(1)

Chun soláthar leordhóthanach gan bhriseadh a áirithiú i gcás táirgí talmhaíochta agus tionsclaíocha áirithe nach dtáirgtear san Aontas agus, dá bhrí sin, chun aon suaitheadh sa mhargadh le haghaidh na dtáirgí sin a sheachaint, cuireadh ar fionraí, i gcás na dtáirgí sin, le Rialachán (AE) 2021/2278 ón gComhairle (1), na dleachtanna Comhtharaife Custaim den chineál dá dtagraítear in Airteagal 56(2), pointe (c), de Rialachán (AE) Uimh. 952/2013 ó Pharlaimint na hEorpa agus ón gComhairle (“dleachtanna CTC”) (2). Mar thoradh air sin, is féidir na táirgí a liostaítear san Iarscríbhinn a ghabhann le Rialachán (AE) 2021/2278 a allmhairiú isteach san Aontas ag rátaí laghdaithe dleachta nó ag rátaí nialasacha dleachta.

(2)

Maidir le táirgeadh táirgí áirithe san Aontas nach liostaítear san Iarscríbhinn a ghabhann le Rialachán (AE) 2021/2278, níl an táirgeadh sin leordhóthanach chun riachtanais shonracha na dtionscal úsáideoirí san Aontas a chomhlíonadh. Ós rud é gur chun leas an Aontais é soláthar leordhóthanach táirgí tionsclaíocha áirithe a áirithiú, agus ag féachaint don fhíoras nach ndéantar cainníochtaí leordhóthanacha táirgí comhionanna, coibhéiseacha ná ionadacha a tháirgeadh laistigh den Aontas, is gá fionraíocht iomlán ar na dleachtanna CTC a dheonú maidir leis na táirgí sin.

(3)

D’fhonn táirgeadh comhtháite ceallraí san Aontas a chur chun cinn i gcomhréir leis an teachtaireacht ón gCoimisiún an 17 Bealtaine 2018 dar teideal Europe on the Move – Sustainable Mobility for Europe: safe, connected, and clean [An Eoraip ag Gluaiseacht – Soghluaisteacht Inbhuanaithe don Eoraip: slán, nasctha agus glan], ba cheart fionraíocht pháirteach ar na dleachtanna CTC a dheonú i leith táirgí áirithe a bhaineann le táirgeadh ceallraí nach liostaítear san Iarscríbhinn a ghabhann le Rialachán (AE) 2021/2278. Is é an 31 Nollaig 2022 an dáta ba cheart a shocrú le haghaidh an athbhreithnithe shainordaithigh ar na fionraíochtaí, ionas go gcuirfear san áireamh san athbhreithniú sin éabhlóid ghearrthéarmach na hearnála ceallraí san Aontas.

(4)

Chun forbairtí teicniúla na dtáirgí agus treochtaí eacnamaíocha sa mhargadh a chur san áireamh, is gá tuairisc an táirge agus aicmiú an táirge a leasú i gcás fionraíochtaí dleachta CTC áirithe a liostaítear san Iarscríbhinn a ghabhann le Rialachán (AE) 2021/2278.

(5)

Ní chun leas an Aontais a thuilleadh é fionraíocht dleachtanna CTC a choinneáil ar bun i gcás táirgí áirithe a liostaítear san Iarscríbhinn a ghabhann le Rialachán (AE) 2021/2278. Dá bhrí sin, ba cheart fionraíochtaí na dtáirgí sin a scriosadh le héifeacht ón 1 Iúil 2022.

(6)

Dá bhrí sin, ba cheart Rialachán (AE) 2021/2278 a leasú dá réir sin.

(7)

Chun nach gcuirfear isteach ar chur i bhfeidhm scéim na bhfionraíochtaí taraife uathrialaitheacha agus chun na treoirlínte a leagtar amach sa teachtaireacht ón gCoimisiún an 13 Nollaig 2011 maidir le fionraíochtaí taraife uathrialaitheacha agus taraif-chuótaí uathrialaitheacha a chomhlíonadh, ba cheart na hathruithe dá bhforáiltear leis an Rialachán seo maidir le fionraíochtaí taraife i leith na dtáirgí lena mbaineann a chur i bhfeidhm ón 1 Iúil 2022. Dá bhrí sin, ba cheart an Rialachán seo a theacht i bhfeidhm mar ábhar práinne,

(1)

An 18 Iúil 2005, ghlac an Chomhairle Rialachán (CE) Uimh. 1183/2005.

(2)

I ndiaidh bhreithiúnas na Cúirte Ginearálta i gcás T-108/21 (2), ba cheart iontráil amháin a scriosadh ó liosta na ndaoine, na n-eintiteas agus na gcomhlachtaí a leagtar amach in Iarscríbhinn Ia a ghabhann le Rialachán (CE) Uimh. 1183/2005.

(3)

Ba cheart, dá bhrí sin, Iarscríbhinn Ia a ghabhann le Rialachán (CE) Uimh. 1183/2005 a leasú dá réir sin,

(1)

An 23 Márta 2012, ghlac an Chomhairle Rialachán (AE) Uimh. 267/2012.

(2)

Ar bhonn athbhreithniú ar Iarscríbhinn II a ghabhann le Cinneadh 2010/413/CBES ón gComhairle (2), ba cheart na bearta sriantacha i gcoinne gach duine agus gach eintitis atá ar an liosta a leagtar amach san Iarscríbhinn sin a choimeád ar bun, sa mhéid nach luaitear a n-ainmneacha in Iarscríbhinn VI a ghabhann leis an gCinneadh sin, agus ba cheart 17 n-iontráil a áirítear in Iarscríbhinn IX a ghabhann le Rialachán (AE) Uimh. 267/2012 a thabhairt cothrom le dáta.

(3)

Ba cheart, dá bhrí sin, Rialachán (AE) Uimh. 267/2012 a leasú dá réir sin,

(1)

Ba cheart difear a bheith ann idir cinneadh luachanna na neamhchosaintí indíreacha ar chliant ó chonarthaí díorthach agus ó chonarthaí díorthach creidmheasa chun críocha neamhchosaintí móra agus modh ríofa luach na neamhchosanta a úsáidtear le haghaidh ceanglais chaipitil rioscabhunaithe a leagtar amach i Rialachán (AE) Uimh. 575/2013, mar d’fhéadfadh sé gurbh é an toradh a bheadh ar mhainneachtain na hionstraime foluití brabús seachas caillteanas. Dá bhrí sin, ba cheart luach na neamhchosanta indírí a bheith ag brath ar an gcaillteanas (i.e. luach neamhchosanta deimhneach) nó ar an ngnóthachan (i.e. luach neamhchosanta diúltach) a d’eascródh as mainneachtain fhéideartha a ionstraime foluití. Faoi chóras na neamhchosaintí móra a leagtar amach i gCuid a Ceathair de Rialachán (AE) Uimh. 575/2013, i gcás neamhchosaintí sa leabhar trádála, féadfaidh institiúidí suíomhanna deimhneacha agus diúltacha a fhritháireamh sna hionstraimí airgeadais céanna, nó, faoi choinníollacha áirithe, in ionstraimí airgeadais difriúla, arna n-eisiúint ag cliant ar leith. Ní dhéantar an ghlan-neamhchosaint fhoriomlán ar chliant aonair a mheas ach amháin nuair is deimhneach í. Ar an gcaoi chéanna, an glan-neamhchosaint fhoriomlán ar chliant ar leith, tar éis na neamhchosaintí indíreacha ar an gcliant sin ó chonarthaí díorthacha nó ó chonarthaí díorthach creidmheasa a leithdháiltear ar an leabhar trádála a chur san áireamh, níor cheart í a mheas ach amháin nuair is deimhneach í. D’fhonn aon fhritháireamh d’aon neamhchosaint indíreach ó chonarthaí díorthach nó ó chonarthaí díorthach creidmheasa a leithdháiltear ar an leabhar neamhthrádála a sheachaint, ba cheart aon luach diúltach neamhchosanta indírí ó na suíomhanna sin a shocrú ag nialas.

(2)

Dá bhrí sin, d’fhonn a áirithiú go gcuimsítear an priacal mainneachtana go cuí, ba cheart do luach neamhchosanta indírí na gcéadroghanna, beag beann ar an leithdháiltear é ar an leabhar trádála ná ar an leabhar neamhthrádála, a bheith ag brath ar na hathruithe i bpraghasanna céadroghanna a d’eascródh as mainneachtain na hionstraime foluití faoi seach, e.g. margadhluach an rogha le haghaidh céadroghanna “ar cheannach” agus margadhluach an chéadrogha lúide a phraghas ceangail le haghaidh roghanna “ar dhíol”.

(3)

Is é cuspóir díorthach creidmheasa priacal creidmheasa a bhaineann le hiasachtaithe a aistriú gan na sócmhainní féin a aistriú. Ba cheart an ról atá ag institiúidí mar dhíoltóir cosanta nó mar cheannaitheoir cosanta agus an cineál díorthaigh creidmheasa a dhéanann siad a chur san áireamh le haghaidh chinneadh luach neamhchosanta indírí na hionstraime foluití. Dá bhrí sin ba cheart an neamhchosaint indíreach a bheith cothrom le margadhluach an chonartha díorthach creidmheasa, ar cheart é a choigeartú faoin méid dlite nó faoin méid a bhfuil coinne lena fháil ón gcontrapháirtí i gcás mhainneachtain eisitheoir na hionstraime fiachais fholuitigh faoi seach.

(4)

Maidir le cineálacha eile conarthaí díorthach arb é atá iontu meascán de shuíomhanna fada agus gearra, d’fhonn a áirithiú go gcuimsítear an mhainneachtain priacail chruinn, ba cheart d’institiúidí na conarthaí díorthach a mhiondealú i gcodanna idirbhirt aonair. Níor cheart ach na codanna lena mbaineann priacal mainneachtana, ina bhfuil priacal caillteanais ag institiúidí i gcás mainneachtana, a bheith ábhartha le haghaidh ríomh luach na neamhchosanta indírí ó na conarthaí díorthach sin. Mar sin féin, i gcás nach bhfuil institiúidí in ann an mhodheolaíocht sin a chur i bhfeidhm, agus d’fhonn láimhseáil choimeádach a áirithiú, ba cheart cead a bheith acu luach neamhchosanta indírí na n-ionstraimí foluiteacha a chinneadh mar an caillteanas uasta a d’fhéadfaidís a thabhú tar éis mhainneachtain eisitheoir an fholuitigh dá dtagraíonn an díorthach.

(5)

Is féidir conarthaí díorthach a scríobh ar ionstraimí a bhfuil ainmneacha tagartha foluiteacha iomadúla acu. Le haghaidh na ndíorthach il-fholuiteach sin, i gcás inar féidir institiúid breathnú ar na hainmneacha tagartha foluiteacha, agus d’fhonn a áirithiú go n-úsáidtear an modh is cruinne, ba cheart luach na neamhchosanta indírí a ríomh trí bhreathnú ar an éagsúlacht i bpraghas an díorthaigh i gcás mhainneachtain gach ceann de na hainmneacha tagartha foluiteacha san ionstraim il-fholuiteach. D’fhonn comhsheasmhacht leis an gcreat neamhchosaintí móra is infheidhme d’idirbhearta i gcás neamhchosanta ar shócmhainní foluiteacha a áirithiú, ba cheart feidhm a bheith ag Airteagal 6(1) agus (2) de Rialachán Tarmligthe (AE) Uimh. 1187/2014 ón gCoimisiún (2) maidir le sannadh na neamhchosaintí don chliant sainaitheanta, do chliant ar leithligh nó don chliant anaithnid. I gcásanna nach féidir le hinstitiúidí cur chuige na trédhearcachta a chur i bhfeidhm nó i gcásanna ina bhfuil cur chuige na trédhearcachta maidir le díorthach a bhfuil ainmneacha tagartha iomadúla aige ina ualach míchuí orthu, agus d’fhonn láimhseáil choimeádach a áirithiú, ba cheart d’institiúidí luach na neamhchosanta indírí a ríomh trí bhreathnú ar an éagsúlacht i bpraghas an díorthaigh i gcás mhainneachtain gach ceann de na hainmneacha tagartha foluiteacha sin. Ar an gcaoi chéanna, d’fhonn comhsheasmhacht leis an gcreat neamhchosaintí móra is infheidhme d’idirbhearta i gcás neamhchosaint ar shócmhainní foluiteacha a áirithiú, ba cheart feidhm a bheith ag Airteagal 6(3) den Rialachán Tarmligthe (AE) Uimh. 1187/2014 maidir le sannadh na neamhchosanta do chliant ar leithligh nó don chliant anaithnid. I ngach cás ina sanntar na hionstraimí foluiteacha don chliant anaithnid, d’fhonn an priacal go ndéanfar luachanna diúltacha na neamhchosaintí indíreacha a fhritháireamh le luachanna deimhneacha neamhchosaintí indíreacha, ba cheart d’institiúidí aon luach diúltach neamhchosanta indírí a shocrú ag nialas.

(6)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Baincéireachta Eorpach faoi bhráid an Choimisiúin.

(7)

Rinne an tÚdarás Baincéireachta Eorpach comhairliúcháin phoiblí oscailte a reáchtáil maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (3).

(1)

I gcomhréir le hAirteagal 8 de Rialachán (CE) Uimh. 561/2006, glacfaidh tiománaithe iompair de bhóthar tréimhsí scíthe laethúla agus seachtainiúla. Is minic a chaitear cuid de na tréimhsí scíthe sin ar an mbóthar, go háirithe i gcásanna ina mbíonn na tiománaithe ag gabháil d’oibríochtaí iompair idirnáisiúnta fadraoin. Is den ríthábhacht é, dá bhrí sin, rochtain a bheith ag tiománaithe ar limistéir pháirceála ina mbeidh siad in ann scíth a dhéanamh go sábháilte, agus na saoráidí iomchuí acu chun rochtain a fháil ar na seirbhísí a bhíonn de dhíth orthu.

(2)

Leagtar amach in Airteagal 8a(1) de Rialachán (CE) Uimh. 561/2006 liosta ceanglas nach mór do limistéir pháirceála atá inrochtana do thiománaithe atá ag gabháil d’iompar earraí agus paisinéirí de bhóthar a chomhlíonadh lena ndeimhniú mar limistéir pháirceála shábháilte shlána, i ndáil le leibhéil seirbhíse agus slándála na limistéar páirceála sin.

(3)

I staidéar de chuid an Choimisiúin in 2019 ar limistéir pháirceála shábháilte shlána san Aontas (2), aithníodh go raibh ganntanas mór saoráidí den sórt sin ann. Rinneadh roinnt moltaí sa staidéar freisin, lena n-áirítear moltaí maidir le caighdeáin le haghaidh limistéir pháirceála shábháilte shlána agus maidir le nósanna imeachta deimhniúcháin.

(4)

I bhfianaise ghanntanas na limistéar páirceála sábháilte slán san Aontas faoi láthair, ba cheart forbairt na saoráidí sin a spreagadh ar leibhéal an Aontais chun a áirithiú go mbeidh rochtain ag na tiománaithe iompair de bhóthar orthu cibé áit a stopann siad ar bhóithre an Aontais.

(5)

Chun forbairt na limistéar páirceála sábháilte slán a spreagadh, is gá creat coiteann a fhorbairt ar leibhéal an Aontais chun a áirithiú go mbeidh faisnéis shoiléir chomhchuibhithe ar fáil don earnáil maidir le limistéir pháirceála shábháilte shlána ar fud an Aontais.

(6)

Chun dálaí oibre na dtiománaithe iompair de bhóthar a fheabhsú i gcomhréir le Rialachán (CE) Uimh. 561/2006, ba cheart íosleibhéal coiteann seirbhísí a bheith ar fáil i ngach limistéar páirceála sábháilte slán, beag beann ar a leibhéal slándála.

(7)

I bhfianaise an mhéadaithe atá ag teacht ar líon na dteagmhas coireachta lastais a tharlaíonn do thiománaithe iompair de bhóthar ar an mbóthar, ba cheart feabhas a chur ar shlándáil na dtiománaithe iompair de bhóthar chun a áirithiú go ndéanann siad scíth shaor ó strus acu agus nach gcarnann siad tuirse. Tá sé ríthábhachtach dálaí maithe scíthe a chur ar fáil do thiománaithe i limistéir pháirceála shábháilte shlána chun an tsábháilteacht ar bhóithre a áirithiú agus chun an riosca go dtarlódh timpistí de dheasca tuirse a laghdú.

(8)

Tá limistéir pháirceála shábháilte shlána riachtanach ionas go bhféadfaidh na tiománaithe agus na gnóthais iompair chun a gcuid ualaí a chosaint ar an gcoireacht lastais. I bhfianaise éagsúlacht na ngnólachtaí agus na n-earraí a iompraítear, is féidir go mbeidh limistéir pháirceála ar leibhéil éagsúla slándála ag teastáil ó oibreoirí iompair agus ó thiománaithe, de réir na n-earraí a iompraíonn siad. Dá bhrí sin, ba cheart freastal a dhéanamh ar na cineálacha éagsúla gnólachtaí i gcaighdeáin an Aontais, agus ba cheart do na limistéir pháirceála íosleibhéil éagsúla slándála a chur ar fáil.

(9)

Ba cheart slándáil na limistéar páirceála a bhaint amach trína áirithiú go suiteáiltear an trealamh slándála iomchuí, agus go gcuirtear na nósanna imeachta slándála iomchuí i bhfeidhm, timpeall ar theorainn an limistéir, sa limistéar páirceála féin agus ag na pointí iontrála agus imeachta. Ba cheart nósanna imeachta foirne a bheith i bhfeidhm freisin chun a áirithiú go nglacfar bearta coiscthe riosca, agus chun iarmhairtí na dteagmhas a mhaolú nuair a tharlaíonn a leithéid.

(10)

Chun trédhearcacht agus cinnteacht a sholáthar d’úsáideoirí na limistéar páirceála sábháilte slán, ba cheart na limistéir pháirceála a bheith deimhnithe ag comhlacht deimhniúcháin neamhspleách, i gcomhréir le nósanna imeachta arna sainiú ar leibhéal an Aontais. Ba cheart nósanna imeachta deimhniúcháin maidir le hiniúchtaí, athiniúchtaí agus iniúchtaí neamhfhógartha ar limistéir pháirceála shábháilte shlána a shonrú go soiléir chun a áirithiú go mbeidh a fhios ag oibreoirí na limistéar páirceála conas iarratas a dhéanamh ar dheimhniúchán nó ar athdheimhniúchán. Ba cheart a áirithiú freisin go gcuirfear nósanna imeachta leormhaithe i bhfeidhm nuair a fhaightear nach gcomhlíonann limistéar páirceála sábháilte slán an leibhéal seirbhíse nó slándála dá bhfuil sé deimhnithe a thuilleadh.

(11)

Ba cheart go mbeadh sásraí gearáin ar fáil d’úsáideoirí na limistéar páirceála sábháilte slán chun neamhchomhlíontachtaí a thuairisciú.

(12)

Ba cheart go mbeadh comhlachtaí deimhniúcháin in ann deimhnithe iniúchta a eisiúint do na hoibreoirí agus an fhaisnéis sin a chur in iúl don Choimisiún freisin, ionas go mbeidh liosta na limistéar páirceála sábháilte slán ar an suíomh gréasáin oifigiúil ábhartha fós cothrom le dáta.

(13)

Chun forbairt thapa na dteicneolaíochtaí digiteacha a chur san áireamh agus chun dálaí oibre na dtiománaithe a fheabhsú ar bhonn leanúnach, ba cheart don Choimisiún measúnú a dhéanamh ar a ábhartha a bheidh sé athbhreithniú a dhéanamh ar na caighdeáin chomhchuibhithe agus ar na nósanna imeachta deimhniúcháin tráth nach déanaí ná ceithre bliana tar éis ghlacadh an ghnímh seo,

(1)

Le Rialachán (CE) Uimh. 119/97 (2), d’fhorchuir an Chomhairle dleacht frithdhumpála chinntitheach idir 32,5 % agus 39,4 % ar allmhairí meicníochtaí ceanglóra fháinnigh áirithe (“RBM”) de thionscnamh Dhaon-Phoblacht na Síne (“an tSín” nó “an tír lena mbaineann”) agus dleacht frithdhumpála chinntitheach 10,5 % ar allmhairí de thionscnamh Mhalaeisia. Bhí na rátaí dleachta sin infheidhme maidir le RBM seachas iad siúd a bhfuil 17 bhfáinne nó 23 fháinne acu, agus bhí RBM a bhfuil 17 bhfáinne agus 23 fháinne acu faoi réir dleachta is ionann agus an difríocht idir an praghas íosta ar allmhairí (MIP EUR 325 in aghaidh 1 000 píosa) agus an saor-agall sa Chomhphobal nár réitíodh trí phraghas custaim, aon uair a bhí an praghas custaim níos ísle ná an MIP.

(2)

Le Rialachán (CE) Uimh. 2100/2000 (3), mhéadaigh an Chomhairle na dleachtanna thuasluaite do RBM na Síne seachas iad siúd a bhfuil 17 bhfáinne nó 23 fháinne acu, tar éis imscrúdú frithionsúcháin de bhun Airteagal 12 den bhun-Rialachán. Sa raon ó 51,2 % go 78,8 % bhí na dleachtanna leasaithe is infheidhme maidir le hallmhairí den sórt sin ón tSín.

(3)

Tar éis imscrúdú frith-imchéimniúcháin a dhéanamh de bhun Airteagal 13 den bhun-Rialachán, le Rialachán (CE) Uimh. 1208/2004 (4), leathnaigh an Chomhairle na bearta frithdhumpála cinntitheacha chun allmhairí RBM áirithe arna gcur chun bealaigh ó Vítneam a chumhdach, bíodh sé dearbhaithe gur de thionscnamh Vítneam iad nó ná bíodh.

(4)

Le Rialachán (CE) Uimh. 2074/2004 (5) leathnaigh an Chomhairle na bearta frithdhumpála cinntitheacha ar allmhairí RBM de thionscnamh an Síne tar éis athbhreithniú éaga. Ní bhfuarthas aon iarraidh ar athbhreithniú éaga i ndáil leis na bearta is infheidhme maidir leis an Malaeisia, a chuaigh in éag ina dhiaidh sin in Eanáir 2002.

(5)

Tar éis imscrúdú frith-imchéimniúcháin a dhéanamh de bhun Airteagal 13 den bhun-Rialachán, le Rialachán (CE) Uimh. 33/2006 (6), leathnaigh an Chomhairle na bearta frithdhumpála cinntitheacha chun allmhairí RBM áirithe arna gcur chun bealaigh ó Dhaon-Phoblacht Dhaonlathach Laos (“Laos”) a chumhdach, bíodh sé dearbhaithe gur de thionscnamh Laos iad nó ná bíodh.

(6)

Le Rialachán (CE) Uimh. 818/2008 (7) agus mar thoradh ar imscrúdú frith-imchéimniúcháin, leathnaigh an Chomhairle raon feidhme na mbeart chun RBM áirithe a ndearnadh mionmhodhnú orthu a chumhdach.

(7)

Tar éis athbhreithniú a dhéanamh ar dhul in éag, rinneadh na dleachtanna frithdhumpála ar allmhairí RBM áirithe a shíneadh go ceann 5 bliana i mí Feabhra 2010 le Rialachán Cur Chun Feidhme (AE) Uimh. 157/2010 ón gComhairle (8), agus tar éis athbhreithniú éaga eile, go ceann 5 bliana eile i mBealtaine 2016 le Rialachán Cur Chun Feidhme (AE) 2016/703 ón gComhairle (9) (na “bearta i bhfeidhm”).

(8)

Is ionann na dleachtanna frithdhumpála atá i bhfeidhm faoi láthair agus 51,2 % do tháirgeoir onnmhairithe amháin agus 78,8 % do gach táirgeoir onnmhairiúcháin eile.

(9)

Tar éis d’fhógra a bheith foilsithe maidir le dul in éag atá le tarlú i dtaca leis na bearta atá i bhfeidhm (10), fuair an Coimisiún iarraidh ar athbhreithniú de bhun Airteagal 11(2) den bhun-Rialachán.

(10)

Is é Comhlachas Eorpach na gCruach (“Eurofer” nó “an t-iarratasóir”) a bhfuil breis agus 25 % de tháirgeacht iomlán RBM an Aontais acu a chuir iarraidh ar athbhreithniú isteach an 12 Feabhra 2021. Bunaíodh an iarraidh ar athbhreithniú ar an bhforas gur dócha go leanfar den dumpáil agus den díobháil do thionscal an Aontais nó go dtarlóidh siad arís de thoradh dhul in éag na mbeart.

(11)

Arna chinneadh don Choimisiún, tar éis dó dul i gcomhairle leis an gCoiste arna bhunú le hAirteagal 15(1) den bhun-Rialachán, gurbh ann d’fhianaise leordhóthanach chun an t-athbhreithniú éaga a thionscnamh, an 11 Bealtaine 2021 thionscain an Coimisiún athbhreithniú éaga maidir le hallmhairí RBM de thionscnamh Dhaon-Phoblacht na Síne agus arna leathnú chun Vítneam agus Daon-Phoblacht Dhaonlathach Laos a chumhdach ar bhonn Airteagal 11(2) den bhun-Rialachán. D’fhoilsigh sé Fógra Tionscnaimh in Iris Oifigiúil an Aontais Eorpaigh (11) (“an Fógra Tionscnaimh”).

(12)

An t-imscrúdú ar an dóchúlacht go leanfar den dumpáil nó go dtarlóidh sí arís, chumhdaigh sé an tréimhse ón 1 Eanáir 2020 go dtí an 31 Nollaig 2020 (“tréimhse an imscrúdaithe athbhreithniúcháin”). San imscrúdú ar threochtaí atá ábhartha maidir leis an measúnú ar an dóchúlacht go leanfar den díobháil nó go dtarlóidh sí arís, cumhdaítear an tréimhse ón 1 Eanáir 2017 go dtí deireadh thréimhse an imscrúdaithe athbhreithniúcháin (“an tréimhse faoi bhreathnú”).

(13)

San Fhógra Tionscnaimh, iarradh ar na páirtithe leasmhara teagmháil a dhéanamh leis an gCoimisiún chun bheith rannpháirteach san imscrúdú. Ina theannta sin, an t-iarratasóir ar an eolas go sonrach faoin imscrúdú mar aon le táirgeoirí aitheanta eile ón Aontas, na táirgeoirí onnmhairiúcháin aitheanta agus údaráis na Síne, allmhaireoirí, úsáideoirí agus trádálaithe aitheanta chomh maith le comhlachais arb eol iad a bheith bainteach le tionscnamh an athbhreithnithe éaga, agus d’iarr sé orthu a bheith rannpháirteach.

(14)

Bhí deis ag na páirtithe leasmhara barúil a thabhairt maidir le tionscnamh an athbhreithnithe éaga agus éisteacht os comhair an Choimisiúin agus/nó os comhair an Oifigigh Éisteachta in imeachtaí trádála a iarraidh. Níor iarr aon cheann de na páirtithe leasmhara éisteacht.

(15)

San Fhógra Tionscnaimh, shonraigh an Coimisiún go bhféadfadh sé na páirtithe leasmhara a shampláil i gcomhréir le hAirteagal 17 den bhun-Rialachán.

(16)

San Fhógra Tionscnaimh, dúirt an Coimisiún go raibh ar na trí tháirgeoir aitheanta de chuid an Aontais, IML Industria Meccanica Lombarda SRL, Koloman Handler Fémárugyár Magyarország Kft agus Ring Alliance Ringbuchtechnik GmbH, an ceistneoir comhlánaithe a chur isteach laistigh de 37 lá ó dháta foilsithe an Fhógra Tionscnaimh. D’iarr an Coimisiún freisin ar tháirgeoirí agus ar chomhlachais ionadaíocha eile de chuid an Aontais iad féin a chur in iúl, dá mba ann dóibh, agus ceistneoir a iarraidh. Níor tháinig aon táirgeoir nó aon chomhlachas ionadaíoch eile de chuid an Aontais chun cinn.

(17)

Chun a chinneadh an raibh gá le sampláil agus, más amhlaidh a bhí, chun sampla a roghnú, d’iarr an Coimisiún ar allmhaireoirí neamhghaolmhara an fhaisnéis a sonraíodh san Fhógra Tionscnaimh a sholáthar. Níor sholáthair aon allmhaireoir neamhghaolmhar an fhaisnéis a iarradh. Dá bharr sin, chinn an Coimisiún nach raibh gá le sampláil.

(18)

Chun a chinneadh an bhfuil gá le sampláil agus, más amhlaidh atá, chun sampla a roghnú, d’iarr an Coimisiún ar gach táirgeoir onnmhairiúcháin aitheanta i nDaon-Phoblacht na Síne an fhaisnéis a sonraíodh san Fhógra Tionscnaimh a sholáthar. Sa bhreis air sin, d’iarr an Coimisiún ar Mhisean Dhaon-Phoblacht na Síne táirgeoirí onnmhairiúcháin eile a shainaithint agus/nó teagmháil a dhéanamh leo, dá mba ann dóibh, ar táirgeoirí iad a d’fhéadfadh suim a bheith acu a bheith rannpháirteach san imscrúdú.

(19)

Níor sholáthair aon táirgeoir onnmhairiúcháin i nDaon-Phoblacht na Síne an fhaisnéis a iarradh ná nár thoiligh siad a bheith san áireamh sa sampla. Dá bhrí sin, níorbh ann d’aon chomhoibriú ó tháirgeoirí na Síne agus is ar bhonn na bhfíoras atá ar fáil a fhaightear na torthaí maidir le hallmhairí ón tSín, de bhun Airteagal 18 den bhun-Rialachán.

(20)

Chuir an Coimisiún ceistneoir chuig Rialtas Dhaon-Phoblacht na Síne (“Rialtas na Síne”) maidir le saobhadh suntasach a bheith ann sa tSín de réir bhrí Airteagal 2(6a)(b) den bhun-Rialachán.

(21)

Chuir an Coimisiún an ceistneoir ar aghaidh chuig táirgeoirí an Aontais, chuig allmhaireoirí neamhghaolmhara agus chuig táirgeoirí onnmhairiúcháin. Cuireadh na ceistneoirí céanna ar fáil ar shuíomh gréasáin Ard-Stiúrthóireacht na Trádála (12) lá an tionscnaimh

(22)

Fuarthas freagraí ar an gceistneoir ó tháirgeoirí de chuid an Aontais Ring Alliance Ringbuchtechnik GmbH agus Koloman Handler Kft., dhá pháirtí a bhaineann leis an ngrúpa céanna a bhfuil saoráid táirgeachta amháin acu agus dá ngairfear anseo feasta le chéile “Ring Alliance Ringbuchtechnik GmbH”, agus M.L. Industria Meccanica Lombarda S.r.l.

(23)

Lorg agus d’fhíoraigh an Coimisiún an fhaisnéis uile a mheas sé a bheith riachtanach chun cinneadh a dhéanamh maidir leis an dóchúlacht go leanfar den dumpáil agus den díobháil nó go dtarlóidh siad arís, agus maidir le leas an Aontais. Is in áitribh na gcuideachtaí seo a leanas a rinneadh cuairteanna fíorúcháin de bhun Airteagal 16 den bhun-Rialachán:

—

Ring Alliance Ringbuchtechnik GmbH, Oroszlany, an Ungáir,

—

I.M.L. Industria Meccanica Lombarda S.r.l., Offanengo, an Iodáil.

(24)

Is ionann an táirge faoi athbhreithniú agus an táirge a bhí faoi réir an athbhreithnithe éaga roimhe seo, is é sin meicníochtaí ceanglóra fháinnigh de thionscnamh na Síne, ina bhfuil dhá leathán nó dhá shreang de chruach a bhfuil ar a laghad ceithre leathfháinne de chruach sreinge feistithe orthu agus iad coinnithe le chéile le clúdach cruach. Is féidir iad a oscailt trí na leathfháinní a tharraingt, sin nó le meicníocht truicir bheag de chruach atá feistithe ar an meicníocht ceanglóra fháinnigh (an táirge faoi athbhreithniú). Tráth theacht i bhfeidhm Rialachán (AE) 2016/703, bhí RBM faoi chód AC ex 8305 10 00 (cóid TARIC 8305100011, 8305100013, 8305100019, 8305100021, 8305100023, 8305100029, 8305100034 agus 8305100035).

(25)

Bíonn réimse leathan úsáidí ag RBM, mar shampla, i dtáirgeadh lámhleabhar bogearraí, catalóg agus bróisiúr, lámhleabhar teicniúil, comhad oifige, chomh maith le cur i láthair agus comhaid cheangailte eile agus albam grianghraf agus stampa.

(26)

Díoladh líon mór cineálacha éagsúla RBM san Aontas le linn thréimhse an imscrúdaithe athbhreithniúcháin. Socraíodh na difríochtaí idir na cineálacha seo de réir leithead an bhoinn, an chineál meicníochta, líon na bhfáinní, an córas oscailte, an cumas sealbhaithe páipéir ainmniúil, an trastomhas fáinne, cruth na bhfáinní, fad agus spásáil an fháinne. Ós rud é go bhfuil na buntréithe fisiceacha agus teicniúla céanna ag gach cineál agus, laistigh de raonta áirithe, go bhfuil siad inmhalartaithe, suíodh gurb ionann gach RBM agus aon táirge amháin chun críche an imeachta reatha. Ní bhfuarthas aon tuairimí i ndáil leis sin.

(27)

Faoi mar a léiríodh san imscrúdú as ar tháinig forchur na mbeart atá i bhfeidhm (13), tá na saintréithe bunúsacha fisiceacha agus teicniúla céanna, mar aon leis na húsáidí bunúsacha céanna, ag na táirgí seo a leanas:

Dá bhrí sin, meastar gur táirgí comhchosúla iad na táirgí sin de réir bhrí Airteagal 1(4) den bhun-Rialachán.

(28)

Le linn na tréimhse an imscrúdaithe athbhreithniúcháin, lean allmhairithe den táirge atá faoi athbhreithniú ón tSín ag leibhéal i bhfad níos ísle ná an t-athbhreithniú éaga roimhe sin (i.e. ó Eanáir 2014 go Nollaig 2014). De réir Comext (Eurostat), bhí thart ar 0,7 % de mhargadh an Aontais i gceist le hallmhairí RBM ó Dhaon-Phoblacht na Síne i dtréimhse an imscrúdaithe athbhreithniúcháin, i gcomparáid le scair 2,3 % den mhargadh le linn an athbhreithnithe éaga roimh sin.

(29)

Mar a luadh in aithris (19), níor chomhoibrigh aon duine de na honnmhaireoirí/táirgeoirí ó Dhaon-Phoblacht na Síne san imscrúdú. Dá bhrí sin, chuir an Coimisiún in iúl do rialtas Dhaon-Phoblacht na Síne go bhféadfadh an Coimisiún, in éagmais comhoibriú, Airteagal 18 den bhun-Rialachán a chur i bhfeidhm maidir leis na torthaí a bhaineann le Daon-Phoblacht na Síne. Ní bhfuair an Coimisiún aon bharúil maidir leis sin ná aon iarraidh ar idirghabháil ón Oifigeach Éisteacha maidir leis sin.

(30)

Dá bhrí sin, i gcomhréir le hAirteagal 18 den bhun-Rialachán, bhí na torthaí maidir leis an dóchúlacht go leanfar den dumpáil nó go dtarlóidh sé arís bunaithe ar na fíorais a bhí ar fáil, go háirithe an fhaisnéis atá san iarraidh ar an athbhreithniú éaga, sonraí a bhí ar fáil go poiblí maidir leis an dá chuideachta Thurcacha atá ag oibriú faoi chód NACE Rev2, faisnéis a chuir an t-iarratasóir ar fáil, faisnéis ó oifig staidrimh náisiúnta na Tuirce, bunachar sonraí Comext Eurostat, Global Trade Atlas, suíomh gréasáin de chuid ECFE maidir le hIompar Idirnáisiúnta agus Costais Árachais na Trádála Marsantais (ITIC), agus suíomh “an gnó a dhéanamh” de chuid an Bhainc Dhomhanda.

(31)

Ós rud é gur leor an fhianaise a bhí ann tráth a tionscnaíodh an t-imscrúdú lena thaispeáint, a mhéid a bhain le Daon-Phoblacht na Síne, gurbh ann do shaobhadh suntasach de réir bhrí Airteagal 2(6a), pointe (b) den bhun-Rialachán, thionscain an Coimisiún an t-imscrúdú ar bhonn Airteagal 2(6a) den bhun-Rialachán.

(32)

An fhaisnéis a mheas sé a bheith riachtanach le haghaidh a imscrúdaithe maidir leis an saobhadh suntasach líomhnaithe, chun an fhaisnéis sin a fháil, chuir an Coimisiún ceistneoir chuig Rialtas na Síne. Ina theannta sin, i bpointe 5.3.2 den Fhógra Tionscnaimh, thug an Coimisiún cuireadh do gach páirtí leasmhar a gcuid tuairimí a chur in iúl, faisnéis a chur isteach agus fianaise thacaíochta a chur ar fáil maidir le cur i bhfeidhm Airteagal 2(6a) den bhun-Rialachán laistigh de 37 lá ó dháta fhoilsiú an Fhógra Tionscnaimh in Iris Oifigiúil an Aontais Eorpaigh. Ní bhfuarthas aon fhreagra ar an gceistneoir ó Rialtas na Síne agus ní bhfuarthas aon aighneacht maidir le cur i bhfeidhm Airteagal 2(6a) den bhun-Rialachán roimh an sprioc-am. Ina dhiaidh sin, chuir an Coimisiún in iúl do Rialtas na Síne go n-úsáidfeadh sé na fíricí a bhí ar fáil de réir bhrí Airteagal 18 den bhun-Rialachán chun a chinneadh an ann do shaobhadh suntasach i nDaon-Phoblacht na Síne.

(33)

San fhógra tionscnaimh, shonraigh an Coimisiún freisin, i bhfianaise na fianaise a bhí ar fáil, go bhféadfadh sé gur ghá dó tír ionadaíoch iomchuí a roghnú de bhun Airteagal 2(6a)(a) den bhun-Rialachán, chun an gnáthluach a chinneadh ar bhonn praghsanna nó tagarmharcanna neamhshaofa. Shonraigh an Coimisiún freisin go scrúdódh sé tíortha ionadaíocha eile a d’fhéadfadh a bheith iomchuí i gcomhréir leis na critéir a leagtar amach in Airteagal 2(6a)(a), an chéad fhleasc, den bhun-Rialachán.

(34)

An 20 Deireadh Fómhair 2021, chuir an Coimisiún na páirtithe leasmhara ar an eolas le nóta (“an Chéad Nóta”) maidir leis na foinsí ábhartha a bhí beartaithe aige a úsáid chun an gnáthluach a chinneadh. Sa nóta sin, sholáthair an Coimisiún liosta de na tosca táirgeachta uile amhail amhábhair, saothar agus fuinneamh a úsáidtear chun an táirge faoi athbhreithniú a tháirgeadh. Ina theannta sin, ar bhonn na gcritéar a threoraíonn rogha na bpraghsanna nó na dtagarmharcanna neamhshaofa, shainaithin an Coimisiún tíortha ionadaíocha féideartha, eadhon an Tuirc mar thír ionadaíoch iomchuí. Fuair an Coimisiún barúil amháin ón iarratasóir ar an gCéad Nóta.

(35)

An 7 Feabhra 2022, chuir an Coimisiún na páirtithe leasmhara ar an eolas leis an dara nóta (“an Dara Nóta”) maidir leis na foinsí ábhartha a bhí beartaithe aige a úsáid chun an gnáthluach a chinneadh, agus gurbh í an Tuirc an tír ionadaíoch. Chuir sé in iúl freisin do pháirtithe leasmhara go bhfuil sé ar intinn aige úsáid a bhaint as an dá chuideachta Thurcacha, (D S C Otomotiv agus Samet Kalip ve Madeni) a fheidhmíonn faoi chód NACE Rev2 2599 agus a tháirgeann táirgí sa chatagóir ghinearálta chéanna le RBM mar bhonn chun na costais SGA agus brabús a shuí d’fhonn an gnáthluach a ríomh.

(36)

De réir Airteagal 2(1) den bhun-Rialachán, ‘déanfar an gnáthluach a shuí de ghnáth ar an bpraghas a íocadh nó atá le híoc, i ngnáthchúrsa trádála, ag custaiméirí neamhspleácha sa tír is onnmhaireoir’.

(37)

Mar sin féin, de réir Airteagal 2(6a)(a) den bhun-Rialachán, ‘más rud é go gcinntear […] nach iomchuí praghsanna agus costais intíre a úsáid sa tír is onnmhaireoir toisc gur ann do shaobhadh suntasach sa tír sin de réir bhrí pointe (b), ríomhfar an gnáthluach go heisiach ar bhonn costais táirgthe agus díola a léiríonn praghsanna nó tagarmharcanna neamhshaofa’, agus ‘aireofar sa ghnáthluach ríofa méid neamhshaofa agus réasúnach le haghaidh costais riaracháin, díola agus ghinearálta agus le haghaidh na mbrabús’ (Gairfear “costais SGA” ar ‘costais riaracháin, díola agus ghinearálta’ anseo feasta).

(38)

Mar a mhínítear thíos tuilleadh, tháinig an Coimisiún ar an gconclúid san imscrúdú seo, bunaithe ar an bhfianaise atá ar fáil agus ag féachaint don éagmais comhair ó Rialtas na Síne agus ó tháirgeoirí na Síne, gurbh iomchuí Airteagal 2(6a) den bhun-Rialachán a chur i bhfeidhm.

(39)

In imscrúduithe a rinneadh le déanaí a bhain leis an earnáil cruach i nDaon-Phoblacht na Síne (14)-ós í an chruach an phríomhthoisc tháirgeachta le haghaidh RBM-shuigh an Coimisiún gurbh ann do shaobhadh suntasach de réir bhrí Airteagal 2(6a)(b) den bhun-Rialachán. Tháinig an Coimisiún ar an gconclúid san imscrúdú sin gur ar bhonn na fianaise ar bhí ar fáil, ba iomchuí freisin Airteagal 2(6a) den bhun-Rialachán a chur i bhfeidhm.

(40)

Sna himscrúduithe sin, rinne an Coimisiún amach gurbh ann d’idirghabháil shuntasach ón rialtas sa tSín, rud a shaobhann leithdháileadh éifeachtach na n-acmhainní i gcomhréir le prionsabail an mhargaidh (15). Go háirithe, tháinig an Coimisiún ar an gconclúid gur san earnáil cruach, arb í an príomh-amhábhar í chun an táirge faoi athbhreithniú a thairgeadh, ní hamháin go bhfuil cuid mhór úinéireachta ag Rialtas na Síne uirthi de réir bhrí Airteagal 2(6a)(b), an chéad fhleasc den bhun-Rialachán (16), ach ina theannta sin, go bhfuil Rialtas na Síne in ann cur isteach ar phraghsanna agus ar chostais trí láithreacht Stáit i ngnólachtaí de réir bhrí Airteagal 2(6a)(b), an dara fleasc den bhun-Rialachán (17). Rinne an Coimisiún amach thairis sin go raibh éifeachtaí saofa breise ar an margadh ag láithreacht agus ag idirghabháil an Stáit sna margaí airgeadais agus ó thaobh soláthar amhábhar agus ionchur de freisin. Go deimhin, ar an iomlán, de bharr an chórais pleanála i nDaon-Phoblacht na Síne, fágann sé go mbíonn acmhainní á ndíriú ag Rialtas na Síne ar earnálacha atá ainmnithe mar earnálacha straitéiseacha nó atá tábhachtach go polaitiúil ar shlí eile, seachas iad a bheith á leithdháileadh i gcomhréir le fórsaí an mhargaidh (18). Thairis sin, tháinig an Coimisiún ar an gconclúid nach bhfuil dlíthe féimheachta agus maoine na Síne ag obair i gceart de réir bhrí Airteagal 2(6a)(b), an ceathrú fleasc den bhun-Rialachán, rud a chruthaíonn saobhadh go háirithe nuair a bhíonn gnólachtaí dócmhainneacha á gcoimeád i mbun gnó agus nuair a bhíonn cearta úsáide talún á leithdháileadh sa tSín (19). Ar an gcaoi chéanna, rinne an Coimisiún amach gurbh ann do shaobhadh maidir le costais phá san earnáil cruach de réir bhrí Airteagal 2(6a)(b), an cúigiú fleasc den bhun-Rialachán (20), mar aon le saobhadh sna margaí airgeadais de réir bhrí Airteagal 2(6a)(b), an séú fleasc den bhun-Rialachán, go háirithe maidir le gníomhaithe corparáideacha caipiteal a rochtain sa tSín. (21)

(41)

Bhí faisnéis san iarratas ar an saobhadh in earnáil na cruach, go háirithe rinneadh tagairt do thorthaí na n-imscrúduithe frithdhumpála a rinne an Coimisiún Eorpach a dheimhnigh go bhfuil saobhadh ar earnáil na cruach ann. Bhí faisnéis bhreise san iarraidh maidir le saobhadh in earnáil an mhiotail neamhfheiriúil, go háirithe maidir le nicil ar amhábhar tábhachtach é chun an táirge faoi athbhreithniú a mhonarú. Thairis sin, san iarraidh rinneadh tagairt do thuarascáil an Choimisiúin maidir le saobhadh suntasach sa tSín (22) (“Tuarascáil”), inar cuireadh i dtábhacht go háirithe an saobhadh i margadh an tsaothair agus i rochtain ar mhaoiniú.

(42)

San imscrúdú reatha, scrúdaigh an Coimisiún cibé a raibh nó nach raibh sé iomchuí praghsanna agus costais intíre a úsáid i nDaon-Phoblacht na Síne, i ngeall gurb ann do shaobhadh suntasach de réir bhrí phointe (b) d’Airteagal 2(6a) den bhun-Rialachán. Rinne an Coimisiún amhlaidh ar bhonn na fianaise a bhí ar fáil sa chomhad, lena n-áirítear an fhianaise a bhí sa Tuarascáil, rud a bhraitheann ar fhoinsí atá ar fáil go poiblí. Cumhdaíodh san anailís sin an scrúdú a rinneadh ar na hidirghabhálacha substaintiúla ón rialtas i ngeilleagar na Síne go ginearálta, ach cumhdaíodh freisin staid shonrach an mhargaidh san earnáil ábhartha lena n-áirítear earnáil an táirge faoi athbhreithniú. Chuir an Coimisiún leis na gnéithe fianaiseacha sin tuilleadh lena thaighde féin ar na critéir éagsúla atá ábhartha chun a dheimhniú gurb ann do shaobhadh suntasach i nDaon-Phoblacht na Síne.

(43)

Go sonrach, is ann do chuid mhór úinéireachta ag Rialtas na Síne san earnáil cruach, arb í an príomh-amhábhar í chun RBM a tháirgeadh. Tá roinnt de na táirgeoirí is mó faoi úinéireacht an Stáit. Tagraítear go sonrach do chuid acu sa “Phlean um Oiriúnú agus Uasghrádú an Tionscail Cruach, 2016-2020”. Mar shampla, luann Shanxi Taiyuan Iron & Steel Co. Ltd. (“Tisco”), cuideachta Shíneach atá faoi úinéireacht stáit, ar a shuíomh gréasáin gur ‘mórchuideachta iarainn agus cruach” atá ann “a d’fhorbair ina chóras ollmhór iarainn agus cruach ar mhórscála, atá comhtháite le gnó na mianadóireachta iarainn, agus le táirgeadh, próiseáil, seachadadh agus trádáil iarainn agus cruach’ (23). Mórchuideachta Shíneach eile atá faoi úinéireacht stáit is ea Baosteel atá i mbun monarú cruach agus atá ina chuid de China Baowu Steel Group Co. Ltd., cuideachta a comhdhlúthaíodh le déanaí (ar a dtugtaí Baosteel Group agus Wuhan Iron & Steel roimhe seo) (24) .. Cé go meastar go bhfuil an deighilt ainmniúil beagnach cothrom idir an líon cuideachtaí faoi úinéireacht stáit agus an líon cuideachtaí faoi úinéireacht phríobháideach, as na cúig tháirgeoir cruach ón tSín a aicmítear sna deich dtáirgeoir cruach is mó ar domhan, is cuideachtaí faoi úinéireacht stáit iad ceithre cinn díobh (25). An tráth céanna, cé nár bhain ach thart ar 36 % de tháirgeacht iomlán an tionscail in 2016 leis na deich dtáirgeoir is mó, leag Rialtas na Síne sprioc amach sa bhliain chéanna chun idir 60 % agus 70 % den táirgeadh cruach a chomhdhlúthú go thart ar dheich bhfiontar mhóra nó mar sin faoi 2025 (26). Chuir Rialtas na Síne an rún sin in iúl arís i mí Aibreáin 2019, agus d’fhógair sé go n-eiseofaí treoirlínte maidir le comhdhlúthú an tionscail chruach (27). D’fhéadfadh sé gurb é atá i gceist leis an gcomhdhlúthú sin cumaisc éigeantacha na gcuideachtaí príobháideacha brabúsacha agus na gcuideachtaí faoi úinéireacht stáit atá ag tearcfheidhmiú (28).

(44)

Ina theannta sin, san earnáil cruach, tagraítear go sonrach do go leor de na táirgeoirí is mó sa Phlean um Choigeartú agus Uasghrádú an Tionscail Cruach le haghaidh 2016-2020. Mar shampla, luann Tisco ar a shuíomh gréasáin gur ‘mórchuideachta iarainn agus cruach’ atá ann ‘a d’fhorbair ina chóras ollmhór iarainn agus cruach ar mhórscála, atá comhtháite le gnó na mianadóireachta iarainn, agus le táirgeadh, próiseáil, seachadadh agus trádáil iarainn agus cruach’ (29).

(45)

Ós rud é go bhfuil an earnáil RBM an-ilroinnte agus gur cuideachtaí faoi úinéireacht an stáit (SOEnna) iad an chuid is mó de na táirgeoirí, bhí sé dodhéanta teacht ar chóimheas cruinn d’úinéireacht stáit vs. táirgeoirí RBM faoi úinéireacht phríobháideach le linn an imscrúdaithe.

(46)

Le sciar ard SOEnna in earnáil na cruach, an príomh-amhábhar chun meicníochtaí ceanglóra fháinnigh a tháirgeadh, cuirtear cosc ar tháirgeoirí atá faoi úinéireacht phríobháideach fiú oibriú faoi dhálaí margaidh. Go deimhin, tá cuideachtaí faoi úinéireacht phoiblí agus cuideachtaí faoi úinéireacht phríobháideach san earnáil RBM araon faoi réir maoirseacht beartais agus treorach freisin mar a leagtar amach in aithrisí (47) go (53) thíos.

(47)

Maidir le Rialtas na Síne a bheith in ann cur isteach ar phraghsanna agus ar chostais tríd an Stát a bheith i láthair i ngnólachtaí de réir bhrí Airteagal 2(6a)(b), an dara fleasc den bhun-Rialachán, níor fhiosraigh an t-imscrúdú cuideachtaí aonair, ós rud é go bhfuil earnálacha na gceanglóirí ilroinnte agus áirítear orthu FBManna agus cuideachta faoi úinéireacht stáit den chuid is mó.

(48)

Thairis sin, tá beartais i bhfeidhm san earnáil RBM lena ndéantar idirdhealú i bhfabhar táirgeoirí intíre nó lena ndéantar tionchar ar an margadh ar shlí eile de réir bhrí Airteagal 2(6a)(b), an tríú fleasc den bhun-Rialachán.

(49)

Measann Rialtas na Síne gur príomhthionscal é an tionscal cruach, arb í an phríomh-chomhpháirt i dtáirgeadh RBM í (30). Deimhnítear é sin sna pleananna, treoracha agus doiciméid iomadúla eile ina ndírítear ar an gcruach, a eisítear ar leibhéal náisiúnta, réigiúnach agus cathrach amhail ‘Steel Industry Adjustment and Upgrading Plan for 2016-2020’. Luaitear sa Phlean sin gurb ‘earnáil bhunúsach thábhachtach de gheilleagar na Síne, cloch choirnéil náisiúnta’ é an tionscal cruach (31). Cumhdaítear sna príomhchúraimí agus cuspóirí a leagtar amach sa Phlean seo, gach gné d’fhorbairt an tionscail (32).

(50)

Beartaítear sa 13ú Plean 5 bliana (33) maidir leis an bhForbairt Eacnamaíoch agus Shóisialta go dtabharfaí tacaíocht d’fhiontair a tháirgeann cineálacha táirge cruach ardleibhéil (34). Dírítear ann freisin ar cháilíocht, marthanacht agus iontaofacht táirge a bhaint amach trí thacú le cuideachtaí a mbíonn teicneolaíochtaí in úsáid acu a bhaineann le táirgeadh glan cruach, rolladh beacht, agus feabhas ar cháilíocht (35).

(51)

In Catalogue for Guiding Industry Restructuring [Catalóg um Athstruchtúrú Tionscail a Threorú] (Leagan 2011) (2013 Leasú) (36) (“an Chatalóg”), liostaítear cruach mar thionscal atá á spreagadh.

(52)

Déanann Rialtas na Síne treoraíocht bhreise ar fhorbairt na hearnála i gcomhréir le raon leathan uirlisí agus treoracha beartais a bhaineann, inter alia leo seo a leanas: comhdhéanamh agus athstruchtúrú an mhargaidh, amhábhair, infheistíocht, díothú acmhainneachta, raon táirgí, athshocrú, uasghrádú, etc. Ar an mbealach sin agus ar bhealaí eile, déanann Rialtas na Síne gach gné, nach mór, d’fhorbairt agus d’fheidhmiú na hearnála a stiúradh agus a rialú (37). D’fhéadfaí a áitiú gurb í fadhb reatha na ró-acmhainneachta an léiriú is soiléire ar impleachtaí bheartais Rialtas na Síne agus ar an saobhadh a eascraíonn astu.

(53)

Mar achoimre, tá bearta i bhfeidhm ag Rialtas na Síne chun oibreoirí a spreagadh chun cuspóirí beartais phoiblí maidir le tacú le tionscail spreagtha a chomhlíonadh, lena n-áirítear cruach a tháirgeadh mar an príomh-amhábhar a úsáidtear i monaraíocht na meicníochtaí ceanglóra fháinnigh. Cuireann bearta den sórt sin bac ar ghnáthoibriú fhórsaí an mhargaidh.

(54)

Leis an imscrúdú reatha, níor nochtadh aon fhianaise ar chur i bhfeidhm idirdhealaitheach nó ar fhorfheidhmiú easnamhach na ndlíthe féimheachta agus maoine de réir Airteagal 2(6a)(b), an ceathrú fleasc, den bhun-Rialachán in earnáil na dtúr gaoithe, rud dá dtagraítear thuas in aithris (40), ar cur i bhfeidhm nó forfheidhmiú é nach ndéanfadh difear do mhonaróirí na dtúr gaoithe cruach.

(55)

Ina theannta sin, tá an earnáil TPF faoi thionchar an tsaofa ar chostais phá de réir bhrí Airteagal 2(6a)(b), an cúigiú fleasc den bhun-Rialachán, rud dá dtagraítear thuas in aithris (40) freisin. Déanann an saobhadh sin difear don earnáil go díreach (nuair a bhíonn an túir ghaoithe chruach nó na príomh-ionchuir á dtáirgeadh) agus go hindíreach araon (le linn rochtain ar chaipiteal nó ar ionchuir ó chuideachtaí atá faoi réir an chórais saothair chéanna i nDaon-Phoblacht na Síne) (38).

(56)

Thairis sin, níor tíolacadh aon fhianaise san imscrúdú sin a léiríonn nach ndéanann idirghabháil an rialtais sa chóras airgeadais difear d’earnáil táirgí áirithe cothrom-rollta de chruach shileacain-leictreach dírithe ar ghráinní de réir Airteagal 2(6a)(b), an séú fleasc den Rialachán bunúsach, dá dtagraítear freisin thuas in aithris (40). Dá bhrí sin, déantar difear tromchúiseach do dhálaí an mhargaidh ar gach leibhéal de dheasca idirghabháil shubstaintiúil an rialtais sa chóras airgeadais.

(57)

Ar deireadh, meabhraíonn an Coimisiún go bhfuil roinnt ionchur ag teastáil chun RBM a tháirgeadh. Tá an tSín ar cheann de na táirgeoirí móra cruach – an príomh-amhábhar sa phróiseas táirgthe RBM. Nuair a cheannaíonn táirgeoirí RBM na hionchuir sin nó nuair a dhéanann siad conarthaí lena n-aghaidh, is léir go mbíonn na praghsanna a íocann siad (agus a dhéantar a thaifeadadh mar a gcuid costas) neamhchosanta ar an saobhadh sistéamach céanna a luadh roimhe. Mar shampla, fostaíonn soláthróirí na n-ionchur lucht saothair a bhíonn faoi réir an tsaofa. Féadfaidh siad airgead a fháil ar iasacht a bheidh faoi réir shaobhadh na hearnála airgeadais/leithdháileadh an chaipitil. Ina theannta sin, bíonn siad faoi réir an chórais pleanála is infheidhme maidir le gach leibhéal rialtais agus earnálacha.

(58)

Dá bharr sin, ní hamháin nach iomchuí praghsanna díola intíre TPF a úsáid de réir bhrí Airteagal 2(6a)(a) den bhun-Rialachán, ach tá na costais ionchuir uile faoi thionchar freisin (lena n-áirítear amhábhair, fuinneamh, talamh, maoiniú, lucht saothair, etc.) toisc go ndéanann idirghabháil shubstaintiúil an rialtais difear dá bpraghasmhúnlú, mar a thuairiscítear i gCodanna I agus II den Tuarascáil. Go deimhin, idirghabhálacha an rialtais a thuairiscítear i ndáil le leithdháileadh caipitil, talamh, lucht saothair, fuinneamh agus amhábhair, is ann do na hidirghabhálacha sin ar fud Dhaon-Phoblacht na Síne. Ciallaíonn sé sin, mar shampla, nuair a chuirtear réimse tosca táirgeachta le chéile chun ionchur a tháirgeadh sa tSín, is ionchur é atá neamhchosanta ar shaobhadh suntasach. Is amhlaidh atá d’ionchur an ionchuir agus mar sin de. Níor thug Rialtas na Síne ná na táirgeoirí onnmhairiúcháin san imscrúdú reatha aon fhianaise ná argóint ina choinne sin.

(59)

Mar a tugadh le fios in aithris (29), níor chuir Rialtas na Síne barúlacha in iúl nó níor sholáthair sé fianaise lenar tacaíodh nó lenar bréagnaíodh an fhianaise atá sa cháschomhad, lena n-áirítear an Tuarascáil agus an fhianaise bhreise a sholáthair an gearánach maidir le saobhadh suntasach a bheith ann agus/nó maidir lena iomchuí atá cur i bhfeidhm Airteagal 2(6a) den bhun-Rialachán sa chás faoi chaibidil.

(60)

Mar achoimre, léirigh an fhianaise a bhí ar fáil nach toradh ar fhórsaí an mhargaidh shaoir iad praghsanna ná costais an táirge faoi athbhreithniú, lena n-áirítear costais na n-amhábhar, an fhuinnimh agus saothair, toisc go bhfuil siad faoi thionchar idirghabhálacha substaintiúla ón rialtas de réir bhrí 2(6a)(b) den bhun-Rialachán, mar a léiríonn an tionchar iarbhír nó an tionchar féideartha atá ag ceann amháin nó níos mó de na gnéithe ábhartha a liostaítear iontu. Ar an mbonn sin, agus in éagmais aon chomhoibriú ó Rialtas na Síne, ba é conclúid an Choimisiúin nach iomchuí praghsanna agus costais intíre a úsáid chun an gnáthluach a shuí sa chás seo. Dá bhrí sin, chuaigh an Coimisiún ar aghaidh leis an ngnáthluach a ríomh go heisiach ar bhonn na gcostas táirgthe agus díola agus praghsanna nó tagarmharcanna neamhshaofa á léiriú, is é sin, sa chás seo, ar bhonn na gcostas comhfhreagrach táirgthe agus díola i dtír ionadaíoch iomchuí, i gcomhréir le hAirteagal 2(6a)(a) den bhun-Rialachán, mar a pléadh sa roinn a leanas.

(61)

Bunaíodh roghnú na tíre ionadaíche ar na critéir seo a leanas de bhun Airteagal 2(6a) den bhun-Rialachán:

(62)

Mar a mhínítear in aithrisí (34) agus (35), d’eisigh an Coimisiún dhá nóta i gcomhair an chomhaid faoi na foinsí chun an gnáthluach a shuí: an chéad nóta faoi thosca táirgeachta an 20 Deireadh Fómhair 2021 (an “Chéad Nóta”) agus an an dara nóta faoi thosca táirgeachta an 7 Feabhra 2022 (an “Dara Nóta”). Sna nótaí sin, tugadh tuairisc ar na fíorais agus ar an bhfianaise is bun leis na critéir ábhartha agus tugadh aghaidh iontu ar na barúlacha a fuarthas ó na páirtithe maidir leis na gnéithe sin agus maidir leis na foinsí ábhartha. Sa Dara Nóta, chuir an Coimisiún páirtithe leasmhara ar an eolas go raibh sé ar intinn aige an Tuirc a úsáid ina tír ionadaíoch iomchuí sa chás seo dá mba rud é go ndeimhneofaí saobhadh suntasach de bhun Airteagal 2(6a) den bhun-Rialachán.

(63)

Sa Chéad Nóta, shainaithin an Coimisiún an Tuirc agus an Téalainn mar thíortha lena mbaineann leibhéal forbartha eacnamaíche mar atá ag an tSín de réir an Bhainc Dhomhanda, i.e. aicmíonn an Banc Domhanda iad go léir ina dtíortha “ard-mheánioncaim” ar bhonn ollioncam náisiúnta, tíortha inar fios go bhfuil táirgeadh an táirge faoi athbhreithniú, sin nó táirge atá i gcatagóir ghinearálta chéanna agus/nó in earnáil chéanna an táirge faoi athbhreithniú ar siúl.

(64)

Fuarthas barúil amháin ar an nóta ón iarratasóir. D’aontaigh an t-iarratasóir gur rangaíodh an dá thír mar thíortha ard-mheánioncaim. Mar sin féin, dúirt an t-iarratasóir, ina fhreagra ar an gcéad Nóta, nach raibh aon eolas aige ar chuideachtaí sa Tuirc agus sa Téalainn a tháirgeann meicníochtaí ceanglóra fháinnigh, bunaithe ar bhlianta fada de mhonarú agus díol an táirge faoi athbhreithniú. Ina theannta sin, dúirt an t-iarratasóir go raibh mearbhall idir táirgeadh ceanglóirí fáinneacha, i.e. táirge iartheachtach, agus meicníochtaí ceanglóra fháinnigh, i.e. cuid mhiotail an ceanglóra. Maidir leis na cuideachtaí a thíolaic an Coimisiún mar tháirgeoirí sa Tuirc agus sa Téalainn, dúirt an t-iarratasóir gur cuideachtaí stáiseanóireachta a tháirgeann an táirge iartheachtach na cuideachtaí uile a liostaítear i Nóta an 20 Deireadh Fómhair. Mhínigh an t-iarratasóir, san iarratas ar athbhreithniú, gur roghnaigh sé an Tuirc mar gheall ar a méid agus ar a forbairt eacnamaíoch, agus bhí a fhios go maith aige nach raibh táirgeadh RBM sa Tuirc. Dá bhrí sin, mhol sé cuideachtaí a bhfuil modhanna táirgthe comhchosúla acu, FOP agus eilimintí monaraíochta bunaithe ar chód NACE Rev2 2599.

(65)

Toisc nach ionann leibhéal forbartha eacnamaíche do gach tír ina dtáirgtear an táirge faoi athbhreithniú ná an leibhéal forbartha eacnamaíche, chuir an Coimisiún in iúl go n-úsáidfeadh sé táirgeadh táirge sa chatagóir ghinearálta táirgí céanna, cód NACE Rev2 2599, don táirge faoi athbhreithniú, chun tír ionadaíoch iomchuí a bhunú d’fhonn Airteagal 2(6a) den bhun-Rialachán a chur i bhfeidhm.

(66)

Maidir leis na tíortha a bhreithnítear agus a luaitear thuas, rinne an Coimisiún fíorú breise ar infhaighteacht na sonraí poiblí, agus go háirithe sonraí airgeadais poiblí ó tháirgeoirí an táirge i gcatagóir ghinearálta chód NACE Rev2 2599.

(67)

Rinne an Coimisiún imscrúdú breise ar na sonraí airgeadais de chuid na gcuideachtaí a shainaithin an t-iarratasóir atá ar fáil go poiblí (Cód NACE Rev2 2599). Cé nach bhfuil aon táirgí á n-athbhreithniú ag na cuideachtaí sin, baineann siad úsáid as FOPanna comhchosúla ina bpróiseas monaraíochta. Chinn an Coimisiún nach raibh ach dhá cheann de na sé chuideachta a sainaithníodh faoi chód NACE Rev2, eadhon D S C Otomotiv agus Samet Kalip ve Madeni, sa Tuirc araon. Chinn an Coimisiún go raibh an dá chuideachta shainaitheanta brabúsach le linn thréimhse an imscrúdaithe athbhreithniúcháin. Is féidir na hardleibhéil chomparáideacha de SG&A agus de bhrabús nuair a bhíonn meán ualaithe an dá chuideachta in úsáid a mhíniú toisc gur táirgeoirí móra ina n-earnálacha faoi seach iad an dá chuideachta sin. Soláthraíonn D S C Otomotiv an earnáil gluaisteán, agus tá Samet Kalip imreoir mór i margadh domhanda an tionscail gabhála troscáin. Ar chaoi ar bith, níl aon fhaisnéis faighte ag an gCoimisiún a thugann le fios nach mbeadh leibhéil SG&A agus brabús D S C Otomotiv agus Samet Kalip réasúnta don earnáil ina n-oibríonn siad.

(68)

Rinne an Coimisiún anailís freisin ar allmhairí na bpríomhthosca táirgeachta go dtí an Tuirc. Léiríodh san anailís a rinneadh ar shonraí allmhairí nach raibh tionchar ábhartha ag allmhairí ón tSín nó ó aon cheann de na tíortha a liostaítear in Iarscríbhinn I a ghabhann le Rialachán (AE) 2015/755 ó Pharlaimint na hEorpa agus ón gComhairle (41) ar allmhairí isteach sa Tuirc ar mhórthosca táirgeachta agus, dá bhrí sin, go bhféadfaí an Tuirc a úsáid mar thír ionadaíoch iomchuí.

(69)

I bhfianaise na mbreithnithe thuas, chuir an Coimisiún na páirtithe leasmhara ar an eolas leis an Dara Nóta go raibh sé beartaithe aige an Tuirc a úsáid mar thír ionadaíoch iomchuí chun praghsanna nó tagarmharcanna neamhshaofa a shuí ar mhaithe leis an ngnáthluach a ríomh, i gcomhréir le hAirteagal 2(6a)(a), an chéad fhleasc den bhun-Rialachán.

(70)

Iarradh ar na páirtithe leasmhara a dtuairimí a thabhairt maidir lena oiriúnaí atá an Tuirc mar thír ionadaíoch. Ní bhfuarthas aon bharúil.

(71)

Roghnú thosaigh na dtíortha ionadaíocha féideartha agus na gcuideachtaí oiriúnacha a bhfuil sonraí atá ar fáil go poiblí acu, ní chuireann sin chosc ar an gCoimisiún a rogha agus a thaighde a fhorlíonadh nó a bheachtú ag céim níos déanaí, lena n-áirítear trí mholtaí nua a chur ar aghaidh maidir le tíortha ionadaíocha féideartha. Go deimhin, is é príomhchuspóir na Nótaí maidir le tosca táirgeachta a iarradh ar pháirtithe leasmhara a mbarúlacha a thabhairt maidir le réamhthaighde sheirbhísí an Choimisiúin agus, más gá, roghanna eile a fháil a ndéanfaidh seirbhísí an Choimisiúin machnamh orthu. Thairis sin, tá iarscríbhinn ar leith sna Nótaí chun treoraíocht a thabhairt do pháirtithe faisnéis a chur isteach maidir le tíortha agus/nó cuideachtaí breise a d’fhéadfadh a bheith ionadaíoch chun críoch Airteagal 2(6a)(a) den bhun-Rialachán.

(72)

Tar éis a shuí gurb í an Tuirc an tír ionadaíoch iomchuí, bunaithe ar gach ceann de na gnéithe thuasluaite, ní raibh aon ghá measúnú a dhéanamh ar leibhéal na cosanta sóisialta agus an chomhshaoil i gcomhréir leis an abairt dheireanach d’Airteagal 2(6a)(a) an chéad fhleasc den bhun-Rialachán.

(73)

I bhfianaise na hanailíse thuas, chomhlíon Meicsiceo na critéir a leagtar síos in Airteagal 2(6a)(a), an chéad fhleasc, den bhun-Rialachán, chun go measfar é a bheith ina thír ionadaíoch iomchuí.

(74)

Sa Chéad Nóta, liostaigh an Coimisiún na tosca táirgeachta amhail ábhair, fuinneamh agus saothar a úsáideann na táirgeoirí onnmhairiúcháin i dtáirgeadh an táirge faoi athbhreithniú agus d’iarr sé ar na páirtithe leasmhara a mbarúil a thabhairt agus faisnéis atá ar fáil go poiblí a mholadh maidir le luachanna neamhshaofa le haghaidh gach ceann de na tosca táirgeachta a luaitear sa nóta sin.

(75)

Ina theannta sin, sa Dara Nóta, luaigh an Coimisiún, chun an gnáthluach a ríomh i gcomhréir le hAirteagal 2(6a)(a) den bhun-Rialachán, go n-úsáidfeadh sé Global Trade Atlas (“GTA”) chun an costas neamhshaofa a dhéanamh amach maidir le formhór na dtosca táirgeachta sa tír ionadaíoch, go sonrach na hamhábhair agus na seachtháirgí. Ina theannta sin, dhearbhaigh an Coimisiún go n-úsáidfeadh sé faisnéis ó Oifig Náisiúnta Staidrimh na Tuirce (42) chun costais neamhshaofa saothair agus fuinnimh a bhunú.

(76)

Agus an ríomh á dhéanamh aige, chuir an Coimisiún luach ar fhorchostais mhonaraíochta san áireamh ann ar mhaithe le costais nár cuimsíodh sna tosca táirgeachta dá dtagraítear thuas a chumhdach. Chun an méid sin a bhunú, bhain sé úsáid as sonraí airgeadais ceann de tháirgeoirí an Aontais a chomhoibrigh leis an imscrúdú agus a chuir faisnéis shonrach ar fáil chun na críche sin (43), Koloman Handler Kft (“KH”). Mínítear an mhodheolaíocht sin go hiomchuí i Roinn 3.3.5..

(77)

Ar deireadh, mar a shonraítear sa Dara Nóta, bhain an Coimisiún úsáid as na sonraí airgeadais ón gcuideachta roghnaithe sa Tuirc, a liostaítear in aithris (67) chun costais SGA agus brabúis a bhunú.

(78)

Leis an dá nóta ar thosca táirgeachta, d’fhéach an Coimisiún le liosta a shuí de thosca táirgeachta agus d’fhoinsí a mbeartaítear iad a úsáid le haghaidh gach toisce táirgeachta amhail ábhair, fuinneamh agus saothar, ar tosca iad a úsáideann táirgeoirí sa tSín chun an táirge faoi athbhreithniú a tháirgeadh. Ní bhfuair an Coimisiún aon bharúil maidir leis an liosta tosca táirgeachta.

(79)

In éagmais comhoibriú ó tháirgeoirí onnmhairiúcháin sa tSín i nós imeachta an athbhreithnithe, b’éigean don Choimisiún brath ar KH, táirgeoir san Eoraip, chun na tosca táirgeachta a úsáidtear i dtáirgeadh RBM a shuí. Bunaithe ar shonraí a bailíodh ó na cuideachtaí sa tSín sa chéad imscrúdú agus ar fhaisnéis atá ar fáil ar shuíomhanna gréasáin táirgeoirí RBM sa tSín, dealraíonn sé go bhfuil a bpróiseas táirgeachta agus na hábhair a úsáidtear cosúil leo siúd a sholáthair KH.

(80)

In éagmais comhoibriú, ní raibh cóid taraife ní ba mhionsonraithe ná na cóid 6 dhigit an Chórais Chomhchuibhithe (“HS”) ag an gCoimisiún le haghaidh gach toisce táirgeachta.

(81)

Ag féachaint don fhaisnéis go léir a sholáthair KS agus don easpa barúlacha ar an dá nóta maidir leis na foinsí chun an gnáthluach a bhaineann leis na tosca táirgeachta a chinneadh, sainaithníodh na tosca táirgeachta agus na cóid HS seo a leanas, i gcás inarb infheidhme:

Tosca táirgeachta RBM

(82)

Chun praghsanna neamhshaofa na n-amhábhar a shuí, mar a dhéantar iad a sheachadadh ag geata táirgeora tíre ionadaíche, d’úsáid an Coimisiún mar bhonn, i gcás gach amhábhair a úsáideann KH i dtáirgeadh RBM, an meánphraghas allmhairiúcháin ualaithe chuig an tír ionadaíoch mar a thuairiscítear in GTA, agus cuireadh dleachtanna allmhairiúcháin agus costais iompair intíre leis an mbonn sin. D’fhíoraigh an Coimisiún na hamhábhair thuairiscithe a úsáideadh agus na cóimheasa tomhaltais ábhartha i monarú an táirge faoi athbhreithniú. Cinneadh praghas allmhairiúcháin sa tír ionadaíoch mar mheán ualaithe phraghsanna aonaid na n-allmhairí ó gach tríú tír gan Daon-Phoblacht na Síne a áireamh ná tíortha nach comhaltaí den Eagraíocht Dhomhanda Trádála iad, a liostaítear in Iarscríbhinn 1 de Rialachán (AE) 2015/755 (44). Bhí na sonraí maidir le staitisticí allmhairiúcháin sách ionadaíoch go fóill tar éis na hallmhairí sin a chur as an áireamh. Chinn an Coimisiún allmhairí ón tSín isteach sa tír ionadaíoch a chur as an áireamh toisc gur tháinig sé ar an gconclúid in aithris (60) nach iomchuí praghsanna agus costais intíre sa tSín a úsáid toisc go bhfuil saobhadh suntasach ann i gcomhréir le hAirteagal 2(6a)(b) den bhun-Rialachán. De bhrí nach bhfuil aon fhianaise ann lena léirítear nach ndéanann an saobhadh céanna difear comhionann do tháirgí a bhfuil sé beartaithe iad a onnmhairiú, mheas an Coimisiún go ndéanann an saobhadh céanna difear do phraghsanna onnmhairiúcháin.

(83)

D’fhonn praghas neamhshaofa na n-amhábhar tráth a seachadta ag geata mhonarcha an táirgeora a shuí, chuir an Coimisiún dleacht allmhairiúcháin na tíre ionadaíche i bhfeidhm, ag na leibhéil faoi seach, ag brath ar thír thionscnaimh na méideanna allmhairithe (45). Costas iompair intíre arna ríomh in aghaidh an kg ar bhonn mheastacháin le haghaidh seachadtaí teorann Iostanbúl-Kapikule, mar a fhoráiltear sa Tuarascáil maidir le Gnó a Dhéanamh ón mBanc Domhanda, chuir an Coimisiún an gcostas sin isteach (46).

(84)

In éagmais comhoibriú ó tháirgeoirí onnmhairiúcháin de chuid na Síne i nós imeachta an athbhreithnithe, brath an Coimisiún ar na sonraí arna soláthar ag KH chun na seachtháirge a fhaightear i dtáirgeadh RBM a shonrú. Níor thuairiscigh an chuideachta ach aon fhotháirge amháin: fuíoll agus dramhaíl d’iarann stánaithe nó de chruach stánaithe

(85)

In éagmais allmhairí na míre thuas sa Tuirc, d’fhéach an Coimisiún ar fhoinse tagarmhairc eile. Ar bhonn asbhaint ó GTA, shainaithin an Coimisiún an t-onnmhaireoir domhanda is mó den táirge i dtrácht – Stáit Aontaithe Mheiriceá (“SAM”). Rinneadh an tagarmharc a ríomh ina dhiaidh sin mar an meánphraghas onnmhairiúcháin ualaithe tagtha i dtír (CIF + dleachtanna allmhairiúcháin sna tíortha a bhfuil allmhairí ó SAM acu) bunaithe ar onnmhairí SAM chuig an gcuid eile den domhan le linn thréimhse an imscrúdaithe athbhreithniúcháin.

(86)

Chun an tagarmharc do chostais saothair a bhunú, bhain an Coimisiún úsáid as staitisticí náisiúnta na Tuirce atá ar fáil go poiblí, lena gcuimsítear cánacha agus tobhaigh fostóirí (47).

(87)

Mar bhonn leis an ríomh, d’úsáid an Coimisiún staitisticí ó Thairseach Sonraí Turkstat a thug eolas mionsonraithe maidir le costas saothair in aghaidh na huaire in earnálacha éagsúla de réir bliana. D’úsáid an Coimisiún an figiúr arna thuairisciú le haghaidh chód NACE Rev2 C.25 “Monarú táirgí miotail réamhdhéanta, seachas innealra agus trealamh” mar thagarmharc.

(88)

Chun an tagarmharc don leictreachas a bhunú, bhain an Coimisiún praghsanna leictreachais an tionscail de réir bandaí tomhaltais arna bhfoilsiú ar shuíomh gréasáin Oifig Staidrimh Náisiúnta na Tuirce (“Turkstat”) (48).

(89)

D’úsáid an Coimisiún meastachán phraghas an leictreachais atá ar fáil i dTairseach Sonraí Turkstat, rud a sholáthraíonn meánphraghsanna leathbhliana na n-aonad leictreachais. Mar thagarmharc, bhain an Coimisiún úsáid as meán na rátaí tionsclaíocha a soláthraíodh do thréimhse an imscrúdaithe athbhreithniúcháin.

(90)

De réir Airteagal 2(6a)(a) den bhun-Rialachán, “áireofar sa ghnáthluach ríofa méid neamhshaofa agus réasúnach le haghaidh costais riaracháin, díola agus ghinearálta agus le haghaidh na mbrabús.” Ina theannta sin, ní mór luach a shuí le haghaidh forchostais mhonaraíochta ar mhaithe leis na costais nár cuimsíodh sna tosca táirgeachta dá dtagraítear thuas a chumhdach.

(91)

Sa bhreis ar na tosca táirgeachta atá in aithris (81) thuas, ríomh an Coimisiún forchostais mhonaraíochta. I bhfianaise an easpa comhair e ó tháirgeoirí na Síne, bhí ríomh na bhforchostas monaraíochta sin bunaithe ar an gcóimheas d’fhorchostais mhonaraíochta arna roinnt ar chostas na monaraíochta a thuairiscigh KH. Cuireadh an céatadán sin i bhfeidhm maidir le costais neamhshaofa na monaraíochta.

(92)

Le haghaidh costais SGA agus brabúis, d’úsáid an Coimisiún sonraí airgeadais an dá tháirgeoir Thurcacha a liostaítear in aithris (67). Chinn an Coimisiún ar dtús céatadán chostais SGA agus brabúis thar chostais na n-earraí a díoladh (“COGS”) i gcás gach táirgeora. Ansin, suíodh meánchostas SGA agus meánbhrabús sa tír ionadaíoch (ualaithe de réir láimhdeachas na gcuideachtaí). Rinneadh cuntais iniúchta na gcuideachtaí sin a bhí ar fáil go poiblí a chur ar fáil do na páirtithe leasmhara mar cheangaltán leis an Dara Nóta.

(93)

Ar bhonn na dtagarmharcanna thuas, ríomh an Coimisiún an gnáthluach de réir na modheolaíochta seo a leanas:

(94)

Ar an gcéad dul síos, shuigh an Coimisiún na costais mhonaraíochta neamhshaofa. In éagmais comhoibriú ó na táirgeoirí onnmhairiúcháin, bhraith an Coimisiún ar an bhfaisnéis a sholáthair KH ar thomhaltas gach toisce táirgeachta (amhábhair, lucht saothair agus fuinneamh) chun an táirge faoi athbhreithniú a tháirgeadh. Rinneadh na méideanna tomhaltais sin a iolrú faoi na costais neamhshaofa in aghaidh an aonaid arna bhunú sa Tuirc, faoi mar a thuairiscítear i Roinn 3.3.4 thuas.

(95)

Ar an dara dul síos, chun teacht ar na costais táirgthe neamhshaofa, chuir an Coimisiún céatadán na bhforchostas monaraíochta a cinneadh, rud a shonraítear in aithris (90), leis na costais mhonaraíochta neamhshaofa.

(96)

Ar deireadh, i dteannta an chostais táirgeachta arna bhunú mar a thuairiscítear in aithris (95), chuir an Coimisiún na costais díola, ghinearálta agus riaracháin agus an brabús chun feidhme sa tír ionadaíoch arna suí mar a mhínítear in aithris (92). Na costais SGA agus brabús arna sloinneadh mar chéatadán COGS agus arna gcur leis na costais táirgthe neamhshaofa, is céatadáin 31,3 % agus 24,7 % faoi seach a bhí iontu.

(97)

An gnáthluach ríomha mar a shonraítear in aithrisí (92) go (96), laghdaíodh é síos go dtí luach neamhshaofa an tseachtháirge. Suíodh luach neamhshaofa an tseachtháirge tríd an gcainníocht a díoladh i dtréimhse an imscrúdaithe athbhreithniúcháin, arna tuairisciú ag KH, a iolrú faoi phraghas neamhshaofa in aghaidh an aonaid arna shuí sa Tuirc, mar a shonraítear i roinn 3.3.4.2 thuas.

(98)

I gcomhair táirgí áirithe, cuireann Daon-Phoblacht na Síne beartas chun feidhme gan ach cuid de CBL a aisíoc ar onnmhairiú an táirge. Chun a áirithiú go sloinnfear an gnáthluach ar an leibhéal céanna cánachais agus a shloinntear an praghas onnmhairí, déantar an gnáthluach a choigeartú aníos de réir na coda sin de CBL a ghearrtar ar onnmhairí an táirge faoi athbhreithniú nár aisíocadh le táirgeoirí onnmhairiúcháin na Síne. Tugadh le fios le sonraí staitisticí ó shuíomh idirlín riaracháin cánach agus custaim na Síne agus le sonraí Transcustoms (49) gur aisíocadh an CBL a gearradh ar onnmhairí WPT go hiomlán le linn na tréimhse imscrúdaithe athbhreithnithe. Dá bhrí sin, coigeartaíodh an gnáthluach deiridh suas faoi 3 % dá réir.

(99)

Ar an mbonn sin, rinne an Coimisiún an gnáthluach a ríomh ar bhonn an phraghais dhírigh i gcomhréir le hAirteagal 2(6a)(a) den bhun-Rialachán. Toisc nár chomhoibrigh aon cheann de na táirgeoirí onnmhairiúcháin, tá feidhm ag an ngnáthluach le haghaidh na tíre ina hiomláine.

(100)

In éagmais chomhoibriú tháirgeoirí onnmhairiúcháin na Síne, is ar bhonn na bhfíoras a bhí ar fáil a cinneadh an praghas onnmhairiúcháin, i gcomhréir le hAirteagal 18 den bhun-Rialachán.

(101)

De réir Eurostat, níor allmhairíodh ach 356 mhíle píosa RBM ón tSín le linn thréimhse an imscrúdaithe athbhreithniúcháin. Tá an méid sin diomaibhseach ní hamháin i bhfianaise thomhaltas iomlán an Aontais, ach freisin ós rud é, mar a mhínítear in aithris (26), gur díoladh líon mór cineálacha éagsúla RBM san Aontas le linn thréimhse an imscrúdaithe athbhreithniúcháin.. In éagmais comhair ó tháirgeoirí onnmhairiúcháin na Síne, níl aon sonraí ag an gCoimisiún maidir leis an meascán táirgí laistigh de mhéideanna allmhairí atá chomh beag sin. Ar na cúiseanna sin, chinn an Coimisiún nach leor na méideanna ísle sin chun cinneadh a dhéanamh ó thaobh leanúint den dumpáil agus rinne sé scrúdú ar an dóchúlacht go dtarlódh dumpáil arís i gcás ina ligfear do na bearta dul i léig.

(102)

Rinne an Coimisiún imscrúdú de réir Airteagal 11(2) den bhun-Rialachán maidir leis an dóchúlacht go leanfar den dumpáil má dhéantar na bearta a aisghairm. Rinneadh anailís ar na gnéithe seo a leanas: arbh ann don dumpáil ar bhonn onnmhairí chuig tríú tíortha, an acmhainneacht táirgeachta agus an acmhainneacht bhreise sa Rúis agus tarraingteacht mhargadh an Aontais.

(103)

Ar bhonn staitisticí allmhairí GTA, shainaithin an Coimisiún na ceithre allmhaireoir RBM ba mhó ó Dhaon-Phoblacht na Síne le linn thréimhse an imscrúdaithe athbhreithniúcháin: Meicsiceo, SAM, an Mhalaeisia agus Vítneam (50). Bhí 61 % d’allmhairí “domhanda” an táirge faoi athbhreithniú ón tSín ag na ceithre thír sin.

(104)

Maidir le honnmhairí RBM na Síne chuig na ceithre phríomh-mhargadh sin, rinneadh na ríomhanna dumpála de réir na modheolaíochta a shonraítear thíos.

(105)

Chun measúnú a dhéanamh ar dhumpáil ón tSín go tríú tíortha, d’úsáid an Coimisiún an gnáthluach arna ríomh mar a shonraítear in aithrisí (93) go (99).

(106)

Toisc nach raibh aon chomhoibriú ó tháirgeoirí na Síne, measadh an praghas onnmhairí ba dhócha a bheadh ar tháirge onnmhairithe chuig an Aontas trí anailís a dhéanamh ar phraghsanna onnmhairí na Síne chuig tríú tíortha le linn thréimhse an imscrúdaithe athbhreithniúcháin, bunaithe ar staitisticí allmhairiúcháin tírshonracha ábhartha ó GTA.

(107)

Thuairiscigh an Mhalaeisia agus Vítneam a luachanna allmhairiúcháin ar leibhéal CAL amháin. Dá bhrí sin, choigeartaigh an Coimisiún na luachanna tuairiscithe go leibhéal SAB trí chostais lasta farraige agus costais árachais a asbhaint (51). Níor ghá an coigeartú sin do Mheicsiceo ná do Stáit Aontaithe Mheiriceá toisc go raibh luachanna allmhairiúcháin ar leibhéal SAB ar fáil.

(108)

Sa dara céim rinneadh luachanna allmhairiúcháin SAB na gceithre thír go léir a choigeartú go dtí an leibhéal an phraghais díreach ón monarcha trí chostas iompair intíre sa tSín a asbhaint (52).

(109)

Rinne an Coimisiún comparáid idir an gnáthluach ríofa agus na praghsanna onnmhairí chuig tríú tíortha ar bhonn an phraghais díreach ón monarcha.

(110)

Léiríodh sa chomparáid thuas corrlach dumpála ar fud na tíre le haghaidh onnmhairí na Síne chuig na ceithre thír, arna shloinneadh mar chéatadán dá luach CAL (53) faoi seach mar a leanas:

(111)

Bheadh corrlach dumpála níos mó ná 20 % mar thoradh ar an meánphraghas onnmhairiúcháin a suíodh le linn thréimhse an imscrúdaithe athbhreithniúcháin i gcás gach ceann de na tíortha thuasluaite i gcomparáid leis an ngnáthluach a leagtar síos i roinn 3.3.6. Léiríonn sé sin, dá mba rud é go dtiocfadh allmhairí ón tSín isteach san Aontas ar an leibhéal sin, gur allmhairí dumpáilte a bheadh iontu.

(112)

Acmhainneacht bhreise sa tSín, atá measta ag 375 mhilliún píosa de réir an iarraidh ar athbhreithniú éaga, tá sé níos mó ná 7 n-oiread thomhaltas iomlán an Aontais a bhfuil 40 milliún píosa i gceist leis – 60 milliún píosa le linn thréimhse an imscrúdaithe athbhreithniúcháin. Cuireadh go mór le hacmhainneacht na Síne de réir a chéile le deich mbliana anuas, agus faoi láthair tá thart ar 830 milliún píosa i gceist leis, méid atá i bhfad níos faide ná a aschur reatha, is é sin 455 mhilliún píosa.

(113)

Ar bhonn an mhéid thuas, mheas an Coimisiún sa deireadh go bhfuil acmhainneachtaí breise suntasacha ag táirgeoirí onnmhairiúcháin na Síne, a d’fhéadfaidís a úsáid chun RBM a tháirgeadh chun a onnmhairiú chuig an Aontas dá ligfí do na bearta dul in éag.

(114)

De réir shonraí GTA, d’onnmhairigh táirgeoirí onnmhairiúcháin na Síne chuig a bpríomh-thríú margaí ar phraghsanna a bhí idir 1,2 % agus 32,5 % ní b’ísle i gcomparáid le meánphraghsanna díola tháirgeoirí an Aontais ar mhargadh an Aontais. Agus an leibhéal praghsanna sin á chur san áireamh, d’fhéadfadh sé go mbeadh sé tarraingteach d’onnmhaireoirí na Síne onnmhairiú chuig an Aontas, toisc má ligfear do na bearta dul in éag, beidh siad in ann díol ar phraghsanna níos airde ná praghsanna a n-onnmhairí chuig tíortha eile ach atá fós faoi phraghsanna thionscal an Aontais.

(115)

Tá margadh an Aontais tarraingteach freisin do tháirgeoirí Síneacha i bhfianaise a mhéide, toisc gurb é an margadh is mó ar domhan é do chineálacha áirithe RBM de réir na hiarrata ar athbhreithniú éaga.

(116)

I bhfianaise a bhfuil thuas, tháinig an Coimisiún ar an gconclúid gur dócha go dtarlódh dumpáil arís dá ligfí do na bearta atá ann faoi láthair dul i léig. Go háirithe, leibhéal an ghnáthluacha a suíodh i nDaon-Phoblacht na Síne, leibhéal na bpraghsanna onnmhairiúcháin ón tSín chuig margaí tríú tíortha, tarraingteacht mhargadh an Aontais agus an acmhainneacht mhór táirgeachta atá ar fáil i nDaon-Phoblacht na Síne, léiríonn siad sin go léir gur dócha go dtarlóidh an dumpáil arís i gcás ina ligfí do na bearta atá ann faoi láthair dul i léig.

(117)

Rinne dhá táirgeoir san Aontas an táirge comhchosúil a mhonarú le linn na tréimhse imscrúdúcháin: Ring Alliance Ringbuchtechnik GmbH (Oroszlany, an Ungáir) agus I.M.L. Industria Meccanica Lombarda S.r.l., (Offanengo, an Iodáil). Is iad “tionscal an Aontais” iad de réir bhrí Airteagal 4(1) den bhun-Rialachán.

(118)

Tá an dá tháirgeoir (arb é an chéad cheann acu an t-iarratasóir) tar éis comhoibriú san imscrúdú. Ós rud é go bhfuil táirgeacht iomlán RBM san Aontas ag an dá chuideachta le chéile le linn thréimhse an imscrúdaithe athbhreithniúcháin, meastar gur ionadaithe iad ar thionscal an Aontais de réir bhrí Airteagal 4(1) den bhun-Rialachán.

(119)

Suíodh gur thart ar 40 000-60 000 tona a bhí i gceist le táirgeacht iomlán an Aontais le linn thréimhse an imscrúdaithe athbhreithniúcháin (54). Shuigh an Coimisiún an uimhir ar bhonn na bhfreagraí ar an gceistneoir ón dá tháirgeoir. Ós rud é gur suíodh na figiúirí micreacnamaíocha agus maicreacnamaíocha ar bhonn sonraí ó dhá tháirgeoir de chuid an Aontais, is de réir raonta a cuireadh na sonraí ar fáil chun rúndacht a áirithiú.

(120)

Shuigh an Coimisiún tomhaltas an Aontais ar bhonn (a) na méideanna díolacháin fíoraithe den táirge comhchosúil ag tionscal an Aontais i margadh an Aontais a tuairiscíodh sna freagraí ceistneora faoi seach ó tháirgeoirí an Aontais, agus (b) na méideanna allmhairí RBM (leibhéal TARIC) i margadh an Aontais arna dtuairisciú in Eurostat agus agus arna dtiontú ina bpíosaí. De réir ainmníocht TARIC a bhí bailí tráth theacht i bhfeidhm Rialachán (AE) 2016/703, shainaithin an Coimisiún dhá ghrúpa de RBM:

(121)

In Eurostat, is meáchan (KG) é an t-aonad tomhais le haghaidh RBM. Ríomh an Coimisiún fachtóir tiontaithe maidir le gach ceann de na grúpaí thuasluaite de RBM, ar bhonn sonraí táirgthe fíoraithe de chuid thionscal an Aontais. Bhain sé úsáid as na fachtóirí tiontaithe arna ríomh ar an gcaoi sin chun na méideanna allmhairiúcháin ábhartha i bpíosaí a shuí.

(122)

Míníodh ríomh na bhfachtóirí tiontaithe sin go cuí i nóta don chomhad (55). Sa nóta sin, sholáthair an Coimisiún foinse na sonraí a d’úsáid sé chun an dá fhachtóir tiontaithe a ríomh (figiúirí díolacháin thionscal an Aontais do thréimhse an imscrúdaithe athbhreithniúcháin arna gcur isteach de réir meáchain agus aonaid) agus an mhodheolaíocht a cuireadh i bhfeidhm (an meáchan iomlán a bhí i díolachán san Aontas ag gach grúpa táirgí roinnte ar líon comhfhreagrach na bpíosaí). Ní bhfuarthas aon tuairimí maidir leis an nóta seo don chomhad.

(123)

Forbraíodh tomhaltas an Aontais mar seo a leanas:

Tábla 1

Tomhaltas i margadh an Aontais

(124)

Léirigh an t-athbhreithniú gur tháinig laghdú 31 % ar thomhaltas RBM san Aontas le linn na tréimhse faoi bhreathnú ó thart ar 70-90 milliún píosa i 2017 go 40-60 milliún píosa le linn thréimhse an imscrúdaithe athbhreithniúcháin (56).

(125)

Is é digitiú an míniú ar an meath leanúnach atá ag teacht ar thomhaltas an Aontais. Mar sin féin, creideann tionscal an Aontais go bhfuil tionchar an digitithe ag an gcéim dheireanach agus go gcobhsóidh an margadh de réir a chéile, go háirithe i gcás na bpríomh-mhargaí, i.e. margadh na scoile agus margadh na samplaí. Ina theannta sin, mar thoradh ar ráig COVID-19 in 2020 tháinig laghdú sealadach breise ar an éileamh sa bhliain sin.

(126)

Shuigh an Coimisiún méid na n-allmhairí ar bhonn staitisticí Eurostat, mar atá mínithe go cuí in aithris (120) thuas. Suíodh an sciar den mhargadh a bhí aige trí allmhairí a chur i gcomparáid le tomhaltas an Aontais mar a leagtar amach i dTábla 1.

(127)

Is mar a leanas a tháinig forbairt ar allmhairí ón tír lena mbaineann:

Tábla 2

Méid na n-allmhairí agus an sciar den mhargadh

(128)

D’fhan méid na n-allmhairí RBM de thionscnamh na Síne C ag leibhéal an-íseal le linn na tréimhse faoi bhreathnú agus a luanaigh siad timpeall sciar 1 % den mhargadh.

(129)

Toisc nach raibh aon chomhoibriú ó tháirgeoirí onnmhairiúcháin i nDaon-Phoblacht na Síne, agus i bhfianaise na gcainníochtaí an-íseal arna n-allmhairiú san Aontas ó Dhaon-Phoblacht na Síne mar a mhínítear in aithris (101), níorbh fhéidir aon phraghsanna allmhairí iontaofa a shuí le linn thréimhse an imscrúdaithe athbhreithniúcháin agus, dá bhrí sin, níorbh fhéidir ríomh fóinteach a dhéanamh ar shladghearradh na bpraghsanna.

(130)

Sna himthosca sin, chinn an Coimisiún an sladghearradh praghais a bhí á dhéanamh ag allmhairí ó Dhaon-Phoblacht na Síne le linn thréimhse an imscrúdaithe athbhreithniúcháin tríd an méid seo a leanas a chur i gcomparáid:

(131)

Sloinneadh toradh na comparáide mar chéatadán de láimhdeachas na dtáirgeoirí ón Aontas le linn na tréimhse imscrúdaithe athbhreithnithe. Léirigh sé sladghearradh suas le 32,5 % ag brath ar na praghsanna do na príomh-mhargaí onnmhairiúcháin a úsáidtear. Tá coinne ann go mbeidh leibhéal comhchosúil sladghearrtha ar mhargadh an Aontais má ligfear do na bearta dul i léig.

(132)

Shuigh an Coimisiún méideanna agus praghsanna na n-allmhairí, agus an mhodheolaíocht chéanna á cur i bhfeidhm aige agus d’úsáid sé le haghaidh na Síne (féach aithris (126)).

(133)

Is mar seo a leanas a tháinig forbairt ar mhéid na n-allmhairí ó thríú tíortha eile le linn na tréimhse faoi bhreathnú:

Tábla 3

Allmhairí ó thríú tíortha

(134)

Le linn na tréimhse faoi bhreathnú ina hiomláine, ba iad an India agus an Chambóid na tíortha is mó a d’onnmhairigh RBM chuig an Aontas. Bhí sciar suntasach de mhargadh an Aontais ag allmhairí ó na tíortha sin le linn na tréimhse faoi bhreathnú ina hiomláine, is é sin idir 10 % agus 16 %. Ba cheart a thabhairt faoi deara, áfach, gur laghdaigh líon agus sciar na n-allmhairí ón India agus ón gCambóid go láidir thar an tréimhse faoi bhreathnú. Tháinig laghdú freisin ar phraghsanna na n-allmhairí sin, agus níl aon fhianaise tugtha ag tionscal an Aontais lena léiriú go ndumpáiltear na hallmhairí sin ar mhargadh an Aontais.

(135)

Is allmhairí fánacha iad na hallmhairí ó na tríú tíortha eile. D’imigh an Téalainn, a bhí ar an dara honnmhaireoir is mó chuig an Aontas, beagnach as an margadh.

(136)

I gcomhréir le hAirteagal 3(5) den bhun-Rialachán, sa scrúdú ar thionchar na n-allmhairí dumpáilte ar an tionscal de chuid an Aontais, áiríodh meastóireacht ar na táscairí eacnamaíocha uile a raibh baint acu le staid an tionscail de chuid an Aontais le linn na tréimhse faoi bhreathnú.

(137)

Mar a luaitear in aithris (16), níor úsáideadh sampláil chun a chinneadh an ndearnadh díobháil do thionscal an Aontais. Dá bhrí sin, chun cinneadh a dhéanamh maidir le díobháil, ní dhearna an Coimisiún idirdhealú idir táscairí díobhála maicreacnamaíocha agus táscairí díobhála micreacnamaíocha toisc gur chomhoibrigh táirgeoirí uile an Aontais leis an athbhreithniú.

(138)

D’fhonn faisnéis rúnda gnó a urramú, ba ghá faisnéis a thíolacadh maidir leis an dá tháirgeoir de chuid an Aontais i raonta. Trí na figiúirí beachta a chur i láthair, bheadh táirgeoir de chuid an Aontais in ann figiúirí táirgeachta beachta an táirgeora eile a ríomh, agus bheadh baol ann go mbeadh oibreoirí eile margaidh a bhfuil sonraí margaidh acu in ann a dhéanamh amhlaidh freisin.

(139)

Is mar seo a leanas a tháinig forbairt ar tháirgeacht, acmhainneacht táirgeachta agus úsáid acmhainneachta iomlán an Aontais le linn na tréimhse faoi bhreathnú:

Tábla 4

Táirgeacht, acmhainneacht táirgeachta agus úsáid acmhainneachta

(140)

Tháinig laghdú 22 % ar tháirgeacht thionscal an Aontais le linn na tréimhse faoi bhreathnú. Lean an treocht sin an treocht sa tomhaltas cé go raibh an titim in aschur táirgeachta thionscal an Aontais níos éadroime ná an laghdú ar thomhaltas. Le linn na tréimhse faoi bhreathnú, tháinig an laghdú 22 % céanna ar an ráta úsáide acmhainneachta ag tionscal an Aontais, toisc gur fhan an acmhainneacht féin de bheith cobhsaí. Shroich an ráta úsáide acmhainneachta leibhéal íseal 50 % go 60 % i ndearbhthéarmaí nach bhfacthas riamh le linn thréimhse an imscrúdaithe athbhreithniúcháin.

(141)

Is mar seo a leanas a tháinig forbairt ar mhéid díolachán thionscal an Aontais agus ar a sciar den mhargadh le linn na tréimhse faoi bhreathnú:

Tábla 5

Méid na ndíolachán agus an sciar den mhargadh