(1)

Ceanglaítear, le Rialachán (AE) Uimh. 1380/2013 ó Pharlaimint na hEorpa agus ón gComhairle (1), go nglactar bearta caomhnaithe agus aird á tabhairt ar an gcomhairle eolaíoch, theicniúil agus eacnamaíoch a bhíonn ar fáil, lena n-áirítear, i gcás inarb ábhartha, tuarascálacha arna dtarraingt suas ag an gCoiste Eolaíoch, Teicniúil agus Eacnamaíoch um Iascach (STECF) agus ag comhlachtaí comhairleacha eile agus aon chomhairle a fhaightear ó chomhairlí comhairleacha.

(2)

Tá sé de dhualgas ar an gComhairle bearta a ghlacadh maidir le deiseanna iascaireachta a shocrú agus a leithdháileadh, lena n-áirítear coinníollacha atá nasctha go feidhmiúil leis sin, de réir mar is iomchuí. Faoi Airteagal 16(4) de Rialachán (AE) Uimh. 1380/2013, socrófar deiseanna iascaireachta i gcomhréir le cuspóirí an Chomhbheartais Iascaigh (CBI) a leagtar amach in Airteagal 2(2) den Rialachán sin. Ina theannta sin, i gcás stoic atá faoi réir pleananna ilbhliantúla sonracha, ba cheart na gabhálacha iomlána incheadaithe (TACanna) a bhunú i gcomhréir leis na spriocanna agus na bearta a leagtar síos sna pleananna sin. Faoi Airteagal 16(1) den Rialachán sin, déanfar deiseanna iascaireachta a leithdháileadh ar na Ballstáit chun go n-áiritheofar cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic éisc nó gach iascaigh.

(3)

Ba cheart TACanna a bhunú, dá bhrí sin, i gcomhréir le Rialachán (AE) Uimh. 1380/2013, ar bhonn na comhairle eolaíche atá ar fáil, agus aird á tabhairt ar ghnéithe bitheolaíocha agus socheacnamaíocha agus cóir chothrom idir earnálacha iascaireachta á háirithiú ag an am céanna, agus i bhfianaise na dtuairimí a cuireadh in iúl le linn an chomhairliúcháin le geallsealbhóirí, go háirithe le linn chruinnithe na gcomhairlí comhairleacha.

(4)

Faoi Airteagal 15 de Rialachán (AE) Uimh. 1380/2013, tá na stoic uile a bhfuil teorainneacha gabhálacha ag gabháil leo faoi réir na hoibleagáide gabhálacha a thabhairt i dtír ón 1 Eanáir 2019, ach tá feidhm a bheith ag díolúintí áirithe. Foráiltear le hAirteagal 16(2) den Rialachán sin, i gcás ina dtabharfar isteach an oibleagáid gabhálacha a thabhairt i dtír i ndáil le stoc éisc, beidh na deiseanna iascaireachta ina léiriú ar ghabhálacha seachas ar ghabhálacha a thabharfar i dtír. Ar bhonn moltaí comhpháirteacha ó na Ballstáit agus i gcomhréir le hAirteagal 15 de Rialachán (AE) Uimh. 1380/2013, ghlac an Coimisiún roinnt rialacháin tarmligthe lena leagtar síos na sonraí, i bhfoirm pleananna ar leith maidir le hábhar muirí aischurtha, a bhaineann le cur chun feidhme na hoibleagáide gabhálacha a thabhairt i dtír.

(5)

Ba cheart a chur san áireamh sna deiseanna iascaireachta le haghaidh stoic speicis a chumhdaítear leis an oibleagáid gabhálacha a thabhairt i dtír, nach gceadaítear a thuilleadh i bprionsabal iasc a aischur. Dá bhrí sin, ba cheart iad a bheith bunaithe ar an bhfigiúr comhairle le haghaidh gabhálacha iomlána arna chur ar fáil ag an gComhairle Idirnáisiúnta um Thaiscéalaíocht na Mara (ICES) (seachas ar an bhfigiúr le haghaidh gabhálacha inmhianaithe). Na cainníochtaí a bhféadfar, mar dhíolúine ón oibleagáid gabhálacha a thabhairt i dtír, leanúint de bheith á n-aischur, ba cheart iad a asbhaint ón bhfigiúr comhairle sin le haghaidh gabhálacha iomlána.

(6)

Is ann do stoic áirithe ar thug ICES comhairle ina leith nach ndéanfaí iad a ghabháil. Mar sin féin, má bhunaítear na TACanna le haghaidh na stoc sin ar an leibhéal a mholtar, thiocfadh feiniméan an ‘tachtspeicis’ chun cinn de thoradh na hoibleagáide gach gabháil a thabhairt i dtír, lena n-áirítear foghabhálacha ó na stoic sin, in iascaigh mheasctha. Chun an chothromaíocht cheart a bhaint amach idir an t-iascach a choinneáil ar bun i bhfianaise na n-impleachtaí tromchúiseacha socheacnamaíocha a d’fhéadfadh a bheith ann mura ndéanfar amhlaidh, agus an gá atá le stádas maith bitheolaíoch a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar gach stoc in iascach measctha ag an uastáirgeacht inbhuanaithe (MSY), is iomchuí TACanna sonracha a bhunú le haghaidh fhoghabhálacha na stoc sin. Ba cheart leibhéal na TACanna sin a shocrú chun a áirithiú go laghdófar ráta básmhaireachta na stoc sin agus go gcuirfear dreasachtaí ar fáil chun an roghnaíocht a fheabhsú agus foghabhálacha na stoc sin a sheachaint. Chun gabhálacha na stoc a laghdú a bhfuil TACanna foghabhála socraithe ina leith, ba cheart na deiseanna iascaireachta le haghaidh na n-iascach as a ngabhtar na stoic sin a shocrú ar leibhéil a chuideoidh le bithmhais na stoc leochaileach a athshlánú go leibhéil inbhuanaithe. Ba cheart bearta teicniúla agus rialaithe a mbeadh dlúthbhaint acu le deiseanna iascaireachta a bhunú freisin chun aischur neamhdhleathach a chosc.

(7)

Chun úsáid deiseanna iascaireachta in iascaigh mheasctha i gcomhréir le hAirteagal 16(2) de Rialachán (AE) Uimh. 1380/2013 a ráthú a mhéid is féidir, is iomchuí linn a bhunú le haghaidh malartuithe cuótaí le haghaidh na mBallstát nach bhfuil aon chuóta acu chun a bhfoghabhálacha dosheachanta a chumhdach.

(8)

I gcomhréir le plean ilbhliantúil Uiscí an Iarthair arna bhunú le Rialachán (AE) 2019/472 ó Pharlaimint na hEorpa agus ón gComhairle (2), déanfar an spriocbhásmhaireacht iascaireachta le haghaidh na stoc a liostaítear in Airteagal 1(1) den Rialachán sin a choinneáil laistigh de raonta luachanna básmhaireachta iascaireachta a mbíonn MSY (‘raon FMSY’) a shainítear in Airteagal 2, pointe (2), den Rialachán sin mar thoradh orthu, i gcomhréir le hAirteagal 4 de. Ba cheart, dá bhrí sin, an bhásmhaireacht iascaireachta fhoriomlán le haghaidh doingin mhara Eorpacha (Dicentrarchus labrax) i ranna 8a agus 8b ICES a shocrú i gcomhréir le comhairle MSY ICES agus le luachphointe FMSY, agus gabhálacha tráchtála agus áineasa agus ábhar muirí aischurtha á gcur san áireamh. Is é luachphointe FMSY luach na básmhaireachta iascaireachta lena dtugtar an MSY fadtéarmach. Ba cheart do na Ballstáit ábhartha (an Fhrainc agus an Spáinn) bearta iomchuí a ghlacadh chun a áirithiú nach rachaidh an bhásmhaireacht iascaireachta óna gcabhlaigh iascaigh agus óna n-iascairí áineasa os cionn luachphointe FMSY, mar a cheanglaítear le hAirteagal 4(3) de Rialachán (AE) 2019/472.

(9)

Ba cheart na bearta le haghaidh iascaigh áineasa i gcás doingin mhara Eorpacha a choinneáil ar bun, i bhfianaise thionchar suntasach an iascaigh áineasa ar na stoic lena mbaineann. Ba cheart na teorainneacha gabhála a choinneáil i gcomhréir leis an gcomhairle eolaíoch. Ba cheart líonta seasmhacha a eisiamh, toisc nach bhfuil siad sách roghnach agus is dóichí go ngabhfar líon is airde eiseamal ná na teorainneacha atá leagtha síos. I bhfianaise na n-imthosca comhshaoil, sóisialta agus eacnamaíocha, agus go háirithe spleáchas na n-iascairí tráchtála sna pobail cois cósta ar na stoic atá i gceist, leis na bearta sin maidir le doingin mhara Eorpacha, tá cothromaíocht iomchuí ann idir leasanna na n-iascairí tráchtála agus na n-iascairí áineasa. Go háirithe, leis na bearta sin cuirtear ar a gcumas d’iascairí áineasa iascaireacht a dhéanamh trína dtionchar ar na stoic sin a chur san áireamh.

(10)

An 4 Samhain 2021, ICES comhairle eolaíoch maidir leis an eascann Eorpach (Anguilla anguilla) ina réimse nádúrtha. Mhol ICES, nuair a chuirtear an cur chuige réamhchúraim i bhfeidhm, nár cheart aon ghabhálacha a dhéanamh sna gnáthóga uile in 2022. Baineann sé sin le gabhálacha áineasa agus tráchtála araon agus áirítear leis gabhálacha eascann gloine le haghaidh athstocála agus dobharshaothrú. I gcomhréir leis an gcomhairle sin, meastar gurb iomchuí an tréimhse choiscthe leanúnach 3 mhí a choinneáil ar bun do gach iascaireacht eascann fad a bhíonn an Coimisiún i mbun comhairliúcháin le geallsealbhóirí faoin eascann Eorpach in 2022. Ba cheart feidhm a bheith ag an toirmeasc maidir le gach gníomhaíocht iascaireachta mar a shainítear in Airteagal 4(1), pointe (28), de Rialachán (AE) Uimh. 1380/2013. Ba cheart do na Ballstáit an tréimhse choiscthe 3 mhí as a chéile a chinneadh, treímshe ar cheart a bheith laistigh de thréimhsí is airde imirce na heascainne Eorpaí agus é sin a thuairisciú le faisnéis tacaíochta don Choimisiún faoin 1 Meitheamh 2022.

(11)

An 17 Nollaig 2021 amháin, scaoileadh ICES an chomhairle eolaíoch maidir le hainseabhaithe (Engraulis encrasicolus) i bhfolimistéar 8 ICES (Bá na Bioscáine) don bhliain 2022. Ós rud é gur gá TAC a bheith ann do thús an tséasúir iascaireachta an 1 Eanáir 2022, ba cheart TAC sealadach a shocrú. Ba cheart an TAC sin a shocrú ag 24 000 tona agus an tréimhse ón 1 Eanáir 2022 go dtí an 30 Meitheamh 2022 a chumhdach. Bheadh an leibhéal sin ag freagairt do ghabhálacha an stoic sin, a bheag nó a mhór, sa tréimhse ón 1 Eanáir 2021 go dtí an 30 Meitheamh 2021.

(12)

I ranna 8c, 8d, 8e agus i bhfolimistéir 9 agus 10 ICES agus in uiscí an Aontais in CECAF 34.1.1, déantar trí speiceas ar leith den sól a bhainistiú laistigh de TAC aonair. Ós rud é gur cheart deiseanna iascaireachta do cheann amháin de na stoic sin, eadhon an sól coiteann (Solea solea) i ranna 8c agus 9a ICES, a shocrú i gcomhréir le hAirteagal 4 de Rialachán (AE) 2019/472, ba cheart teorainn ghabhála ar leith a bhunú don speiceas sin, i gcomhréir leis an gcomhairle MSY.

(13)

Is í an chomhairle eolaíoch atá i bhfeidhm maidir le stoic ealásmabrainciach (sciataí, siorcanna, roic) gan aon ghabhálacha a dhéanamh, de dheasca dhrochstádas caomhnaithe na stoc sin. Ina theannta sin, ciallaíonn rátaí arda marthanais nach meastar go méadófaí a mbásmhaireacht iascaireachta tríd an aischur agus go mbeadh an t-aischur tairbhiúil ó thaobh chaomhnú na speiceas sin. Dá bhrí sin, ba cheart toirmeasc a chur ar speiceas den sórt sin a iascach. Faoi Airteagal 15(4), pointe (a), de Rialachán (AE) Uimh. 1380/2013, níl feidhm ag an oibleagáid gabhálacha a thabhairt i dtír maidir leis na speicis a bhfuil lánchosc iascaireachta ina leith.

(14)

Bunaíodh plean ilbhliantúil na Mara Thuaidh le Rialachán (AE) 2018/973 ó Pharlaimint na hEorpa agus ón gComhairle (3) agus tháinig an plean i bhfeidhm in 2018. Bunaíodh plean ilbhliantúil Uiscí an Iarthair le Rialachán (AE) 2019/472 agus tháinig an plean i bhfeidhm in 2019. Ba cheart deiseanna iascaireachta le haghaidh na stoc a liostaítear in Airteagal 1(1) de na Rialacháin sin a shocrú i gcomhréir leis na spriocanna (raonta FMSY) agus leis na coimircí dá bhforáiltear sna Rialacháin sin. Leagadh amach na raonta FMSY sa chomhairle ábhartha ICES. I gcás nach mbeidh faisnéis eolaíoch leormhaith ar fáil, ba cheart deiseanna iascaireachta le haghaidh na stoc foghabhála a shocrú i gcomhréir leis an gcur chuige réamhchúraim, mar a leagtar amach i Rialacháin (AE) 2018/973 agus (AE) 2019/472.

(15)

I gcomhréir le hAirteagal 7 de Rialachán (AE) 2018/973, i gcás ina léireoidh an chomhairle eolaíoch go bhfuil bithmhais stoic sceite aon cheann de na stoic éisc dá dtagraítear in Airteagal 1(1) den Rialachán sin faoi bhun an phointe tagartha teorann (Blim), tá bearta ceartaitheacha breise le déanamh chun a áirithiú go ndéanfar leibhéil an stoic éisc a athbhunú go tapa os cionn na leibhéal atá in ann MSY a tháirgeadh. Féadfar, go háirithe, a áireamh ar na bearta ceartaitheacha sin iascaireacht dhírithe an stoic atá i gceist a chur ar fionraí agus deiseanna iascaireachta le haghaidh na stoc sin nó na stoc eile san iascach a laghdú go leordhóthanach.

(16)

Ba cheart na TACanna le haghaidh tuinníní gorma (Thunnus thynnus) san Atlantach Thoir agus sa Mheánmhuir a bhunú i gcomhréir leis na rialacha a leagtar síos i Rialachán (AE) 2016/1627 ó Pharlaimint na hEorpa agus ón gComhairle (4).

(17)

Maidir le stoic a bhfuil easpa sonraí leordhóthanacha nó iontaofa ina leith ar a bhfuil meastacháin ar mhéid na stoc le bunú, ba cheart, le bearta bainistíochta agus leibhéil TAC, cloí leis an gcur chuige réamhchúraim i leith bainistiú iascach mar a shainítear é in Airteagal 4(1), pointe (8), de Rialachán (AE) Uimh. 1380/2013, agus fachtóirí stocshonracha á gcur san áireamh san am céanna, go háirithe an fhaisnéis atá ar fáil faoi threochtaí stoc agus gnéithe maidir le hiascaigh mheasctha.

(18)

Le Rialachán (CE) Uimh. 847/96 ón gComhairle (5), tugadh coinníollacha breise isteach maidir le TACanna a bhainistiú ó bhliain go bliain, lena n-áirítear forálacha solúbthachta le haghaidh TACanna réamhchúraim agus TACanna anailíseacha (Airteagail 3 agus 4). Faoi Airteagal 2 den Rialachán sin, bíonn sé le cinneadh ag an gComhairle, agus TACanna á mbunú aici, cé na stoic nach mbeidh feidhm ag Airteagail 3 nó 4 den Rialachán sin maidir leo, go háirithe ar bhonn stádas bitheolaíoch na stoc sin. In 2014, tugadh sásra eile solúbthachta bliain go bliain isteach faoi Airteagal 15(9) de Rialachán (AE) Uimh. 1380/2013 maidir le gach stoc atá faoi réir na hoibleagáide gabhálacha a thabhairt i dtír. Chun solúbthacht iomarcach a sheachaint a bhainfeadh an bonn de phrionsabal shaothrú céillí freagrach na n-acmhainní bitheolaíocha muirí, gnóthú chuspóirí an Chomhbheartais Iascaigh (CBI) agus stádas bitheolaíoch na stoc, níor cheart feidhm a bheith ag Airteagail 3 agus 4 de Rialachán (CE) Uimh. 847/96 maidir le TACanna anailíseacha ach amháin i gcás nach mbaintear leas as an tsolúbthacht bliain go bliain dá bhforáiltear in Airteagal 15(9) de Rialachán (AE) Uimh. 1380/2013.

(19)

I gcás nach leithdháilfear TAC ach ar aon Bhallstát amháin, is iomchuí a thabhairt de chumhacht don Bhallstát sin TAC a chinneadh i gcomhréir le hAirteagal 2(1) den Chonradh ar Fheidhmiú an Aontais Eorpaigh (CFAE). Ba cheart a áirithiú go ngníomhóidh an Ballstát, agus leibhéal TAC á chinneadh aige, ar bhealach a bheidh comhchuí go hiomlán le prionsabail agus le rialacha CBI.

(20)

Ní mór na huasteorainneacha iarrachta iascaireachta le haghaidh 2022 a bhunú i gcomhréir le hAirteagail 5, 6, 7 agus 9 de Rialachán (AE) 2016/1627 agus le hIarscríbhinn I a ghabhann leis.

(21)

Chun a ráthú go mbainfear lánúsáid as deiseanna iascaireachta, is iomchuí foráil a dhéanamh do shocrú solúbtha a chur chun feidhme idir limistéir áirithe TAC inarb é an stoc bitheolaíoch céanna atá i gceist.

(22)

I gcás speicis áirithe, amhail speicis áirithe siorcanna, d’fhéadfadh fiú gníomhaíocht theoranta iascaireachta a bheith ina siocair le riosca tromchúiseach caomhnaithe. Ba cheart mar sin srian iomlán a chur ar dheiseanna iascaireachta i gcás speiceas den chineál sin trí bhíthin toirmeasc ginearálta ar iascaireacht a dhéanamh ar na speicis sin.

(23)

Ag an 12ú Comhdháil de na Páirtithe sa Choinbhinsiún maidir le Caomhnú na Speiceas Imirceach Ainmhithe Fiáine (Mainile, an 23-28 Deireadh Fómhair 2017), cuireadh roinnt speiceas leis na liostaí de speicis faoi chosaint i bhFoscríbhinní I agus II a ghabhann leis an gCoinbhinsiún sin. Dá bhrí sin, is iomchuí foráil a dhéanamh do chosaint na speiceas sin maidir le soithí iascaireachta de chuid an Aontais sna huiscí uile agus maidir le soithí iascaireachta nach den Aontas iad ach a bhíonn ag iascaireacht in uiscí an Aontais.

(24)

Tá úsáid na ndeiseanna iascaireachta atá ar fáil do shoithí iascaireachta an Aontais a leagtar amach sa Rialachán seo faoi réir Rialachán (CE) Uimh. 1224/2009 (6) ón gComhairle, agus go háirithe Airteagail 33 agus 34 den Rialachán sin, maidir le gabhálacha agus iarracht iascaireachta a thaifeadadh agus maidir le fógra a thabhairt faoi shonraí i ndáil le hídiú deiseanna iascaireachta. Is gá, dá bhrí sin, na cóid atá le húsáid ag na Ballstáit a shonrú agus sonraí á gcur chuig an gCoimisiún maidir le stoic éisc a thabhairt i dtír atá faoi réir an Rialacháin seo.

(25)

Tá TAC an Aontais le haghaidh haileabónna Graonlannacha (Reinhardtius hippoglossoides) in uiscí idirnáisiúnta fholimistéir 1 agus 2 ICES gan dochar do sheasamh an Aontais maidir le cion iomchuí an Aontais san iascach sin.

(26)

Ag an gcruinniú bliantúil a bhí aige in 2021, ghlac an Coimisiún um Iascach an Atlantaigh Thoir Thuaidh (NEAFC) beart caomhnaithe maidir leis an dá stoc péirsí mara (Sebastes marinus agus Sebastes mentella) i Muir Irminger agus sna huiscí taobh léi, lenar cuireadh toirmeasc ar iascaireacht dhíreach a dhéanamh ar na stoic sin. Ina theannta sin, chuir NEAFC toirmeasc ar ghníomhaíochtaí iascaireachta sa limistéar ina gcomhchruinníonn péirsí mara, chun foghabhálacha a íoslaghdú. Ba cheart na bearta sin, bunaithe ar chomhairle ICES nach ndéanfaí aon ghabhálacha, a chur chun feidhme i ndlí an Aontais. Níorbh fhéidir le NEAFC moladh a ghlacadh maidir le péirsí mara i bhfolimistéir 1 agus 2 ICES. Ba cheart an TAC ábhartha a bhunú le haghaidh an stoic sin i gcomhréir le seasamh an Aontais a cuireadh in iúl in NEAFC.

(27)

I gcás haileabónna Graonlannacha in uiscí idirnáisiúnta fholimistéir 1 agus 2 ICES, agus comhairle eolaíoch ICES á cur san áireamh don bhliain 2022, ba cheart TAC 1 766 thona a shocrú.

(28)

Ag an gcruinniú bliantúil a bhí aige in 2021, chinn an Coimisiún Idirnáisiúnta um Thuinníní Atlantacha a Chaomhnú (ICCAT) na TACanna reatha a choinneáil le haghaidh tuinníní gorma, colgán (Xiphias gladius), mairlíní gorma (Makaira nigricans), mairlíní geala (Tetrapturus albidus), tuinníní buí (Thunnus albacares) agus siorcanna gorma (Prionace glauca) do 2022. Chomh maith leis sin, bhunaigh ICCAT TAC le haghaidh tuinníní mórshúileacha (Thunnus obesus) de 62 000 tona do 2022. Ba cheart na bearta sin a chur chun feidhme i ndlí an Aontais.

(29)

Chun básmhaireacht iascaireachta tuinníní mórshúileacha óga agus tuinníní buí a laghdú, bhunaigh ICCAT uasteorainn de 300 feiste comhthiomsaithe éisc (FADanna) in aghaidh an tsoithigh in 2022 agus tréimhse choiscthe le haghaidh úsáid FADanna. Ba cheart na bearta sin a chur chun feidhme i ndlí an Aontais.

(30)

Ina theannta sin, ghlac ICCAT plean atógála 15 bliana le haghaidh thuinníní colgacha na Meánmhara (Thunnus alalunga) ó 2022 go 2036. Do 2022, shocraigh ICCAT an TAC le haghaidh thuinnín colgach na Meánmhara ag 2 500 tona. Anuas air sin, ghlac ICCAT TAC 37 801 thona le haghaidh thuinníní colgacha an Atlantaigh Thuaidh don tréimhse ó 2022 go 2023, bunaithe ar an riail rialaithe gabhála d’fhonn nós imeachta bainistithe fadtéarmach a ghlacadh don stoc sin. Ba cheart na bearta sin a chur chun feidhme i ndlí an Aontais.

(31)

Ag an gcruinniú bliantúil a bhí aige in 2021, ghlac ICCAT plean téarnaimh freisin do mhácó biorshrónach an Atlantaigh Thuaidh (Isurus oxyrinchus) a gabhadh i gcomhar le hiascaigh eile ICCAT chun deireadh a chur leis an ró-iascaireacht agus chun leibhéil bhithmhaise a bhaint amach de réir a chéile chun tacú le MSY faoi 2070. Áirítear leis an bplean téarnaimh toirmeasc coinneála 2 bhliain a thosóidh in 2022. Socraíodh ráta básmhaireachta iomlán na hiascaireachta ag 250 tonna ar a mhéad go dtí go gcuirfí comhairle eolaíoch nua ar fáil. Ba cheart na bearta sin a chur chun feidhme i ndlí an Aontais.

(32)

Faoi roinnt moltaí ICCAT, tá sé ceadaithe don Aontas, arna iarraidh sin, céatadán socraithe dá chuóta deiseanna iascaireachta nár úsáideadh a thabhairt anonn ó 2020 go 2022. Go dtí go gcuirfear na moltaí sin ó ICCAT chun feidhme i ndlí an Aontais, ba cheart na cuótaí maidir le Ballstáit aonair maidir le stoic áirithe a bhunú ar bhonn cuóta iomlán an Aontais do 2022 arna chinneadh ag ICCAT sula ndéanfaidh ICCAT cuótaí nó asbhaintí nár úsáideadh maidir le cainníochtaí a ndearnadh ró-iascaireacht orthu a thabhairt anonn. Maidir le cuótaí na mBallstát aonair do 2022 lena léirítear aon tabhairt anonn agus asbhaintí, ba cheart na coigeartuithe a dhéanamh ag céim níos déanaí ar bhonn rialacha an Aontais maidir le tabhairt anonn agus asbhaintí amhail Rialachán (CE) Uimh. 847/96, Airteagal 15(9) de Rialachán (AE) Uimh. 1380/2013 nó Airteagal 105 de Rialachán (CE) Uimh. 1224/2009.

(33)

Rinne roinnt Ballstát ró-iascaireacht ar thuinníní colgacha an tuaiscirt in 2019, rud a d’fhág go ndearnadh ró-iascaireacht ar chuóta iomlán an Aontais agus gur chuir ICCAT laghdú i bhfeidhm, in ainneoin nár bhain Ballstáit eile a gcuótaí aonair amach an bhliain chéanna. Chun aghaidh a thabhairt ar an gcás áirithe sin, ba cheart Rialachán (AE) 2021/92 ón gComhairle (7) a leasú trí chuótaí a bhunú le haghaidh thuinníní colgacha an Tuaiscirt do Bhallstáit aonair i gcomhréir le prionsabal na cobhsaíochta coibhneasta agus ar bhonn chuóta iomlán an Aontais arna chinneadh ag ICCAT do 2021 sula ndéanfar aon choigeartú de bharr ró-iascaireachta nó tearcshaothrú ag na Ballstáit. Ba cheart coigeartuithe cuótaí a chur i bhfeidhm ansin ar bhonn rialacha an Aontais maidir le tabhairt anonn agus asbhaintí amhail Rialachán (CE) Uimh. 847/96, Airteagal 15(9) de Rialachán (AE) Uimh. 1380/2013 nó Airteagal 105 de Rialachán (CE) Uimh. 1224/2009 chun a áirithiú go gcuirfear na coigeartuithe a rinne ICCAT san áireamh i gcuóta iomlán an Aontais maidir le tuinnín colgach an tuaiscirt.

(34)

Ag an gcruinniú bliantúil a bhí aige in 2021, ghlac an Coimisiún um Chaomhnú Beo-Acmhainní Muirí Antartacha (CCAMLR) teorainneacha gabhála le haghaidh na spriocspeiceas agus na speiceas foghabhála araon le haghaidh na tréimhse ón 1 Nollaig 2021 go dtí an 30 Samhain 2022. Ba cheart na bearta sin a chur chun feidhme i ndlí an Aontais.

(35)

Ag an gcruinniú bliantúil a bhí aige in 2021, d’athbhreithnigh an Coimisiún um Thuinníní an Aigéin Indiaigh (IOTC) na bearta caomhnaithe agus bainistíochta a glacadh roimhe sin. Ba cheart na bearta sin a bheith curtha chun feidhme cheana féin i ndlí an Aontais. Níor dearbhóidh Rúnaíocht IOTC na teorainneacha gabhála athbhreithnithe do thuinnín buí go dtí gur tháinig deireadh leis an tréimhse oifigiúla agóide an 17 Nollaig 2021. Na teorainneacha gabhála athbhreithnithe le haghaidh tuinníní buí atá dearbhaithe, ba cheart iad a chur chun feidhme i ndlí an Aontais níos déanaí.

(36)

Tionólfar cruinniú bliantúil na hEagraíochta Réigiúnaí um Bainistíocht Iascaigh san Aigéan Ciúin Theas (SPRFMO) ón 24 go dtí an 28 Eanáir 2022. Ba cheart, dá bhrí sin, na bearta reatha i limistéar Choinbhinsiún SPRFMO, atá nasctha go feidhmiúil leis na TACanna a choinneáil go sealadach go dtí go dtionólfar an cruinniú bliantúil agus go dtí go gcinnfear na TACanna do 2022.

(37)

Ag an gcruinniú bliantúil a bhí aige in 2021, ghlac an Coimisiún Idir-Mheiriceánach um Thuinníní Teochriosacha (IATTC) bearta nua caomhnaithe agus bainistíochta le haghaidh tuinníní trópaiceacha don tréimhse ó 2022 go 2024, lenar áiríodh athbhreithniú ar líon na FADanna gníomhacha. Ba cheart na bearta sin a chur chun feidhme i ndlí an Aontais.

(38)

Ag an gcruinniú bliantúil a bhí aige in 2021, shocraigh an Coimisiún um an Tuinnín Gorm Deisceartach a Chaomhnú (CCSBT) an TAC bliantúil don tuinnín gorm deisceartach (Thunnus maccoyii) ar feadh tréimhse 3 bliana (2021 go 2023), ar an leibhéal céanna agus a socraíodh don tréimhse 3 bliana roimhe sin. Ba cheart an beart sin a chur chun feidhme i ndlí an Aontais.

(39)

Ag an gcruinniú bliantúil a bhí aici in 2021, chinn Eagraíocht Iascaigh an Atlantaigh Thoir Theas (SEAFO) an chuid is mó de na TACanna le haghaidh na bpríomhspeiceas faoina cúram a choinneáil ar bun go dtí go mbeidh an chéad chruinniú bliantúil eile aici in 2023. I gcomhréir leis an gcomhairle eolaíoch, laghdaíodh de bheagán na TACanna le haghaidh déadéisc Phatagónacha (Dissostichus eleginoides) agus portáin dhearga domhainmhara (Chaceon spp.). Ba cheart na bearta sin a chur chun feidhme i ndlí an Aontais.

(40)

Ag an gcruinniú bliantúil a bhí aige in 2021, chinn an Coimisiún Iascaigh don Aigéan Ciúin Iartharach agus don Aigéan Ciúin Láir (WCPFC) na bearta reatha is infheidhme i limistéar Choinbhinsiún WCPFC a choinneáil ar bun. Ba cheart na bearta sin a chur chun feidhme i ndlí an Aontais.

(41)

Ag an 43ú cruinniú bliantúil a bhí aici in 2021, ghlac Eagraíocht Iascaigh an Atlantaigh Thiar Thuaidh (NAFO) roinnt deiseanna iascaireachta le haghaidh 2022 i gcás stoic áirithe i bhfolimistéir 1 go 4 de limistéar Choinbhinsiún NAFO. Ba cheart na bearta sin a chur chun feidhme i ndlí an Aontais.

(42)

Ag an 8ú cruinniú a bhí ag Comhaontú Iascaigh an Aigéin Indiaigh Theas (SIOFA) in 2021, coinníodh ar bun na TACanna a glacadh in 2020 le haghaidh na stoc a chumhdaítear leis an gComhaontú sin. Ba cheart na bearta sin a chur chun feidhme i ndlí an Aontais.

(43)

A mhéid a bhaineann leis na deiseanna iascaireachta le haghaidh na bportán sneachta (Chionoecetes spp.) timpeall ar limistéar Svalbard, deonaítear faoi Chonradh an 9 Feabhra 1920 a bhaineann le Spitsbergen (Svalbard) (‘Conradh Pháras 1920’) rochtain chomhionann agus neamh-idirdhealaitheach ar acmhainní do gach Páirtí sa Chonradh sin, lena n-áirítear i ndáil le hiascaireacht. Leagadh amach tuairim an Aontais maidir leis an rochtain sin, a mhéid a bhaineann le hiascaireacht a dhéanamh ar phortáin sneachta ar an scairbh ilchríochach timpeall ar Svalbard, i roinnt notes verbales chuig an Iorua, arb iad na cinn dar dáta an 26 Feabhra 2021 agus an 28 Meitheamh 2021 na cinn is déanaí. Chun a áirithiú go mbeidh saothrú portán sneachta timpeall ar Svalbard comhsheasmhach le cibé rialacha bainistithe neamh-idirdhealaitheacha a d’fhéadfadh an Iorua a leagan amach, a bhfuil ceannasacht agus dlínse aici sa limistéar i gcomhréir le forálacha ábhartha Choinbhinsiún na Náisiún Aontaithe maidir le Dlí na Farraige agus Chonradh Pháras 1920, is iomchuí an líon soithí dá n-údaraítear an t-iascach sin a dhéanamh a shocrú. Tá leithdháileadh na ndeiseanna iascaireachta sin ar na Ballstát teoranta do 2022. Meabhraítear gur ar na Ballstáit bhrataí atá an phríomhfhreagracht, san Aontas, comhlíonadh an dlí is infheidhme a áirithiú.

(44)

Ós rud é go bhfuiltear ag leanúint den phlé leis an Iorua maidir le rochtain chomhionann agus neamh-idirdhealaitheach ar uiscí Svalbard ag cabhlaigh iascaireachta an Aontais a bhíonn ag iascaireacht trosc (Gadus morhua) sa limistéar sin, plé ba cheart a thabhairt i gcrích ag tús 2022, is iomchuí don Aontas cuóta sealadach de chuid an Aontais a bhunú don chéad ráithe de 2022. Ba cheart leibhéal an chuóta shealadaigh sin a shocrú ag 4 500 tona, agus séasúracht an iascaigh á cur san áireamh. Ba cheart na cuótaí a leithdháileadh ar na Ballstáit i gcomhréir le Cinneadh 87/277/CEE ón gComhairle (8) faoi réir na n-oiriúnuithe is gá de bharr tharraingt siar na Ríochta Aontaithe as an Aontas agus de bharr cóimheas leibhéal chuóta sealadach an Aontais agus leibhéal sciar an Aontais den stoc.

(45)

I gcomhréir leis an dearbhú ón Aontas chuig Poblacht Bholavarach Veiniséala maidir le deiseanna iascaireachta in uiscí an Aontais a dheonú do shoithí iascaireachta a mbeidh bratach Veiniséala ar foluain acu sa limistéar eacnamaíoch eisiach amach ó chósta Ghuáin na Fraince (9), ní mór na deiseanna iascaireachta le haghaidh sclamhairí a bheidh ar fáil do Veiniséala in uiscí an Aontais a shocrú.

(46)

Ós rud é gur cheart forálacha áirithe a chur i bhfeidhm ar bhonn leanúnach, agus chun éiginnteacht dhlíthiúil a sheachaint sa tréimhse idir deireadh 2022 agus dáta theacht i bhfeidhm an Rialacháin lena socraítear na deiseanna iascaireachta le haghaidh 2023, ba cheart forálacha an Rialacháin seo maidir le toirmisc agus séasúir choiscthe a bheith fós infheidhme ag tús 2023, go dtí go dtiocfaidh an Rialachán lena socraítear na deiseanna iascaireachta le haghaidh 2023 i bhfeidhm.

(47)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun Ballstáit aonair a údarú chun leithdháiltí iarrachta iascaireachta a bhainistiú i gcomhréir le córas cileavat-lae; chun laethanta breise ar muir a dheonú le haghaidh scor buan gníomhaíochtaí iascaireachta agus le haghaidh cumhdach feabhsaithe breathnóirí eolaíochta; agus chun formáidí scarbhileoga a bhunú chun faisnéis a bhailiú agus a tharchur a bhaineann le haistriú laethanta ar muir idir soithí iascaireachta a bhfuil bratach Ballstáit ar foluain acu. Ba cheart don Choimisiún na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (10).

(48)

Chun cur isteach ar ghníomhaíochtaí iascaireachta a sheachaint agus slí bheatha iascairí an Aontais a áirithiú, ba cheart feidhm a bheith ag an Rialachán seo ón 1 Eanáir 2022, cé is moite de na forálacha a bhaineann le teorainneacha iarrachta iascaireachta, ar cheart feidhm a bheith acu ón 1 Feabhra 2022, agus forálacha áirithe a bhaineann le réigiúin ar leith, ar cheart dáta sonrach cur i bhfeidhm a bheith ag gabháil leo. Ar chúiseanna práinne, go dtiocfadh an Rialachán i bhfeidhm láithreach tar éis a fhoilsithe.

(49)

Glacadh na heagraíochtaí ábhartha réigiúnacha bainistithe iascaigh (ERBInna) bearta idirnáisiúnta áirithe lena gcruthófar nó lena srianfar deiseanna iascaireachta le haghaidh an Aontais ag deireadh 2021 agus bhí feidhm ag na bearta sin sular tháinig an Rialachán seo i bhfeidhm. Ba cheart, dá bhrí sin, feidhm chúlghabhálach a bheith ag na forálacha lena gcuirtear na bearta sin chun feidhme i ndlí an Aontais. Go háirithe, ós rud é go maireann an séasúr iascaireachta i limistéar Choinbhinsiún CCAMLR ón 1 Nollaig go dtí an 30 Samhain agus, ar an gcaoi sin, go leagtar síos deiseanna nó toirmisc áirithe iascaireachta i limistéar Choinbhinsiún CCAMLR le haghaidh na tréimhse dar tús an 1 Nollaig 2021, ba cheart feidhm a bheith ag forálacha ábhartha an Rialacháin seo ón dáta sin. Ní dhéanann an cur i bhfeidhm cúlghabhálach sin dochar do phrionsabal an ionchais dhlisteanaigh ós rud é go bhfuil cosc ar chomhaltaí CCAMLR iascaireacht a dhéanamh i limistéar Choinbhinsiún CCAMLR gan údarú. Thairis sin, i gcomhréir le rialacha ICCAT, ba cheart do na Ballstáit a áirithiú nach n-imscarfaidh a gcuid soithí FADanna le linn na 15 lá roimh thús na tréimhse coiscthe, i.e. ón 17 Nollaig 2021 ar aghaidh.

(50)

I gcomhréir leis an nós imeachta dá bhforáiltear sa Chomhaontú Comhpháirtíochta maidir le hIascaigh Inbhuanaithe idir an tAontas Eorpach de pháirt, agus Rialtas na Graonlainne agus Rialtas na Danmhairge, den pháirt eile, agus sa Phrótacal lena gcuirfí an comhaontú sin chun feidhme (11), tá leibhéal na ndeiseanna iascaireachta atá ar fáil le haghaidh an Aontais in uiscí na Graonlainne in 2022 bunaithe ag an gComhchoiste. Ba cheart na bearta sin a chur chun feidhme i ndlí an Aontais.

(51)

In 2021, reáchtáil an tAontas, an Ríocht Aontaithe agus an Iorua comhairliúcháin thríthaobhacha maidir le sé stoc a chomhroinntear agus a bhainistítear go comhpháirteach i limistéar na Mara Thuaidh, agus é d’aidhm acu teacht ar chomhaontú maidir leis na stoic sin a bhainistiú, lena n-áirítear na deiseanna iascaireachta don chéad bhliain eile. Rinneadh na comhairliúcháin sin idir an 28 Deireadh Fómhair agus an 10 Nollaig 2021, ar bhonn sheasamh an Aontais arna chomhaontú ag an gComhairle. Rinneadh toradh na gcomhairliúchán a dhoiciméadú i dtaifead comhaontaithe, a shínigh Cinn Toscaireachta an Aontais, na Ríochta Aontaithe agus na hIorua an 10 Nollaig 2021. Dá bhrí sin, tá sé beartaithe na deiseanna ábhartha iascaireachta a shocrú ar an leibhéal a chomhaontaítear leis an Ríocht Aontaithe agus leis an Iorua, mar aon leis na forálacha eile sa taifead comhaontaithe.

(52)

In 2021, thionóil an tAontas agus an Iorua comhairliúcháin dhéthaobhacha maidir le dhá stoc a chomhroinntear agus a bhainistítear go comhpháirteach i limistéar Skagerrak, agus é mar aidhm acu teacht ar chomhaontú maidir leis na stoic sin a bhainistiú, lena n-áirítear na deiseanna iascaireachta don chéad bhliain eile. Rinneadh na comhairliúcháin sin idir an 8 Samhain agus an 10 Nollaig 2021, ar bhonn sheasamh an Aontais arna chomhaontú ag an gComhairle. Rinneadh toradh na gcomhairliúchán a dhoiciméadú i dtrí thaifead comhaontaithe, a shínigh Cinn Toscaireachta an Aontais agus na hIorua an 10 Nollaig 2021. Dá bhrí sin, tá sé beartaithe na deiseanna ábhartha iascaireachta a shocrú lena gcuirtear chun feidhme an taifead comhaontaithe leis an Iorua, mar aon leis na forálacha eile sa taifead comhaontaithe.

(53)

Ba cheart na deiseanna iascaireachta le haghaidh trosc sa Mhuir Thuaidh a bhunú chun cothrom na Féinne a áirithiú d’oibreoirí an Aontais agus chun foráil a dhéanamh d’athshlánú an stoic sin. Ba cheart bearta ag a bhfuil baint fheidhmiúil a comhaontaíodh go comhpháirteach leis an Ríocht Aontaithe agus leis an Iorua a choinneáil ar bun chun go bhféadfar an stoc a athshlánú agus a bhainistiú go fadtéarmach ar bhealach inbhuanaithe.

(54)

Thug ICES dá aire in 2019 gur cheart na gabhálacha scadán (Clupea harengus) i roinn 3.a a bheith chomh gar do nialas agus is féidir ó tharla go mbeadh gabháil scadáin sceite earraigh Mhuir Bhailt thiar (WBSS) dosheachanta mura mbeadh limistéar breise nó srian ama ar an iascach scadán. Léiríonn an t-eolas a thug ICES le déanaí go bhfuil méadú ag teacht ar idirmheascadh scadáin WBSS le scadáin na Mara Thuaidh in Skagerrak agus sa Mhuir Thuaidh, áit a bhfuil formhór na ngabhálacha scadán WBSS anois in Skagerrak agus, go pointe áirithe, in oirthear na Mara Thuaidh.

(55)

Sa taifead comhaontaithe ó na comhairliúcháin dhéthaobhacha idir an tAontas Eorpach agus an Iorua i gcás Skagerrak, geallann an tAontas a ghabhálacha iarbhír in Skagerrak a theorannú go 969 dtona, agus chomhaontaigh an Iorua ar a laghad 95 % dá cuóta a aistriú go dtí an Mhuir Thuaidh chun scadáin WBSS a chosaint. Dá réir sin, tá sé beartaithe gabhálacha iomlána na gcabhlach C (HER/03A.) agus D (HER/03A-BC) a theorannú do na Ballstáit ábhartha trí fhonóta coinníll speisialta a chur le táblaí TAC na gcuótaí sin agus, san am céanna, leibhéal na gcuótaí a choinneáil sna táblaí chun an chobhsaíocht choibhneasta a léiriú agus chun an tsolúbthacht ghaolmhar idirlimistéir a rialú. I gcás na hIorua, b’ionann na gabhálacha iarbhír uasta a d’fhéadfaí a dhéanamh in uiscí an Aontais i roinn ICES 3a agus 167 dtona (5 % dá cuóta).

(56)

De réir mhír 13.11 den taifead comhaontaithe ó na comhairliúcháin dhéthaobhacha idir an tAontas agus an Iorua i gcás Skagerrak, ba cheart don Iorua agus don Aontas a bheith in ann iascaireacht a dhéanamh suas le 100 % dá gcuóta scadáin Skagerrak sa Mhuir Thuaidh chun scadáin WBSS a chosaint. Go dtí go dtabharfar na comhairliúcháin dhéthaobhacha leis an Ríocht Aontaithe don bhliain 2022 i gcrích, ní fhéadfadh a dhearbhú an 20 Nollaig go gcoinneofaí an tsolúbthacht ghaolmhar idirlimistéir in uiscí na Ríochta Aontaithe do 2022 i gcás HER/03A. Dá bhrí sin, is gá a shoiléiriú nach mbeadh an tsolúbthacht ghaolmhar idirlimistéir in uiscí na Ríochta Aontaithe infheidhme i bhfonótaí ábhartha chabhlach C go dtí go dtiocfaidh an tAontas agus an Ríocht Aontaithe ar shocrú faoi sholúbthacht den sórt sin sna comhairliúcháin dhéthaobhacha idir an dá pháirtí sin.

(57)

I mír 13.12 den taifead comhaontaithe ó na comhairliúcháin dhéthaobhacha idir an tAontas agus an Iorua i gcás Skagerrak, d’fhógair an tAontas Eorpach go bhfuil sé ar intinn aige úsáid a bhaint as solúbthacht áirithe i limistéir na Mara Thuaidh 4a agus 4b arb ionann í agus cuid an Aontais de 5,7 % de leibhéal chabhlach A, nó 21 038 dtona.

(58)

Reáchtálaigh an tAontas comhairliúcháin dhéthaobhacha gach bliain leis an Iorua agus le hOileáin Fharó maidir le cuótaí a mhalartú agus rochtain chómhalartach do 2022. Leis na comhairliúcháin sin, níor thánagthas ar chomhaontú in 2021.

(59)

Faoi Airteagal 498(2) den Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (12) (“an Comhaontú Trádála agus Comhair”), déanfaidh an tAontas agus an Ríocht Aontaithe comhairliúcháin a reáchtáil go bliantúil, faoin 10 Nollaig gach bliain, chun na TACanna don bhliain dár gcionn a chomhaontú le haghaidh na stoc a liostaítear in Iarscríbhinn 35 den Chomhaontú Trádála agus Comhair. Faoi Airteagal 499(2) den Chomhaontú Trádála agus Comhair, mura bhfuil TACanna den sórt sin comhaontaithe faoin 20 Nollaig, is iad na Páirtithe a dhéanfaidh TACanna sealadacha a shocrú.

(60)

Tugadh na comhairliúcháin dhéthaobhacha leis an Ríocht Aontaithe chun críche an 21 Nollaig. Bhí sé ró-dhéanach an toradh a áireamh sa Rialachán seo, ag cur san áireamh gur cheart feidhm a bheith aige ón 1 Eanáir 2022. Dá bhrí sin, ba cheart don Chomhairle, agus lánurraim á tabhairt aici do Choinbhinsiún na Náisiún maidir le Dlí na Farraige agus do chearta agus d’oibleagáidí na stát cósta agus dá gceannasacht agus dá ndlínse, TACanna sealadacha a shocrú maidir le hiascaireacht a dhéanamh in uiscí an Aontais agus in uiscí idirnáisiúnta, agus in uiscí a dtugann tríú tíortha rochtain do shoithí iascaireachta an Aontais orthu. Leis an toradh de na comhairliúcháin faoi Airteagal 498 den Chomhaontú Trádála agus Comhair, mar a cuireadh in iúl leis an taifead i scríbhinn a síníodh an 21 Nollaig 2021, ba cheart iad a léirú i leasú ar an Rialachán seo, agus ba cheart an leasú sin a ghlacadh a luaithe is féidir.

(61)

Ba cheart é a bheith d’aidhm ag na TACanna sealadacha deimhneacht dhlíthiúil a áirithiú d’oibreoirí an Aontais agus a áirithiú go leanfar de ghníomhaíochtaí iascaireachta inbhuanaithe go dtí go nglacfar leasú den sórt sin i bhfeidhm.

(62)

Tá an cur chuige sin bunaithe ar Airteagal 499(2) den Chomhaontú Trádála agus Comhair, lena bhforáiltear, má fhanann stoc atá liostaithe in Iarscríbhinn 35 a ghabhann leis an gComhaontú sin nó i dTáblaí A agus B d’Iarscríbhinn 36 a ghabhann leis an gComhaontú sin gan TAC comhaontaithe, go bhfuil TAC sealadach le leagan síos ag gach Páirtí, TAC i gcomhréir leis an leibhéal a mholann ICES, a bheidh infheidhme ón 1 Eanáir. De bhun Airteagal 499(3), (4) agus (5) den Chomhaontú Trádála agus Comhair, agus de mhaolú ar mhír 2 den Airteagal sin, tá na TACanna le haghaidh stoic speisialta le socrú i gcomhréir leis na treoirlínte a bhí le glacadh ag an gCoiste Speisialaithe um Iascach faoin 1 Iúil 2021.

(63)

Dá bhrí sin, mar chur chuige ginearálta, ba cheart na deiseanna iascaireachta sealadacha don Aontas a bhunú ar chomhairle ICES le haghaidh 2022. Ba cheart go gcomhfhreagróidís do sciar an Aontais arna chomhaontú faoin gComhaontú Trádála agus Comhair.

(64)

Gan dochar do na treoirlínte maidir le stoic speisialta, agus éagmais na dtreoirlínte sin á cur san áireamh, ba cheart do na TACanna le haghaidh na stoc sin comhchuí le hAirteagal 499 den Chomhaontú Trádála agus Comhair.

(65)

Chomh maith leis sin, ba cheart, leis na TACanna sealadacha, an creat dlíthiúil is infheidhme de chuid an Aontais a chomhlíonadh, go háirithe Airteagal 4, Airteagal 5(3) agus Airteagal 8 de Rialachán (AE) 2019/472 agus Airteagal 4, Airteagal 5(3) agus Airteagal 7 de Rialachán (AE) 2018/973.

(66)

Is ann do stoic áirithe dár eisigh ICES comhairle eolaíoch nach ngabhfar iad in aon chor. Dá mbunófaí TACanna sealadacha le haghaidh na stoc sin ar an leibhéal a léirítear sa chomhairle eolaíoch, thiocfadh feiniméan an ‘tachtspeicis’ chun cinn de thoradh na hoibleagáide gach gabháil a thabhairt i dtír, lena n-áirítear foghabhálacha ó na stoic sin, in iascaigh mheasctha. Chun an chothromaíocht cheart a bhaint amach idir an t-iascach a choimeád ar bun i bhfianaise na n-impleachtaí tromchúiseacha socheacnamaíocha a d’fhéadfadh a bheith i gceist, agus an gá atá le stádas maith bitheolaíoch a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar gach stoc in iascach measctha ag an MSY ag an am céanna, is iomchuí TACanna sealadacha a bhunú le haghaidh fhoghabhálacha na stoc sin. Ba cheart leibhéal na TACanna sin a shocrú ionas go laghdófar ráta básmhaireachta na stoc sin agus go mbeidh sin ina dhreasacht chun roghnaíocht agus seachaint gabhála na stoc sin a fheabhsú. Chun gabhálacha na stoc a laghdú a bhfuil TACanna sealadacha foghabhála socraithe ina leith, ba cheart na deiseanna iascaireachta le haghaidh na n-iascach as a ngabhtar na stoic sin a shocrú ar leibhéil a chuideoidh le bithmhais na stoc leochaileach a athshlánú go leibhéil inbhuanaithe.

(67)

Mar chur chuige ginearálta, ba cheart na TACanna sealadacha a bheith bunaithe ar an tar-rolladh ar na TACanna a ghlac an Chomhairle le haghaidh 2021, agus cóimheas 25 % a chur i bhfeidhm leis na leibhéil TAC do 2021, chun an chéad ráithe de 2022 a chumhdach. Leis an gcur chuige sin ní dhéanfar réamhbhreith ar TACanna cinntitheacha.

(68)

Ba cheart an stoc ar cheart céatadán níos airde ná 25 % a bheith infheidhme ina leith a chinn ar bhonn anailís na mBallstát ar ghlacadh na gcuótaí sa chéad ráithe de na 4 bliana deireanacha (2018-2021). Rinneadh measúnú ar TACanna i gcomhréir leis an gcomhairle eolaíoch agus sciartha an Aontais arna mbunú sa Chomhaontú Trádála agus Comhair á gcur san áireamh agus ní sháraíonn siad na TACanna cinntitheacha arna gcomhaontú leis an Ríocht Aontaithe. Ba cheart na TACanna sealadacha méadaithe sin a bheith i gcomhréir leis an gcomhairle ó ICES, leis an gcreat dlíthiúil is infheidhme de chuid an Aontais agus leis an gComhaontú Trádála agus Comhair. Cuirfidh siad ar a gcumas do shoithí iascaireachta an Aontas na deiseanna iascaireachta a bhfuil siad ina dteideal a úsáid, agus a mbainfí díobh murach sin, de dhroim shéasúracht na hiascaireachta ar na stoic lena mbaineann.

(69)

Meastar i bprionsabal gur leor an leibhéal sin i gcás shoithí iascaireachta an Aontais ar a laghad go dtí an 31 Márta 2022.

(70)

Chuaigh an tAontas i gcomhairle leis an Ríocht Aontaithe maidir leis an gcur chuige chun TACanna sealadacha a shocrú.

(71)

Is stoc comhroinnte le tríú tíortha é doingean mara Thuaisceart na hEorpa a roinntear leis an Ríocht Aontaithe, agus ba cheart, dá bhrí sin, bearta sealadacha a shocrú don chéad ráithe de 2022 le haghaidh an stoic sin, ar feitheamh thoradh na gcomhairliúchán leis an Ríocht Aontaithe.

(72)

Chun cur i bhfeidhm na hoibleagáide gabhálacha a thabhairt i dtír a chur san áireamh agus chun cuótaí le haghaidh foghabhálacha áirithe a chur ar fáil do Bhallstáit nach bhfuil cuóta acu, ba cheart sásra um malartuithe cuótaí a bhunú le haghaidh roinnt stoc.

(73)

Ba cheart leanúint de thréimhsí coiscthe séasúracha le haghaidh iascaigh corr gainimh (Ammodytes spp.) le trealamh tarraingthe áirithe i ranna 2a agus 3a agus i bhfolimistéar 4 ICES ionas go mbeifear in ann láithreacha sceite agus teorannú gabhálacha óga a chosaint.