón gComhairle (12) go dtí go dtiocfaidh an Rialachán leasaitheach seo i bhfeidhm, mar gheall ar a spleáchas sonrach ar amhola agus ar a shuíomh geografach, ba cheart dó a bheith in ann an bonneagar agus na saoráidí ola is gá chun freastal ar riachtanais láithreacha maidir le slándáil an tsoláthair a áireamh i gcaibidil REPowerEU.

Ba cheart don Choimisiún a mheas an bhfuil bearta a meastar go dtabharfar aghaidh ar riachtanais láithreacha maidir le slándáil an tsoláthair fuinnimh leo incháilithe do mhaolú ar an bprionsabal “gan dochar suntasach a dhéanamh”. Chun críche an mheasúnaithe sin, ba cheart an Coimisiún a bheith in ann breithniú a dhéanamh, as measc imthosca eile, ar an riosca a ghabhann le héifeachtaí gaibhnithe agus ar neamh-infhaighteacht roghanna malartacha atá níos glaine agus indéanta ó thaobh na teicneolaíochta agus na heacnamaíochta de a d’fhéadfaí a úsáid laistigh d’amlíne inchomparáide. Ba cheart an measúnú sin a bheith comhréireach, agus aird á tabhairt ar an bpráinn a bhaineann le cuspóirí REPowerEU a bhaint amach. I gcás amhrais, ba cheart an Coimisiún a bheith in ann a iarraidh ar na Ballstáit faisnéis ábhartha a sholáthar chun tacú leis an measúnú. Ba cheart an mheastóireacht ar roghanna malartacha níos glaine a dhéanamh laistigh de theorainneacha réasúnta.

(24)

Ba cheart gach beart sna pleananna téarnaimh agus athléimneachta a dhéanamh i gcomhréir le acquis comhshaoil an Aontais is infheidhme agus le acquis comhshaoil náisiúnta is infheidhme, go háirithe maidir le measúnú ar an tionchar ar an gcomhshaol agus cosaint an dúlra. Maidir le bearta a bhaineann tairbhe as an maolú ar an bprionsabal “gan dochar suntasach a dhéanamh”, ba cheart do na Ballstáit iarrachtaí sásúla a dhéanamh chun an dochar a d’fhéadfaí a dhéanamh do chuspóirí comhshaoil de réir bhrí Airteagal 17 de Rialachán (AE) 2020/852 a theorannú, i gcás inarb indéanta, agus chun an dochar a mhaolú, trí bhearta eile, lena n-áirítear bearta i gcaibidlí REPowerEU.

(25)

Ba cheart caibidlí REPowerEU a bheith comhsheasmhach le pleananna náisiúnta fuinnimh agus aeráide na mBallstát agus le spriocanna aeráide an Aontais a leagtar amach i Rialachán (AE) 2021/1119.

(26)

Mar léiriú ar an gComhaontú Glas don Eoraip mar straitéis fáis inbhuanaithe na hEorpa agus ar a thábhachtaí atá sé le dul i ngleic leis an athrú aeráide i gcomhréir le gealltanais an Aontais Comhaontú Pháras agus Spriocanna Forbartha Inbhuanaithe na Náisiún Aontaithe a chur chun feidhme, leis an tSaoráid rannchuideofar le bearta aeráide agus inbhuanaitheacht comhshaoil a phríomhshruthú agus leis an sprioc fhoriomlán go mbeidh 30 % den chaiteachas i mbuiséad an Aontais ag tacú le cuspóirí aeráide a ghnóthú. Chuige sin, leis na bearta a dtacaíonn an tSaoráid leo agus a áirítear i bpleananna téarnaimh agus athléimneachta Ballstát, ba cheart rannchuidiú go héifeachtach leis an aistriú glas, lena n-áirítear an bhithéagsúlacht, nó le haghaidh a thabhairt ar na dúshláin a eascraíonn as, agus ba cheart gurb ionann iad agus 37 % ar a laghad de leithdháileadh iomlán an phlean téarnaimh agus athléimneachta agus 37 % ar a laghad de chostais mheasta iomlána na mbeart i gcaibidil REPowerEU, bunaithe ar an modheolaíocht le haghaidh rianú aeráide a leagtar amach in Iarscríbhinn VI a ghabhann le Rialachán (AE) 2021/241. Ba cheart an mhodheolaíocht sin a úsáid dá réir sin le haghaidh bearta nach féidir a shannadh go díreach do réimse idirghabhála a liostaítear san Iarscríbhinn sin. Má aontaíonn an Ballstát lena mbaineann agus an Coimisiún, ba cheart é a bheith indéanta na comhéifeachtaí le haghaidh tacaíocht do na cuspóirí aeráide a mhéadú go dtí 40 % nó 100 % i gcomhair infheistíochtaí aonair, mar a mhínítear sa phlean téarnaimh agus athléimneachta, chun bearta tionlacain athchóiriúcháin a mhéadaíonn go hinchreidte a dtionchar ar na cuspóirí aeráide a chur san áireamh. Chuige sin, ba cheart é a bheith indéanta na comhéifeachtaí le haghaidh tacaíocht do na cuspóirí aeráide a mhéadú suas go dtí méid iomlán de 3 % de leithdháileadh an phlean téarnaimh agus athléimneachta le haghaidh infheistíochtaí aonair. Leis an tSaoráid, ba cheart tacú le gníomhaíochtaí lena n-urramófar go hiomlán caighdeáin agus tosaíochtaí an Aontais ó thaobh na haeráide agus an chomhshaoil de agus an prionsabal “gan dochar suntasach a dhéanamh”.

(27)

Ba cheart do na Ballstáit, i gcás inarb ábhartha, bearta a bhfuil gné nó éifeacht trasteorann nó ilnáisiúnta acu, arna sainaithint sa mheasúnú ar riachtanais is déanaí ón gCoimisiún, a áireamh i gcaibidlí REPowerEU, a rannchuideoidh le breisluach Eorpach a ghiniúint, i measc nithe eile. Ba cheart a chur san áireamh freisin go bhféadfadh éifeachtaí iarmharta a bheith ag bearta a dhéantar i mBallstát amháin ar Bhallstáit eile. Ba cheart don Choimisiún an comhar idir na Ballstáit a éascú a luaithe is féidir d’fhonn bearta a fhorbairt a bhfuil gné nó éifeacht trasteorann nó ilnáisiúnta acu lena n-áireamh i gcaibidlí REPowerEU. Ba cheart do na Ballstáit a ndícheall a dhéanamh chun a áirithiú gurb ionann na bearta sin agus méid arb ionann é agus 30 % ar a laghad de chostais mheasta na mbeart i gcaibidil REPowerEU. Sa bhreis ar bhearta a bhfuil gné thrasteorann nó ilnáisiúnta nó éifeacht acu, féadfaidh bearta ar an leibhéal náisiúnta a rannchuidíonn le soláthar fuinnimh a dhaingniú san Aontas ina iomláine, i gcomhréir le cuspóirí REPowerEU, go háirithe maidir le haghaidh a thabhairt ar na scrogaill atá ann cheana ó thaobh tarchur, dáileadh agus stóráil fuinnimh de, mar a shainaithnítear sa mheasúnú is déanaí ón gCoimisiún ar riachtanais, rud a mhéadóidh ar an bpoitéinseal maidir le sreabha trasteorann idir na Ballstáit, agus ar an gcaoi sin ba cheart a mheas go bhfuil gné nó éifeacht trasteorann nó ilnáisiúnta ag baint le sreabha trasteorann idir na Ballstáit. Ba cheart a mheas freisin go bhfuil éifeacht dhearfach trasteorann ag bearta lena laghdaítear an spleáchas ar bhreoslaí iontaise agus lena laghdaítear an t-éileamh ar fhuinneamh toisc go ndéanann siad acmhainneacht nó soláthar a shaoradh tuilleadh do Bhallstáit eile.

(28)

Ba cheart critéar iomchuí measúnaithe a chur leis mar bhonn chun go ndéanfaidh an Coimisiún measúnú ar ghné nó éifeacht trasteorann nó ilnáisiúnta na n-athchóirithe agus na n-infheistíochtaí a áirítear i gcaibidlí REPowerEU.

(29)

Ba cheart tuilleadh dreasachtaí a thabhairt do na Ballstáit tacaíocht iasachta a iarraidh chun a áirithiú go nglacfaidh na Ballstáit na cistí atá ar fáil agus prionsabail na córa comhionainne, na dlúthpháirtíochta, na comhréireachta agus na trédhearcachta á gcomhlíonadh acu. Chuige sin, ba cheart do na Ballstáit a chur in iúl, chomh soiléir agus is féidir, don Choimisiún ar a dhéanaí 30 lá tar éis theacht i bhfeidhm an Rialacháin seo, cibé acu an bhfuil nó nach bhfuil sé ar intinn acu iarraidh ar thacaíocht iasachta a chur isteach. Ba cheart don Choimisiún forléargas a chur faoi bhráid Pharlaimint na hEorpa agus na Comhairle, ag an am céanna, ar théarmaí comhionanna agus gan moill mhíchuí ar na rúin arna gcur in iúl ag na Ballstáit agus ar an mbealach chun cinn atá beartaithe chun na hacmhainní atá ar fáil a dháileadh. Leis an teachtaireacht sin maidir leis an méid atá ar intinn aige, níor cheart dochar a dhéanamh do chumas na mBallstát tacaíocht iasachta a iarraidh go dtí an 31 Lúnasa 2023 i gcomhréir le hAirteagal 14 de Rialachán (AE) 2021/241, lena n-áirítear i gcás iarrataí os cionn 6,8 % dá n-ollioncam náisiúnta (OIN) i gcás ina bhfuil feidhm ag na coinníollacha ábhartha. Leis sin, ní cheart ach an oiread dochar a dhéanamh don Choimisiún dul isteach sa chomhaontú iasachta chomhfhreagrach tar éis an cinneadh cur chun feidhme ábhartha ón gComhairlea ghlacadh.

(30)

Moltar do na Ballstáit na caibidlí REPowerEU a chur isteach a luaithe is féidir agus, más féidir, faoi 2 mhí tar éis theacht i bhfeidhm an Rialacháin leasaithigh seo. I gcomhréir le hAirteagal 19(1) de Rialachán (AE) 2021/241, ba cheart don Coimisiún measúnú a dhéanamh ar an bpleanmodhnaithe téarnaimh agus athléimneachta arna gcur isteach ag an mBallstát laistigh de 2 mhí agus déanfaidh sé togra le haghaidh Cinneadh cur chun feidhme ón gComhairle. I bhfianaise a phráinní atá na dúshláin atá os comhair na mBallstát, ba cheart don Choimisiún a dhícheall a dhéanamh an measúnú ar na pleananna modhnaithe téarnaimh agus athléimneachta a thabhairt i gcrích gan moill mhíchuí.

(31)

Ina theannta sin, chun ardleibhéal uaillmhéine a dhreasú le haghaidh athchóirithe agus infheistíochtaí atá le cur san áireamh i gcaibidil REPowerEU, ba cheart foinsí cistiúcháin tiomnaithe nua a chur ar fáil.

(32)

Le Rialachán (AE) 2022/1854 ón gComhairle (13), tugtar isteach ranníocaíocht dlúthpháirtíochta shealadach do chuideachtaí agus buanbhunaíochtaí de chuid an Aontais a bhfuil gníomhaíochtaí acu in earnálacha an pheitriliam amh, an gháis nádúrtha, an ghuail agus na scaglann is infheidhme i ngach Ballstát. Iarrtar ar na Ballstáit cion de na fáltais a ghintear leis an ranníocaíocht shealadach sin a úsáid, chun sineirgí agus comhlántachtaí a chothú leis na hathchóirithe agus na hinfheistíochtaí ina gcaibidlí REPowerEU ar bhealach comhleanúnach, chun bearta a chistiú atá le cur chun feidhme ar leibhéal náisiúnta i gcomhréir le cuspóirí REPowerEU.

(33)

Mar gheall ar an staid eacnamaíoch agus gheopholaitiúil atá ann faoi láthair, ní mór don Aontas na hacmhainní atá ar fáil a shlógadh chun soláthar fuinnimh an Aontais a éagsúlú go tapa agus chun an spleáchas ar bhreoslaí iontaise a laghdú roimh 2030. Sa chomhthéacs sin, le Treoir 2003/87/CE ba cheart luach airgid eisceachtúil a cheadú trí sciar de lamháltais ón gciste don nuálaíocht agus de lamháltais a leithdháiltear ar na Ballstáita cur ar ceant, cé is moite de lamháltais a leithdháiltear ar mhaithe le dlúthpháirtíocht, fás agus idirnaisc, agus ba cheart ioncam a dhíriú i dtreo athchóirithe agus infheistíochtaí a rannchuidíonn le cuspóirí REPowerEU, faoi chuimsiú na Saoráide. Ba cheart tús áite a thabhairt do lamháltais ón gciste don nuálaíocht agus do lamháltais arna leithdháileadh ar Bhallstáit a chur ar ceant. Ba cheart cuid de na lamháltais ó chúlchiste cobhsaíochta an mhargaidh, a dhéanfaí a neamhbhailíochtú murach sin, a úsáid chun an ciste don nuálaíocht a athshlánú.

(34)

I gcomhthéacs idirghabháil éigeandála an Aontais chun aghaidh a thabhairt ar phraghsanna arda fuinnimh, a eascraíonn as tionchar chogadh foghach na Rúise i gcoinne na hÚcráine, le bearta eisceachtúla sealadacha spriocdhírithe faoi chuimsiú bheartas comhtháthaithe 2014-2020 a leagtar amach i Rialachán (AE) Uimh 1303/2013 ó Pharlaimint na hEorpa agus ón gComhairle (14), trí úsáid sholúbtha a bhaint as acmhainní de chuid Chiste Forbraíochta Réigiúnaí na hEorpa (CFRE), Chiste Sóisialta na hEorpa (CSE) agus an Chiste Chomhtháthaithe, ba cheart cabhrú le fiontair bheaga agus mheánmhéide (FBManna) a ndéanann méaduithe ar phraghsanna fuinnimh difear mór dóibh chomh maith le teaghlaigh leochaileacha, costais fuinnimh arna dtabhú agus arna n-íoc ón 1 Feabhra 2022 ar aghaidh a chumhdach. Tá an tacaíocht sin ag teacht go hiomlán le cuspóirí REPowerEU.

(35)

Go háirithe, ba cheart úsáid eisceachtúil a bhaint as CFRE chun tacaíocht caipitil oibre a chur ar fáil do FBManna a ndéanann méaduithe ar phraghsanna fuinnimh difear mór dóibh. Maidir le tacaíocht do FBManna a ndéanann méaduithe ar phraghsanna fuinnimh difear mór dóibh, ba cheart an tacaíocht sin a bheith comhréireach agus ba cheart léi na rialacha is infheidhme maidir le Státchabhair a urramú. Thairis sin, ba cheart úsáid eisceachtúil a bhaint as CSE chun tacaíocht a thabhairt do theaghlaigh leochaileacha, mar a shainítear i rialacha náisiúnta, chun cabhrú leo a gcostais tomhaltais fuinnimh a íoc fiú in éagmais bearta a chuireann le hinfhostaitheacht na ndaoine a fhaigheann tacaíocht i.e. bearta gníomhacha. Is bearta eisceachtúla iad sin a bhfuil géarghá leo chun aghaidh a thabhairt ar an ngéarchéim fuinnimh a d’eascair as tionchar chogadh foghach na Rúise i gcoinne na hÚcráine. Áirithítear leo go mbeidh rochtain ag na daoine a fhaigheann tacaíocht ar sheirbhísí riachtanacha, agus ar an gcaoi sin rannchuidiú freisin leis na dálaí atá fabhrach don dea-shláinte is gá chun páirt a ghlacadh i margadh an tsaothair. Féadfar tacaíocht a chur ar fáil le Ciste Forbraíochta Réigiúnaí na hEorpa (CFRE), Ciste Sóisialta na hEorpa (CSE) agus leis an gCiste Chomhtháthaithe go hidirmhalartach. Ina theannta sin, sa bhreis ar CSE, ba cheart do CFRE agus an Ciste Comhtháthaithe a bheith in ann tacú le bearta coinneála poist trí scéimeanna oibre gearr-ama agus trí scéimeanna coibhéiseacha, lena n-áirítear tacaíocht do dhaoine féinfhostaithe. Tá sé d’aidhm ag scéimeanna den sórt sin fostaithe agus daoine féinfhostaithe a chosaint ar bhaol na dífhostaíochta. Tá acmhainní a leithdháiltear ar na scéimeanna sin le húsáid go heisiach chun tacú le hoibrithe agus daoine féinfhostaithe. Ba cheart tacaíocht ón Aontas do scéimeanna oibre gearr-ama agus scéimeanna coibhéiseacha den sórt sin a bheith teoranta ó thaobh ama de. Ba cheart a bheith in ann úsáid a bhaint freisin as acmhainní REACT-EU a leagtar amach in Airteagal 92a de Rialachán (AE) Uimh. 1303/2013 le haghaidh na dtrí chineál tacaíochta sin chun treisiú le hiarrachtaí leanúnacha na mBallstát i dtreo théarnamh athléimneach a ngeilleagair tar éis ghéarchéim COVID-19.

(36)

Le socruithe sonracha clársceidealaithe, ba cheart a bheith in ann acmhainní a chlársceidealú go heisiach laistigh d’aiseanna tosaíochta tiomnaithe agus rannchuidiú le tosaíochtaí infheistíochta sonracha. Chun tacaíocht shuntasach a thairiscint do na Ballstáit maidir lena n-iarrachtaí ar iarmhairtí na géarchéime fuinnimh a shrianadh, ba cheart do na Ballstáit tairbhe eisceachtúil a bhaint as ráta cómhaoinithe 100 % a bheidh le cur i bhfeidhm maidir le haiseanna tosaíochta tiomnaithe na gclár oibríochtúil lena soláthraítear tacaíocht den sórt sin go heisiach go dtí deireadh thréimhse chlársceidealaithe 2014-2020. Ba cheart do na bearta teoranta agus spriocdhírithe sin na hidirghabhálacha struchtúracha sa bheartas comhtháthaithe lena dtacaítear le táirgeadh fuinnimh ghlain agus le cur chun cinn na héifeachtúlachta fuinnimh a chomhlánú. Chun srianta buiséadacha an Aontais a chur san áireamh, ba cheart uasteorainn EUR 5 000 000 000 in 2023 a chur le híocaíochtaí ón gCoimisiún le hoibríochtaí den sórt sin faoi na tosaíochtaí tiomnaithe.

(37)

Chun solúbthacht leordhóthanach a chur ar fáil do na Ballstáit agus do réigiúin chun aghaidh a thabhairt ar na dúshláin nua atá ag teacht chun cinn, ba cheart Rialachán (AE) 2021/1060 ó Pharlaimint na hEorpa agus ón gComhairle (15) foráil a dhéanamh go mbeidh an deis ag na Ballstáit suas le 7,5 % d’acmhainní a iarraidh faoi CFRE, Ciste Shóisialta na hEorpa agus faoin gCiste Comhtháthaithe chun rannchuidiú le cuspóirí REPowerEU. Leis na cistí sin, ba cheart é a bheith indéanta tacaíocht a sholáthar do chuspóirí REPowerEU i gcás ina dtagann an tacaíocht sin faoi raon feidhme an Chiste lena mbaineann, ina rannchuidíonn sí lena chuspóirí sonracha agus ina gcomhlíonann sí na rialacha a leagtar amach i Rialachán (AE) 2021/1060 agus sa Rialachán Chiste-shonracha lena mbaineann, lena n-áirítear an prionsabal “gan dochar suntasach a dhéanamh”.

(38)

Ba cheart an fhéidearthacht a bheith ag na Ballstáit lena mbaineann, a leithdháileadh sealadach iomlán nó cuid dá leithdháileadh sealadach a aistriú ó acmhainní an Chúlchiste Coigeartaithe Brexit chuig an tSaoráid. De dheasca ghéarchéim COVID-19, ar measa fós í mar gheall ar an mbagairt ar shlándáil fuinnimh an Aontais, is measa fós na hiarmhairtí diúltacha a bhaineann le tarraingt siar na Ríochta Aontaithe as an Aontas sna Ballstáit, lena n-áirítear a réigiúin agus a bpobail áitiúla, agus earnálacha, go háirithe sna hearnálacha sin is mó a ndéanann an tarraingt siar sin dochar dóibh. Maidir leis na bearta a bheidh le cistiú faoin gCúlchiste Coigeartaithe Brexit agus na hathchóirithe agus na hinfheistíochtaí atá le cistiú faoin tSaoráid, féadfaidh siad cuspóirí comhchosúla a bheith acu agus féadfaidh siad ábhar den chineál céanna a bheith acu. I ndeireadh na dála, is é is aidhm don Chúlchiste agus don tSaoráid araon na tionchair dhiúltacha ar chomhtháthú eacnamaíoch, sóisialta agus críochach a mhaolú. Sa chomhthéacs sin, cé go ndíríonn na hathchóirithe agus na hinfheistíochtaí faoin tSaoráid go príomha ar aghaidh a thabhairt ar iarmhairtí eacnamaíocha na paindéime, féadfaidh siad rannchuidiú freisin le cur i gcoinne iarmhairtí díobhálacha gan choinne sna Ballstáit agus sna hearnálacha is mó atá thíos le Brexit. Ar deireadh, déantar gealltanais agus leithreasuithe faoi chomhair íocaíochtaí faoin gCúlchiste Coigeartaithe Brexit agus faoin tSaoráid araon a iontráil de bhreis ar uasteorainneacha an chreata airgeadais ilbhliantúil. Sa chás sin, agus aird á tabhairt ar an suaitheadh sa mhargadh fuinnimh domhanda arb iad na forbairtí geopholaitiúla is déanaí is cúis leis, is iomchuí solúbthacht a chur ar fáil do na Ballstáit trí aistrithe ón gCúlchiste Coigeartaithe Brexit chuig an tSaoráid a cheadú, rud a fhágann gur féidir freastal ar a gcuspóirí agus an comhtháthú eacnamaíoch, sóisialta agus críochach a bhaint amach, ar deireadh.

(39)

Ba cheart eisíocaíochtaí maoinithe bhreise do na Ballstáit a áiríonn caibidil REPowerEU ina phlean téarnaimh agus athléimneachta a dhéanamh de réir rialacha na Saoráide go dtí deireadh 2026.

(40)

Maidir le hiarraidh, arna cur isteach i bplean téarnaimh agus athléimneachta, ar chistiú tiomnaithe, lena n-áirítear leithdháileadh ó lamháltais an chórais trádála astaíochtaí faoi Treoir 2003/87/CE a chur ar ceant, aistrithe acmhainní ó Chiste Forbraíochta Réigiúnaí na hEorpa (CFRE), ó Chiste Sóisialta na hEorpa (CSE) agus ón gCiste Chomhtháthaithe atá faoi rialú ag Airteagal 26 de Rialachán (AE) 2021/1060 agus aistrithe acmhainní ón gCúlchiste Coigeartaithe Brexit, ar bhearta atá i gcaibidil REPowerEU ba cheart a léiriú léi riachtanas airgeadais níos airde atá nasctha le hathchóirithe agus infheistíochtaí a áirítear sa chaibidil sin.

(41)

Chun a áirithiú go dtabharfar tús áite don tacaíocht airgeadais chun freagairt níos fearr a thabhairt ar an ngéarchéim fuinnimh atá ann faoi láthair, ba cheart é a bheith indéanta, arna iarraidh sin do Bhallstát atá le tíolacadh in éineacht le caibidil REPowerEU i bplean modhnaithe téarnaimh agus athléimneachta, is féidir méid den chistiú breise is gá chun bearta dá chaibidil REPowerEU a mhaoiniú a íoc i bhfoirm dhá íocaíocht réamh-mhaoinithe.

Ba cheart don Choimisiún an chéad íocaíocht réamh-mhaoinithe a dhéanamh, a mhéid is féidir, laistigh de 2 mhí tar éis don Choimisiún dul isteach sa ghealltanas dlíthiúil chun críche Rialachán (AE) 2021/241, agus an dara híocaíocht réamh-mhaoinithe a dhéanamh laistigh de 12 mhí ó theacht i bhfeidhm an chinnidh cur chun feidhme ón gComhairle lena bhformheastar an measúnú ar an bplean téarnaimh agus athléimneachta lena n-áirítear caibidil REPowerEU. Ba cheart íocaíochtaí lena gcomhfhreagraítear don réamh-mhaoiniú a dhéanamh faoi réir na n-acmhainní atá ar fáil, go háirithe infhaighteacht na gcistí ó chuntas NextGenerationEU, cistí arna bhformheas i mbuiséad bliantúil an Aontais agus an t-ioncam a fhaightear ó cheantáil lamháltas an Chórais Trádála Astaíochtaí faoi Threoir 2003/87/CE, agus leis an réamhaistriú éifeachtach acmhainní faoi chláir bhainistíochta comhroinnte, má iarrtar sin.

(42)

Chun uasteorainneacha íocaíochta an chreata airgeadais ilbhliantúil a chomhlíonadh, ba cheart caidhp a bhunú le haghaidh íocaíochtaí a chomhfhreagraíonn don réamh-mhaoiniú le haghaidh méideanna a aistrítear faoi Rialachán (AE) 2021/1060.

(43)

Ba cheart don Choimisiún faireachán a dhéanamh ar chur chun feidhme na n-athchóirithe agus na n-infheistíochtaí a leagtar amach i gcaibidil REPowerEU agus ar a mhéid a rannchuidíonn siad le cuspóirí REPowerEU, agus eolas a chur ar fáil i ndáil leis sin, go háirithe trí mhalartuithe le linn an idirphlé téarnaimh agus athléimneachta, trí thuarisciú sa scórchlár téarnaimh agus athléimneachta, agus trí chuid ar leith sa tuarascáil bhliantúil atá le tíolacadh chuig Parlaimint na hEorpa agus chuig an gComhairle.

(44)

Bhí tionchar suntasach ag imeachtaí geopholaitiúla a tharla le déanaí ar phraghsanna fuinnimh, bia agus ábhar tógála agus ba iad ba chúis freisin le ganntanais sna slabhraí soláthair domhanda, a raibh méadú ar an mboilsciú agus dúshláin nua mar thoradh orthu, lena n-áirítear baol na bochtaineachta fuinnimh agus costas maireachtála níos airde. D’fhéadfadh freagairt ar na dúshláin sin a bheith ag teastáil. D’fhéadfadh tionchar díreach a bheith ag na forbairtí sin ar an acmhainneacht atá ann maidir leis na bearta sna pleananna téarnaimh agus athléimneachta a chur chun feidhme. A mhéid is féidir leis na Ballstáit a léiriú go bhfuil cloch mhíle nó sprioc shonrach ag baint leis na forbairtí sin, bíodh sin ina n-iomláine nó i bpáirt, nach féidir iad a bhaint amach a thuilleadh, d’fhéadfaí na cásanna sin a agairt mar imthosca oibiachtúla faoi Rialachán (AE) 2021/241. Thairis sin, a mhéid is féidir leis na Ballstáit a léiriú go bhfuil baint amach cloch mhíle nó sprioc shonrach ag teacht salach ar bhaint amach chuspóirí REPowerEU, d’fhéadfaí cásanna den sórt sin a agairt freisin mar imthosca oibiachtúla faoin Rialachán sin. Ina theannta sin, níor cheart go mbainfeadh aon iarraidh ar leasuithe an bonn de chur chun feidhme foriomlán na bpleananna téarnaimh agus athléimneachta, lena n-áirítear iarrachtaí athchóirithe agus infheistíochta na mBallstát,

(45)

Ba cheart, dá bhrí sin, Rialacháin (AE) 2021/241, (AE) Uimh. 1303/2013, (AE) 2021/1060 agus (AE) 2021/1755, agus Treoir 2003/87/CE a leasú dá réir.

(46)

Chun go bhféadfar na bearta dá bhforáiltear sa Rialachán seo a chur i bhfeidhm go pras, ba cheart an Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,

(1)

An 6 Meitheamh 2019, d’údaraigh an Chomhairle don Choimisiún a bheith rannpháirteach, thar ceann an Aontais, sa chaibidlíocht maidir leis an Dara Prótacal Breise a ghabhann le Coinbhinsiún Chomhairle na hEorpa maidir le Cibearchoireacht (CETS Uimh. 185) (“an Coinbhinsiún maidir le Cibearchoireacht”).

(2)

An 17 Samhain 2021, ghlac Coiste Airí Chomhairle na hEorpa an Dara Prótacal Breise a ghabhann leis an gCoinbhinsiún maidir le Cibearchoireacht, Prótacal i ndáil le comhar feabhsaithe agus nochtadh fianaise leictreonaí (“an Prótacal”), agus tá sé beartaithe é a oscailt lena shíniú an 12 Bealtaine 2022.

(3)

Tagann forálacha an Phrótacail faoi réimse a chumhdaítear den chuid is mó le rialacha comhchoiteanna de réir bhrí Airteagal 3(2) den Chonradh ar Fheidhmiú an Aontais Eorpaigh (CFAE), lena n-áirítear ionstraimí lena n-éascaítear comhar breithiúnach in ábhair choiriúla, lena n-áirithítear íoschaighdeáin maidir le cearta nós imeachta, mar aon le coimircí i ndáil le cosaint sonraí agus le coimircí príobháideachas.

(4)

Chuir an Coimisiún tograí reachtacha isteach freisin le haghaidh Rialachán maidir le hOrduithe Eorpacha chun Fianaise a Thabhairt ar Aird agus Orduithe Caomhnaithe Eorpacha i gcomhair fianaise leictreonach in ábhair choiriúla, agus le haghaidh Treoir lena leagtar síos rialacha comhchuibhithe maidir le hionadaithe dlíthiúla a cheapadh chun críche fianaise a bhailiú in imeachtaí coiriúla, lenar tugadh isteach Orduithe Táirgthe agus Caomhnaithe Eorpacha ceangailteacha trasteorann atá le díriú go díreach ar ionadaí de chuid soláthraí seirbhíse i mBallstát eile.

(5)

Lena rannpháirtíocht sa chaibidlíocht ar an bPrótacal, d’áirithigh an Coimisiún a chomhoiriúnacht le rialacha comhchoiteanna ábhartha an Aontais.

(6)

Tá gá le roinnt forchoimeádas, dearbhuithe, fógraí agus teachtaireachtaí maidir leis an bPrótacal chun comhoiriúnacht an Phrótacail le dlí agus beartais an Aontais a áirithiú. Tá roinnt eile acu ábhartha chun a áirithiú go gcuireann Ballstáit an Aontais ar Páirtithe iad sa Phrótacal (“na Páirtithe sa Phrótacal ar Ballstáit iad”) an Prótacal i bhfeidhm go haonfhoirmeach maidir lena gcaidrimh le tríú tíortha ar Páirtithe iad sa Phrótacal (“na Páirtithe sa Phrótacal ar tríú tíortha iad”), agus go gcuirtear an Prótacal i bhfeidhm go héifeachtach freisin.

(7)

Is gan dochar d’aon fhorchoimeádais nó dearbhuithe is mian leis na Ballstáit a dhéanamh ar bhonn aonair i gcás ina gceadóidh an Prótacal é sin atá na forchoimeádais, na dearbhuithe, na fógraí agus na teachtaireachtaí seo a dtugtar treoir do na Ballstáit ina dtaobh atá san Iarscríbhinn a ghabhann leis an gCinneadh seo.

(8)

Maidir leis na Ballstáit sin nach ndéanann na forchoimeádais, na dearbhuithe, na fógraí agus na teachtaireachtaí i gcomhréir leis an Iarscríbhinn a ghabhann leis an gCinneadh seo, a fhoirmiú tráth an tsínithe, ba cheart dóibh an méid sin a dhéanamh tráth a dhéanfar an ionstraim dhaingniúcháin, ghlactha nó formheasa a thaisceadh i dtaca leis an bPrótacal.

(9)

Tar éis dóibh an Prótacal a shíniú agus a dhaingniú, é a ghlacadh nó a fhormheas, ba cheart do na Ballstáit breathnú ar an méid a thugtar le fios san Iarscríbhinn a ghabhann leis an gCinneadh seo.

(10)

Déantar foráil sa Phrótacal maidir le nósanna imeachta meara lena gcuirtear feabhas ar rochtain trasteorann ar fhianaise leictreonach agus maidir le leibhéal ard coimircí. Dá bhrí sin, déanfar na rudaí seo a leanas de thairbhe a theacht i bhfeidhm: cuirfear leis an gcomhrac i gcoinne na cibearchoireachta agus cineálacha eile coireachta ar an leibhéal domhanda trí chomhar a éascú idir Páirtithe ar Ballstáit iad agus Páirtithe tríú tíortha, áiritheofar ardleibhéal cosanta do dhaoine aonair, agus tabharfar aghaidh ar choinbhleachtaí dlí.

(11)

Déantar foráil sa Phrótacal maidir le coimircí iomchuí i gcomhréir leis na ceanglais i ndáil le haistrithe idirnáisiúnta sonraí pearsanta faoi Rialachán (AE) 2016/679 ó Pharlaimint na hEorpa agus ón gComhairle (2) agus faoi Threoir (AE) 2016/680 ó Pharlaimint na hEorpa agus ón gComhairle (3). Dá bhrí sin, áiritheofar an méid seo a leanas lena theacht i bhfeidhm: rannchuideofar le cur chun cinn chaighdeáin an Aontais maidir le cosaint sonraí ar an leibhéal domhanda, éascófar sreabha sonraí idir Páirtithe ar Ballstáit iad agus Páirtithe tríú tíortha, agus áiritheofar go gcomhlíonfaidh Páirtithe ar Ballstáit iad a gcuid oibleagáidí faoi rialacha an Aontais maidir le cosaint sonraí.

(12)

Le teacht i bhfeidhm mear an Phrótacail, deimhneofar tábhacht an Coinbhinsiún maidir le Cibearchoireacht mar an príomhchreat iltaobhach sa chomhrac i gcoinne na cibearchoireachta é.

(13)

Ní féidir leis an Aontas an Phrótacal a dhaingniú, ós rud é nach féidir ach le stáit amháin a bheith mar pháirtithe air.

(14)

Dá bhrí sin, ba cheart a údarú do na Ballstáit an Prótacal a dhaigniú, ag gníomhú go comhpháirteach dóibh chun leas an Aontais.

(15)

Chuathas i gcomhairle leis an Maoirseoir Eorpach ar Chosaint Sonraí i gcomhréir Rialachán (AE) 2018/1725 ó Pharlaimint na hEorpa (4) agus ón gComhairle agus thug sé tuairim an 21 Eanáir 2022.

(16)

I gcomhréir le hAirteagail 1 agus 2 de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal leis an gConradh ar an Aontas Eorpach (CAE) agus le CFAE, agus gan dochar d’Airteagal 4 den Phrótacal sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(17)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, Prótacal atá i gceangal le CAE agus le CFAE, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(18)

Is iad na leaganacha Béarla agus Fraincise den Prótacal, a ghlac Coiste Airí Chomhairle na hEorpa an 17 Samhain 2021, na leaganacha barántúla den téacs,

(1)

An 30 Nollaig 2022 cuireadh iarraidh ar chlárú an tionscnaimh Eorpaigh ó na saoránaigh dar teideal “Glacadh díniteach imirceach san Eoraip a áirithiú” faoi bhráid an Choimisiúin.

(2)

Is iad seo a leanas cuspóirí an tionscnaimh mar a chuir an grúpa eagraithe in iúl iad: “Is minic nach n-urramaítear prionsabail dhínit an duine, bunluach de chuid an Aontais, leis an gcaoi a gcaitear le himircigh san Aontas Eorpach (AE). Dar linne, is é is príomhchúis leis sin neamhdhóthanacht leanúnach rialacha Eorpacha agus an easpa dlúthpháirtíochta idir na Ballstáit. Ós rud é gur ‘limistéar saoirse, slándála agus ceartais ina n-urramaítear cearta bunúsacha’ é an tAontas, iarraimidne, saoránaigh Eorpacha, ar an Aontas a áirithiú go ndéanfar imircigh a ghlacadh ar bhealach díniteach a luaithe a thiocfaidh siad isteach ina chríoch, rud a bheadh i gcomhréir leis na cearta bunúsacha a bhfuil gach duine ina dteideal faoi Chairt um Chearta Bunúsacha an Aontais Eorpaigh agus faoin dlí idirnáisiúnta. Chun cur leis sin, iarraimid, i gcomhthéacs forbartha comhbheartais tearmainn, go nglacfaí rialacháin chun: 1) sásra nua a thabhairt isteach maidir le dáileadh iarrthóirí tearmainn san Aontas, sásra a bheadh bunaithe ar shaorthoil na n-iarrthóirí tearmainn agus ar dhlúthpháirtíocht éifeachtach idir na Ballstáit (Rialachán Bhaile Átha Cliath a athbhreithniú); 2) caighdeáin ghlactha a dhéanamh ceangailteach sna Ballstáit i ndáil le bia, sláinte, tithíocht, oideachas agus obair, caighdeáin lena n-áiritheofaí dálaí maireachtála díniteacha d’iarrthóirí tearmainn ar dálaí iad a bheadh inchomparáide ar fud an Aontais.”

(3)

In Iarscríbhinn a ghabhann leis an tionscnamh, tugtar tuilleadh sonraí ar an ábhar, ar na cuspóirí agus ar an gcúlra. D’ainneoin mhian an Choimisiúin córas tearmainn agus imirce mífheidhmiúil a fheabhsú, tá roinnt athruithe reachtacha agus beartais fós le glacadh ar leibhéal an Aontais agus ar an leibhéal náisiúnta chun a áirithiú go gcaitear go díniteach leis na himircigh uile. Ar an gcéad dul síos, tá an grúpa eagraithe ag iarraidh ar an gCoimisiún sásra nua maidir le dáileadh iarrthóirí tearmainn san Aontas a bhunú trí athbhreithniú a dhéanamh ar Rialachán (AE) Uimh. 604/2013 ó Pharlaimint na hEorpa agus ón gComhairle (2) d’fhonn glacadh iarrthóirí tearmainn san Aontas a roinnt ar bhealach níos cothroime, mianta na n-iarrthóirí tearmainn a chur san áireamh mar chritéar nua, agus foráil a dhéanamh maidir le sásra dlúthpháirtíochta ceangailteach um athshocrú a bhunú idir na Ballstáit chun leithdháileadh díréireach a leigheas. Ar an dara dul síos, tá siad ag iarraidh go nglacfaí rialachán maidir le dálaí glactha iarrthóirí tearmainn san Aontas chun caighdeán maireachtála díniteach faoi dhálaí a bheadh inchomparáide ar fud an Aontais a ráthú dóibh, coinníollacha lena gceanglófaí ar na Ballstáit cearta bunúsacha a urramú ina n-iomláine, lena n-áiritheofaí go gcomhlíonfadh dálaí ábhartha glactha le haghaidh iarrthóirí tearmainn na caighdeáin oibríochtúla agus na táscairí a d’fhorbair an Oifig Tacaíochta Eorpach do Chúrsaí Tearmainn (EASO), lena ráthófaí cearta an linbh, lena n-éascófaí rochtain ar fhostaíocht agus lena ndéanfaí foráil maidir le pleananna glactha éigeandála.

(4)

Cuireadh isteach freisin doiciméad breise ina bhfuil faisnéis faoi chúlra an tionscnaimh bheartaithe ó na saoránaigh.

(5)

A mhéid a bhaineann le cuspóirí an tionscnaimh, tá sé de chumhacht ag an gCoimisiún togra le haghaidh gníomh dlí a thíolacadh chun sásra nua maidir le dáileadh iarrthóirí tearmainn a thabhairt isteach agus chun dálaí glactha ceangailteacha áirithe a leagan síos sna Ballstáit ar bhonn Airteagal 78(2) den Chonradh.

(6)

Ar na cúiseanna sin, ní thagann aon chuid den tionscnamh lasmuigh, go follasach, de chreat chumhachtaí an Choimisiúin togra le haghaidh gníomh dlí de chuid an Aontais a thíolacadh chun na Conarthaí a chur chun feidhme.

(7)

Is conclúid é sin atá gan dochar don mheasúnú ar cé acu a chomhlíonfaí nó nach gcomhlíonfaí, sa chás seo, na coinníollacha coincréiteacha substainteacha is gá chun go ngníomhódh an Coimisiún, coinníollacha lena n-áirítear comhlíonadh phrionsabail na comhréireachta agus na coimhdeachta, sin agus comhoiriúnacht do chearta bunúsacha.

(8)

Tá fianaise iomchuí curtha ar fáil ag an ngrúpa eagraithe go bhfuil na ceanglais a leagtar síos in Airteagal 5(1) agus (2) de Rialachán (AE) 2019/788 comhlíonta aige agus gur i gcomhréir le hAirteagal 5(3), an chéad fhomhír, den Rialachán sin atá na teagmhálaithe ainmnithe aige.

(9)

Ní tionscnamh é ar léir é a bheith míchuí, suaibhreosach ná cráiteach, ná ní follas go bhfuil sé contrártha do luachanna an Aontais a leagtar amach in Airteagal 2 den Chonradh ar an Aontas Eorpach ná do na cearta a chumhdaítear i gCairt um Chearta Bunúsacha an Aontais Eorpaigh.

(10)

Dá bhrí sin, ba cheart an tionscnamh dar teideal “Glacadh díniteach imirceach san Eoraip a áirithiú” a chlárú.

(11)

An chonclúid go bhfuil na coinníollacha maidir le clárú faoi Airteagal 6(3) de Rialachán (AE) 2019/788 comhlíonta, ní rud í a thugann le tuiscint go ndearbhaíonn an Coimisiún ar bhealach ar bith go bhfuil ábhar an tionscnaimh cruinn fíorasach, agus is é grúpa eagraithe an tionscnaimh amháin atá freagrach as an méid sin. Ní chuireann ábhar an tionscnaimh ach tuairimí an grúpa eagraithe in iúl, agus ní féidir a dhéanamh amach ar aon bhealach gurb iad tuairimí an Choimisiúin a léiríonn sé,

(1)

In Airteagal 6(1) de Rialachán (AE) Uimh. 952/2013, ceanglaítear gur trí leas a bhaint as teicnící leictreonacha próiseála sonraí a dhéanfar na malartuithe go léir ar fhaisnéis idir údaráis chustaim agus idir oibreoirí eacnamaíocha agus údaráis chustaim, agus stóráil faisnéise den sórt sin, mar a éilítear faoin reachtaíocht chustaim. Chun na críche sin agus i gcomhréir le hAirteagal 6(2) de Rialachán (AE) Uimh. 952/2013, dréachtaíonn an Coimisiún comhcheanglais maidir le sonraí.

(2)

Foráiltear in Airteagal 6(4) de Rialachán (AE) Uimh. 952/2013 go bhféadfaidh an Coimisiún cinntí a ghlacadh i gcásanna eisceachtúla chun ligean do Bhallstát amháin nó do roinnt Ballstát maolú ó úsáid teicnící próiseála sonraí leictreonacha chun faisnéis a mhalartú agus a stóráil, má tá bonn cirt leis an maolú sin de bharr staid shonrach an Bhallstáit iarrthaigh agus má dheonaítear é ar feadh tréimhse shonrach.

(3)

Le Cinneadh Cur Chun Feidhme (AE) 2019/2151 ón gCoimisiún (2) bunaítear an clár oibre a bhaineann le forbairt agus imscaradh na gcóras leictreonach dá bhforáiltear i gCód Custaim an Aontais (“an clár oibre”). Liostaítear sa chlár oibre na córais leictreonacha atá le forbairt agus na dátaí óna meastar go mbeidh na córais sin oibríochtúil. Chomh maith le nithe eile, sonraítear sa chlár oibre sin an tréimhse cur chun feidhme agus imscartha le haghaidh Chóras Rialaithe Allmhairí 2 i gcomhréir le hAirteagal 6(1) agus Airteagail 16, 46, 47 agus 127 go 132 de Rialachán (AE) Uimh. 952/2013.

(4)

Thairis sin, sonraítear in Airteagal 278(3)(b) de Rialachán (AE) Uimh. 952/2013 an sprioc-am a bhféadfar, go dtí é, leas a bhaint, ar bhonn idirthréimhseach, as bealaí eile seachas teicnící próiseála sonraí leictreonacha chun na forálacha a chur chun feidhme a bhaineann le dearbhuithe iontrála achoimre agus le hanailís riosca i ndáil le teacht isteach earraí i gcríoch chustaim an Aontais.

(5)

I gcomhréir leis an gclár oibre, tá na Ballstáit le bheith réidh ón 1 Márta 2023 chun an córas iontrála náisiúnta a imscaradh mar chomhpháirt náisiúnta d’Eisiúint 2 de Chóras Rialaithe Allmhairí 2 chun dearbhuithe iontrála achoimre arna mbailiú ó oibreoirí eacnamaíocha le haghaidh earraí arna n-iompar d’aer a mhalartú agus a stóráil agus tá siad le deis a thabhairt d’oibreoirí eacnamaíocha nascadh leis an gcóras laistigh de thréimhse an imscartha a mhairfidh go dtí an 2 Deireadh Fómhair 2023 agus, ó dháta a nasctha ar aghaidh, dearbhuithe iontrála achoimre a thaisceadh trí leas a bhaint as an gcóras sin.

(6)

Tháinig trí cinn de chora móra chun cinn, áfach, de chora nach raibh coinne leo ach go páirteach, a raibh tionchar nach beag acu uile ar acmhainní na mBallstát agus a bhfuil dúshláin chomhlántacha ag baint leo uile a mhéid a bhaineann leis na hacmhainní sin: bhí paindéim COVID-19 ina cúis le moilleanna móra ar fhorbairtí TF san Ostair, sa Fhrainc, sa Ghréig agus san Ísiltír. I ngeall ar tharraingt siar na Ríochta Aontaithe as an Aontas Eorpach agus an méadú a tháinig dá bharr sin ar líon na ndearbhuithe custaim, bhí ar an bhFrainc agus ar an Ísiltír atheagar a chur ar acmhainní agus ar thosaíochtaí. De bharr iarmhairtí airgeadais ionradh na Rúise ar an Úcráin ar ghníomhaíochtaí custaim na dtíortha comharsanachta nó na dtíortha sa chóngar geografach, géaraíodh ar an staid agus bhí gá le hacmhainní breise san Ostair. Go háirithe, deacrachtaí soláthair agus tairisceana, chomh maith le saincheisteanna buiséadacha agus foirne, a d’eascair as na cúinsí thuasluaite, bhí tionchar nach beag acu sin ar chumas na mBallstát na sprioc-amanna a chomhlíonadh, mar a luaigh an Bheilg, an Chróit, an Danmhairg, an Eastóin, an Fhrainc, an Ghréig, Lucsamburg, an Ostair, an Pholainn, an Rómáin agus an tSualainn.

(7)

Bhí na cúinsí sonracha sin ina gcúis le moilleanna móra ar na forbairtí leanúnacha TF agus ba iad ba chúis le gan Ballstáit áirithe bheith in ann imscaradh na modhanna TF a chur i gcrích le haghaidh chomhpháirt an chórais iontrála náisiúnta d’Eisiúint 2 de Chóras Rialaithe Allmhairí 2 faoin 1 Márta 2023. Dá bhrí sin, an 16 Bealtaine 2022 i gcas na hEastóine, an 19 Bealtaine 2022 i gcás na hÍsiltíre, an 25 Bealtaine 2022 i gcás na Rómáine, an 3 Meitheamh 2022 i gcás na Gréige, an 7 Meitheamh 2022 i gcás na Fraince, an 23 Meán Fómhair 2022 i gcás na Danmhairge, an 28 Deireadh Fómhair 2022 i gcás na hOstaire, an 15 Nollaig 2022 i gcás na Sualainne, an 19 Nollaig 2022 i gcás na Beilge, an 22 Nollaig 2022 i gcás Lucsamburg, an 23 Nollaig 2022 i gcás na Cróite agus an 23 Eanáir i gcás na Polainne, d’iarr na Ballstáit sin leas a bhaint as bealaí eile le faisnéis a mhalartú agus a stóráil seachas teicnící próiseála sonraí leictreonacha i gcomhréir le hAirteagal 6(4), an dara fomhír, de Rialachán (AE) Uimh. 952/2013.

(8)

I gcomhréir le hAirteagal 6(4), an tríú fomhír, den rialachán thuasluaite, níor cheart é a theacht de na maoluithe sin go ndéanfaí difear don mhalartú faisnéise idir an Ballstát chuig a ndírítear í agus Ballstáit eile ná do mhalartú agus stóráil faisnéise i mBallstáit eile chun an reachtaíocht chustaim a fheidhmiú. Tá an Bheilg, an Chróit, an Danmhairg, an Eastóin, an Fhrainc, an Ghréig, an Ísiltír, Lucsamburg, an Ostair, an Pholainn, an Rómáin agus an tSualainn le fógra a thabhairt don Choimisiún faoin dul chun cinn atá déanta maidir le himscaradh chóras iontrála náisiúnta Eisiúint 2 de Chóras Rialaithe Allmhairí 2 i ndáil le hearraí a iompraítear d’aer mar chuid den phróiseas tuairiscithe ar dhul chun cinn a leagtar síos in Airteagal 278a de Rialachán (AE) Uimh. 952/2013. Tá cumarsáid agus comhroinnt na faisnéise pleanála náisiúnta mar a leagtar amach in Airteagal 4 de Chinneadh Cur Chun Feidhme (AE) 2019/2151 le háirithiú.

(9)

Mar gheall ar thábhacht Chóras Rialaithe Allmhairí 2 maidir le cur chuige comhtháite AE a bhunú chun an bhainistíocht riosca custaim a threisiú agus maidir leis an tslándáil réamhtheachta agus an tsábháilteacht réamhtheachta a áirithiú, agus saorshreabhadh na trádála dlisteanaí á éascú ag an am céanna, agus mar gheall ar chineál agus ar chastacht Chóras Rialaithe Allmhairí 2, beidh iarmhairtí, i dtaca le córais TF ghaolmhara nó spleácha eile, ag na hathruithe is gá a dhéanamh chun ceanglais Chód Custaim an Aontais a ailíniú. Dá bhrí sin, ba cheart fad tréimhse an mhaolaithe a choinneáil chomh gearr agus is féidir. I bhfianaise an mhéid sin agus ag féachaint do thionchair na n-imthosca eisceachtúla ba chúis le moilleanna ar fhorbairtí leanúnacha TF Eisiúint 2 de Chóras Rialaithe Allmhairí 2 sna Ballstáit agus do staid reatha na bhforbairtí sin, ba cheart an maolú a bheith ann go ceann tréimhse nach déanaí ná an 30 Meitheamh 2023,