(1)

De bhun Airteagal 13 de Rialachán (AE) 2021/2115, áiritheoidh na Ballstáit go gcoinneofar gach limistéar talmhaíochta, lena n-áirítear talamh nach n-úsáidtear a thuilleadh chun críoch táirgthe, i ndea-riocht talmhaíochta agus comhshaoil agus socróidh siad, ar an leibhéal náisiúnta nó réigiúnach, na híoschaighdeáin d’fheirmeoirí agus tairbhithe eile le haghaidh gach ceann de na caighdeáin maidir le dea-riocht talmhaíochta agus comhshaoil talún (caighdeán GAEC) a liostaítear in Iarscríbhinn III a ghabhann leis an Rialachán sin i gcomhréir le príomhchuspóir na gcaighdeán dá dtagraítear san Iarscríbhinn sin. Beidh caighdeáin GAEC infheidhme ón mbliain éilimh 2023 ar aghaidh, cé is moite de GAEC 2 nach bhféadfadh a bheith infheidhme ach amháin ón mbliain éilimh 2024 nó 2025 ar aghaidh, má tá údar cuí leis.

(2)

Sa Teachtaireacht uaidh “An tslándáil bia a chosaint agus athléimneacht na gcóras bia a threisiú” (2), chuir an Coimisiún i láthair iarmhairtí tromchúiseacha ionradh na Rúise ar an Úcráin ar an tslándáil bia ar fud an domhain. Spreag ionradh na Rúise ar an Úcráin borradh mór tobann ar phraghsanna tráchtearraí agus tá tionchar aige ar sholáthar agus éileamh táirgí talmhaíochta ar an leibhéal domhanda. Go háirithe, tá an t-aschur domhanda cruithneachta i mbaol mar gheall ar an turraing soláthair de thoradh sciar na hÚcráine agus na Rúise i margaí cruithneachta agus mar gheall ar an turraing i gcostais táirgthe, go háirithe i gcás gáis nádúrtha, leasacháin nítrigine agus ocsaigine. Tá leibhéal ard éiginnteachtaí ann maidir le staid an tsoláthair bia ar fud an domhain, ar cúis imní é maidir leis an tslándáil bia ar fud an domhain. Chun rannchuidiú le haghaidh a thabhairt ar an staid seo go tráthúil tríd an soláthar bia a choinneáil ar bun, ba cheart acmhainneacht táirgthe bia talmhaíochta an Aontais a choinneáil ar bun, agus ag an céanna inbhuanaitheacht mheántéarmach agus fhadtéarmach an tsoláthair bia a áirithiú trí leanúint leis an aistriú chuig táirgeadh bia inbhuanaithe mar a leagtar amach sa Straitéis “ón bhFeirm go dtí an Forc” agus sa Straitéis Bhithéagsúlachta.

(3)

Maidir le caighdeán 7 GAEC “uainíocht na mbarr i dtalamh arúil, ach amháin i gcás barra a fhásann faoi uisce” agus maidir leis an gcéad cheanglas faoi chaighdeán 8 GAEC “an sciar íosta den limistéar talmhaíochta atá dírithe ar réimsí nó gnéithe neamhtháirgiúla”, a liostaítear in Iarscríbhinn III a ghabhann le Rialachán (AE) 2021/2115, atá infheidhme ón mbliain éilimh 2023 ar aghaidh, tá tionchar acu araon ar úsáid na talún arúla chun críoch táirgthe. Trí bhíthin íoscheanglais a leagan síos maidir leis an éagsúlú le himeacht ama agus thar spás i dtaca le barra éagsúla a fhás, d’fhonn acmhainn na hithreach a chaomhnú agus torthúlacht na hithreach a fheabhsú chun táirgiúlacht fhadtéarmach a áirithiú, d’fhéadfadh sé go mbeadh tionchar ag caighdeán 7 GAEC ar roghanna barr na bhfeirmeoirí. Trína cheangal go mbeidh sciar íosta den limistéar talmhaíochta dírithe ar réimsí nó gnéithe neamhtháirgiúla chun feabhas a chur ar an mbithéagsúlacht ar an bhfeirm is gá le haghaidh éiceachórais shláintiúla agus tháirgiúla, de bhun an chéad cheanglais faoi chaighdeán 8 GAEC, féadfaidh feirmeoirí, sa bhreis ar na gnéithe tírdhreacha a bheith ann, sciar áirithe den talamh arúil a fhágáil bán chun críoch bithéagsúlachta.

(4)

I bhfianaise an ghá atá ann aghaidh a thabhairt ar na hábhair imní maidir le slándáil bia a bhaineann le gnéithe infhaighteachta agus inacmhainneachta bia ar fud an domhain agus chun acmhainneacht táirgthe bia an Aontais a choinneáil ar bun, agus rannchuidiú á dhéanamh le spriocanna an Chomhaontaithe Ghlais don Eoraip ag an am céanna, go háirithe an Straitéis “ón bhFeirm go dtí an Forc” agus an Straitéis Bhithéagsúlachta, is iomchuí, dá bhrí sin, ar bhonn eisceachtúil, solúbthacht a bheith ag feirmeoirí chun úsáid a bhaint as an talamh arúil atá ar fáil dóibh chun bia a tháirgeadh, agus tionchair dhiúltacha na roghanna sin ar an gcomhshaol agus ar an athrú aeráide á maolú ag an am céanna. Dá bhrí sin, ba cheart a údarú do na Ballstáit, i gcás na bliana éilimh 2023, maolú ar chur i bhfeidhm chaighdeán 7 GAEC agus an chéad cheanglais faoi chaighdeán 8 GAEC a liostaítear in Iarscríbhinn III a ghabhann le Rialachán (AE) 2021/2115 mar a shainmhíníonn na Ballstáit iad ina bPleananna Straitéiseacha CBT. Ós rud é gurb é is aidhm don mhaolú rannchuidiú le haghaidh a thabhairt ar ábhair imní maidir le slándáil bia sa ghearrthéarmach, maidir leis an talamh arúil nach mbeadh dírithe ar réimsí neamhtháirgiúla mar thoradh ar an maolú ar an gcéad cheanglas faoi chaighdeán 8 GAEC a liostaítear in Iarscríbhinn III a ghabhann le Rialachán (AE) 2021/2115 mar a shainmhíníonn na Ballstáit iad ina bPleananna Straitéiseacha CBT, is iomchuí a bhunú nár cheart an talamh sin a úsáid chun arbhar Indiach agus pónairí soighe a fhás, ós rud é nach mbíonn na barra sin ceaptha chun bia a tháirgeadh. Thairis sin, ba cheart do na Ballstáit a bhainfidh úsáid as aon cheann de na maoluithe ar chaighdeáin 7 nó 8 GAEC úsáid na mbarr le haghaidh táirgeadh bia a chur chun cinn i gcoitinne, mar aon le húsáid na n-éiciscéimeana agus na mbeart agra-chomhshaoil-aeráide atá clársceidealaithe ina bPleananna Straitéiseacha CBT arb é is cuspóir dóibh feabhas a chur ar an mbithéagsúlacht ar an bhfeirm agus acmhainn na hithreach a chaomhnú.

(5)

I bhfianaise a thábhachtaí atá caighdeáin 7 agus 8 GAEC réamhluaite do na cuspóirí chun acmhainn na hithreach a chaomhnú agus feabhas a chur ar an mbithéagsúlacht ar an bhfeirm mar chuid d’inbhuanaitheacht fhadtéarmach na hearnála agus chun acmhainneacht an táirgthe bia a choinneáil ar bun, beidh an maolú teoranta don bhliain éilimh 2023 agus ní dhéanfaidh sé difear do na rialacha sna blianta tar éis 2023 agus ba cheart é a bheith srianta don mhéid a bhfuil fíorghá leis chun aghaidh a thabhairt ar na hábhair imní maidir leis an tslándáil bia ar fud an domhain. Dá bhrí sin, na trí cheanglas eile faoi chaighdeán 8 GAEC a liostaítear in Iarscríbhinn III a ghabhann le Rialachán (AE) 2021/2115, lena n-áirítear an ceanglas maidir le gnéithe tírdhreacha a choinneáil, tá siad fós infheidhme le haghaidh na bliana éilimh 2023 mar chosaint i dtreo phríomhchuspóir an chaighdeáin feabhas a chur ar an mbithéagsúlacht ar an bhfeirm.

(6)

Maidir leis an bhféidearthacht maolú ar chur i bhfeidhm na gcaighdeán GAEC sin mar a shainmhíníonn na Ballstáit iad ina bPleananna Straitéiseacha CBT, tá sí gan dochar don oibleagáid de bhun Airteagal 109(2), pointe (a)(i), de Rialachán (AE) 2021/2115 atá ar na Ballstáit a áireamh ina bPleananna Straitéiseacha CBT tuairisc ar chur chun feidhme agus ar eilimintí gaolmhara gach ceann de na caighdeáin GAEC a liostaítear in Iarscríbhinn III a ghabhann leis an Rialachán sin.

(7)

Ós rud é go bhfuil caighdeáin GAEC mar chuid de choinníollacha bunlíne na n-éiciscéimeana agus na ngealltanas agra-chomhshaoil, na ngealltanas a bhaineann leis an aeráid agus na ngealltanas bainistíochta eile, is iomchuí rialacha a leagan síos maidir le hurraim na bunlíne i gcás ina mbainfidh Ballstát úsáid as na maoluithe chun caighdeán 7 GAEC nó an chéad cheanglas faoi chaighdeán 8 GAEC a chur i bhfeidhm. Chun cobhsaíocht na bPleananna Straitéiseacha CBT a áirithiú agus uaillmhian na n-idirghabhálacha a chosaint, ar cuid iad d’ailtireacht ghlas an chomhbheartais talmhaíochta (CBT) ó 2023 ar aghaidh, ba cheart an bhunlíne a fhágáil gan athrú gan beann ar chur i bhfeidhm an mhaolaithe. Go háirithe, is iomchuí gur cheart ceanglais bhunlíne chaighdeán 7 GAEC nó an chéad cheanglas faoi chaighdeán 8 GAEC a urramú fós ar mhaithe le tacaíocht a fháil faoi idirghabhálacha i gcás ina n-áirítear nó ina bhforbraítear leis na gealltanais na ceanglais bhunlíne sin.

(8)

Tá sé fíor-riachtanach faireachán a dhéanamh ar na tionchair a bheidh ag na maoluithe sin ar an tslándáil bia ar fud an domhain agus ar an gcomhshaol agus ar an athrú aeráide, agus ba cheart do na Ballstáit, dá bhrí sin, measúnú a dhéanamh agus tuairisciú don Choimisiún maidir le cur chur chun feidhme na maoluithe sin.

(9)

Chun a áirithiú go bhfuil na maoluithe a údaraítear leis an Rialachán seo éifeachtach i bhfianaise a gcuspóra, agus ós rud é go ndéanfaidh feirmeoirí a gcinntí síolaithe d’fhómhar 2023 ó shamhradh 2022 ar aghaidh, ba cheart an cinneadh maidir le húsáid na maoluithe a dhéanamh go pras. Dá bhrí sin, ba cheart do na Ballstáit a gcinntí a dhéanamh agus fógra a thabhairt faoi sin don Choimisiún laistigh de 30 lá ón lá a thiocfaidh an Rialachán seo i bhfeidhm trí bhíthin an chórais atá bunaithe ar an teicneolaíocht faisnéise arna chur ar fáil ag an gCoimisiún de bhun Rialachán Cur Chun Feidhme (AE) 2017/1185 ón gCoimisiún (3). Ba cheart na cinntí a áireamh sna Pleananna Straitéiseacha CBT ar an gcéad deis a bheidh ann, tráth a chuirfear an Plean Straitéiseach CBT isteach arís i gcomhréir le hAirteagal 118(3), an dara fomhír, de Rialachán (AE) 2021/2115 nó sa chéad iarraidh ar an bPlean Straitéiseach CBT a leasú i gcomhréir le hAirteagal 119 den Rialachán sin. I bhfianaise an ghá atá ann cur chun feidhme tráthúil a áirithiú, níor cheart na cinntí a bheith faoi réir formheas ón gCoimisiún.

(10)

I bhfianaise an ghá atá ann go ndéanfar cinntí na mBallstát in am trátha roimh chinntí síolaithe na bhfeirmeoirí, ba cheart don Rialachán seo teacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh.

(11)

Tá na bearta dá bhforáiltear sa Rialachán seo i gcomhréir leis an tuairim ó Choiste an Chomhbheartais Talmhaíochta,

(1)

Trí bhíthin Chinneadh (AE) 2019/2173 (2), ceapadh Alex BRENNINKMEIJER mar chomhalta den Chúirt Iniúchóirí don tréimhse ón 1 Eanáir 2020 go dtí an 31 Nollaig 2025.

(2)

I litir uaidh dar dáta an 3 Meitheamh 2021, chuir Alex BRENNINKMEIJER in iúl go raibh sé ag éirí as oifig mar chomhalta den Chúirt Iniúchóirí le héifeacht ón 1 Eanáir 2022. I gcomhréir le hAirteagal 286(5), an tríú fomhír, den Chonradh, d’fhan sé in oifig go dtí go gceapfaí a chomharba.

(3)

An 14 Aibreán 2022, fuair Alex BRENNINKMEIJER bás.

(4)

Ba cheart comhalta nua den Chúirt Iniúchóirí a cheapadh ar feadh a bhfuil fágtha de théarma oifige Alex BRENNINKMEIJER.

(5)

Mhol Ríocht na hÍsiltíre go gceapfaí Stephanus Abraham BLOK mar chomhalta den Chúirt Iniúchóirí ón 1 Meán Fómhair 2022,

(1)

An 10 Nollaig 2021, chuir an Fhrainc iarraidh faoi bhráid an Choimisiúin, i gcomhréir le hAirteagal 7(4) de Threoir (AE) 2016/797, maidir le neamhchur i bhfeidhm forálacha áirithe a leagtar síos sna sonraíochtaí teicniúla don idir-inoibritheacht (“STI”) san Iarscríbhinn a ghabhann le Rialachán (AE) Uimh. 1302/2014 ón gCoimisiún (2) (“STI LOC&PAS”), sna STInna a leagtar síos san Iarscríbhinn a ghabhann le Rialachán (AE) Uimh. 1300/2014 ón gCoimisiún (3) (“STI PRM”) agus sa STI a leagtar síos san Iarscríbhinn a ghabhann le Rialachán (AE) Uimh. 1304/2014 ón gCoimisiún (4) (“STI NOI”), ar thionscadal uasghrádúcháin ar rothstoc maidir le 19 dtraein dhoscartha a dearadh chun oibriú ar ghréasán iarnróid na Fraince.

(2)

Cuireadh an iarraidh isteach ar bhonn Airteagal 7(1), pointe (c), de Threoir (AE) 2016/797, eadhon easpa inmharthanachta eacnamaíoch an tionscadail agus uasghrádú á dhéanamh ar na traenacha lena mbaineann.

(3)

Baineann an iarraidh le 19 dtraein dhoscartha a athchruthú ar scaradh a n-innill lena gcóistí nuair a táirgeadh iad in 2006. Mar gheall ar an éileamh ar an margadh ag an am sin, bhí innill fhéinghluaiste na dtraenacha sin á n-oibriú, agus tá siad fós á n-oibriú faoi láthair, mar chomh-cheangal de chineál cóiste “Réseau 1N” agus bhí cóistí na dtraenacha sin á n-oibriú mar chomh-cheangal de chineál innill féinghluaiste “Réseau”.

(4)

Sa lá atá ann inniu, tá na traenacha sin gar dá stad cothabhála leathré. Tá idirghabháil chothabhála beartaithe chun a áirithiú go n-oibreoidh siad go sábháilte go ceann 16 bliana eile. Beartaítear leis an idirghabháil chothabhála go gcuirfear le chéile arís na hinnill fhéinghluaiste bunaidh agus na cóistí bunaidh. Beidh céim oibre an uasghrádaithe ar siúl idir 2022 agus 2025 tar éis do na chéad traenacha dul isteach sna ceardlanna i mí Feabhra 2022. Is é an sprioc atá ann an t-údarú cineáil a fháil le haghaidh na 19 dtraein dhoscartha a chumhdaítear leis an uasghrádú faoi mhí na Nollag 2023. Ina dhiaidh sin, tabharfar údaruithe maidir le cineál-chomhréireacht gach cineáil traenach.

(5)

Tá an straitéis údaraithe don phróiseas athchumraithe bunaithe ar údarú “nua”, mar mhalairt den chineál TGV Duplex, a údaraíodh cheana féin. Faoi na coinníollacha sin, ní gá ach na codanna modhnaithe de na cóistí a thabhairt i gcomhréir leis an STI. Níl na hinnill fhéinghluaiste faoi réir aon athraithe, ach meastar gur eilimintí nua iad den chineál Duplex TGV agus meastar mar “chéad” údarú a n-údarú lena n-éilítear go dtaispeánfar go gcomhlíonann siad go hiomlán na STIanna LOC&PAS, NOI agus PRM atá ann faoi láthair.

(6)

Comhlíonann innill fhéinghluaiste agus cóistí na 19 dtraein dhoscartha atá faoi réir uasghrádaithe agus athchumraithe na caighdeáin agus na STInna is infheidhme tráth a dtáirgthe. Ó 2006 i leith, bhí na STInna ábhartha faoi réir ceanglais forbartha agus feabhsaithe. Iarrtar an neamhchur i bhfeidhm ós rud é, i gcás ina gcuirtear na STIanna atá ann faoi láthair i bhfeidhm ar thraenacha atá ann cheana féin, go mbeadh costais shuntasacha bhreise uasghrádaithe agus athchumraithe i gceist leo, chomh maith le moill mhór chun na traenacha a thabhairt ar ais i mbun oibríochtaí.

(7)

Thairis sin, le cur i bhfeidhm phointí 4.2.3.1, 4.2.8.2.6, 4.2.10.4.4, 4.2.3.3.2, 4.2.3.7 agus 4.2.8.2.9 den Iarscríbhinn a ghabhann le Rialachán (AE) Uimh. 1302/2014, phointí 4.2.1, 4.2.2, agus 4.2.3 den Iarscríbhinn a ghabhann le Rialachán (AE) Uimh. 1304/2014 agus phointe 4.2.2.1 den Iarscríbhinn a ghabhann le Rialachán (AE) Uimh. 1300/2014, chuirfí de cheangal ar an soláthróir mórstaidéir i ndáil le forbairt a dhéanamh, acmhainní a leithdháileadh agus costas ábhar breise a ghearradh lena gcaithfí amhras ar inmharthanacht eacnamaíoch an tionscadail, i bhfianaise go mbeadh méadú níos mó ná 60 % ar chostas measta an tionscadail in aghaidh an aonaid.

(8)

Ní féidir an costas breise a sheasamh leis na 19 dtraein dhoscartha gan ábharthacht eacnamaíoch agus inmharthanacht an tionscadail uasghrádaithe agus athchumraithe a cheistiú.

(9)

I gcreat an tionscadail, áiritheofar go gcomhlíonfar forálacha eile na STInna atá ann faoi láthair, lena n-áirítear an soilsiú inmheánach, an t-ardán inmheánach agus spásanna paisinéirí, fuinneoga tosaigh, lampaí agus lampaí rialaithe, cúpláin éigeandála, feistí rabhaidh inchloiste, comharthaíocht inmheánach, picteagraim agus faisnéis thadhlach agus gineadóir fuaime an chábáin a mhodhnú i gcomhréir le pointí 4.2.9.1.8, 4.2.9.2.1, 4.2.7.1.1 go 4.2.7.1.4, 4.2.7.2.1 agus 4.2.2.7.2 den Iarscríbhinn a ghabhann le Rialachán (AE) Uimh. 1302/2014 agus pointe 4.2.2.4 a ghabhann leis an Iarscríbhinn a ghabhann le Rialachán (AE) Uimh. 1300/2014.

(10)

Áiritheofar leis an tionscadal freisin go gcomhlíonfaidh na 19 dtraein dhoscartha Rialachán (AE) 2016/919 (5) ón gCoimisiún go hiomlán, lena n-áirítear uasghrádú go Bonnlíne 3 ERTMS.

(11)

Mura nglacfar leis an iarraidh ar neamhchur i bhfeidhm, tá baol ann go ndéanfar difear don acmhainn iompair i réimse na húsáide a bhainfear as na 19 dtraein dhoscartha amach anseo agus go ndéanfaidh sé sin dochar do phaisinéirí iarnróid. Chuirfí moill thart ar 3 bliana ar an tionscadal. Dá gcuirfí stad leis an tionscadal, d’fhéadfaí na traenacha a chur i leataobh, rud a dhéanfadh difear do bhunanna tráchtála an oibreora in 2023, le linn théarnamh iar-COVID-19 earnáil an iarnróid. Meastar go mbeidh an caillteanas ioncaim sin níos mó ná 100 milliún Euro ag an oibreoir.

(12)

Le linn an 93ú cruinniú dá chuid, roinn ionadaithe na Fraince faisnéis maidir leis an iarraidh ar neamhchur i bhfeidhm le comhaltaí an Choiste dá dtagraítear in Airteagal 51(1) de Threoir (AE) 2016/797.

(13)

Maolaítear aon tionchar a d’fhéadfadh a bheith ann ar shábháilteacht neamhchur I bhfeidhm forálacha áirithe de chuid na STIanna LOC&PAS, NOI agus PRM toisc gur léirigh na 19 dtraein dhoscartha athchumraithe go gcomhlíonann siad na ceanglais sábháilteachta ar leith a bhí infheidhme tráth a n-údaraithe bunaidh in 2006 agus go raibh siad á n-oibriú go sábháilte ó shin.

(14)

I bhfianaise a bhfuil thuas, measann an Coimisiún gur cheart a mheas go bhfuil na coinníollacha a leagtar amach in Airteagal 7(1)(c) agus in Airteagal 7(4) de Threoir (AE) 2016/797 comhlíonta i gcás innill agus chóistí na 19 dtraein dhoscartha lena mbaineann. Dá bhrí sin, an iarraidh a rinne an Fhrainc maidir le neamhchur i bhfeidhm phointí 4.2.3.1, 4.2.8.2.6, 4.2.10.4.4, 4.2.3.3.2, 4.2.3.7 agus 4.2.8.2.9 den Iarscríbhinn a ghabhann le Rialachán (AE) Uimh. 1302/2014, phointí 4.2.1, 4.2.2 agus 4.2.3 den Iarscríbhinn a ghabhann le Rialachán (AE) Uimh. 1304/2014 agus phointe 4.2.2.1 den Iarscríbhinn a ghabhann le Rialachán (AE) Uimh. 1300/2014, agus neamhchur i bhfeidhm na bpointí sin á mhaolú trí na forálacha a bhí i bhfeidhm tráth a n-údaraithe bunaidh a chur i bhfeidhm mar fhorálacha malartacha, ba cheart glacadh léi.

(15)

Tá na bearta dá bhforáiltear sa Chinneadh seo i gcomhréir leis an tuairim ón gCoiste dá dtagraítear in Airteagal 51(1) de Threoir (AE) 2016/797,

(1)

Is galar víreasach tógálach é an fliú éanúil ardphataigineach (HPAI) in éin agus d’fhéadfadh tionchar tromchúiseach a bheith aige ar bhrabúsacht na feirmeoireachta éanlaithe clóis, rud a chuirfeadh isteach ar thrádáil laistigh den Aontas agus ar onnmhairí chuig tríú tíortha. Is féidir le víris HPAI éin imirceacha a ionfhabhtú, rud a fhágann gur féidir leo na víris seo a leathadh thar achair fhada le linn a n-imircí san fhómhar agus san earrach. Dá bhrí sin, is bagairt leanúnach é víris HPAI a bheith in éin fhiáine maidir le tabhairt isteach na víreas sin go díreach agus go hindíreach i ngabháltais ina gcoimeádtar éanlaith chlóis nó éin i mbraighdeanas. I gcás ráig de HPAI, tá baol ann go bhféadfaidh an t-oibreán galair leathadh go gabháltais eile ina gcoimeádtar éanlaith chlóis nó éin i mbraighdeanas.

(2)

Le Rialachán (AE) 2016/429, bunaítear creat reachtach nua chun galair a chosc agus a rialú, ar galair iad atá in-tarchurtha chuig ainmhithe nó chuig daoine. Tagann HPAI faoin sainmhíniú ar ghalar liostaithe sa Rialachán sin, agus tá sé faoi réir na rialacha coisctheacha agus rialaithe galar a leagtar síos ann. Ina theannta sin, le Rialachán Tarmligthe (AE) 2020/687 ón gCoimisiún (2), déantar forlíonadh ar Rialachán (AE) 2016/429 a mhéid a bhaineann leis na rialacha maidir le galair liostaithe áirithe a chosc agus a rialú, lena n-áirítear bearta rialaithe galar le haghaidh HPAI.

(3)

Glacadh Cinneadh Cur Chun Feidhme (AE) 2021/641 ón gCoimisiún (3) faoi chuimsiú Rialachán (AE) 2016/429 agus leagtar síos leis bearta rialaithe galar i ndáil le ráigeanna HPAI.

(4)

Go háirithe, is éard a fhoráiltear le Cinneadh Cur Chun Feidhme (AE) 2021/641 go gcuimseoidh na criosanna cosanta agus faireachais agus na criosanna srianta breise arna mbunú ag na Ballstáit tar éis ráigeanna HPAI, i gcomhréir le Rialachán Tarmligthe (AE) 2020/687, ar a laghad na limistéir a liostaítear mar chriosanna cosanta agus faireachais agus criosanna srianta breise san Iarscríbhinn a ghabhann leis an gCinneadh Cur Chun Feidhme sin.

(5)

Leasaíodh an Iarscríbhinn a ghabhann le Cinneadh Cur Chun Feidhme (AE) 2021/641 le déanaí le Cinneadh Cur Chun Feidhme (AE) 2022/1200 ón gCoimisiún (4) tar éis ráigeanna HPAI in éanlaith chlóis nó in éin i mbraighdeanas sa Bheilg agus san Ísiltír, rud ba ghá a léiriú san Iarscríbhinn sin.

(6)

Ón dáta a glacadh Cinneadh Cur Chun Feidhme (AE) 2022/1200, thug an Ghearmáin fógra don Choimisiún faoi ráigeanna HPAI i mbunaíochtaí inar coimeádadh éanlaith chlóis nó éin i mbraighdeanas, ar bunaíochtaí iad atá lonnaithe i Schleswig-Holstein agus i stát na Sacsaine Íochtaraí sa Bhallstát sin.

(7)

Ina theannta sin, thug an Pholainn fógra don Choimisiún faoi ráig de HPAI i mbunaíocht inar coimeádadh éanlaith chlóis nó éin eile i mbraighdeanas, ar bunaíocht í atá lonnaithe i gceantar Wielkopolskie an Bhallstáit sin.

(8)

Thairis sin, ceann amháin de na ráigeanna atá deimhnithe sa Ghearmáin, tá sé dlúth leis an teorainn leis an Danmhairg agus tá comhoibriú cuí déanta ag údaráis inniúla na mBallstát sin maidir le bunú an chreasa faireachais is gá, i gcomhréir le Rialachán Tarmligthe (AE) 2020/687, ós rud é go síneann an crios faireachais go dtí críoch na Danmhairge.

(9)

Rinne údarás inniúil na Danmhairge, na Gearmáine agus na Polainne na bearta rialaithe galar is gá i gcomhréir le Rialachán Tarmligthe (AE) 2020/687, lena n-áirítear bunú criosanna cosanta agus faireachais timpeall ar na ráigeanna sin.

(10)

Scrúdaigh an Coimisiún na bearta rialaithe galar a rinne an Danmhairg, an Ghearmáin agus an Pholainn i gcomhar leis na Ballstáit sin agus tá sé sásta, maidir le teorainneacha na gcriosanna cosanta agus faireachais sa Ghearmáin agus sa Pholainn agus maidir le teorainneacha an chreasa faireachais sa Danmhairg, arna mbunú ag údarás inniúil na mBallstát sin, go bhfuil siad fada go leor ó na bunaíochtaí inar deimhníodh na ráigeanna HPAI.

(11)

San Iarscríbhinn a ghabhann le Cinneadh Cur Chun Feidhme (AE) 2021/641, níl aon limistéar liostaithe faoi láthair mar chrios faireachais le haghaidh na Danmhairge agus níl aon limistéar liostaithe mar chrios cosanta le haghaidh na Gearmáine agus níl aon limistéar liostaithe mar chrios cosanta agus faireachais le haghaidh na Polainne.

(12)

Chun aon suaitheadh nach bhfuil gá leis ar thrádáil laistigh den Aontas a chosc agus chun nach bhforchuirfidh tríú tíortha bacainní gan údar ar thrádáil, is gá tuairisc a thabhairt go mear ar leibhéal an Aontais, i gcomhar leis an Danmhairg, leis an nGearmáin agus leis an bPolainn, ar na criosanna cosanta agus faireachais arna mbunú ag an nGearmáin agus ag an bPolainn agus ar an gcrios faireachais arna bhunú ag an Danmhairg i gcomhréir le Rialachán Tarmligthe (AE) 2020/687.

(13)

Dá bhrí sin, ba cheart crios faireachais a liostú le haghaidh na Danmhairge, ba cheart crios cosanta a liostú le haghaidh na Gearmáine agus ba cheart criosanna cosanta agus faireachais a liostú le haghaidh na Polainne san Iarscríbhinn a ghabhann le Cinneadh Cur Chun Feidhme (AE) 2021/641.

(14)

Ina theannta sin, na limistéir atá liostaithe mar chriosanna faireachais le haghaidh na Gearmáine san Iarscríbhinn a ghabhann le Cinneadh Cur Chun Feidhme (AE) 2021/641, ba cheart iad a leasú.

(15)

Dá réir sin, ba cheart an Iarscríbhinn a ghabhann le Cinneadh Cur Chun Feidhme (AE) 2021/641 a leasú chun an réigiúnú a thabhairt cothrom le dáta ar leibhéal an Aontais chun aird a thabhairt ar na criosanna cosanta agus faireachais arna mbunú go cuí ag an nGearmáin agus ag an bPolainn, agus ar an gcrios faireachais arna bhunú go cuí ag an Danmhairg, i gcomhréir le Rialachán Tarmligthe (AE) 2020/687, agus ré na mbeart is infheidhme ann.

(16)

Dá bhrí sin, ba cheart Cinneadh Cur Chun Feidhme (AE) 2021/641 a leasú dá réir sin.

(17)

I bhfianaise phráinn na staide eipidéimeolaíche san Aontas a mhéid a bhaineann le leathadh HPAI, tá sé tábhachtach go dtiocfaidh na leasuithe atá le déanamh ar Chinneadh Cur Chun Feidhme (AE) 2021/641 leis an gCinneadh seo i bhfeidhm a luaithe is féidir.

(18)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,