(1)

Tá seirbhísí sochaí faisnéise agus go háirithe seirbhísí idirghabhálacha anois ina gcuid thábhachtach de gheilleagar an Aontais agus de shaol laethúil shaoránaigh an Aontais. Scór bliain tar éis ghlacadh an chreata dhlíthiúil reatha is infheidhme maidir le seirbhísí den sórt sin a leagtar síos i dTreoir 2000/31/CE ó Pharlaimint na hEorpa agus ón gComhairle (4), thug samhlacha agus seirbhísí nua agus nuálacha gnó, cosúil le líonraí sóisialta ar líne agus ardáin ar líne a cheadaíonn do thomhaltóirí cianchonarthaí a thabhairt i gcrích le trádálaithe, deis d’úsáideoirí gnó agus do thomhaltóirí faisnéis a thabhairt agus a rochtain agus tabhairt faoi idirbhearta ar bhealaí nua. Úsáideann tromlach shaoránaigh an Aontais na seirbhísí sin ar bhonn laethúil anois. Ach, tá an claochlú digiteach agus an úsáid mhéadaithe a bhaintear as na seirbhísí sin anois ina bhfoinse rioscaí agus dúshlán nua d’fhaighteoirí aonair na seirbhíse ábhartha, do chuideachtaí agus don tsochaí ina hiomláine.

(2)

Tá na Ballstáit ag tabhairt níos mó dlíthe náisiúnta isteach, nó ag smaoineamh ar dhlíthe náisiúnta a thabhairt isteach maidir leis na hábhair a chumhdaítear leis an Rialachán seo, ag forchur, go háirithe, ceanglais díchill chuí ar sholáthraithe seirbhísí idirghabhálacha maidir leis an gcaoi ar cheart dóibh dul i ngleic le hinneachar neamhdhleathach, bréagaisnéis ar líne nó rioscaí sochaíocha eile. Tá tionchar diúltach ag na dlíthe náisiúnta difriúla sin ar an margadh inmheánach, atá comhdhéanta, de bhun Airteagal 26 den Chonradh ar Fheidhmiú an Aontais Eorpaigh (CFAE), de limistéar gan teorainneacha inmheánacha ina n-áirithítear saorghluaiseacht earraí agus seirbhísí agus saoirse bhunaíochta, agus aird á tabhairt ar chineál trasteorann an idirlín go bunúsach, a úsáidtear go ginearálta chun na seirbhísí sin a sholáthar. Ba cheart na coinníollacha maidir le soláthar seirbhísí idirghabhálacha ar fud an mhargaidh inmheánaigh a chomhchuibhiú, chun rochtain a chur ar fáil do ghnólachtaí ar mhargaí agus deiseanna nua chun leas a bhaint as buntáistí an mhargaidh inmheánaigh, agus chun a cheadú do thomhaltóirí agus d’fhaighteoirí eile na seirbhísí rogha níos mó a bheith acu ag an am céanna. Chun críocha an Rialacháin seo, meastar gur “faighteoirí na seirbhíse” iad úsáideoirí gnó, tomhaltóirí agus úsáideoirí eile.

(3)

Tá iompar freagrach agus dícheallach na soláthraithe seirbhísí idirghabhálacha fíor-riachtanach i gcomhair timpeallacht ar líne atá sábháilte, intuartha agus iontaofa agus chun ligean do shaoránaigh an Aontais agus daoine eile a gcearta bunúsacha a ráthaítear sa Chairt um Chearta Bunúsacha an Aontais Eorpaigh (“an Chairt”) a fheidhmiú, go háirithe an tsaoirse chun tuairimí a nochtadh agus faisnéis a fháil, an tsaoirse chun gnó a sheoladh, ceart an neamh-idirdhealaithe agus baint amach ardleibhéil cosanta do thomhaltóirí.

(4)

Dá bhrí sin, chun feidhmiú an mhargaidh inmheánaigh a choimirciú agus a fheabhsú, ba cheart sraith spriocdhírithe rialacha sainordaitheacha aonfhoirmeacha, éifeachtacha agus comhréireacha a bhunú ar leibhéal an Aontais. Soláthraítear na coinníollacha sa Rialachán seo chun gur féidir le seirbhísí nuálacha digiteacha teacht chun cinn agus méadú sa mhargadh inmheánach. Tá an comhfhogasú ar bhearta rialála náisiúnta ar leibhéal an Aontais a bhaineann leis na ceanglais do sholáthraithe seirbhísí idirghabhálacha riachtanach chun ilroinnt an mhargaidh a sheachaint agus deireadh a chur léi sin agus chun deimhneacht dhlíthiúil a áirithiú, ag laghdú na héiginnteachta, dá bhrí sin, d’fhorbróirí agus ag cothú idir-inoibritheachta. Ach úsáid a bhaint as ceanglais atá neodrach ó thaobh na teicneolaíochta de, níor cheart bac a chur ar nuálaíocht ach ba cheart ina ionad sin í a spreagadh.

(5)

Ba cheart feidhm a bheith ag an Rialachán seo maidir le soláthraithe seirbhísí áirithe sochaí faisnéise mar a shainmhínítear i dTreoir (AE) 2015/1535 ó Pharlaimint na hEorpa agus ón gComhairle (5) iad, is é sin, aon seirbhís a sholáthraítear de ghnáth i gcomhair luach saothair, ó chian, trí mheán leictreonach agus tar éis iarraidh aonair a fháil ó fhaighteoir. Go sonrach, ba cheart feidhm a bheith ag an Rialachán seo maidir le soláthraithe seirbhísí idirghabhálacha, agus go háirithe seirbhísí idirghabhálacha comhdhéanta de sheirbhísí ar a dtugtar seirbhísí “cainéil fhóraigh”, “taiscthe” agus “óstála”, ós rud é gur mhéadaigh fás as cuimse na húsáide a bhaintear as na seirbhísí sin, go príomha chun críoch dlisteanach agus chun tairbhe na sochaí de gach cineál, a ról freisin in idirghabháil agus scaipeadh faisnéise agus gníomhaíochtaí atá neamhdhleathach nó díobhálach ar bhealach eile.

(6)

Sa chleachtas, déanann soláthraithe áirithe seirbhísí idirghabhálacha idirghabháil i ndáil le seirbhísí a d’fhéadfaí a chur ar fáil trí mheán leictreonach, amhail seirbhísí teicneolaíochta faisnéise cianda, iompar, cóiríocht nó seirbhísí seachadta. Níor cheart go mbeadh feidhm ag an Rialachán seo ach maidir le seirbhísí idirghabhálacha amháin agus níor cheart dó difear a dhéanamh do cheanglais a leagtar amach san Aontas nó sa dlí náisiúnta a bhaineann le táirgí nó seirbhísí a ndéantar idirghabháil orthu trí sheirbhísí idirghabhálacha, lena n-áirítear i gcásanna inarb ionann an tseirbhís idirghabhálach agus dlúthchuid de sheirbhís eile nach seirbhís idirghabhálach í mar a aithnítear i gcásdlí Chúirt Bhreithiúnais an Aontais Eorpaigh.

(7)

Chun éifeachtacht na rialacha a leagtar síos sa Rialachán seo a áirithiú agus cothroime iomaíochta a bheith ann laistigh den mhargadh inmheánach, ba cheart feidhm a bheith ag na rialacha sin maidir le soláthraithe seirbhísí idirghabhálacha gan beann ar a n-áit bhunaíochta nó a suíomh, a mhéid a thairgeann siad seirbhísí san Aontas, arna fhianú le nasc substaintiúil leis an Aontas.

(8)

Ba cheart féachaint ar nasc substaintiúil den chineál sin leis an Aontas mar rud arb ann dó i gcás ina bhfuil bunaíocht ag an soláthraí seirbhíse san Aontas nó, in éagmais bunaíocht den sórt sin, i gcás ina bhfuil an líon faighteoirí seirbhíse i mBallstát amháin nó níos mó suntasach i gcomparáid leis an daonra iontu, nó ar bhonn gníomhaíochtaí á spriocdhíriú i dtreo Ballstát amháin nó níos mó. Is féidir spriocdhíriú gníomhaíochtaí i dtreo Ballstát amháin nó níos mó a chinneadh ar bhonn na gcúinsí ábhartha ar fad, lena n-áirítear tosca amhail úsáid teanga nó airgeadra a úsáidtear go ginearálta sa Bhallstát sin, nó an fhéidearthacht chun táirgí nó seirbhísí a ordú, nó fearann barrleibhéil ábhartha a úsáid. Ba cheart spriocdhíriú gníomhaíochtaí i dtreo Ballstát amháin nó níos mó a dhíorthú ó infhaighteacht iarratais sa stór iarratais náisiúnta ábhartha, ó fhógraíocht áitiúil nó fógraíocht i dteanga a úsáidtear sa Bhallstát sin a sholáthar, nó ó chaidreamh custaiméirí a láimhseáil cosúil le seirbhís do chustaiméirí a sholáthar i dteanga a úsáidtear go ginearálta sa Bhallstát sin. Ba cheart nasc substaintiúil a thoimhdiú freisin i gcás ina ndíríonn soláthraí seirbhíse a ghníomhaíochtaí i dtreo Ballstát amháin nó níos mó de réir bhrí Airteagal 17(1), pointe (c), de Rialachán (AE) Uimh. 1215/2012 ó Pharlaimint na hEorpa agus ón gComhairle (6). Os a choinne sin, ní féidir díreach inrochtaineacht theicniúil suímh gréasáin ón Aontas a mheas, ar an bhforas sin amháin, mar rud lena mbunaítear nasc substaintiúil leis an Aontas.

(9)

Leis an Rialachán seo, déantar na rialacha is infheidhme maidir le seirbhísí idirghabhálacha sa mhargadh inmheánach a chomhchuibhiú go hiomlán agus é mar chuspóir leis timpeallacht shábháilte, intuartha agus iontaofa ar líne a áirithiú agus aghaidh a thabhairt ar scaipeadh inneachair neamhdhleathaigh ar líne agus ar an mbaol don tsochaí a d’fhéadfadh teacht as scaipeadh bréagaisnéise nó inneachair eile, agus ina dtugtar cosaint éifeachtach do na cearta bunúsacha a chumhdaítear sa Chairt agus ina n-éascaítear an nuálaíocht. Dá réir sin, níor cheart do na Ballstáit ceanglais bhreise náisiúnta a ghlacadh ná a choimeád ar bun maidir leis na hábhair a thagann faoi raon feidhme an Rialacháin seo, mura bhforáiltear dó sin go sainráite sa Rialachán seo, ós rud é go ndéanfadh sé sin difear do chur i bhfeidhm díreach aonfhoirmeach na rialacha lán-chomhchuibhithe is infheidhme maidir le soláthraithe seirbhísí idirghabhálacha i gcomhréir le cuspóirí an Rialacháin seo. Níor cheart go gcuirfeadh sé sin bac ar an deis atá ann reachtaíocht náisiúnta eile is infheidhme maidir le soláthraithe seirbhísí idirghabhálacha a chur i bhfeidhm, i gcomhréir le dlí an Aontais, lena n-áirítear Treoir 2000/31/CE, go háirithe Airteagal 3 di, i gcás ina saothraítear le forálacha an dlí náisiúnta cuspóirí dlisteanacha eile maidir le leas an phobail seachas na cuspóirí a shaothraítear leis an Rialachán seo.

(10)

Ba cheart an Rialachán seo a bheith gan dochar do ghníomhartha eile de dhlí an Aontais lena rialáiltear soláthar sheirbhísí sochaí faisnéise i gcoitinne nó gnéithe eile de sholáthar seirbhísí idirghabhálacha sa mhargadh inmheánach nó lena sonraítear agus lena gcomhlánaítear na rialacha comhchuibhithe a leagtar amach sa Rialachán seo, amhail Treoir 2010/13/AE ó Pharlaimint na hEorpa agus ón gComhairle (7), lena n-áirítear na forálacha di maidir le hardáin comhroinnte físeán, Rialacháin (AE) 2019/1148 (8), (AE) 2019/1150 (9), (AE) 2021/784 (10) agus (AE) 2021/1232 (11) ó Pharlaimint na hEorpa agus ón gComhairle agus Treoir 2002/58/CE ó Pharlaimint na hEorpa agus ón gComhairle (12) agus forálacha dhlí an Aontais a leagtar amach i Rialachán maidir le hOrduithe Eorpacha chun Fianaise a Thabhairt ar Aird agus Orduithe Caomhnaithe Eorpacha i gcomhair fianaise leictreonach in ábhair choiriúla agus i dTreoir lena leagtar síos rialacha comhchuibhithe maidir le hionadaithe dlíthiúla a cheapadh chun críche fianaise a bhailiú in imeachtaí coiriúla.

Ar an gcaoi chéanna, ar mhaithe le soiléireacht, ba cheart an Rialachán seo a bheith gan dochar do dhlí an Aontais maidir le cosaint tomhaltóirí, go háirithe Rialacháin (AE) 2017/2394 (13) agus (AE) 2019/1020 (14) ó Pharlaimint na hEorpa agus ón gComhairle, Treoracha 2001/95/CE (15), 2005/29/CE (16), 2011/83/AE (17) agus 2013/11/AE (18) ó Pharlaimint na hEorpa agus ón gComhairle, agus Rialachán 93/13/CEE ón gComhairle (19), agus maidir le cosaint sonraí pearsanta, go háirithe Rialachán (AE) 2016/679 ó Pharlaimint na hEorpa agus ón gComhairle (20).

Ba cheart an Rialachán seo a bheith gan dochar do rialacha an Aontais maidir leis an dlí idirnáisiúnta príobháideach freisin, go háirithe na rialacha a bhaineann le dlínse agus le haithint agus forfheidhmiú breithiúnas in ábhair shibhialta agus thráchtála, mar atá Rialachán (AE) Uimh. 1215/2012, agus na rialacha a bhaineann leis an dlí is infheidhme maidir le hoibleagáidí conarthacha agus neamhchonarthacha. Déantar cosaint daoine aonair maidir le próiseáil sonraí pearsanta a rialú le rialacha dhlí an Aontais maidir leis an ábhar sin, agus leis na rialacha sin amháin, go háirithe Rialachán (AE) 2016/679 agus Treoir 2002/58/CE. Ina theannta sin, ba cheart an Rialachán seo a bheith gan dochar do dhlí an Aontais maidir le dálaí oibre agus dhlí an Aontais i réimse an chomhair bhreithiúnaigh in ábhair shibhialta agus choiriúla. A mhéid a shaothraítear leis na gníomhartha dlí sin de chuid an Aontais na cuspóirí céanna leis na cinn a leagtar síos sa Rialachán seo, áfach, ba cheart feidhm a bheith ag rialacha an Rialacháin seo maidir le saincheisteanna nach dtugtar aghaidh orthu nó nach dtugtar aghaidh orthu go hiomlán sna gníomhartha dlí eile sin chomh maith le saincheisteanna ar maidir leo a fhágann na gníomhartha dlí eile sin Ballstáit leis an bhféidearthacht bearta áirithe a ghlacadh ar an leibhéal náisiúnta.

(11)

Ba cheart a shoiléiriú go bhfuil an Rialachán seo gan dochar do dhlí an Aontais maidir le cóipcheart agus cearta lena mbaineann, lena n-áirítear Treoracha 2001/29/CE (21), 2004/48/CE (22) agus (AE) 2019/790 (23) ó Pharlaimint na hEorpa agus ón gComhairle, lena mbunaítear rialacha agus nósanna imeachta sonracha nár cheart go mbeadh tionchar orthu.

(12)

Chun an cuspóir a bhaint amach maidir le timpeallacht shábháilte, intuartha agus iontaofa ar líne a áirithiú, chun críocha an Rialacháin seo, ba cheart don choincheap “inneachar neamhdhleathach” a bheith ina léiriú ginearálta ar na rialacha atá ann cheana sa timpeallacht as líne. Go háirithe, ba cheart coincheap an “ábhair neamhdhleathaigh” a shainmhíniú go leathan chun faisnéis a bhaineann le hinneachar, táirgí, seirbhísí agus gníomhaíochtaí neamhdhleathacha a chumhdach. Go háirithe, ba cheart a thuiscint leis an gcoincheap sin go dtagraíonn sé d’fhaisnéis, gan beann ar a foirm, atá neamhdhleathach inti féin faoin dlí is infheidhme, amhail fuathchaint nó inneachar sceimhlitheoireachta neamhdhleathach agus inneachar idirdhealaitheach neamhdhleathach, nó go bhfágann na rialacha is infheidhme go bhfuil sí neamhdhleathach toisc go mbaineann sí le gníomhaíochtaí neamhdhleathacha. Is samplaí léiritheacha iad seo a leanas: comhroinnt íomhánna ina dtaispeántar mí-úsáid ghnéasach leanaí, comhroinnt íomhánna príobháideacha ar bhealach neamhthoiliúil neamhdhleathach, cibearstácáil, díolachán táirgí neamhchomhlíontacha nó góchumtha, díol táirgí nó soláthar seirbhísí lena sáraítear an dlí cosanta tomhaltóirí, úsáid neamhúdaraithe ábhair atá faoi chosaint cóipchirt, tairiscint mhídhleathach seirbhísí cóiríochta nó díol neamhdhleathach ainmhithe beo. Os a choinne sin, níor cheart a mheas gur inneachar neamhdhleathach é físeán a ghlacann finné de choir a d’fhéadfadh a bheith déanta, toisc go léirítear gníomh neamhdhleathach leis, i gcás nach bhfuil sé neamhdhleathach físeán den sórt sin a thaifeadadh nó a scaipeadh ar an bpobal faoin dlí náisiúnta nó faoi dhlí an Aontais. I ndáil leis sin, tá sé neamhábhartha an dtagann neamhdhleathacht na faisnéise nó na gníomhaíochta ó dhlí an Aontais nó ón dlí náisiúnta a chomhlíonann dlí an Aontais agus cad é cineál nó ábhar beacht an dlí atá i gceist.

(13)

I bhfianaise shaintréithe áirithe na seirbhísí lena mbaineann agus an ghá chomhfhreagraigh atá leis na soláthraithe sin a bheith faoi réir oibleagáidí sonracha áirithe, is gá, laistigh den chatagóir níos leithne maidir le soláthraithe seirbhísí óstála mar a shainmhínítear sa Rialachán seo í, an fhochatagóir maidir le hardáin ar líne a shainiú. Ba cheart ardáin ar líne, amhail líonraí sóisialta nó ardáin ar líne a cheadaíonn do thomhaltóirí cianchonarthaí a thabhairt i gcrích le trádálaithe, a shainmhíniú mar sholáthraithe seirbhísí óstála a stórálann ní hamháin faisnéis a sholáthraíonn faighteoirí na seirbhísí arna iarraidh sin dóibh, ach a scaipeann an fhaisnéis sin ar an bpobal freisin, arna iarraidh sin d’faighteoirí na seirbhíse. Áfach, chun forchur oibleagáidí atá róleathan a sheachaint, níor cheart soláthraithe seirbhísí óstála a mheas mar ardáin ar líne nach bhfuil sa scaipeadh ar an bpobal ach mionghné atá go hiomlán coimhdeach agus atá nasctha aisti féin le seirbhís eile nó mionfheidhmiúlacht de chuid na príomhsheirbhíse agus nach féidir an ghné nó an fheidhmiúlacht sin, ar chúiseanna teicniúla cuspóireacha, a úsáid gan an tseirbhís eile nó an phríomhsheirbhís sin, agus nach bealach é comhtháthú na gné nó na feidhmiúlachta sin chun dul timpeall ar infheidhmeacht rialacha an Rialacháin seo is infheidhme maidir le hardáin ar líne. Mar shampla, d’fhéadfadh gné den sórt sin a bheith i gceist i rannán na mbarúlacha i nuachtán ar líne, inar léir gur gné choimhdeach é anuas ar an bpríomhsheirbhís atá ag an bhfoilseachán nuachta faoi fhreagracht eagarthóireachta an fhoilsitheora. Os a choinne sin, ba cheart féachaint ar stóráil barúlacha i líonra sóisialta mar sheirbhís ardáin ar líne, i gcás inar léir nach mionghné den tseirbhís atá á tairiscint an méid sin, fiú más seirbhís choimhdeach é anuas ar fhoilsiú phostálacha fhaighteoirí na seirbhíse. Chun críocha an Rialacháin seo, níor cheart a mheas gur ardán ar líne iad seirbhísí néalríomhaireachta nó seirbhísí óstála gréasáin arb ionann scaipeadh faisnéise sonraí ar an bpobal agus mionghné choimhdeach nó mionfheidhmiúlacht de chuid na seirbhísí sin.

Thairis sin, i gcás seirbhísí néalríomhaireachta agus seirbhísí óstála gréasáin, nuair a bhíonn siad ag feidhmiú mar bhonneagar, amhail na seirbhísí foluiteacha bonneagair le haghaidh stórála agus ríomhaireachta de chuid feidhmchlár idirlíonbhunaithe, suíomh gréasáin nó ardán ar líne, níor cheart a mheas go bhfuil na seirbhísí sin ag scaipeadh faisnéis ar an bpobal, ar faisnéis í a stóráiltear nó a phróiseáiltear arna iarraidh sin d’faighteoir an fheidhmchláir, an tsuímh gréasáin nó an ardáin ar líne a óstálann siad.

(14)

Leis an gcoincheap “scaipeadh ar an bpobal”, mar a úsáidtear sa Rialachán seo é, ba cheart faisnéis a chur ar fáil do líon daoine a d’fhéadfadh a bheith neamhtheoranta a áireamh, is é sin le rá faisnéis a dhéanamh inrochtana d’fhaighteoirí na seirbhíse i gcoitinne gan gá a bheith le tuilleadh gníomhaíochta ó fhaighteoir na seirbhíse a sholáthraíonn an fhaisnéis, gan beann ar cé acu is féidir nó nach féidir leis na daoine sin rochtain a fháil ar an bhfaisnéis atá i gceist. Dá réir sin, i gcás ina bhfágann rochtain ar fhaisnéis gur gá grúpa d’fhaighteoirí na seirbhíse a chlárú nó a ligean isteach, níor cheart a mheas go bhfuil an fhaisnéis sin á scaipeadh ar an bpobal ach amháin i gcás ina gcláraítear nó ina ligtear isteach go huathoibríoch na faighteoirí seirbhíse atá ag iarraidh rochtain a fháil ar an bhfaisnéis gan cinneadh a bheith déanta ag duine ná rogha a bheith déanta maidir leis na daoine a dtabharfar rochtain dóibh. Tagann seirbhísí cumarsáide idirphearsanta, mar a shainmhínítear i dTreoir (AE) 2018/1972 ó Pharlaimint na hEorpa agus ón gComhairle (24) iad, amhail ríomhphoist nó seirbhísí teachtaireachta príobháidí, lasmuigh de raon feidhme an tsainmhínithe ar ardáin ar líne cionn is go n-úsáidtear iad chun cumarsáid idirphearsanta a dhéanamh idir líon teoranta daoine, ar líon é a chinneann seoltóir na cumarsáide. Na hoibleagáidí ar sholáthraithe ardán ar líne a leagtar amach sa Rialachán seo, áfach, féadfaidh feidhm a bheith acu maidir le seirbhísí lenar féidir faisnéis a chur ar fáil do líon faighteoirí a d’fhéadfadh a bheith neamhtheoranta agus nach gcinneann seoltóir na cumarsáide, amhail trí ghrúpaí poiblí nó trí bhealaí oscailte. Níor cheart faisnéis a mheas amhail gur scaipeadh ar an bpobal í de réir bhrí an Rialacháin seo ach amháin i gcás ina dtarlaíonn an scaipeadh sin ar iarraidh dhíreach ó fhaighteoir na seirbhíse sin a chuir an fhaisnéis ar fáil.

(15)

I gcás ina gcumhdaítear roinnt de na seirbhísí a sholáthraíonn soláthraí leis an Rialachán seo cé nach gcumhdaítear roinnt eile, nó i gcás ina gcumhdaítear na seirbhísí a sholáthraíonn soláthraí le ranna éagsúla den Rialachán seo, ba cheart feidhm a bheith ag forálacha ábhartha an Rialacháin seo maidir leis na seirbhísí sin amháin a thagann faoina raon feidhme.

(16)

Mar gheall ar an deimhneacht dhlíthiúil arna soláthar ag an gcreat cothrománach le haghaidh díolúintí coinníollacha ó dhliteanas do sholáthraithe seirbhísí idirghabhálacha, mar a leagtar síos i dTreoir 2000/31/CE, tháinig go leor seirbhísí nua chun cinn agus tháinig méadú orthu ar fud an mhargaidh inmheánaigh. Ba cheart an creat a chaomhnú dá bhrí sin. D’fhonn na héagsúlachtaí agus na rialacha ábhartha a bheith á dtrasuí agus á gcur i bhfeidhm ar an leibhéal náisiúnta, áfach, agus ar mhaithe le soiléireacht agus comhleanúnachas, ba cheart an creat sin a ionchorprú sa Rialachán sin. Is gá freisin gnéithe áirithe den chreat sin a shoiléiriú, ag féachaint do chásdlí Chúirt Bhreithiúnais an Aontais Eorpaigh.

(17)

Níor cheart a bhunú le rialacha maidir le dliteanas do sholáthraithe seirbhísí idirghabhálacha a leagtar amach sa Rialachán seo ach amháin nuair nach féidir soláthraí na seirbhísí idirghabhálacha lena mbaineann a chur faoi dhliteanas i ndáil le hinneachar neamhdhleathach a sholáthraíonn faighteoirí na seirbhíse. Níor cheart tuiscint a bhaint as na rialacha sin go gcuirtear bunús dearfach ar fáil leo chun a shuí cá huair is féidir soláthraí a chur faoi dhliteanas, rud a dhéanfar a chinneadh le rialacha infheidhme an Aontais nó an dlí náisiúnta. Thairis sin, ba cheart feidhm a bheith ag na díolúintí ó dhliteanas a bhunaítear sa Rialachán seo maidir le haon chineál dliteanais a mhéid a bhaineann le haon chineál inneachair neamhdhleathaigh, gan beann ar ábhar beacht na ndlíthe sin ná ar a gcineál.

(18)

Níor cheart feidhm a bheith ag na díolúintí ó dhliteanas a bhunaítear sa Rialachán seo i gcás, seachas é féin a theorannú do sholáthar neodrach na seirbhísí ach díreach próiseáil theicniúil agus uathoibríoch a dhéanamh ar an bhfaisnéis a sholáthair faighteoir na seirbhíse, ina bhfuil ról gníomhach ag an soláthraí seirbhísí idirghabhálacha ar de chineál é a fhágann gur féidir leis eolas nó smacht a fháil ar an bhfaisnéis sin. Níor cheart na díolúintí sin a bheith ar fáil dá réir sin maidir le dliteanas a bhaineann le faisnéis nach soláthraíonn faighteoir na seirbhíse ach a sholáthraíonn soláthraí na seirbhíse idirghabhálaí féin, lena n-áirítear i gcás inar forbraíodh an fhaisnéis faoi fhreagracht eagarthóireachta an tsoláthraí sin.

(19)

I bhfianaise chineál éagsúil na ngníomhaíochtaí “cainéil fhóraigh”, “taiscthe” agus “óstála” agus sheasamh agus chumais éagsúla soláthraithe na seirbhísí atá i gceist, is gá idirdhealú a dhéanamh idir na rialacha is infheidhme maidir leis na gníomhaíochtaí sin, a mhéid atá siad faoi réir ceanglais agus coinníollacha éagsúla agus go bhfuil a raon feidhme éagsúil faoin Rialachán seo, mar a léirmhíníonn Cúirt Bhreithiúnais an Aontais Eorpaigh é.

(20)

I gcás ina dtéann soláthraí seirbhísí idirghabhálacha i gcomhar d’aon turas le faighteoir seirbhísí chun tabhairt faoi ghníomhaíochtaí neamhdhleathacha, níor cheart a mheas gur soláthraíodh na seirbhísí go neodrach agus, dá bhrí sin, níor cheart go mbeadh an soláthraí in ann tairbhe a bhaint as na díolúintí ó dhliteanas dá bhforáiltear sa Rialachán seo. Ba cheart go mb’amhlaidh an cás, mar shampla, i gcás ina dtairgfidh an soláthraí a sheirbhís chun gníomhaíochtaí neamhdhleathacha a éascú, mar shampla trína léiriú go sainráite gurb é is cuspóir dó gníomhaíochtaí neamhdhleathacha a éascú nó go bhfuil a chuid seirbhísí oiriúnach chun na críche sin. Níor cheart gur leor ann féin go dtairgeann seirbhís tarchur criptithe nó aon chóras eile a fhágann nach féidir an t-úsáideoir a aithint chun a mheas go bhfuiltear ag éascú gníomhaíochtaí neamhdhleathacha.

(21)

Ba cheart go mbeadh soláthraí in ann tairbhe a bhaint as na díolúintí ó dhliteanas do “chainéal fórach” agus do sheirbhísí “taiscthe” nuair nach mbaineann sé in aon chor leis an bhfaisnéis a tharchuirtear nó a bhfuil rochtain uirthi. Ní mór chuige sin, i measc nithe eile, nach modhnódh an soláthraí an fhaisnéis a tharchuireann sé nó a dtugann sé rochtain uirthi. Níor cheart a thuiscint as an gceanglas sin, áfach, go gcumhdaítear leis ionramhálacha de chineál teicniúil a tharlaíonn i rith an tarchuir nó na rochtana, a fhad agus nach n-athraíonn na hionramhálacha sin sláine na faisnéise a tharchuirtear nó a dtugtar rochtain uirthi.

(22)

Chun tairbhe a bhaint as an díolúine ó dhliteanas i gcomhair seirbhísí óstála, ba cheart don soláthraí, nuair a fhaigheann sé eolas nó feasacht maidir le gníomhaíochtaí nó inneachar neamhdhleathach, gníomhú go tapa chun rochtain ar an inneachar sin a bhaint nó a dhíchumasú. Ba cheart tabhairt faoi bhaint nó díchumasú na rochtana agus aird ar chearta bunúsacha fhaighteoirí na seirbhíse, lena n-áirítear an tsaoirse chun tuairimí a nochtadh agus chun faisnéis a fháil. Féadfaidh an soláthraí an t-eolas nó an fheasacht sin a fháil ar chineál neamhdhleathach an inneachair, inter alia trína chuid imscrúduithe féintionscnaimh féin nó trí fhógraí arna seoladh isteach chuige ó dhaoine aonair nó eintitis i gcomhréir leis an Rialachán seo a mhéid atá na fógraí den sórt sin beacht go leor agus go bhfuil bunús oiriúnach leo chun gur féidir le hoibreoir eacnamaíoch dícheallach an t-inneachar a líomhnaíodh go bhfuil sé neamhdhleathach a shainaithint agus a mheasúnú go réasúnta agus, i gcás inarb iomchuí, gníomhú go réasúnta ina aghaidh. Ní féidir a mheas, áfach, go bhfuarthas an t-eolas nó an fheasacht sin díreach ar an bhforas go bhfuil an soláthraí ar an eolas, sa chiall ghinearálta, go n-úsáidtear a sheirbhís freisin chun inneachar neamhdhleathach a stóráil. Ina theannta sin, más é an cás é go ndéanann an soláthraí faisnéis arna huaslódáil chuig a sheirbhís a innéacsú go huathoibríoch, go bhfuil feidhm chuardaigh aige nó go molann sé faisnéis ar bhonn phróifílí nó roghanna na bhfaighteoirí seirbhíse, ní foras leordhóthanach é sin chun a mheas go bhfuil eolas “sonrach” ag an soláthraí ar ghníomhaíochtaí neamhdhleathacha arna ndéanamh ar an ardán sin ná ar inneachar neamhdhleathach arna stóráil ann.

(23)

Níor cheart feidhm a bheith ag an díolúine ó dhliteanas i gcás ina bhfuil faighteoir na seirbhíse ag feidhmiú faoi údarás nó smacht soláthraí seirbhíse óstála. Mar shampla, i gcás ina ndéanann soláthraí ardáin ar líne a thugann cead do thomhaltóirí cianchonarthaí a thabhairt i gcrích le trádálaithe cinneadh faoi phraghas na n-earraí nó na seirbhísí arna dtairiscint ag an trádálaí, d’fhéadfaí a mheas go bhfuil an trádálaí ag gníomhú faoi údarás nó rialú an ardáin ar líne sin.

(24)

Chun cosaint éifeachtach tomhaltóirí a áirithiú nuair a bhítear ag dul i ngleic le hidirbhearta tráchtála idirghafa ar líne, níor cheart go mbeadh soláthraithe áirithe seirbhísí óstála, eadhon ardáin ar líne a cheadaíonn do thomhaltóirí cianchonarthaí a thabhairt i gcrích le trádálaithe, in ann tairbhe a bhaint as an díolúine ó dhliteanas do sholáthraithe seirbhíse óstála a bhunaítear leis an Rialachán seo a mhéid a chuireann na hardáin ar líne sin an fhaisnéis ábhartha a bhaineann leis na hidirbhearta atá i gceist i láthair ar bhealach a thugann le fios do thomhaltóirí gurb iad na hardáin ar líne sin féin nó trádálaithe atá ag feidhmiú faoina n-údarás nó a rialú a sholáthair an fhaisnéis sin, agus, dá bhrí sin, go bhfuil eolas nó smacht ag na hardáin ar líne ar an bhfaisnéis, fiú murab amhlaidh atá go réadúil. Ar na samplaí d’iompar den sórt sin, d’fhéadfaí a áireamh, cás nach ndéanann ardán ar líne céannacht an trádálaí a thaispeáint go soiléir mar a cheanglaítear leis an Rialachán seo, cás ina ndéanann ardán ar líne céannacht nó sonraí teagmhála an trádálaí a choinneáil siar go dtí go mbeidh an conradh arna thabhairt i gcrích idir an trádálaí agus an tomhaltóir tugtha i gcrích, nó cás ina ndéanann ardán ar líne an táirge nó an tseirbhís a mhargú ina ainm féin seachas in ainm an trádálaí a sholáthróidh an táirge nó an tseirbhís sin. Ina leith sin, ba cheart a chinneadh go hoibiachtúil, ar bhonn gach cúinse ábhartha, an bhféadfadh an cur i láthair an méid sin a thabhairt ar ghnáth-thomhaltóir a chreidiúint gur chuir an t-ardán ar líne féin nó trádálaithe a bhí ag gníomhú faoina údarás nó faoina rialú an fhaisnéis atá i gceist ar fáil.

(25)

Níor cheart go ndéanfadh na díolúintí ó dhliteanas a bhunaítear leis an Rialachán seo difear don fhéidearthacht urghairí de chineálacha éagsúla a dheonú in aghaidh soláthraithe seirbhísí idirghabhálacha, fiú i gcás ina sásaíonn siad na coinníollacha a leagtar amach mar chuid de na díolúintí sin. D’fhéadfadh na hurghairí sin a bheith comhdhéanta, go háirithe, de chúirteanna nó údaráis riaracháin ag ceangal go ndéanfaí deireadh a chur le haon sárú nó aon sárú a chosc, arna n-eisiúint i gcomhréir le dlí an Aontais, lena n-áirítear baint inneachair neamhdhleathaigh shonraigh sna horduithe sin, nó rochtain chuige a dhíchumasú.

(26)

Chun deimhneacht dhlíthiúil a chruthú, agus gan gníomhaíochtaí atá dírithe ar inneachar neamhdhleathach a bhrath, a shainaithint agus gníomhú ina aghaidh a dhíspreagadh, gníomhaíochtaí ar féidir le soláthraithe na gcatagóirí seirbhísí idirghabhála ar fad tabhairt fúthu ar bhonn deonach, ba cheart a shoiléiriú díreach mar gheall go dtugann soláthraithe faoi na gníomhaíochtaí nach ionann sin agus a rá nach mbeidh na díolúintí ó dhliteanas a leagtar amach sa Rialachán seo ar fáil, ar choinníoll go ndéantar na gníomhaíochtaí sin de mheon macánta agus ar bhealach dícheallach. Maidir leis an gcoinníoll go ngníomhófaí de mheon macánta agus ar bhealach dícheallach, ba cheart a áireamh ann go ngníomhófaí ar bhealach oibiachtúil, neamh-idirdhealaitheach agus comhréireach, agus aird chuí á tabhairt ar chearta agus leasanna dlisteanacha na bpáirtithe uile lena mbaineann, agus go gcuirfí na coimircí is gá ar fáil i gcoinne inneachar dleathach a bheith á bhaint gan údar cuí, i gcomhréir le cuspóir agus ceanglais an Rialacháin seo. Chuige sin, ba cheart do na soláthraithe lena mbaineann bearta réasúnta a dhéanamh, mar shampla, chun a áirithiú, i gcás ina n-úsáidtear uirlisí uathoibrithe chun na gníomhaíochtaí sin a dhéanamh, go bhfuil an teicneolaíocht ábhartha sách iontaofa chun an ráta earráide a theorannú a mhéid is féidir. Ina theannta sin, is iomchuí a shoiléiriú mar gheall go ndearna na soláthraithe bearta, de mheon macánta, chun ceanglais dhlí an Aontais a chomhlíonadh, lena n-áirítear iad sin a leagtar amach sa Rialachán seo a mhéid a bhaineann lena dtéarmaí agus coinníollacha a chomhlíonadh, nach bhfágfaidh sé sin nach mbeidh na díolúintí sin ó dhliteanas a leagtar amach sa Rialachán seo ar fáil. Dá bhrí sin, níor cheart aon ghníomhaíochtaí agus bearta den chineál sin a bhféadfadh soláthraí tabhairt fúthu a chur san áireamh agus cinneadh á dhéanamh cibé acu is féidir nó nach féidir leis an soláthraí brath ar an díolúine ó dhliteanas, go háirithe a mhéid a bhaineann le cibé acu a sholáthraíonn nó nach soláthraíonn an soláthraí a sheirbhís go neodrach agus gur féidir leis dá bhrí sin teacht faoi réim raon feidhme na forála ábhartha, gan an riail sin a bheith ag tabhairt le fios gur féidir leis an soláthraí brath uirthi. Níor cheart gníomhaíochtaí deonacha a úsáid chun dul timpeall ar oibleagáidí na soláthraithe seirbhísí idirghabhálacha faoin Rialachán seo.

(27)

Cé go ndíríonn na rialacha maidir le díolúine ó dhliteanas do sholáthraithe seirbhísí idirghabhálacha a leagtar amach sa Rialachán seo ar an díolúine ó dhliteanas do sholáthraithe seirbhísí idirghabhálacha, tá sé tábhachtach a mheabhrú, d’ainneoin an róil thábhachtaigh a imríonn na soláthraithe sin go ginearálta, nár cheart déileáil le fadhb an inneachair agus na ngníomhaíochtaí neamhdhleathacha ar líne díreach trí dhíriú ar a ndliteanas agus a bhfreagrachtaí. Nuair is féidir, ba cheart do thríú páirtithe dá ndéanann inneachar neamhdhleathach arna tharchur nó arna stóráil ar líne difear iarracht a dhéanamh coinbhleachtaí a réiteach maidir leis an inneachar sin gan soláthraithe na seirbhísí idirghabhálacha atá i gceist a bheith páirteach ann. Ba cheart d’fhaighteoirí na seirbhíse a bheith faoi dhliteanas, i gcás ina bhforáiltear dó sin sna rialacha is infheidhme de chuid an Aontais agus sa dlí náisiúnta lena gcinntear an dliteanas sin, maidir leis an inneachar neamhdhleathach a sholáthraíonn siad agus a d’fhéadfaidís a scaipeadh ar an bpobal trí sheirbhísí idirghabhálacha. I gcás inarb iomchuí, ba cheart do ghníomhaithe eile, amhail modhnóirí grúpa i dtimpeallachtaí dúnta ar líne, go háirithe i gcás grúpaí móra, cuidiú chun scaipeadh inneachair neamhdhleathaigh ar líne a chosc, i gcomhréir leis an dlí is infheidhme. Thairis sin, nuair is gá do sholáthraithe seirbhíse sochaí faisnéise a bheith rannpháirteach, lena n-áirítear soláthraithe seirbhísí idirghabhálacha, ba cheart aon iarraidh nó ordú maidir le rannpháirtíocht den sórt sin, mar riail ghinearálta, a chur chuig an soláthraí sonrach a bhfuil an cumas teicniúil agus oibríochtúil aige chun gníomhú in aghaidh na míreanna sonracha den inneachar neamhdhleathach, chun aon éifeachtaí diúltacha féideartha ar infhaighteacht agus inrochtaineacht faisnéise nach inneachar neamhdhleathach é a chosc agus a íoslaghdú.

(28)

Ó 2000, tá teicneolaíochtaí nua tagtha chun cinn a fheabhsaíonn infhaighteacht, éifeachtacht, luas, iontaofacht, inniúlachtaí agus slándáil córas chun sonraí ar líne a tharchur, a aimsiú agus a stóráil, rud a fhágann go bhfuil an t-éiceachóras ar líne ag éirí níos casta. Chuige sin, ba cheart a mheabhrú gur féidir le soláthraithe seirbhísí a bhunaíonn agus a éascaíonn an ailtireacht loighciúil bhunúsach agus feidhmiú ceart an idirlín, lena n-áirítear feidhmeanna coimhdeacha teicniúla, tairbhe a bhaint freisin as na díolúintí ó dhliteanas a leagtar amach sa Rialachán seo, a mhéid a cháilíonn a gcuid seirbhísí mar sheirbhísí “cainéil fhóraigh”, “taiscthe” nó “óstála”. Áirítear le seirbhísí den sórt sin, de réir an cháis, líonraí achair logánta gan sreang, seirbhísí córais ainmneacha fearainn (DNS), clárlanna ainmneacha fearainn barrleibhéil, cláraitheoirí, údaráis deimhnithe a eisíonn deimhnithe digiteacha, líonraí príobháideacha fíorúla, innill chuardaigh ar líne, seirbhísí bonneagair néil, nó líonraí seachadta inneachair, a chumasaíonn, a aimsíonn nó a fheabhsaíonn feidhmeanna soláthraithe eile na seirbhísí idirghabhálacha. Ar an gcuma chéanna, tá forbairt mhór tagtha ar sheirbhísí a úsáidtear chun críoch cumarsáide, agus modhanna teicniúla a seachadta, is cionsiocair le seirbhísí ar líne amhail IP gutha, seirbhísí teachtaireachta agus seirbhís ríomhphoist gréasánbhunaithe, i gcás ina seachadtar an chumarsáid trí sheirbhís rochtana idirlín. Féadfaidh na seirbhísí sin, freisin, tairbhe a bhaint as díolúintí ó dhliteanas, a mhéid a cháilíonn siad mar sheirbhísí “cainéil fhóraigh”, “taiscthe” nó “óstála”.

(29)

Le seirbhísí idirghabhálacha, cumhdaítear réimse leathan gníomhaíochtaí eacnamaíocha a bhíonn ar siúl ar líne, gníomhaíochtaí a fhorbraíonn go leanúnach chun tarchur faisnéise a éascú atá tapa, sábháilte agus slán, agus chun áisiúlacht a áirithiú do na rannpháirtithe uile san éiceachóras ar líne. Mar shampla, is é a áirítear le seirbhísí idirghabhálacha den chineál “cainéil fhóraigh” catagóirí cineálacha maidir le seirbhísí amhail pointí malartaithe idirlín, pointí rochtana gan sreang, líonraí príobháideacha fíorúla, seirbhísí córais ainmneacha fearainn (DNS) agus réiteoirí, clárlanna ainmneacha fearainn barrleibhéil, cláraitheoirí, údaráis deimhnithe a eisíonn deimhnithe digiteacha, Prótacal Idirlín Guthaithe agus seirbhísí cumarsáide idirphearsanta eile, agus is é a áirítear le samplaí cineálacha de sheirbhísí idirghabhálacha “taiscthe” ná soláthar aonair gréasáin seachadta inneachair, seachfhreastalaithe droim ar ais nó seachfhreastalaithe oiriúnaithe inneachair. Tá seirbhísí den sórt sin ríthábhachtach chun seachadadh rianúil éifeachtúil na faisnéise a sholáthraítear ar an idirlíon a áirithiú. Áirítear le samplaí de “sheirbhísí óstála” catagóirí seirbhísí amhail néalríomhaireacht, óstáil, seirbhísí tagartha íoctha nó seirbhísí lena gcumasaítear faisnéis agus inneachar ar líne a chomhroinnt, lena n-áirítear comhaid a stóráil agus a chomhroinnt. Féadfar seirbhísí idirghabhálacha a sholáthar ar leithligh, mar chuid de chineál eile seirbhíse idirghabhálaí, nó go comhuaineach le seirbhísí idirghabhálacha eile. Braitheann bunchineál na seirbhíse – cibé acu seirbhís cainéil fhóraigh, seirbhís taiscthe nó seirbhís óstála í – ar a cuid feidhmeanna teicniúla a d’fhéadfadh athrú in imeacht ama, agus ba cheart é a mheas de réir an cháis.

(30)

Níor cheart go mbeadh soláthraithe seirbhísí idirghabhálacha, de jure ná de facto, faoi réir oibleagáid faireacháin i ndáil le hoibleagáidí de chineál ginearálta. Ní bhaineann sé sin le hoibleagáidí faireacháin i gcás sonrach agus, go háirithe, ní dhéanann sé difear d’orduithe ó údaráis náisiúnta i gcomhréir leis an reachtaíocht náisiúnta, i gcomhréir le dlí an Aontais, arna léirmhíniú ag Cúirt Bhreithiúnais an Aontais Eorpaigh, agus i gcomhréir leis na coinníollacha a bhunaítear leis an Rialachán seo. Níor cheart a fhorléiriú le ní ar bith den Rialachán seo mar oibleagáid ghinearálta faireacháin nó oibleagáid ghinearálta ghníomhach aimsithe fíoras a fhorchur, nó mar oibleagáid ghinearálta ar sholáthraithe bearta réamhghníomhacha a dhéanamh i ndáil le hinneachar neamhdhleathach.

(31)

Ag brath ar chóras dlí gach Ballstáit agus an réimse dlí atá i gceist, féadfaidh údaráis bhreithiúnacha nó riaracháin náisiúnta, lena n-áirítear údaráis um fhorfheidhmiú an dlí, ordú a thabhairt do sholáthraithe seirbhísí idirghabhálacha gníomhú in aghaidh aon mhír shonrach amháin nó níos mó d’inneachar neamhdhleathach, nó faisnéis shonrach áirithe a sholáthar. Tá éagsúlacht mhór ann idir na dlíthe náisiúnta ar ar a mbonn a eisítear na horduithe sin agus táthar ag tabhairt aghaidh níos mó ar orduithe i gcásanna trasteorann. Chun a áirithiú gur féidir cloí leis na horduithe sin ar bhealach éifeachtach agus éifeachtúil, go háirithe i gcomhthéacs trasteorann, ionas gur féidir leis na húdaráis phoiblí lena mbaineann tabhairt faoina gcúraimí agus nach mbíonn na soláthraithe faoi réir aon ualach neamhréireach, gan tionchar gan ghá a imirt ar chearta agus ar leasanna dlisteanacha aon tríú páirtithe, is gá coinníollacha áirithe a leagan síos ar cheart do na horduithe sin iad a chomhlíonadh chomh maith le ceanglais chomhlántacha áirithe maidir le próiseáil na n-orduithe sin. Dá bhrí sin, níor cheart go gcomhchuibheofaí leis an Rialachán seo ach íoschoinníollacha sonracha áirithe ar cheart do na horduithe sin iad a chomhlíonadh chun go gcuirfí d’oibleagáid ar sholáthraithe seirbhísí idirghabhálacha na húdaráis ábhartha a chur ar an eolas faoin éifeacht a tugadh do na horduithe sin. Dá bhrí sin, ní fhoráiltear sa Rialachán seo don bhunús dlí chun orduithe den sórt sin a eisiúint ná ní rialáiltear raon feidhme críochach nó forfheidhmiú trasteorann na n-orduithe sin leis.

(32)

D’fhéadfadh dlí an Aontais is infheidhme nó an dlí náisiúnta is infheidhme, ar ar a bhonn a eisítear na horduithe sin, coinníollacha breise a cheangal agus ba cheart é sin a bheith mar bhonn le forfheidhmiú na n-orduithe faoi seach. I gcás neamhchomhlíonadh orduithe den sórt sin, ba cheart an Ballstát eisiúna a bheith in ann iad a fhorfheidhmiú i gcomhréir lena dhlí náisiúnta féin. Ba cheart na dlíthe náisiúnta is infheidhme a bheith i gcomhréir le dlí an Aontais, lena n-áirítear an Chairt agus forálacha CFAE maidir le saoirse bunaíochta, agus an tsaoirse chun seirbhísí a sholáthar laistigh den Aontas, go háirithe i dtaca leis an gcearrbhachas ar líne agus seirbhísí gealltóireachta. Ar an gcaoi chéanna, tá cur i bhfeidhm dlíthe náisiúnta den sórt sin maidir le forfheidhmiú na n-orduithe faoi seach gan dochar do na gníomhartha dlí is infheidhme de chuid an Aontais ná do chomhaontuithe idirnáisiúnta arna dtabhairt i gcrích ag an Aontas nó ag na Ballstáit a bhaineann leis na horduithe sin a aithint, a fhorghníomhú agus a fhorfheidhmiú ar bhonn trasteorann, go háirithe in ábhair shibhialta agus choiriúla. Ar an taobh eile, ba cheart forfheidhmiú na hoibleagáide go gcuirfí na húdaráis ábhartha ar an eolas faoin éifeacht a tugadh do na horduithe sin, seachas forfheidhmiú na n-orduithe féin, a bheith faoi réir na rialacha a leagtar amach sa Rialachán seo.

(33)

Ba cheart don soláthraí seirbhísí idirghabhálacha an t-údarás eisiúna a chur ar an eolas faoi aon bhearta a rinneadh ina dhiaidh sin i dtaobh orduithe den sórt sin gan moill mhíchuí i gcomhréir leis na teorainneacha ama a leagtar amach sa dlí ábhartha de chuid an Aontais nó sa dlí ábhartha náisiúnta.

(34)

Ba cheart do na húdaráis náisiúnta ábhartha a bheith in ann orduithe den sórt sin a eisiúint in aghaidh inneachar a mheastar a bheith neamhdhleathach nó orduithe chun faisnéis a sholáthar ar bhonn dhlí an Aontais nó an dlí náisiúnta, i gcomhréir le dlí an Aontais, go háirithe an Chairt, agus iad a dhíriú ar sholáthraithe seirbhísí idirghabhálacha, lena n-áirítear iad siúd atá bunaithe i mBallstát eile. Ba cheart an Rialachán seo, áfach, a bheith gan dochar do dhlí an Aontais i réimse an chomhair bhreithiúnaigh in ábhair shibhialta nó choiriúla, lena n-áirítear Rialachán (AE) Uimh. 1215/2012 agus Rialachán maidir le hOrduithe Eorpacha chun fianaise a thabhairt ar aird agus Orduithe Caomhnaithe Eorpacha i gcomhair fianaise leictreonach in ábhair choiriúla], ná don dlí náisiúnta nós imeachta choiriúil nó shibhialta. Dá bhrí sin, i gcás ina bhforáiltear leis na dlíthe sin i gcomhthéacs imeachtaí coiriúla nó sibhialta do choinníollacha breise nó coinníollacha nach bhfuil comhoiriúnach leo siúd dá bhforáiltear sa Rialachán seo i ndáil le horduithe chun gníomhú in aghaidh inneachar neamhdhleathach nó chun faisnéis a sholáthar, d’fhéadfadh sé nach mbeadh feidhm ag na coinníollacha dá bhforáiltear sa Rialachán seo nó go bhféadfaí iad a oiriúnú. Go háirithe, an oibleagáid atá ar an gComhordaitheoir Seirbhísí Digiteacha ó Bhallstát an údaráis eisiúna cóip de na horduithe a tharchur chuig na Comhordaitheoirí Seirbhísí Digiteacha eile go léir, d’fhéadfadh sé nach mbeadh feidhm aici i gcomhthéacs imeachtaí coiriúla nó d’fhéadfaí í a oiriúnú, i gcás ina bhforáiltear dó sin sa dlí nós imeachta choiriúil náisiúnta is infheidhme.

Thairis sin, ba cheart an oibleagáid ráiteas ar chúiseanna a bheith sna horduithe ina mínítear an fáth ar inneachar neamhdhleathach í an fhaisnéis a oiriúnú i gcás inar gá faoin dlí nós imeachta choiriúil náisiúnta is infheidhme le haghaidh cionta coiriúla a chosc, a imscrúdú, a bhrath agus a ionchúiseamh. Ar deireadh, d’fhéadfaí moill a chur ar an oibleagáid atá ar sholáthraithe seirbhísí idirghabhálacha faighteoir na seirbhíse a chur ar an eolas i gcomhréir leis an dlí is infheidhme de chuid an Aontais nó an dlí náisiúnta is infheidhme, go háirithe i gcomhthéacs imeachtaí coiriúla, sibhialta nó riaracháin. Lena chois sin, ba cheart orduithe a eisiúint i gcomhréir le Rialachán (AE) 2016/679 agus leis an gcosc ar oibleagáidí ginearálta chun faireachán a dhéanamh ar fhaisnéis nó chun fíorais nó imthosca a thugann gníomhaíocht neamhdhleathach le fios mar a leagtar síos sa Rialachán seo a lorg go gníomhach. Na coinníollacha agus na ceanglais a leagtar síos sa Rialachán seo a bhfuil feidhm acu maidir le horduithe i dtaca le gníomhú in aghaidh inneachar neamhdhleathach, ní dochar iad d’ionstraimí eile an Aontais ina bhforáiltear do chórais den chineál céanna gníomhú in aghaidh cineálacha sonracha inneachair neamhdhleathaigh, amhail Rialachán (AE) 2021/784, Rialachán (AE) 2019/1020, nó Rialachán (AE) 2017/2394 lena dtugtar cumhachtaí sonracha ordú a thabhairt d’údaráis um fhorfheidhmiú an dlí maidir le cosaint tomhaltóirí i mBallstát faisnéis a sholáthar, cé nach dochar na coinníollacha agus na ceanglais a bhfuil feidhm acu maidir le horduithe faisnéis a sholáthar d’ionstraimí eile an Aontais lena bhforáiltear do rialacha ábhartha den chineál céanna d’earnálacha sonracha. Ba cheart na coinníollacha agus na ceanglais sin a bheith gan dochar do rialacha coinneála agus caomhnaithe faoin dlí náisiúnta is infheidhme, i gcomhréir le dlí an Aontais agus iarrataí rúndachta ó údaráis um fhorfheidhmiú an dlí a bhaineann le neamhnochtadh faisnéise. Níor cheart go ndéanfadh na coinníollacha agus na ceanglais sin difear don deis atá ag na Ballstáit a cheangal ar sholáthraí seirbhísí idirghabhálacha sárú a chosc, i gcomhréir le dlí an Aontais lena n-áirítear an Rialachán seo, agus go háirithe i gcomhréir leis an toirmeasc ar oibleagáidí ginearálta faireacháin.

(35)

Ba cheart na coinníollacha agus na ceanglais a leagtar síos sa Rialachán seo a chomhlíonadh ar a dhéanaí nuair a chuirfear an t-ordú ar aghaidh chuig an soláthraí lena mbaineann. Dá bhrí sin, féadfar an t-ordú a eisiúint i gceann amháin de theangacha oifigiúla údarás eisiúna an Bhallstáit lena mbaineann. I gcás nach ionann an teanga sin, áfach, agus an teanga a dhearbhaigh soláthraí na seirbhísí idirghabhálacha nó teanga oifigiúil eile de chuid na mBallstát, arna comhaontú idir an t-údarás a eisíonn an t-ordú agus an soláthraí seirbhísí idirghabhálacha, ba cheart aistriúchán ar na gnéithe den ordú a leagtar amach sa Rialachán seo, ar a laghad, a bheith ag gabháil le tarchur an ordaithe. I gcás inar aontaigh soláthraí seirbhísí idirghabhálacha le húdaráis Ballstáit teanga áirithe a úsáid, ba cheart a mholadh dó glacadh le horduithe sa teanga chéanna arna n-eisiúint ag údaráis i mBallstáit eile. Ba cheart gnéithe a bheith sna horduithe a fhágann gur féidir leis an duine ar a bhfuil siad dírithe an t-údarás eisiúna a aithint, lena n-áirítear sonraí teagmhála pointe teagmhála laistigh den údarás sin i gcás inarb iomchuí, agus barántúlacht an ordaithe a fhíorú.

(36)

Ba cheart go leagfaí amach raon feidhme críochach na n-orduithe sin go soiléir ar bhonn an dlí is infheidhme ar leibhéal an Aontais nó ar an leibhéal náisiúnta, a chumasaíonn eisiúint an ordaithe agus níor cheart go sáróidís an méid a bhfuil fíorghá leis chun a chuspóirí a bhaint amach. Chuige sin, ba cheart don údarás breithiúnach nó riaracháin náisiúnta, a d’fhéadfadh a bheith ina údarás forfheidhmithe dlí, a eisíonn an t-ordú lena bhféachtar leis an gcuspóir a bhaint amach, i gcomhréir leis an mbunús dlí a chumasaíonn a eisiúint, cothromaíocht a áirithiú idir an t-ordú agus cearta agus leasanna dlisteanacha na dtríú páirtithe uile a bhféadfadh an t-ordú difear a dhéanamh dóibh, go háirithe a gcearta bunúsacha faoin gCairt. Go háirithe i gcomhthéacs trasteorann, ba cheart éifeacht an ordaithe a theorannú, i bprionsabal, do chríoch an Bhallstáit eisiúna, mura rud é go n-eascraíonn neamhdhleathacht an inneachair go díreach ó dhlí an Aontais nó go measann an t-údarás eisiúna go bhfuil raon feidhme críochach níos leithne de dhíth ar na cearta atá i gceist, i gcomhréir le dlí an Aontais agus an dlí idirnáisiúnta, agus leasanna na cúirtéise idirnáisiúnta á gcur san áireamh.

(37)

Baineann na horduithe chun faisnéis a sholáthar arna rialáil ag an Rialachán seo le faisnéis shonrach a tháirgeadh maidir le faighteoirí aonair na seirbhíse idirghabhálaí lena mbaineann a aithnítear sna horduithe sin chun na gcríoch comhlíonadh na rialacha is infheidhme de chuid an Aontais nó na rialacha náisiúnta is infheidhme ag faighteoirí na seirbhíse a chinneadh. Ba cheart faisnéis a iarraidh leis na horduithe sin a mbeadh sé mar aidhm léi faighteoirí na seirbhíse lena mbaineann a aithint. Dá bhrí sin, ní dhéantar orduithe maidir le faisnéis ar ghrúpa faighteoirí de chuid na seirbhíse nach n-aithnítear go sonrach, lena n-áirítear orduithe go soláthrófaí faisnéis chomhiomlán is gá chun críoch staitistiúil nó le haghaidh ceapadh beartas fianaisebhunaithe, a chumhdach le ceanglais an Rialacháin seo maidir le soláthar faisnéise.

(38)

Níl orduithe i dtaca le gníomhú in aghaidh inneachar neamhdhleathach agus faisnéis a sholáthar faoi réir na rialacha lena gcosnaítear inniúlacht na mBallstát san áit ina bhfuil an soláthraí seirbhíse lena mbaineann bunaithe agus na rialacha lena leagtar síos maoluithe féideartha ón inniúlacht sin i gcásanna áirithe, a leagtar amach in Airteagal 3 de Threoir 2000/31/CE, ach amháin má chomhlíontar coinníollacha an Airteagail sin. Mar gheall go mbaineann na horduithe i dtaca le faisnéis a sholáthar le míreanna sonracha faisnéise, i gcás ina bhfuil siad dírithe ar sholáthraithe seirbhísí idirghabhálacha atá bunaithe i mBallstát eile, ní chuireann siad srian i bprionsabal le saoirse na soláthraithe sin a gcuid seirbhísí a sholáthar thar theorainneacha. Dá bhrí sin, níl feidhm maidir leis na horduithe sin ag na rialacha a leagtar amach in Airteagal 3 de Threoir 2000/31/CE, lena n-áirítear iad siúd a bhaineann leis an ngá atá le húdar cuí a thabhairt le bearta a mhaolaíonn ó inniúlacht an Bhallstáit ina bhfuil an soláthraí seirbhíse bunaithe ar fhorais shonraithe áirithe agus i dtaca le fógairt na mbeart sin.

(39)

Ar na ceanglais maidir le faisnéis a chur ar fáil i dtaca le sásraí sásaimh is infhaighte do sholáthraí na seirbhíse agus d’fhaighteoir na seirbhíse idirghabhálaí a sholáthair an t-inneachar, áirítear ceanglas maidir le faisnéis a chur ar fáil faoi shásraí láimhseála gearán riaracháin agus faoi shásamh breithiúnach lena n-áirítear achomhairc in aghaidh orduithe arna n-eisiúint ag údaráis bhreithiúnacha. Thairis sin, d’fhéadfadh na Comhordaitheoirí Seirbhísí Digiteacha uirlisí agus treoir náisiúnta a fhorbairt i dtaca leis na sásraí gearán agus sásaimh is infheidhme ina gcríoch féin, chun rochtain ar na sásraí sin a éascú d’fhaighteoirí na seirbhíse. Ar deireadh, agus an Rialachán seo á chur i bhfeidhm acu, ba cheart do na Ballstáit an ceart bunúsach chun leighis éifeachtaigh bhreithiúnaigh agus chun trialach córa dá bhforáiltear in Airteagal 47 den Chairt a urramú. Dá bhrí sin, níor cheart an Rialachán seo bac a chur ar na húdaráis ábhartha náisiúnta bhreithiúnacha nó riaracháin, ar bhonn dhlí infheidhme an Aontais nó an dlí náisiúnta, ordú a eisiúint chun inneachar a athbhunú, i gcás ina raibh an t-inneachar sin i gcomhréir le téarmaí agus coinníollacha an tsoláthraí seirbhíse idirghabhála, ach gur mheas an soláthraí sin go hearráideach go raibh sé neamhdhleathach agus gur baineadh é.

(40)

Chun cuspóirí an Rialacháin seo a bhaint amach, agus go háirithe chun feidhmiú an mhargaidh inmheánaigh a fheabhsú agus timpeallacht shábháilte agus thrédhearcach ar líne a áirithiú, is gá sraith oibleagáidí díchill chuí comhchuibhithe atá soiléir, éifeachtach, intuartha agus cothrom a bhunú do sholáthraithe seirbhísí idirghabhálacha. Leis na hoibleagáidí sin, ba cheart go háirithe é a bheith d’aidhm leo cuspóirí difriúla an bheartais phoiblí a ráthú amhail sábháilteacht agus iontaobhas fhaighteoirí na seirbhíse, lena n-áirítear tomhaltóirí, mionaoisigh agus úsáideoirí atá i mbaol ar leith fuathchaint, gnéaschiapadh nó gníomhaíochtaí eile idirdhealaitheacha a fhulaingt, cosaint na gceart bunúsach ábhartha a chumhdaítear sa Chairt, cuntasacht fhónta na soláthraithe sin agus cumhachtú na bhfaighteoirí agus na bpáirtithe eile dá ndéantar difear agus, ag an am céanna, ba cheart dóibh an fhormhaoirseacht riachtanach a dhéanann na húdaráis inniúla a éascú.

(41)

Chuige sin, tá sé tábhachtach na hoibleagáidí díchill chuí a chur in oiriúint do chineál, méid agus nádúr na seirbhísí idirghabhálacha lena mbaineann. Dá bhrí sin, leagtar amach sa Rialachán seo oibleagáidí bunúsacha is infheidhme maidir le gach soláthraí seirbhísí idirghabhálacha, chomh maith le hoibleagáidí breise do sholáthraithe seirbhísí óstála agus, go sonrach, soláthraithe ardán ar líne agus ardán an-mhór ar líne agus soláthraithe inneall cuardaigh an-mhór ar líne. A mhéid a thagann soláthraithe seirbhísí idirghabhálacha laistigh roinnt catagóirí éagsúla i bhfianaise chineál a gcuid seirbhísí agus a méide, ba cheart dóibh oibleagáidí comhfhreagracha ar fad an Rialacháin seo i dtaca leis na seirbhísí sin a chomhlíonadh. Tá na hoibleagáidí díchill chuí comhchuibhithe sin, ar cheart dóibh a bheith réasúnach agus neamhthreallach, ag teastáil chun aghaidh a thabhairt ar ábhair imní shainaitheanta maidir leis an mbeartas poiblí, amhail sainleasanna dlisteanacha fhaighteoirí na seirbhíse a chosaint, dul i ngleic le cleachtais neamhdhleathacha agus na cearta bunúsacha a chumhdaítear sa Chairt a chosaint. Tá na hoibleagáidí díchill chuí neamhspleách ar an gceist maidir le dliteanas soláthraithe seirbhísí idirghabhálacha agus, dá bhrí sin, is gá iad a mheasúnú ar leithligh.

(42)

Chun cumarsáid dhá threo atá furasta agus éifeachtúil a éascú, lena n-áirítear, i gcás inarb ábhartha, trí aitheantas a thabhairt do chumarsáid den sórt sin, a bhaineann le hábhair a chumhdaítear leis an Rialachán seo, ba cheart a cheangal ar sholáthraithe seirbhísí idirghabhálacha pointe teagmhála aonair leictreonach a ainmniú agus faisnéis ábhartha a fhoilsiú agus a thabhairt cothrom le dáta maidir leis an bpointe teagmhála sin, lena n-áirítear na teangacha atá le húsáid sa chumarsáid sin. Is féidir le comharthóirí iontaofa agus eintitis ghairmiúla atá faoi chaidreamh sonrach le soláthraí na seirbhísí idirghabhálacha an pointe teagmhála leictreonach a úsáid freisin. Murab ionann agus an t-ionadaí dlíthiúil, ba cheart don phointe teagmhála leictreonach a bheith ann ar mhaithe le cúrsaí oibríochtúla agus níor cheart a chur de cheangal air láthair fhisiciúil a bheith aige. Is féidir le soláthraithe seirbhísí idirghabhálacha an pointe teagmhála céanna a ainmniú le haghaidh cheanglais an Rialacháin seo agus le haghaidh ghníomhartha eile dhlí an Aontais. Agus na teangacha cumarsáide á sonrú, moltar do sholáthraithe seirbhísí idirghabhálacha a áirithiú nach constaic ar chumarsáid iad iontu féin na teangacha a roghnaítear. I gcás inar gá, ba cheart do sholáthraithe seirbhísí idirghabhálacha agus údaráis na mBallstát a bheith in ann teacht ar chomhaontú ar leithligh maidir leis an teanga chumarsáide, nó modhanna malartacha a lorg chun an bac teanga a shárú, lena n-áirítear trí na modhanna teicneolaíochta uile atá ar fáil nó acmhainní daonna inmheánacha agus seachtracha a úsáid.

(43)

Ba cheart ceangal a chur ar sholáthraithe seirbhísí idirghabhálacha pointe teagmhála aonair a ainmniú d’fhaighteoirí seirbhísí, rud a fhágann gur féidir cumarsáid a dhéanamh ar bhealach tapa, díreach agus éifeachtúil, go háirithe trí mhodhanna a bhfuil teacht orthu go héasca amhail uimhreacha gutháin, seoltaí ríomhphoist, foirmeacha teagmhála leictreonacha, botaí comhrá nó córas teachtaireachtaí meandracha. Ba cheart é a shonrú go sainráite i gcás ina ndéanann faighteoir na seirbhíse cumarsáid le botaí comhrá. Ba cheart do sholáthraithe seirbhísí idirghabhálacha cead a thabhairt d’fhaighteoirí seirbhísí modhanna cumarsáide a roghnú atá díreach agus éifeachtúil agus nach bhfuil ag brath ar uirlisí uathoibrithe. Ba cheart do sholáthraithe seirbhísí idirghabhálacha gach iarracht réasúnach a dhéanamh chun a ráthú go ndéanfar acmhainní leordhóthanacha daonna agus airgeadais a leithdháileadh chun a áirithiú go ndéanfar an chumarsáid sin a fheidhmiú ar bhealach tráthúil agus éifeachtúil.

(44)

Ba cheart do sholáthraithe seirbhísí idirghabhálacha atá bunaithe i dtríú tír agus a thairgeann seirbhísí san Aontas ionadaí dlíthiúil atá sainordaithe go leordhóthanach san Aontas a ainmniú agus ba cheart dóibh faisnéis a sholáthar do na húdaráis ábhartha maidir lena n-ionadaithe dlíthiúla agus an fhaisnéis sin a chur ar fáil go poiblí. Chun an oibleagáid sin a chomhlíonadh, ba cheart do sholáthraithe seirbhísí idirghabhálacha den sórt sin a áirithiú go bhfuil na cumhachtaí agus na hacmhainní is gá ag an ionadaí dlíthiúil ainmnithe chun comhoibriú leis na húdaráis ábhartha. D’fhéadfadh an cás a bheith amhlaidh, mar shampla, i gcás ina ndéanfadh soláthraí seirbhísí idirghabhálacha foghnóthas as an ngrúpa céanna leis an soláthraí a cheapadh, nó a mháthairghnóthas, má tá an foghnóthas nó an máthairghnóthas bunaithe san Aontas. Mar sin féin, d’fhéadfadh sé nach mbeadh an cás amhlaidh, mar shampla i gcás ina mbeadh an t-ionadaí dlíthiúil faoi réir imeachtaí atógála, féimheachta, nó dócmhainneacht phearsanta nó dócmhainneacht chorparáideach. Leis an oibleagáid sin, ba cheart gur féidir formhaoirseacht éifeachtach a dhéanamh agus, i gcás inar gá, an Rialachán seo a fhorfheidhmiú i ndáil leis na soláthraithe sin. Ba cheart gur féidir le níos mó ná aon soláthraí seirbhísí idirghabhálacha amháin sainordú a thabhairt d’ionadaí dlíthiúil i gcomhréir leis an dlí náisiúnta. Ba cheart don ionadaí dlíthiúil sin a bheith in ann feidhmiú freisin mar phointe teagmhála, ar choinníoll go gcloítear le ceanglais ábhartha an Rialacháin seo.

(45)

Cé gur cheart meas a bheith ar shaoirse conartha sholáthraithe na seirbhísí idirghabhálacha i bprionsabal, tá sé iomchuí rialacha áirithe a leagan síos maidir le hinneachar, cur i bhfeidhm agus forfheidhmiú théarmaí agus coinníollacha na soláthraithe sin ar mhaithe le trédhearcacht, faighteoirí na seirbhíse a chosaint agus torthaí míchothroma nó treallacha a sheachaint. Ba cheart do sholáthraithe seirbhísí idirghabhálacha a léiriú go soiléir agus a choinneáil cothrom le dáta ina gcuid téarmaí agus coinníollacha an fhaisnéis faoi na forais ar ar a mbonn a fhéadfaidh siad soláthar a seirbhísí a shrianadh. Go háirithe, ba cheart dóibh faisnéis a thabhairt faoi aon bheartais, nósanna imeachta, bearta agus uirlisí a úsáidtear chun modhnóireacht a dhéanamh ar inneachar, lena n-áirítear cinnteoireacht algartamach agus athbhreithniú daonna, mar aon le rialacha nós imeachta a gcórais inmheánaigh um láimhseáil gearán. Ba cheart dóibh faisnéis is féidir a rochtain go héasca a chur ar fáil freisin faoin gceart úsáid na seirbhíse a fhoirceannadh. Féadfaidh soláthraithe seirbhísí idirghabhálacha úsáid a bhaint as gnéithe grafacha ina gcuid téarmaí seirbhíse, amhail deilbhíní nó íomhánna, chun príomhghnéithe na gceanglas faisnéise a leagtar amach sa Rialachán seo a léiriú. Ba cheart do na soláthraithe faighteoirí a seirbhíse a chur ar an eolas trí mhodhanna iomchuí faoi athruithe suntasacha arna gcur ar na téarmaí agus coinníollacha, mar shampla nuair a dhéanann siad modhnú ar na rialacha maidir leis an bhfaisnéis atá ceadaithe ar a seirbhís, nó athruithe eile den sórt sin a d’fhéadfadh tionchar díreach a imirt ar chumas na bhfaighteoirí úsáid a bhaint as an tseirbhís.

(46)

Seirbhísí idirghabhálacha atá dírithe go príomha ar mhionaoisigh, mar shampla trí leagan amach nó margú na seirbhíse, nó arb iad mionaoisigh is mó a bhaineann úsáid astu, ba cheart do sholáthraithe na seirbhísí sin iarrachtaí ar leith a dhéanamh chun a chinntiú go bhfuil míniú a dtéarmaí agus coinníollacha sothuigthe ag mionaoisigh.

(47)

Agus na srianta sin á gceapadh, á gcur i bhfeidhm agus á bhforfheidhmiú acu, ba cheart do sholáthraithe seirbhísí idirghabhálacha gníomhú ar bhealach neamhthreallach agus neamh-idirdhealaitheach agus ba cheart dóibh cearta agus leasanna dlisteanacha fhaighteoirí na seirbhíse a chur san áireamh, lena n-áirítear na cearta bunúsacha mar a chumhdaítear sa Chairt iad. Mar shampla, ba cheart do sholáthraithe ardán an-mhór ar líne aird chuí a thabhairt ar an tsaoirse chun tuairimí a nochtadh agus faisnéis a fháil, lena n-áirítear saoirse agus iolrachas na meán. Ba cheart do gach soláthraí seirbhísí idirghabhálacha aird chuí a thabhairt freisin ar na caighdeáin ábhartha idirnáisiúnta le haghaidh cearta an duine a chosaint, amhail Prionsabail Threoracha na Náisiún Aontaithe maidir le Gnó agus Cearta an Duine.

(48)

I bhfianaise an róil agus na cumhachta ar leith atá acu, is iomchuí ceanglais bhreise maidir le faisnéis agus trédhearcacht a dtéarmaí agus coinníollacha a fhorchur ar ardáin an-mhór ar líne agus ar innill chuardaigh an-mhór ar líne. Dá bhrí sin, ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne a gcuid téarmaí agus coinníollacha a chur ar fáil i dteangacha oifigiúla na mBallstát uile ina dtairgeann siad a gcuid seirbhísí agus ba cheart dóibh achoimre bheacht agus sholéite ar phríomhghnéithe na dtéarmaí agus coinníollacha a sholáthar d’fhaighteoirí na seirbhísí freisin. Ba cheart príomhghnéithe na gceanglas faisnéise a thabhairt sna hachoimrí sin, lena n-áirítear an deis roghnú gan bheith páirteach i gclásail roghnacha.

(49)

Chun leibhéal leordhóthanach trédhearcachta agus cuntasachta a áirithiú, ba cheart do sholáthraithe seirbhísí idirghabhálacha tuarascáil bhliantúil a chur ar fáil go poiblí i bhformáid mheaisín-inléite agus i gcomhréir leis na ceanglais chomhchuibhithe sa Rialachán seo, maidir leis an modhnóireacht inneachair ina nglacann siad páirt, lena n-áirítear na bearta ar glacadh leo de thoradh chur i bhfeidhm agus fhorfheidhmiú a dtéarmaí agus coinníollacha. Chun ualaí neamhréireacha a sheachaint, áfach, níor cheart feidhm a bheith ag na hoibleagáidí tuairiscithe trédhearcachta sin maidir le soláthraithe ar micrifhiontair nó fiontair bheaga iad mar a shainmhínítear i Moladh 2003/361/CE ón gCoimisiún (25) iad agus nach ardáin an-mhór ar líne iad de réir bhrí an Rialacháin seo.

(50)

Tá ról an-tábhachtach ag soláthraithe seirbhísí óstála ó thaobh dul i ngleic le hinneachar neamhdhleathach ar líne, agus iad ag stóráil faisnéis arna soláthar agus arna hiarraidh ag faighteoirí na seirbhíse agus ar gnách go dtugann siad rochtain d’fhaighteoirí eile uirthi, uaireanta ar scála mór. Tá sé tábhachtach go gcuirfeadh gach soláthraí seirbhísí óstála, gan beann ar a méid, sásraí fógra agus gnímh a chur i bhfeidhm is féidir a rochtain go héasca agus atá sothuigthe, sásraí lena n-éascaítear fógra a thabhairt faoi mhíreanna sonracha faisnéise a mheasann an páirtí dá dtugtar fógra a bheith ina n-inneachar neamhdhleathach do sholáthraí na seirbhísí óstála lena mbaineann (“fógra”), ar dá mbun is féidir leis an soláthraí sin cinneadh a dhéanamh cibé acu a aontaíonn nó nach n-aontaíonn sé leis an measúnú sin agus cibé acu is mian leis rochtain ar an inneachar sin a bhaint nó a dhíchumasú (“gníomh”). Ba cheart na sásraí sin a bheith inaitheanta go soiléir, ba cheart iad a bheith suite gar don fhaisnéis i dtrácht agus ba cheart é a bheith chomh héasca céanna, ar a laghad, iad a aimsiú agus a úsáid leis na sásraí fógra le haghaidh inneachar a sháraíonn téarmaí agus coinníollacha an tsoláthraí seirbhísí óstála. Ar choinníoll go gcomhlíontar na ceanglais maidir le fógraí, ba cheart do gach duine aonair nó eintiteas a bheith in ann fógra a thabhairt i leith ilmhíreanna inneachair a líomhnaítear a bheith neamhdhleathach agus sin a dhéanamh trí fhógra aonair chun oibriú éifeachtach na sásraí fógra agus gnímh a áirithiú. Leis an sásra fógra, ba cheart a bheith in ann an duine aonair nó an t-eintiteas a chuireann fógra isteach a aithint, ach níor cheart é sin a bheith ina cheangal. I gcás cineálacha áirithe míreanna faisnéise a dtugtar fógra fúthu, d’fhéadfadh sé go mbeadh gá le céannacht an duine aonair nó an eintitis a chuireann fógra isteach chun a chinneadh an inneachar neamhdhleathach atá san fhaisnéis atá i gceist, mar atá líomhnaithe. Ba cheart feidhm a bheith leis an oibleagáid sásraí fógra agus gníomhaíochta a chur i bhfeidhm, mar shampla, maidir le seirbhísí stórála agus comhroinnte comhad, seirbhísí óstála gréasáin, freastalaithe fógraíochta agus boscaí bruscair greamaithe, a mhéid is a cháilíonn siad mar sheirbhísí óstála a chumhdaítear leis an Rialachán seo.

(51)

Ag féachaint don ghá atá le haird chuí a thabhairt ar chearta bunúsacha na bpáirtithe uile lena mbaineann a ráthaítear faoin gCairt, aon ghníomhaíocht a dhéanann soláthraí seirbhísí óstála de bhun fógra a fháil, ba cheart í a spriocdhírithe go docht, sa mhéid gur cheart é a bheith mar chuspóir léi na míreanna sonracha faisnéise a mheastar a bheith ina n-inneachar neamhdhleathach a bhaint nó a dhíchumasú, gan difear míchuí a dhéanamh don tsaoirse atá ag faighteoirí na seirbhíse tuairimí a nochtadh agus faisnéis a fháil. Dá bhrí sin, mar riail ghinearálta, ba cheart fógraí a dhíriú ar na soláthraithe seirbhísí óstála ar féidir a bheith ag dréim leis go réasúnta go bhfuil an cumas teicniúil agus oibríochtúil acu gníomhú i gcoinne míreanna sonracha den sórt sin. Na soláthraithe seirbhísí óstála a gheobhaidh fógra faoi mhír shonrach faisnéise a bhaint agus nach féidir leo déanamh amhlaidh ar chúiseanna teicniúla nó oibríochtúla, ba cheart dóibh an duine nó an t-eintiteas a chuir an fógra isteach a chur ar an eolas faoi sin.

(52)

Ba cheart na rialacha maidir le sásraí fógra agus gnímh den sórt sin a chomhchuibhiú ar leibhéal an Aontais, chun foráil a dhéanamh maidir le próiseáil thráthúil, dhícheallach agus neamhthreallach na bhfógraí ar bhonn rialacha atá aonfhoirmeach, trédhearcach agus soiléir agus lena bhforáiltear do choimircí láidre chun cearta agus sainleasanna dlisteanacha gach páirtí dá ndéantar difear a chosaint, go háirithe a gcearta bunúsacha mar a ráthaítear sa Chairt iad, gan beann ar an mBallstát ina bhfuil na páirtithe sin bunaithe nó ina gcónaíonn siad ná an réimse dlí atá i gceist. Áirítear ar na cearta bunúsacha sin, ach gan a bheith teoranta dóibh; i gcás fhaighteoirí na seirbhíse, an ceart maidir le saoirse chun tuairimí a nochtadh agus faisnéis a fháil, an ceart maidir le meas ar an saol príobháideach agus ar shaol an teaghlaigh, an ceart go ndéanfaí sonraí pearsanta a chosaint, an ceart chun neamh-idirdhealaithe agus an ceart chun leighis éifeachtaigh; i gcás na soláthraithe seirbhíse an tsaoirse chun gnó a sheoladh, lena n-áirítear saoirse conarthachta; i gcás páirtithe dá ndéanann an t-inneachar neamhdhleathach difear, an ceart maidir le dínit an duine, cearta an linbh, an ceart maidir le cosaint maoine, lena n-áirítear maoin intleachtúil, agus an ceart maidir le neamh-idirdhealú. Ba cheart do sholáthraithe seirbhísí óstála gníomhú de réir fógraí ar bhealach tráthúil, go háirithe, tríd an gcineál inneachair neamhdhleathaigh a bhfuiltear á fhógairt a chur san áireamh agus an phráinn a bhaineann le beart a dhéanamh. Is féidir a bheith ag súil leis, cuir i gcás, go ngníomhóidh soláthraithe den sórt sin gan mhoill i gcás ina líomhnófaí go bhfuil inneachar neamhdhleathach ann lena mbaineann bagairt ar bheatha nó sábháilteacht daoine. Ba cheart don soláthraí seirbhísí óstála an duine aonair nó an t-eintiteas a thugann fógra faoin inneachar sonrach a chur ar an eolas gan moill mhíchuí tar éis dó cinneadh a dhéanamh an ngníomhóidh sé nó nach ngníomhóidh sé de réir an fhógra.

(53)

Leis na sásraí fógra agus gnímh, ba cheart a bheith in ann fógraí a chur isteach atá sách cruinn agus cuí-réasúnaithe go leor chun gur féidir leis an soláthraí seirbhísí óstála lena mbaineann cinneadh feasach agus dícheallach a dhéanamh, i gcomhréir leis an tsaoirse chun tuairimí a nochtadh agus faisnéis a fháil, i ndáil leis an inneachar a mbaineann an fógra leis, go háirithe cibé acu a mheastar nó nach meastar go bhfuil an t-inneachar sin neamhdhleathach agus go bhfuil sé le baint nó go bhfuil an rochtain air le díchumasú. Ba cheart a bheith ag na sásraí sin saintréithe lena n-éascófar soláthar fógraí ina bhfuil míniú ar na cúiseanna a measann an duine aonair nó an t-eintiteas a chuireann fógra isteach gur inneachar neamhdhleathach é an t-inneachar agus léiriú soiléir maidir leis an áit ar féidir teacht ar an inneachar sin. I gcás ina bhfuil faisnéis go leor i bhfógra chun gur féidir le soláthraí dícheallach seirbhísí óstála a chinneadh, gan mionscrúdú dlíthiúil, gur léir go bhfuil an t-inneachar neamhdhleathach, ba cheart a mheas go bhfágann an fógra go bhfuiltear ar an eolas i ndáiríre faoin neamhdhleathacht nó gur tugadh faoi deara í. Seachas le haghaidh fógraí a chur isteach a bhaineann le cionta dá dtagraítear in Airteagail 3 go 7 de Threoir 2011/93/AE ó Pharlaimint na hEorpa agus ón gComhairle (26), ba cheart a iarraidh leis na sásraí sin ar an duine aonair nó an eintiteas a chuireann fógra isteach a chéannacht a nochtadh, chun mí-úsáid a sheachaint.

(54)

I gcás ina gcinneann soláthraí seirbhísí óstála, ar an bhforas go bhfuil an fhaisnéis a sholáthair na faighteoirí neamhdhleathach nó nach bhfuil sí i gcomhréir lena chuid téarmaí agus coinníollacha, an rochtain ar fhaisnéis arna soláthar ag faighteoir na seirbhíse a bhaint nó a dhíchumasú nó srian a chur lena infheicthe atá sí nó lena mhéid is féidir airgead a shaothrú aisti ar aon bhealach eile, mar shampla tar éis fógra a fháil nó gníomhú ar a thionscnamh féin, lena n-áirítear trí mhodhanna uathoibríocha amháin, ba cheart don soláthraí sin an faighteoir a chur ar an eolas ar bhealach soiléir agus sothuigthe faoina chinneadh, na cúiseanna lena chinneadh agus na féidearthachtaí maidir le sásamh atá ar fáil le cur in aghaidh an chinnidh sin, d’fhonn na hiarmhairtí diúltacha a d’fhéadfadh a bheith ag cinntí den sórt sin ar an bhfaighteoir, lena n-áirítear a mhéid a bhaineann sé lena cheart bunúsach ar shaoirse chun tuairimí a nochtadh, a fheidhmiú. Ba cheart feidhm a bheith leis an oibleagáid sin gan beann ar na cúiseanna atá leis an gcinneadh, go háirithe cibé acu a glacadh nó nár glacadh an gníomh mar go meastar gur inneachar neamhdhleathach í an fhaisnéis ar tugadh fógra fúithi nó nach bhfuil sí i gcomhréir leis na téarmaí agus coinníollacha is infheidhme. I gcás ina ndearnadh an cinneadh tar éis fógra a fháil, níor cheart don soláthraí seirbhísí óstála céannacht an duine nó an eintitis a chuir an fógra faoi bhráid fhaighteoir na seirbhíse a nochtadh ach amháin i gcás ina bhfuil an fhaisnéis sin riachtanach chun a chinneadh an bhfuil an t-inneachar neamhdhleathach, amhail i gcásanna ina sáraíodh cearta maoine intleachtúla.

(55)

D’fhéadfadh maolú ar an rangú nó ar chórais moltaí a bheith i gceist le srian a chur le hinfheictheacht, chomh maith le hinrochtaineacht a theorannú ag ceann amháin nó níos mó d’fhaighteoirí na seirbhíse nó an t-úsáideoir a bhlocáil ó phobal ar líne gan an t-úsáideoir a bheith ar an eolas faoi (“cosc faoi choim”). Is féidir saothrú airgid as an bhfaisnéis arna soláthar ag faighteoir na seirbhíse trí ioncam fógraíochta a shrianadh tríd an íocaíocht airgeadaíochta nó an t-ioncam a bhaineann leis an bhfaisnéis sin a fhionraí nó a fhoirceannadh. Níor cheart feidhm a bheith ag an oibleagáid ráiteas ar na cúiseanna a sholáthar, áfach, maidir le hinneachar tráchtála ardéilimh meabhlach a scaiptear trí ionramháil na seirbhíse in aon turas, go háirithe úsáid bhréagach na seirbhíse amhail úsáid a bhaint as botaí nó cuntais bhréige nó úsáid a bhaint as an tseirbhís ar bhealach meabhlach eile. Gan beann ar fhéidearthachtaí eile atá ann agóid a dhéanamh i gcoinne chinneadh an tsoláthraí seirbhísí óstála, ba cheart a bheith ag faighteoir na seirbhíse i gcónaí an ceart chun leighis éifeachtaigh os comhair cúirte i gcomhréir leis an dlí náisiúnta.

(56)

D’fhéadfadh soláthraí seirbhísí óstála i gcásanna áirithe eolas a fháil, amhail trí fhógra ó pháirtí dá dtugtar fógra nó trína bhearta deonacha féin, faoi fhaisnéis a bhaineann le gníomhaíocht áirithe de chuid fhaighteoir na seirbhíse, amhail cineálacha áirithe inneachair neamhdhleathaigh a sholáthar, a thugann údar cuí leis an amhras, ag féachaint do na cúinsí ábhartha ar fad a bhfuil an soláthraí seirbhísí óstála feasach orthu, go bhféadfadh sé go ndearna an faighteoir sin cion coiriúil a bhaineann le bagairt ar bheatha nó sábháilteacht duine nó daoine, go bhféadfadh an faighteoir a bheith ag déanamh an chiona sin nó gur dócha go ndéanfaidh sé an cion sin, amhail na cionta a shonraítear i dTreoir 2011/36/AE ó Pharlaimint na hEorpa agus ón gComhairle (27), Treoir 2011/93/AE nó Treoir (AE) 2017/541 ó Pharlaimint na hEorpa agus ón gComhairle (28). Mar shampla, d’fhéadfadh amhras a bheith ann mar thoradh ar mhíreanna sonracha inneachair go bhfuil an pobal faoi bhagairt, amhail gríosú chun sceimhlitheoireachta de réir bhrí Airteagal 21 de Threoir (AE) 2017/541. Sna cásanna sin, ba cheart don soláthraí seirbhísí óstála na húdaráis inniúla forfheidhmithe dlí a chur ar an eolas gan mhoill faoi amhras den sórt sin. Ba cheart don soláthraí seirbhísí óstála an fhaisnéis ábhartha uile atá ar fáil dó a chur ar fáil, lena n-áirítear, i gcás inarb ábhartha, an t-inneachar atá i gceist agus, má tá sé sin ar fáil, an t-am ar foilsíodh an t-inneachar, lena n-áirítear an t-amchrios ainmnithe, míniú ar an amhras atá air agus an fhaisnéis is gá chun faighteoir ábhartha na seirbhíse a aimsiú agus a aithint. Ní sholáthraítear an bunús dlí chun próifíliú a dhéanamh ar fhaighteoirí na seirbhíse sa Rialachán seo d’fhonn cionta coiriúla arna ndéanamh ag soláthraithe seirbhísí óstála a shainaithint. Ina theannta sin, ba cheart do sholáthraithe seirbhísí óstála urraim a thabhairt do rialacha eile is infheidhme de chuid dhlí an Aontais nó an dlí náisiúnta maidir le cearta agus saoirsí daoine aonair a chosaint le linn dóibh údaráis forfheidhmithe dlí a chur ar an eolas.

(57)

Chun ualaí díréireacha a sheachaint, níor cheart feidhm a bheith ag na hoibleagáidí breise a fhorchuirtear faoin Rialachán seo ar sholáthraithe ardán ar líne, lena n-áirítear ardáin a thugann cead do thomhaltóirí cianchonarthaí a thabhairt i gcrích le trádálaithe, maidir le soláthraithe a cháilíonn mar mhicrifhiontair nó mar fhiontair bheaga mar a shainmhínítear i Moladh 2003/361/CE iad. Ar an gcúis chéanna, níor cheart go mbeadh feidhm ag na hoibleagáidí breise sin ach oiread maidir le soláthraithe ardán ar líne a cháiligh roimhe sin mar mhicrifhiontair nó mar fhiontair bheaga le linn tréimhse 12 mhí tar éis dóibh an stádas sin a chailleadh. Níor cheart na soláthraithe sin a dhíolmhú ón oibleagáid faisnéis a sholáthar faoi mheánlíon faighteoirí gníomhacha na seirbhíse in aghaidh na míosa arna iarraidh sin don Chomhordaitheoir Seirbhísí Digiteacha bunaíochta nó don Choimisiún. Ós rud é, áfach, go bhfuil cumhacht níos mó ag ardáin an-mhór ar líne nó ag agus go bhfuil tionchar níos mó acu ar an gcaoi a bhfaigheann faighteoirí na seirbhíse faisnéis agus a ndéanann siad cumarsáid ar líne, níor cheart do na soláthraithe sin a bheith in ann leas a bhaint as an díolúine sin, is cuma cé acu a cháilíonn siad nó nach gcáilíonn siad mar mhicrifhiontair nó mar fhiontair bheaga nó a cháiligh siad nó nár cháiligh mar sin le déanaí. Cabhraíonn na rialacha comhdhlúite a leagtar síos i Moladh 2003/361/CE chun a áirithiú go gcoisctear aon teacht timpeall ar na hoibleagáidí breise sin. Ní chuirtear bac le haon ní sa Rialachán seo ar sholáthraithe ardán ar líne a chumhdaítear leis an díolúine sin córas a chur ar bun, ar bhonn deonach, a chomhlíonann ceann amháin nó níos mó de na hoibleagáidí sin.

(58)

Maidir le cinntí áirithe de chuid soláthraithe ardán ar líne a dhéanann difear diúltach d’fhaighteoirí na seirbhíse agus a bhaineann le neamhdhleathacht inneachair nó neamhréireacht inneachair leis na téarmaí agus coinníollacha, ba cheart go mbeidís in ann cur ina gcoinne go héasca agus go héifeachtach. Dá bhrí sin, ba cheart a cheangal ar sholáthraithe ardán ar líne foráil a dhéanamh maidir le córais inmheánacha chun gearáin a láimhseáil, a chomhlíonann coinníollacha áirithe d’fhonn a áirithiú go mbeidh na córais sin inrochtana go héasca agus go mbeidh torthaí tapa, neamh-idirdhealaitheacha, neamhthreallacha agus cothroma mar thoradh orthu, agus go mbeidh siad faoi réir athbhreithniú daonna i gcás ina n-úsáidtear modhanna uathoibrithe. Ba cheart go gcuirfeadh na córais sin ar chumas fhaighteoirí uile na seirbhíse gearán a dhéanamh agus níor cheart go leagfaí ceanglais fhoirmiúla síos leo, amhail tarchur chuig forálacha dlí sonracha, ábhartha nó chuig mínithe dlí ilchasta. Maidir le faighteoirí na seirbhíse a chuir fógra isteach tríd an sásra fógra agus gnímh dá bhforáiltear sa Rialachán seo nó tríd an sásra fógra d’inneachar a sháraíonn téarmaí agus coinníollacha an tsoláthraí ardán ar líne, ba cheart go mbeidís i dteideal an sásra gearán a úsáid chun an cinneadh a dhéanann soláthraí ardán ar líne maidir lena bhfógraí a chonspóid, lena n-áirítear nuair a mheasann siad nach raibh an ghníomhaíocht a rinne an soláthraí sin leordhóthanach. Ba cheart an fhéidearthacht gearán a thaisceadh chun na cinntí a chonspóidtear a fhreaschur a bheith ar fáil ar feadh 6 mhí ar a laghad, a ríomhfar ón tráth a rinne an soláthraí ardán ar líne faighteoir na seirbhíse a chur ar an eolas faoin gcinneadh.

(59)

Thairis sin, ba cheart foráil a dhéanamh don fhéidearthacht dul i mbun réiteach díospóidí lasmuigh den chúirt a dhéanamh ar dhíospóidí den sórt sin, de mheon macánta, lena n-áirítear iad siúd nach bhféadfaí a réiteach ar bhealach sásúil trí chórais inmheánacha um láimhseáil gearán, ag comhlachtaí deimhnithe a bhfuil an neamhspleáchas, na modhanna agus an saineolas riachtanach acu chun a ngníomhaíochtaí a dhéanamh ar bhealach cothrom, tapa agus costéifeachtach. Ba cheart neamhspleáchas na gcomhlachtaí um réiteach díospóidí lasmuigh den chúirt a áirithiú freisin ar leibhéal na ndaoine nádúrtha atá i gceannas ar dhíospóidí a réiteach, lena n-áirítear trí rialacha maidir le coinbhleacht leasa. Ba cheart na táillí a ghearrann na comhlachtaí um réiteach díospóidí lasmuigh den chúirt a bheith réasúnach, inrochtana, tarraingteach, neamhchostasach do thomhaltóirí agus comhréireach, agus ba cheart iad a mheas de réir an cháis. I gcás ina ndeimhneoidh an Comhordaitheoir Seirbhísí Digiteacha inniúil, comhlacht um réiteach díospóidí lasmuigh den chúirt, ba cheart go mbeadh an deimhniú sin bailí i ngach Ballstát. Ba cheart go mbeadh soláthraithe ardán ar líne in ann diúltú páirt a ghlacadh i nósanna imeachta um réiteach díospóidí lasmuigh den chúirt faoin Rialachán seo, i gcás ina ndearnadh an díospóid chéanna, go háirithe maidir leis an bhfaisnéis lena mbaineann agus na forais leis an gcinneadh a dhéanamh, éifeachtaí an chinnidh agus na forais a ardaíodh chun an cinneadh a chonspóid, a réiteach cheana féin le nós imeachta leanúnach os comhair na cúirte inniúla nó os comhair comhlacht inniúil eile um réiteach díospóidí lasmuigh den chúirt nó go bhfuil sí faoi réir nós imeachta cheana féin. Ba cheart go mbeadh faighteoirí na seirbhíse in ann rogha a dhéanamh idir an sásra inmheánach gearán, réiteach díospóidí lasmuigh den chúirt agus an fhéidearthacht imeachtaí breithiúnacha a thionscnamh ag céim ar bith. Ós rud é nach ceangailteach é toradh an nós imeachta um réiteach díospóidí lasmuigh den chúirt, níor cheart cosc a chur ar na páirtithe imeachtaí breithiúnacha a thionscnamh i ndáil leis an díospóid chéanna. Na féidearthachtaí chun cur in aghaidh cinntí soláthraithe ardán ar líne a chruthaítear dá réir sin, níor cheart go ndéanfaidís difear ar bhealach ar bith don fhéidearthacht sásamh breithiúnach a lorg i gcomhréir le dlíthe an Bhallstáit lena mbaineann, agus dá bhrí sin, níor cheart go ndéanfaidís difear d’fheidhmiú an chirt chun leigheas breithiúnach éifeachtach a fháil faoi Airteagal 47 den Chairt. Leis na forálacha sa Rialachán seo maidir le réiteach díospóidí lasmuigh den chúirt, níor cheart go gceanglófaí ar na Ballstáit comhlachtaí den sórt sin um réiteach díospóidí lasmuigh den chúirt a bhunú.

(60)

I gcás díospóidí conarthacha idir tomhaltóirí agus gnólachtaí maidir le ceannach earraí nó seirbhísí, áirithítear le Treoir 2013/11/AE go mbíonn rochtain ag tomhaltóirí agus ag gnólachtaí san Aontas ar eintitis mhalartacha um réiteach díospóidí a bhfuil a gcáilíocht deimhnithe. Chuige seo, ba cheart a shoiléiriú go bhfuil rialacha an Rialacháin seo maidir le réiteach díospóidí lasmuigh den chúirt gan dochar don Treoir sin, lena n-áirítear ceart tomhaltóirí faoin Treoir sin aistarraingt ón nós imeachta ag céim ar bith mura mbíonn siad sásta le feidhmíocht nó le hoibriú an nós imeachta.

(61)

Is féidir gníomhaíocht in aghaidh inneachar neamhdhleathach a ghlacadh níos tapúla agus níos iontaofa i gcás ina ndéanann soláthraithe ardán ar líne na bearta is gá lena áirithiú go gcaitear le fógraí arna gcur isteach ag comharthóirí iontaofa, ag gníomhú dóibh laistigh dá réimse ainmnithe saineolais, trí na sásraí fógra agus gnímh a cheanglaítear sa Rialachán seo ar bhonn tosaíochta, gan dochar don cheanglas chun gach fógra a chuirtear isteach faoi na sásraí sin a phróiseáil agus cinneadh a dhéanamh faoi ar bhealach tráthúil, dícheallach agus neamhthreallach. Ba cheart do Chomhordaitheoir Seirbhísí Digiteacha an Bhallstáit ina bhfuil an t-iarratasóir bunaithe an stádas comharthóra iontaofa sin a bhronnadh agus ba cheart do gach soláthraí ardán ar líne é a aithint laistigh de raon feidhme an Rialacháin seo. Níor cheart an stádas sin mar chomharthóir iontaofa a bhronnadh ach ar eintitis, agus ní ar dhaoine aonair, a léirigh, i measc nithe eile, go bhfuil saineolas agus inniúlacht ar leith acu maidir le dul i ngleic le hinneachar neamhdhleathach agus go n-oibríonn siad ar bhealach dícheallach, cruinn agus oibiachtúil. Is féidir eintitis phoiblí a bheith i gceist le heintitis den sórt sin, amhail, i gcás inneachar sceimhlitheoireachta mar shampla, aonaid tarchuir idirlín in údaráis forfheidhmithe dlí náisiúnta nó i nGníomhaireacht an Aontais Eorpaigh i ndáil le Comhar i bhForfheidhmiú an Dlí (“Europol”) nó is féidir leo a bheith ina n-eagraíochtaí neamhrialtasacha agus ina gcomhlachtaí príobháideacha nó leathphoiblí, cosúil leis na heagraíochtaí atá mar chuid de líonra INHOPE de bheolínte chun ábhar mí-úsáide gnéasaí leanaí a thuairisciú agus eagraíochtaí atá tiomanta d’fhógra a thabhairt maidir le léirithe ciníocha agus seineafóbacha neamhdhleathacha ar líne. Chun laghdú ar bhreisluach sásra den sórt sin a sheachaint, ba cheart teorainn a chur le líon iomlán na gcomharthóirí iontaofa a mbronntar an stádas sin orthu i gcomhréir leis an Rialachán seo. Go háirithe, moltar do chomhlachais tionscail a dhéanann ionadaíocht ar leasanna a gcomhaltaí iarratas a dhéanamh ar stádas comharthóirí iontaofa, gan dochar do cheart eintiteas príobháideach nó daoine aonair comhaontuithe déthaobhacha a dhéanamh le soláthraithe ardán ar líne.

(62)

Ba cheart do chomharthóirí iontaofa tuarascálacha atá éasca a thuiscint agus mionsonraithe a fhoilsiú maidir le fógraí arna gcur isteach i gcomhréir leis an Rialachán seo. Sna tuarascálacha sin, ba cheart go sonrófaí faisnéis amhail líon na bhfógraí arna n-aicmiú ag an soláthraí seirbhísí óstála, an cineál inneachair, agus an ghníomhaíocht arna déanamh ag an soláthraí. Ós rud é go bhfuil saineolas agus inniúlacht léirithe ag comharthóirí iontaofa, is féidir a bheith ag dréim leis nach mbeadh an t-ualach céanna ag baint le próiseáil fógraí arna gcur isteach ag comharthóirí iontaofa, agus gur tapúla a bheadh an phróiseáil sin dá bharr, i gcomparáid le fógraí arna gcur isteach ag faighteoirí eile na seirbhíse. Mar sin féin, d’fhéadfadh sé go mbeadh an meán-am a thógann sé an phróiseáil a dhéanamh fós éagsúil ag brath ar na tosca lena n-áirítear an cineál inneachair neamhdhleathaigh, cáilíocht fógraí, agus na nósanna imeachta teicniúla iarbhír atá i bhfeidhm chun na fógraí sin a chur isteach.

Mar shampla, cé go leagtar amach tagarmharc sa Chód iompair maidir le fuathchaint neamhdhleathach ar líne a chomhrac ó 2016 do na cuideachtaí rannpháirteacha maidir leis an am is gá chun fógraí bailí a phróiseáil chun fuathchaint neamhdhleathach a bhaint anuas, d’fhéadfadh amlínte atá an-éagsúil a bheith ag baint le próiseáil cineálacha eile inneachair neamhdhleathaigh, ag brath ar na fíricí agus imthosca sonracha agus ar na cineálacha inneachair neamhdhleathaigh atá i gceist. Chun mí-úsáid an stádais mar chomharthóir iontaofa a sheachaint, ba cheart go bhféadfaí an stádas sin a chur ar fionraí nuair a d’oscail Comhordaitheoir Seirbhísí Digiteacha bunaíochta imscrúdú ar bhonn cúiseanna dlisteanacha. Le rialacha an Rialacháin seo maidir le comharthóirí iontaofa, níor cheart a thuiscint go gcoisceann siad soláthraithe ardán ar líne ó chaitheamh mar a chéile le fógraí arna gcur isteach ag eintitis nó daoine aonair nár bronnadh stádas mar chomharthóir iontaofa orthu faoin Rialachán seo, ó chomhoibriú ar bhealach eile le heintitis eile, i gcomhréir leis an dlí is infheidhme, lena n-áirítear an Rialachán seo agus Rialachán (AE) 2016/794 ó Pharlaimint na hEorpa agus ón gComhairle (29). Le rialacha an Rialacháin seo, níor cheart cosc a chur ar sholáthraithe ardán ar líne úsáid a bhaint as an gcomharthóir iontaofa sin nó as sásraí comhchosúla chun gníomhaíocht thapa agus iontaofa a dhéanamh in aghaidh inneachar nach bhfuil comhoiriúnach lena dtéarmaí agus coinníollacha, go háirithe in aghaidh inneachar a dhéanann dochar d’fhaighteoirí leochaileacha na seirbhíse, amhail mionaoisigh.

(63)

Ach mí-úsáid a bhaint as ardáin ar líne trí inneachar ar follasach go bhfuil sé neamhdhleathach a sholáthar go minic nó trí fhógraí nó gearáin ar follasach go bhfuil siad gan bhunús a sheoladh isteach go minic faoi na sásraí agus na córais, faoi seach, a bhunaítear faoin Rialachán seo, déantar dochar d’iontaoibh agus díobháil do chearta agus leasanna dlisteanacha na bpáirtithe lena mbaineann. Dá bhrí sin, is gá coimircí iomchuí, comhréireacha agus éifeachtacha in aghaidh na mí-úsáide sin a chur i bhfeidhm, ar gá dóibh cearta agus leasanna dlisteanacha na bpáirtithe uile lena mbaineann a urramú, lena n-áirítear na cearta agus na saoirsí bunúsacha is infheidhme mar a chumhdaítear sa Chairt iad, go háirithe an tsaoirse chun tuairimí a nochtadh. Ba cheart a mheas gur inneachar ar follasach go bhfuil sé neamhdhleathach í faisnéis agus ba cheart a mheas gur follasach nach bhfuil bunús le fógraí nó gearáin i gcás inar léir don ghnáthdhuine, gan aon anailís shubstainteach, go bhfuil an t-inneachar neamhdhleathach nó, go bhfuil na fógraí nó na gearáin, faoi seach, gan bhunús.

(64)

Faoi choinníollacha áirithe, ba cheart do sholáthraithe ardán ar líne a ngníomhaíochtaí ábhartha a chur ar fionraí go sealadach i leith an duine atá ag gabháil don iompraíocht mhí-úsáideach. Tá sé seo gan dochar don tsaoirse atá ag soláthraithe ardán ar líne a dtéarmaí agus coinníollacha a chinneadh agus bearta níos géire a bhunú i gcás inneachar a bhaineann le coireanna tromchúiseacha ar follasach go bhfuil sé neamhdhleathach, amhail ábhar mí-úsáide gnéasaí leanaí. Ar chúiseanna trédhearcachta, ba cheart an fhéidearthacht sin a leagan amach, go soiléir agus le dóthain sonraí, i dtéarmaí agus coinníollacha na n-ardán ar líne. Ba cheart sásamh a bheith i gcónaí ar fáil maidir leis na cinntí a ghlac soláthraithe ardán ar líne ina leith sin agus ba cheart iad a bheith faoi réir fhormhaoirseacht an Chomhordaitheora Seirbhísí Digiteacha inniúil. Ba cheart do sholáthraithe ardán ar líne réamhrabhadh a sheoladh sula ndéanfaidh siad cinneadh faoin bhfionraí, ar cheart a áireamh ann cúiseanna na fionraí féideartha agus na modhanna sásaimh in aghaidh an chinnidh ó sholáthraithe an ardáin ar líne. Agus cinneadh á dhéanamh maidir leis an bhfionraí, ba cheart do sholáthraithe ardán ar líne an ráiteas ar chúiseanna a sheoladh i gcomhréir leis na rialacha a leagtar amach sa Rialachán seo. Níor cheart do rialacha an Rialacháin seo maidir le mí-úsáid cosc a chur ar sholáthraithe ardán ar líne ó bhearta eile a dhéanamh chun aghaidh a thabhairt ar inneachar neamhdhleathach arna sholáthar ag faighteoirí a seirbhíse nó mí-úsáid eile a seirbhísí, lena n-áirítear trí shárú ar a dtéarmaí agus coinníollacha, i gcomhréir leis an dlí is infheidhme san Aontas agus an dlí náisiúnta. Tá na rialacha sin gan dochar d’aon fhéidearthacht na daoine a bhí páirteach sa mhí-úsáid a choinneáil faoi dhliteanas, lena n-áirítear maidir le damáistí, dá bhforáiltear i ndlí an Aontais nó sa dlí náisiúnta.

(65)

I bhfianaise na bhfreagrachtaí agus na n-oibleagáidí ar leith atá ar sholáthraithe ardán ar líne, ba cheart iad a bheith faoi réir oibleagáidí tuairiscithe trédhearcachta, a bhfuil feidhm leo sa bhreis ar na hoibleagáidí tuairiscithe trédhearcachta infheidhme maidir le gach soláthraí seirbhísí idirghabhálacha faoin Rialachán seo. Chun críocha a chinneadh cibé an bhfuil nó nach bhfuil ardáin ar líne agus innill chuardaigh ar líne ina n-ardáin an-mhór ar líne nó ina n-innill chuardaigh an-mhór ar líne, faoi seach, atá faoi réir oibleagáidí breise áirithe faoin Rialachán seo, ba cheart a áireamh ar na hoibleagáidí tuairiscithe trédhearcachta d’ardáin ar líne agus d’innill chuardaigh ar líne oibleagáidí áirithe maidir le foilsiú agus cumarsáid faisnéise ar mheánfhaighteoirí gníomhacha míosúla na seirbhíse san Aontas.

(66)

Chun trédhearcacht a áirithiú agus grinnscrúdú ar chinntí na soláthraithe ardán ar líne maidir le modhnóireacht inneachair a chumasú agus faireachán a dhéanamh ar scaipeadh inneachair neamhdhleathaigh ar líne, ba cheart don Choimisiún bunachar sonraí a chothabháil agus a fhoilsiú ina bhfuil cinntí agus ráitis ar chúiseanna na soláthraithe ardán ar líne nuair a bhaineann siad infhaighteacht agus rochtain ar fhaisnéis nó nuair a chuireann siad srian ar bhealach eile ar an rochtain uirthi. Chun an bunachar sonraí a choinneáil cothrom le dáta ar bhonn leanúnach, ba cheart do sholáthraithe ardán ar líne na cinntí agus an ráiteas ar chúiseanna a thíolacadh, i bhformáid chaighdeánach, gan moill mhíchuí tar éis cinneadh a dhéanamh, chun nuashonruithe fíor-ama a cheadú i gcás inar féidir sin go teicniúil agus i gcomhréir le modhanna an ardáin ar líne i dtrácht. Ba cheart go gceadódh an bunachar sonraí struchtúrtha rochtain ar an bhfaisnéis ábhartha agus fiosruithe ina leith, go háirithe maidir leis an gcineál inneachair neamhdhleathaigh líomhainte atá i gceist.

(67)

Is éard is patrúin dhorcha ar chomhéadain ar líne ardán ar líne ann cleachtais a shaobhann cumas fhaighteoirí na seirbhíse roghanna nó cinntí uathrialacha agus eolasacha a dhéanamh go hábhartha nó a chuireann bac ábhartha ar an gcumas sin, bíodh sin d’aon ghnó nó go hiarbhír. Is féidir na cleachtais sin a úsáid chun a chur ina luí ar fhaighteoirí na seirbhíse dul i mbun iompraíocht neamh-inmhianaithe nó cinntí míchuibhiúla a dhéanamh a mbíonn iarmhairtí diúltacha acu dóibh. Ba cheart cosc a chur, dá bhrí sin, ar sholáthraithe ardán ar líne dallamullóg a chur ar fhaighteoirí na seirbhíse nó iad a ghríosú agus neamhspleáchas, cinnteoireacht, nó rogha fhaighteoirí na seirbhíse a shaobhadh, nó dochar a dhéanamh dóibh, trí bhíthin an struchtúir nó an leagan amach atá ar chomhéadan ar líne, nó cuid de, nó trína chuid feidhmeanna. Ba cheart go n-áireofaí leis sin roghanna dúshaothraithe dearaidh chun an faighteoir a stiúradh i dtreo gníomhaíochtaí a théann chun tairbhe don soláthraí ardán ar líne, ach a bhféadfadh sé nach bhfuil siad chun leasa na bhfaighteoirí, agus roghanna a chur i láthair ar bhealach neamhneodrach, amhail níos mó suntais a tharraingt ar roghanna áirithe trí chomhpháirteanna amhairc, éisteachta nó eile, nuair a iarrtar ar fhaighteoir na seirbhíse cinneadh a dhéanamh, ach gan a bheith teoranta dóibh sin amháin.

Ba cheart go n-áireofaí leis freisin cásanna ina n-iarrtar ar fhaighteoir na seirbhíse arís is arís eile rogha a dhéanamh i gcás ina ndearnadh an rogha sin cheana féin, ina ndéantar an nós imeachta maidir le seirbhís a chur ar ceal i bhfad níos liopasta ná an nós imeachta maidir le clárú don tseirbhís chéanna, nó ina ndéantar roghanna áirithe níos deacra nó níos fadálaí ná roghanna eile, rud a fhágann go mbíonn sé i bhfad ródheacair scor de cheannacháin nó síniú amach ó ardán ar leith ar líne, lenar bhféadfadh le tomhaltóirí cianchonarthaí le trádálaithe a thabhairt i gcrích, agus ina gcuirtear dallamullóg ar fhaighteoirí na seirbhíse trí thabhairt orthu cinntí nó idirbhearta a dhéanamh, nó trí shocruithe atá an-deacair a athrú a bheith i bhfeidhm ar bhonn réamhshocraithe, lena gcruthaítear claonadh míréasúnta i gcinnteoireacht fhaighteoir na seirbhíse, ar bhealach a dhéanann a neamhspleáchas, a gcinnteoireacht agus a rogha a shaobhadh agus a lagú. Maidir le rialacha lena gcuirtear cosc ar phatrúin dhorcha, áfach, níor cheart a thuiscint go gcuirtear cosc leo ar sholáthraithe idirghníomhú go díreach le faighteoirí na seirbhíse agus seirbhísí nua nó seirbhísí breise a thairiscint dóibh. Níor cheart cleachtais dhlisteanacha, mar shampla san fhógraíocht, atá i gcomhréir le dlí an Aontais a mheas mar phatrúin dhorcha iontu féin. Ba cheart na rialacha sin maidir le patrúin dhorcha a léirmhíniú mar rialacha lena gclúdaítear cleachtais thoirmiscthe a thagann faoi raon feidhme an Rialacháin seo a mhéid nach gcumhdaítear na cleachtais sin cheana féin faoi Threoir 2005/29/CE nó Rialachán (AE) 2016/679.

(68)

Tá ról tábhachtach ag an bhfógraíocht ar líne sa timpeallacht ar líne, lena n-áirítear i ndáil le soláthar ardán ar líne, áit a dtarlaíonn uaireanta go n-íoctar go díreach nó go hindíreach agus go hiomlán nó go páirteach as soláthar na seirbhíse, trí ioncaim fógraíochta. Is féidir le fógraíocht ar líne cur le rioscaí suntasacha, idir fógráin ar inneachar neamhdhleathach iontu féin iad, agus cur le dreasachtaí airgeadais chun inneachar agus gníomhaíochtaí neamhdhleathacha nó inneachar agus gníomhaíochtaí atá díobhálach ar bhealach eile a fhoilsiú nó a mhéadú ar líne, nó taispeáint idirdhealaitheach fógraí le tionchar ar chóir chomhionann agus ar chomhionannas deiseanna saoránach. Chomh maith leis na ceanglais arb ann dóibh mar thoradh ar Airteagal 6 de Threoir 2000/31/CE, ba cheart a iarraidh ar sholáthraithe ardán ar líne dá bhrí sin a áirithiú go mbíonn faisnéis aonair áirithe ag faighteoirí na seirbhíse atá riachtanach dóibh chun tuiscint a fháil ar cén uair atá an fógrán á thaispeáint agus cén duine a bhfuil sé á thaispeáint thar a cheann. Ba cheart dóibh a áirithiú go bhfuil an fhaisnéis suntasach, lena n-áirítear trí amharcmharcanna caighdeánaithe nó marcanna fuaime caighdeánaithe, atá inaitheanta go soiléir agus gan débhrí do ghnáthfhaighteoir na seirbhíse, agus ba cheart iad a chur in oiriúint do chineál chomhéadan ar líne na seirbhíse aonair. Ina theannta sin, ba cheart faisnéis a bheith ag faighteoirí na seirbhíse, ar féidir rochtain dhíreach a fháil uirthi ón gcomhéadan ar líne ar a bhfuil an fógrán ar taispeáint, maidir leis na príomh-pharaiméadair a úsáidtear lena chinneadh go bhfuil fógrán ar leith á chur ar taispeáint dóibh, ag soláthar míniúcháin bhríocha maidir leis an loighic a úsáidtear chuige sin, lena n-áirítear nuair a bhunaítear é sin ar phróifíliú.

Ba cheart a áireamh sna mínithe sin faisnéis faoin modh a úsáidtear chun an fógrán a chur i láthair, mar shampla cibé acu an fógraíocht chomhthéacsúil nó cineál eile fógraíochta é – agus, i gcás inarb infheidhme, na príomhchritéir próifílithe a úsáideadh; ba cheart, leis sin, go gcuirfí an faighteoir ar an eolas freisin faoi aon bhealach atá ar fáil dóibh chun na critéir sin a athrú. Tá ceanglais an Rialacháin seo maidir le soláthar faisnéise a bhaineann le fógraíocht gan dochar do chur i bhfeidhm forálacha ábhartha Rialachán (AE) 2016/679, go háirithe iad siúd a bhaineann leis an gceart chun agóid a dhéanamh, cinnteoireacht aonair uathoibrithe, lena n-áirítear próifíliú, agus go sonrach an gá le toiliú a fháil ón ábhar sonraí sula ndéantar na sonraí pearsanta don fhógraíocht spriocdhírithe a phróiseáil. Mar an gcéanna, tá sé gan dochar do na forálacha a leagtar síos i dTreoir 2002/58/CE go háirithe iad siúd a bhaineann le stóráil faisnéise i dtrealamh críochfoirt agus an rochtain ar fhaisnéis arna stóráil ann. Ar deireadh, comhlánaíonn an Rialachán seo cur i bhfeidhm Threoir 2010/13/AE lena bhforchuirtear bearta chun a chur ar chumas úsáideoirí cumarsáid tráchtála closamhairc a dhearbhú i bhfíseáin arna nginiúint ag úsáideoirí. Comhlánaíonn sé freisin na hoibleagáidí atá ar thrádálaithe maidir le nochtadh cumarsáide tráchtála a eascraíonn as Treoir 2005/29/CE.

(69)

Nuair a chuirtear fógráin i láthair d’fhaighteoirí na seirbhíse bunaithe ar theicnící spriocdhírithe atá barrfheabhsaithe chun teacht lena leasanna agus a d’fhéadfadh a bheith tarraingteach dá leochaileachtaí, is féidir drochthionchar thar a bheith tromchúiseach a bheith ag baint leis sin. I gcásanna áirithe, is féidir le teicnící cúblála drochthionchar a imirt ar ghrúpaí iomlána agus dochar don tsochaí a mhéadú, mar shampla trí chur le feachtais bhréagaisnéise nó trí idirdhealú a dhéanamh in aghaidh grúpaí áirithe. Is ionann ardáin ar líne agus timpeallachtaí atá thar a bheith íogair do chleachtais den sórt sin agus tá riosca sochaíoch níos airde ag baint leo. Dá bhrí sin, níor cheart do sholáthraithe ardán ar líne fógráin a thíolacadh bunaithe ar phróifíliú, mar a shainítear in Airteagal 4, pointe (4), de Rialachán (AE) 2016/679, trí úsáid a bhaint as catagóirí speisialta de shonraí pearsanta dá dtagraítear in Airteagal 9(1) den Rialachán sin, lena n-áirítear trí chatagóirí próifílithe a úsáid bunaithe ar na catagóirí speisialta sin. Tá an toirmeasc sin gan dochar do na hoibleagáidí is infheidhme maidir le soláthraithe ardán ar líne nó maidir le haon soláthraí seirbhíse nó fógróir eile atá páirteach i scaipeadh fógrán faoi dhlí an Aontais maidir le cosaint sonraí pearsanta.

(70)

Croíchuid de ghnó an ardáin ar líne is ea an bealach ina gcuirtear faisnéis in ord tosaíochta agus i láthair ar a chomhéadan ar líne chun rochtain ar fhaisnéis a éascú agus a bharrfheabhsú i gcomhair fhaighteoirí na seirbhíse. Déantar é sin, mar shampla, trí fhaisnéis a mholadh, a rangú agus a chur in ord tosaíochta go halgartamach, ag dealú trí théacs nó léirithe amhairc eile, nó ag coimeád ar shlí eile faisnéis arna soláthar ag faighteoirí. Is féidir le córais moltaí den sórt sin tionchar suntasach a imirt ar chumas faighteoirí faisnéis a aisghabháil agus idirghníomhú le faisnéis ar líne, lena n-áirítear chun cuardach faisnéise ábhartha a éascú d’fhaighteoirí na seirbhíse agus cur le heispéireas níos fearr an úsáideora. Tá ról tábhachtach acu freisin maidir le teachtaireachtaí áirithe a mhéadú, faisnéis a mhearscaipeadh go fíorúil agus iompar ar líne a spreagadh. Dá réir sin, ba cheart go n-áiritheodh ardáin ar líne go comhsheasmhach go bhfuil faighteoirí a seirbhíse ar an eolas go hiomchuí maidir leis an tionchar a bhíonn ag córais moltaí ar an gcaoi a dtaispeántar faisnéis, agus maidir leis an gcaoi ar féidir leo tionchar a imirt ar an mbealach a gcuirtear faisnéis os a gcomhair. Ba cheart dóibh na paraiméadair do chórais moltaí den sórt sin a chur i láthair go soiléir ar bhealach intuigthe lena áirithiú go dtuigeann faighteoirí na seirbhíse an chaoi a gcuirtear faisnéis in ord tosaíochta dóibh. Ba cheart a áireamh sna paraiméadair sin, ar a laghad, na critéir is tábhachtaí chun an fhaisnéis arna moladh d’fhaighteoir na seirbhíse a chinneadh agus na cúiseanna lena dtábhacht faoi seach, lena n-áirítear i gcás ina dtugtar tús áite d’fhaisnéis bunaithe ar phróifíliú agus ar a n-iompar ar líne.

(71)

Is mórchuspóir beartais de chuid an Aontais é mionaoisigh a chosaint. Is féidir a mheas go bhfuil ardán ar líne inrochtana ag mionaoisigh nuair a cheadaíonn a théarmaí agus a choinníollacha do mhionaoisigh úsáid a bhaint as an tseirbhís, nuair a dhírítear a sheirbhís ar mhionaoisigh nó nuair is mionaoisigh is mó a úsáideann í, nó i gcás ina bhfuil an soláthraí ar an eolas ar shlí eile gur mionaoisigh iad cuid d’fhaighteoirí a sheirbhíse, mar shampla toisc go ndéanann sé próiseáil cheana féin ar shonraí pearsanta fhaighteoirí a sheirbhíse a nochtann an aois atá acu chun críocha eile. Ba cheart do sholáthraithe ardán ar líne a mbaineann mionaoisigh úsáid astu bearta iomchuí agus comhréireacha a dhéanamh chun mionaoisigh a chosaint, mar shampla trína gcomhéadain ar líne nó codanna díobh a dhearadh leis an leibhéal is airde príobháideachais, sábháilteachta agus slándála do mhionaoisigh ar bhonn réamhshocraithe i gcás inarb iomchuí nó trí chaighdeáin a ghlacadh do chosaint mionaoiseach, nó trí pháirt a ghlacadh i gcóid iompair chun mionaoisigh a chosaint. Ba cheart dóibh breithniú a dhéanamh ar dhea-chleachtais agus ar an treoirlínte atá ar fáil, amhail an treoir dá bhforáiltear sa Teachtaireacht ón gCoimisiún dar teideal A Digital Decade for children and youth: the new European strategy for a better internet for kids (BIK+) [Deich mBliana Digiteacha do leanaí agus don óige: an straitéis Eorpach nua le haghaidh idirlíon níos fearr do leanaí (BIK+)]. Níor cheart do sholáthraithe ardán ar líne fógráin a chur ar taispeáint bunaithe ar phróifíliú lena n-úsáidtear sonraí pearsanta fhaighteoir na seirbhíse nuair is eol dóibh, go réasúnta cinnte, gur mionaoiseach é faighteoir na seirbhíse. I gcomhréir le Rialachán (AE) 2016/679, go háirithe prionsabal an íoslaghdaithe sonraí dá bhforáiltear in Airteagal 5(1), pointe (c), de, níor cheart go bhfágfadh an toirmeasc sin go ndéanfadh soláthraí an ardáin ar líne níos mó sonraí pearsanta a choinneáil, a fháil nó a phróiseáil ná mar a dhéanann sé cheana féin chun a mheas an mionaoiseach é faighteoir na seirbhíse. Dá bhrí sin, níor cheart don oibleagáid sin soláthraithe ardán ar líne a dhreasú chun aois fhaighteoir na seirbhíse a bhailiú roimh a n-úsáid. Ba cheart go mbeadh sé gan dochar do dhlí an Aontais maidir le cosaint sonraí pearsanta.

(72)

D’fhonn cur le timpeallacht atá sábháilte, iontaofa agus trédhearcach ar líne do thomhaltóirí, chomh maith le páirtithe leasmhara eile cosúil le trádálaithe iomaíocha agus sealbhóirí cearta maoine intleachtúla, agus chun cosc a chur ar thrádálaithe táirgí nó seirbhísí de shárú ar na rialacha is infheidhme a dhíol, ba cheart go n-áiritheodh ardáin ar líne a thugann cead do thomhaltóirí cianchonarthaí a thabhairt i gcrích le trádálaithe den sórt sin go bhfuil na trádálaithe sin inrianaithe. Ba cheart a cheangal ar an trádálaí dá bhrí sin faisnéis riachtanach áirithe a sholáthar do na soláthraithe an ardáin ar líne a cheadaíonn do thomhaltóirí cianchonarthaí a thabhairt i gcrích le trádálaithe, lena n-áirítear chun críocha teachtaireachtaí a chur chun cinn nó táirgí a thairiscint. Ba cheart don cheanglas sin a bheith infheidhme freisin maidir le trádálaithe a chuireann teachtaireachtaí chun cinn maidir le táirgí nó seirbhísí thar ceann brandaí, bunaithe ar chomhaontuithe bunúsacha. Ba cheart do na soláthraithe ardán ar líne sin an fhaisnéis go léir a stóráil ar bhealach slán do thréimhse a gcaidrimh chonarthaigh leis an trádálaí agus ar feadh 6 mhí ina dhiaidh sin, chun go bhféadfar aon éilimh a chomhdú i gcoinne an trádálaí nó orduithe a bhaineann leis an trádálaí a chomhlíonadh.

Tá gá leis an oibleagáid sin agus tá sé comhréireach chun go mbeidh údaráis phoiblí agus páirtithe príobháideacha a bhfuil leas dlisteanach acu in ann rochtain a fháil ar an bhfaisnéis, i gcomhréir leis an dlí is infheidhme, lena n-áirítear maidir le cosaint sonraí pearsanta, lena n-áirítear trí na horduithe chun faisnéis a sholáthar dá dtagraítear sa Rialachán seo. Leis an oibleagáid sin, ní dhéantar difear d’oibleagáidí a d’fhéadfadh a bheith ann chun inneachar áirithe a chaomhnú go ceann tréimhsí níos faide, ar bhonn dlí eile de chuid an Aontais nó dlíthe náisiúnta eile, i gcomhréir le dlí an Aontais. Gan dochar don sainmhíniú dá bhforáiltear sa Rialachán seo, ba cheart aon trádálaí, is cuma cé acu duine nádúrtha nó dlítheanach é, arna shainaithint ar bhonn Airteagal 6a(1), pointe (b), de Threoir 2011/83/AE agus Airteagal 7(4), pointe (f), de Threoir 2005/29/CE a bheith inrianaithe nuair a bhíonn táirge nó seirbhís á dtairiscint aige trí ardán ar líne. Le Treoir 2000/31/CE, cuirtear d’oibleagáid ar na soláthraithe seirbhísí sochaí faisnéise uile faisnéis áirithe a sholáthar go héasca, go díreach agus go buan d’fhaighteoirí na seirbhíse agus do na húdaráis inniúla lena bhféadfar na soláthraithe uile a shainaithint. Ní dhéanann na ceanglais inrianaitheachta do sholáthraithe margaí ar líne a cheadaíonn do thomhaltóirí cianchonarthaí a thabhairt i gcrích le trádálaithe a leagtar amach sa Rialachán seo difear do chur i bhfeidhm Threoir (AE) 2021/514 ón gComhairle (30), a bhfuil cuspóirí dlisteanacha eile maidir le leas an phobail á saothrú léi.

(73)

Chun cur i bhfeidhm éifeachtach agus leordhóthanach na hoibleagáide sin a áirithiú, gan aon ualaí neamhréireacha a fhorchur, ba cheart do sholáthraithe ardán ar líne a cheadaíonn do thomhaltóirí cianchonarthaí a thabhairt i gcrích le trádálaithe, a ndícheall a dhéanamh chun measúnú a dhéanamh ar iontaofacht na faisnéise arna soláthar ag na trádálaithe lena mbaineann, go háirithe trí bhunachair shonraí agus comhéadain oifigiúla ar líne atá ar fáil gan srian a úsáid, amhail cláir thrádála náisiúnta agus an Córas Malartaithe Faisnéise CBL, nó iarradh ar na trádálaithe lena mbaineann doiciméid tacaíochta iontaofa a sholáthar, amhail cóipeanna de dhoiciméid aitheantais, ráitis cuntas íocaíochta dheimhnithe, deimhnithe cuideachtaí agus deimhnithe ó chlár trádála. Féadfaidh siad foinsí eile a úsáid freisin, atá ar fáil lena n-úsáid go cianda, a thugann iontaofacht den chineál céanna chun críche an oibleagáid seo a chomhlíonadh. Mar sin féin, níor cheart go n-éileofaí ar na soláthraithe ardán ar líne lena mbaineann tabhairt faoi ghníomhaíochtaí aimsithe fíoras iomarcacha nó costasacha ar líne nó fíoruithe díréireacha a dhéanamh ar an toirt. Ná níor cheart go nglacfaí leis go bhfuil soláthraithe den sórt sin, a bhfuil na hiarrachtaí is fearr déanta acu a cheanglaítear leis an Rialachán seo, ag ráthú iontaofacht na faisnéise i dtreo tomhaltóirí nó páirtithe leasmhara eile.

(74)

Ba cheart do sholáthraithe ardán ar líne a cheadaíonn do thomhaltóirí cianchonarthaí a thabhairt i gcrích le trádálaithe a gcomhéadan ar líne a dhearadh agus a eagrú ar bhealach a chuireann ar chumas trádálaithe a n-oibleagáidí a chomhlíonadh faoi dhlí ábhartha an Aontais, go háirithe na ceanglais a leagtar amach in Airteagail 6 agus 8 de Threoir 2011/83/AE, Airteagal 7 de Threoir 2005/29/CE, Airteagail 5 agus 6 de Threoir 2000/31/CE agus Airteagal 3 de Threoir 98/6/CE ó Pharlaimint na hEorpa agus ón gComhairle (31). Chun na críche sin, ba cheart do na soláthraithe ardán ar líne lena mbaineann a ndícheall a dhéanamh measúnú a dhéanamh an bhfuil an fhaisnéis iomlán uaslódáilte ar a gcomhéadain ar líne ag na trádálaithe a úsáideann a gcuid seirbhísí, i gcomhréir le dlí ábhartha an Aontais is infheidhme. Ba cheart do sholáthraithe ardán ar líne a áirithiú nach dtairgtear táirgí nó seirbhísí a fhad is nach bhfuil an fhaisnéis sin iomlán. Níor cheart é sin a bheith ina oibleagáid ar na soláthraithe ardán ar líne lena mbaineann faireachán ginearálta a dhéanamh ar na táirgí nó na seirbhísí a thairgeann trádálaithe trína seirbhísí, ná oibleagáid ghinearálta aimsithe fíoras, go háirithe chun measúnú a dhéanamh ar chruinneas na faisnéise arna soláthar ag trádálaithe. Ba cheart na comhéadain ar líne a bheith soláimhsithe agus inrochtana go héasca ag trádálaithe agus ag tomhaltóirí. Sa bhreis air sin, agus tar éis don trádálaí an táirge nó an tseirbhís a thairiscint, ba cheart do na soláthraithe ardán ar líne lena mbaineann iarrachtaí réasúnacha a dhéanamh chun seiceáil randamach a dhéanamh i dtaobh ar sainaithníodh na táirgí nó na seirbhísí atá á dtairiscint mar tháirgí nó seirbhísí neamhdhleathacha in aon bhunachair sonraí ar líne nó comhéadain ar líne atá oifigiúil, inrochtana agus inléite ag meaisín agus atá ar fáil i mBallstát nó san Aontas. Ba cheart don Choimisiún inrianaitheacht táirgí a spreagadh freisin trí réitigh teicneolaíochta amhail cóid mhearfhreagartha arna síniú go digiteach (nó “cóid QR”) nó licíní neamh-idirmhalartacha. Ba cheart don Choimisiún forbairt caighdeán a chur chun cinn agus, in éagmais na gcaighdeán sin, forbairt réiteach faoi stiúir an mhargaidh ar féidir leo a bheith inghlactha ag na páirtithe lena mbaineann.

(75)

I bhfianaise a thábhachtaí atá ardáin an-mhór ar líne, mar gheall ar a dtionchar, go háirithe mar a léirítear é i líon faighteoirí na seirbhíse, chun díospóireacht phoiblí, idirbhearta eacnamaíocha agus scaipeadh faisnéise ar an bpobal, tuairimí agus smaointe a éascú agus tionchar a imirt ar an gcaoi a bhfaigheann faighteoirí faisnéis ar líne agus ar an gcaoi a gcuireann siad faisnéis in iúl ar líne, is gá oibleagáidí sonracha a fhorchur ar sholáthraithe na n-ardán sin, sa bhreis ar na hoibleagáidí is infheidhme maidir le gach ardán ar líne. I ngeall ar an ról ríthábhachtach atá acu faisnéis a aimsiú agus teacht a bheith uirthi ar líne, is gá freisin na hoibleagáidí sin a fhorchur, a mhéid is infheidhme, ar sholáthraithe inneall cuardaigh an-mhór ar líne. Tá na hoibleagáidí breise sin ar sholáthraithe ardán an-mhór ar líne agus ar sholáthraithe inneall cuardaigh an-mhór ar líne riachtanach chun aghaidh a thabhairt ar na hábhair imní sin maidir leis an mbeartas poiblí, ós rud é nach ann d’aon bhearta malartacha nach bhfuil chomh sriantach a bheadh in ann an toradh céanna a bhaint amach go héifeachtach.

(76)

Is féidir le hardáin an-mhór ar líne agus innill chuardaigh an-mhór ar líne rioscaí sochaíocha a chruthú, a bheadh éagsúil i dtaobh raon feidhme agus tionchair de i gcomparáid leo siúd a chruthódh ardáin níos lú. Ba cheart do sholáthraithe ardán an-mhór ar líne agus do sholáthraithe inneall cuardaigh an-mhór ar líne den sórt sin, dá bhrí sin, an caighdeán is airde d’oibleagáidí díchill chuí a sheasamh, a bheadh comhréireach lena dtionchar sochaíoch. A luaithe a shroichfidh an líon faighteoirí gníomhacha ar ardán nó inneall cuardaigh ar líne, arna ríomh mar mheán thar thréimhse 6 mhí, cionroinnt shuntasach de dhaonra an Aontais, féadfaidh tionchar neamhréireach a bheith ag na rioscaí sistéamacha a bhíonn ag an ardán ar líne nó ag an inneall cuardaigh ar líne san Aontas. Ba cheart a mheas gurb ann do rochtain shuntasach den sórt sin i gcás ina sáraíonn an líon sin an tairseach oibríochtúil atá socraithe ag 45 mhilliún, is é sin, líon atá cothrom le 10 % de dhaonra an Aontais. Ba cheart an tairseach oibríochtúil sin a choinneáil suas chun dáta agus, dá bhrí sin, ba cheart a thabhairt de chumhacht don Choimisiún forálacha an Rialacháin seo a fhorlíonadh trí ghníomhartha tarmligthe a ghlacadh, i gcás inar gá.

(77)

Chun lucht féachana ardáin ar líne nó innill cuardaigh ar líne a chinneadh, is gá meánlíon faighteoirí gníomhacha gach seirbhíse ar leith a shuí. Dá réir sin, ba cheart, leis an meánlíon d’fhaighteoirí gníomhacha míosúla ardáin ar líne, go léireofaí na faighteoirí uile a bhí i dteagmháil leis an tseirbhís uair amháin ar a laghad laistigh de thréimhse ar leith, trí bheith neamhchosanta ar fhaisnéis arna scaipeadh ar chomhéadan ar líne an ardáin ar líne, amhail féachaint uirthi nó éisteacht léi nó trí fhaisnéis a sholáthar, amhail trádálaithe ar ardáin ar líne a cheadaíonn do thomhaltóirí cianchonarthaí a thabhairt i gcrích le trádálaithe.

Chun críocha an Rialacháin seo, níl an rannpháirtíocht teoranta d’idirghníomhú leis an bhfaisnéis trí chliceáil, fágáil tráchta, nascadh, comhroinnt, ceannach nó déanamh idirbheart ar ardán ar líne. Dá bhrí sin, ní gá go mbeadh coincheap an fhaighteora ghníomhaigh seirbhíse ag teacht le coincheap úsáideora chláraithe seirbhíse. Maidir le hinnill chuardaigh ar líne, ba cheart a chumhdach leis an gcoincheap d’fhaighteoirí gníomhacha na seirbhíse iad siúd a bhreathnaíonn ar an bhfaisnéis ar a gcomhéadan ar líne, ach níor cheart a chumhdach leis, mar shampla, úinéirí na suíomhanna gréasáin atá innéacsaithe ag inneall cuardaigh ar líne toisc nach mbíonn siad rannpháirteach go gníomhach sa tseirbhís. Ba cheart go n-áireofaí ar líon na bhfaighteoirí gníomhacha seirbhíse gach faighteoir uathúil de chuid na seirbhíse a bhíonn i dteagmháil leis an tseirbhís shonrach. Chuige sin, i gcás inar féidir, níor cheart faighteoir de chuid na seirbhíse a úsáideann comhéadain ar líne éagsúla, amhail suíomhanna gréasáin nó aipeanna, lena n-áirítear an áit a bhfaightear rochtain ar na seirbhísí trí aimsitheoirí aonfhoirmeacha acmhainne (URLanna) nó ainmneacha fearainn éagsúla, a chomhaireamh ach aon uair amháin. Mar sin féin, níor cheart go n-áireofaí i gcoincheap an fhaighteora ghníomhaigh seirbhíse úsáid theagmhasach na seirbhíse ag faighteoirí soláthraithe eile de sheirbhísí idirghabhála a chuireann faisnéis arna hóstáil ag soláthraí ardán ar líne ar fáil go hindíreach trí nascadh nó innéacsú ag soláthraí innill cuardaigh ar líne. Thairis sin, ní cheanglaítear leis an Rialachán seo ar sholáthraithe ardán ar líne ná ar sholáthraithe inneall cuardaigh ar líne rianú sonrach a dhéanamh ar dhaoine aonair ar líne. I gcás inar féidir le soláthraithe den sórt sin neamhshuim a dhéanamh d’úsáideoirí uathoibrithe amhail róbait nó scríobairí gan tuilleadh próiseála ar shonraí pearsanta agus tuilleadh rianaithe a bheith i gceist, féadfaidh siad é sin a dhéanamh. Féadfaidh forbairtí margaidh agus teicniúla tionchar a imirt ar líon fhaighteoirí gníomhacha na seirbhíse agus, dá bhrí sin, ba cheart a thabhairt de chumhacht don Choimisiún forálacha an Rialacháin seo a fhorlíonadh trí ghníomhartha tarmligthe a ghlacadh lena leagtar síos an mhodheolaíocht chun faighteoirí gníomhacha ardáin ar líne nó innill cuardaigh ar líne a chinneadh, i gcás inar gá, lena léirítear cineál na seirbhíse agus an chaoi a n-idirghníomhaíonn faighteoirí na seirbhíse léi.

(78)

I bhfianaise na n-éifeachtaí líonra lena léirítear an geilleagar ardáin, d’fhéadfadh bonn úsáideoirí ardán ar líne nó inneall cuardaigh ar líne leathnú go tapa agus gné ardán an-mhór ar líne nó inneall cuardaigh an-mhór ar líne a shroicheadh, leis an tionchar gaolmhar ar an margadh inmheánach. D’fhéadfadh sé gur amhlaidh a bheadh i gcás fás easpónantúil a tharlaíonn i dtréimhsí gearra ama, nó mar gheall ar láithreacht agus láimhdeachas mór domhanda a cheadaíonn don ardán ar líne nó don inneall cuardaigh ar líne an úsáid iomlán a bhaint as tionchair líonraí agus barainneachtaí scála agus raon feidhme. D’fhéadfadh láimhdeachas ard bliantúil nó caipitliú margaidh a bheith ina léiriú go háirithe ar inscálaitheacht thapa ó thaobh rochtain úsáideora de. Sna cásanna sin, ba cheart don Chomhordaitheoir Seirbhísí Digiteacha bunaíochta nó don Choimisiún a bheith in ann tuairisciú níos rialta a iarraidh ó sholáthraí an ardáin ar líne nó an innill cuardaigh ar líne maidir le líon faighteoirí gníomhacha na seirbhíse ionas go bhféadfar an pointe ag ar cheart an t-ardán nó an t-inneall sin a ainmniú mar ardán an-mhór ar líne nó mar inneall cuardaigh an-mhór ar líne, faoi seach, chun críocha an Rialacháin seo a shainaithint go tráthúil.

(79)

Is féidir ardán an-mhór ar líne agus inneall cuardaigh an-mhór ar líne a úsáid ar bhealach a imríonn tionchar láidir ar shábháilteacht ar líne, a chuireann cruth ar thuairimí an phobail agus ar an dioscúrsa poiblí, agus ar an trádáil ar líne. Go ginearálta, barrfheabhsaítear an chaoi a ndearann siad a seirbhísí chun tairbhe a bhaint as a samhlacha gnó a bhíonn tiomanta ag fógraíocht go minic agus ar féidir leo imní a chruthú i measc na sochaí. Tá gá le rialáil agus forfheidhmiú éifeachtach chun na rioscaí agus an díobháil shocaíoch agus eacnamaíoch a d’fhéadfadh teacht chun cinn a shainaithint agus a mhaolú go héifeachtúil. Faoin Rialachán seo, ba cheart dá bhrí sin do sholáthraithe ardán an-mhór ar líne agus soláthraithe inneall cuardaigh an-mhór ar líne réasúnú a dhéanamh ar rioscaí córasacha a eascraíonn as dearadh, feidhmiú agus úsáid a seirbhísí, agus freisin as mí-úsáidí féideartha ag faighteoirí na seirbhíse, agus ba cheart dóibh bearta maolaithe iomchuí a dhéanamh agus na cearta bunúsacha á n-urramú. Agus tábhacht na n-éifeachtaí agus na dtionchar diúltach a d’fhéadfadh a bheith ann á gcinneadh, ba cheart do sholáthraithe breithniú a dhéanamh ar a thromchúisí atá an tionchar a d’fhéadfadh a bheith ann agus ar an dóchúlacht go mbeidh ann do rioscaí córasacha sin ar fad. Mar shampla, d’fhéadfaidís measúnú a dhéanamh i dtaobh an bhféadfadh an tionchar diúltach a d’fhéadfadh a bheith ann difear a dhéanamh do líon mór daoine, an bhféadfadh sé a bheith do-athraitheach, nó cé chomh deacair is atá sé an staid atá i réim a leigheas agus a athbhunú roimh an tionchar a d’fhéadfadh a bheith ann.

(80)

Ba cheart do sholáthraithe ardán an-mhór ar líne agus inneall cuardaigh an-mhór ar líne measúnú a dhéanamh go mion ar cheithre chatagóir rioscaí córasacha. Baineann an chéad chatagóir leis na rioscaí atá bainteach le scaipeadh inneachair neamhdhleathaigh, amhail scaipeadh inneachair mí-úsáide gnéasaí leanaí nó fuathchaint neamhdhleathach nó cineálacha eile mí-úsáide a seirbhísí chun cionta coiriúla a dhéanamh, agus tabhairt faoi gníomhaíochtaí neamhdhleathacha, amhail táirgí nó seirbhísí atá coiscthe ag an Aontas nó ag an dlí náisiúnta, lena n-áirítear táirgí dainséaracha nó góchumtha, nó ainmhithe arna dtrádáil go neamhdhleathach, a dhíol. Mar shampla, d’fhéadfadh scaipeadh nó gníomhaíochtaí den sórt sin a bheith ina riosca sistéamach suntasach i gcás ina bhféadfadh rochtain ar inneachar neamhdhleathach scaipeadh go tapa agus go forleathan trí chuntais a bhfuil lucht féachana leathan acu nó trí mhodhanna eile a mhéadaithe. Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne measúnú a dhéanamh ar an riosca go scaipfí inneachar neamhdhleathach gan beann ar cé acu atá nó nach bhfuil an fhaisnéis ar neamhréir freisin lena dtéarmaí agus coinníollacha. Tá an measúnú sin gan dochar don fhreagracht phearsanta atá ar fhaighteoir na seirbhíse de chuid ardán an-mhór ar líne nó ar úinéirí suíomhanna gréasáin arna n-innéacsú ag innill chuardaigh an-mhór ar líne as neamhdhleathacht fhéideartha a ngníomhaíochtaí faoin dlí is infheidhme.

(81)

Baineann an dara catagóir le tionchar iarbhír nó intuartha na seirbhíse ar fheidhmiú ceart bunúsach, arna chosaint sa Chairt um Chearta Bunúsacha, lena n-áirítear dínit an duine, an tsaoirse chun tuairimí agus faisnéis a nochtadh, lena n-áirítear saoirse agus iolrachas na meán, an ceart chun saoil phríobháidigh, cosaint sonraí, an ceart maidir le neamh-idirdhealú, cearta an linbh agus cosaint an tomhaltóra, ach gan a bheith teoranta dóibh. D’fhéadfadh rioscaí den sórt sin teacht aníos, mar shampla, i ndáil le dearadh na gcóras algartamach arna n-úsáid ag an ardán an-mhór ar líne nó ag an inneall cuardaigh an-mhór ar líne nó mí-úsáid a seirbhíse trí fhógraí maslacha a chur isteach nó modhanna eile chun caint a chiúnú nó cur isteach ar iomaíocht. Agus measúnú á dhéanamh ar na rioscaí do chearta an linbh, ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne breithniú a dhéanamh, mar shampla, ar a éasca atá sé do mhionaoisigh dearadh agus feidhmiú na seirbhíse a thuiscint, chomh maith leis an gcaoi ar féidir mionaoisigh a nochtadh trína seirbhís d’inneachar a d’fhéadfadh dochar a dhéanamh d’fhorbairt sláinte mionaoiseach, nó dá bhforbairt fhisiciúil, mheabhrach agus mhorálta. D’fhéadfadh rioscaí den sórt sin teacht chun cinn, mar shampla, i ndáil le dearadh comhéadan ar líne a bhaineann leas d’aon ghnó nó go neamhbheartaithe as laigí agus neamhthaithí mionaoiseach nó a d’fhéadfadh a bheith ina gcúis le hiompraíocht andúileach.

(82)

Baineann an tríú catagóir rioscaí leis na héifeachtaí diúltacha iarbhír nó intuartha ar phróisis dhaonlathacha, ar dhioscúrsa sibhialta agus ar phróisis toghcháin, agus ar an tslándáil phoiblí.

(83)

Eascraíonn an ceathrú catagóir rioscaí as ábhair imní chomhchosúla maidir le dearadh, feidhmiú nó úsáid na seirbhíse, lena n-áirítear trí chúbláil, na n-ardán an-mhór ar líne agus na n-inneall cuardaigh an-mhór ar líne a bhfuil tionchar diúltach iarbhír nó intuartha acu ar chosaint na sláinte poiblí agus mionaoiseach, agus iarmhairtí tromchúiseacha diúltacha ar fholláine fhisiciúil agus mheabhrach duine, nó ar an bhforéigean inscnebhunaithe. D’fhéadfadh rioscaí den sórt sin eascairt freisin as feachtais bhréagaisnéise chomhordaithe a bhaineann leis an tsláinte phoiblí, nó as dearadh comhéadain ar líne lena bhféadfaí andúil iompraíochta a spreagadh i measc fhaighteoirí na seirbhíse.

(84)

Agus measúnú á dhéanamh ar na rioscaí sistéamacha sin, ba cheart do sholáthraithe ardán an-mhór ar líne agus innill chuardaigh an-mhór ar líne díriú ar na córais nó ar ghnéithe eile a d’fhéadfadh cur leis na rioscaí, lena n-áirítear na córais algartamacha go léir a d’fhéadfadh a bheith ábhartha, go háirithe a gcórais moltaí agus a gcórais fógraíochta, agus aird á tabhairt ar na cleachtais ghaolmhara maidir le sonraí a bhailiú agus a úsáid. Ba cheart dóibh a mheas freisin an bhfuil a dtéarmaí agus coinníollacha agus forfheidhmiú na dtéarmaí agus na gcoinníollacha sin iomchuí, mar aon lena bpróisis modhnóireachta inneachair, a n-uirlisí teicniúla agus a n-acmhainní leithdháilte. Agus measúnú á dhéanamh ar na rioscaí sistéamacha arna sainaithint sa Rialachán seo, ba cheart do na soláthraithe sin díriú freisin ar an bhfaisnéis nach bhfuil neamhdhleathach, ach a rannchuidíonn leis na rioscaí sistéamacha arna sainaithint sa Rialachán seo. Dá bhrí sin, ba cheart do sholáthraithe den sórt sin aird ar leith a thabhairt ar an gcaoi a n-úsáidtear a gcuid seirbhísí chun inneachar míthreorach nó cealgach, lena n-áirítear bréagaisnéis, a scaipeadh nó a mhéadú. I gcás ina gcuireann aimpliú algartamach faisnéise leis na rioscaí sistéamacha, ba cheart do na soláthraithe sin é sin a léiriú go cuí ina gcuid measúnuithe riosca. I gcás inar logánaithe iad rioscaí nó ina bhfuil difríochtaí teanga ann, ba cheart do na soláthraithe sin é sin a chur san áireamh ina gcuid measúnuithe riosca. Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne measúnú a dhéanamh, go háirithe, ar an gcaoi a gcuireann dearadh agus feidhmiú a seirbhíse, chomh maith le húsáid agus cúbláil a seirbhísí, a dhéantar d’aon ghnó agus go minic, ar bhealach comhordaithe, nó sárú córasach a dtéarmaí seirbhíse, leis na rioscaí sin. D’fhéadfadh rioscaí den sórt sin teacht chun cinn, mar shampla, trí úsáid bhréagach na seirbhíse, amhail cuntais bhréige a chruthú, róbait a úsáid nó úsáid chalaoiseach seirbhíse, agus iompraíochtaí eile atá uathoibrithe nó atá uathoibrithe i bpáirt, a bhféadfadh scaipeadh ar an bpobal tapa agus fairsing faisnéise ar inneachar neamhdhleathach nó inneachar nach bhfuil comhoiriúnach leis na téarmaí agus coinníollacha a ghabhann le hardán ar líne nó le hinneall cuardaigh ar líne agus a rannchuidíonn le feachtais bhréagaisnéise a bheith mar thoradh orthu.

(85)

Chun go bhféadfadh measúnuithe riosca a dhéanfar ina dhiaidh sin tógáil ar a chéile agus éabhlóid na rioscaí arna sainaithint a léiriú, mar aon le himscrúduithe agus gníomhaíochtaí forfheidhmithe a éascú, ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne na doiciméid tacaíochta uile a bhaineann leis na measúnuithe riosca a rinne siad a chaomhnú, amhail faisnéis maidir le hullmhú na measúnuithe sin, sonraí bunúsacha, agus sonraí maidir le tástáil a gcóras algartamach.

(86)

Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne na modhanna riachtanacha a úsáid chun na rioscaí sistéamacha arna sainaithint sna measúnuithe riosca a mhaolú go dícheallach, agus cearta bunúsacha á n-urramú. Ba cheart go n-urramódh aon bhearta a ghlacfar ceanglais díchill chuí an Rialacháin seo agus ba cheart dóibh a bheith réasúnach agus éifeachtach chun na rioscaí sistéamacha sonracha arna sainaithint a mhaolú. Ba cheart iad a bheith comhréireach i bhfianaise acmhainneacht eacnamaíoch sholáthraí an ardáin an-mhór ar líne nó an innill cuardaigh an-mhór ar líne agus i bhfianaise an ghá atá le srianta neamhriachtanacha ar úsáid a seirbhíse a sheachaint, agus aird chuí á tabhairt ar na héifeachtaí diúltacha a d’fhéadfadh a bheith ann ar na cearta bunúsacha sin. Ba cheart do na soláthraithe sin aird ar leith a thabhairt ar an tionchar ar an tsaoirse chun tuairimí a nochtadh.

(87)

Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne breithniú a dhéanamh faoi bhearta maolaitheacha den sórt sin, mar shampla, ar aon chuid de dhearadh, gné dá gcuid seirbhísí nó feidhmiú a gcuid seirbhísí, amhail dearadh an chomhéadain ar líne, a oiriúnú. Ba cheart dóibh a dtéarmaí agus a gcoinníollacha a oiriúnú agus a chur i bhfeidhm, de réir mar is gá, agus i gcomhréir le rialacha an Rialacháin seo maidir le téarmaí agus coinníollacha. D’fhéadfaí a áireamh ar bhearta iomchuí eile a gcórais modhnóireachta inneachair agus a bpróisis inmheánacha a oiriúnú nó a bpróisis agus a n-acmhainní cinnteoireachta a oiriúnú, lena n-áirítear an pearsanra modhnóireachta inneachair, a n-oiliúint agus a saineolas áitiúil. Baineann sé sin go háirithe le luas agus cáilíocht próiseála fógraí. I ndáil leis an méid sin, i gCód Iompair 2016 maidir le cur i gcoinne na fuathchainte neamhdhleathaí ar líne, mar shampla, leagtar amach tagarmharc maidir le fógraí bailí a phróiseáil chun fuathchaint neamhdhleathach a bhaint laistigh de 24 uair an chloig. Ba cheart do sholáthraithe ardán an-mhór ar líne, go háirithe na cinn sin a úsáidtear go príomha chun inneachar pornagrafach a scaipeadh ar an bpobal, a n-oibleagáidí uile faoin Rialachán seo a chomhlíonadh go dúthrachtach i ndáil le hinneachar neamhdhleathach arb ionann é agus cibearfhoréigean, lena n-áirítear inneachar pornagrafach neamhdhleathach, go háirithe i ndáil lena áirithiú gur féidir le híospartaigh a gcearta a fheidhmiú go héifeachtach i ndáil le hinneachar, arb é atá ann comhroinnt ábhair phearsanta nó chúbláilte go neamh-chomhthoiliúil, trí fhógraí a phróiseáil go tapa agus tríd an inneachar sin a bhaint gan moill mhíchuí. I gcás inneachar neamhdhleathach de chineálacha eile, d’fhéadfadh sé go mbeadh amlínte níos faide nó níos giorra de dhíth chun fógraí a phróiseáil, rud a bheidh ag brath ar na fíricí, ar na himthosca agus ar na cineálacha inneachair neamhdhleathaigh atá idir lámha. Féadfaidh na soláthraithe sin freisin comhar a chur ar bun nó a mhéadú le comharthóirí iontaofa agus seisiúin oiliúna agus malartuithe le heagraíochtaí comharthóirí iontaofa a eagrú.

(88)

Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne a bheith dúthrachtach maidir leis na bearta a dhéanann siad chun a gcórais algartamacha a thástáil agus, i gcás inar gá, a chur in oiriúint, go háirithe a gcórais moltaí. D’fhéadfadh sé go mbeadh orthu éifeachtaí diúltacha moltaí pearsantaithe a mhaolú agus na critéir a úsáidtear ina gcuid moltaí a cheartú. Is féidir leis na córais fógraíochta a úsáideann soláthraithe ardán an-mhór ar líne agus soláthraithe inneall cuardaigh an-mhór ar líne borradh a chur faoi na rioscaí sistéamacha. Ba cheart do na soláthraithe sin breithniú a dhéanamh ar bhearta ceartaitheacha, amhail deireadh a chur le hioncam fógraíochta d’fhaisnéis shonrach, nó gníomhaíochtaí eile, amhail sofheictheacht foinsí faisnéise údarásacha a fheabhsú, nó a gcórais fógraíochta a oiriúnú ar bhealach níos struchtúrtha. D’fhéadfadh sé go mbeadh ar sholáthraithe ardán an-mhór ar líne agus soláthraithe inneall cuardaigh an-mhór ar líne a bpróisis inmheánacha nó maoirseacht ar aon cheann dá ngníomhaíochtaí a threisiú, go háirithe maidir le rioscaí sistéamacha a bhrath, agus measúnuithe riosca níos minice nó níos spriocdhírithe a dhéanamh i ndáil le feidhmiúlachtaí nua. Go háirithe, i gcás ina gcomhroinntear rioscaí ar ardáin éagsúla ar líne nó ar innill chuardaigh éagsúla ar líne, ba cheart dóibh comhoibriú le soláthraithe seirbhíse eile, lena n-áirítear trí chóid iompair nó bearta féinrialála a thosú nó tabhairt faoi chóid iompair nó bearta féinrialála eile atá ann cheana. Ba cheart dóibh freisin breithniú a dhéanamh ar ghníomhaíochtaí múscailte feasachta, go háirithe i gcás ina mbaineann rioscaí le feachtais bhréagaisnéise.

(89)

Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne aird a thabhairt ar leas mionaoiseach agus bearta á ndéanamh acu, amhail dearadh a seirbhíse agus a gcomhéadain ar líne a oiriúnú, go háirithe nuair atá a seirbhísí dírithe go príomha ar mhionaoisigh nó nuair is iadsan a bhíonn á n-úsáid den chuid is mó. Ba cheart dóibh a áirithiú go n-eagrófar a gcuid seirbhísí ar bhealach a chuirfidh ar chumas mionaoiseach rochtain a fháil go héasca ar na sásraí dá bhforáiltear sa Rialachán seo, i gcás inarb infheidhme, lena n-áirítear sásraí fógra agus gnímh agus sásraí gearán. Ba cheart dóibh bearta a dhéanamh freisin chun mionaoisigh a chosaint ar inneachar a d’fhéadfadh díobháil a dhéanamh dá bhforbairt fhisiciúil, mheabhrach nó mhorálta agus ba cheart dóibh uirlisí a chur ar fáil lena gcumasaítear rochtain choinníollach ar an bhfaisnéis sin. Agus na bearta maolaithe iomchuí á roghnú acu, féadfaidh soláthraithe, i gcás inarb iomchuí, breithniú a dhéanamh ar dhea-chleachtais tionscail, lena n-áirítear mar a bhunaítear le comhar féinrialála, amhail cóid iompair, agus ba cheart dóibh na treoirlínte ón gCoimisiún a chur san áireamh.

(90)

Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne a áirithiú go bhfuil a gcur chuige maidir le measúnú agus maolú riosca bunaithe ar an bhfaisnéis agus ar na léargais eolaíocha is fearr atá ar fáil agus go ndéanann siad a dtoimhdí a thástáil leis na grúpaí is mó a bhfuil tionchar ag na rioscaí agus na bearta a dhéanann siad orthu. Chuige sin, ba cheart dóibh, i gcás inarb iomchuí, a measúnuithe riosca a dhéanamh agus a mbearta maolaithe riosca a dhearadh le rannpháirtíocht ionadaithe fhaighteoirí na seirbhíse, ionadaithe ó ghrúpaí a bhféadfadh tionchar a bheith ag a seirbhísí orthu, saineolaithe neamhspleácha agus eagraíochtaí na sochaí sibhialta. Ba cheart dóibh féachaint leis na comhairliúcháin sin a leabú ina modheolaíochtaí chun measúnú a dhéanamh ar na rioscaí agus chun bearta maolaithe a cheapadh, lena n-áirítear, de réir mar is iomchuí, suirbhéanna, grúpaí fócais, cruinnithe comhchéime, agus modhanna eile comhairliúcháin agus deartha. Sa mheasúnú i dtaobh an bhfuil beart réasúnta, comhréireach agus éifeachtach, ba cheart aird ar leith a thabhairt ar an gceart chun tuairimí a nochtadh.

(91)

Le linn géarchéime, d’fhéadfadh sé go mbeadh gá le bearta sonracha áirithe a bheadh le déanamh go práinneach ag soláthraithe ardán an-mhór ar líne, sa bhreis ar na bearta a bheadh á nglacadh acu i bhfianaise a n-oibleagáidí eile faoin Rialachán seo. I ndáil leis sin, ba cheart a mheas go dtarlaíonn géarchéim nuair a tharlaíonn imthosca urghnácha a d’fhéadfadh a bheith ina gcúis le bagairt thromchúiseach ar an tslándáil phoiblí nó ar an tsláinte phoiblí san Aontas nó i gcodanna suntasacha de. D’fhéadfadh géarchéimeanna den sórt sin eascairt as coinbhleachtaí armtha nó gníomhartha sceimhlitheoireachta, lena n-áirítear coinbhleachtaí atá ag teacht chun cinn nó gníomhartha sceimhlitheoireachta, tubaistí nádúrtha amhail creathanna talún agus spéirlingí, chomh maith le paindéimí agus bagairtí tromchúiseacha trasteorann eile ar an tsláinte phoiblí. Ba cheart go mbeadh an Coimisiún in ann, ar mholadh ón mBord Eorpach um Sheirbhísí Digiteacha (“an Bord), a cheangal ar sholáthraithe ardán an-mhór ar líne agus soláthraithe inneall cuardaigh an-mhór ar líne freagairt ar ghéarchéimeanna a thionscnamh mar ábhar práinne. Féadfar a áireamh ar na bearta a fhéadfaidh na soláthraithe sin a shainaithint agus a chur i bhfeidhm, mar shampla, próisis modhnóireachta inneachair a oiriúnú agus na hacmhainní a thiomnaítear do mhodhnóireacht inneachair a mhéadú, téarmaí agus coinníollacha, córais algartamacha ábhartha agus córais fógraíochta a oiriúnú, an comhar le comharthóirí iontaofa a threisiú tuilleadh, bearta múscailte feasachta a ghlacadh, faisnéis iontaofa a chur chun cinn agus dearadh a gcomhéadan ar líne a oiriúnú. Ba cheart foráil a dhéanamh maidir leis na ceanglais is gá chun a áirithiú go ndéanfar na bearta sin laistigh de thréimhse ama an-ghearr agus nach n-úsáidfear an sásra freagartha ar ghéarchéimeanna ach amháin i gcás ina bhfuil fíorghá leis, agus sa mhéid go bhfuil fíorghá leis, agus ina bhfuil aon bhearta a dhéantar faoin sásra sin éifeachtach agus comhréireach, agus aird chuí á tabhairt ar chearta agus leasanna dlisteanacha na bpáirtithe uile lena mbaineann. Ba cheart úsáid an tsásra a bheith gan dochar d’fhorálacha eile an Rialacháin seo, amhail na forálacha sin a bhaineann le measúnuithe riosca agus bearta maolaithe, agus d’fhorfheidhmiú na bhforálacha sin, agus do na forálacha sin maidir le prótacail ghéarchéime.

(92)

Mar gheall ar an ngá atá le fíorú ó shaineolaithe neamhspleácha a áirithiú, ba cheart do sholáthraithe ardán an-mhór ar líne agus do sholáthraithe inneall cuardaigh an-mhór ar líne a bheith cuntasach, trí iniúchóireacht neamhspleách, as a gcomhlíontacht leis na hoibleagáidí a leagtar síos leis an Rialachán seo agus, i gcás inarb ábhartha, aon ghealltanais chomhlántacha arna dtabhairt de bhun cóid iompair agus prótacail ghéarchéime. D’fhonn a áirithiú go ndéanfar iniúchtaí ar bhealach éifeachtach, éifeachtúil agus tráthúil, ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne an comhar agus an cúnamh is gá a chur ar fáil do na heagraíochtaí a dhéanann na hiniúchtaí, lena n-áirítear trí rochtain a thabhairt don iniúchóir ar na sonraí ábhartha uile agus ar na háitribh is gá chun an t-iniúchadh a dhéanamh i gceart, lena n-áirítear, i gcás inarb iomchuí, ar shonraí a bhaineann le córais algartamacha, agus trí cheisteanna ó bhéal nó i scríbhinn a fhreagairt. Ba cheart do na hiniúchóirí a bheith in ann úsáid a bhaint freisin as foinsí eile faisnéise oibiachtúla, lena n-áirítear staidéir de chuid taighdeoirí grinnfhiosraithe. Níor cheart do sholáthraithe ardán an-mhór ar líne agus soláthraithe inneall cuardaigh an-mhór ar líne an bonn a bhaint d’fheidhmíocht an iniúchta. Ba cheart iniúchtaí a dhéanamh de réir dhea-chleachtais an tionscail agus ard-eitic agus oibiachtúlacht ghairmiúil, agus aird chuí á tabhairt, de réir mar is iomchuí, ar chaighdeáin iniúchóireachta agus ar chóid chleachtais. Ba cheart do na hiniúchóirí rúndacht, slándáil agus sláine na faisnéise a ráthú, amhail rúin trádála, a fhaigheann siad agus a gcúraimí á gcur i gcrích acu. Níor cheart go mbeadh an ráthaíocht sin ina modh chun dul timpeall ar infheidhmeacht na n-oibleagáidí iniúchta sa Rialachán seo. Ba cheart go mbeadh an saineolas riachtanach ag na hiniúchóirí i réimse na bainistíochta riosca agus na hinniúlachta teicniúla chun iniúchadh a dhéanamh ar algartaim. Ba cheart dóibh a bheith neamhspleách, chun go mbeidh siad in ann a gcúraimí a chomhlíonadh ar bhealach leordhóthanach agus iontaofa. Ba cheart dóibh croícheanglais neamhspleáchais a chomhlíonadh maidir le seirbhísí neamh-iniúchóireachta atá toirmiscthe, sealaíocht gnólachtaí iniúchóireachta agus táillí neamhtheagmhasacha. Má bhíonn aon amhras faoina neamhspleáchas agus faoina n-inniúlacht theicniúil, ba cheart dóibh éirí as nó staonadh ón obair iniúchta.

(93)

Ba cheart go mbeadh bunús leis an tuarascáil iniúchóireachta, chun go mbeidh cuntas bríoch ar na gníomhaíochtaí a dtugtar fúthu agus na conclúidí a shroichtear. Ba cheart é seo a bheith ina chabhair le heolas a thabhairt, agus i gcás inarb iomchuí, feabhsuithe a mholadh ar na bearta arna nglacadh ag soláthraithe an ardáin an-mhór ar líne agus an innill cuardaigh an-mhór ar líne chun a n-oibleagáidí faoin Rialachán seo a chomhlíonadh. Ba cheart an tuarascáil iniúchóireachta a tharchur chuig an gComhordaitheoir Seirbhísí Digiteacha, chuig an gCoimisiún agus chuig an mBord tar éis an tuarascáil iniúchóireachta a fháil. Ba cheart do sholáthraithe freisin gach ceann de na tuarascálacha ar an measúnú riosca agus na bearta maolaithe a tharchur gan moill mhíchuí tráth a gcríochnaithe, chomh maith leis an tuarascáil ar chur chun feidhme iniúchóireachta ó sholáthraí an ardáin an-mhór ar líne nó an innill cuardaigh an-mhór ar líne ina léireofar an chaoi ar thug siad aghaidh ar na moltaí a rinneadh san iniúchadh. Ba cheart tuairim iniúchóireachta a bheidh bunaithe ar na conclúidí a tháinig ón bhfianaise iniúchóireachta a fuarthas a áireamh sa tuarascáil iniúchóireachta. Ba cheart “tuairim dhearfach” a thabhairt i gcás ina léiríonn an fhianaise ar fad go gcloíonn soláthraí an ardáin an-mhór ar líne nó soláthraí an innill cuardaigh an-mhór ar líne leis na hoibleagáidí a leagtar síos sa Rialachán seo nó, i gcás inarb infheidhme, aon ghealltanais ar thug sé fúthu de bhun cód iompair nó prótacal géarchéime, go háirithe trí na rioscaí sistéamacha a bhaineann lena chóras agus seirbhísí a shainaithint, a mheas agus a mhaolú. Ba cheart go mbeadh barúlacha ag gabháil le “tuairim dhearfach” i gcás inar mian leis an iniúchóir tuairimí a áireamh nach bhfuil tionchar substaintiúil acu ar thoradh an iniúchta. Ba cheart “tuairim dhiúltach” a thabhairt i gcás ina measann an t-iniúchóir nach gcloíonn soláthraí an ardáin an-mhór ar líne nó soláthraí an innill cuardaigh an-mhór ar líne leis an Rialachán seo, ná leis na gealltanais ar tugadh fúthu. I gcás inarb amhlaidh, sa tuairim iniúchóireachta, nárbh fhéidir teacht ar chonclúid maidir le gnéithe sonracha a thagann faoi raon feidhme an iniúchta, ba cheart míniú ar na cúiseanna nár thángthas ar chonclúid den sórt sin a chur san áireamh sa tuairim iniúchóireachta. I gcás inarb infheidhme, ba cheart go n-áireofaí sa tuarascáil cur síos ar ghnéithe sonracha nach bhféadfaí a iniúchadh, agus míniú ar an bhfáth nach bhféadfaí iad sin a iniúchadh.

(94)

Ba cheart a spreagadh leis na hoibleagáidí maidir le measúnú agus maolú rioscaí, de réir an cháis, an gá do sholáthraithe ardán an-mhór ar líne agus soláthraithe inneall cuardaigh an-mhór ar líne dearadh a gcóras moltóirí a mheasúnú agus, i gcás inar gá, a choigeartú, mar shampla, trí bhearta a dhéanamh chun claontachtaí a chosc nó a íoslaghdú as a leanfaidh idirdhealú ar dhaoine i gcásanna leochaileacha, go háirithe i gcás ina mbeidh coigeartú den sórt sin i gcomhréir leis an dlí um chosaint sonraí agus nuair a dhéantar an fhaisnéis a phearsantú ar bhonn catagóirí speisialta sonraí pearsanta, dá dtagraítear in Airteagal 9 de Rialachán (AE) 2016/679. Ina theannta sin, agus na hoibleagáidí trédhearcachta is infheidhme maidir le hardáin ar líne a mhéid a bhaineann lena gcórais moltaí á gcomhlánú, ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne a áirithiú go comhsheasmhach go mbeidh roghanna malartacha ag faighteoirí a seirbhíse nach bhfuil bunaithe ar phróifíliú, de réir bhrí Rialachán (AE) 2016/679, le haghaidh phríomhpharaiméadair a gcóras moltaí. Ba cheart go mbeadh na roghanna sin inrochtana go díreach ón gcomhéadan ar líne ar a gcuirtear na moltaí i láthair.

(95)

Tá rioscaí ar leith ag baint leis na córais fógraíochta a úsáideann ardáin an-mhór ar líne agus innill chuardaigh an-mhór ar líne, agus teastaíonn maoirseacht bhreise phoiblí agus rialála uathu mar gheall ar a scála agus a gcumas chun díriú ar fhaighteoirí na seirbhíse agus iad a rochtain bunaithe ar a n-iompar laistigh de chomhéadan ar líne an ardáin nó an innill cuardaigh sin agus lasmuigh de. Ba cheart d’ardáin an-mhór ar líne nó d’innill chuardaigh an-mhór ar líne a áirithiú go mbeidh rochtain phoiblí ar stórais fógrán a thaispeántar ar a gcomhéadain ar líne chun maoirseacht agus taighde ar rioscaí atá ag teacht chun cinn mar gheall ar dháileadh fógraíochta ar líne a éascú, mar shampla, i ndáil le fógráin neamhdhleathacha nó teicnící ionramhála agus bréagaisnéis a bhfuil tionchar diúltach ceart agus intuartha acu ar an tsláinte phoiblí, ar an tslándáil phoiblí, ar an dioscúrsa sibhialta, ar an rannpháirtíocht pholaitiúil agus ar an gcomhionannas. Ba cheart inneachar fógrán a áireamh i stórtha, lena n-áirítear ainm an táirge, na seirbhíse nó an bhranda agus ábhar an fhógráin, agus sonraí gaolmhara faoin bhfógróir, agus, murab ionann iad, an duine nádúrtha nó dlítheanach a d’íoc as an bhfógrán, agus seachadadh an fhógráin, go háirithe i gcás fógraíocht spriocdhírithe. Ba cheart a áireamh san fhaisnéis sin faisnéis maidir le critéir spriocdhírithe agus critéir seachadta araon, go háirithe nuair a dhéantar fógráin a sheachadadh chuig daoine atá i staideanna leochaileacha, amhail mionaoisigh.

(96)

Chun comhlíontacht ardán an-mhór ar líne agus inneall cuardaigh an-mhór ar líne leis na hoibleagáidí a leagtar síos sa Rialachán seo a mhaoirsiú agus a mheasúnú go hiomchuí, féadfaidh an Comhordaitheoir Seirbhísí Digiteacha bunaíochta nó an Coimisiún rochtain ar shonraí sonracha nó a dtuairisciú a éileamh, lena n-áirítear sonraí a bhaineann le halgartaim. D’fhéadfaí a áireamh le ceanglas den sórt sin, mar shampla, na sonraí atá riachtanach chun measúnú a dhéanamh ar na rioscaí agus na díobhálacha féideartha a tharlaíonn mar gheall ar chórais an ardáin an-mhór ar líne nó an innill cuardaigh an-mhór ar líne, sonraí maidir le cruinneas, feidhmiú agus tástáil na gcóras algartamach i gcomhair modhnóireacht inneachair, córais moltaí nó córais fógraíochta, lena n-áirítear, i gcás inarb iomchuí sonraí agus algartaim oiliúna nó sonraí maidir le próisis agus aschuir modhnóireachta inneachair nó ar chórais inmheánacha um láimhseáil gearán de réir bhrí an Rialacháin seo. Níor cheart go n- áireofaí le hiarrataí ar rochtain ar shonraí den sórt sin iarrataí ar fhaisnéis shonrach a thabhairt faoi fhaighteoirí aonair na seirbhíse chun críche a chinneadh an gcomhlíonann faighteoirí den sórt sin dlí eile de chuid an Aontais is infheidhme nó an dlí náisiúnta is infheidhme. Tá tábhacht ar leith ag baint le hiniúchtaí a dhéanann taighdeoirí maidir le forbairt agus déine na rioscaí sistéamacha ar líne chun neamhshiméadrachtaí faisnéise a líonadh agus córas athléimneach de mhaolú riosca a bhunú, agus chun soláthraithe ardán ar líne, soláthraithe inneall cuardaigh ar líne, Comhordaitheoirí Seirbhísí Digiteacha, údaráis inniúla eile, an Coimisiún agus an pobal a chur ar an eolas.

(97)

Cuirtear creat ar fáil sa Rialachán seo, dá bhrí sin, i gcomhair rochtain fhíorláidir ar shonraí ó ardáin an-mhór ar líne agus ó innill chuardaigh an-mhór ar líne a thabhairt do thaighdeoirí grinnfhiosraithe atá cleamhnaithe le heagraíocht taighde de réir bhrí Airteagal 2 de Threoir (AE) 2019/790, lena bhféadfaí a áireamh, chun críche an Rialacháin seo, eagraíochtaí na sochaí sibhialta atá ag déanamh taighde eolaíoch agus é mar phríomhaidhm acu tacú lena misean chun leasa an phobail. Ba cheart gach iarratas maidir le rochtain ar shonraí faoin gcreat sin a bheith comhréireach agus cearta agus leasanna dlisteanacha, lena n-áirítear cosaint sonraí pearsanta, rúin trádála agus faisnéis rúnda eile, an ardáin an-mhór ar líne nó an innill cuardaigh an-mhór ar líne agus aon pháirtithe eile lena mbaineann, lena n-áirítear faighteoirí na seirbhíse, á gcosaint go hiomchuí acu. Mar sin féin, chun a áirithiú go mbainfear amach cuspóir an Rialacháin seo, níor cheart go ndiúltófaí rochtain ar shonraí atá riachtanach don chuspóir taighde sonrach a chur ar fáil mar thoradh ar bhreithniú leasanna tráchtála soláthraithe de bhun iarraidh faoin Rialachán seo. I ndáil leis sin, agus gan dochar do Threoir (AE) 2016/943 ó Pharlaimint na hEorpa agus ón gComhairle (32), ba cheart do sholáthraithe a áirithiú go mbeidh rochtain iomchuí ag taighdeoirí, lena n-áirítear, i gcás inar gá, trí bhíthin cosaintí teicniúla amhail stórais sonraí. D’fhéadfadh iarrataí ar rochtain ar shonraí an líon amharc nó, i gcás inarb ábhartha, cineálacha eile rochtana ar inneachar ag faighteoirí na seirbhíse a chumhdach, mar shampla, sula mbainfeadh soláthraithe ardán an-mhór ar líne nó soláthraithe inneall cuardaigh an-mhór ar líne é.

(98)

Ina theannta sin, i gcás ina bhfuil rochtain ag an bpobal ar shonraí, níor cheart do sholáthraithe den sórt sin cosc a chur ar thaighdeoirí a chomhlíonann fothacar iomchuí critéar na sonraí sin a úsáid chun críocha taighde lena gcuirtear le rioscaí sistéamacha a bhrath, a shainaithint agus a thuiscint. Ba cheart dóibh rochtain a sholáthar do thaighdeoirí den sórt sin, lena n-áirítear, i gcás inar féidir go teicniúil, i bhfíor-am, ar na sonraí a bhfuil rochtain ag an bpobal orthu, mar shampla maidir le hidirghníomhaíochtaí comhiomlánaithe le hinneachar ó leathanaigh phoiblí, grúpaí poiblí, nó figiúirí poiblí, lena n-áirítear sonraí maidir le himprisean agus rannpháirtíocht amhail líon na bhfreagairtí, an líon uaireanta a rinneadh inneachar a roinnt agus an líon tráchtanna ó fhaighteoirí na seirbhíse. Ba cheart soláthraithe ardán an-mhór ar líne nó soláthraithe inneall cuardaigh an-mhór ar líne a spreagadh chun comhoibriú le taighdeoirí agus rochtain níos leithne ar shonraí a sholáthar chun faireachán a dhéanamh ar ábhair imní i measc na sochaí trí bhíthin iarrachtaí deonacha, lena n-áirítear trí ghealltanais agus nósanna imeachta arna gcomhaontú faoi chóid iompair nó faoi phrótacail ghéarchéime. Ba cheart do na soláthraithe agus do na taighdeoirí sin aird ar leith a thabhairt ar chosaint sonraí pearsanta, agus a áirithiú go gcomhlíonfar Rialachán (AE) 2016/679 le haon phróiseáil sonraí. Ba cheart do sholáthraithe sonraí pearsanta a anaithnidiú nó ainm bréige a thabhairt orthu ach amháin sna cásanna sin nárbh fhéidir an cuspóir taighde atá á shaothrú a bhaint amach dá bharr sin.

(99)

I bhfianaise a chasta atá feidhmiú na gcóras arna n-úsáid agus na rioscaí sistéamacha atá iontu don tsochaí, ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne feidhm chomhlíonta a bhunú, ar cheart di a bheith neamhspleách ar fheidhmeanna oibríochtúla na soláthraithe sin. Ba cheart do cheann na feidhme comhlíonta tuairisciú go díreach do lucht bainistíochta na soláthraithe sin, lena n-áirítear ábhair imní maidir le neamhchomhlíonadh an Rialacháin seo. Ba cheart na cáilíochtaí, an t-eolas, an taithí agus an cumas is gá a bheith ag na hoifigigh um chomhlíonadh atá ina gcuid den fheidhm chomhlíonta chun bearta a oibríochtú agus faireachán a dhéanamh ar chomhlíonadh an Rialacháin seo laistigh d’eagraíocht soláthraithe ardán an-mhór ar líne nó inneall cuardaigh an-mhór ar líne. Ba cheart do sholáthraithe ardán an-mhór ar líne agus soláthraithe inneall cuardaigh an-mhór ar líne a áirithiú go bhfuil baint ag an bhfeidhm chomhlíonta, go cuí agus go tráthúil, le gach saincheist a bhaineann leis an Rialachán seo, lena n-áirítear sa straitéis measúnaithe agus maolaithe riosca agus i mbearta sonracha, chomh maith le measúnú a dhéanamh, i gcás inarb infheidhme, ar chomhlíonadh na ngealltanas a thug na soláthraithe sin faoi na cóid iompair agus na prótacail ghéarchéime lena mbaineann siad.

(100)

I bhfianaise na rioscaí breise a bhaineann lena ngníomhaíochtaí agus a n-oibleagáidí breise faoin Rialachán seo, ba cheart ceanglais trédhearcachta breise a cheangal go sonrach ar ardáin an-mhór ar líne agus ar innill chuardaigh an-mhór ar líne, go háirithe maidir le tuairisciú go cuimsitheach ar mheasúnuithe riosca arna ndéanamh agus bearta ina dhiaidh sin arna ndéanamh mar a fhoráiltear leis an Rialachán seo.

(101)

Ba cheart na hacmhainní riachtanacha uile a bheith ag an gCoimisiún, ó thaobh foirne, saineolais agus acmhainní airgeadais de, chun a chúraimí a chur i gcrích faoin Rialachán seo. Chun a áirithiú go mbeidh na hacmhainní is gá ar fáil don mhaoirseacht leormhaith ar leibhéal an Aontais faoin Rialachán seo, agus ós rud é gur cheart do na Ballstáit a bheith i dteideal táille mhaoirseachta a a ghearradh ar sholáthraithe atá bunaithe ar a gcríoch i dtaca leis na cúraimí maoirseachta agus forfheidhmiúcháin a fheidhmíonn a n-údaráis, ba cheart don Choimisiún táille mhaoirseachta, ar cheart a leibhéal a bhunú ar bhonn bliantúil, a ghearradh ar ardáin an-mhór ar líne agus ar innill chuardaigh an-mhór ar líne. Ba cheart méid foriomlán na táille maoirseachta bhliantúla a ghearrtar a shocrú ar bhonn mhéid foriomlán na gcostas arna dtabhú ag an gCoimisiún chun a chúraimí maoirseachta a fheidhmiú faoin Rialachán seo, ar costais iad a mheasfar go réasúnta roimh ré. Ba cheart a áireamh sa mhéid sin costais a bhaineann le feidhmiú na gcumhachtaí agus na gcúraimí sonracha maoirseachta, imscrúdaithe, forghníomhaithe agus faireacháin i ndáil le soláthraithe ardán an-mhór ar líne agus soláthraithe inneall cuardaigh an-mhór ar líne, lena n-áirítear costais a bhaineann le hardáin an-mhór ar líne agus innill chuardaigh an-mhór ar líne a ainmniú nó le bunú, cothabháil agus oibriú na mbunachar sonraí a bheartaítear faoin Rialachán seo.

Ba cheart costais a bhaineann leis an mbunfhaisnéis agus leis an mbonneagar institiúideach a chur ar bun, a chothabháil agus a oibriú le haghaidh an chomhair idir Comhordaitheoirí Seirbhísí Digiteacha, an Bord agus an Coimisiún a áireamh ann freisin, agus é á chur san áireamh, i bhfianaise cé chomh mór agus atá siad agus cén lucht féachana atá acu, go mbíonn tionchar suntasach ag ardáin an-mhór ar líne agus innill chuardaigh an-mhór ar líne ar na hacmhainní a theastaíonn chun tacú leis an mbonneagar sin. Ba cheart a chur san áireamh sa mheastachán ar na costais fhoriomlána na costais mhaoirseachta a tabhaíodh sa bhliain roimhe sin, lena n-áirítear, i gcás inarb infheidhme, na costais sin ar mó iad ná an táille mhaoirseachta bhliantúil aonair a gearradh sa bhliain roimhe sin. D’fhéadfaí na hioncaim shannta sheachtracha a eascróidh as an táille mhaoirseachta bhliantúil a úsáid chun acmhainní daonna breise a mhaoiniú, amhail gníomhairí conarthacha agus saineolaithe náisiúnta ar iasacht, mar aon le caiteachas eile a bhaineann le comhlíonadh na gcúraimí sin a chuirtear de chúram ar an gCoimisiún leis an Rialachán seo. Ba cheart an táille bhliantúil mhaoirseachta atá le gearradh ar sholáthraithe ardán an-mhór ar líne agus soláthraithe inneall cuardaigh an-mhór ar líne a bheith comhréireach le méid na seirbhíse mar a léiríonn líon a faighteoirí gníomhacha na seirbhíse san Aontas. Thairis sin, níor cheart go rachadh an táille mhaoirseachta bhliantúil aonair thar uasteorainn fhoriomlán do sholáthraithe uile ardán an-mhór ar líne nó inneall cuardaigh an-mhór ar líne, agus acmhainneacht eacnamaíoch sholáthraí na seirbhíse nó na seirbhísí ainmnithe á cur san áireamh.

(102)

Chun cur chun feidhme éifeachtach agus comhsheasmhach na n-oibleagáidí sa Rialachán seo a éascú a bhféadfadh forfheidhmiú trí mhodhanna teicneolaíochta a bheith de dhíth maidir leo, tá sé tábhachtach caighdeáin dheonacha a chur chun cinn a chumhdaíonn nósanna imeachta teicniúla áirithe, i gcás inar féidir leis an tionscal modhanna caighdeánaithe a fhorbairt chun tacú le soláthraithe seirbhísí idirghabhálacha an Rialachán seo a chomhlíonadh, amhail cur isteach fógraí a cheadú, lena n-áirítear trí chomhéadain ríomhchláraithe feidhmchlár, nó maidir le caighdeáin a bhaineann le téarmaí agus coinníollacha nó caighdeáin a bhaineann le hiniúchtaí, nó maidir le hidir-inoibritheacht na stórtha fógraíochta. Ina theannta sin, d’fhéadfaí a áireamh sna caighdeáin sin caighdeáin a bhaineann le fógraíocht ar líne, córais moltaí, inrochtaineacht agus cosaint mionaoiseach ar líne. Tá sé de shaoirse ag soláthraithe seirbhísí idirghabhálacha na caighdeáin a ghlacadh ach ní thoimhdíonn a nglacadh go gcomhlíontar an Rialachán seo. Ag an am céanna, dá soláthrófaí na cleachtais is fearr, d’fhéadfadh caighdeáin den chineál sin a bheith úsáideach go háirithe do sholáthraithe seirbhísí idirghabhálacha atá réasúnta beag. D’fhéadfaí idirdhealú a dhéanamh sna caighdeáin idir cineálacha éagsúla inneachair neamhdhleathaigh nó cineálacha éagsúla seirbhísí idirghabhálacha, de réir mar is iomchuí.

(103)

Ba cheart go spreagfadh an Coimisiún agus an Bord tarraingt suas cód iompair deonach, mar aon le cur chun feidhme fhorálacha na gcód sin chun rannchuidiú le cur i bhfeidhm an Rialacháin seo. Ba cheart é a bheith mar aidhm ag an gCoimisiún agus ag an mBord go ndéanfaí cineál chuspóirí leas an phobail a bhfuil aghaidh á dtabhairt orthu a shainiú go soiléir sna cóid iompair, go mbeidh sásraí iontu chun meastóireacht neamhspleách a dhéanamh ar ghnóthú na gcuspóirí sin agus go saineofar ról na n-údarás ábhartha go soiléir. Ba cheart aird ar leith a thabhairt ar éifeachtaí diúltacha ar shlándáil a sheachaint, ar an bpríobháideachas agus sonraí pearsanta a chosaint, agus ar an toirmeasc ar oibleagáidí ginearálta faireacháin a fhorchur. Cé gur cheart go mbeadh cur chun feidhme na gcód iompair intomhaiste agus faoi réir formhaoirseacht phoiblí, níor cheart go gcuirfeadh sé sin bac ar chineál deonach na gcód sin ná ar shaoirse páirtithe leasmhara cinneadh a dhéanamh maidir le bheith rannpháirteach. In imthosca áirithe, tá sé tábhachtach go ngabhfadh ardáin an-mhór ar líne i gcomhar chun cóid iompair shonracha a tharraingt suas agus cloí leo. Ní choisceann aon ní sa Rialachán seo soláthraithe seirbhíse eile cloí leis na caighdeáin chéanna um dhícheall cuí, glacadh leis na cleachtais is fearr agus tairbhe a bhaint as na treoirlínte arna gcur ar fáil ag an gCoimisiún agus ag an mBord, trí bheith rannpháirteach sna cóid iompair chéanna.

(104)

Tá sé iomchuí go sainaithneofaí sa Rialachán seo réimsí áirithe breithniúcháin do chóid iompair den chineál sin. Go háirithe, ba cheart bearta maolaithe riosca a bhaineann le cineálacha éagsúla inneachair neamhdhleathaigh a fhiosrú trí chomhaontuithe féinrialála agus comhrialála. Réimse eile le breithniú is ea tionchair dhiúltacha fhéideartha na rioscaí sistéamacha ar an tsochaí agus ar an daonlathas, amhail bréagaisnéis nó gníomhaíochtaí ionramhála agus mí-úsáideacha, nó aon éifeachtaí díobhálacha ar mhionaoisigh. Áirítear leis sin oibríochtaí comhordaithe atá dírithe ar fhaisnéis a mhéadú, lena n-áirítear bréagaisnéis, amhail úsáid róbat nó cuntas bréige chun faisnéis mhíchruinn nó mhíthreorach d’aon ghnó a chruthú, uaireanta chun críche gnóthachtáil eacnamaíoch a bhaint amach, atá díobhálach go háirithe d’fhaighteoirí leochaileacha na seirbhíse, amhail mionaoisigh. Maidir le réimsí den sórt sin, d’fhéadfaí a mheas gur beart maolaithe riosca iomchuí is ea comhlíonadh agus comhlíontacht na n-ardán an-mhór ar líne nó na n-inneall cuardaigh an-mhór ar líne le cód iompair ar leith. D’fhéadfaí an diúltú gan mínithe cuí a dhéanann soláthraí ardáin ar líne nó innill cuardaigh ar líne ar chuireadh an Choimisiúin chun páirt a ghlacadh i gcur i bhfeidhm cóid iompair den sórt sin a thabhairt san áireamh, i gcás inarb ábhartha, nuair a bhíonn cinneadh á dhéanamh faoi cibé a sháraigh nó nár sháraigh an t-ardán ar líne nó an t-inneall cuardaigh ar líne na hoibleagáidí a leagtar síos leis an Rialachán seo. Níor cheart a thoimhdiú ann féin go bhfuil an Rialachán seo á chomhlíonadh toisc go bhfuiltear ag glacadh páirt i gcód iompair ar leith agus á chur i bhfeidhm.

(105)

Ba cheart go n-éascódh na cóid iompair inrochtaineacht na n-ardán an-mhór ar líne agus na n-inneall cuardaigh an-mhór ar líne, i gcomhréir le dlí an Aontais agus leis an dlí náisiúnta, chun a n-úsáid intuartha ag daoine faoi mhíchumas a éascú. Go háirithe, d’fhéadfaí a áirithiú leis na cóid iompair go gcuirfear an fhaisnéis i láthair ar bhealach inbhraite, inoibrithe, intuigthe agus láidir agus go ndéanfaí foirmeacha agus bearta dá bhforáiltear de bhun an Rialacháin seo a chur ar fáil ar shlí atá éasca a aimsiú agus inrochtana do dhaoine faoi mhíchumas.

(106)

D’fhéadfadh na rialacha maidir le cóid iompair faoin Rialachán seo a bheith mar bhunús le haghaidh iarrachtaí féinrialála atá bunaithe cheana féin ar leibhéal an Aontais, lena n-áirítear an Gealltanas um Shábháilteacht Táirgí, an Meabhrán tuisceana maidir le díol earraí góchumtha ar an idirlíon, an Cód iompair maidir le fuathchaint neamhdhleathach ar líne a chomhrac, chomh maith leis an gCód cleachtais maidir le bréagaisnéis. Go háirithe i gcás an chinn deiridh, mar thoradh ar an treoir ón gCoimisiún, neartaíodh an Cód cleachtais maidir le bréagaisnéis mar a fógraíodh é sa Phlean Gníomhaíochta um Dhaonlathas Eorpach.

(107)

Go ginearálta, baineann soláthar fógraíochta ar líne le roinnt gníomhaithe, lena n-áirítear seirbhísí idirghabhálacha a nascann foilsitheoirí fógraí le fógróirí. Ba cheart cóid iompair a úsáid chun tacú leis na hoibleagáidí trédhearcachta a bhaineann le fógraíocht do sholáthraithe ardán ar líne, soláthraithe ardán an-mhór ar líne agus soláthraithe inneall cuardaigh an-mhór ar líne a leagtar amach sa Rialachán seo, agus chun iad a chomhlánú, chun foráil a dhéanamh maidir le sásraí solúbtha agus éifeachtacha chun an chomhlíontacht leis na hoibleagáidí sin a éascú agus a fheabhsú, go háirithe mar a bhaineann sé le modúlachtaí tharchur na faisnéise ábhartha. Ba cheart go n-áireofaí leis sin tarchur na faisnéise ar an bhfógróir a íocann as an bhfógra a éascú nuair nach ionann iad agus an duine nádúrtha nó dlítheanach a bhfuil an fógrán á chur ar chomhéadan ar líne ardáin ar líne thar a cheann. Ba cheart a áireamh sna cóid iompair freisin bearta chun a áirithiú go roinnfear faisnéis fhiúntach maidir le luach airgid a chur ar shonraí go hiomchuí ar fud an tslabhra luacha. Ba cheart go n-áiritheofaí le rannpháirtíocht réimse leathan geallsealbhóirí go dtacaítear go forleathan leis na cóid iompair sin, go bhfuil siad fónta go teicniúil, éifeachtach agus go dtairgeann siad na leibhéil is airde fusacht úsáide lena áirithiú go mbaineann na hoibleagáidí trédhearcachta a gcuspóirí amach. Chun éifeachtacht na gcód iompair a áirithiú, ba cheart don Choimisiún sásraí meastóireachta a áireamh i ndréachtú na gcód iompair. I gcás inarb iomchuí, féadfaidh an Coimisiún a iarraidh ar an nGníomhaireacht um Chearta Bunúsacha nó ar an Maoirseoir Eorpach ar Chosaint Sonraí a dtuairimí a chur in iúl maidir leis an gcód iompair faoi seach.

(108)

Chomh maith leis an sásra freagartha ar ghéarchéimeanna d’ardáin an-mhór ar líne agus d’innill chuardaigh an-mhór ar líne, féadfaidh an Coimisiún tús a chur le prótacail ghéarchéime dheonacha a tharraingt suas chun freagairt thapa, chomhchoiteann agus trasteorann a chomhordú sa timpeallacht ar líne. D’fhéadfadh an cás a bheith amhlaidh, mar shampla, i gcás ina mbaintear mí-úsáid as ardáin ar líne chun inneachar neamhdhleathach nó bréagaisnéis a scaipeadh go tapa nó i gcás inar gá faisnéis iontaofa a scaipeadh go tapa. I bhfianaise an róil thábhachtaigh atá ag ardáin an-mhór ar líne chun faisnéis a scaipeadh inár sochaithe agus thar theorainneacha, ba cheart soláthraithe ardán den sórt sin a spreagadh chun prótacail ghéarchéime shonracha a leagan amach agus a chur i bhfeidhm. Níor cheart prótacail ghéarchéime den sórt sin a ghníomhachtú ach amháin ar feadh tréimhse theoranta ama agus ba cheart go mbeadh na bearta a rinneadh teoranta don mhéid a bhfuil fíorghá leis le dul i ngleic leis an toisc urghnách. Ba cheart na bearta sin a bheith comhsheasmhach leis an Rialachán seo, agus níor cheart gurb ionann iad agus oibleagáid ghinearálta ar sholáthraithe rannpháirteacha ardán an-mhór ar líne agus ar sholáthraithe rannpháirteacha inneall cuardaigh an-mhór ar líne faireachán a dhéanamh ar an bhfaisnéis a tharchuireann nó a stórálann siad, ná fíorais ná cúinsí a lorg go gníomhach a thugann inneachar neamhdhleathach le fios.

(109)

Chun maoirseacht agus forfheidhmiú leordhóthanach na n-oibleagáidí a leagtar síos sa Rialachán seo a áirithiú, ba cheart do na Ballstáit údarás amháin ar a laghad a ainmniú a mbeidh sé de chúram air cur i bhfeidhm an Rialacháin seo a mhaoirsiú agus a fhorfheidhmiú, gan dochar don deis údarás atá ann cheana a ainmniú ná dá fhoirm dhlíthiúil i gcomhréir leis an dlí náisiúnta. Mar sin féin, ba cheart do na Ballstáit a bheith in ann cúraimí agus inniúlachtaí maoirseachta nó forfheidhmithe sonracha a bhaineann le cur i bhfeidhm an Rialacháin seo a chur faoi chúram níos mó ná údarás inniúil amháin, mar shampla i gcomhair earnálacha sonracha inar féidir na húdaráis atá ann cheana a chumhachtú freisin, cosúil le rialaitheoirí cumarsáide leictreonaí, rialaitheoirí meán nó údaráis um chosaint tomhaltóirí, a léireoidh a struchtúr bunreachtúil, eagraíochtúil agus riaracháin. I bhfeidhmiú a gcúraimí dóibh, ba cheart do gach údarás inniúil rannchuidiú le cuspóirí an Rialacháin seo a bhaint amach, eadhon le feidhmiú cuí an mhargaidh inmheánaigh do sheirbhísí idirghabhálacha i gcás ina ndéantar na rialacha comhchuibhithe do thimpeallacht shábháilte, intuartha agus iontaofa ar líne lena n-éascaítear nuálaíocht, agus go háirithe na hoibleagáidí díchill chuí is infheidhme maidir le catagóirí éagsúla de sholáthraithe seirbhísí idirghabhálacha, a mhaoirsiú agus a fhorfheidhmiú go héifeachtach, d’fhonn a áirithiú go ndéantar cearta bunúsacha, mar atá cumhdaithe sa Chairt, lena n-áirítear prionsabal na cosanta tomhaltóirí, a chosaint go héifeachtach. Ní cheanglaítear ar na Ballstáit de bhun an Rialacháin seo a chur de chúram ar údaráis inniúla breithniú a dhéanamh ar dhlíthiúlacht míreanna sonracha inneachair.

(110)

Mar gheall ar chineál na seirbhísí atá i gceist agus an réimse cothrománach oibleagáidí a thugtar isteach leis an Rialachán seo, ba cheart go sainaithneofaí údarás amháin a cheaptar chun maoirseacht a dhéanamh ar chur i bhfeidhm, agus i gcás inar gá, forfheidhmiú an Rialacháin seo mar Chomhordaitheoir Seirbhísí Digiteacha i ngach Ballstát. I gcás ina gceaptar níos mó ná údarás inniúil amháin chun cur i bhfeidhm an Rialacháin seo a mhaoirsiú agus a fhorfheidhmiú, níor cheart ach údarás amháin sa Bhallstát sin a ainmniú mar Chomhordaitheoir Seirbhísí Digiteacha. Ba cheart go bhfeidhmeodh an Comhordaitheoir Seirbhísí Digiteacha mar phointe teagmhála aonair maidir le gach ábhar a bhaineann le cur i bhfeidhm an Rialacháin seo don Choimisiún, don Bhord, do Chomhordaitheoirí Seirbhísí Digiteacha Ballstát eile, agus d’údaráis inniúla eile an Bhallstáit atá i gceist. Go háirithe, i gcás ina gcuirtear cúraimí faoin Rialachán seo ar iontaoibh údaráis inniúla i mBallstát ar leith, ba cheart don Chomhordaitheoir Seirbhísí Digiteacha comhordú agus dul i gcomhar leis na húdaráis sin i gcomhréir leis an dlí náisiúnta chun a gcúraimí faoi seach a leagan amach agus gan dochar do mheasúnú neamhspleách na n-údarás inniúil eile. Cé nach mbeidh sé i gceist aon fhorordú ordlathach a dhéanamh ar údaráis eile agus a gcúraimí á bhfeidhmiú acu, ba cheart don Chomhordaitheoir Seirbhísí Digiteacha a áirithiú go mbeidh na húdaráis inniúla ábhartha uile rannpháirteach go héifeachtach agus ba cheart dó measúnú orthu a thuairisciú go tráthúil i gcomhthéacs an chomhair maidir le maoirseacht agus forfheidhmiú ar leibhéal an Aontais. Ina theannta sin, sa bhreis ar na sásraí sonracha dá bhforáiltear sa Rialachán seo a mhéid a bhaineann le comhar ar an leibhéal Eorpach, ba cheart do na Ballstáit comhar a áirithiú freisin idir an Comhordaitheoir Seirbhísí Digiteacha agus údaráis inniúla eile arna n-ainmniú ar an leibhéal náisiúnta, i gcás inarb infheidhme, trí uirlisí iomchuí amhail acmhainní a chomhthiomsú, tascfhórsaí comhpháirteacha, imscrúduithe comhpháirteacha agus sásraí cúnaimh fhrithpháirtigh.

(111)

Tá ról ríthábhachtach ag an gComhordaitheoir Seirbhísí Digiteacha, chomh maith le húdaráis inniúla eile atá ainmnithe faoin Rialachán seo, chun éifeachtacht na gceart agus na n-oibleagáidí a leagtar síos sa Rialachán seo agus baint amach a chuspóirí a áirithiú. Dá réir sin, is gá a áirithiú go bhfuil na hacmhainní is gá ag na húdaráis sin, lena n-áirítear acmhainní airgeadais agus daonna, chun maoirseacht a dhéanamh ar na soláthraithe seirbhísí idirghabhálacha go léir a thagann faoina n-inniúlacht, ar mhaithe le saoránaigh uile an Aontais. I bhfianaise éagsúlacht na soláthraithe seirbhísí idirghabhálacha agus na húsáide a bhaineann siad as ardteicneolaíocht chun a seirbhísí a sholáthar, tá sé fíor-riachtanach freisin go mbeadh an líon riachtanach foirne agus saineolaithe ag a bhfuil sainscileanna agus ardacmhainní teicniúla ag an gComhordaitheoir Seirbhísí Digiteacha agus ag na húdaráis inniúla ábhartha agus go ndéanfaidh siad acmhainní airgeadais a bhainistiú go neamhspleách chun a gcúraimí a dhéanamh. Ina theannta sin, ba cheart a chur san áireamh i leibhéal na n-acmhainní méid, castacht agus an tionchar sochaíoch a d’fhéadfadh a bheith ag soláthraithe seirbhísí idirghabhálacha a thagann faoina n-inniúlacht, chomh maith le raon feidhme a gcuid seirbhísí ar fud an Aontais. Tá an Rialachán seo gan dochar don deis atá ag na Ballstáit sásraí cistiúcháin a bhunú a bheidh bunaithe ar tháille mhaoirseachta a ghearrtar ar sholáthraithe seirbhísí idirghabhálacha faoin dlí náisiúnta i gcomhréir le dlí an Aontais, sa mhéid go dtoibhítear í ar sholáthraithe seirbhísí idirghabhálacha a bhfuil príomhbhunaíocht acu sa Bhallstát i dtrácht, go bhfuil sí teoranta go docht don mhéid atá riachtanach agus comhréireach chun costais chomhall na gcúraimí arna dtabhairt do na húdaráis inniúla de bhun an Rialacháin seo a chumhdach, agus na cúraimí arna dtabhairt don Choimisiún á n-eisiamh, agus go n-áirithítear trédhearcacht leordhóthanach maidir le táillí maoirseachta a ghearradh agus úsáid an táille mhaoirseachta sin.

(112)

Ba cheart do na húdaráis inniúla sin arna n-ainmniú faoin Rialachán seo feidhmiú faoi neamhspleáchas iomlán ó chomhlachtaí príobháideacha agus poiblí, gan an oibleagáid ná an fhéidearthacht chun treoracha a lorg nó a fháil, lena n-áirítear ón rialtas, agus gan dochar do na dualgais shonracha le dul i gcomhar le húdaráis inniúla eile, na Comhordaitheoirí Seirbhísí Digiteacha, an Bord agus an Coimisiún. Ar an lámh eile, níor cheart go gciallódh neamhspleáchas na n-údarás sin, nach mbeidís faoi réir - i gcomhréir le bunreachtanna náisiúnta agus gan gnóthachtáil chuspóirí an Rialacháin seo a chur i mbaol - sásraí cuntasachta comhréireacha maidir le gníomhaíochtaí ginearálta na gComhordaitheoirí Seirbhísí Digiteacha, amhail a gcaiteachas airgeadais nó tuairisciú do na parlaimintí náisiúnta. Níor cheart ach oiread go gcuirfeadh an ceanglas maidir le neamhspleáchas cosc ar athbhreithniú breithiúnach a fheidhmiú, ná ar an bhféidearthacht dul i gcomhairle le húdaráis náisiúnta eile nó tuairimí a mhalartú leo go rialta, lena n-áirítear údaráis forfheidhmithe dlí, údaráis bainistithe géarchéime nó údaráis cosanta tomhaltóirí, i gcás inarb iomchuí, chun a chéile a chur ar an eolas faoi imscrúduithe atá ar siúl, gan difear a dhéanamh d’fheidhmiú a gcumhachtaí faoi seach.

(113)

Is féidir leis na Ballstáit feidhm mar Chomhordaitheoir Seirbhísí Digiteacha, nó cúraimí sonracha a shannadh d’údarás náisiúnta atá ann cheana, chun cur i bhfeidhm an Rialacháin seo a mhaoirsiú agus a fhorfheidhmiú, ar choinníoll go gcloíonn aon údarás ceaptha den sórt sin leis na ceanglais a leagtar síos sa Rialachán seo, i ndáil lena neamhspleáchas, mar shampla. Thairis sin, ní choisctear na Ballstáit i bprionsabal ó fheidhmeanna a chónascadh laistigh d’údarás reatha, i gcomhréir le dlí an Aontais. D’fhéadfaí a áireamh leis na bearta sin, inter alia, bac a chur ar dhífhostú an Uachtaráin nó comhalta boird de chomhlacht coláisteach in údarás reatha roimh dhul in éag a dtéarmaí oifige, ar an bhforas amháin gur tharla athchóiriú institiúideach a bhaineann le feidhmeanna éagsúla a chumasc laistigh d’údarás amháin, in éagmais aon rialacha a ráthaíonn nach gcuireann dífhostuithe den sórt sin neamhspleáchas agus neamhchlaontacht na gcomhaltaí sin i mbaol.

(114)

Ba cheart do na Ballstáit cumhachtaí leordhóthanacha agus bealaí chun imscrúdú agus forfheidhmiú éifeachtach a áirithiú a thabhairt don Chomhordaitheoir Seirbhísí Digiteacha, agus aon údarás inniúil eile arna ainmniú faoin Rialachán seo, i gcomhréir leis na cúraimí a thugtar dóibh. Áirítear leis sin an chumhacht atá ag údaráis inniúla bearta eatramhacha a ghlacadh i gcomhréir leis an dlí náisiúnta i gcás ina mbeadh riosca díobhála tromchúisí ann. Maidir le bearta eatramhacha den sórt sin, a bhféadfadh orduithe chun sárú líomhainte ar leith a fhoirceannadh nó a leigheas a bheith san áireamh iontu, níor cheart – nó go ndéanfar an cinneadh críochnaitheach – dul thar a bhfuil riachtanach chun a áirithiú go gcoiscfear díobháil thromchúiseach. Ba cheart na Comhordaitheoirí Seirbhísí Digiteacha a bheith in ann go háirithe faisnéis a chuardach agus a fháil atá lonnaithe ina gcríocha, lena n-áirítear i gcomhthéacs imscrúduithe comhpháirteacha, agus aird chuí ar an bhfíoras gur cheart don Chomhordaitheoir Seirbhísí Digiteacha sa Bhallstát eile sin bearta formhaoirseachta agus forfheidhmithe a bhaineann le soláthraí faoi dhlínse Ballstáit eile nó an Choimisiúin a ghlacadh, i gcás inarb ábhartha i gcomhréir leis na nósanna imeachta a bhaineann le comhar trasteorann, nó, i gcás inarb infheidhme, gur cheart don Choimisiún iad a ghlacadh.

(115)

Ba cheart do na Ballstáit na coinníollacha agus na teorainneacha mionsonraithe i gcomhair fheidhmiú cumhachtaí imscrúdaithe agus forfheidhmithe a gComhordaitheoirí Seirbhísí Digiteacha, agus údarás inniúil eile i gcás inarb ábhartha, faoin Rialachán seo, a leagan amach ina ndlí náisiúnta, i gcomhréir le dlí an Aontais agus go háirithe an Rialachán seo agus an Chairt.

(116)

Le linn do na cumhachtaí sin a bheith á bhfeidhmiú, ba cheart do na húdaráis inniúla sin na rialacha náisiúnta is infheidhme maidir le nósanna imeachta agus ábhair a chomhlíonadh, amhail an gá do réamhúdarú breithiúnach chun dul isteach in áitreabh áirithe agus i gcomhair pribhléid ghairmiúil dlí. Ba cheart do na forálacha sin a áirithiú, go háirithe, go mbeidh urraim do na cearta bunúsacha maidir le leigheas éifeachtach agus triail chóir, lena n-áirítear cearta cosanta, agus an ceart le hurraim a thabhairt don saol príobháideach. I dtaca leis sin, d’fhéadfadh na ráthaíochtaí dá bhforáiltear i ndáil le himeachtaí an Choimisiúin de bhun an Rialacháin seo a bheith mar phointe tagartha iomchuí. Ba cheart nós imeachta roimh ré, cóir agus neamhchlaonta a ráthú sula nglactar le haon chinneadh críochnaitheach, lena n-áirítear ceart éisteachta do na daoine lena mbaineann, agus an ceart le rochtain a fháil ar an gcomhad, fad is a bhíonn urraim do rúndacht ghairmiúil agus gnó, chomh maith leis an oibleagáid chun cúiseanna bríocha a thabhairt ar na cinntí. Níor cheart go gcoiscfí leis seo cearta a ghlacadh, áfach, i gcásanna práinne a bhfuil bunús iomchuí leo agus faoi réir coinníollacha agus socruithe nós imeachta iomchuí. Ba cheart don fheidhmiú cumhachta a bheith comhréireach freisin, inter alia, le cineál an tsáraithe nó an tsáraithe amhrasta agus leis an díobháil iarbhír nó fhéideartha fhoriomlán a tharla de bharr an tsáraithe nó an tsáraithe amhrasta. Ba cheart do na húdaráis inniúla fíorais agus cúinsí ábhartha uile an cháis a chur san áireamh, lena n-áirítear faisnéis arna bailiú ag údaráis inniúla i mBallstáit eile.

(117)

Ba cheart do na Ballstáit a áirithiú gur féidir smachtbhannaí a ghearradh de bharr sáruithe ar na hoibleagáidí a leagtar síos sa Rialachán seo agus é sin a dhéanamh ar bhealach éifeachtach, comhréireach agus athchomhairleach, agus cineál, tromchúis, atarlú agus fad an tsáraithe á gcur san áireamh, i bhfianaise an leasa phoiblí arna shaothrú, raon feidhme agus chineál na ngníomhaíochtaí a rinneadh, chomh maith le hacmhainn eacnamaíoch an tsáraitheora. Go háirithe, ba cheart a chur san áireamh leis na pionóis cibé a mhainníonn nó nach mainníonn an soláthraí seirbhísí idirghabhálacha lena mbaineann a oibleagáidí a thagann ón Rialachán seo a chomhlíonadh go córasach nó arís agus arís eile, chomh maith le, i gcás inarb ábhartha, líon faighteoirí na seirbhíse a ndéantar difear dóibh, cineál an tsáraithe a bheith déanta d’aon ghnó nó le faillí agus cibé atá nó nach bhfuil an soláthraí gníomhach i roinnt Ballstát. I gcás ina bhforáiltear leis an Rialachán seo d’uasmhéid fíneálacha nó d’íocaíocht phionósach thréimhsiúil, ba cheart feidhm a bheith ag an uasmhéid sin in aghaidh gach sáraithe ar an Rialachán seo agus gan dochar do mhodhnú na bhfíneálacha nó na n-íocaíochtaí pionósacha tréimhsiúla i gcás sáruithe sonracha. Ba cheart do na Ballstáit a áirithiú i ngach cás ar leith go mbeadh forchur fíneálacha nó íocaíochtaí pionósacha tréimhsiúla i ndáil le sáruithe éifeachtach, comhréireach agus athchomhairleach trí rialacha agus nósanna imeachta náisiúnta a bhunú i gcomhréir leis an Rialachán seo, agus na critéir maidir leis na coinníollacha ginearálta i dtaca leis na fíneálacha nó na híocaíochtaí pionósacha tréimhsiúla a fhorchur á gcur san áireamh.

(118)

Chun forfheidhmiú éifeachtach na n-oibleagáidí a leagtar síos sa Rialachán seo a áirithiú, ba cheart do dhaoine aonair nó d’eagraíochtaí ionadaíocha a bheith in ann aon ghearán a bhaineann le comhlíonadh na n-oibleagáidí sin a leagtar síos sa Rialachán seo a thaisceadh leis an gComhordaitheoir Seirbhísí Digiteacha sa chríoch ina bhfuair siad an tseirbhís, gan dochar do rialacha an Rialacháin seo maidir le leithdháileadh inniúlachtaí ná do na rialacha is infheidhme maidir le gearáin a láimhseáil i gcomhréir le prionsabail náisiúnta an dea-riaracháin. D’fhéadfadh gearáin léargas dílis a thabhairt ar ábhar imní a bhaineann le comhlíontacht soláthraí seirbhíse idirghabhálaí áirithe agus, ina theannta sin, an Comhordaitheoir Seirbhísí Digiteacha a chur ar an eolas faoi aon saincheisteanna trasghearrtha eile. Ba cheart don Chomhordaitheoir Seirbhísí Digiteacha leas a bhaint freisin as údaráis náisiúnta inniúla eile chomh maith le Comhordaitheoir Seirbhísí Digiteacha as Ballstát eile, agus go háirithe Comhordaitheoir de chuid an Bhallstáit ina bhfuil an soláthraí seirbhísí idirghabhálacha lena mbaineann bunaithe, má éilítear comhar trasteorann maidir leis an tsaincheist.

(119)

Ba cheart do na Ballstáit a áirithiú gur féidir le Comhordaitheoirí Seirbhísí Digiteacha bearta a dhéanamh atá éifeachtach maidir le haghaidh a thabhairt ar sháruithe tromchúiseacha agus comhsheasmhacha áirithe ar an Rialachán seo agus atá i gcomhréir leis na sáruithe sin. Go háirithe i gcás inar féidir leis na bearta sin difear a dhéanamh do chearta agus leasanna tríú páirtithe, de réir mar a bheidh go háirithe i gcás ina bhfuil an rochtain ar chomhéadain ar líne srianta, is iomchuí a cheangal go mbeadh na bearta faoi réir coimircí breise. Go háirithe, ba cheart deis éisteachta a thabhairt do thríú páirtithe dá bhféadfaí difear a dhéanamh agus níor cheart orduithe den sórt sin a eisiúint ach amháin nuair nach bhfuil na cumhachtaí chun bearta den sórt sin a ghlacadh ar fáil go réasúnach, mar a fhoráiltear le gníomhartha eile de dhlí an Aontais nó leis an dlí náisiúnta, mar shampla chun leasanna comhchoiteanna tomhaltóirí a chosaint, lena áirithiú go mbaintear go tapa leathanaigh ghréasáin ina bhfuil pornagrafaíocht leanaí nó ina bhfuil pornagrafaíocht leanaí á scaipeadh, nó chun rochtain ar sheirbhísí atá á n-úsáid ag tríú páirtí chun ceart maoine intleachtúla a shárú, a dhíchumasú.

(120)

Níor cheart d’ordú den sórt sin chun rochtain a shrianadh dul thar a bhfuil riachtanach chun a chuspóir a bhaint amach. Chun na críche sin, ba cheart dó a bheith sealadach agus ba cheart i bprionsabal é a chur faoi bhráid soláthraí seirbhísí idirghabhálacha, amhail an soláthraí seirbhíse óstála, an soláthraí seirbhíse idirlín nó an clár fearainn nó an cláraitheoir ábhartha, atá in ann go réasúnach an cuspóir sin a bhaint amach gan srianadh míchuí a chur ar rochtain ar fhaisnéis dhlíthiúil.

(121)

Gan dochar do na forálacha maidir leis an díolúine ó dhliteanas, dá bhforáiltear sa Rialachán seo i ndáil leis an bhfaisnéis a tharchuirtear nó a stóráiltear arna iarraidh sin d’faighteoir na seirbhíse, ba cheart soláthraí seirbhísí idirghabhálacha a bheith faoi dhliteanas i leith na ndamáistí a bhain d’fhaighteoirí na seirbhíse arb iad sárú ar na hoibleagáidí arna leagan amach sa Rialachán seo ag an soláthraí sin ba chúis leo. Ba cheart an cúiteamh sin a bheith i gcomhréir leis na rialacha agus na nósanna imeachta a leagtar amach sa dlí náisiúnta is infheidhme agus gan dochar d’fhéidearthachtaí eile maidir le sásamh atá ar fáil faoi na rialacha maidir le cosaint tomhaltóirí.

(122)

Ba cheart don Chomhordaitheoir Seirbhísí Digiteacha tuarascáil a fhoilsiú go rialta, ar a shuíomh gréasáin mar shampla, maidir leis na gníomhaíochtaí a dhéantar faoin Rialachán seo. Go háirithe, ba cheart an tuarascáil a fhoilsiú i bhformáid atá inléite ag meaisín agus ba cheart forléargas a bheith inti ar na gearáin a fuarthas agus ar an obair leantach a rinneadh orthu, amhail líon foriomlán na ngearán a fuarthas agus líon na ngearán as ar tháinig imscrúdú foirmiúil a oscailt nó tarchur chuig Comhordaitheoirí Seirbhísí Digiteacha eile, gan tagairt a dhéanamh do shonraí pearsanta ar bith. Ós rud é gur gcuirtear an Comhordaitheoir Seirbhísí Digiteacha ar an eolas freisin maidir le horduithe chun beart a dhéanamh i gcoinne inneachar neamhdhleathach nó chun faisnéis a chur ar fáil arna rialú ag an Rialachán seo tríd an gcóras comhroinnte faisnéise, ba cheart don Chomhordaitheoir Seirbhísí Digiteacha líon agus catagóirí orduithe den sórt sin arna gcur faoi bhráid soláthraithe seirbhísí idirghabhálacha arna n-eisiúint ag údaráis bhreithiúnacha agus riaracháin ina Bhallstát a áireamh ina thuarascáil bhliantúil.

(123)

Ar mhaithe le soiléireacht, simplíocht agus éifeachtacht, ba cheart na cumhachtaí chun maoirseacht a dhéanamh ar oibleagáidí faoin Rialachán seo agus chun iad a fhorfheidhmiú a thabhairt do na húdaráis inniúla sa Bhallstát ina bhfuil príomhbhunaíocht an tsoláthraí seirbhísí idirghabhálacha lonnaithe, is é sin, áit a bhfuil a cheannoifig nó a oifig chláraithe ag an soláthraí ina ndéantar na príomhfheidhmeanna airgeadais agus an rialú oibríochtúil a fheidhmiú. I dtaca le soláthraithe nach bhfuil bunaithe san Aontas ach a thairgeann seirbhísí san Aontas agus, dá bhrí sin, a thagann faoi raon feidhme an Rialacháin seo, ba cheart inniúlacht a bheith ag an mBallstát inar cheap na soláthraithe sin a n-ionadaí dlí, ag tabhairt feidhm ionadaithe dlí faoin Rialachán seo san áireamh. Ar mhaithe le cur i bhfeidhm éifeachtach an Rialacháin seo, ba cheart, áfach, go mbeadh inniúlacht ag gach Ballstát nó ag an gCoimisiún, i gcás inarb infheidhme, i leith soláthraithe a mhainnigh ionadaí dlíthiúil a ainmniú. Féadfaidh aon cheann de na húdaráis inniúla nó an Coimisiún an inniúlacht sin a fheidhmiú, ar choinníoll nach mbeidh an soláthraí faoi réir imeachtaí forfheidhmithe i leith na bhfíoras céanna ag údarás inniúil eile nó ag an gCoimisiún. Chun a áirithiú go n-urramófar prionsabal ne bis in idem, agus go háirithe chun a sheachaint go ngearrfar smachtbhannaí níos mó ná uair amháin ar an sárú céanna ar na hoibleagáidí a leagtar síos sa Rialachán seo, ba cheart do gach Ballstát a bhfuil sé ar intinn aige a inniúlacht a fheidhmiú i leith na soláthraithe sin na húdaráis eile go léir, lena n-áirítear an Coimisiún, a chur ar an eolas, gan aon mhoill mhíchuí, tríd an gcóras comhroinnte faisnéise a bhunaítear chun críocha an Rialacháin seo.

(124)

I bhfianaise an tionchair a d’fhéadfadh a bheith acu agus na ndúshlán a bhaineann le maoirseacht éifeachtach a dhéanamh orthu, tá gá le rialacha speisialta maidir le maoirseacht agus forfheidhmiú i ndáil le soláthraithe ardán an-mhór ar líne agus le soláthraithe inneall cuardaigh an-mhór ar líne. Ba cheart don Choimisiún a bheith freagrach, le tacaíocht ó údaráis inniúla náisiúnta i gcás inarb ábhartha, as formhaoirseacht agus forfheidhmiú poiblí saincheisteanna sistéamacha, amhail saincheisteanna a bhfuil tionchar leathan acu ar chomhleasanna fhaighteoirí na seirbhíse. Dá bhrí sin, ba cheart cumhachtaí eisiacha a bheith ag an gCoimisiún chun maoirseacht agus forfheidhmiú a dhéanamh ar na hoibleagáidí breise maidir le rioscaí sistéamacha a bhainistiú a fhorchuirtear ar sholáthraithe ardán an-mhór ar líne agus ar sholáthraithe inneall cuardaigh an-mhór ar líne leis an Rialachán seo. Ba cheart go mbeadh cumhachtaí eisiacha an Choimisiúin gan dochar do chúraimí áirithe riaracháin arna sannadh leis an Rialachán seo d’údaráis inniúla an Bhallstáit bunaíochta, amhail grinnfhiosrúchán taighdeoirí.

(125)

Ba cheart don Choimisiún agus do na húdaráis inniúla náisiúnta na cumhachtaí a bhaineann le maoirseacht a dhéanamh ar oibleagáidí díchill chuí, seachas na hoibleagáidí breise sin maidir le rioscaí sistéamacha a bhainistiú a fhorchuirtear leis an Rialachán seo ar sholáthraithe ardán an-mhór ar líne agus ar sholáthraithe inneall cuardaigh an-mhór ar líne a chomhroinnt idir an Coimisiún agus na húdaráis inniúla náisiúnta. Ar thaobh amháin, d’fhéadfadh an Coimisiún a bheith i riocht níos fearr, in a lán cásanna, chun aghaidh a thabhairt ar sháruithe sistéamacha a dhéanann na soláthraithe sin, amhail sáruithe a dhéanann difear do roinnt Ballstát nó sáruithe tromchúiseacha arís agus arís eile nó maidir le mainneachtain sásraí éifeachtacha a cheanglaítear leis an Rialachán seo a bhunú. Ar an taobh eile, d’fhéadfadh na húdaráis inniúla sa Bhallstát ina bhfuil príomhbhunaíocht soláthraí ardáin an-mhór ar líne nó innill cuardaigh an-mhór ar líne lonnaithe a bheith i riocht níos fearr chun aghaidh a thabhairt ar sháruithe aonair arna ndéanamh ag na soláthraithe sin, nach mbaineann aon saincheisteanna sistéamacha ná trasteorann leo. Ar mhaithe le héifeachtúlacht, chun dúbláil a sheachaint agus chun comhlíonadh phrionsabal ne bis in idem a áirithiú, ba cheart gur faoin gCoimisiún a bheadh sé a mheas más dóigh leis gurb iomchuí na hinniúlachtaí comhroinnte sin a fheidhmiú i gcás ar leith agus, a luaithe a thionscnóidh sé imeachtaí, níor cheart go mbeadh na Ballstáit in ann é sin a dhéanamh a thuilleadh. Ba cheart do na Ballstáit oibriú i ndlúthchomhar le chéile agus leis an gCoimisiún araon, agus ba cheart don Choimisiún comhoibriú go dlúth leis na Ballstáit, chun a áirithiú go bhfeidhmeoidh an córas maoirseachta agus forfheidhmithe a chuirtear ar bun leis an Rialachán seo ar bhealach rianúil agus éifeachtach.

(126)

Ba cheart rialacha an Rialacháin seo maidir le leithdháileadh inniúlachta a bheith gan dochar d’fhorálacha dhlí an Aontais agus do rialacha náisiúnta maidir leis an dlí idirnáisiúnta príobháideach a bhaineann le dlínse agus leis an dlí is infheidhme in ábhair shibhialta agus thráchtála, amhail imeachtaí a thionscnaíonn tomhaltóirí i gcúirteanna an Bhallstáit ina bhfuil sainchónaí orthu i gcomhréir le forálacha ábhartha dhlí an Aontais. Maidir leis na hoibleagáidí a fhorchuirtear leis an Rialachán seo ar sholáthraithe seirbhísí idirghabhálacha chun an t-údarás eisiúna a chur ar an eolas faoin éifeacht a thugtar do na horduithe chun gníomhú i gcoinne inneachar neamhdhleathach agus do na horduithe chun faisnéis a sholáthar, is maidir le maoirseacht ar fhorfheidhmiú na n-oibleagáidí sin amháin gur cheart feidhm a bheith ag na rialacha maidir le leithdháileadh inniúlachta agus níor cheart feidhm a bheith acu maidir le hábhair eile a bhaineann leis an ordú, amhail an inniúlacht chun an t-ordú a eisiúint.

(127)

I bhfianaise ábharthacht trasteorann agus trasearnála na seirbhísí idirghabhálacha, tá gá le hardleibhéal comhair chun a áirithiú go gcuirfear an Rialachán seo i bhfeidhm go comhsheasmhach agus go mbeidh fáil ar fhaisnéis ábhartha chun cúraimí forfheidhmithe a fheidhmiú tríd an gcóras comhroinnte faisnéise. Féadfaidh an comhar a bheith i bhfoirmeacha éagsúla ag brath ar na saincheisteanna atá i gceist, gan dochar do chleachtaí sonracha imscrúdaithe chomhpháirtigh. Is gá i gcás ar bith go gcuirfeadh an Comhordaitheoir Seirbhísí Digiteacha bunaíochta de chuid an tsoláthraí seirbhísí idirghabhálacha na Comhordaitheoirí Seirbhísí Digiteacha eile ar an eolas maidir le saincheisteanna, imscrúduithe agus gníomhaíochtaí a dhéanfar maidir le soláthraí den sórt sin. Thairis sin, i gcás ina bhfuil faisnéis ábhartha ag údarás inniúil i mBallstát le haghaidh imscrúdú arna dhéanamh ag na húdaráis inniúla sa Bhallstát bunaíochta, nó i gcás ina bhfuil sé in ann faisnéis den sórt sin atá lonnaithe ina chríoch a bhailiú, ar faisnéis í nach bhfuil rochtain ag na húdaráis inniúla sa Bhallstát bunaíochta uirthi, ba cheart don Chomhordaitheoir Seirbhísí Digiteacha sa tír cinn scríbe cúnamh tráthúil a thabhairt don Chomhordaitheoir Seirbhísí Digiteacha bunaíochta, lena n-áirítear trína chumhachtaí imscrúdaithe a fheidhmiú i gcomhréir leis na nósanna imeachta náisiúnta is infheidhme agus leis an gCairt. Ba cheart do sheolaí beart imscrúdaithe den sórt sin iad a chomhlíonadh agus a bheith faoi dhliteanas i gcás nach gcomhlíontar iad, agus ba cheart do na húdaráis inniúla sa Bhallstát bunaíochta a bheith in ann brath ar an bhfaisnéis a bailíodh trí chúnamh frithpháirteach, chun a áirithiú go gcomhlíonfar an Rialachán seo.

(128)

Ba cheart go mbeadh an Comhordaitheoir Seirbhísí Digiteacha sa tír cinn scríbe, go háirithe ar bhonn gearáin a fhaightear nó ionchur ó údaráis inniúla náisiúnta eile i gcás inarb iomchuí, nó an Bord i gcás saincheisteanna a bhaineann le trí Bhallstát ar a laghad, in ann a iarraidh ar an gComhordaitheoir Seirbhísí Digiteacha bunaíochta gníomhaíochtaí imscrúdaithe nó forfheidhmithe a dhéanamh maidir le soláthraí faoina inniúlacht. Ba cheart iarrataí den sórt sin ar ghníomhaíocht a bheith bunaithe ar fhianaise a bhfuil bunús maith léi a léiríonn go bhfuil sárú líomhnaithe ann a bhfuil tionchar diúltach aige ar chomhleasanna na seirbhíse ina Ballstát nó a bhfuil tionchar diúltach aige ar an tsochaí. Ba cheart don Chomhordaitheoir Seirbhísí Digiteacha bunaíochta a bheith in ann brath ar chúnamh frithpháirteach nó iarraidh ar Chomhordaitheoir iarrthach Seirbhísí Digiteacha teacht chuig imscrúdú comhpháirteach i gcás ina bhfuil gá le tuilleadh faisnéise chun cinneadh a dhéanamh, gan dochar don deis a iarraidh ar an gCoimisiún an cheist a mheas má tá cúis aige a bheith in amhras go bhféadfadh sárú sistéamach ag ardán an-mhór ar líne nó inneall cuardaigh an-mhór ar líne a bheith idir chamáin.

(129)

Ba cheart don Bhord a bheith in ann an cheist a tharchur chuig an gCoimisiún i gcás ina mbeadh easaontas ann maidir leis na measúnuithe nó na bearta a rinneadh nó atá beartaithe nó maidir le mainneachtain aon bhearta a ghlacadh i gcomhréir leis an Rialachán seo tar éis iarraidh ar chomhar trasteorann nó imscrúdú comhpháirteach a dhéanamh. I gcás ina measann an Coimisiún, ar bhonn na faisnéise arna cur ar fáil ag na húdaráis lena mbaineann, nach féidir leis na bearta atá beartaithe, lena n-áirítear an leibhéal fíneálacha atá beartaithe, forfheidhmiú éifeachtach na n-oibleagáidí a leagtar síos sa Rialachán seo a áirithiú, ba cheart don Choimisiún, dá réir sin, a bheith in ann a mhóramhras a chur in iúl agus a iarraidh ar an gComhordaitheoir Seirbhísí Digiteacha inniúil athmheasúnú a dhéanamh ar an ábhar agus na bearta is gá a dhéanamh chun a áirithiú go gcomhlíonfar an Rialachán seo laistigh de thréimhse shainithe. Tá an fhéidearthacht seo gan dochar do dhualgas ginearálta an Choimisiúin chun formhaoirseacht a dhéanamh ar chur i bhfeidhm, agus i gcás inar gá, forfheidhmiú dlí an Aontais faoi rialú Chúirt Bhreithiúnais an Aontais Eorpaigh i gcomhréir leis na Conarthaí.

(130)

Chun maoirseacht agus imscrúduithe trasteorann ar oibleagáidí a leagtar síos sa Rialachán seo, a bhfuil baint ag roinnt Ballstát leo, a éascú, ba cheart do Chomhordaitheoirí Seirbhísí Digiteacha bunaíochta a bheith in ann, tríd an gcóras comhroinnte faisnéise, a iarraidh ar Chomhordaitheoirí Seirbhísí Digiteacha eile teacht chuig imscrúdú comhpháirteach maidir le sárú líomhainte ar an Rialachán seo. Ba cheart do Chomhordaitheoirí Seirbhísí Digiteacha eile, agus d’údaráis inniúla eile i gcás inarb iomchuí, a bheith in ann páirt a ghlacadh san imscrúdú arna bheartú ag an gComhordaitheoir Seirbhísí Digiteacha bunaíochta, ach amháin má mheasann an Comhordaitheoir sin go bhféadfadh líon iomarcach údarás rannpháirteach difear a dhéanamh d’éifeachtacht an imscrúdaithe, agus gnéithe an tsáraithe líomhainte agus an easpa éifeachtaí díreacha ar fhaighteoirí na seirbhíse sna Ballstáit sin á gcur san áireamh. Féadfar a áireamh i ngníomhaíochtaí comhpháirteacha imscrúdaithe gníomhaíochtaí éagsúla a bheidh le comhordú ag an gComhordaitheoir Seirbhísí Digiteacha bunaíochta, i gcomhréir le hinfhaighteacht na n-údarás rannpháirteach, amhail cleachtaí comhordaithe bailithe sonraí, comhthiomsú acmhainní, tascfhórsaí, iarrataí comhordaithe ar fhaisnéis nó cigireachtaí comhchoiteanna ar áitribh. Ba cheart do na húdaráis inniúla uile a bhíonn rannpháirteach san imscrúdú comhpháirteach comhoibriú leis an gComhordaitheoir Seirbhísí Digiteacha bunaíochta, lena n-áirítear a gcumhachtaí imscrúdaithe a fheidhmiú laistigh dá gcríoch, i gcomhréir leis na nósanna imeachta náisiúnta is infheidhme. Ba cheart an t-imscrúdú comhpháirteach a thabhairt i gcrích laistigh de thréimhse ama ar leith le tuarascáil deiridh, agus rannchuidiú na n-údarás inniúil uile atá rannpháirteach á chur san áireamh. Chomh maith leis sin, féadfaidh an Bord, i gcás ina n-iarrfaidh ar a laghad triúr Comhordaitheoirí Seirbhísí Digiteacha sa tír cinn scríbe é, a mholadh don Chomhordaitheoir Seirbhísí Digiteacha bunaíochta imscrúdú comhpháirteach den sórt sin a thionscnamh agus tásca a thabhairt maidir lena eagrú. Chun dúsháinneacha a sheachaint, ba cheart go mbeadh an Bord in ann an t-ábhar a tharchur chuig an gCoimisiún i gcásanna sonracha, lena n-áirítear i gcásanna ina ndiúltaíonn an Comhordaitheoir Seirbhísí Digiteacha bunaíochta an t-imscrúdú a sheoladh agus i gcás nach n-aontaíonn an Bord leis an mbonn cirt a tugadh.

(131)

Chun a áirithiú go gcuirtear an Rialachán seo i bhfeidhm go comhsheasmhach, is gá grúpa comhairleach neamhspleách a bhunú ar leibhéal an Aontais, Bord Eorpach um Sheirbhísí Digiteacha, ar cheart dó tacaíocht a thabhairt don Choimisiún agus cuidiú chun gníomhaíochtaí na gComhordaitheoirí Seirbhísí Digiteacha a chomhordú. Ba cheart don Bhord a bheith comhdhéanta de Chomhordaitheoirí Seirbhísí Digiteacha, i gcás inar ceapadh iad, gan dochar don fhéidearthacht go dtabharfadh na Comhordaitheoirí Seirbhísí Digiteacha cuireadh ina chruinnithe do thoscairí ad hoc ó údaráis inniúla eile a bhfuil iontaoibh orthu i leith cúraimí sonracha faoin Rialachán seo nó go gceapfaidís toscairí ad hoc, i gcás ina bhfuil gá leis sin de bhun a leithdháilte náisiúnta cúraimí agus inniúlachtaí. I gcás rannpháirtithe iomadúla ó Bhallstát amháin, ba cheart go mbeadh an ceart vótála fós teoranta d’ionadaí amháin in aghaidh an Bhallstáit.

(132)

Ba cheart don Bhord rannchuidiú le dearcadh comhchoiteann a bhaint amach san Aontas maidir le cur i bhfeidhm comhsheasmhach an Rialacháin seo agus leis an gcomhar i measc údaráis inniúla, lena n-áirítear trí chomhairle a chur ar an gComhairle agus ar na Comhordaitheoirí Seirbhísí Digiteacha maidir le himscrúdú iomchuí agus bearta forfheidhmithe, go háirithe maidir le soláthraithe ardán an-mhór ar líne nó soláthraithe inneall cuardaigh an-mhór ar líne agus ag féachaint, go háirithe, don tsaoirse atá ag na soláthraithe seirbhísí idirghabhálacha seirbhísí a sholáthar ar fud an Aontais. Ba cheart don Bhord rannchuidiú freisin le teimpléid agus cóid iompair a dhréachtú agus le hanailís a dhéanamh ar threochtaí ginearálta atá ag teacht chun cinn i bhforbairt seirbhísí digiteacha san Aontas, lena n-áirítear trí thuairimí nó moltaí a eisiúint maidir le hábhair a bhaineann le caighdeáin.

(133)

Chun na críche sin, ba cheart don Bhord a bheith in ann glacadh le tuairimí, le hiarrataí agus le moltaí arna gcur faoi bhráid Comhordaitheoirí Seirbhísí Digiteacha nó údaráis náisiúnta inniúla eile. Cé nach bhfuil sé ceangailteach ó thaobh dlí de, ba cheart an cinneadh chun atreorú uaidh sin a mhíniú i gceart agus d’fhéadfadh an Coimisiún é a thabhairt san áireamh agus measúnú á dhéanamh aige ar chomhlíontacht na mBallstát lena mbaineann leis an Rialachán seo.

(134)

Ba cheart don Bhord ionadaithe na gComhordaitheoirí Seirbhísí Digiteacha agus údaráis inniúla eile féideartha a thabhairt le chéile faoi chathaoirleacht an Choimisiúin, d’fhonn measúnú a áirithiú ar ábhair arna sheoladh isteach chuige i ngné iomlán Eorpach. I bhfianaise gnéithe cothrománacha féideartha a bhféadfadh ábharthacht a bheith leo i gcomhair creataí rialála eile ar leibhéal an Aontais, ba cheart deis a thabhairt don Bhord dul i gcomhar le comhlachtaí, oifigí, gníomhaireachtaí agus grúpaí comhairleacha eile de chuid an Aontais a bhfuil freagracht orthu i réimsí amhail comhionannas, lena n-áirítear comhionannas inscne, agus neamh-idirdhealú, cosaint sonraí, cumarsáid leictreonach, seirbhísí closamhairc, calaoisí in aghaidh bhuiséad an Aontais a bhrath agus a imscrúdú a mhéid a bhaineann le dleachtanna custaim, cosaint tomhaltóirí, nó dlí na hiomaíochta, de réir mar is gá chun a chúraimí a fheidhmiú.

(135)

Ba cheart don Choimisiún, tríd an gCathaoirleach, a bheith rannpháirteach sa Bhord gan cearta vótála. Tríd an gCathaoirleach, ba cheart don Choimisiún a áirithiú go leagtar síos clár oibre do na cruinnithe i gcomhréir le hiarrataí chomhaltaí an Bhoird mar a leagtar síos sna rialacha nós imeachta agus i gcomhréir le dualgais an Bhoird mar a leagtar síos sa Rialachán seo.

(136)

I bhfianaise an ghá atá ann tacaíocht a áirithiú do ghníomhaíochtaí an Bhoird, ba cheart don Bhord a bheith in ann brath ar shaineolas agus ar acmhainní daonna an Choimisiúin agus na n-údarás náisiúnta inniúil. Ba cheart socruithe oibríochtúla sonracha i gcomhair fheidhmiú inmheánach an Bhoird a shonrú a thuilleadh i rialacha nós imeachta an Bhoird.

(137)

Mar gheall ar an tábhacht a bhaineann le hardáin an-mhór ar líne nó le hinnill chuardaigh an-mhór ar líne, i bhfianaise a rochtana agus a dtionchair, d’fhéadfaí difear a dhéanamh do líon suntasach faighteoirí seirbhísí i mBallstáit éagsúla agus d’fhéadfadh díobhálacha móra sochaíocha a bheith i gceist má chliseann orthu na hoibleagáidí sonracha is infheidhme maidir leo a chomhlíonadh, agus d’fhéadfadh clistí den sórt sin a bheith an-chasta le sainaithint agus le haghaidh a thabhairt orthu. Ar an gcúis sin, ba cheart don Choimisiún, i gcomhar leis na Comhordaitheoirí Seirbhísí Digiteacha agus leis an mBord, saineolas agus inniúlachtaí an Aontais a fhorbairt maidir leis an maoirseacht a dhéantar ar ardáin an-mhór ar líne nó innill chuardaigh an-mhór ar líne. Dá bhrí sin, ba cheart don Choimisiún a bheith in ann saineolas agus acmhainní na n-údarás sin a chomhordú, agus brath orthu, mar shampla trí anailís a dhéanamh, ar bhonn buan nó sealadach, ar threochtaí sonracha nó ar shaincheisteanna a thagann chun cinn maidir le ceann amháin de na hardán an-mhór ar líne nó na hinnill chuardaigh an-mhór ar líne, nó níos mó ná sin. Ba cheart do na Ballstáit comhoibriú leis an gCoimisiún chun cumais den sórt sin a fhorbairt, lena n-áirítear trí phearsanra a thabhairt ar iasacht i gcás inarb iomchuí, agus trí rannchuidiú le hacmhainn choiteann mhaoirseachta de chuid an Aontais a chruthú. Chun saineolas agus cumais an Aontais a fhorbairt, féadfaidh an Coimisiún leas a bhaint freisin as saineolas agus as cumais na Faireachlainne maidir le Geilleagar na nArdán ar Líne arna bunú le Cinneadh ón gCoimisiún an 26 Aibreán 2018 maidir leis an ngrúpa saineolaithe a chur ar bun don Fhaireachlann maidir le Geilleagar na nArdán ar Líne, sainchomhlachtaí ábhartha, chomh maith le hionaid barr feabhais. Féadfaidh an Coimisiún cuireadh a thabhairt do shaineolaithe a bhfuil saineolas sonrach acu, lena n-áirítear go háirithe taighdeoirí grinnfhiosraithe, d’ionadaithe ó ghníomhaireachtaí agus ó chomhlachtaí de chuid an Aontais, d’ionadaithe tionscail, do chomhlachais a dhéanann ionadaíocht ar úsáideoirí nó ar an tsochaí shibhialta, d’eagraíochtaí idirnáisiúnta, do shaineolaithe ón earnáil phríobháideach, chomh maith le geallsealbhóirí eile.

(138)

Ba cheart don Choimisiún a bheith in ann imscrúdú a dhéanamh ar a thionscnamh féin ar sháruithe i gcomhréir leis na cumhachtaí dá bhforáiltear sa Rialachán seo, lena n-áirítear trí rochtain ar shonraí a iarraidh, trí fhaisnéis a iarraidh nó trí chigireachtaí a dhéanamh, agus trí bhrath ar thacaíocht na gComhordaitheoirí Seirbhísí Digiteacha. I gcás ina léirítear leis an maoirseacht a dhéanann na húdaráis náisiúnta inniúla ar sháruithe líomhnaithe aonair ag soláthraithe ardán an-mhór ar líne nó soláthraithe inneall cuardaigh an-mhór ar líne, go bhfuil saincheisteanna sistéamacha ann, amhail saincheisteanna a bhfuil tionchar leathan acu ar chomhleasanna fhaighteoirí na seirbhíse, ba cheart do Chomhordaitheoirí Seirbhísí Digiteacha a bheith in ann, ar bhonn iarraidh chuí-réasúnaithe, na saincheisteanna sin a chur faoi bhráid an Choimisiúin. Ba cheart a bheith san iarraidh sin, ar a laghad, na fíorais agus na himthosca uile is gá a thacaíonn leis an sárú líomhainte agus lena chineál sistéamach. Ag brath ar thoradh a mheasúnaithe féin, ba cheart don Choimisiún a bheith in ann na bearta imscrúdaithe agus forfheidhmithe is gá a dhéanamh de bhun an Rialacháin seo, lena n-áirítear, i gcás inarb ábhartha, imscrúdú a sheoladh nó bearta eatramhacha a ghlacadh.

(139)

Chun a chúraimí a dhéanamh go héifeachtach, ba cheart don Choimisiún corrlach lánroghnach a choimeád maidir leis an gcinneadh imeachtaí a thionscnamh in aghaidh soláthraithe ardán an-mhór ar líne nó soláthraithe inneall cuardaigh an-mhór ar líne. A luaithe is a thionscnaíonn an Coimisiún na himeachtaí, ba cheart cosc a chur ar na Comhordaitheoirí Seirbhísí Digiteacha bunaíochta lena mbaineann a gcumhachtaí iniúchta agus forfheidhmithe a fheidhmiú i leith iompar bainteach sholáthraí an ardáin an-mhór ar líne nó an innill cuardaigh an-mhór ar líne lena mbaineann, chun dúbláil, neamhréireachtaí agus rioscaí ó dhearcadh an phrionsabail ne bis in idem a sheachaint. Ba cheart, áfach, don Choimisiún a bheith in ann rannchuidiú aonair nó comhpháirteach san imscrúdú a iarraidh ar Comhordaitheoirí Seirbhísí Digiteacha. I gcomhréir le dualgas an chomhair dhílis, ba cheart don Chomhordaitheoir Seirbhísí Digiteacha a dhícheall a dhéanamh chun iarrataí comhréireacha ón gCoimisiún a bhfuil bonn cirt leo a chomhlíonadh i gcomhthéacs imscrúdaithe. Ina theannta sin, ba cheart don Chomhordaitheoir Seirbhísí Digiteacha bunaíochta, mar aon leis an mBord agus aon Chomhordaitheoirí Seirbhísí Digiteacha eile i gcás inarb ábhartha, an fhaisnéis agus an cúnamh uile is gá a chur ar fáil don Choimisiún chun go mbeidh sé in ann a chúraimí a chur i gcrích go héifeachtach, lena n-áirítear faisnéis arna bailiú i gcomhthéacs bailiú sonraí nó cleachtaí rochtana ar shonraí, sa mhéid nach n-eisiatar sin leis an mbunús dlí ar dá réir a bailíodh an fhaisnéis. Os a choinne sin, ba cheart don Choimisiún an Comhordaitheoir Seirbhísí Digiteacha bunaíochta agus an Bord a choinneáil ar an eolas maidir le feidhmiú a chumhachtaí agus go háirithe nuair atá rún aige an t-imeacht a thionscnamh agus a chumhachtaí imscrúdaithe a fheidhmiú. Thairis sin, nuair a chuireann an Coimisiún a réamhchinnti in iúl do na soláthraithe ardán an-mhór ar líne nó do na soláthraithe inneall cuardaigh an-mhór ar líne lena mbaineann, lena n-áirítear aon ní a chuireann sé ina aghaidh, ba cheart dó iad a chur in iúl don Bhord freisin. Ba cheart don Bhord a thuairimí a thabhairt ar na hagóidí agus ar an measúnú a rinne an Coimisiún, agus ba cheart don Choimisiún an tuairim sin a chur san áireamh sa réasúnú is bonn leis an gcinneadh críochnaitheach ón gCoimisiún.

(140)

I bhfianaise na ndúshlán áirithe a d’fhéadfadh teacht chun cinn agus iarracht á déanamh chun comhlíontacht soláthraithe ardán an-mhór ar líne nó soláthraithe inneall cuardaigh an-mhór ar líne a áirithiú agus an tábhacht a bhaineann leis sin a dhéanamh go héifeachtach, agus a méid agus a dtionchar agus na díobhálacha a d’fhéadfaidís a chruthú á gcur san áireamh, ba cheart roinnt cumhachtaí láidre imscrúdaithe agus forfheidhmithe a bheith ag an gCoimisiún ionas go mbeifear in ann imscrúdú, forfheidhmiú agus faireachán a dhéanamh ar chomhlíonadh rialacha áirithe a leagtar síos sa Rialachán seo, agus urraim iomlán don cheart bunúsach éisteacht a fháil agus rochtain a bheith ann ar an gcomhad i gcomhthéacs na n-imeachtaí forfheidhmithe, do phrionsabal na comhréireachta agus do chearta agus leasanna na bpáirtithe dá ndéantar difear.

(141)

Ba cheart don Choimisiún a bheith in ann an fhaisnéis is gá a iarraidh chun cur chun feidhme éifeachtach na n-oibleagáidí a leagtar síos sa Rialachán seo agus comhlíonadh éifeachtach na n-oibleagáidí sin a áirithiú ar fud an Aontais. Go háirithe, ba cheart go mbeadh rochtain ag an gCoimisiún ar aon doiciméid, sonraí agus faisnéis ábhartha is gá chun iniúchtaí a oscailt agus a reáchtáil agus chun faireachán a dhéanamh ar chomhlíontacht leis na hoibleagáidí ábhartha a leagtar síos sa Rialachán seo, gan beann ar cén duine a bhfuil na doiciméid ina sheilbh, na sonraí nó an fhaisnéis atá i gceist, agus gan beann ar a bhfoirm nó a bhformáid, an bealach a stóráiltear iad, nó an áit bheacht ina stóráiltear iad. Ba cheart don Choimisiún a bheith in ann a cheangal go díreach, trí iarraidh chuí-réasúnaithe ar fhaisnéis, go ndéanfaidh soláthraí an ardáin an-mhór ar líne nó an innill cuardaigh an-mhór ar líne lena mbaineann, chomh maith le haon duine nádúrtha nó dlítheanach eile atá ag gníomhú chun críoch a bhaineann lena dtrádáil, lena ngnó, lena gceird nó lena ngairm agus a d’fhéadfadh a bheith ar an eolas le réasún faoi fhaisnéis a bhaineann leis an sárú amhrasta nó leis an sárú, de réir mar is infheidhme, aon fhianaise, sonraí agus faisnéis ábhartha a sholáthar. Ina theannta sin, ba cheart don Choimisiún a bheith in ann aon fhaisnéis ábhartha a iarraidh ó aon údarás, comhlacht nó gníomhaireacht phoiblí laistigh den Bhallstát chun críocha an Rialacháin seo. Ba cheart don Choimisiún a bheith in ann a cheangal go mbeadh rochtain agus mínithe ag teastáil trí chumhachtaí imscrúdaithe a fheidhmiú, amhail iarrataí ar fhaisnéis nó agallaimh, a bhaineann le doiciméid, sonraí, faisnéis, bunachair sonraí agus algartaim daoine ábhartha, agus agallamh a chur, le toiliú uathu, ar aon duine nádúrtha nó dlítheanach a bhféadfadh faisnéis úsáideach a bheith acu agus na ráitis a dhéantar a thaifeadadh trí aon mhodh teicniúil. Ba cheart an Coimisiún a chumhachtú freisin chun tabhairt faoi imscrúduithe den sórt sin de réir mar is gá chun na forálacha ábhartha den Rialachán seo a fhorfheidhmiú. Tá sé mar aidhm ag na cumhachtaí imscrúdaitheacha sin a bheith comhlántach leis an bhféidearthacht don Choimisiún cúnamh a iarraidh ar Chomhordaitheoirí Seirbhísí Digiteacha agus údaráis Ballstát eile, mar shampla trí fhaisnéis a sholáthar nó i bhfeidhmiú na gcumhachtaí sin.

(142)

Is féidir le bearta eatramhacha a bheith ina n-uirlis thábhachtach lena áirithiú, cé go bhfuil imscrúdú ar siúl, nach mbeidh an sárú atá á imscrúdú ina chúis le damáiste tromchúiseach d’fhaighteoirí na seirbhíse. Is uirlis thábhachtach iad chun forbairtí a sheachaint, ar forbairtí iad ar dheacair iad a aisiompú le cinneadh ón gCoimisiún i ndeireadh na n-imeachtaí. Ba cheart an chumhacht a bheith ag an gCoimisiún, dá bhrí sin, chun bearta idirlinne a fhorchur le cinneadh i gcomhthéacs imeachtaí a thionscnaítear d’fhonn go bhféadfaí cinneadh maidir le neamhchomhlíonadh a ghlacadh. Ba cheart feidhm a bheith ag an gcumhacht sin i gcásanna ina bhfuil cinneadh prima facie déanta ag an gCoimisiún gur sháraigh soláthraí ardán an-mhór ar líne nó soláthraí inneall cuardaigh an-mhór ar líne oibleagáidí faoin Rialachán seo. Níor cheart feidhm a bheith ag cinneadh lena bhforchuirtear bearta idirlinne ach ar feadh tréimhse shonraithe, go dtí go dtabharfaidh an Coimisiún na himeachtaí i gcrích, sin nó go ceann tréimhse shocraithe ar féidir í a athnuachan a mhéid is gá agus is iomchuí.

(143)

Ba cheart don Choimisiún na gníomhaíochtaí riachtanacha a dhéanamh chun faireachán a dhéanamh ar chur chun feidhme agus ar chomhlíonadh éifeachtach na n-oibleagáidí a leagtar síos sa Rialachán seo. I measc na ngníomhaíochtaí sin, ba cheart an cumas saineolaithe neamhspleácha seachtracha, agus iniúchóirí, a cheapadh a bheith san áireamh chun cabhrú leis an gCoimisiún sa phróiseas sin, lena n-áirítear, i gcás inarb infheidhme, saineolaithe ó údaráis inniúla na mBallstát, amhail údaráis um chosaint sonraí nó um chosaint tomhaltóirí. Agus iniúchóirí á gceapadh ag an gCoimisiún, ba cheart dó uainíocht leordhóthanach a áirithiú.

(144)

Ba cheart don chomhlíontacht leis na hoibleagáidí ábhartha a fhorchuirtear faoin Rialachán seo a bheith in-fhorfheidhmithe trí bhíthin fíneálacha agus íocaíochtaí pionóis tréimhsiúla. Chuige sin, ba cheart leibhéil iomchuí fíneálacha agus íocaíochtaí pionósacha tréimhsiúla a leagan síos freisin i dtaca le neamhchomhlíonadh na n-oibleagáidí agus le sárú ar na rialacha nós imeachta faoi réir tréimhsí teorann iomchuí, i gcomhréir le prionsabail na comhréireachta agus ne bis in idem. Ba cheart don Choimisiún agus do na húdaráis náisiúnta ábhartha a n-iarrachtaí forfheidhmithe a chomhordú chun a áirithiú go n-urramófar na prionsabail sin. Go háirithe, ba cheart don Choimisiún aon fhíneálacha agus aon phionóis a fhorchuirtear ar an duine dlítheanach céanna i leith na bhfíoras céanna a chur san áireamh trí chinneadh críochnaitheach in imeachtaí a bhaineann le sárú ar rialacha eile de chuid an Aontais nó ar rialacha náisiúnta, chun a áirithiú go bhfuil na fíneálacha agus na pionóis fhoriomlána arna bhforchur comhréireach agus go bhfreagraíonn siad do thromchúis na sáruithe a rinneadh. Beidh gach cinneadh a dhéanfaidh an Coimisiún faoin Rialachán seo faoi réir athbhreithniú ag Cúirt Bhreithiúnais an Aontais Eorpaigh i gcomhréir le CFAE. Ba cheart dlínse neamhtheoranta a bheith ag Cúirt Bhreithiúnais an Aontais Eorpaigh maidir le fíneálacha agus íocaíochtaí pionósacha i gcomhréir le hAirteagal 261 CFAE.

(145)

I bhfianaise na n-éifeachtaí suntasacha sochaíocha a d’fhéadfadh a bheith ag sárú na n-oibleagáidí breise chun rioscaí sistéamacha a bhainistiú nach bhfuil feidhm acu ach amháin maidir le hardáin an-mhór ar líne agus innill chuardaigh an-mhór ar líne agus chun aghaidh a thabhairt ar na hábhair imní sin maidir le beartas poiblí, is gá foráil a dhéanamh maidir le córas feabhsaithe chun maoirseacht a dhéanamh ar aon ghníomhaíocht a dhéantar chun sáruithe ar an Rialachán seo a fhoirceannadh agus a leigheas go héifeachtach. Dá bhrí sin, a luaithe a dhearbhaítear sárú ar cheann d’fhorálacha an Rialacháin seo nach bhfuil feidhm acu ach amháin maidir le hardáin an-mhór ar líne nó innill chuardaigh an-mhór ar líne agus, i gcás inar gá, a ghearrtar smachtbhanna mar thoradh ar an sárú sin, ba cheart don Choimisiún a iarraidh ar sholáthraí an ardáin sin nó an innill cuardaigh sin plean gníomhaíochta mionsonraithe a tharraingt chun éifeacht an tsáraithe amach anseo a leigheas agus an plean gníomhaíochta sin a chur in iúl laistigh d’amlíne arna socrú ag an gCoimisiún, do na Comhordaitheoirí Seirbhísí Digiteacha, don Choimisiún agus don Bhord. Ba cheart don Choimisiún, agus tuairim an Bhoird á cur san áireamh aige, a shuíomh an leor na bearta a áirítear sa phlean gníomhaíochta chun aghaidh a thabhairt ar an sárú, agus é á chur san áireamh aige freisin an áirítear nó nach n-áirítear i measc na mbeart atá beartaithe cloí leis an gcód iompair ábhartha. Ba cheart don Choimisiún faireachán a dhéanamh freisin ar aon bheart a dhéanann soláthraí ardáin an-mhór ar líne nó innill cuardaigh an-mhór ar líne lena mbaineann mar a leagtar amach ina phlean gníomhaíochta, agus iniúchadh neamhspleách ar an soláthraí á chur san áireamh freisin. Más rud é, tar éis chur chun feidhme an phlean gníomhaíochta, go measann an Coimisiún fós nár leigheasadh an sárú ina iomláine, nó murar cuireadh an plean gníomhaíochta ar fáil nó má mheastar nach bhfuil sé oiriúnach, ba cheart dó a bheith in ann aon chumhachtaí imscrúdaithe nó forfheidhmithe a úsáid de bhun an Rialacháin seo, lena n-áirítear an chumhacht chun íocaíochtaí pionósacha tréimhsiúla a fhorchur agus tús a chur leis an nós imeachta chun rochtain ar an tseirbhís sháraitheach a dhíchumasú.

(146)

Ba cheart deis a thabhairt do sholáthraí an ardáin an-mhór ar líne nó do sholáthraí an innill cuardaigh an-mhór ar líne lena mbaineann agus daoine eile atá faoi réir fheidhmiú cumhachta an Choimisiúin a bhféadfaí difear a dhéanamh dá leasanna mar gheall ar chinneadh, a mbarúlacha a sheoladh isteach roimh ré, agus ba cheart na cinntí a ghlactar a phoibliú go forleathan. Agus cearta cosanta na bpáirtithe lena mbaineann á n-áirithiú, go háirithe, an ceart rochtana ar an gcomhad, tá sé fíor-riachtanach go ndéanfaí faisnéis rúnda a chosaint. Thairis sin, agus rúndacht na faisnéise á hurramú, ba cheart don Choimisiún a áirithiú go nochtar aon fhaisnéis a mbraitear uirthi chun críche a chinnidh a mhéid is a cheadaíonn do sheolaí an chinnidh na fíorais agus na breithnithe ba chúis leis an gcinneadh a thuiscint.

(147)

Chun cur i bhfeidhm agus forfheidhmiú comhchuibhithe an Rialacháin seo a choimirciú, beidh sé tábhachtach a áirithiú go bhfuil an fhaisnéis uile is gá ag na húdaráis náisiúnta, lena n-áirítear na cúirteanna náisiúnta, chun a áirithiú nach dtagann a gcinntí salach ar chinneadh arna ghlacadh ag an gCoimisiún faoin Rialachán seo. Tá sé sin gan dochar d’Airteagal 267 CFAE.

(148)

Chun an Rialachán seo a fhorfheidhmiú go héifeachtach agus chun faireachán a dhéanamh air, tá gá le malartú faisnéise fíor-ama leanúnach idir na Comhordaitheoirí Seirbhísí Digiteacha, an Bord agus an Coimisiún, bunaithe ar na sreabha faisnéise agus ar na nósanna imeachta a leagtar amach sa Rialachán seo. D’fhéadfadh sé gur ghá d’údaráis inniúla eile rochtain a bheith acu ar an gcóras sin freisin, i gcás inarb iomchuí. Ag an am céanna, ós rud é go bhféadfadh an fhaisnéis a mhalartófar a bheith rúnda nó go bhféadfadh sonraí pearsanta a bheith i gceist léi, ba cheart an fhaisnéis sin a chosaint ar rochtain neamhúdaraithe, i gcomhréir leis na cuspóirí ar chucu a bailíodh an fhaisnéis. Ar an gcúis sin, ba cheart gach cumarsáid idir na húdaráis sin a dhéanamh ar bhonn córas iontaofa slán comhroinnte faisnéise, ar cheart a mhionsonraí a leagan síos i ngníomh cur chun feidhme. Féadfaidh an córas comhroinnte faisnéise a bheith bunaithe ar uirlisí an mhargaidh inmheánaigh atá ann cheana, a mhéid is féidir leo cuspóirí an Rialacháin seo a chomhlíonadh ar bhealach cost-éifeachtúil.

(149)

Gan dochar do chearta faighteoirí seirbhísí dul i dteagmháil le hionadaí i gcomhréir le Treoir (AE) 2020/1828 ó Pharlaimint na hEorpa agus ón gComhairle (33) nó aon chineál ionadaíochta eile faoin dlí náisiúnta, ba cheart an ceart a bheith ag faighteoirí seirbhísí sainordú a thabhairt do dhuine dlítheanach nó do chomhlacht poiblí a gcearta, dá bhforáiltear sa Rialachán seo, a fheidhmiú. D’fhéadfaí a áireamh sna cearta sin, cearta maidir le fógraí a chur isteach, agóid a dhéanamh maidir leis na cinntí a dhéanann soláthraithe seirbhísí idirghabhálacha, agus gearáin a thaisceadh in aghaidh na soláthraithe as an Rialachán seo a shárú. Tá saineolas agus inniúlacht ar leith ag comhlachtaí, eagraíochtaí agus comhlachais áirithe maidir le cinntí um modhnóireacht inneachair earráidigh nó gan údar a bhrath agus a mharcáil, agus féadfaidh tionchar dearfach a bheith ag a ngearán thar ceann fhaighteoirí na seirbhíse ar an tsaoirse chun tuairimí a nochtadh agus faisnéis a fháil i gcoitinne agus ba cheart, dá bhrí sin, do sholáthraithe ardán ar líne déileáil leis na gearáin sin gan moill mhíchuí.

(150)

Ar mhaithe le héifeachtacht agus le héifeachtúlacht, ba cheart don Choimisiún meastóireacht ghinearálta a dhéanamh ar an Rialachán seo. Go háirithe, ba cheart don mheastóireacht ghinearálta sin aghaidh a thabhairt, inter alia , ar raon feidhme na seirbhísí a chumhdaítear leis an Rialachán seo, ar an idirghníomhú le gníomhartha dlíthiúla eile, ar thionchar an Rialacháin seo ar fheidhmiú an mhargaidh inmheánaigh, go háirithe maidir le seirbhísí digiteacha, cur chun feidhme na gcód iompair, an oibleagáid ionadaí dlíthiúil atá bunaithe san Aontas a ainmniú, éifeacht na n-oibleagáidí ar fhiontair bheaga agus ar mhicrifhiontair, ar éifeachtacht an tsásra maoirseachta agus forfheidhmithe agus ar an tionchar ar an gceart chun tuairimí a nochtadh agus faisnéis a fháil. Ina theannta sin, chun ualaí díréireacha a sheachaint agus chun éifeachtacht leanúnach an Rialacháin seo a áirithiú, ba cheart don Choimisiún meastóireacht a dhéanamh ar thionchar na n-oibleagáidí a leagtar amach sa Rialachán seo ar fhiontair bheaga agus mheánmhéide laistigh de thrí bliana ó thús chur i bhfeidhm an Rialacháin seo agus meastóireacht a dhéanamh ar raon feidhme na seirbhísí a chumhdaítear leis an Rialachán seo, go háirithe i gcás ardáin an-mhór ar líne agus innill chuardaigh an-mhór ar líne, agus ar an idirghníomhaíocht le gníomhartha dlíthiúla eile laistigh de thrí bliana ón dáta a dtiocfaidh sé i bhfeidhm.

(151)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun teimpléid a leagan síos maidir le foirm, inneachar agus mionsonraí eile tuarascálacha maidir le modhnóireacht inneachair, chun méid na táille maoirseachta bliantúla a ghearrfar ar sholáthraithe ardán an-mhór ar líne agus ar sholáthraithe inneall cuardaigh an-mhór ar líne a bhunú, socruithe praiticiúla do na himeachtaí a leagan síos, na héisteachtaí agus an nochtadh idirbheartaithe faisnéise a rinneadh i gcomhthéacs na maoirseachta, imscrúduithe, forfheidhmithe agus monatóireachta i leith soláthraithe ardán an-mhór ar líne agus soláthraithe inneall cuardaigh an-mhór ar líne, chomh maith le socruithe praiticiúla agus oibríochtúla maidir le feidhmiú an chórais comhroinnte faisnéise agus a idir-inoibritheacht le córais ábhartha eile a leagan síos. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (34).

(152)

Chun cuspóirí an Rialacháin seo a chomhlíonadh, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún chun an Rialachán seo a fhorlíonadh, i leith na gcritéar chun ardáin an-mhór ar líne agus innill chuardaigh an-mhór ar líne, na céimeanna nós imeachta, modheolaíochtaí agus teimpléid tuairiscithe le haghaidh na n-iniúchtaí agus na sonraíochtaí teicniúla le haghaidh iarrataí ar rochtain a shainaithint agus an mhodheolaíocht mhionsonraithe agus nós imeachtaí le haghaidh táille mhaoirseachta a shocrú. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (35). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(153)

Leis an Rialachán seo urramaítear na cearta bunúsacha a shainaithnítear sa Chairt agus na cearta bunúsacha ar phrionsabail ghinearálta de dhlí an Aontais iad. Dá réir sin, ba cheart an Rialachán seo a léirmhíniú agus a chur i bhfeidhm i gcomhréir leis na cearta bunúsacha sin, lena n-áirítear an tsaoirse chun tuairimí a nochtadh agus faisnéis a fháil, chomh maith le saoirse agus iolrachas na meán. Le linn dóibh na cumhachtaí a leagtar amach sa Rialachán seo a fheidhmiú, ba cheart do gach údarás poiblí lena mbaineann, i gcásanna ina bhfuil coinbhleacht idir na cearta bunúsacha ábhartha, cothromaíocht chóir a bhaint amach idir na cearta lena mbaineann, i gcomhréir le prionsabal na comhréireachta.

(154)

I bhfianaise raon feidhme agus thionchar na rioscaí sochaíocha a d’fhéadfadh a bheith mar thoradh ar ardáin an-mhór ar líne agus innill chuardaigh an-mhór ar líne, ar an ngá atá le haghaidh a thabhairt ar na rioscaí sin mar ábhar tosaíochta agus ar acmhainneacht na soláthraithe na bearta is gá a dhéanamh, tá údar maith le teorainn a chur leis an tréimhse a mbeidh feidhm ag an Rialachán seo ina diaidh maidir le soláthraithe na seirbhísí sin.

(155)

Ós rud é nach féidir leis na Ballstáit cuspóirí an Rialacháin seo, eadhon rannchuidiú le feidhmiú ceart an mhargaidh inmheánaigh agus timpeallacht shábháilte, intuartha agus iontaofa ar líne a áirithiú ina dtugtar cosaint do na cearta bunúsacha a chumhdaítear sa Chairt, a ghnóthú go leordhóthanach mar gheall nach féidir leo an comhchuibhiú agus an comhar is gá a bhaint amach trí fheidhmiú astu féin, agus, de bharr raon feidhme críochach agus pearsanta, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán sin thar a bhfuil riachtanach chun na cuspóirí sin a ghnóthú.

(156)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (36) agus thug sé a thuairim uaidh an 10 Feabhra 2021 (37),

(1)

I gcomhréir le Cinneadh (AE) 2021/1117 ón gComhairle (2), síníodh an Prótacal maidir le cur chun feidhme an Chomhaontaithe Comhpháirtíochta Iascaigh idir Poblacht na Gabúine agus an Comhphobal Eorpach (2021-2026) (3) (“an Prótacal”) an 29 Meitheamh 2021, faoi réir a thabhairt i gcrích tráth níos déanaí.

(2)

Tá feidhm ag an bPrótacal ar bhonn sealadach ó dháta a shínithe.

(3)

Is é is cuspóir don Chomhaontú Comhpháirtíochta Iascaigh idir Poblacht na Gabúine agus an Comhphobal Eorpach (4) (“an Comhaontú”) agus don Phrótacal cur ar chumas an Aontais agus Phoblacht na Gabúine (“an Ghabúin”) oibriú níos dlúithe le chéile chun forbairt an bheartais iascaigh inbhuanaithe a chur chun cinn, agus chun saothrú acmhainní iascaigh i limistéar iascaireachta na Gabúine agus san Aigéan Atlantach a éascú ar bhealach freagrach, agus chun tacú le dálaí córa oibre in earnáil na hiascaireachta san am céanna.

(4)

Ba cheart an Prótacal a fhormheas.

(5)

Le hAirteagal 9 den Chomhaontú, bunaítear Comhchoiste atá freagrach as faireachán a dhéanamh ar chur i bhfeidhm an Chomhaontaithe. Thairis sin, de bhun Airteagal 19(5) den Phrótacal, féadfaidh an Comhchoiste leasuithe áirithe ar an bPrótacal a ghlacadh. D’fhonn glacadh na leasuithe sin a éascú, ba cheart go dtabharfaí de chumhacht don Choimisiún, faoi réir coinníollacha sonracha substainteacha agus nós imeachta a chomhlíonadh, iad a fhormheas thar ceann an Aontais faoi nós imeachta simplithe.

(6)

Ba cheart don Chomhairle seasamh an Aontais maidir le leasuithe atá beartaithe don Phrótacal a chinntiú. Ba cheart don Choimisiún na leasuithe atá beartaithe a fhormheas, thar ceann an Aontais, mura rud é go ndéanann mionlach blocála de na Ballstáit agóid i gcoinne na leasuithe i gcomhréir le hAirteagal 16(4) den Chonradh ar an Aontas Eorpach.

(7)

Ba cheart an Prótacal a theacht i bhfeidhm a luaithe is féidir i bhfianaise na tábhachta eacnamaíche a bhaineann le gníomhaíochtaí iascaireachta an Aontais i limistéar iascaireachta na Gabúine agus an gá atá ann fad tréimhse bhearnaithe na ngníomhaíochtaí sin a laghdú oiread is féidir,

(1)

Is galar víreasach tógálach é fiabhras Afracach na muc a bhíonn ar mhuc-ainmhithe atá ar coimeád agus ar mhuc-ainmhithe fiáine agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

Glacadh Rialachán Cur Chun Feidhme (AE) 2021/605 ón gCoimisiún (2) faoi chuimsiú Rialachán (AE) 2016/429, agus leagtar síos leis bearta speisialta rialaithe galar maidir le fiabhras Afracach na muc atá le cur i bhfeidhm ar feadh tréimhse theoranta ama ag na Ballstáit a liostaítear in Iarscríbhinn I a ghabhann leis (na Ballstáit lena mbaineann), i gcriosanna srianta I, II agus III a liostaítear san Iarscríbhinn sin.

(3)

Na limistéir a liostaítear mar chriosanna srianta I, II agus III in Iarscríbhinn I a ghabhann le Rialachán Cur Chun Feidhme (AE) 2021/605, tá siad bunaithe ar staid eipidéimeolaíoch fhiabhras Afracach na muc san Aontas. Is le Rialachán Cur Chun Feidhme (AE) 2022/1911 ón gCoimisiún (3) a leasaíodh Iarscríbhinn I a ghabhann le Rialachán Cur Chun Feidhme (AE) 2021/605 go deireanach tar éis athruithe sa staid eipidéimeolaíoch a mhéid a bhaineann leis an ngalar sin sa Ghearmáin agus san Iodáil. Ó dháta glactha an Rialacháin Cur Chun Feidhme sin, tá athrú tagtha ar an staid eipidéimeolaíoch maidir leis an ngalar sin i mBallstáit áirithe lena mbaineann.

(4)

Aon leasú ar chriosanna srianta I, II agus III in Iarscríbhinn I a ghabhann le Rialachán Cur Chun Feidhme (AE) 2021/605, ba cheart iad a bheith bunaithe ar an staid eipidéimeolaíoch a mhéid a bhaineann le fiabhras Afracach na muc sna limistéir atá buailte ag an ngalar sin agus ar staid eipidéimeolaíoch fhoriomlán fhiabhras Afracach na muc sa Bhallstát lena mbaineann, ar an leibhéal riosca maidir le leathadh breise an ghalair sin, ar phrionsabail agus critéir atá bunaithe ar an eolaíocht i dtaca le criosú a shainiú go geografach de bharr fhiabhras Afracach na muc, agus ar threoirlínte an Aontais a comhaontaíodh leis na Ballstáit ag an mBuanchoiste um Plandaí, Ainmnithe, Bia agus Beatha, treoirlínte atá ar fáil ar shuíomh gréasáin an Choimisiúin (4). Ina theannta sin, ba cheart caighdeáin idirnáisiúnta a chur san áireamh sna leasuithe sin, caighdeáin amhail Cód um Shláinte na nAinmhithe Talún ón Eagraíocht Dhomhanda um Shláinte Ainmhithe (WOAH) (5), agus ba cheart an bonn cirt a thug údaráis inniúla náisiúnta na mBallstát lena mbaineann leis an gcriosú a chur san áireamh freisin.

(5)

Le Rialachán Tarmligthe 2020/689 ón gCoimisiún (6) forlíontar na rialacha i dtaca le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair i gcatagóirí A, B agus C i Rialachán Cur Chun Feidhme (AE) 2018/1882 ón gCoimisiún (7). Go háirithe, déantar foráil in Airteagal 9 de Rialachán Tarmligthe (AE) 2020/689 maidir le bearta áirithe chun ainmhí nó grúpa ainmhithe a aicmiú mar chás amhrasta nó deimhnithe de ghalar liostaithe, lena n-áirítear fiabhras Afracach na muc.

(6)

Le Rialachán Tarmligthe 2020/687 ón gCoimisiún (8) forlíontar na rialacha i dtaca le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair i gcatagóirí A, B agus C i Rialachán Cur Chun Feidhme (AE) 2018/1882 ón gCoimisiún. Go háirithe, déantar foráil in Airteagail 63 go 66 de Rialachán Tarmligthe (AE) 2020/687 maidir le bearta áirithe atá le glacadh i gcás dearbhú oifigiúil ar ráig galair i gcatagóir A i measc ainmhithe fiáine, lena n-áirítear fiabhras Afracach na muc i measc muc-ainmhithe fiáine. Leis na forálacha sin déantar foráil, go háirithe, maidir le crios ionfhabhtaithe a bhunú, maille le toirmisc ar ghluaiseachtaí ainmhithe fiáine de speicis liostaithe agus táirgí de bhunadh ainmhíoch díobh.

(7)

I mí Bealtaine 2022, chuir an Iodáil an Coimisiún ar an eolas faoi stad fhiabhras Afracach na muc ina críoch faoi láthair, tar éis cás amhrasta den ghalar sin i muc-ainmhí fiáin i gCúige Rieti i Réigiún Lazio. Agus úsáid á baint as prionsabal an réamhchúraim, chuir údarás inniúil an Bhallstáit sin cóireáil ar chás amhrasta fhiabhras Afracach na muc amhail is dá mba chás deimhnithe d’fhiabhras Afracach na muc é, agus bhunaigh sé crios ionfhabhtaithe dá bhforáiltear i gcás dearbhú oifigiúil an ghalair sin i Rialachán Tarmligthe (AE) 2020/687 agus i Rialachán Cur Chun Feidhme (AE) 2021/605.

(8)

I mí Dheireadh Fómhair 2022, chuir an Iodáil in iúl don Choimisiún go léiríonn na bearta rialaithe galar leanúnacha agus mionsonraithe agus an faireachas éighníomhach ar mhuc-ainmhithe atá ar coimeád agus ar mhuc-ainmhithe fiáine nach bhfuil víreas Afracach fhiabhras na muc á scaipeadh i gcúige Rieti, agus go bhfuil údarás inniúil na hIodáile in ann a chinneadh nár cheart cás amhrasta fhiabhras Afracach na muc i gcúige Rieti a mheas mar chás deimhnithe d’fhiabhras Afracach na muc i gcomhréir le hAirteagal 9(2), pointe (b), de Rialachán Tarmligthe (AE) 2020/689, toisc, in ainneoin gur sainaithníodh aigéad núicléasach a bhaineann go sonrach leis an ngalar i dtorthaí tástálacha ar an ainmhí, nár léirigh an t-ainmhí aon chomharthaí cliniciúla a bhí comhsheasmhach leis an ngalar agus gur cuireadh aon nasc eipidéimeolaíoch le riail amhrasta eile as an áireamh.

(9)

Ina theannta sin, bhí dáta glactha Rialachán Cur Chun Feidhme (AE) 2022/1911 ann, bhí ráigeanna nua d’fhiabhras Afracach na muc ann i muc-ainmhithe fiáine sa Ghearmáin. Ina theannta sin, tá feabhas tagtha ar an staid eipidéimeolaíoch i gcriosanna áirithe a liostaítear mar chriosanna srianta I agus III sa Pholainn a mhéid a bhaineann le muc-ainmhithe atá ar coimeád agus muc-ainmhithe fiáine.

(10)

I mí Dheireadh Fómhair 2022, tugadh faoi deara go raibh roinnt ráigeanna d’fhiabhras Afracach na muc ann i muc-ainmhithe fiáine i stát Brandenburg sa Ghearmáin, i limistéar a liostaítear faoi láthair mar chrios srianta II in Iarscríbhinn I a ghabhann le Rialachán Cur Chun Feidhme (AE) 2021/605, áit atá dlúth le limistéar atá gar do Stát Brandenburg a liostaítear mar chrios srianta I san Iarscríbhinn sin faoi láthair. Na ráigeanna nua sin d’fhiabhras Afracach na muc i muc-ainmhithe fiáine, tá leibhéal méadaithe riosca ag baint leo, rud ba cheart a léiriú in Iarscríbhinn I a ghabhann le Rialachán Cur Chun Feidhme (AE) 2021/605. Dá réir sin, ba cheart teorainneacha reatha chriosanna srianta I agus II a leasú chun na ráigeanna sin a bhí ann le déanaí a chur san áireamh.

(11)

Tar éis na ráigeanna d’fhiabhras Afracach na muc a bhí ann le déanaí i muc-ainmhithe fiáine i stát Brandenburg sa Ghearmáin, agus an staid eipidéimeolaíoch reatha a mhéid a bhaineann le fiabhras Afracach na muc san Aontas á cur san áireamh, rinneadh criosú sa Bhallstát sin a athmheasúnú agus a thabhairt cothrom le dáta i gcomhréir le hAirteagail 5, 6 agus 7 de Rialachán Cur Chun Feidhme (AE) 2021/605. Ina theannta sin, na bearta bainistithe riosca a bhí i bhfeidhm, rinneadh iad a athmheasúnú agus a thabhairt cothrom le dáta. Ba cheart na hathruithe sin a léiriú in Iarscríbhinn I a ghabhann le Rialachán Cur Chun Feidhme (AE) 2021/605.

(12)

Thairis sin, agus aird á tabhairt ar éifeachtacht na mbeart rialaithe galar maidir le fiabhras Afracach na muc i gcás muc-ainmhithe atá ar coimeád i gcriosanna áirithe srianta III a liostaítear in Iarscríbhinn I a ghabhann le Rialachán Cur Chun Feidhme (AE) 2021/605 atá á gcur i bhfeidhm sa Pholainn i gcomhréir le Rialachán Tarmligthe (AE) 2020/687 ón gCoimisiún, agus go háirithe na bearta sin a leagtar síos in Airteagail 22, 25 agus 40 de, agus i gcomhréir leis na bearta maolaithe riosca maidir le fiabhras Afracach na muc a leagtar amach i gCód WOAH, criosanna áirithe i réigiúin Lubelskie, Podkarpackie, Wielkopolskie agus Lubuskie sa Pholainn, ar limistéir iad a liostaítear faoi láthair mar chriosanna srianta II in Iarscríbhinn I a ghabhann le Rialachán Cur Chun Feidhme (AE) 2021/605, ba cheart iad a liostú mar chrios srianta II anois san Iarscríbhinn sin, toisc nach raibh aon ráig d’fhiabhras Afracach na muc ann i muc-ainmhithe atá ar coimeád i gcriosanna srianta III sin le 12 mhí anuas, cé go bhfuil an galar fós ann i muc-ainmhithe fiáine. Ba cheart na criosanna srianta III sin a liostú feasta mar chriosanna srianta II agus staid eipidéimeolaíoch fhiabhras Afracach na muc atá ann faoi láthair á cur san áireamh.

(13)

Chomh maith leis sin, agus aird á tabhairt ar éifeachtacht na mbeart rialaithe galar maidir le fiabhras Afracach na muc i gcás muc-ainmhithe atá ar coimeád i gcriosanna srianta I a liostaítear in Iarscríbhinn I a ghabhann le Rialachán Cur Chun Feidhme (AE) 2021/605 atá á gcur i bhfeidhm sa Pholainn i gcomhréir le Rialachán Tarmligthe (AE) 2020/687, agus go háirithe na bearta sin a leagtar síos in Airteagail 64, 65 agus 67 de, agus i gcomhréir leis na bearta maolaithe riosca maidir le fiabhras Afracach na muc a leagtar amach i gCód WOAH, criosanna áirithe i réigiúin Podkarpackie, Łódzkie agus Śląskie sa Pholainn, ar réigiúin iad a liostaítear faoi láthair mar chriosanna srianta III in Iarscríbhinn I a ghabhann le Rialachán Cur Chun Feidhme (AE) 2021/605, ba cheart iad a scriosadh mar chriosanna srianta I anois san Iarscríbhinn sin, toisc nach raibh aon ráig d’fhiabhras Afracach na muc ann i muc-ainmhithe atá ar coimeád nó i muc-ainmhithe fiáine sna criosanna srianta I sin le 12 mhí anuas. Ba cheart criosanna srianta I a scriosadh anois ón Iarscríbhinn sin chun staid eipidéimeolaíoch fhiabhras Afracach na muc atá ann faoi láthair a chur san áireamh.

(14)

Ina theannta sin, ar bhonn na faisnéise agus na mbonn cirt a fuarthas ón Iodáil, ag cur san áireamh go háirithe críochnú an imscrúdaithe eipidéimeolaíoch agus éifeachtacht na mbeart rialaithe galar maidir le fiabhras Afracach na muc, agus aird á tabhairt ar staid fhabhrach fhiabhras Afracach na muc i muc-ainmhithe fiáine i réigiún Lazio agus ar na bearta rialaithe galar arna gcur chun feidhme go cuí ag an Iodáil, chun aon chur isteach nach bhfuil gá leis ar thrádáil a chosc, is iomchuí anois criosanna srianta I agus II i gcúige Rieti a scriosadh ó Iarscríbhinn I a ghabhann le Rialachán Cur Chun Feidhme (AE) 2021/605 chun staid reatha eipidéimeolaíochta fhiabhras Afracach na muc sa Bhallstát sin a chur san áireamh.

(15)

Ar mhaithe leis na forbairtí is déanaí i staid eipidéimeolaíoch fhiabhras Afracach na muc san Aontas a chur san áireamh, agus ar mhaithe le dul i ngleic leis na rioscaí a bhaineann le leathadh an ghalair sin ar bhealach réamhghníomhach, ba cheart criosanna srianta nua de mhéid leordhóthanach a chríochú sa Gearmáin agus sa Pholainn, agus ba cheart iad a liostú mar chriosanna srianta I agus II in Iarscríbhinn I a ghabhann le Rialachán Cur Chun Feidhme (AE) 2021/605. Chomh maith leis sin, ba cheart codanna áirithe de chrios srianta I a scriosadh ón Iarscríbhinn sin don Pholainn. Ó tharla go bhfuil an staid a mhéid a bhaineann le fiabhras Afracach na muc an-dinimiciúil san Aontas, tugadh aird ar staid eipidéimeolaíoch na limistéar máguaird nuair a bhí na criosanna srianta nua sin á gcríochú.

(16)

I bhfianaise phráinn na staide eipidéimeolaíche san Aontas a mhéid a bhaineann le leathadh fhiabhras Afracach na muc, tá sé tábhachtach go dtiocfaidh na leasuithe atá le déanamh ag an Rialachán Cur Chun Feidhme seo ar Iarscríbhinn I a ghabhann le Rialachán Cur Chun Feidhme (AE) 2021/605 i bhfeidhm a luaithe is féidir.

(17)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,