(1)

Tá gá le bonn trédhearcach, cuimsitheach agus iontaofa eolais staidrimh chun beartais de chuid an Aontais a dhearadh, a chur chun feidhme agus a athbhreithniú agus chun faireachán agus meastóireacht a dhéanamh orthu, ar beartais iad a bhaineann leis an talmhaíocht, go háirithe an comhbheartas talmhaíochta (CBT), lena n-áirítear bearta forbartha tuaithe, chomh maith le beartais de chuid an Aontais a bhaineann, inter alia, leis an gcomhshaol, le hoiriúnú don athrú aeráide agus maolú ar an athrú sin, le húsáid talún, le réigiúin, leis an tsláinte phoiblí, le sábháilteacht bia, le cosaint plandaí, le húsáid inbhuanaithe lotnaidicídí, le húsáid táirgí íocshláinte tréidliachta agus le spriocanna forbartha inbhuanaithe na Náisiún Aontaithe. Is féidir leis na staidrimh sin a bheith úsáideach freisin chun faireachán agus measúnú a dhéanamh ar thionchar na talmhaíochta ar phailneoirí agus ar orgánaigh ríthábhachtacha ithreach.

(2)

Ba cheart é a bheith mar aidhm le bailiú sonraí staidrimh, go háirithe ar ionchur agus aschur talmhaíochta, inter alia, bonn eolais a chur faoi phróiseas cinnteoireachta fianaisebhunaithe le sonraí nuashonraithe, ardcháilíochta agus inrochtana, go háirithe na sonraí is gá d’fhorbairt na dtáscairí agra-chomhshaoil, agus ba cheart é a bheith mar aidhm leis tacú le dul chun cinn an Chomhaontaithe Ghlais don Eoraip i dteannta leis na straitéisí gaolmhara arb iad an Straitéis “Ón bhFeirm go dtí an Forc” agus an Straitéis Bhithéagsúlachta iad, leis an bplean gníomhaíochta maidir le truailliú nialasach agus leis an bplean gníomhaíochta maidir le táirgeadh orgánach san Aontas, agus leis na hathchóirithe a dhéanfar ar CBT amach anseo, agus meastóireacht a dhéanamh ar an dul chun cinn sin. Príomhghné chun cuspóirí an Chomhaontaithe Ghlais don Eoraip a bhaint amach is ea an t-aistriú i dtreo talmhaíocht ilfheidhmiúil atá in ann bia sábháilte leordhóthanach a tháirgeadh agus aschuir dhearfacha chomhshaoil a sholáthar ag an am céanna.

(3)

Tá tábhacht le sonraí staidrimh ardcháilíochta atá comhchuibhithe, comhleanúnach agus inchomparáide chun measúnú a dhéanamh ar staid agus treochtaí an ionchuir agus an aschuir talmhaíochta san Aontas chun sonraí iontaofa agus beachta a sholáthar maidir le tionchar comhshaoil agus eacnamaíoch na talmhaíochta agus maidir le luas an aistrithe chuig cleachtais talmhaíochta níos inbhuanaithe. Chomh maith leis sin, ba cheart do na sonraí a bhailítear a bheith ag baint le feidhmiú na margaí agus slándáil an tsoláthair bia, ionas go n-áiritheofar rochtain ar bhia leordhóthanach agus ar ardcháilíocht, agus leis an measúnú ar inbhuanaitheacht bheartais an Aontais agus beartas náisiúnta agus ar thionchair chomhshaoil, eacnamaíocha agus shóisialta agus ar fheidhmíocht na mbeartas sin, agus leis an measúnú ar inbhuanaitheacht samhlacha gnó nua agus ar an tionchar a bhíonn ag forbairt samhlacha gnó nua. Áirítear ar na sonraí sin staidreamh beostoic agus feola, táirgeadh agus úsáid uibheacha agus táirgeadh agus úsáid bainne agus táirgí bainne, ach níl siad teoranta do na nithe sin. Tá tábhacht freisin le staidreamh ar achar, táirgeacht agus táirgeadh barra curaíochta, glasraí, barr buan agus féarthailte buana agus comharduithe tráchtearraí. Thairis sin, tá gá le staidreamh ar dhíolacháin agus úsáid táirgí cosanta plandaí, leasacháin agus táirgí íocshláinte tréidliachta, go háirithe antaibheathach in ábhair bheatha.

(4)

De thoradh meastóireacht idirnáisiúnta a rinneadh ar an staidreamh talmhaíochta, cruthaíodh straitéis dhomhanda de chuid Eagraíocht Bhia agus Talmhaíochta na Náisiún Aontaithe chun staidreamh talmhaíochta agus tuaithe a fheabhsú. D’fhormhuinigh Coimisiún Staidrimh na Náisiún Aontaithe an straitéis dhomhanda sin in 2010. Ba cheart don staidreamh Eorpach talmhaíochta, i gcás inarb iomchuí, moltaí na straitéise domhanda sin a leanúint.

(5)

Le Rialachán (CE) Uimh. 223/2009 ó Pharlaimint na hEorpa agus ón gComhairle (2), bunaítear creat dlíthiúil chun an staidreamh Eorpach a fhorbairt, a tháirgeadh agus a scaipeadh bunaithe ar phrionsabail chomhchoiteanna staidrimh. Leis an Rialachán sin, leagtar amach critéir cháilíochta agus tagraítear don ghá atá ann an t-ualach freagartha ar fhreagróirí suirbhé a íoslaghdú agus rannchuidiú leis an gcuspóir níos ginearálta maidir leis an ualach riaracháin a laghdú.

(6)

Leis an Straitéis don Staidreamh Talmhaíochta le haghaidh 2020 agus ina dhiaidh sin, a d’fhormhuinigh an Coiste um an gCóras Staidrimh Eorpach (CCSE) i mí na Samhna 2015, beartaítear dhá chreatrialachán a ghlacadh lena gcumhdaítear gach gné de reachtaíocht an Aontais maidir leis an staidreamh talmhaíochta, cé is moite de chuntais eacnamaíochta na talmhaíochta (CET). Tá an Rialachán seo ar cheann den dá chreatrialachán sin agus ba cheart dó an creatrialachán atá glactha cheana féin, eadhon Rialachán (AE) 2018/1091 ó Pharlaimint na hEorpa agus ón gComhairle (3), a chomhlánú.

(7)

Faoi láthair, déantar an staidreamh Eorpach ar ionchur agus aschur talmhaíochta a bhailiú, a tháirgeadh agus a scaipeadh ar bhonn roinnt gníomhartha dlí. Leis an gcreat dlíthiúil reatha, ní sholáthraítear an chomhsheasmhacht chuí idir na réimsí staidrimh éagsúla ná ní dhéantar cur chuige comhtháite a chur chun cinn i leith staidreamh talmhaíochta a fhorbairt, a tháirgeadh agus a scaipeadh, ar staidreamh é atá ceaptha chun gnéithe eacnamaíocha agus comhshaoil na talmhaíochta a chumhdach. Ba cheart an Rialachán seo a chur in ionad na ngníomhartha dlí sin ar mhaithe le comhchuibhiú agus inchomparáideacht faisnéise agus, chun comhsheasmhacht agus comhordúchán a áirithiú sa staidreamh talmhaíochta Eorpach trí chéile, ba cheart comhtháthú agus cuíchóiriú na bpróiseas comhfhreagrach staidrimh a éascú leis agus cur chuige níos iomlánaíche a chumasú leis. Is gá, dá bhrí sin, na gníomhartha dlí sin a aisghairm, eadhon Rialacháin (CE) Uimh. 1165/2008 (4), (CE) Uimh. 543/2009 (5) agus (CE) Uimh. 1185/2009 (6) ó Pharlaimint na hEorpa agus ón gComhairle agus Treoir 96/16/CE ón gComhairle (7). An iliomad comhaontuithe gaolmhara de chuid an Chórais Staidrimh Eorpaigh (CSE) agus “comhaontuithe oinigh” idir na hinstitiúidí staidrimh náisiúnta (NSInna) agus an Coimisiún (Eurostat) maidir le tarchur sonraí, ba cheart iad a chomhtháthú sa Rialachán seo i gcás ina bhfuil fianaise ann go gcomhlánaíonn na sonraí riachtanais na n-úsáideoirí, go n-oibríonn an mhodheolaíocht chomhaontaithe agus go bhfuil na sonraí de cháilíocht iomchuí.

(8)

Tá an staidreamh a cheanglaítear i gcomhréir le Rialachán (CE) Uimh. 617/2008 ón gCoimisiún (8) bailithe laistigh de CSE, ag comhlíonadh cuid dá chaighdeáin cháilíochta ach ní iad ar fad. Leis an staidreamh sin, tacaítear le beartais de chuid an Aontais agus beartais náisiúnta go fadtréimhseach agus ba cheart é a chomhtháthú mar staidreamh Eorpach chun infhaighteacht agus cáilíocht na sonraí a áirithiú. Chun tuairisciú dúbailte ó na Ballstáit a sheachaint, ba cheart na ceanglais staidrimh faoin Rialachán sin a scriosadh.

(9)

Féarthailte is ea cuid mhór de limistéar talmhaíochta ag leibhéal an Aontais. Níor measadh roimhe seo go raibh tábhacht le táirgeadh na limistéar sin, mar sin níor áiríodh aon sonraí táirgeachta sa staidreamh i ndáil le barra. Toisc go bhfuil níos mó tábhacht le tionchar na bhféarthailte agus na n-athchogantach ar an gcomhshaol de bharr an athraithe aeráide, tá gá anois le staidreamh ar tháirgeadh féarthalaimh lena n-áirítear innilt ainmhithe.

(10)

Chun críoch staidreamh talmhaíochta Eorpach, ba cheart measúnú a dhéanamh ar a indéanta atá sé an úsáid is fearr is féidir a bhaint as sonraí atá ann cheana a bailíodh faoi oibleagáidí CBT, gan oibleagáidí ná ualach riaracháin nua a chruthú.

(11)

Chun críocha chomhchuibhiú agus inchomparáideacht na faisnéise faoi ionchur agus aschur talmhaíochta le faisnéis faoi struchtúr gabháltas talmhaíochta agus chun an Straitéis don Staidreamh Talmhaíochta le haghaidh 2020 agus ina dhiaidh sin a chur chun feidhme a thuilleadh, ba cheart don Rialachán seo Rialachán (AE) 2018/1091 a chomhlánú.

(12)

Le Rialachán (CE) Uimh. 138/2004 ó Pharlaimint na hEorpa agus ón gComhairle (9), ní chumhdaítear staidreamh ar phraghsanna talmhaíochta, ach ba cheart infhaighteacht agus comhleanúnachas an staidrimh sin le CET a áirithiú. Dá bhrí sin, ba cheart staidreamh ar phraghsanna ionchuir talmhaíochta atá ag teacht le CET a chumhdach faoi staidreamh ar ionchur agus aschur talmhaíochta. Chun ríomhanna CET agus innéacsanna praghsanna inchomparáide a cheadú, ní mór sonraí faoi phraghsanna aschuir talmhaíochta a bheith ar fáil sna Ballstáit.

(13)

I bhfianaise an Chomhaontaithe Ghlais don Eoraip, CBT agus an chuspóra spleáchas ar lotnaidicídí a laghdú, tá sé tábhachtach foráil a dhéanamh do staidreamh bliantúil ardcháilíochta ar úsáid táirgí cosanta plandaí i ndáil le saincheisteanna comhshaoil, sláinte agus eacnamaíocha. An easpa taifead leictreonach ar úsáid ghairmiúil táirgí cosanta plandaí, a d’fhéadfaí a úsáid chun críoch staidrimh, ar leibhéal an Aontais, is constaic mhór í ar thréimhsiúlacht an bhailithe sonraí maidir le húsáid táirgí cosanta plandaí sa talmhaíocht a mhéadú ó uair amháin gach 5 bliana go dtí uair amháin sa bhliain. Chun am a thabhairt do NSInna ullmhú do tháirgeadh staidrimh bhliantúil ar úsáid táirgí cosanta plandaí ar bhonn buan, ba cheart foráil a dhéanamh sa Rialachán seo do chóras idirthréimhseach.

(14)

Sonraí maidir le cur ar an margadh agus úsáid lotnaidicídí, ar sonraí iad atá le tíolacadh de bhun Threoir 2009/128/CE ó Pharlaimint na hEorpa agus ón gComhairle (10) agus Rialachán (CE) Uimh. 1107/2009 ó Pharlaimint na hEorpa agus ón gComhairle (11), ba cheart iad a úsáid i gcomhréir leis na forálacha ábhartha den Treoir sin agus den Rialachán sin chun críocha cheanglais an Rialacháin seo. Ba cheart a áireamh ar na sonraí arna scaipeadh ar tháirgí cosanta plandaí na substaintí gníomhacha a chuirtear ar an margadh agus a úsáidtear i ngníomhaíochtaí talmhaíochta de réir barr agus a limistéar cóireáilte lena mbaineann.

(15)

Tá tábhacht le staidreamh inchomparáide ó na Ballstáit go léir ar ionchur agus aschur talmhaíochta chun forbairt CBT a chinneadh agus chun faireachán a dhéanamh ar chur chun feidhme CBT trí na Pleananna Straitéiseacha náisiúnta i bhfianaise rannchuidiú CBT le spriocanna an Chomhaontaithe Ghlais don Eoraip. Ba cheart, dá bhrí sin, aicmithe caighdeánacha agus sainmhínithe comhchoiteanna a úsáid a mhéid is féidir le haghaidh athróg.

(16)

Is réamhriachtanais d’ullmhúchán staidrimh talmhaíochta Eorpaigh iad comhleanúnachas, inchomparáideacht agus idir-inoibritheacht na sonraí agus aonfhoirmeacht na bhformáidí tuairiscithe, go háirithe sa mhéid a bhaineann le héifeachtúlacht na nósanna imeachta bailiúcháin, próiseála agus scaipthe agus le cáilíocht na dtorthaí.

(17)

Na sonraí is gá chun staidreamh a thiomsú, ba cheart iad a bhailiú ar bhealach lena n-íoslaghdaítear na costais agus an t-ualach riaracháin ar fhreagróirí, lena n-áirítear feirmeoirí, fiontair bheaga agus mheánmhéide agus na Ballstáit. Dá bhrí sin, is gá úinéirí féideartha fhoinsí na sonraí atá ag teastáil a shainaithint agus a áirithiú gur féidir na foinsí sin a úsáid le haghaidh staidrimh.

(18)

Leis na tacair sonraí atá le tarchur, cumhdaítear réimsí éagsúla staidrimh. Chun cloí le cur chuige solúbtha faoinar féidir staidreamh a oiriúnú nuair a thagann athrú ar cheanglais maidir le sonraí, níor cheart ach na réimsí, topaicí agus topaicí mionsonraithe a shonrú sa bhunrialachán, agus ba cheart na tacair mhionsonraithe sonraí a shonrú trí bhíthin gníomhartha cur chun feidhme. Le bailiú na dtacar mionsonraithe sonraí, níor cheart costais shuntasacha bhreise a fhágann ualach díréireach gan údar ar fhreagróirí agus ar na Ballstáit a fhorchur.

(19)

Is féidir roinnt gnéithe a bheith san áireamh in athróg i dtacar sonraí le haghaidh staidreamh Eorpach ar ionchur agus aschur talmhaíochta, amhail gnéithe ar leibhéal na feirmeoireachta orgánaí agus ar an leibhéal réigiúnach. Tagraíonn gné na feirmeoireachta orgánaí do tháirgeadh a dhéantar i gcomhréir leis na prionsabail a leagtar amach i Rialachán (AE) 2018/848 ó Pharlaimint na hEorpa agus ón gComhairle (12). Ba cheart gné na feirmeoireachta réigiúnaí a sholáthar i gcomhréir le Rialachán (CE) Uimh. 1059/2003 ó Pharlaimint na hEorpa agus ón gComhairle (13). Chun an t-ualach atá ar na Ballstáit a laghdú nuair atá sonraí á soláthar acu faoin Rialachán seo agus chun intuarthacht a áirithiú maidir leis na sonraí atá le bailiú, ba cheart na topaicí mionsonraithe agus na gnéithe is infheidhme a shonrú san Iarscríbhinn a ghabhann leis an Rialachán seo. San Iarscríbhinn sin, ba cheart an focal “infheidhme” a thabhairt isteach maidir leis na topaicí mionsonraithe a bhfuil gné na feirmeoireachta orgánaí nó réigiúnaí, nó an dá cheann acu, ag teastáil ina leith.

(20)

Is ag dul i dtábhacht mar tháscaire ar chórais táirgthe talmhaíochta inbhuanaithe atá an táirgeadh orgánach. Tá sonraí staidrimh maidir le táirgeadh orgánach fíor-riachtanach chun faireachán a dhéanamh ar dhul chun cinn an phlean gníomhaíochta le haghaidh táirgeadh orgánach san Aontas. Is gá, dá bhrí sin, a áirithiú go bhfuil an staidreamh atá ar fáil ar an táirgeadh orgánach, lena n-áirítear sonraí lena sonraítear limistéir táirgthe dheimhnithe nó limistéir táirgthe atá á dtiontú, comhsheasmhach le staidreamh eile ar tháirgeadh talmhaíochta, tríd an staidreamh sin a chomhtháthú sna tacair sonraí. Ba cheart an staidreamh sin ar tháirgeadh orgánach a bheith comhleanúnach leis na sonraí riaracháin a tháirgtear faoi Rialachán (AE) 2018/848 agus ba cheart dóibh úsáid a bhaint as na sonraí sin freisin.

(21)

Tá comhardú comhlán na gcothaitheach ar cheann de na táscairí agra-chomhshaoil is mó a úsáidtear. Tugtar tuairisc air i modheolaíocht chomhchoiteann Eurostat/ECFE mar an difríocht ríofa idir cainníocht iomlán na n-ionchur cothaitheach a théann isteach i gcóras talmhaíochta agus cainníocht na n-aschur cothaitheach a fhágann an córas talmhaíochta sin. D’ainneoin a thábhachta, ní chuireann na Ballstáit uile na sonraí maidir le comhardú comhlán na gcothaitheach ar fáil go deonach don Choimisiún (Eurostat). Tá sé fíor-riachtanach, dá bhrí sin, comhardú comhlán na gcothaitheach a ionchorprú sa Rialachán seo.

(22)

Is ionchur tábhachtach don talmhaíocht iad táirgí íocshláinte tréidliachta. Tá sé tábhachtach dúbláil na hoibre a sheachaint agus an úsáid is fearr is féidir a bhaint as an bhfaisnéis atá ann cheana, ar faisnéis í ar féidir í a úsáid chun críoch staidrimh. Chuige sin, agus d’fhonn faisnéis atá inrochtana go héasca agus atá úsáideach a sholáthar do shaoránaigh an Aontais agus do gheallsealbhóirí eile maidir le díolacháin agus úsáid táirgí íocshláinte tréidliachta, lena n-áirítear úsáid táirgí íocshláinte frithmhiocróbacha i mbia-ainmhithe, ba cheart don Choimisiún (Eurostat) an staidreamh ábhartha atá ar fáil, faoi Rialachán (AE) 2019/6 ó Pharlaimint na hEorpa agus ón gComhairle (14), a scaipeadh. Chuige sin, ba cheart comhaontuithe comhair iomchuí maidir le gníomhaíochtaí staidrimh a bhunú idir an Coimisiún agus eintitis ábhartha, lena n-áirítear ar an leibhéal idirnáisiúnta.

(23)

Is ionchur tábhachtach iad táirgí bithicídeacha sa talmhaíocht, mar shampla i sláinteachas tréidliachta agus i mbeatha ainmhithe. Is minic a dhéantar substaintí gníomhacha atá údaraithe i dtáirgí cosanta plandaí a úsáid i dtáirgí bithicídeacha. Sainaithníodh cheana i Rialachán (CE) Uimh. 1185/2009 an gá atá le staidreamh a bhailiú ar tháirgí bithicídeacha le haghaidh beartais eolasacha eolaíochtbhunaithe i réimsí na talmhaíochta, an chomhshaoil, na sláinte poiblí agus na sábháilteachta bia. Ag cur san áireamh go bhfuil an clár oibre chun scrúdú córasach a dhéanamh ar gach substaint ghníomhach atá ann cheana i dtáirgí bithicídeacha faoi Rialachán (AE) Uimh. 528/2012 ó Pharlaimint na hEorpa agus ón gComhairle (15) fós ar siúl, agus nach bhfuil ach 35 % den obair ghaolmhar críochnaithe, tá sé róluath fós táirgí bithicídeacha a chur san áireamh i raon feidhme an Rialacháin seo. A luaithe a thabharfar an scrúdú ar shubstaintí gníomhacha lena n-úsáid i dtáirgí bithicídeacha chun críche, ba cheart don Choimisiún breithniú a dhéanamh ar raon feidhme an Rialacháin seo a leathnú chun táirgí den sórt sin a áireamh.

(24)

I gcomhréir le Rialachán (CE) Uimh. 1059/2003, ba cheart aonaid chríche a shainiú i gcomhréir le haicmiú Ainmníocht na nAonad Críche le haghaidh Staidrimh (NUTS). Chun an t-ualach atá ar na Ballstáit a theorannú, níor cheart do na ceanglais maidir le sonraí réigiúnacha dul thar na ceanglais a bunaíodh faoi reachtaíocht an Aontais roimhe seo mura mbeidh leibhéil nua réigiúnacha tagtha chun cinn idir an dá linn. Dá réir sin, is iomchuí a cheadú go ndéanfaí sonraí staidrimh réigiúnacha don Ghearmáin a sholáthar d’aonaid chríochacha NUTS 1 agus dóibh amháin.

(25)

Ba cheart é a bheith indéanta sonraí a bhailiú maidir le hábhair ad hoc a bhaineann le hionchur agus aschur talmhaíochta ag am sonrach chun na sonraí a bhailítear ar bhonn rialta a fhorlíonadh le sonraí breise maidir le hábhair a dteastaíonn níos mó faisnéise ina leith, le feiniméin atá ag teacht chun cinn nó le nuálaíochtaí. Ba cheart údar cuí a bheith leis an ngá atá le sonraí breise den sórt sin, áfach.

(26)

Chun an t-ualach riaracháin ar na Ballstáit a laghdú, ba cheart díolúintí ó tharchur rialta áirithe sonraí a cheadú más beag a chuireann Ballstát le hiomlán AE maidir leis na sonraí sin nó má tá an feiniméan a breathnaíodh neamhshuntasach i gcomparáid leis an táirgeacht iomlán sa Bhallstát áirithe sin.

(27)

Chun éifeachtúlacht phróisis táirgthe staidrimh a fheabhsú laistigh de CES agus chun an t-ualach riaracháin ar fhreagróirí a laghdú, ba cheart é a bheith de cheart ag NSInna agus ag údaráis náisiúnta eile rochtain a fháil ar aon sonraí riaracháin a bhfuil gá leo chun críoch poiblí agus iad a úsáid, go pras agus saor in aisce, gan beann ar na sonraí a bheith i seilbh comhlachtaí poiblí, leathphoiblí nó príobháideacha. Ba cheart NSInna agus údaráis náisiúnta eile a bheith in ann na sonraí riaracháin sin a chomhtháthú le staidreamh a mhéid a bheidh gá le sonraí den sórt sin chun staidreamh talmhaíochta Eorpach a fhorbairt, a tháirgeadh agus a scaipeadh, i gcomhréir le hAirteagal 17a de Rialachán (CE) Uimh. 223/2009.

(28)

Ba cheart do na Ballstáit nó d’údaráis náisiúnta fhreagracha féachaint le modhanna bailithe sonraí a nuachóiriú a mhéid is féidir. Ba cheart úsáid na réiteach digiteach agus uirlisí faireacháin talún, amhail clár an Aontais um fhaire na Cruinne, Copernicus, agus cianbhraiteoirí, a chur chun cinn. Tá méadú ag teacht ar an méid sonraí talmhaíochta a ghintear trí chleachtais feirmeoireachta dhigiteacha, áit arb iad feirmeoirí fós na príomhfhoinsí sonraí.

(29)

Chun an tsolúbthacht a áirithiú agus chun an t-ualach riaracháin ar fhreagróirí, ar NSInna agus ar na húdaráis náisiúnta eile a laghdú, ba cheart cead a bheith ag na Ballstáit leas a bhaint as suirbhéanna staidrimh, taifid riaracháin agus aon fhoinse eile, aon mhodh eile nó aon chur chuige nuálach eile, lena n-áirítear modhanna eolaíochtbhunaithe agus dea-dhoiciméadaithe amhail iontráil bharúlach, meastachán agus samhaltú. Ba cheart cáilíocht, agus go háirithe cruinneas, tráthúlacht agus inchomparáideacht an staidrimh atá bunaithe ar na foinsí sin a áirithiú i gcónaí.

(30)

Áirítear i Rialachán (CE) Uimh. 223/2009 forálacha maidir le tarchur sonraí ó Bhallstáit chuig an gCoimisiún (Eurostat) agus maidir le húsáid sonraí den sórt sin, lena n-áirítear maidir le tarchur agus cosaint sonraí rúnda. Leis na bearta a ghlactar i gcomhréir leis an Rialachán seo, tá sé le háirithiú go ndéanfar sonraí rúnda a tharchur agus a úsáid chun críoch staidrimh amháin i gcomhréir le hAirteagail 21 agus 22 de Rialachán (CE) Uimh. 223/2009.

(31)

Le Rialachán (CE) Uimh. 223/2009, déantar foráil do chreat tagartha le haghaidh staidreamh Eorpach agus ceanglaítear ar na Ballstáit na prionsabail staidrimh agus na critéir cháilíochta a shonraítear sa Rialachán sin a chomhlíonadh. Tá tuarascálacha cáilíochta fíor-riachtanach chun measúnú a dhéanamh ar cháilíocht an staidrimh Eorpaigh, chun feabhas a chur orthu agus chun iad a chur in iúl. D’fhormhuinigh CCSE an struchtúr comhtháite aonair meiteashonraí mar chaighdeán CSE le haghaidh tuairisciú cáilíochta, rud a chuidigh, trí chaighdeáin aonfhoirmeacha agus modhanna comhchuibhithe, leis na ceanglais cáilíochta staidrimh a leagtar síos in Airteagal 12(3) den Rialachán sin a chomhlíonadh. Tá an caighdeán sin de chuid CES le rannchuidiú le comhchuibhiú an dearbhaithe cáilíochta agus an tuairiscithe cáilíochta a dhéantar faoin Rialachán seo

(32)

I gcomhréir le Rialachán (CE) Uimh. 223/2009, ba cheart don Choimisiún (Eurostat) na sonraí a bhailítear agus na tuarascálacha cáilíochta a tharchuireann na Ballstáit faoin Rialachán seo a scaipeadh.

(33)

I gcomhréir le cuspóirí an Rialacháin seo agus i gcás inar gá ceanglais nua maidir le sonraí nó feabhsuithe ar thacair sonraí a chumhdaítear leis an Rialachán seo, ba cheart don Choimisiún measúnú a dhéanamh ar a indéanta atá siad trí staidéir indéantachta agus phíolótacha a sheoladh, i gcás inar gá.

(34)

In 2016, rinneadh measúnú tionchair ar an Straitéis don Staidreamh Talmhaíochta le haghaidh 2020 agus ina dhiaidh sin i gcomhréir le prionsabal na bainistíochta fónta airgeadais chun an clár staidrimh a bhunaítear leis an Rialachán seo a dhíriú ar an ngá atá le héifeachtacht maidir leis na cuspóirí a bhaint amach agus chun srianta buiséid a ionchorprú.

(35)

Ós rud é nach féidir leis na Ballstáit cuspóir an Rialacháin seo, eadhon staidreamh Eorpach ar ionchur agus aschur talmhaíochta a tháirgeadh go córasach san Aontas, a ghnóthú go leordhóthanach toisc go bhfuil gá le cur chuige comhordaithe agus, de bharr na comhsheasmhachta agus na hinchomparáideachta, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(36)

Chun na riachtanais sonraí atá ag teacht chun cinn a chur san áireamh, ar riachtanais iad a eascraíonn go príomha as forbairtí nua sa talmhaíocht, as reachtaíocht athbhreithnithe agus as tosaíochtaí athraitheacha beartais, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh (CFAE) a tharmligean chuig an gCoimisiún i dtaca leis na topaicí mionsonraithe a liostaítear sa Rialachán seo a leasú, leis na minicíochtaí tarchuir, na tréimhsí tagartha agus infheidhmeacht ghnéithe na dtopaicí mionsonraithe a leasú, agus leis an bhfaisnéis atá le soláthar ag na Ballstáit ar bhonn ad hoc a shonrú le haghaidh bhailiú na sonraí ad hoc mar a leagtar síos sa Rialachán seo. Agus gníomhartha tarmligthe den sórt sin á nglacadh aige, ba cheart don Choimisiún gnéithe amhail costas agus an t-ualach riaracháin atá ar fhreagróirí agus ar Bhallstáit a chur san áireamh. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (16). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna le saineolaithe na mBallstát, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(37)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún d’fhonn na ceanglais chumhdaigh, na tacair sonraí atá nasctha leis na topaicí agus na topaicí mionsonraithe a liostaítear san Iarscríbhinn agus gnéithe teicniúla na sonraí atá le soláthar a shonrú, d’fhonn liostaí agus tuairiscí na n-athróg agus socruithe praiticiúla eile le haghaidh bhailiú na sonraí ad hoc a bhunú, d’fhonn minicíocht tarchuir na dtacar sonraí a shonrú tuilleadh, d’fhonn na sprioc-amanna a shainiú chun na sonraí agus na minicíochtaí lena mbaineann a tharchur, d’fhonn na hathróga agus na tairseacha ábhartha a shainiú ar ar a mbonn a fhéadfar na Ballstáit a dhíolmhú ó shonraí sonracha a sheoladh, d’fhonn na tréimhsí tagartha a shonrú tuilleadh, d’fhonn na socruithe praiticiúla a leagan amach maidir leis na tuarascálacha cáilíochta agus d’fhonn ábhar na dtuarascálacha sin a leagan amach, d’fhonn na ceanglais chumhdaigh a shonrú maidir leis an gcóras idirthréimhseach do shonraí maidir leis an topaic mhionsonraithe “úsáid na dtáirgí cosanta plandaí sa talmhaíocht”, agus d’fhonn maoluithe a dheonú do na Ballstáit. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (17). Agus na cumhachtaí sin á bhfeidhmiú aige, ba cheart don Choimisiún gnéithe amhail costas agus an t-ualach riaracháin atá ar fhreagróirí agus ar Bhallstáit a chur san áireamh.

(38)

I gcás ina mbeadh gá le hoiriúnuithe móra ar chóras náisiúnta staidrimh de chuid Ballstáit mar gheall ar chur chun feidhme an Rialacháin seo, ba cheart don Choimisiún a bheith in ann, i gcásanna lena bhfuil údar cuí agus ar feadh tréimhse theoranta, maoluithe a dheonú don Bhallstát lena mbaineann. D’fhéadfadh oiriúnuithe móra den sórt sin teacht chun cinn, go háirithe, de thoradh an ghá atá leis na córais bailithe sonraí a oiriúnú chun na ceanglais nua maidir le sonraí a áireamh iontu, lena n-áirítear an rochtain ar fhoinsí riaracháin agus ar fhoinsí ábhartha eile.

(39)

Ba cheart cistiú a éileamh ó na Ballstáit agus ón Aontas araon chun tacú le cur chun feidhme an Rialacháin seo. Dá bhrí sin, ba cheart foráil a dhéanamh do ranníocaíocht airgeadais ón Aontas i bhfoirm deontas.

(40)

Ba cheart leasanna airgeadais an Aontais a chosaint trí bhearta comhréireacha feadh an timthrialla caiteachais, lena n-áirítear neamhrialtachtaí a chosc, a bhrath agus a imscrúdú, cistí a cailleadh, a íocadh go mícheart nó a úsáideadh go mícheart a ghnóthú agus, i gcás inarb iomchuí, pionóis airgeadais agus riaracháin a ghearradh.

(41)

Ba cheart feidhm a bheith ag an Rialachán seo gan dochar do Threoir 2003/4/CE ó Pharlaimint na hEorpa agus ón gComhairle (18) ná do Rialacháin (CE) Uimh. 1367/2006 (19) agus (CE) Uimh. 1049/2001 (20) ó Pharlaimint na hEorpa agus ón gComhairle agus rúndacht staidrimh á comhlíonadh i gcomhréir le Rialachán (CE) Uimh. 223/2009.

(42)

Ba cheart an comhar agus an comhordú idir na húdaráis faoi chuimsiú CSE a neartú chun comhleanúnachas agus inchomparáideacht an staidrimh talmhaíochta Eorpaigh a áirithiú, ar staidreamh é a tháirgtear i gcomhréir leis na prionsabail a leagtar síos in Airteagal 338(2) CFAE. Déanann comhlachtaí eile de chuid an Aontais, seachas na cinn sin dá dtagraítear sa Rialachán seo, agus eagraíochtaí eile sonraí a bhailiú freisin. Ba cheart, dá bhrí sin, an comhar idir comhlachtaí agus eagraíochtaí den sórt sin agus iad siúd atá páirteach in CSE a threisiú chun leas a bhaint as sineirgí.

(43)

Chuathas i gcomhairle le CCSE,

(1)

Ceann de chuspóirí Treoir 2014/53/AE ó Pharlaimint na hEorpa agus ón gComhairle (3) is ea dea-fheidhmiú an mhargaidh inmheánaigh a áirithiú. De bhun Airteagal 3(3), pointe (a), den Treoir sin, ceann de na ceanglais riachtanacha nach mór do threalamh raidió a chomhlíonadh is ea go n-idiroibríonn sé le gabhálais, go háirithe le luchtairí uilíocha. I ndáil leis sin, léirítear le Treoir 2014/53/AE go ndéanann idir-inoibritheacht idir trealamh raidió agus gabhálais amhail luchtairí úsáid trealaimh raidió a shimpliú agus dramhaíl neamhriachtanach agus costais neamhriachtanacha a laghdú agus gur gá luchtaire uilíoch a fhorbairt le haghaidh catagóirí nó aicmí áirithe trealaimh raidió, go háirithe ar mhaithe le tomhaltóirí agus úsáideoirí deiridh eile.

(2)

Ó 2009 i leith, tá iarrachtaí á ndéanamh ar leibhéal an Aontais chun ilroinnt mhargadh na gcomhéadan luchtúcháin le haghaidh gutháin phóca agus ítimí trealaimh raidió den tsamhail chéanna a theorannú. Cé gur méadaíodh leibhéal cóineasaithe na ngléasanna luchtúcháin, arb ionann iad agus cuid an tsoláthair cumhachta sheachtraigh de luchtairí, agus gur laghdaíodh líon na réiteach luchtúcháin éagsúil atá ar fáil ar an margadh, mar gheall ar thionscnaimh dheonacha a rinneadh le déanaí, leis na tionscnaimh sin, ní chomhlíontar go hiomlán cuspóirí beartais an Aontais maidir leis an áisiúlacht do thomhaltóirí a áirithiú, dramhaíl leictreonach (r-dhramhaíl) a laghdú, agus ilroinnt mhargadh na ngléasanna luchtúcháin a sheachaint.

(3)

Tá an tAontas tiomanta d’úsáid éifeachtúil acmhainní a neartú trí bhogadh i dtreo geilleagar glan ciorclach trí thionscnaimh amhail Treoir 2012/19/AE ó Pharlaimint na hEorpa agus ón gComhairle (4) a thabhairt isteach agus, le déanaí, tríd an gComhaontú Glas don Eoraip, mar a leag an Coimisiún amach sa teachtaireacht uaidh an 11 Nollaig 2019, a thabhairt isteach. Is é is aidhm don Treoir seo laghdú a dhéanamh ar an r-dhramhaíl a ghintear trí threalamh raidió a dhíol, agus laghdú a dhéanamh ar eastóscadh amhábhar agus ar astaíochtaí CO2 a ghintear le táirgeadh, iompar agus diúscairt luchtairí, agus geilleagar ciorclach a chur chun cinn ar an gcaoi sin.

(4)

Le Plean Gníomhaíochta an Choimisiúin don Gheilleagar Ciorclach, a leagtar amach sa teachtaireacht uaidh an 11 Márta 2020, rinneadh foráil maidir le tionscnaimh ar feadh shaolré iomlán na dtáirgí, lena ndírítear ar dhearadh na dtáirgí sin, lena gcuirtear próisis an gheilleagair chiorclaigh chun cinn, lena gcothaítear an tomhaltas inbhuanaithe, agus arb é is aidhm dóibh a áirithiú go ndéanfar na hacmhainní a úsáidtear a choinneáil i ngeilleagar an Aontais chomh fada agus is féidir.

(5)

Rinne an Coimisiún measúnú tionchair, inar léiríodh nach bhfuil lántairbhe á baint as an margadh inmheánach, mar is é easpa áisiúlachta do thomhaltóirí agus méadú ar an r-dhramhaíl an toradh atá ar ilroinnt leanúnach mhargadh na gcomhéadan luchtúcháin agus na bprótacal cumarsáide luchtúcháin le haghaidh gutháin phóca agus trealamh raidió eile den tsamhail chéanna.

(6)

Cuirtear bac ar idir-inoibritheacht idir trealamh raidió agus gabhálais, amhail luchtairí, ós rud é go bhfuil comhéadain dhifriúla luchtúcháin ann do chatagóirí áirithe nó d’aicmí áirithe de threalamh raidió a úsáideann luchtú sreinge, amhail gutháin phóca iniompartha, táibléid, ceamaraí digiteacha, cluasáin nó ceannfhearais, consóil físchluichí láimhe, callairí iniompartha, ríomhléitheoirí, méarchláir, lucha, córais loingseoireachta iniompartha, cluasáin bhachlóige agus ríomhairí glúine. Ina theannta sin, tá roinnt cineálacha prótacal cumarsáide mearluchtúcháin ann nach ndéantar íosleibhéal feidhmíochta a ráthú ina leith i gcónaí. Mar thoradh air sin, tá gá le gníomhaíocht ón Aontas chun leibhéal comhchoiteann idir-inoibritheachta a chur chun cinn, sin agus soláthar faisnéise a bhaineann le saintréithe luchtaithe trealaimh raidió do thomhaltóirí agus d’úsáideoirí deiridh eile. Dá bhrí sin, is gá ceanglais oiriúnacha a thabhairt isteach i dTreoir 2014/53/AE maidir leis na prótacail chumarsáide luchtúcháin, na comhéadain luchtúcháin, i.e. gabhdán luchtúcháin, de chatagóirí nó aicmí áirithe de threalamh raidió, chomh maith leis an bhfaisnéis atá le soláthar do thomhaltóirí agus d’úsáideoirí deiridh eile maidir le saintréithe luchtúcháin na gcatagóirí sin nó na n-aicmí sin de threalamh raidió, amhail faisnéis faoin gcumhacht íosta agus uasta is gá chun an trealamh raidió a luchtú. Ba cheart a léiriú, leis an gcumhacht íosta, suim na cumhachta a theastaíonn ón trealamh raidió chun a oibriú a chothabháil agus an chumhacht íosta a theastaíonn óna cheallra chun tús a chur le luchtú. Ba cheart a léiriú, leis an gcumhacht uasta, suim na cumhachta a theastaíonn ón trealamh raidió chun a oibriú a chothabháil agus an chumhacht is gá chun an luas uasta luchtúcháin a bhaint amach.

(7)

Mar gheall ar an easpa comhchuibhithe i leith na gcomhéadan luchtúcháin agus na bprótacal cumarsáide luchtúcháin, d’fhéadadh difríochtaí suntasacha a bheith ann idir forálacha nó cleachtais reachtaíochta, rialúcháin nó riaracháin na mBallstát maidir le hidir-inoibritheacht guthán póca agus catagóirí nó aicmí den tsamhail chéanna de threalamh raidió lena ngléasanna luchtúcháin, agus maidir le soláthar trealaimh raidió gan gléasanna luchtúcháin.

(8)

Mar gheall ar mhéid an mhargaidh inmheánaigh le haghaidh gutháin phóca in-athluchtaithe agus catagóirí nó aicmí den tsamhail chéanna de threalamh raidió, ar leathadh cineálacha éagsúla de ghléasanna luchtúcháin le haghaidh trealamh raidió den sórt sin, ar an easpa idir-inoibritheachta idir trealamh raidió agus gléasanna luchtúcháin agus ar thrádáil shuntasach trasteorann sna táirgí sin, tá gá le gníomhaíocht reachtach níos láidre ar leibhéal an Aontais seachas gníomhaíocht ar an leibhéal náisiúnta nó beartais dheonacha, chun feidhmiú rianúil an mhargaidh inmheánaigh a bhaint amach, agus an áisiúlacht do thomhaltóirí á háirithiú agus dramhaíl chomhshaoil á laghdú ag an am céanna.

(9)

Na comhéadain luchtúcháin agus na prótacail chumarsáide luchtúcháin le haghaidh catagóirí sonracha nó aicmí sonracha de threalamh raidió a athluchtaítear trí bhíthin luchtú sreinge, is gá, dá bhrí sin, iad a chomhchuibhiú. Is gá freisin an bonn a sholáthar ionas gur féidir oiriúnú d’aon dul chun cinn eolaíoch agus teicneolaíoch amach anseo nó d’fhorbairtí sa mhargadh amach anseo, rudaí a ndéanfaidh an Coimisiún faireachán leanúnach orthu. Go háirithe, ba cheart tabhairt isteach chomhchuibhiú na gcomhéadan luchtúcháin agus na bprótacal cumarsáide luchtúcháin a bhreithniú amach anseo freisin i ndáil le trealamh raidió a d’fhéadfaí a luchtú ar aon mhodh seachas ar luchtú sreinge, lena n-áirítear luchtú trí bhíthin radathonnta (luchtú gan sreang). Thairis sin, ba cheart cuimsiú catagóirí nó aicmí breise trealaimh raidió a athluchtaítear trí bhíthin luchtú sreinge a bhreithniú go córasach i gcomhthéacs oiriúnú na réiteach luchtúcháin comhchuibhithe amach anseo, ar choinníoll gurb indéanta go teicniúil comhtháthú na réiteach luchtúcháin comhchuibhithe do na catagóirí nó na haicmí breise sin de threalamh raidió. Le comhchuibhiú, ba cheart na cuspóirí a shaothrú maidir leis an áisiúlacht do thomhaltóirí a áirithiú, dramhaíl chomhshaoil a laghdú agus ilroinnt an mhargaidh a sheachaint idir comhéadain luchtúcháin éagsúla, prótacail chumarsáide luchtúcháin éagsúla, agus idir tionscnaimh ar bith ar an leibhéal náisiúnta, rudaí a d’fhéadfadh bacainní a chur ar thrádáil sa mhargadh inmheánach. Leis an oiriúnú a dhéanfar amach anseo ar chomhchuibhiú na gcomhéadan luchtúcháin agus na bprótacal cumarsáide luchtúcháin, ba cheart leanúint de na cuspóirí sin a shaothrú trína áirithiú go n-ionchorprófar leis na réitigh theicniúla is iomchuí le haghaidh comhéadain luchtúcháin agus prótacail chumarsáide luchtúcháin d’aon mhodh luchtúcháin. Ba cheart a léiriú, leis na réitigh luchtúcháin chomhchuibhithe an teaglaim is iomchuí idir glacadh an mhargaidh a bhaint amach mar aon leis na cuspóirí a bhaint amach maidir leis an áisiúlacht do thomhaltóirí a áirithiú, an dramhaíl chomhshaoil a laghdú agus ilroinnt an mhargaidh a sheachaint. Ba cheart caighdeáin theicniúla ábhartha lena gcomhlíontar na cuspóirí sin agus a forbraíodh ar an leibhéal Eorpach nó ar an leibhéal idirnáisiúnta a úsáid go príomha chun réitigh luchtúcháin den sórt sin a roghnú. I gcásanna eisceachtúla ina bhfuil gá le sonraíocht theicniúil atá ann cheana a thabhairt isteach, a chur leis nó a mhodhnú in éagmais caighdeáin Eorpacha nó caighdeáin idirnáisiúnta atá ar fáil go poiblí lena gcomhlíontar na cuspóirí sin, ba cheart don Choimisiún a bheith in ann sonraíochtaí teicniúla eile a leagan amach, ar choinníoll gur forbraíodh na sonraíochtaí teicniúla sin i gcomhréir le critéir na hoscailteachta, na comhthola agus na trédhearcachta, agus go gcomhlíontar leo ceanglais na neodrachta agus na cobhsaíochta, dá dtagraítear in Iarscríbhinn II a ghabhann le Rialachán (AE) Uimh. 1025/2012 ó Pharlaimint na hEorpa agus ón gComhairle (5). Ní mór do na geallsealbhóirí earnála ábhartha uile a bhfuil ionadaíocht acu ar Ghrúpa Saineolaithe an Choimisiúin maidir le Trealamh Raidió a bheith rannpháirteach sa phróiseas le linn oiriúnú na réiteach luchtúcháin comhchuibhithe.

(10)

Bheadh comhchuibhiú den sórt sin neamhiomlán, áfach, mura gcomhcheanglófaí é le ceanglais maidir le díol comhcheangailte trealaimh raidió agus a luchtairí, agus maidir le faisnéis atá le soláthar do thomhaltóirí agus d’úsáideoirí deiridh eile. Le hilroinnt na gcineálacha cur chuige i measc na mBallstát maidir le margú na gcatagóirí nó na n-aicmí lena mbaineann de threalamh raidió agus a ngléasanna luchtúcháin, chuirfí bac ar thrádáil trasteorann na dtáirgí sin, mar shampla trína chur de cheangal ar oibreoirí eacnamaíocha a dtáirgí a athphacáistiú ag brath ar an mBallstát ina mbeadh na táirgí le soláthar. Is é an toradh a bheadh air sin go mbeadh tuilleadh mí-áisiúlachta ann do thomhaltóirí agus go nginfí r-dhramhaíl neamhriachtanach, rud a dhéanfadh na sochair a eascraíonn as comhchuibhiú na gcomhéadan luchtúcháin agus na bprótacal cumarsáide luchtúcháin a fhrithchúiteamh. Dá bhrí sin, is gá ceanglais a fhorchur chun a áirithiú nach mbeidh sé d’oibleagáid ar thomhaltóirí agus úsáideoirí deiridh eile gléas luchtúcháin nua a cheannach gach uair a cheannaíonn siad guthán póca nua nó ítim de trealaimh raidió den tsamhail chéanna. Le díchuachadh gléasanna luchtúcháin ó dhíol trealaimh raidió, sholáthrófaí do thomhaltóirí agus d’úsáideoirí deiridh eile roghanna inbhuanaithe, tarraingteacha, áisiúla a bheadh ar fáil. Agus leas á bhaint as an taithí a fuarthas ar chur i bhfeidhm na gceanglas, ar threochtaí an mhargaidh atá ag teacht chun cinn agus ar fhorbairtí teicneolaíocha, ba cheart don Choimisiún breithniú a dhéanamh ar an gceanglas a leathnú i ndáil le gléasanna luchtúcháin a sholáthar in éineacht leis an trealamh raidió chuig cáblaí agus/nó díchuachadh éigeantach a thabhairt isteach chun a áirithiú go saothrófar ar an mbealach is éifeachtaí na cuspóirí maidir leis an áisiúlacht do thomhaltóirí a áirithiú agus an dramhaíl chomhshaoil a laghdú. Chun éifeachtacht ceanglas den sórt sin a áirithiú, ba cheart do thomhaltóirí agus d’úsáideoirí eile an fhaisnéis is gá maidir leis na saintréithe luchtaithe a fháil agus iad ag ceannach guthán póca nó ítim de threalamh raidió den tsamhail chéanna. Le picteagram tiomnaithe, chuirfí ar chumas tomhaltóirí agus úsáideoirí deiridh eile a chinneadh cé acu atá nó nach bhfuil gléas luchtúcháin san áireamh leis an trealamh raidió sula gceannaítear é. Ba cheart an picteagram a bheith ar taispeáint i gcás gach cineáil soláthair, lena n-áirítear trí bhíthin ciandíola.

(11)

Tá sé indéanta go teicniúil a shainiú gurb é USB Type-C an gabhdán luchtúcháin uilíoch le haghaidh na gcatagóirí nó na n-aicmí ábhartha de threalamh raidió, go háirithe toisc go bhfuil siad in ann cheana an gabhdán sin a chomhtháthú. Glacadh an teicneolaíocht USB Type-C, teicneolaíocht atá in úsáid ar fud an domhain, ar leibhéal an chaighdeánaithe idirnáisiúnta agus rinne Coiste Eorpach na gCaighdeán Leictriteicniúil (Cenelec) í a thrasuí sa chóras Eorpach faoi Chaighdeán Eorpach EN IEC 62680-1-3:2021 “Comhéadain bus uilíoch shrathaigh le haghaidh sonraí agus cumhachta - Cuid 1-3: Comhpháirteanna coitianta – Sonraíocht um Chábla agus Nascóir USB Type-C®”.

(12)

Teicneolaíocht atá i gcoiteann cheana féin ag go leor catagóirí nó aicmí de threalamh raidió is ea USB Type-C toisc go soláthraítear leis luchtú ardchaighdeáin agus aistriú ardchaighdeáin sonraí. An gabhdán luchtúcháin USB Type-C, nuair a chomhcheanglaítear é leis an bprótacal cumarsáide luchtúcháin maidir le USB Power Delivery, tá sé in ann suas le 100 Vata de chumhacht a sholáthar, rud a fhágann, dá bhrí sin, go bhfuil neart solúbthachta ann fós chun réitigh mearluchtaithe a fhorbairt a thuilleadh, agus a fhágann ag an am céanna gur féidir cúram a dhéanamh sa mhargadh de ghléasanna íseal-leibhéil nach bhfuil gá acu leis an mearluchtú. Gutháin phóca agus trealamh raidió den tsamhail chéanna a bhfuil mearluchtú ar fáil dóibh, is féidir leo gnéithe USB Power Delivery a ionchorprú, gnéithe mar a thuairiscítear i gCaighdeán Eorpach EN IEC 62680-1-2:2021 “Comhéadain bus uilíoch shrathaigh le haghaidh sonraí agus cumhachta – Cuid 1-2: Comhpháirteanna coitianta - Sonraíocht maidir le USB Power Delivery”. Tá sonraíochtaí USB faoi réir forbairt leanúnach. Maidir leis sin, d’fhorbair Fóram Lucht Cur Chun Feidhme USB leagan cothrom le dáta den tsonraíocht USB Power Delivery, lena gcumasaítear cumhachtaí suas le 240 Vata a chur ar fáil. Rinneadh oiriúnuithe freisin ar shonraíocht USB Type-C, lena leathnófar na ceanglais maidir le nascóirí agus cáblaí a bheith ag freastal ar chumhachtaí suas le 240 Vata. Leis sin, beifear in ann trealamh raidió ar a mbíonn leibhéil chumhachta den sórt sin de dhíth a bhreithniú lena chur go hionchasach ar an liosta de threalamh raidió a chumhdaítear leis an Treoir seo.

(13)

Maidir le luchtú trí mhodhanna eile seachas luchtú sreinge, d’fhéadfaí réitigh éagsúla a fhorbairt amach anseo, réitigh a bhféadfadh tionchar diúltach a bheith acu ar an idir-inoibritheacht, ar an áisiúlacht do thomhaltóirí agus ar an gcomhshaol. Cé go bhfuil sé róluath ceanglais shonracha a fhorchur ar réitigh den sórt sin ag an gcéim seo, ba cheart don Choimisiún gníomhú chun réitigh den sórt sin a chur chun cinn agus a chomhchuibhiú chun go seachnófar ilroinnt an mhargaidh inmheánaigh amach anseo.

(14)

Ba cheart Treoir 2014/53/AE a leasú chun forálacha maidir le comhéadain luchtúcháin agus prótacail chumarsáide luchtúcháin a chur san áireamh. Ba cheart na catagóirí nó na haicmí de threalamh raidió a chumhdaítear go sonrach leis na forálacha nua a mhionsonrú a thuilleadh in iarscríbhinn nua a ghabhann leis an Treoir sin. Laistigh de na catagóirí nó na haicmí sin de threalamh raidió, ní bhaineann sé ach le trealamh raidió le ceallra inbhainte nó leabaithe in-athluchtaithe. A mhéid a bhaineann le ceamaraí digiteacha, is é an trealamh raidió lena mbaineann aon cheamara digiteach grianghraf agus físcheamara digiteach, lena n-áirítear ceamaraí gníomhaíochta. Maidir le ceamaraí digiteacha a dheartar go heisiach d’earnáil an chlosamhairc nó don earnáil slándála agus faireachais, níor cheart ceangal a bheith orthu an réiteach luchtúcháin comhchuibhithe a chomhtháthú. A mhéid a bhaineann le cluasáin bhachlóige, déantar an trealamh raidió lena mbaineann a mheas in éineacht lena chás luchtúcháin tiomnaithe nó lena bhosca luchtúcháin tiomnaithe, ós rud é gurb annamh go ndéantar cluasáin bhachlóige a dhealú óna gcás luchtúcháin ná óna mbosca luchtúcháin nó ós rud é nach ndéantar iad a dhealú riamh uathu mar gheall ar a méid sonrach agus a gcruth sonrach. Ní mheastar gur cuid den ghléas luchtúcháin é an cás luchtúcháin nó an bosca luchtúcháin le haghaidh an chineáil shonraigh trealaimh raidió sin. A mhéid a bhaineann le ríomhairí glúine, is é an trealamh raidió lena mbaineann aon ríomhaire iniompartha, lena n-áirítear ríomhairí glúine, ríomhairí ultrai-iniompartha, ríomhairí hibrideacha nó ríomhairí in-chomhshóite agus mionríomhairí glúine.

(15)

Ba cheart Treoir 2014/53/AE a leasú freisin chun ceanglais a thabhairt isteach maidir le soláthar catagóirí nó aicmí áirithe de threalamh raidió gan gléasanna luchtúcháin. Ba cheart na catagóirí nó aicmí lena mbaineann de threalamh raidió, chomh maith leis na sonraíochtaí a bhaineann le réitigh luchtúcháin, a shonrú in iarscríbhinn nua a ghabhann leis an Treoir sin.

(16)

Le Treoir 2014/53/AE, déantar foráil maidir le faisnéis a áireamh sna treoracha úsáide a ghabhann le trealamh raidió agus, dá bhrí sin, ba cheart ceanglais bhreise faisnéise a chur isteach san airteagal ábhartha den Treoir sin. Ba cheart inneachar na gceanglas nua a shonrú in iarscríbhinn nua a ghabhann leis an Treoir sin. Ba cheart faisnéis áirithe a sholáthar i bhfoirm amhairc do gach cineál soláthair, lena n-áirítear trí bhíthin ciandíola. Le lipéad tiomnaithe lena léirítear na sonraíochtaí a bhaineann le cumais luchtúcháin agus gléasanna luchtúcháin comhoiriúnacha, chuirfí ar chumas tomhaltóirí agus úsáideoirí deiridh eile a chinneadh cén gléas luchtúcháin is iomchuí a bheadh ag teastáil chun a dtrealamh raidió a luchtú. Chun foinse tagartha úsáidí a sholáthar le linn shaolré an trealaimh raidió, ba cheart an fhaisnéis faoi na sonraíochtaí a bhaineann leis na cumais luchtúcháin agus na gléasanna luchtúcháin comhoiriúnacha a áireamh freisin sna treoracha agus san fhaisnéis sábháilteachta a ghabhann leis an trealamh raidió. Ba cheart an fhéidearthacht a bheith ann na ceanglais faisnéise sin a oiriúnú amach anseo chun aon athrú ar na ceanglais lipéadaithe a léiriú, go háirithe do ghléasanna luchtúcháin, arb athruithe iad a d’fhéadfaí a thabhairt isteach faoi Treoir 2009/125/CE ó Pharlaimint na hEorpa agus ón gComhairle (6). Leis na ceanglais faisnéise sin, ba cheart, go háirithe, forbairt na réiteach luchtúcháin comhchuibhithe a léiriú agus ba cheart na ceanglais sin a oiriúnú dá réir. Sa chomhthéacs sin, d’fhéadfaí smaoineamh freisin ar chóras cód dathanna a áireamh.

(17)

Agus é á chur san áireamh go bhféadfadh allmhaireoirí agus dáileoirí trealamh raidió a sholáthar go díreach do thomhaltóirí agus d’úsáideoirí deiridh eile freisin, ba cheart iad a bheith faoi réir oibleagáidí arb ionann iad agus na hoibleagáidí is infheidhme maidir le monaróirí i ndáil leis an bhfaisnéis atá le soláthar nó le taispeáint. Ba cheart a cheangal ar gach oibreoir eacnamaíoch an oibleagáid a chomhlíonadh i ndáil leis an bpicteagram lena léirítear cé acu atá nó nach bhfuil gléas luchtúcháin san áireamh leis an trealamh raidió agus trealamh raidió á chur ar fáil do thomhaltóirí agus d’úsáideoirí deiridh eile. Dá bhrí sin, d’féadfadh allmhaireoirí agus dáileoirí cuachta a thairiscint, lena n-áireofaí an trealamh raidió agus a ghléas luchtúcháin, fiú nuair a sholáthraíonn an monaróir trealamh raidió den sórt sin gan gléas luchtúcháin, ar choinníoll go dtabharfadh na hallmhaireoirí agus na dáileoirí an deis do thomhaltóirí agus d’úsáideoirí deiridh eile freisin an trealamh raidió a fháil gan aon ghléas luchtúcháin.

(18)

Le Treoir 2014/53/AE, leagtar amach na nósanna imeachta um measúnú comhréireachta. Ba cheart í a leasú chun tagairtí do cheanglais riachtanacha nua a chur isteach. Dá bhrí sin, ba cheart an rogha a bheith ag monaróirí nós imeachta um rialú inmheánach táirgthe a úsáid chun a léiriú go gcomhlíontar na ceanglais riachtanacha nua.

(19)

Chun a áirithiú go mbeidh na modhanna nós imeachta ag na húdaráis náisiúnta um fhaireachas margaidh chun comhlíonadh na gceanglas nua maidir leis na comhéadain luchtúcháin chomhchuibhithe agus na prótacail chumarsáide luchtúcháin a fhorfheidhmiú, chomh maith leis na ceanglais sin maidir le trealamh raidió a sholáthar faoi réir comhchuibhiú den sórt sin, ba cheart Treoir 2014/53/AE a oiriúnú dá réir. Go háirithe, ba cheart tagairt shainráite a áireamh d’easpa chomhlíonadh na gceanglas fíor-riachtanach, lena n-áirítear freisin na forálacha nua maidir le sonraíochtaí a bhaineann le cumais luchtúcháin agus le gléasanna luchtúcháin chomhoiriúnacha. Ós rud é go mbaineann na forálacha nua sin le gnéithe idir-inoibritheachta, is é an cuspóir a bheadh ann léirmhínithe éagsúla a sheachaint i dtaobh an bhféadfaí an nós imeachta a leagtar síos i dTreoir 2014/53/AE a thionscnamh freisin i leith trealamh raidió nach baol é do shláinte ná do shábháilteacht daoine nó do ghnéithe eile de chosaint an leasa phoiblí.

(20)

Le Treoir 2014/53/AE, leagtar amach cásanna de neamhchomhlíonadh foirmiúil. Ós rud é go dtugtar isteach leis an Treoir seo ceanglais nua is infheidhme maidir le catagóirí nó aicmí áirithe de threalamh raidió, ba cheart Treoir 2014/53/AE a leasú ionas go mbeidh na húdaráis náisiúnta um fhaireachas margaidh in ann comhlíonadh na gceanglas nua a fhorfheidhmiú go héifeachtach.

(21)

Ba cheart Treoir 2014/53/AE a leasú freisin chun na tagairtí atá inti a oiriúnú do na ceanglais nua a thugtar isteach leis an Treoir seo.

(22)

Is gá an idir-inoibritheacht uilíoch íosta a áirithiú idir trealamh raidió agus na gléasanna luchtúcháin do threalamh raidió den sórt sin, agus aghaidh a thabhairt ar aon fhorbairtí sa mhargadh a bheidh ann amach anseo, amhail teacht chun cinn catagóirí nua nó aicmí nua de threalamh raidió ar ina leith a tharlaíonn méid suntasach ilroinnte maidir leis na comhéadain luchtúcháin agus na prótacail chumarsáide luchtúcháin, agus ar aon fhorbairtí sa teicneolaíocht luchtúcháin. Is gá freisin leasuithe a dhéanfar amach anseo ar cheanglais lipéadaithe, amhail le haghaidh gléasanna luchtúcháin nó cáblaí luchtúcháin, nó aon dul chun cinn teicneolaíoch eile a léiriú. Ba cheart, dá bhrí sin, an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i dtaca le leasú a dhéanamh ar chatagóirí nó aicmí de threalamh raidió agus na sonraíochtaí a bhaineann leis na comhéadain luchtúcháin agus na prótacail chumarsáide luchtúcháin do gach aon cheann acu agus i dtaca le leasú a dhéanamh ar na ceanglais faisnéise maidir leis na comhéadain luchtúcháin agus na prótacail chumarsáide luchtúcháin. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (7). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(23)

Ba cheart, dá bhrí sin, Treoir 2014/53/AE a leasú dá réir.

(24)

Ba cheart dóthain ama a thabhairt d’oibreoirí eacnamaíocha chun dul ar aghaidh leis na hoiriúnuithe riachtanacha a dhéanamh ar an trealamh raidió a thagann faoi raon feidhme na Treorach seo, trealamh a bhfuil sé beartaithe acu é a chur ar mhargadh an Aontais,

(1)

Faoi Airteagal 2 den Chonradh ar an Aontas Eorpach (CAE), is luach bunaidh de chuid an Aontais é an comhionannas agus is comhluach ag na Ballstáit é i sochaí arb é is sainairí inti an comhionannas idir mná agus fir. Faoi Airteagal 3(3) CAE, tá an tAontas le comhionannas idir mná agus fir a chur chun cinn.

(2)

Le hAirteagal 157(3) den Chonradh ar Fheidhmiú an Aontais Eorpaigh (CFAE), tugtar de chumhacht do Pharlaimint na hEorpa agus don Chomhairle bearta a ghlacadh d’fhonn a áirithiú go gcuirfear i bhfeidhm prionsabal an chomhionannais deiseanna agus na córa comhionainne idir fir agus mná i gcúrsaí fostaíochta agus slí bheatha.

(3)

D’fhonn comhionannas iomlán iarbhír idir fir agus mná a áirithiú i saol na hoibre, le hAirteagal 157(4) CFAE, ceadaítear gníomhaíocht dhearfach trí cheadú do na Ballstáit bearta a choimeád ar bun nó a ghlacadh lena ndéantar foráil maidir le buntáistí sonracha chun gur fusa don ghnéas tearcionadaithe gabháil le gairm bheatha nó chun míbhuntáistí i slite beatha gairmiúla a chosc nó a chúiteamh. Foráiltear le hAirteagal 23 de Chairt um Chearta Bunúsacha an Aontais Eorpaigh (“an Chairt”) go bhfuil an comhionannas idir mná agus fir le háirithiú i ngach réimse agus nach féidir le prionsabal an chomhionannais cosc a chur ar bhearta a choimeád ar bun nó a ghlacadh lena bhforáiltear do bhuntáistí sonracha i bhfabhar an ghnéis thearcionadaithe.

(4)

I gColún Eorpach na gCeart Sóisialta, a d’fhógair Parlaimint na hEorpa, an Chomhairle agus an Coimisiún go comhpháirteach in 2017, cuimsítear i measc phrionsabail an cholúin sin nach mór deimhin a dhéanamh de go gcaitear go comhionann le mná agus le fir agus go mbeidh comhdheiseanna acu, lena n-áirítear rannpháirteachas sa mhargadh saothair, téarmaí agus coinníollacha fostaíochta agus dul chun cinn sa ghairmréim.

(5)

Chun comhionannas inscne a bhaint amach san ionad oibre, tá gá le cur chuige cuimsitheach, lena n-áirítear freisin cinnteoireacht atá cothrom ó thaobh inscne de a chothú laistigh de chuideachtaí ar gach leibhéal, chomh maith leis an mbearna phá idir na hinscní a dhúnadh. Is réamhriachtanas tábhachtach freisin é comhionannas a áirithiú san ionad oibre chun an bhochtaineacht i measc na mban a laghdú.

(6)

I Moladh 84/635/CEE ón gComhairle (4), moladh do na Ballstáit bearta a dhéanamh lena áirithiú go n-áireofaí le gníomhaíocht dhearfach, a mhéid is féidir, gníomhaíochtaí a mbíonn tionchar acu ar rannpháirtíocht ghníomhach na mban i gcomhlachtaí cinnteoireachta. I Moladh 96/694/CE ón gComhairle (5), moladh do na Ballstáit an earnáil phríobháideach a spreagadh chun cur le líon na mban ar gach leibhéal cinnteoireachta, go háirithe trí phleananna comhionannais agus cláir um ghníomhaíocht dhearfach a ghlacadh nó laistigh de chreat pleananna agus cláir den sórt sin.

(7)

Is é is aidhm don Treoir seo cur i bhfeidhm phrionsabal an chomhionannais deiseanna idir mná agus fir a áirithiú agus ionadaíocht atá cothrom ó thaobh inscne de a bhaint amach i measc poist ardbhainistíochta trí shraith ceanglas nós imeachta a bhunú maidir le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra bunaithe ar thrédhearcacht agus fiúntas.

(8)

Le blianta beaga anuas, tá roinnt tuarascálacha curtha i láthair ag an gCoimisiún ina ndéantar breithniú ar an staid maidir le comhionannas inscne i gcinnteoireacht eacnamaíoch. Mhol sé do chuideachtaí liostaithe cur le líon na ndaoine den ghnéas tearcionadaithe ar a mboird trí bhíthin bearta féinrialála agus chun gealltanais nithiúla dheonacha a dhéanamh ina leith sin. Sa teachtaireacht uaidh an 5 Márta 2010 dar teideal ‘A Strengthened Commitment to Equality between Women and Men – A Women’s Charter’ [Gealltanas Neartaithe i leith Comhionannas idir Mná agus Fir – Cairt na mBan], chuir an Coimisiún i dtreis nach mbíonn rochtain iomlán fós ag mná ar chomhroinnt na cumhachta agus na cinnteoireachta sa saol polaitiúil agus sa saol eacnamaíoch ná san earnáil phoiblí agus san earnáil phríobháideach, agus d’athdhearbhaigh sé a ghealltanas leas a bhaint as a chumhachtaí chun ionadaíocht níos cothroime idir mná agus fir i bpoist lena ngabhann cumhacht sa saol poiblí agus sa gheilleagar a chur chun cinn. Sa teachtaireacht uaidh an 21 Meán Fómhair 2010 dar teideal ‘Strategy for equality between women and men 2010-2015’ [Straitéis le haghaidh comhionannas idir mná agus fir 2010-2015], bhí sé ar cheann de na tosaíochtaí a leag an Coimisiún amach feabhas a chur ar chothromaíocht inscne sa chinnteoireacht. Is ceann de na tosaíochtaí a leagtar amach sa teachtaireacht ón gCoimisiún an 5 Márta 2020 dar teideal ‘A Union of Equality: Gender Equality Strategy 2020-2025’ [Aontas Comhionannais: Straitéis um Chomhionannas Inscne 2020-2025] go mbainfí amach comhionannas inscne sa chinnteoireacht agus sa pholaitíocht.

(9)

Sna conclúidí uaithi an 7 Márta 2011 maidir leis an gComhaontú Eorpach um Chomhionannas Inscne (2011-2020), d’aithin an Chomhairle go bhfuil beartais comhionannais inscne ríthábhachtach don fhás eacnamaíoch, don rathúnas agus don iomaíochas. D’athdhearbhaigh sí a tiomantas na bearnaí idir na hinscní a dhúnadh d’fhonn chuspóirí Straitéis Eoraip 2020 a chomhlíonadh, go háirithe i dtrí réimse a bhfuil ábharthacht mhór ag baint leo maidir le comhionannas inscne, eadhon fostaíocht, oideachas agus cuimsiú sóisialta a chur chun cinn. D’iarr sí chomh maith go ndéanfaí rannpháirtíocht chothrom idir mná agus fir a chur chun cinn sa chinnteoireacht ar gach leibhéal agus i ngach réimse, chun lánúsáid a bhaint as na tallanna uile. I ndáil leis sin, agus leas á bhaint as an tallann, as an eolas agus as na smaointí go léir atá ar fáil, chuirfí go mór le héagsúlacht achmhainní agus d’fheabhsófaí ionchais ghnó.

(10)

Sa teachtaireacht uaidh an 3 Márta 2010 dar teideal ‘Europe 2020 A strategy for smart, sustainable and inclusive growth’ [An Eoraip 2020: Straitéis maidir le fás cliste, inbhuanaithe agus cuimsitheach] (“Straitéis Eoraip 2020”), d’aithin an Coimisiún gur réamhchoinníoll é cur le rannpháirtíocht na mban sa mhargadh saothair chun borradh a chur faoin bhfás agus chun dul i ngleic le dúshláin dhéimeagrafacha san Eoraip. Leagadh síos i Straitéis Eoraip 2020 príomhsprioc maidir le ráta fostaíochta 75 % ar a laghad a bhaint amach do dhaonra an Aontais idir 20 bliain agus 64 bliana d’aois faoi 2020. Tá sé tábhachtach go ndéanfar tiomantas soiléir do dheireadh a chur leis an mbearna phá leanúnach idir na hinscní agus go ndéanfar iarracht atreisithe chun dul i ngleic leis na bacainní uile ar rannpháirtíocht na mban i margadh an tsaothair, lena n-áirítear feiniméan ‘an tsíleáil ghloine’ atá ann i rith an ama. I nDearbhú Porto, a shínigh na Ceannairí Stáit nó Rialtais an 8 Bealtaine 2021 (6), luadh gur dhíol sásaimh iad príomhspriocanna nua an Aontais maidir le poist, scileanna agus laghdú bochtaineachta agus an scórchlár sóisialta athbhreithnithe a mhol an Coimisiún sa teachtaireacht uaidh an 4 Márta 2021 dar teideal The European Pillar of Social Rights Action Plan [Plean Gníomhaíochta Cholún Eorpach na gCeart Sóisialta]. Leis an bPlean Gníomhaíochta sin, foráiltear, chun an sprioc fhoriomlán de ráta fostaíochta de 78 % ar a laghad i measc dhaonra an Aontais idir 20 bliain agus 64 bliana d’aois a bhaint amach faoi 2030, gur gá tréaniarracht a dhéanamh an bhearna fostaíochta idir na hinscní a laghdú faoi leath ar a laghad i gcomparáid le 2019. Táthar ag súil go mbeidh éifeacht dhearfach ag rannpháirtíocht na mban i gcinnteoireacht eacnamaíoch, ar bhoird go háirithe, ar fhostaíocht ban sna cuideachtaí lena mbaineann agus ar fud an gheilleagair ar fad. I ndiaidh ghéarchéim COVID-19, tá tábhacht níos mó ná riamh ag an gcomhionannas inscne agus ag an gceannaireacht chuimsitheach, i gcomhréir leis an ngá atá le leas iomlán a bhaint as díorma na ndaoine tréitheacha, idir mhná agus fir, atá ar fáil. Is léir ón taighde go gcumasaítear téarnamh agus athléimneacht trí chuimsiú agus éagsúlacht. Tá siad ríthábhachtach ó thaobh iomaíochas eacnamaíoch an Aontais a áirithiú, nuálaíocht a spreagadh agus caighdeáin ghairmiúla ar bhoird a fheabhsú.

(11)

I rún uaithi an 6 Iúil 2011 maidir le mná agus ceannaireacht ghnó, d’áitigh Parlaimint na hEorpa ar chuideachtaí an tairseach chriticiúil 30 % a bhaint amach faoi 2015, agus 40 % faoi 2020, i dtaobh ballraíocht ban i gcomhlachtaí bainistíochta. D’iarr sí ar an gCoimisiún, dá gcinnfí nach leor na céimeanna a thug cuideachtaí agus na Ballstáit, reachtaíocht a mholadh faoi 2012, lena n-áiritheofaí cuótaí. Bheadh sé tábhachtach go gcuirfí reachtaíocht den sórt sin chun feidhme ar bhonn sealadach agus go spreagfaí leis athrú agus athchóirithe gasta chun deireadh a chur le neamhionannas leanúnach inscne agus steiréitíopaí sa chinnteoireacht eacnamaíoch. I rúin uaithi an 13 Márta 2012 agus an 21 Eanáir 2021, d’athdhearbhaigh Parlaimint na hEorpa gur iarr sí reachtaíocht ina leith sin.

(12)

Tá sé tábhachtach d’institiúidí agus comhlachtaí an Aontais dea-shampla a thabhairt a mhéid a bhaineann le comhionannas inscne trí, inter alia, chuspóirí a leagan síos le haghaidh ionadaíocht atá cothrom ó thaobh inscne de ar gach leibhéal bainistíochta. Is gá aird ar leith a thabhairt ar bheartais maidir le hearcú na bainistíochta sinsearaí. Dá bhrí sin, i dteachtaireacht uaidh an 5 Márta 2020 dar teideal ‘A Union of Equality: the Gender Equality Strategy 2020-2025’ [Aontas Comhionannais: Straitéis um Chomhionannas Inscne 2020-2025], chuir an Coimisiún i dtreis gur cheart d’institiúidí, comhlachtaí, oifigí agus gníomhaireachtaí an Aontais cothromaíocht inscne i bpoist cheannaireachta a áirithiú. I dteachtaireacht uaidh an 5 Aibreán 2022 dar teideal ‘A new Human Resources Strategy for the Commission’ [Straitéis Acmhainní Daonna Nua don Choimisiún], gheall an Coimisiún go n-áiritheodh sé comhionannas iomlán inscne ar gach leibhéal dá bhainistíocht faoi 2024. Déanfaidh an Coimisiún faireachán ar an dul chun cinn agus tuairisceoidh sé go rialta ina leith sin ar a shuíomh gréasáin. Comhroinneann an Coimisiún dea-chleachtais freisin le hinstitiúidí, comhlachtaí, oifigí agus gníomhaireachtaí eile de chuid an Aontais agus tabharfaidh sé tuairisc ar staid na cothromaíochta inscne i bpoist cheannaireachta sna hinstitiúidí, comhlachtaí, oifigí agus gníomhaireachtaí sin ar a shuíomh gréasáin. Ina cinneadh ón mBiúró an 13 Eanáir 2020, tháinig Parlaimint na hEorpa ar chomhaontú maidir le spriocanna a leagan síos don chothromaíocht inscne i bpoist bainistíochta sinsearaí agus mheánbhainistíochta do 2024. Leanfaidh Parlaimint na hEorpa d’fhaireachán a dhéanamh ar an dul chun cinn ar gach leibhéal dá bainistíocht agus tá sé d’aidhm aici dea-shampla a thabhairt. Tá an Chomhairle tiomanta, ina Straitéis um Éagsúlacht agus Cuimsiú, do chomhionannas inscne a bhaint amach i bpoist bhainistíochta a hArdrúnaíochta (GSC) le corrlach 45 % go 55 % ar a déanaí faoi dheireadh 2026. I bPlean Gníomhaíochta na hArdrúnaíochta maidir le Comhionannas Inscne sa Bhainistíocht, leagtar amach bearta chun an cuspóir sin a bhaint amach.

(13)

Tá sé tábhachtach go gcothódh agus go bhforbródh cuideachtaí agus gnólachtaí mná tréitheacha, agus go dtacódh siad leo, ar gach leibhéal agus le linn a ngairmréime, chun a áirithiú go dtabharfar deiseanna do mhná cáilithe poist ar bhoird nó poist bainistíochta a ghlacadh.

(14)

Chun comhionannas inscne a chur chun cinn agus tacú le rannpháirtíocht na mban sa chinnteoireacht, foráiltear le Treoir (AE) 2019/1158 ó Pharlaimint na hEorpa agus ón gComhairle (7), lena gcuirtear cothromaíocht oibre is saoil do thuismitheoirí agus do chúramóirí chun cinn, go ndéanfaidh na Ballstáit na bearta is gá chun comhroinnt na bhfreagrachtaí cúraim idir mná agus fir a áirithiú trí bhíthin shaoire do thuismitheoirí, saoire atharthachta agus saoire cúramóirí, mar aon leis an tsaoire mháithreachais atá ann cheana. Foráiltear chomh maith leis an Treoir sin don cheart chun socruithe solúbtha oibre a iarraidh.

(15)

Tá roinnt tosca sonracha ag cur isteach ar cheapadh na mban mar stiúrthóirí, tosca a d’fhéadfaí a shárú ní hamháin trí bhíthin rialacha ceangailteacha ach freisin trí bhíthin tionscnaimh oideachais agus dreasachtaí chun dea-chleachtais a chur chun cinn. Ar an gcéad dul síos, tá sé riachtanach feasacht a mhúscailt i scoileanna gnó agus in ollscoileanna ar na tairbhí a bhaineann le comhionannas inscne chun cuideachtaí a dhéanamh níos iomaíche. Is gá freisin athrú rialta stiúrthóirí a spreagadh agus bearta dearfacha a thabhairt isteach chun iarrachtaí na mBallstát agus na gcuideachtaí a chur chun cinn agus a chúiteamh chun cur chuige níos cinntithí a ghlacadh i leith na n-athruithe sin sna comhlachtaí cinnteoireachta eacnamaíche is airde ar gach leibhéal.

(16)

Tá líon mór ban ardcháilithe san Aontas, líon atá ag fás i gcónaí mar is léir ón bhfíoras gur mná iad 60 % de chéimithe ollscoile. Tá sé fíor-riachtanach cothromaíocht inscne ar bhoird a bhaint amach chun úsáid éifeachtúil a bhaint as an díorma atá ann cheana, rud atá ríthábhachtach chun aghaidh a thabhairt ar dhúshláin dhéimeagrafacha agus eacnamaíocha an Aontais. Deis chaillte, dá bhrí sin, do gheilleagair na mBallstát i gcoitinne, chomh maith lena bhforbairt agus lena bhfás, is ea tearcionadaíocht na mban ar bhoird. Trí leas iomlán a bhaint as díorma na mban tréitheacha atá ann cheana, chuirfí feabhas freisin ar an toradh ar an oideachas i gcás daoine aonair agus na hearnála poiblí araon. Mar thoradh ar mhná a bheith i láthair ar bhoird, admhaítear go forleathan go gcuirtear feabhas ar rialachas corparáideach, mar go bhfeabhsaítear feidhmíocht na foirne agus caighdeán na cinnteoireachta trí mheon níos éagsúla agus níos comhchoitinne a bheith ann lena gcuimsítear réimse níos leithne peirspictíochtaí. Tá sé léirithe ag go leor staidéar gur réamhghníomhaí an tsamhail ghnó, gur cothroime na cinntí agus gur fearr na caighdeáin ghairmiúla ar bhoird a léiríonn an tsochaí mar atá agus riachtanais na dtomhaltóirí de thoradh na héagsúlachta. Spreagann sé an nuálaíocht freisin. Léiríodh i roinnt mhaith staidéar freisin go bhfuil gaol dearfach idir éagsúlacht inscne ar leibhéal ardbhainistíochta agus feidhmíocht airgeadais agus brabúsacht cuideachta, a mbíonn fás suntasach inbhuanaithe fadtéarmach mar thoradh air. Dá bhrí sin, tá sé ríthábhachtach cothromaíocht inscne a bhaint amach ar bhoird chun iomaíochas an Aontais a áirithiú i ngeilleagar domhandaithe agus chun buntáiste comparáideach a chur ar fáil maidir le tríú tíortha.

(17)

Ní hamháin go ndéantar méadú ar ionadaíocht na mban ar bhoird difear do na mná a cheaptar ar bhoird, ach cuidítear leis sin freisin chun mná tréitheacha a mhealladh chuig an gcuideachta agus chun níos mó ban a bheith ar gach leibhéal bainistíochta agus sa lucht saothair a áirithiú. Dá bhrí sin, dá dtiocfadh méadú ar líon na mban ar bhoird, is dócha go n-imreodh sé sin tionchar dearfach ar an mbearna fostaíochta idir na hinscní agus ar an mbearna phá idir na hinscní araon a dhúnadh.

(18)

In ainneoin fianaise go mbíonn tionchar tairbhiúil ag cothromaíocht inscne ar chuideachtaí iad féin agus ar an ngeilleagar i gcoitinne, agus in ainneoin dhlí an Aontais atá ann cheana lena gcuirtear cosc ar idirdhealú ar bhonn gnéis agus gníomhaíochtaí ar leibhéal an Aontais atá ann cheana lena spreagtar féinrialáil, is tearcionadaithe i bhfad na mná go fóill sna comhlachtaí cinnteoireachta is airde i gcuideachtaí ar fud an Aontais. Léiríonn staitisticí go bhfuil cion na mban atá rannpháirteach i gcinnteoireacht ghnó ardleibhéil an-íseal i gcónaí. Mura meastar, fiú, ach leath amháin de dhíorma na ndaoine tréitheacha do phoist cheannaireachta, d’fhéadfaí an próiseas féin agus cáilíocht na gceapachán a chur i mbaol, rud a d’fhágfadh gur mhó an t-amhras a bheadh ann faoi struchtúir chumhachta gnó agus d’fhéadfadh sé go dtiocfadh laghdú ar an úsáid éifeachtúil a bhaintear as an gcaipiteal daonna atá ar fáil. Tá sé tábhachtach comhdhéanamh na sochaí a léiriú go dílis i gcinnteoireacht chorparáideach agus go n-úsáidtear acmhainneacht dhaonra iomlán an Aontais. De réir na hInstitiúide Eorpaí um Chomhionannas Inscne, in 2021, ba mhná iad 30,6 %, ar an meán, de chomhaltaí bord sna cuideachtaí liostaithe is mó, agus níor mhná iad ach 8,5 % de na cathaoirligh. Léirítear leis sin go bhfuil tearcionadaíocht mhíchothrom agus idirdhealaitheach á déanamh ar mhná, rud a bhaineann, ar bhealach soiléir, an bonn de phrionsabail an Aontais maidir le comhionannas deiseanna agus cóir chomhionann do mhná agus d’fhir i réimse na fostaíochta agus na slí beatha. Ba cheart bearta a thabhairt isteach agus a threisiú chun dul chun cinn sa ghairmréim a spreagadh i gcás mná ar gach leibhéal bainistíochta agus ba cheart aird ar leith a thabhairt ar a áirithiú gurb amhlaidh an cás i gcuideachtaí liostaithe, mar gheall ar fhreagracht shuntasach eacnamaíoch agus shóisialta na gcuideachtaí sin. Ina theannta sin, tá sé tábhachtach go dtabharfadh comhlachtaí, oifigí agus gníomhaireachtaí an Aontais dea-shampla maidir le míchothromaíochtaí inscne atá ann cheana laistigh de chomhdhéanamh a mbord bainistíochta féin a chur ina gceart.

(19)

Tá méadú an-mhall tagtha ar chion na mban ar bhoird le blianta beaga anuas. Ní hionann an ráta feabhais ó Bhallstát go chéile agus tá torthaí an-éagsúil ann mar thoradh air sin. Is mó i bhfad an dul chun cinn a tugadh ar aird sna Ballstáit sin inar tugadh bearta ceangailteacha isteach. Is dócha go dtiocfaidh méadú ar an difear sin mar gheall ar na cuir chuige an-éagsúil atá ann chun an chothromaíocht inscne ar bhoird a fheabhsú. Dá bhrí sin, moltar do na Ballstáit faisnéis a chomhroinnt maidir leis na bearta éifeachtacha arna ndéanamh agus na beartais arna nglacadh ar leibhéal náisiúnta, agus dea-chleachtais a mhalartú, d’fhonn tacú leis an dul chun cinn ar fud an Aontais i dtreo ionadaíocht níos cothroime idir mná agus fir ar bhoird.

(20)

Ní hamháin go bhfágann an rialáil scaipthe éagsúil nó an easpa rialála ar an leibhéal náisiúnta maidir le cothromaíocht inscne ar bhoird cuideachtaí liostaithe neamhréireanna ó thaobh líon na mban i measc stiúrthóirí neamhfheidhmiúcháin agus rátaí difriúla feabhsúcháin ar fud na mBallstát ach, ina theannta sin, cruthaítear leis bacainní ar an margadh inmheánach trí cheanglais éagsúla rialachais chorparáidigh a fhorchur ar chuideachtaí liostaithe san Aontas. Na difríochtaí sin i gceanglais dhlíthiúla agus féinrialála maidir le comhdhéanamh bord, d’fhéadfadh deacrachtaí praiticiúla eascairt astu do chuideachtaí liostaithe a oibríonn thar theorainneacha, go háirithe nuair a bhíonn fochuideachtaí á mbunú acu nó i gcumaisc agus éadálacha, agus d’iarrthóirí ar phoist stiúrthóra.

(21)

Is mó iad na míchothromaíochtaí inscne laistigh de chuideachtaí ar leibhéil níos sinsearaí. Ina theannta sin, is i réimsí amhail acmhainní daonna agus cumarsáid a fhaightear go leor de na mná sin a bhfuil poist acu ag leibhéal na bainistíochta sinsearaí, agus is mó seans go bhfostófar fir ar leibhéal sinsearach i mbainistíocht ghinearálta nó i “bainistíocht líne” laistigh den chuideachta. Ós rud é gur as measc iarrthóirí a bhfuil taithí bainistíochta sinsearaí acu a earcaítear daoine do phoist stiúrthóra, tá sé ríthábhachtach go méadófar líon na mban atá ag dul chun cinn i bpoist bhainistíochta den sórt sin laistigh de chuideachtaí.

(22)

Ceann de na príomhthosca lena bhféadfar an Treoir seo a chur chun feidhme i gceart is ea cur i bhfeidhm éifeachtach na gcritéar, a leagfar síos roimh ré agus le trédhearcacht iomlán, do roghnú na stiúrthóirí, agus cáilíochtaí, eolas agus scileanna na n-iarrthóirí á meas ar bhonn comhionann, gan beann ar a n-inscne.

(23)

An easpa trédhearcachta atá ann faoi láthair sa phróiseas roghnúcháin agus i leith na gcritéar cáilithe do phoist stiúrthóra i bhformhór na mBallstát, is bacainn mhór é ar chomhionannas inscne níos fearr i measc stiúrthóirí agus bíonn tionchar diúltach aige ar ghairmréim agus ar shaoirse gluaiseachta na n-iarrthóirí ar phoist bhoird, agus ar chinntí infheisteoirí. Mar gheall ar an easpa trédhearcachta sin, fágtar nach féidir le hiarrthóirí féideartha ar phoist stiúrthóra iarratais a dhéanamh chuig boird inar mó a mbeadh gá lena gcáilíochtaí agus nach féidir leo cur i gcoinne cinntí ceapacháin atá claonta ó thaobh inscne de, rud a chuireann srian ar a saoirse gluaiseachta sa mhargadh inmheánach. Os a choinne sin, d’fhéadfadh sé go mbeadh straitéisí infheistíochta ag infheisteoirí lena n-éilítear go soláthrófaí faisnéis a bheidh nasctha freisin le saineolas agus inniúlacht na stiúrthóirí. Le níos mó trédhearcachta i leith na gcritéar cáilithe agus an phróisis roghnúcháin do stiúrthóirí, cuirtear ar a gcumas d’infheisteoirí measúnú níos fearr a dhéanamh ar straitéis ghnó na cuideachta agus cinntí eolasacha a dhéanamh. Tá sé tábhachtach, dá bhrí sin, nósanna imeachta ceapacháin an bhoird a bheith soiléir agus trédhearcach agus na hiarrthóirí a mheasúnú go hoibiachtúil ar a bhfiúntas aonair, gan beann ar a n-inscne.

(24)

Cé nach bhfuil sé d’aidhm ag an treoir seo comhchuibhiú mionsonraithe a dhéanamh ar dhlíthe náisiúnta maidir leis an bpróiseas roghnúcháin agus na critéir cháilithe do phoist stiúrthóra, is gá, chun an chothromaíocht inscne a bhaint amach, ceanglais íosta áirithe a thabhairt isteach ar chuideachtaí liostaithe nach bhfuil ionadaíocht chothrom inscne acu a bhaineann le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra ar bhonn próiseas roghnúcháin atá trédhearcach agus sainithe go soiléir agus mheasúnú comparáideach oibiachtúil ar a gcáilíochtaí i dtéarmaí oiriúnachta, inniúlachta agus feidhmíocht ghairmiúil de. Is trí bheart ceangailteach a dhéanamh ar leibhéal an Aontais, agus ar an gcaoi sin amháin, is féidir cuidiú go héifeachtach le cothrom na Féinne a áirithiú ar fud an Aontais agus deacrachtaí praiticiúla i saol an ghnó a sheachaint.

(25)

Ba cheart é a bheith d’aidhm ag an Aontas, dá bhrí sin, cur le líon na mban ar bhoird i ngach Ballstát, chun borradh a chur faoin bhfás eacnamaíoch, soghluaisteacht a spreagadh i margadh an tsaothair, iomaíochas cuideachtaí liostaithe a neartú agus comhionannas inscne éifeachtach a bhaint amach sa mhargadh saothair. Ba cheart an aidhm sin a shaothrú trí cheanglais íosta a leagan síos maidir le gníomhaíocht dhearfach i bhfoirm bearta ceangailteacha. Leis na bearta ceangailteacha sin, ba cheart féachaint le cuspóir cainníochtúil a bhaint amach i leith comhdhéanamh inscne bord cuideachtaí liostaithe, ós rud é go bhfuil na torthaí is fearr bainte amach ag na Ballstáit agus ag tríú tíortha a roghnaigh an modh sin nó modh comhchosúil chun tearcionadaíocht na mban i bpoist cinnteoireachta eacnamaíche a laghdú.

(26)

Tá sé tábhachtach go bhforbródh gach cuideachta liostaithe beartas comhionannais inscne chun ionadaíocht inscne níos cothroime a bhaint amach ar gach leibhéal. D’fhéadfadh sé go n-áireofaí ar na beartais sin iarrthóir baineann agus iarrthóir fireann araon a ainmniú le haghaidh príomhphost, scéimeanna meantóireachta agus treoir maidir le forbairt gairmréime do mhná, agus straitéisí acmhainní daonna atá ceaptha earcaíocht éagsúil a spreagadh.

(27)

Tá tábhacht eacnamaíoch faoi leith ag baint le cuideachtaí liostaithe, baineann infheictheacht ar leith leo agus bíonn tionchar ar leith acu ar an margadh trí chéile. Leagann cuideachtaí den sórt sin síos caighdeáin don gheilleagar i gcoitinne agus is féidir a bheith ag súil leis go leanfaidh cineálacha eile cuideachtaí a gcleachtais. Mar gheall ar chineál poiblí cuideachtaí liostaithe, is ceart níos mó rialála a dhéanamh orthu ar mhaithe le leas an phobail.

(28)

Ba cheart feidhm a bheith ag na bearta dá bhforáiltear sa Treoir seo maidir le cuideachtaí liostaithe.

(29)

Níor cheart feidhm a bheith ag an Treoir seo maidir le micrifhiontair agus fiontair bheaga agus mheánmhéide (FBManna).

(30)

Chun críocha na Treorach seo, ba cheart gurb é an Ballstát ina bhfuil a hoifig chláraithe ag an gcuideachta liostaithe lena mbaineann an Ballstát is inniúil maidir leis na hábhair a chuimsítear leis an Treoir seo a rialáil. Leis an Treoir seo, ní dhéantar difear do rialacha náisiúnta lena gcinntear an dlí is infheidhme maidir le cuideachtaí i gcás ábhair nach rialaítear leis an Treoir seo.

(31)

Tá córais éagsúla sna Ballstáit i dtaobh struchtúr boird do chuideachtaí liostaithe, agus is é an príomh-idirdhealú eatarthu an difríocht idir déchóras ina mbíonn bord bainistíochta agus bord maoirseachta araon i gceist agus córas aonadach lena gcomhcheanglaítear na feidhmeanna bainistíochta agus na feidhmeanna maoirseachta i mbord amháin. Tá córais mheasctha ann freisin, a bhfuil gnéithe den dá chóras iontu nó faoina dtugtar rogha do chuideachtaí idir samhlacha éagsúla. Ba cheart feidhm a bheith ag an Treoir seo maidir le gach córas boird atá ann cheana sna Ballstáit.

(32)

Le gach córas boird déantar idirdhealú, de jure nó de facto, idir stiúrthóirí feidhmiúcháin, a mbíonn baint acu le bainistíocht laethúil na cuideachta, agus stiúrthóirí neamhfheidhmiúcháin a chomhlíonann feidhm mhaoirseachta agus nach mbíonn baint acu le bainistíocht laethúil na cuideachta liostaithe. Is é is aidhm don Treoir seo feabhas a chur ar an gcothromaíocht inscne sa dá chatagóir stiúrthóra araon. Chun an chothromaíocht cheart a bhaint amach idir an gá atá le comhionannas inscne na mbord a mhéadú agus an gá atá le híoslaghdú a dhéanamh ar an gcur isteach ar bhainistíocht laethúil chuideachta, déantar idirdhealú sa Treoir seo idir an dá chatagóir stiúrthóra sin.

(33)

I roinnt Ballstát, de bhun an dlí náisiúnta nó an chleachtais náisiúnta, is féidir nó ní mór gurb iad lucht saothair cuideachtaí, eagraíochtaí na bhfostaithe, nó iad araon, a dhéanann cion áirithe de na stiúrthóirí neamhfheidhmiúcháin a cheapadh nó a thoghadh. Ba cheart feidhm a bheith ag na cuspóirí cainníochtúla, a leagtar síos sa Treoir seo, maidir le stiúrthóirí den sórt sin freisin. Ós rud é, áfach, gur ionadaithe fostaithe iad roinnt stiúrthóirí neamhfheidhmiúcháin, ba cheart do na Ballstáit an modh a bhunú lena áirithiú go mbainfear amach na cuspóirí sin, agus aird chuí á tabhairt ar na rialacha sonracha maidir le hionadaithe fostaithe a thoghadh nó a ainmniú mar a leagtar síos sa dlí náisiúnta, agus an tsaoirse vótála á hurramú agus ionadaithe fostaithe á dtoghadh. I bhfianaise na ndifríochtaí i ndlíthe náisiúnta na gcuideachtaí sna Ballstáit, ba cheart na Ballstáit a bheith in ann na cuspóirí cainníochtúla a chur i bhfeidhm ar leithligh maidir le hionadaithe scairshealbhóirí agus ionadaithe fostaithe.

(34)

Ba cheart do na Ballstáit cuideachtaí liostaithe a chur faoi réir an chuspóra boird a bheith acu ar a mbeidh 40 % ar a laghad dá stiúrthóirí neamhfheidhmiúcháin den ghnéas tearcionadaithe faoin 30 Meitheamh 2026 nó, de rogha air sin, ós rud é go bhfuil sé tábhachtach go méadóidh cuideachtaí liostaithe cion an ghnéis tearcionadaithe i ngach post cinnteoireachta, ba cheart cuideachtaí liostaithe a chur faoi réir an chuspóra boird a bheith acu ar den ghnéas tearcionadaithe a bheidh 33 % ar a laghad dá stiúrthóirí uile faoin 30 Meitheamh 2026, gan beann ar iad a bheith ina stiúrthóirí feidhmiúcháin nó neamhfheidhmiúcháin d’fhonn ionadaíocht inscne níos cothroime a chur chun cinn i measc stiúrthóirí uile.

(35)

Baineann na cuspóirí maidir le 40 % ar a laghad de phoist stiúrthóirí neamhfheidhmiúcháin ar bhoird, nó 33 % ar a laghad de phoist stiúrthóirí uile, a bheith ag daoine den ghnéas tearcionadaithe, leis an gcomhionannas inscne fhoriomlán i measc stiúrthóirí agus ní chuireann siad isteach ar roghnú nithiúil stiúrthóirí aonair ó líon leathan iarrthóirí fireanna agus baineanna i ngach cás ar leithligh. Go háirithe, ní fhágann an Treoir seo go gcuirtear aon iarrthóirí áirithe as an áireamh i leith poist stiúrthóra, ná ní fhágann sí go bhforchuirtear aon stiúrthóirí aonair ar chuideachtaí liostaithe nó ar scairshealbhóirí. Dá bhrí sin, is faoi na cuideachtaí agus na scairshealbhóirí a bheidh an cinneadh fós maidir leis na stiúrthóirí iomchuí.

(36)

De bharr a gcineáil, is iomchuí gnóthais phoiblí a thagann faoi raon feidhme na Treorach seo a bheith ina samhail don earnáil phríobháideach. Bíonn tionchar ceannasach ag na Ballstáit ar na gnóthais phoiblí de réir bhrí Airteagal 2, pointe (b), de Threoir 2006/111/CE (8) ón gCoimisiún, atá liostaithe ar mhargadh rialáilte. I ngeall ar an tionchar ceannasach sin, tá na hionstraimí ar fáil do na Ballstáit chun an t-athrú is gá a dhéanamh níos tapa.

(37)

Ní mór sonrú breise a dhéanamh lena chinneadh cén líon post stiúrthóra is gá chun na cuspóirí a leagtar síos sa Treoir seo a bhaint amach ós rud é, i bhfianaise mhéid fhormhór na mbord, nach féidir an cion cruinn de 40 % nó, i gcás inarb infheidhme, 33 % a bhaint amach go matamaiticiúil. Dá bhrí sin, ba cheart gurb é líon na bpost stiúrthóra is gá chun na cuspóirí a leagtar síos sa Treoir seo a chomhlíonadh an líon is gaire do chion 40 % nó, i gcás inarb infheidhme, 33 %, agus sa dá chás níor cheart gur mhó é ná 49 %.

(38)

Ina cásdlí (9) maidir le gníomhaíocht dhearfach agus maidir le comhoiriúnacht na gníomhaíochta dearfaí sin le prionsabal an neamh-idirdhealaithe bunaithe ar ghnéas, a leagtar síos freisin in Airteagal 21 den Chairt, ghlac Cúirt Bhreithiúnais an Aontais Eorpaigh (“an Chúirt Bhreithiúnais”) leis go bhféadfar, i gcásanna áirithe, tosaíocht a thabhairt don ghnéas tearcionadaithe sa roghnú le haghaidh fostaíochta nó ardú céime, ar choinníoll go mbeidh an t-iarrthóir den ghnéas tearcionadaithe chomh cáilithe céanna leis an iomaitheoir den ghnéas eile i dtéarmaí oiriúnachta, inniúlachta agus feidhmíocht ghairmiúil, ar choinníoll nach tosaíocht í a bhfuil feidhm uathoibríoch léi agus atá gan choinníoll ach go bhféadfar í a shárú má fhágann cúiseanna a bhaineann go sonrach le hiarrthóir aonair den ghnéas eile gur cuí tosaíocht a bheith ag an iarrthóir sin, agus ar choinníoll go mbeidh an t-iarratas ó gach iarrthóir faoi réir measúnú oibiachtúil ina gcuirfear i bhfeidhm go sonrach na critéir roghnúcháin uile i leith na n-iarrthóirí aonair.

(39)

Ba cheart do na Ballstáit a áirithiú, i gcás na gcuideachtaí liostaithe sin a bhfuil níos lú ná 40 % de na poist stiúrthóra neamhfheidhmiúcháin ag daoine den ghnéas tearcionadaithe ar a mboird, nó níos lú ná 33 % de na poist stiúrthóra uile, lena n-áirítear stiúrthóirí feidhmiúcháin agus neamhfheidhmiúcháin araon, de réir mar is infheidhme, go roghnóidh siad na hiarrthóirí is cáilithe lena gceapadh chuig na poist sin nó lena dtoghadh do na poist sin ar bhonn measúnú comparáideach ar cháilíochtaí iarrthóirí trí chritéir shoiléire, gan débhrí, arna bhfoirmliú ar bhealach neodrach a chur i bhfeidhm, ar critéir iad a bunaíodh roimh an bpróiseas roghnúcháin, d’fhonn an chothromaíocht inscne ar bhoird a fheabhsú. D’fhéadfaí a áireamh le samplaí de na cineálacha critéar roghnúcháin a d’fhéadfadh cuideachtaí liostaithe a chur i bhfeidhm taithí ghairmiúil ar chúraimí bainistíochta nó maoirseachta, taithí idirnáisiúnta, ildisciplíneacht, ceannaireacht, scileanna cumarsáide agus cumais líonraithe agus eolas i réimsí ábhartha sonracha amhail airgeadas, maoirseacht airgeadais, nó bainistíocht acmhainní daonna.

(40)

Agus iarrthóirí á roghnú lena gceapadh chuig poist stiúrthóra nó lena dtoghadh do phoist stiúrthóra, ba cheart tosaíocht a thabhairt don iarrthóir comhcháilithe den ghnéas tearcionadaithe. Níor cheart don tosaíocht sin a bheith ina tosaíocht uathoibríoch neamhchoinníollach, áfach. D’fhéadfadh cásanna eisceachtúla a bheith ann ina bhféadfadh measúnú oibiachtúil ar chás sonrach iarrthóra comhcháilithe den ghnéas eile an tosaíocht a shárú ba cheart, mura ndéanfaí sin, a thabhairt don iarrthóir den ghnéas tearcionadaithe. D’fhéadfadh a leithéid de shárú rogha a bheith ann, mar shampla, i gcás ina mbeadh feidhm ag beartais éagsúlachta níos leithne ar an leibhéal náisiúnta nó ar leibhéal na cuideachta maidir le stiúrthóirí a roghnú. Mar sin féin, ba cheart sárú chur i bhfeidhm na gníomhaíochta dearfaí a bheith eisceachtúil i gcónaí agus é a bhunú ar mheasúnú cás ar chás, agus ba cheart údar cuí a bheith leis de réir critéir oibiachtúla nár cheart, i gcás ar bith, idirdhealú a dhéanamh in aghaidh an ghnéis tearcionadaithe.

(41)

I mBallstáit ina bhfuil feidhm ag na ceanglais a leagtar síos sa Treoir seo a bhaineann le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra, níor cheart a cheangal ar na cuideachtaí liostaithe na ceanglais sin a chomhlíonadh más cuideachtaí iad inarb ag daoine den ghnéas tearcionadaithe atá 40 % ar a laghad de na poist stiúrthóra neamhfheidhmiúcháin ar a mboird, nó 33 % ar a laghad de na poist stiúrthóra uile, de réir mar is infheidhme.

(42)

Ní hionann i ngach Ballstát ná i ngach cuideachta liostaithe na modhanna chun iarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra. D’fhéadfadh sé go n-áireofaí orthu go ndéanfadh coiste ainmniúcháin nó gnólachtaí cuardaigh feidhmeannach, mar shampla, na hiarrthóirí a réamhroghnú lena gcur faoi bhráid thionól na scairshealbhóirí. Na ceanglais sin maidir le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra, ba cheart iad a chomhlíonadh ag an gcéim iomchuí den phróiseas roghnúcháin i gcomhréir leis an dlí náisiúnta agus le hairteagail chomhlachais na gcuideachtaí liostaithe lena mbaineann, lena n-áirítear sula dtoghfaidh scairshealbhóirí iarrthóir, tráth a bhfuil gearrliosta á ullmhú mar shampla. I ndáil leis an méid sin, bunaítear leis an Treoir seo caighdeáin íosta maidir le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra, rud a fhágann gur féidir na coinníollacha dá bhforáiltear le cásdlí na Cúirte Breithiúnais a chur i bhfeidhm ionas go mbeidh comhionannas inscne ann agus d’fhonn an cuspóir a bhaint amach maidir le hionadaíocht níos cothroime idir mná agus fir ar bhoird cuideachtaí liostaithe. Leis an Treoir seo, ní chuirtear isteach go míchuí ar bhainistíocht laethúil na gcuideachta liostaithe, ós rud é go gcoimeádann siad an tsaoirse chun iarrthóirí a roghnú ar bhonn cáilíochtaí nó ar bhonn tosaíochtaí oibiachtúla ábhartha eile.

(43)

I bhfianaise chuspóirí na Treorach seo a mhéid a bhaineann le cothromaíocht inscne, ba cheart a cheangal ar chuideachtaí liostaithe, arna iarraidh sin d’iarrthóir atá roghnaithe lena cheapadh nó lena ceapadh chuig poist stiúrthóra nó lena thoghadh nó lena toghadh do phoist stiúrthóra, an t-iarrthóir sin a chur ar an eolas faoi na critéir cháilithe ar a raibh an roghnú bunaithe, faoin measúnú comparáideach oibiachtúil ar na hiarrthóirí faoi na critéir sin agus, i gcás inarb ábhartha, faoi na breithnithe sonracha lenar cinneadh go heisceachtúil tosaíocht a thabhairt d’iarrthóir nach duine den ghnéas thearcionadaithe é nó í. D’fhéadfadh sé a bheith ina thoradh ar cheanglas faisnéise chun eolas den sórt sin a chur ar fáil go gcuirfí teorainn ar an gceart go n-urramófaí an saol príobháideach agus ar an gceart go gcosnófaí sonraí pearsanta, cearta a aithnítear le hAirteagail 7 agus 8, faoi seach, den Chairt. Tá gá le teorainneacha den sórt sin, áfach, agus, i gcomhréir le prionsabal na comhréireachta, is fíor go gcomhlíonann siad cuspóirí aitheanta i ndáil leis an leas ginearálta. Dá bhrí sin, tá siad i gcomhréir leis na ceanglais maidir le teorainneacha den sórt sin a leagtar síos in Airteagal 52(1) den Chairt agus le cásdlí ábhartha na Cúirte Breithiúnais. Ba cheart na teorainneacha sin a chur i bhfeidhm i gcomhréir le Rialachán (AE) 2016/679 ó Pharlaimint na hEorpa agus ón gComhairle (10).

(44)

I gcás ina suíonn iarrthóir den ghnéas thearcionadaithe atá roghnaithe lena cheapadh nó lena ceapadh chuig poist stiúrthóra nó lena thoghadh nó lena toghadh do phoist stiúrthóra fíorais os comhair cúirte nó os comhair údarás inniúil eile ónar féidir a thoimhdiú go raibh an t-iarrthóir chomh cáilithe céanna leis an iarrthóir a roghnaíodh den ghnéas eile, ba cheart a cheangal ar an gcuideachta liostaithe a léiriú go ndearnadh an rogha cheart.

(45)

Cé go bhféachtar leis an Treoir seo le híoscheanglais a bhunú i bhfoirm bearta ceangailteacha chun comhdhéanamh inscne bhoird a fheabhsú, tá sé tábhachtach, i gcomhréir le prionsabal na coimhdeachta, dlisteanacht cur chuige éagsúil a aithint agus éifeachtacht beart náisiúnta áirithe atá ann cheana féin, a glacadh cheana sa réimse beartais sin, a aithint, ar bearta iad a raibh torthaí sásúla ag baint leo. Rinneadh iarrachtaí cheana i roinnt Ballstát a áirithiú go mbeadh ionadaíocht níos cothroime idir mná agus fir ann ar bhoird trí bhearta ceangailteacha a ghlacadh a mheastar a bheith chomh héifeachtach céanna leis na bearta a leagtar síos sa Treoir seo. Ba cheart na Ballstáit sin a bheith in ann cur i bhfeidhm na gceanglas a leagtar síos sa Treoir seo a bhaineann le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra a chur ar fionraí agus, i gcás inarb ábhartha, na ceanglais a bhaineann le cuspóirí cainníochtúla aonair a bhunú, ar choinníoll go ndéanfar na coinníollacha le haghaidh hionraí a leagtar amach sa Treoir seo a chomhlíonadh. Sna cásanna sin, más rud é gur thug na Ballstáit bearta den sórt sin isteach trí bhíthin an dlí náisiúnta, ba cheart na rialacha slánaithe a leagtar amach sa Treoir seo maidir le líon sonrach na stiúrthóirí a chur i bhfeidhm mutatis mutandis chun measúnú a dhéanamh ar an dlí náisiúnta sin faoin Treoir seo. I mBallstát ina gcuirtear fionraí den sórt sin i bhfeidhm, ba cheart a mheas go bhfuil na cuspóirí a leagtar síos sa Treoir seo bainte amach agus, dá bhrí sin, maidir leis na cuspóirí a leagtar síos sa Treoir seo i ndáil le stiúrthóirí neamhfheidhmiúcháin nó gach stiúrthóirí, ní chuirtear na cuspóirí sin in ionad na bearta naisiúnta ábhartha ná ní chuirtear na cuspóirí sin leis na bearta naisiúnta ábhartha.

(46)

D’fhonn an chothromaíocht inscne a fheabhsú i measc stiúrthóirí a mbíonn baint acu le cúraimí laethúla bainistíochta, ba cheart ceangal a chur ar chuideachtaí liostaithe cuspóirí cainníochtúla dá gcuid féin a leagan síos maidir le hionadaíocht níos cothroime idir mná agus fir i measc stiúrthóirí feidhmiúcháin, agus é mar aidhm na cuspóirí sin a bhaint amach faoin dáta a leagtar amach sa Treoir seo. Ba cheart do na cuspóirí sin cabhrú le cuideachtaí dul chun cinn inbhraite a bhaint amach i gcomparáid leis an staid ina bhfuil siad faoi láthair. Níor cheart feidhm a bheith ag an oibleagáid sin maidir le cuideachtaí liostaithe a bhfuil cuspóir 33 % á shaothrú acu i ndáil leis na stiúrthóirí uile, idir stiúrthóirí feidhmiúcháin agus neamhfheidhmiúcháin.

(47)

Ba cheart do na Ballstáit a cheangal ar chuideachtaí liostaithe faisnéis a sholáthar ar bhonn bliantúil do na húdaráis inniúla maidir le comhdhéanamh inscne a mbord agus faisnéis maidir leis na bearta a rinneadh d’fhonn na cuspóirí a leagtar síos sa Treoir seo a bhaint amach, chun a chur ar a gcumas do na húdaráis sin measúnú a dhéanamh ar an dul chun cinn a bheidh déanta ag gach cuideachta liostaithe ionsar chothromaíocht inscne i measc stiúrthóirí a bhaint amach. Ba cheart do chuideachtaí liostaithe an fhaisnéis sin a fhoilsiú ar bhealach atá iomchuí agus inrochtana go héasca ar a suíomhanna gréasáin agus ba cheart í a áireamh ar thuarascáil bhliantúil na cuideachta. I gcás nár bhain cuideachta liostaithe na cuspóirí cainníochtúla is infheidhme amach, ba cheart a áireamh san fhaisnéis sin freisin tuairisc ar na bearta nithiúla atá déanta aici go dtí seo nó atá beartaithe aici a dhéanamh amach anseo chun na cuspóirí a leagtar amach sa Treoir seo a bhaint amach. Chun ualach riaracháin nach bhfuil gá leis agus dúbailt iarrachtaí a sheachaint, ba cheart an fhaisnéis maidir le cothromaíocht inscne ar bhoird a bheidh le tuairisciú de bhun na Treorach seo a bheith ina cuid, i gcás inarb infheidhme, de ráiteas rialachais chorparáidigh na gcuideachtaí liostaithe, i gcomhréir le dlí an Aontais is infheidhme agus, go háirithe, le Treoir 2013/34/AE ó Pharlaimint na hEorpa agus ón gComhairle (11). I gcás inar chuir Ballstáit cur i bhfeidhm Airteagal 6 ar fionraí de bhun Airteagal 12, níor cheart feidhm a bheith ag na hoibleagáidí maidir le tuairisciú a leagtar amach sa Treoir seo, ar choinníoll go bhforáiltear oibleagáidí maidir le tuairisciú sa dlí náisiúnta lena n-áirithítear go bhfoilseofar faisnéis maidir leis an dul chun cinn atá bainte amach ag cuideachtaí liostaithe i dtreo ionadaíocht níos cothroime idir mná agus fir ar a mboird go rialta.

(48)

Na riachtanais a bhaineann le hiarrthóirí a roghnú lena gceapadh chuig poist stiúrthóra nó lena dtoghadh do phoist stiúrthóra, an oibleagáid maidir le cuspóir cainníochtúil a leagan síos i ndáil le stiúrthóirí feidhmiúcháin, agus oibleagáidí maidir le tuairisciú, ba cheart iad a fhorfheidhmiú trí phionóis atá éifeachtach, comhréireach agus athchomhairleach, agus ba cheart do na Ballstáit a áirithiú go bhfuil nósanna imeachta riaracháin nó breithiúnacha leordhóthanacha ar fáil chun na críche sin. D’fhéadfaí a áireamh i bpionóis den sórt sin fíneálacha nó an deis a bheith ag comhlacht breithiúnach cinneadh a bhaineann le roghnú stiúrthóirí a chur ar neamhní nó a dhearbhú go bhfuil an cinneadh sin ar neamhní go hiomlán. Gan dochar don dlí náisiúnta maidir le pionóis a fhorchur, fad a chomhlíonann cuideachtaí liostaithe na hoibleagáidí sin, níor cheart pionós a ghearradh orthu as mainneachtain na cuspóirí cainníochtúla a bhaineann le hionadaíocht chothrom idir mná agus fir i measc stiúrthóirí a bhaint amach. Níor cheart pionóis a chur i bhfeidhm maidir le cuideachtaí liostaithe iad féin más rud é, faoin dlí náisiúnta, nach bhfuil gníomh nó easnamh áirithe inchurtha i leith na cuideachta, ach i leith daoine nádúrtha nó dlítheanacha eile amhail scairshealbhóirí aonair. Ba cheart do na Ballstáit a bheith in ann pionóis a chur i bhfeidhm seachas iad siúd a liostaítear sa liosta neamh-uileghabhálach de phionóis a leagtar amach sa Treoir seo, go háirithe i gcásanna sáruithe tromchúiseacha agus sáruithe a dhéantar arís agus arís eile ag cuideachta liostaithe a bhaineann leis na hoibleagáidí a leagtar síos sa Treoir seo. Ba cheart do na Ballstáit a áirithiú, agus conarthaí poiblí agus lamháltais phoiblí á gcomhlíonadh acu, go gcomhlíonfaidh cuideachtaí liostaithe na hoibleagáidí is infheidhme a bhaineann leis an dlí sóisialta agus saothair, i gcomhréir leis an dlí is infheidhme de chuid an Aontais.

(49)

Ba cheart na Ballstáit nó cuideachtaí liostaithe a bheith in ann bearta níos fabhraí a thabhairt isteach nó a choinneáil ar bun chun ionadaíocht níos cothroime idir mná agus fir a áirithiú.

(50)

Ba cheart do na Ballstáit comhlachtaí a ainmniú chun cothromaíocht inscne ar bhoird cuideachtaí liostaithe a chur chun cinn, chun anailís agus faireachán a dhéanamh uirthi agus chun tacú léi. Ina theannta sin, le feachtais faisnéise agus comhroinnt dea-chleachtas a dhéanamh, rannchuideofaí go mór le feasacht ar an tsaincheist a ardú i measc na gcuideachtaí uile agus spreagfaí iad chun cothromaíocht inscne a bhaint amach go réamhghníomhach. Moltar do na Ballstáit, go háirithe, beartais a chur i bhfeidhm chun tacú le FBManna agus iad a dhreasú chun feabhas suntasach a chur ar an gcothromaíocht inscne ar gach leibhéal bainistíochta agus ar bhoird.

(51)

Sa Treoir seo, urramaítear na cearta bunúsacha agus comhlíontar na prionsabail a aithnítear sa Chairt. Go háirithe, rannchuidíonn sí leis an bprionsabal um chomhionannas idir mná agus fir (Airteagal 23 den Chairt) agus an tsaoirse ghairmiúil agus an ceart chun obair a dhéanamh (Airteagal 15 den Chairt) a chomhlíonadh. Leis an Treoir seo, féachtar lena áirithiú go n-urramófar go hiomlán an ceart chun leigheas éifeachtach agus triail chóir a fháil (Airteagal 47 den Chairt). Leis na teorainneacha ar fheidhmiú na saoirse chun gnó a sheoladh (Airteagal 16 den Chairt) agus ar fheidhmiú an chirt chun maoin a shealbhú (Airteagal 17(1) den Chairt), urramaítear bunbhrí na saoirse agus an chirt sin agus tá siad riachtanach agus comhréireach. Ní fhéadfar teorainneacha a dhéanamh ach amháin má chomhlíonann siad go fírinneach cuspóirí leasa ghinearálta arna n-aithint ag an Aontas nó más gá cearta agus saoirsí daoine eile a chosaint.

(52)

Cé go bhfuil gníomhaíocht rialála déanta ag roinnt Ballstát nó féinrialáil molta acu as ar tháinig torthaí measctha, níl gníomhaíocht déanta ag formhór na mBallstát ná níor léirigh siad go bhfuil siad toilteanach gníomhú ar bhealach a mbeadh feabhas leordhóthanach ina thoradh air. Réamh-mheastacháin atá bunaithe ar anailís chuimsitheach ar an bhfaisnéis uile atá ar fáil maidir leis na treochtaí a bhí ann cheana agus na treochtaí atá ann faoi láthair, agus maidir le rúin, léirítear leo nach mbainfidh na Ballstáit amach tráth ar bith ar feadh i bhfad agus iad ag gníomhú dóibh ina n-aonar, ionadaíocht chothrom idir mná agus fir i measc comhaltaí boird ar fud an Aontais i gcomhréir leis na cuspóirí a leagtar síos sa Treoir seo. Cuireann easpa gníomhaíochta sa réimse seo moill ar shaothrú an chomhionannais inscne san ionad oibre go ginearálta, lena n-áirítear maidir leis an mbearna phá idir na hinscní a dhúnadh, rud is cúis le leithscaradh ingearach. I bhfianaise na n-imthosca sin agus i bhfianaise na neamhréireachtaí idir na Ballstáit i dtéarmaí ionadaíocht chothrom idir mná agus fir ar bhoird, ar neamhréireachtaí iad atá ag dul i méid, ní féidir feabhas a chur ar an gcothromaíocht inscne ar bhoird ar fud an Aontais ach amháin trí bhíthin cur chuige comhchoiteann, agus is fearr is féidir an acmhainneacht maidir le comhionannas inscne, iomaíochas agus fás a bhaint amach trí ghníomhaíocht chomhordaithe ar leibhéal an Aontais seachas trí bhíthin tionscnaimh náisiúnta a bhfuil raon feidhme, uaillmhian agus éifeachtacht éagsúil acu. Ós rud é nach féidir leis na Ballstáit cuspóir na Treorach seo, eadhon ionadaíocht níos cothroime idir mná agus fir a bhaint amach i measc stiúrthóiri na gcuideachta liostaithe trí bhearta éifeachtacha arb é is aidhm leo dlús a chur leis an dul chun cinn i dtreo chomhionannais inscne, agus ag an am céanna, dóthain ama a cheadú do chuideachta liostaithe na socruithe is gá a dhéanamh chun na críche sin, a ghnóthú go leordhóthanach, agus, de bharr fhairsinge agus éifeacht na gníomhaíochta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, tá an Treoir seo teoranta do chuspóirí agus prionsabail choiteanna a leagan síos agus ní théann sí thar a bhfuil riachtanach chun an cuspóir sin a ghnóthú. Tugtar dóthain saoirse do na Ballstáit lena chinneadh cén chaoi is fearr chun na cuspóirí a leagtar síos sa Treoir seo a ghnóthú agus imthosca náisiúnta á gcur san áireamh, go háirithe rialacha agus cleachtais a bhaineann le hearcú ar bhoird. Ní chuireann an Treoir seo isteach ar an bhféidearthacht go gceapfadh cuideachtaí liostaithe na stiúrthóirí is incháilithe, agus foráiltear ann do chreat solúbtha agus tréimhse oiriúnaithe atá fada go leor.

(53)

Ba cheart do na Ballstáit comhoibriú leis na comhpháirtithe sóisialta agus leis an tsochaí shibhialta chun iad a chur ar an eolas go héifeachtúil faoi thábhacht, trasuí agus cur chun feidhme na Treorach seo.

(54)

I gcomhréir le prionsabal na comhréireachta, ba cheart teorainn ama a chur leis na cuspóirí atá le baint amach ag cuideachtaí liostaithe agus níor cheart don chuspóir sin fanacht i bhfeidhm ach go dtí go mbeidh dul chun cinn inbhuanaithe bainte amach maidir le comhdhéanamh inscne bord. Chuige sin, ba cheart don Choimisiún athbhreithniú tráthrialta a dhéanamh ar chur i bhfeidhm na Treorach seo agus tuairisciú do Pharlaimint na hEorpa agus don Chomhairle. Thairis sin, foráiltear leis an Treoir seo do dháta a rachaidh sí in éag. Ba cheart don Choimisiún measúnú a dhéanamh, ina athbhreithniú, féachaint an gá síneadh a chur le ré na Treorach seo thar an dáta sin.

(55)

I gcomhréir leis an Dearbhú Comhpháirteach Polaitiúil ó na Ballstáit agus ón gCoimisiún an 28 Meán Fómhair 2011 maidir le doiciméid mhíniúcháin (12), ghlac na Ballstáit mar chúram orthu féin, i gcásanna a bhfuil údar cuí leo, doiciméad amháin nó níos mó a chur leis an bhfógra faoina mbearta maidir le trasuí, ar doiciméid iad lena mínítear an gaol idir na codanna de threoir agus páirteanna comhfhreagracha na n-ionstraimí náisiúnta maidir le trasuí. I ndáil leis an Treoir seo, measann an reachtóir go bhfuil údar cuí le doiciméid den sórt sin a tharchur,

(1)

Leagtar síos le Rialachán (AE) 2022/109 ón gComhairle (2) cuótaí le haghaidh 2022.

(2)

De réir na faisnéise a fuair an Coimisiún, tá an cuóta le haghaidh 2022 ídithe ag gabhálacha an stoic roc dústríoctha in uiscí an Aontais i gcrios 9 ag soithí a bhfuil bratach na Portaingéile ar foluain acu nó ag soithí atá cláraithe sa Phortaingéil.

(3)

Is gá, dá bhrí sin, toirmeasc a chur ar ghníomhaíochtaí áirithe iascaireachta a bhaineann leis an stoc sin.

(1)

Ní mór d’fheithiclí a chineálcheadaítear san Aontas a bheith in ann rith ar bhithdhíosal íon agus ar chumaisc éagsúla de bhithdhíosal agus de bhreoslaí iontaise i gcás inar gá.

(2)

I gcomhréir le hAirteagal 3 de Rialachán (AE) Uimh. 582/2011 ón gCoimisiún (2), ceanglaítear le haghaidh cineálcheadú mótarfheithiclí agus inneall i leith astaíochtaí go n-áirithíonn an monaróir go gcomhlíontar na sonraíochtaí maidir le breoslaí tagartha a leagtar amach in Iarscríbhinn IX a ghabhann leis an Rialachán sin agus a úsáidtear le haghaidh tástálacha cineálcheadaithe.

(3)

Ní liostaítear an bithdhíosal íon (FAME B100) in Iarscríbhinn IX a ghabhann le Rialachán (AE) Uimh. 582/2011 mar bhreosla tagartha le haghaidh chineálcheadú na bhfeithiclí saothair throm i leith astaíochtaí. Ní mór tástáil chineálcheadaithe a dhéanamh go dúbailte ar dhíosal (B7) agus ar bhithdhíosal (B100) araon chun comhlíonadh na gceangaltas maidir le hastaíochtaí a léiriú. Chun dúbláil na tástála a íoslaghdú agus chun an deimhniúchán le haghaidh úsáid bithdhíosail íon agus cumasc bithdhíosail (amhail FAME B20/B30) a éascú, is gá sonraíochtaí a thabhairt isteach le haghaidh an bhithdhíosail íon mar bhreosla tagartha, agus iad bunaithe ar chaighdeáin ábhartha idirnáisiúnta agus Eorpacha. Ba cheart a cheadú go léireofaí comhlíonadh na gceangaltas tástála astaíochtaí le haghaidh cineálcheadú B100 trí thástáil astaíochtaí le bithdhíosal íon a dhéanamh ar an máthair-inneall. Féadfar aon chumasc bithbhreosla a roghnú le haghaidh na tástála comhréireachta inseirbhíse is gá.

(4)

Chun feithiclí a bhfuil inneall formheasta iontu a fhormheas, is gá aguisín maidir le sonraíochtaí an deimhnithe ar chineálcheadú.

(5)

Dá bhrí sin, ba cheart Rialachán (AE) Uimh. 582/2011 ón gCoimisiún a leasú dá réir sin.

(6)

Tá na bearta dá bhforáiltear sa Rialachán seo i gcomhréir le tuairim an Choiste Theicniúil – Mótarfheithiclí.

(1)

Ag an 11ú Comhdháil Aireachta de chuid na hEagraíochta Domhanda Trádála (EDT), d’eisigh grúpa de 59 gComhalta EDT, lena n-áirítear an tAontas, Ráiteas Comhpháirteach Aireachta maidir le Rialáil Intíre Seirbhísí lenar sheol siad tionscnamh iltaobhach chun caibidlíocht a dhéanamh ar dhisciplíní ar rialáil intíre seirbhísí.

(2)

Rinne an Coimisiún caibidlíocht i gcomhairle leis an gCoiste arna bhunú faoi Airteagal 207(3) den Chonradh. Mhéadaigh líon na rannpháirtithe sa Tionscnamh Comhráiteas iltaobhach sin go 67 gComhalta EDT le himeacht aimsire.

(3)

An 2 Nollaig 2021, d’eisigh na rannpháirtithe sa chaibidlíocht sin Dearbhú maidir le tabhairt i gcrích na Caibidlíochta maidir le Rialáil Intíre Seirbhísí (“an Dearbhú”), lenar fógraíodh gur tugadh an chaibidlíocht i gcrích go rathúil. Thug na rannpháirtithe dá n-aire gur tugadh an chaibidlíocht i gcrích maidir leis an bPáipéar Tagartha maidir le Rialáil Intíre Seirbhísí, a leagtar amach in Iarscríbhinn 1 a ghabhann leis an Dearbhú. Ba dhíol sásaimh dóibh freisin Sceidil GATS de Cheangaltais Shonracha a thíolaic Comhaltaí EDT mar rannchuidiú uathu chun bailchríoch a chur ar an gcaibidlíocht agus a bhí ag gabháil leis an Dearbhú mar Iarscríbhinn 2.

(4)

Tá sé beartaithe ag rannpháirtithe an Dearbhaithe na disciplíní a shonraítear in Iarscríbhinn 1 a ghabhann leis an Dearbhú a ionchorprú mar cheangaltais bhreise ina Sceidil GATS de Cheangaltais Shonracha, i gcomhréir le Roinn 1 den Iarscríbhinn sin. I gcomhréir le mír 5 den Dearbhú, tá sé d’aidhm ag na rannpháirtithe a Sceidil GATS de Cheangaltais Shonracha a chur isteach lena ndeimhniú, de bhun na Nósanna Imeachta maidir le Deimhniúchán Ceartúcháin nó Feabhsúcháin a ghabhann le Sceidil de Cheangaltais Shonracha, laistigh de 12 mhí ó dháta an Dearbhaithe, faoi réir aon nós imeachta intíre is gá a chur i gcrích.

(5)

I gcomhréir leis an Dearbhú, ba cheart don Aontas na modhnuithe is gá ar Sceideal GATS an Aontais de Cheangaltais Shonracha a chur faoi bhráid EDT, mar a leagtar amach i Sceideal Réamh Chríochnaithe an Aontais de Cheangaltais Shonracha,

(6)

Ba cheart, dá bhrí sin, ionchorprú na ndisciplíní a shonraítear in Iarscríbhinn 1 a ghabhann leis an Dearbhú mar cheangaltais bhreise i Sceideal GATS an Aontais de Cheangaltais Shonracha a fhormheas thar ceann an Aontais.