(1)

In 2013, ghlac an Coimisiún Rialachán Cur Chun Feidhme (AE) Uimh. 185/2013 (2) lena bhforáiltear maidir le hasbhaintí ón gcuóta ronnach arna leithdháileadh ar an Spáinn in 2013 agus sna blianta ina dhiaidh sin i roinn 8c ICES, i bhfolimistéir 9 agus 10 ICES agus in uiscí an Aontais in 34.1.1 CECAF agus ón gcuóta ainseabhaithe i bhfolimistéar 8 ICES de dheasca ró-iascaireacht ar an gcuóta ronnach in 2009.

(2)

Leasaíodh Rialachán Cur Chun Feidhme (AE) Uimh. 185/2013 le Rialachán Cur Chun Feidhme (AE) 2020/1244 (3) ón gCoimisiún a mhéid a bhaineann le hasbhaintí ó chuótaí iascaireachta arna leithdháileadh ar an Spáinn in 2020 agus 2023. D’iarr an Spáinn cead na 3 341 tona nach ndearnadh a iascach in 2019 a úsáid i gcomhair asbhaintí le haghaidh 2019 agus na hasbhaintí dá bhforáiltear le Rialachán Cur Chun Feidhme (AE) Uimh. 185/2013 le haghaidh na mblianta 2020 agus 2023 a laghdú. Ba cheart don asbhaint ón gcuóta ábhartha ronnach le haghaidh na bliana 2019 a leagtar amach san Iarscríbhinn a ghabhann le Rialachán Cur Chun Feidhme (AE) 2020/1244 a bheith méadaithe leis na 3 341 tona sin nach ndearnadh a iascach. Ós rud é gur fágadh ar lár trí thimpiste an méid breise sin, ba cheart na cainníochtaí i gcomhair asbhaintí le haghaidh 2019 a cheartú. Ní dhearna an Spáinn 114 thona den chuóta ábhartha ronnach a iascach in 2020, rud a fhágann gur lú an brú iascaireachta ar an stoc sin i gcomparáid leis an uasmhéid a ceadaíodh de réir na ndeiseanna iascaireachta arna leithdháileadh le haghaidh na bliana sin. D’iarr an Spáinn cead na cainníochtaí sin nach ndearnadh a iascach a úsáid i gcomhair asbhaintí le haghaidh 2020 agus na hasbhaintí dá bhforáiltear le Rialachán Cur Chun Feidhme (AE) Uimh. 185/2013 le haghaidh na bliana 2023 a laghdú dá réir. Ba cheart na cainníochtaí i gcomhair asbhaintí le haghaidh 2020 agus 2023 atá bunaithe i Rialachán Cur Chun Feidhme (AE) Uimh. 185/2013 a oiriúnú.

(3)

Leis na méideanna a bhainfear as na cuótaí ronnach le haghaidh 2023 i ndiaidh na n-athruithe, d’áiritheofaí fós nach sárófaí na deiseanna iascaireachta i gcás na speiceas sin, i gcomhréir le cuspóirí an Chomhbheartais Iascaigh.

(4)

Ba cheart, dá bhrí sin, Rialachán Cur Chun Feidhme (AE) Uimh. 185/2013 a cheartú agus a leasú dá réir.

(5)

Tá na bearta dá bhforáiltear sa Rialachán seo i gcomhréir le tuairim an Choiste um Iascach agus Dobharshaothrú,

(1)

Leagtar síos i Rialachán (AE) Uimh. 142/2011 (2) ón gCoimisiún rialacha áirithe maidir le sláinte an phobail agus sláinte ainmhithe i dtaca le seachtháirgí ainmhithe agus táirgí díorthaithe a chur ar an margadh agus a onnmhairiú.

(2)

Mar thoradh ar an mborradh atá tagtha faoin earnáil táirgthe feithidí tá méid suntasach tuar feithidí ann, rud a dhiúscraítear ar bhealaí éagsúla i ngach Ballstát in éagmais rialacha comhchuibhithe ar leibhéal an Aontais. Ní mór rialacha ar leibhéal an Aontais a leagan síos chun luachshaothrú tuair feithidí mar leasachán a áirithiú.

(3)

Chun críche Rialachán (AE) Uimh. 142/2011, ba cheart “frass” a shainmhíniú mar mheascán de thuar feithidí ina bhfuil codanna d’fheithidí marbha agus substráit chothaithe. Sa “frass” maireann larbhaí feithidí, a mbaintear úsáid astu chun próitéin ainmhíoch phróiseáilte a tháirgeadh nó lena gcaitheamh ag an duine. Ba cheart sainmhíniú “frass” a chur isteach in Iarscríbhinn I a ghabhann le Rialachán (AE) Uimh. 142/2011 d’fhonn na ceanglais maidir le cóireáil agus cur ar an margadh a ailíniú leis na ceanglais maidir le haoileach próiseáilte. Ba cheart, dá bhrí sin, Iarscríbhinn I a ghabhann le Rialachán (AE) Uimh. 142/2011 a leasú dá réir.

(4)

Níl sé i gcónaí indéanta ó thaobh na heacnamaíochta de, conablaigh aonair d’ainmhithe feirmshaothraithe neamh-athchogantacha a bhailiú go tráthúil, go háirithe a mhéid a bhaineann le conablaigh a bhailiú ó fheirmeacha beaga. Dá bhrí sin, is le Caibidil V d’Iarscríbhinn IX a ghabhann le Rialachán (AE) Uimh. 142/2011 a fhoráiltear maidir le modhanna coimeádta chun stóráil shábháilte ainmhithe feirmshaothraithe sonracha atá marbh go dtí go mbailítear iad. Ní chumhdaítear ach conablaigh mucach leis an modh coimeádta “hidrealú agus diúscairt ina dhiaidh sin” i láthair na huaire. Is iomchuí an modh coimeádta sin a leathnú chun conablaigh éanlaithe clóis agus giorriach feirmshaothraithe a chumhdach freisin. Ba cheart, dá bhrí sin, Pointe 2, Roinn 2.B de Chaibidil V d’Iarscríbhinn IX a ghabhann le Rialachán (AE) Uimh. 142/2011 a leasú dá réir sin.

(5)

I gcomhréir leis an gComhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (An Comhaontú um Tharraingt Siar), agus go háirithe Airteagal 5(4) den Phrótacal maidir le hÉirinn/Tuaisceart Éireann i gcomhréir le hIarscríbhinn 2 a ghabhann leis an bPrótacal sin, tá feidhm ag Rialachán (CE) Uimh. 1069/2009, agus ag na gníomhartha ón gCoimisiún a bhunaítear air, maidir leis an Ríocht Aontaithe i ndáil le Tuaisceart Éireann tar éis dheireadh na hidirthréimhse dá bhforáiltear sa Chomhaontú um Tharraingt Siar.

(6)

Ó tharla gur tháinig deireadh leis an idirthréimhse dá bhforáiltear sa Chomhaontú um Tharraingt Siar an 31 Nollaig 2020, ba cheart Pointe 1, Roinn 2.B de Chaibidil V d’Iarscríbhinn IX a ghabhann le Rialachán (AE) Uimh. 142/2011 a leasú chun tagairt don Ríocht Aontaithe i ndáil le Tuaisceart Éirinn a chur in ionad na tagartha don Ríocht Aontaithe i liosta na mBallstát atá údaraithe leis an modh coimeádta a chur i bhfeidhm. Thairis sin, ba cheart tagairtí don Ríocht Aontaithe a scriosadh i Roinn 2.A, Caibidil V d’Iarscríbhinn IX a ghabhann leis an Rialachán (AE) Uimh. 142/2011 agus i dTábla 3 de Roinn 11 de Chaibidil II d’Iarscríbhinn XIV a ghabhann leis an Rialachán sin.

(7)

An 8 Deireadh Fómhair 2015, d’fhoilsigh an tÚdarás Eorpach um Shábháilteacht Bia (EFSA) tuairim eolaíoch maidir le próifíl riosca i ndáil le feithidí a tháirgeadh agus a chaitheamh mar bhia agus mar bheatha (3). I measc speiceas feithidí éagsúla, mheas EFSA an seiriceán mar fhoinse a d’fhéadfaí a úsáid chun próitéin ainmhíoch phróiseáilte a tháirgeadh. Traidisiún seanbhunaithe is ea an síodashaothrú i réigiúin éagsúla den Aontas. Ós rud é nach n-itheann an seiriceán clóis ach duillí maoildeirge amháin (Morus alba agus Morus nigra), níl aon bhaol ann go dtarlóidh truailliú le beatha de bhunadh ainmhíoch, rud nach gceadaítear chun feithidí a bheathú. Dá bhrí sin, ba cheart é a bheith údaraithe le haghaidh próiseáil atá ceaptha chun beatha a mhonarú d’ainmhithe feirmshaothraithe, tar éis an síoda a bhaint. Is iomchuí seiriceáin (Bombyx mori) a chur leis an liosta de speiceas feithidí atá údaraithe le haghaidh próitéin ainmhíoch phróiseáilte a tháirgeadh atá beartaithe chun beatha a mhonarú d’ainmhithe feirmshaothraithe. Ba cheart, dá bhrí sin, Iarscríbhinn X a ghabhann le Rialachán (AE) Uimh. 142/2011 a leasú dá réir.

(8)

Is le hIarscríbhinn XI a ghabhann le Rialachán (AE) Uimh. 142/2011 a leagtar síos na ceanglais maidir le haoileach a chur ar an margadh. I ndiaidh sainmhíniú “frass” a chur isteach sa réamhrá in Iarscríbhinn I a ghabhann leis an Rialachán sin, ba cheart go n-áiritheofar leis na ceanglais i dtaca le “frass” próiseáilte a chur ar an margadh an trádáil shábháilte de “frass” próiseáilte. Dá bhrí sin, ba cheart “frass” a chumhdach leis na ceanglais a leagtar síos san Iarscríbhinn sin. Ba cheart, dá bhrí sin, Iarscríbhinn XI a ghabhann le Rialachán (AE) Uimh. 142/2011 a leasú dá réir.

(9)

Ba cheart do na Ballstáit a chuireann bearta náisiúnta chun feidhme maidir le próiseáil “frass”, a mbearta náisiúnta a ailíniú leis an modh a leagadh síos in Iarscríbhinn XI a ghabhann le Rialachán (AE) Uimh. 142/2011, arna leasú leis an Rialachán seo. Ba cheart foráil a dhéanamh sa Rialachán seo maidir le hidirthréimhse 12 mhí.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

De réir Airteagal 15(1) de Rialachán Cur Chun Feidhme (AE) Uimh. 543/2011 ón gCoimisiún (2), féadfaidh an Coimisiún, arna iarraidh sin ag tríú tír, seiceálacha ar chomhréireacht le caighdeáin mhargaíochta a rinne an tríú tír sin a fhormheas roimh allmhairiú isteach san Aontas.

(2)

Tar éis tharraingt siar na Ríochta Aontaithe as an Aontas an 1 Feabhra 2020, agus i bhfianaise dheireadh na hidirthréimhse dá bhforáiltear sa Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (an Comhaontú um Tharraingt Siar) an 31 Nollaig 2020, bhí iarraidh curtha ag an Ríocht Aontaithe faoi bhráid an Choimisiúin chun seiceálacha ar chomhréireacht le sainchaighdeáin mhargaíochta a fhormheas, ar seiceálacha iad a rinne an Ríocht Aontaithe roimh allmhairiú isteach san Aontas. Go háirithe, bhí gealltanas tugtha ag an Ríocht Aontaithe go gcomhlíonfadh sí na ceanglais a leagadh síos maidir le margú torthaí agus glasraí tar éis dheireadh na hidirthréimhse agus bhí an t-údarás oifigiúil agus na comhlachtaí cigireachta dá dtagraítear sa dara fomhír d’Airteagal 15(2) de Rialachán Cur Chun Feidhme (AE) Uimh. 543/2011 curtha in iúl aici.

(3)

Ar an mbonn sin, le Rialachán Cur Chun Feidhme (AE) 2020/2102 ón gCoimisiún (3) formheasadh seiceálacha ar chomhréireacht le caighdeáin mhargaíochta a chuir an Ríocht Aontaithe i gcrích maidir le torthaí agus glasraí, sonraíodh an t-údarás oifigiúil a ndéantar na seiceálacha sin faoina fhreagracht, chomh maith leis na comhlachtaí cigireachta atá i gceannas ar na seiceálacha cuí sa Bhreatain Mhór agus liostaíodh an Ríocht Aontaithe in Iarscríbhinn IV a ghabhann le Rialachán Cur Chun Feidhme (AE) Uimh. 543/2011 le fonóta.

(4)

Cé go bhfuil feidhm ag Rialachán Cur Chun Feidhme (AE) Uimh. 543/2011 maidir leis an Ríocht Aontaithe agus sa Ríocht Aontaithe i ndáil le Tuaisceart Éireann i gcomhréir le hAirteagal 6(3) agus Airteagal 7(1) den Chomhaontú um Tharraingt Siar agus le hAirteagal 5(4) agus Airteagal 13(1) den Phrótacal maidir le hÉirinn/Tuaisceart Éireann a ghabhann leis an gComhaontú sin i gcomhar le hIarscríbhinn 2 a ghabhann leis an bPrótacal sin, foráiltear leis an gcéad fhomhír d’Airteagal 7(3) den Phrótacal sin i ndáil le haitheantas a thabhairt i mBallstát amháin do rialacháin theicniúla, measúnuithe, clárúcháin, deimhnithe, ceaduithe agus údaruithe a d’eisigh nó a rinne údaráis Ballstáit eile, nó a d’eisigh nó a rinne comhlacht a bunaíodh i mBallstát eile, níl le tuiscint as tagairtí do Bhallstáit i bhforálacha i ndlí an Aontais a rinneadh infheidhme leis an bPrótacal sin go bhfuil feidhm acu maidir leis an Ríocht Aontaithe i ndáil le Tuaisceart Éireann a mhéid a bhaineann le rialacháin theicniúla, measúnuithe, clárúcháin, deimhnithe, formheasanna, agus údaruithe a d’eisigh nó a rinne údaráis na Ríochta Aontaithe nó a d’eisigh nó a rinne comhlachtaí a bunaíodh sa Ríocht Aontaithe. Dá bhrí sin, maidir le seiceálacha ar chomhréireacht leis na caighdeáin mhargaíochta a dhéanann an comhlacht cigireachta le haghaidh Thuaisceart Éireann, ba cheart a mheas gur tríú tír a chuir i gcrích iad, gan dochar don cheathrú fomhír d’Airteagal 7(3) den Phrótacal sin.

(5)

Dá bhrí sin, ba cheart don Choimisiún an comhlacht cigireachta atá i gceannas ar na seiceálacha cuí le haghaidh Thuaisceart Éireann a shonrú freisin, de réir mar a thug an Ríocht Aontaithe fógra ina leith an 9 Aibreán 2020, agus ba cheart dó iontráil na Ríochta Aontaithe a shoiléiriú in Iarscríbhinn IV a ghabhann le Rialachán Cur Chun Feidhme (AE) Uimh. 543/2011.

(6)

Ba cheart, dá bhrí sin, Rialachán Cur Chun Feidhme (AE) Uimh. 543/2011 a leasú dá réir.

(7)

Ar mhaithe le soiléireacht agus le deimhneacht dhlíthiúil, ba cheart Rialachán Cur Chun Feidhme (AE) 2020/2102 a aisghairm.

(8)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Chomheagrú na Margaí Talmhaíochta,

(1)

Le Treoir 66/402/CEE bunaítear rialacha maidir le síolta gránach a tháirgeadh agus a mhargú san Aontas. I gcás síolta cruithneachta hibridí, is iad na teicnící chun síolta hibrideacha a tháirgeadh dá bhforáiltear leis an Treoir sin na teicnící a úsáidtear chun crosphórú díreach agus hibridiú ceimiceach a dhéanamh, agus na teicnící sin amháin.

(2)

Le blianta beaga anuas, áfach, glacadh le steirilíocht fhireann chíteaplasmach (“CMS”) ar fud an domhain mar theicníc phórúcháin chun hibridí de chineálacha síolta gránach a tháirgeadh. Tá rialacha ábhartha maidir le teicníc tháirgthe CMS i bhfeidhm cheana féin maidir le heorna, toisc gur cuireadh táirgeadh síolta hibrideacha le CMS i bhfeidhm roinnt blianta ó shin.

(3)

Tá an eorna agus an chruithneacht féinphailnitheach ó dhúchas agus is i saothrú cumaisc a tháirgtear iad. Agus na cosúlachtaí teicniúla idir táirgeadh síolta hibridí eorna agus cruithneachta mar aon le riachtanais úsáideoirí síolta hibrideacha á gcur san áireamh, is iomchuí coinníollacha le haghaidh síolta cruithneachta hibridí atá comhchosúil leis na coinníollacha a bhaineann le síolta hibridí eorna a leagan amach. Maidir le córas táirgthe cumaisc sonrach na cruithneachta hibridí amhail Triticum aestivum fospeiceas aestivum, Triticum turgidum fospeiceas. durum, Triticum aestivum fospeiceas spelta, a úsáidtear ar an láthair, i gcomhar leis na rioscaí a bhaineann leis an aimsir le linn na tréimhse bláthaithe, is léir ón taithí a fuarthas go n-éilíonn an córas táirgthe sin laghdú ar an gcaighdeán íonachta cineáil go 85 %, i gcás ina gcuirtear CMS i bhfeidhm, rud a fhágann gur féidir síolta a tháirgeadh go cobhsaí faoi dhálaí aimsire neamhfhabhracha. Dá bhrí sin, is iomchuí leibhéal níos ísle íonachta cineáil a cheadú le haghaidh síolta cruithneachta hibridí a tháirgtear le CMS ná an leibhéal is gá le haghaidh hibridí de shíolta eile.

(4)

Is léir ón taithí a fuarthas ar shíolta eile de chuid hibridí a táirgeadh trí bhíthin CMS go bhfuil sé tábhachtach tástáil a dhéanamh, ag tús scéime nua táirgthe, ar na ceanglais theicniúla atá i bhfeidhm. Dá bhrí sin, ba cheart na ceanglais maidir le cineálacha a bheith infheidhme ar bhonn sealadach go dtí an 31 Lúnasa 2029, chun go bhféadfaidh na póraitheoirí táirgeadh na cruithneachta hibridí i gcóras cumaisc a oiriúnú. Tá gá le cur chuige den sórt sin chun aon riosca a bhaineann leis an scéim táirgthe sin a íoslaghdú agus chun cineál nua cineálacha cruithneachta a chur ar fáil d’fheirmeoirí. Ba cheart gur leor an teorainn ama sin chun é a chur ar a gcumas do phóraitheoirí agus d’údaráis deimhniúcháin an t-eolas is gá a fháil chun na ceanglais theicniúla maidir le táirgeadh síolta cruithneachta hibridí a chur i bhfeidhm, agus chun athbhreithniú a dhéanamh ar na ceanglais sin.

(5)

Ionas go mbeidh an Coimisiún agus na Ballstáit in ann eolas leordhóthanach a fháil faoi chur i bhfeidhm CMS, agus chun go bhféadfar athbhreithniú a dhéanamh ar na rialacha sin, ba cheart don údarás deimhniúcháin atá freagrach tuarascáil a chur chuig an gCoimisiúin agus chuig na Ballstáit eile gach bliain, go dtí an 28 Feabhra 2030, faoi thorthaí na bliana roimhe sin maidir le cainníocht na síolta hibrideacha a táirgeadh agus faoi chéatadán na luchtóg síolta ar diúltaíodh dóibh de bharr paraiméadair cháilíochta neamh-leordhóthanacha.

(6)

Dá bhrí sin, ba cheart Iarscríbhinn I agus Iarscríbhinn II a ghabhann le Treoir 66/402/CEE a leasú dá réir sin.

(7)

Tá na bearta dá bhforáiltear sa Treoir seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,