(1)

Ceanglaítear, le Rialachán (AE) Uimh. 1380/2013 ó Pharlaimint na hEorpa agus ón gComhairle (1), go nglactar bearta caomhantais agus aird á tabhairt ar an gcomhairle eolaíoch, theicniúil agus eacnamaíoch a bhíonn ar fáil, lena n-áirítear, i gcás inarb ábhartha, tuarascálacha arna dtarraingt suas ag an gCoiste Eolaíoch, Teicniúil agus Eacnamaíoch um Iascaigh agus ag comhlachtaí comhairleacha eile, mar aon le comhairle ó chomhairlí comhairleacha a bunaíodh do na limistéir gheografacha ábhartha inniúlachta agus moltaí comhpháirteacha arna ndéanamh ag na Ballstáit.

(2)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis na deiseanna iascaireachta sin, de réir mar is iomchuí. Foráiltear le Rialachán (AE) Uimh. 1380/2013 gur cheart go ndéanfar deiseanna iascaireachta a chionroinnt ar na Ballstáit ar dhóigh lena n-áirithítear cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic nó iascaigh.

(3)

Foráiltear le Rialachán (AE) Uimh. 1380/2013 gurb é cuspóir an Chomhbheartais Iascaigh ráta saothraithe na huastáirgeachta inbhuanaithe (MSY) a bhaint amach faoi 2015 i gcás inar féidir agus, ar bhonn forchéimnitheach incriminteach faoi 2020 ar a dhéanaí le haghaidh na stoc uile. Ba é cuspóir na hidirthréimhse go dtí 2020 baint amach na huastáirgeachta inbhuanaithe i gcás na stoc uile a chothromú leis na himpleachtaí socheacnamaíocha a d’fhéadfadh a bheith ann le coigeartuithe a d’fhéadfaí a dhéanamh ar dheiseanna iascaireachta gaolmhara.

(4)

Dá bhrí sin, ba cheart na gabhálacha iomlána incheadaithe (TACanna) a bhunú i gcomhréir le Rialachán (AE) Uimh. 1380/2013, ar bhonn na comhairle eolaíche atá ar fáil, agus aird á tabhairt ar impleachtaí bitheolaíocha agus socheacnamaíocha agus cóir chothrom idir earnálacha iascaireachta á háirithiú, agus i bhfianaise na tuairimí a cuireadh in iúl le linn an chomhairliúcháin leis na páirtithe leasmhara.

(5)

Bunaítear le Rialachán (AE) 2016/1139 ó Pharlaimint na hEorpa agus ón gComhairle (2) plean ilbhliantúil le haghaidh na stoc trosc, scadán agus salán i Muir Bhailt agus maidir leis an iascach a shaothraíonn na stoic sin (“an plean”). Is é is aidhm don phlean a áirithiú go ndéanfaidh saothrú bheo-acmhainní bitheolaíocha na mara líon na speiceas atá á saothrú a athbhunú agus a chothabháil os cionn leibhéil atá in ann uastáirgeacht inbhuanaithe a tháirgeadh. Foráiltear le Rialachán (AE) Uimh. 1380/2013, i gcás stoic atá faoi réir pleananna ilbhliantúla sonracha, go bhfuil na deiseanna iascaireachta le bunú i gcomhréir leis na rialacha a leagtar síos sna pleananna ilbhliantúla sin.

(6)

I gcomhréir le hAirteagal 4(1) den phlean, bhí na deiseanna iascaireachta le haghaidh na stoic a liostaítear in Airteagal 1 den phlean le socrú chun básmhaireacht iascaireachta ar leibhéal uastáirgeachta inbhuanaithe, arna shloinneadh i raonta, a bhaint amach a luaithe is féidir agus, ar bhonn forchéimnitheach agus incriminteach, faoi 2020 ar a dhéanaí. Dá bhrí sin, ba cheart na teorainneacha gabhála is infheidhme in 2022 maidir leis na stoic ábhartha i Muir Bhailt a bhunú i gcomhréir le cuspóirí an phlean.

(7)

D’fhoilsigh an Chomhairle Idirnáisiúnta um Thaiscéalaíocht na Mara (“ICES”) a comhairle bhliantúil stoic maidir le stoic Mhuir Bhailt an 28 Bealtaine 2021. Thug sí le fios nach raibh bithmhais scadán Mhuir Bhailt Thiar i bhforanna ICES 20-24 ach ag 54 % de phointe tagartha teorann maidir le bithmais (Blim) stoic sceite, leibhéal ar faoina bhun a d’fhéadfadh laghdú a bheith ar acmhainn atáirgthe na stoc éisc. Ina theannta sin, tá an earcaíocht fós ar leibhéil níos ísle ná riamh. Dá bhrí sin, d’fhoilsigh ICES comhairle don 4ú bliain as a chéile gan aon ghabhálacha a bheith ann do scadán Mhuir Bhailt Thiar. De bhun Airteagal 5(2) de Rialachán (AE) 2016/1139, ba cheart, dá bhrí sin, gach beart ceartaitheach iomchuí a ghlacadh chun a áirithiú go ndéanfar leibhéil an stoic éisc lena mbaineann a athbhunú go tapa os cionn na leibhéal atá in ann uastáirgeacht inbhuanaithe a tháirgeadh. Thairis sin, ceanglaítear leis an bhforáil sin bearta ceartaitheacha breise a ghlacadh. Dá mbeadh na deiseanna iascaireachta do scadán Mhuir Bhailt Thiar le socrú ar an leibhéal a léirítear i gcomhairle ICES, thiocfadh feiniméan an “tachtspeiceas” chun cinn de thoradh na hoibleagáide na gabhálacha ar fad in iascaigh mheasctha a thabhairt i dtír le foghabhálacha scadán Mhuir Bhailt Thiar a thabhairt i dtír. Chun an chothromaíocht cheart a bhaint amach idir, ar lámh amháin, cead a thabhairt iascaigh do stoic eile a choimeád ar bun i bhfianaise na n-impleachtaí tromchúiseacha socheacnamaíocha a d’fhéadfadh a bheith i gceist murach sin agus, ar an lámh eile, an gá atá le stádas maith bitheolaíoch a bhaint amach don stoc, agus aird á tabhairt ar an deacracht a bhaineann le hiascaireacht a dhéanamh ar gach stoc in iascach measctha ag an uastáirgeacht inbhuanaithe ag an am céanna, is iomchuí TAC sonrach a bhunú le haghaidh fhoghabhálacha scadán Mhuir Bhailt Thiar. Mar sin féin, oibríochtaí iascaireachta a dhéantar chun críche imscrúduithe eolaíocha agus chun na críche sin amháin, agus go hiomlán i gcomhréir leis na coinníollacha a leagtar amach in Airteagal 25 de Rialachán (AE) 2019/1241 ó Pharlaimint na hEorpa agus ón gComhairle (3), mar aon le hiascairí cósta ar mhionscála a dhéanann iascaireacht le trealamh áirithe éighníomhach, ba cheart cead a thabhairt dóibh díriú ar scadán Mhuir Bhailt Thiar. Ba cheart leibhéal an TAC sin a shocrú sa chaoi nach méadófar ráta básmhaireachta agus go dtugtar dreasachtaí maidir leis an roghnaíocht agus an tseachaint a fheabhsú.

(8)

Maidir le stoc throsc Mhuir Bhailt Thoir, bhí an Chomhairle Idirnáisiúnta um Thaiscéalaíocht na Mara in ann a comhairle réamhchúraim a bhunú ar mheasúnú atá níos iomláine ó thaobh sonraí de ó bhí 2019 ann. Measann an Chomhairle Idirnáisiúnta um Thaiscéalaíocht na Mara go leanann bithmhais stoc throsc Mhuir Bhailt Thiar de bheith faoi bhun Blim agus go bhfuil laghdú breise tagtha uirthi ó 2020. Dá bhrí sin, d’fhoilsigh an Chomhairle Idirnáisiúnta um Thaiscéalaíocht na Mara comhairle don 3ú bliain as a chéile gan aon ghabhálacha a bheith ann do throsc Mhuir Bhailt Thiar. Ó bhí 2019 ann glacadh bearta dochta caomhnaithe san Aontas. De bhun Airteagal 5(2) de Rialachán (AE) 2016/1139, dúnadh iascach dírithe ar throsc Mhuir Bhailt Thoir agus socraíodh an ghabháil iomlán incheadaithe i dtaca le foghabhálacha dosheachanta throsc Mhuir Bhailt Thoir ar leibhéal an-íseal chun feiniméan an “tachtspeiceas” in iascaigh eile a sheachaint. Fairis sin, glacadh bearta breise ceartaitheacha a bhfuil baint fheidhmiúil acu leis na deiseanna iascaireachta i bhfoirm cosc le linn an tséasúir sceite agus toirmeasc ar iascaigh áineasa sa phríomhlimistéar dáileacháin. I bhfianaise na comhairle ón gComhairle Idirnáisiúnta um Thaiscéalaíocht na Mara agus staid na stoc atá gan athrú, is iomchuí leibhéal na ndeiseanna iascaireachta agus na bearta ceartaitheacha a bhfuil nasc feidhmiúil acu leo a choinneáil ar bun gan athrú.

(9)

A mhéid a bhaineann le trosc Mhuir Bhailt Thiar, léirítear i measúnuithe eolaíocha le roinnt blianta cheana féin go raibh an bhithmhais stoic sceite faoi bhun an phointe tagartha, ar faoina bhun a dhéanfar gníomhaíocht shonrach agus iomchuí bainistíochta (Btrigger). Dá bhrí sin, is ag dul i ndéine a bhí na bearta bainistíochta a glacadh le blianta beaga anuas. In 2021 chinn ICES measúnú níos doimhne a dhéanamh ar staid an stoic agus, dá bhrí sin, chuir sí a chomhairle siar go dtí an 10 Meán Fómhair 2021. Léiríodh sa mheasúnú sin gur lú bithmhais stoic throsc Mhuir Bhailt Thiar ná leath den mheastachán a rinneadh roimhe sin agus go raibh sí faoi bhun Blim den chuid is mó le breis agus 10 mbliana,. Meastar gurb ionann an bhithmhais reatha agus leath de Blim. Ó 2018 i leith, tá an earcaíocht ar leibhéil níos ísle ná riamh. Measann an Chomhairle Idirnáisiúnta um Thaiscéalaíocht na Mara, agus dóchúlacht 53 % ann gur féidir méadú a theacht ar bhithmhais an stoic beagán os cionn Blim in 2023 in ainneoin roinnt gabhálacha a bheith á ndéanamh. I gcás den sórt sin, de bhun Airteagal 5(2) de Rialachán (AE) 2016/1139, ba cheart bearta ceartaitheacha a dhéanamh agus na deiseanna iascaireachta a shocrú ar bhealach a áiritheoidh go ndéanfar an stoc a athbhunú go tapa os cionn an leibhéil atá in ann uastáirgeacht inbhuanaithe a tháirgeadh. Tá leibhéal na ngabhálacha arna moladh chomh híseal sin nach féidir leis iascach dírithe agus na foghabhálacha dosheachanta in iascaigh eile a sheasamh, go háirithe in iascaigh ghrinnill na leathóg. Dá bhrí sin, is iomchuí TAC a shocrú atá teoranta d’fhoghabhálacha dosheachanta in iascaigh eile chun an feiniméan maidir le “tachtspeiceas” a sheachaint, le díolúine d’oibríochtaí iascaireachta a dhéantar chun críche imscrúduithe eolaíocha, agus chun na críche sin amháin, agus go hiomlán i gcomhréir leis na coinníollacha a leagtar amach in Airteagal 25 de Rialachán (AE) 2019/1241. Thairis sin, glacadh bearta ceartaitheacha breise a raibh baint fheidhmiúil acu leis na deiseanna iascaireachta roimhe seo i bhfoirm cosc le linn an tséasúir sceite agus iascaigh áineasa a theorannú. I bhfianaise an mheatha thromchúisigh atá tagtha ar an stoc, is iomchuí síneadh a chur leis an gcosc le linn an tséasúir sceite ón 15 Eanáir go dtí an 31 Márta chun an tréimhse ina gcomhchruinníonn trosc roimh sceitheadh a chumhdach. Ba cheart díolúine bhreise ón gcosc le linn an tséasúir sceite a thabhairt isteach i gcás soithí iascaireachta a bhíonn ag iascaireacht, le dreidirí, ar mhoilisc dhébhlaoscacha i bhforoinn ICES 22 in uiscí ar lú a ndoimhneacht ná 20 méadar, ós rud é go dtarlaíonn na hiascaigh sin lasmuigh de na láithreacha sceite trosc agus go mbíonn foghabhálacha an-íseal trosc acu. Maidir le hiascaigh áineasa, murab ionann agus blianta roimhe sin, ní raibh an Chomhairle Idirnáisiúnta um Thaiscéalaíocht na Mara in ann gabhálacha tráchtála agus áineasa a mhiondealú, mar gheall ar an leibhéal íseal de ghabhálacha iomlána arna moladh. I bhfianaise riocht an stoic, is gá an teorainn ghabhála a laghdú a mhéid is féidir chun fanacht laistigh de na leibhéil ghabhála arna moladh ag ICES. Thairis sin, is iomchuí gan iascaigh áineasa a dhíolmhú a thuilleadh ón tréimhse choiscthe le linn an tséasúir sceite.

(10)

In 2020 mheas an Chomhairle Idirnáisiúnta um Thaiscéalaíocht na Mara go raibh bithmhais scadán Mhuir Bhailt tite faoi bhun an phointe tagartha do bhithmhais stoic sceite ar faoina bhun a dhéanfar gníomhaíocht shonrach agus iomchuí bainistíochta(Btrigger). In 2021, mheas an Chomhairle Idirnáisiúnta um Thaiscéalaíocht na Mara go raibh laghdú breise tagtha ar an mbithmhais agus go bhfuil sí gar do Blim anois. Is iomchuí dá bhrí sin na deiseanna iascaireachta a shocrú i gcomhréir le hAirteagal 5(1) de Rialachán (AE) 2016/1139.

(11)

De réir comhairle ón gComhairle Idirnáisiúnta um Thaiscéalaíocht na Mara, bíonn trosc á fhoghabháil in iascaigh leathóg. Gabhtar saláin in iascach measctha le scadáin agus is speiceas creiche don trosc é. Is iomchuí na hidirghníomhaíochtaí ilspeiceas sin a chur san áireamh agus na deiseanna iascaireachta á socrú le haghaidh leathóg agus salán.

(12)

Maidir le bradáin i bhforoinn ICES 22-31, bhí sé ráite ag ICES le roinnt blianta cheana féin go raibh stádas stoc na n-aibhneacha an-ilchineálach. Chun níos mó ama a thabhairt do shaineolaithe an éagsúlacht sin a chur san áireamh ar bhealach níos fearr, chinn ICES a chomhairle a chur siar go dtí an 15 Meán Fómhair 2021. De réir an mholta ó ICES, chun stoic laga na n-aibhneacha a chosaint, ba cheart deireadh a chur le gach gabháil tráchtála agus áineasa sa phríomh-imchuach, ar iascaigh mheasctha iad ó nádúr a ghabhann bradáin ó stoic shláintiúla agus laga aibhneacha. Measann ICES, áfach, go bhféadfaí leanúint den iascach dírithe atá ann cheana i limistéir chósta Mhurascaill na Boitnia agus Mhuir Aland le linn imirce samhraidh na mbradán. Chun an chothromaíocht cheart a bhaint amach idir, ar thaobh amháin, cead a thabhairt do na hiascaigh leanúint ar aghaidh i bhfianaise impleachtaí socheacnamaíocha tromchúiseacha a d’fhéadfadh a bheith ann mura gceadófaí sin, agus, ar an taobh eile, an gá le dea-stádas bitheolaíoch a bhaint amach don stoc, agus an deacracht a bhaineann le hiascaireacht a dhéanamh ar na stoic uile in iascach measctha de réir MSY ag an am céanna, is iomchuí TAC sonrach a bhunú d’fhoghabhálacha bradán sna limistéir sin, le díolúine d’oibríochtaí iascaireachta a dhéantar chun críche imscrúduithe eolaíocha, agus chun na críche sin amháin, agus go hiomlán i gcomhréir leis na coinníollacha a leagtar amach in Airteagal 25 de Rialachán (AE) 2019/1241, agus d’iascaigh chósta lastuaidh de dhomhanleithead 59°30′T le linn na tréimhse ón 1 Bealtaine go dtí an 31 Lúnasa. I bhfianaise chomhairle ICES, is iomchuí tuilleadh bearta ceartaitheacha a ghlacadh a mbeidh baint fheidhmiúil acu leis na deiseanna iascaireachta. Ba cheart úsáid spiléar thar ceithre mhuirmhíle a thoirmeasc ós rud é gur gnách gur trealamh é a úsáidtear chun díriú ar bhradáin. Ina theannta sin, sna limistéir sin nach bhfuil iascaigh thráchtála ceadaithe iontu, ba cheart a cheadú go ndéanfaí aon bhradán eiteghearrtha amháin in aghaidh an iascaire in aghaidh an lae a choinneáil in iascaigh áineasa. Ar deireadh, chun míthuairisciú a sheachaint, ba cheart gach eiseamal d’aon speiceas éisc a choinnítear a thabhairt i dtír agus iad iomlán chun go mbeifear in ann iad a shainaithint go soiléir.

(13)

Chun úsáid iomlán na ndeiseanna iascaireachta cósta a áirithiú, tugadh isteach solúbthacht theoranta idirlimistéir do bhradáin ó fhoranna 22-31 ICES go foroinn ICES 32 in 2019. I bhfianaise na n-athruithe ar dheiseanna iascaireachta don dá stoc sin, is iomchuí an tsolúbthacht sin a laghdú.

(14)

Nuair a tugadh isteach cosc ar iascaireacht breac geal thar 4 mhuirmhíle agus teorannú ar fhoghabhálacha breac geal go 3 % den chomhghabháil breac geal agus bradán, chuir an cosc agus an teorannú araon go mór leis an laghdú ar an míthuairisciú suntasach a bhí roimhe seo, ar ghabhálacha in iascach bradán, go háirithe iad siúd a thuairiscítí mar ghabhálacha breac geal. Is iomchuí dá bhrí sin an fhoráil sin a choinneáil chun an míthuairisciú a choinneáil ar leibhéal íseal.

(15)

Tá úsáid na ndeiseanna iascaireachta a leagtar amach sa Rialachán seo faoi réir Rialachán (CE) Uimh. 1224/2009 ón gComhairle (4), agus go háirithe Airteagail 33 agus 34 de, maidir le gabhálacha agus iarracht iascaireachta a thaifeadadh agus maidir le sonraí i ndáil le hídiú deiseanna iascaireachta a tharchur chuig an gCoimisiún. Ba cheart a shonrú sa Rialachán seo, dá bhrí sin, na cóid a bhaineann le stoic a thabhairt i dtír, stoic atá faoi réir an Rialacháin seo agus atá le húsáid ag na Ballstáit agus sonraí á seoladh chuig an gCoimisiún.

(16)

Le Rialachán (CE) Uimh. 847/96 ón gComhairle (5), tugadh coinníollacha breise isteach maidir le TACanna a bhainistiú ó bhliain go bliain, lena n-áirítear, faoi Airteagail 3 agus 4 de, forálacha solúbthachta le haghaidh TACanna réamhchúraim agus anailíseacha. Faoi Airteagal 2 den Rialachán sin, bíonn sé le cinneadh ag an gComhairle, agus TACanna á socrú aici, cé na stoic nach mbeidh feidhm ag Airteagail 3 nó 4 maidir leo, go háirithe ar bhonn stádas bitheolaíoch na stoc. Níos déanaí fós, tugadh an sásra solúbthachta ó bhliain go bliain isteach le hAirteagal 15(9) de Rialachán (AE) Uimh. 1380/2013 maidir le gach stoc atá faoi réir oibleagáid gabhálacha a thabhairt i dtír. Dá bhrí sin, chun solúbthacht iomarcach a sheachaint a bhainfeadh an bonn de phrionsabal shaothrú céillí freagrach bheo-acmhainní bitheolaíocha na mara, a chuirfeadh bac ar ghnóthú chuspóirí an Chomhbheartais Iascaigh agus a chuirfeadh meath ar stádas bitheolaíoch na stoc, ba cheart a shuí nach mbeidh feidhm ag Airteagail 3 agus 4 de Rialachán (CE) Uimh. 847/96 maidir le TACanna anailíseacha ach amháin i gcás nach mbaintear leas as an tsolúbthacht ó bhliain go bliain dá bhforáiltear in Airteagal 15(9) de Rialachán (AE) Uimh. 1380/2013.

(17)

Ina theannta sin, ós rud é go bhfuil bithmhais stoc throsc Mhuir Bhailt Thoir, scadán Mhuir Bhailt Thiar agus trosc Mhuir Bhailt Thiar faoi bhun Blim agus nach gceadaítear ach iascaigh foghabhála, iascaigh eolaíocha agus, i gcás scadán Mhuir Bhailt Thiar, roinnt iascach cósta ar mhionscála in 2022, ghlac na Ballstáit ag a bhfuil scair chuóta sa TAC ábhartha mar chúram orthu féin gan an tsolúbthacht ó bhliain go bliain dá bhforáiltear in Airteagal 15(9) de Rialachán (AE) Uimh. 1380/2013 a chur i bhfeidhm maidir leis na stoic sin in 2022 ionas nach rachaidh gabhálacha in 2022 thar an ngabháil iomlán incheadaithe arna socrú maidir le troisc Mhuir Bhailt Thoir, scadáin Mhuir Bhailt Thiar agus trosc Mhuir Bhailt Thiar. Ina theannta sin, ós rud é go bhfuil bithmhais bradán ó stoic aibhneacha laisteas de dhomhanleithead 59°30′T beagnach faoi bhun an phointe tagartha teorann do tháirgeadh gealóg (Rlim) agus nach gceadaítear ach foghabháil agus iascach eolaíoch sa limistéar sin in 2022, ghlac na Ballstáit ábharta mar chúram orthu féin gealltanas comhchosúil a dhéanamh maidir le solúbthacht ó bhliain go bliain i ndáil le gabhálacha bradán sa phríomh-imchuach in 2022

(18)

Is ón 1 Samhain go dtí an 31 Deireadh Fómhair a mhaireann an bhliain iascaireachta don trosc Ioruach i Roinn 3a ICES agus in uiscí na Ríochta Aontaithe i roinn 2a ICES agus in uiscí na Ríochta Aontaithe agus an Aontais i bhfolimistéar 4 ICES. Chun go bhféadfar tús a chur leis an iascach an 1 Samhain 2021 agus ar bhonn na comhairle eolaíche nua agus tar éis dul i gcomhairle leis an Ríocht Aontaithe, is gá réamh-TAC a shocrú don trosc Ioruach i roinn 3a ICES agus in uiscí na Ríochta Aontaithe i roinn 2a ICES agus in uiscí na Ríochta Aontaithe agus an Aontais i bhfolimistéar 4 ICES don tréimhse ón 1 Samhain 2021 go dtí an 31 Nollaig 2021. Ba cheart an TAC tosaigh sin a shocrú i gcomhréir leis an gcomhairle ó ICES a foilsíodh an 8 Deireadh Fómhair 2021.

(19)

I Rialachán (AE) 2021/92 ón gComhairle (6), sa tábla maidir le deiseanna iascaireachta le haghaidh ronnach sa Mhuir Thuaidh, tagraítear d’uiscí 3a agus 4, Uiscí na Ríochta Aontaithe in 2a; Uiscí an Aontais i 3b, 3c agus i bhforanna 22-32 i gcomhréir leis an gComhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (7). In 2021, bhí comhairliúcháin maidir leis an ronnach idir na Stáit chósta ach níor thángthas ar chomhaontú, áfach, maidir le socruithe rochtana idir an tAontas, an Ríocht Aontaithe agus an Iorua. Dá bhrí sin, níl rochtain ag an Aontas ar iascaireacht a dhéanamh ar a chuóta ronnach in uiscí na hIorua sa Mhuir Thuaidh.

(20)

In 2021, thug an tAontas caibidlíocht leis an Ríocht Aontaithe i gcrích maidir le deiseanna iascaireachta agus bearta bainistíochta le haghaidh TACanna áirithe do 2021, lena n-áirítear le haghaidh ronnach, lena gcuirtear ar chumas an Aontais iascaireacht a dhéanamh ar a chuóta ronnach in uiscí na Ríochta Aontaithe. Mar thoradh air sin, ba cheart na táblaí ábhartha maidir le deiseanna iascaireachta a leasú dá réir chun go léireofar teorannuithe limistéir iascaireachta in uiscí na Mara Thuaidh d’uiscí na Ríochta Aontaithe agus an Aontais.

(21)

In 2021, níl rochtain ag Aontas ar iascaireacht a dhéanamh ar a chuóta ronnach in uiscí na hIorua sa Mhuir Thuaidh. Áirítear in Rialachán (AE) 2021/92 an tábla maidir le deiseanna iascaireachta ronnach in uiscí 2a agus 4a agus ba cheart go bhféadfaí iascaireacht a dhéanamh ar an gcuóta de 13 359 tona a chionroinntear ar an Danmhairg in uiscí an Aontais agus na Ríochta Aontaithe sa Mhuir Thuaidh r. Ba cheart fonóta a chur isteach sa tábla ábhartha maidir le deiseanna iascaireachta chun go mbeidh an Danmhairg in ann iascaireacht a dhéanamh ar an gcuóta sin in uiscí an Aontais agus na Ríochta Aontaithe sa Mhuir Thuaidh. Chuathas i gcomhairle leis an Ríocht Aontaithe maidir leis an bhféidearthacht sin agus ní dhearna sí aon agóid i gcoinne an chur chuige lena gceadaítear an cuóta sin a iascach in uiscí sin na Ríochta Aontaithe amhail ón 12 Deireadh Fómhair 2021.

(22)

Leis an gComhaontú Comhpháirtíochta Iascaigh Inbhuanaithe idir an tAontas Eorpach, de pháirt amháin, agus Rialtas na Graonlainne agus Rialtas na Danmhairge, den pháirt eile, agus leis an bPrótacal Chur Chun Feidhme a ghabhann leis (8), foráiltear go bhfuil an tAontas le 7,7 % den TAC le haghaidh na gcaibeallán a fháil atá le gabháil in uiscí na Graonlainne d’fholimistéir 5 agus 14 ICES. An 5 Deireadh Fómhair 2021, fuair an tAontas faisnéis ó údaráis na Graonlainne go bhfuil comhairle eisithe ag ICES don chaibeallán don séasúr 2021/2022 ag leibhéal 904 200 tona mar TAC. Tar éis comhairle eolaíoch a fháil agus bunaithe ar an gcomhaontú ar thángthas air idir an Ghraonlainn, an Íoslainn agus an Iorua maidir leis an gcaibeallán, tá cuóta 135 630 tona socraithe ag Rialtas na Graonlainne. I gcomhréir leis an bPrótacal Chur Chun Feidhme idir an tAontas agus an Ghraonlainn, ba mhaith leis an nGraonlainn 69 623 tona de chaibeallán, is é sin 7,7 % den TAC iomlán, a thairiscint don Aontas. Ba cheart an TAC sin a shocrú anois ar an mbonn sin. Ina theannta sin, chomhaontaigh an Ghraonlainn, an Íoslainn agus an Iorua, mar chuid dá gcreat-chomhaontú maidir le caomhnú agus bainistiú na gcaibeallán, maidir le socruithe nua séasúir iascaireachta. Dá bhrí sin, is gá freisin an t-athrú sa séasúr iascaireachta a léiriú, ar cheart dó a bheith ag tagairt anois do thréimhse ón 15 Deireadh Fómhair 2021 go dtí an 15 Aibreán 2022.

(23)

Tugann an Coimisiún ceadúnais iascaireachta do shoithí a bhfuil bratach Veiniséala ar foluain acu chun a cheadú dóibh sclamhaire a ghabháil in uiscí an Aontais amach ó chósta Ghuáin na Fraince. Is é is aidhm don leasú atá beartaithe leanúnachas na n-oibríochtaí iascaireachta a áirithiú le linn an phróisis údaraithe idir dhá bhliain faoi choinníollacha áirithe.

(24)

Dá bhrí sin, ba cheart Rialachán (AE) 2021/92 a leasú dá réir sin.

(25)

Chun briseadh i ngníomhaíochtaí iascaireachta a sheachaint agus chun slí bheatha iascairí an Aontais a áirithiú, ba cheart feidhm a bheith ag forálacha an Rialacháin seo a bhaineann le Muir Bhailt ón 1 Eanáir 2022. Tá feidhm ag na teorainneacha gabhála dá bhforáiltear i Rialachán (AE) 2021/92 ón 1 Eanáir 2021. Ba cheart, dá bhrí sin, feidhm a bheith ag na forálacha arna dtabhairt isteach leis an Rialachán seo a bhaineann leis na teorainneacha gabhála sin ón 1 Eanáir 2021 chomh maith. Mar sin féin, ba cheart feidhm a bheith ag an Rialachán seo maidir leis an trosc Ioruach i roinn 3a ICES agus in uiscí na Ríochta Aontaithe agus in uiscí an Aontais d’fholimistéar 4 ICES agus in uiscí na Ríochta Aontaithe i roinn 2a ICES ón 1 Samhain 2021 go dtí an 31 Deireadh Fómhair 2022. I bhfianaise an ghá atá ann leanúint de ghníomhaíochtaí iascaireachta inbhuanaithe agus tús a chur leis na hiascaigh ábhartha in am d’oscailt na séasúr iascaireachta, ba cheart feidhm a bheith ag forálacha an Rialacháin seo maidir le teorainneacha gabhála do ronnach in uiscí na hIorua sa Mhuir Thuaidh. agus na gcaibeallán in uiscí na Graonlainne i bhfolimistéir 5 agus 14 ICES faoi seach ón 12 Deireadh Fómhair 2021 agus ón 15 Deireadh Fómhair 2021 faoi seach. Ós rud é nach bhfuil na deiseanna iascaireachta lena mbaineann ídithe go fóill nó toisc go méadófar iad leis an Rialachán seo, ní dhéantar difear do phrionsabail na deimhneachta dlíthiúla agus an ionchais dhlisteanaigh le cur i bhfeidhm cúlghabhálach an Rialacháin seo. Ar chúiseanna práinne, ba cheart an Rialachán seo a theacht i bhfeidhm láithreach tar éis a fhoilsithe,

(1)

Mar gheall ar ghéarchéim COVID-19, tá laghdú géar ar an aerthrácht fós i ngeall ar an titim shuntasach ar an éileamh ar aerthaisteal agus ar bhearta díreacha atá déanta ag na Ballstáit chomh maith le tríú tíortha chun leathnú COVID-19 a choinneáil faoi smacht. Thuairiscigh Eurocontrol go raibh aerthrácht in aerspás LEE measartha cobhsaí sa chéad leath de 2021 agus é isteach agus amach le 38 % de leibhéal aerthráchta 2019 sa tréimhse chomhfhreagrach agus is ar an mbealach aníos atá an treocht. De réir na réamhaisnéise ó Eurocontrol, táthar ag súil go mbainfidh an meán-aerthrácht bliantúil leibhéal amach a bheidh cothrom le 50 % in 2021 agus 72 % in 2022, ar bhonn an cháis réamhaisnéise is réadúla.

(2)

Níl neart ag aeriompróirí ar na himthosca sin agus is freagairt riachtanach nó dhlisteanach ar na himthosca sin go gcuirfeadh aeriompróirí aersheirbhísí ar ceal i gcomhréir leis an éileamh síorathraitheach ar bhonn riachtanais nó ar bhonn éigeantach dá bharr.

(3)

De bhun Airteagal 8(2) de Rialachán (CEE) Uimh. 95/93, arna léamh i gcomhar le hAirteagal 10(2), ní mór d’aeriompróirí 80 % ar a laghad de shraith sliotán a leithdháiltear orthu a úsáid, nó caillfidh siad tosaíocht stairiúil do na sliotáin sin, an riail “úsáid é nó caill é” mar a thugtar air. I bhfianaise ghéarchéim COVID-19, agus chun sláinte airgeadais aeriompróirí a chosaint agus chun an tionchar diúltach ar an gcomhshaol atá ag eitiltí folmha nó eitiltí atá beagnach folamh a sheachaint, eitiltí nach n-oibrítear ach chun críche sliotáin bhunúsacha aerfoirt a choinneáil, agus chun na críche sin amháin, cuireadh an riail “úsáid é nó caill é” ar fionraí ón 1 Márta 2020 go dtí an 28 Márta 2021.

(4)

An 16 Feabhra 2021, agus i bhfianaise thionchar leanúnach ghéarchéim COVID-19 ar aerthrácht, leasaigh an tAontas Rialachán (CEE) Uimh. 95/93 chun díolúine bhreise a thabhairt d’aerlínte ón riail “úsáid é nó caill é” le linn thréimhse sceidealaithe shamhradh 2021 tríd an riail a chur ar fionraí go ceann tréimhse breise ón 28 Márta 2021 go dtí an 30 Deireadh Fómhair 2021.

(5)

De bhun Airteagal 10a(5) de Rialachán (CEE) Uimh. 95/93, tabharfar de chumhacht don Choimisiún gníomhartha tarmligthe a ghlacadh chun leasú a dhéanamh ar an tréimhse fionraíochta maidir leis an riail “úsáid é nó caill é” a leagtar amach in Airteagal 10a(3).

(6)

Ina theannta sin, de bhun Airteagal 10a(5) de Rialachán (CEE) Uimh. 95/93, tabharfar de chumhacht don Choimisiún gníomhartha tarmligthe a ghlacadh, i gcás ina bhfuil géarghá leis sin chun aghaidh a thabhairt ar thionchar ghéarchéim COVID-19 ar leibhéil aerthráchta, chun an ráta úsáide sliotán a leasú agus é laistigh den raon 30 % agus 70 %.

(7)

D’ainneoin méadú a bheith ag teacht de réir a chéile, tá na leibhéil aerthráchta sa chéad leath de 2021 fós íseal i gcomparáid leis an tréimhse chéanna in 2019, é isteach agus amach le 38 % ar an meán d’aerthrácht sa tréimhse chomhfhreagrach. Cé go n-aithnítear na deacrachtaí a bhaineann le conair théarnaimh na leibhéal aerthráchta a thuar go cruinn, tá sé réasúnta a bheith ag súil go mbeidh an staid sin ann fós san am atá romhainn amach, am ina mbeidh an bhearna á caolú go seasta idir leibhéal an aerthráchta in 2021 i gcomparáid le 2019. Bunaithe ar an réamhaisnéis 4 bliana ó Eurocontrol an 21 Bealtaine 2021, sa chás is dóchúla, cás ina nglactar leis gur cheart go mbainfeadh an vacsaíniú éifeachtúlacht amach in 2022, bhainfeadh na leibhéil tráchta bhliantúla meán bliantúil amach a bheadh cothrom le 50 % go 72 % de na leibhéil chomhfhreagracha le haghaidh 2019, agus sin in 2021 agus in 2022 faoi seach. Ar bhonn na réamhaisnéisí míosúla ó Eurocontrol atá ar fáil don bhliain 2021 agus ar bhonn mheán bliantúil Eurocontrol le haghaidh 2022, táthar ag súil go mbeidh an leibhéal aerthráchta le linn thréimhse sceidealaithe gheimhreadh 2021/2022 cothrom le 70 % de leibhéil 2019.

(8)

Léiríonn na sonraí a thiomsaigh an Eagraíocht Dhomhanda Sláinte agus an Lárionad Eorpach um Ghalair a Rialú gur toradh é an laghdú leanúnach ar aerthrácht ar thionchar ghéarchéim COVID-19. Léirítear sna sonraí atá ar fáil go bhfuil comhghaol idir líon na gcásanna atá ag teacht chun cinn agus freagairtí na mBallstát agus tríú tíortha don líon sin atá ag teacht chun cinn, freagairtí a dhéantar trí bhearta a ghlacadh a mbíonn tionchar acu ar aerthaisteal agus a mbíonn laghdú ar aerthrácht mar thoradh orthu. Bearta den sórt sin, ar féidir iad a chur chun feidhme nó a bhaint ar fhógra an-ghearr, cuireann siad le timpeallacht éiginnteachta agus bíonn tionchar diúltach acu ar mhuinín na dtomhaltóirí agus ar an iompraíocht áirithinte.

(9)

Mar gheall ar an athrú atá ag teacht ar líon chásanna COVID-19 agus ar leathadh a d’fhéadfadh a bheith ann ar leaganacha malartacha nua, tá sé réasúnta glacadh leis go mbeidh líon suntasach cealuithe ann mar thoradh ar ghéarchéim COVID-19 sa tréimhse sceidealaithe geimhridh atá le teacht, ón 31 Deireadh Fómhair 2021 go dtí an 26 Márta 2022, dá gceanglófaí ar aerlínte a bpunann sliotán iomlán a fheidhmiú i gcomhréir le hAirteagal 8 de Rialachán (CEE) Uimh. 95/93.

(10)

Is gá, dá bhrí sin, síneadh a chur leis an tréimhse atá leagtha síos in Airteagal 10a(3) de Rialachán (CEE) Uimh. 95/93 ón 31 Deireadh Fómhair 2021 go dtí an 26 Márta 2022.

(11)

An t-éileamh ar thaisteal le linn na tréimhse sceidealaithe geimhridh ón 31 Deireadh Fómhair 2021 go dtí an 26 Márta 2022, d’fhéadfadh sé a bheith fós íseal in ainneoin dul chun cinn na bhfeachtas vacsaínithe, méadú ar an tsábháilteacht taistil, agus tarraingt siar na mbeart a imríonn tionchar ar thaisteal. D’fhéadfadh éileamh seasmhach íseal le linn na tréimhse sceidealaithe geimhridh a bheith ina léiriú ar athruithe struchtúracha fadtéarmacha ar iompraíocht an mhargaidh agus an tomhaltóra. Dá bhrí sin, ar thaobh amháin, ba cheart, leis an ráta úsáide sliotán, iarmhairtí diúltacha neamhbheartaithe ar staid airgeadais na n-aerlínte agus tionchair dhiúltacha ar an gcomhshaol a sheachaint, mar gheall ar eitiltí folmha nó eitiltí atá beagnach folamh agus nach n-oibrítear ach chun cearta stairiúla sliotán a choinneáil, agus ar an taobh eile, dreasachtaí a thabhairt do na haerlínte chun úsáid éifeachtúil a bhaint as acmhainn aerfoirt, nó sliotáin a scaoileadh isteach sa chomhthiomsú d’úsáideoirí eile chun a áirithiú go mbainfear úsáid éifeachtúil as acmhainn aerfoirt.

(12)

Thairis sin, ba cheart an ráta úsáide sliotán a shocrú ag ráta lena ráthaítear íosmhéid seirbhísí chun cur le muinín paisinéirí, úsáid éifeachtúil a bhaint as acmhainn aerfoirt le linn na tréimhse sceidealaithe geimhridh 2021/2022 agus nascacht iontaofa a chur ar fáil.

(13)

Ba cheart, leis an ráta úsáide sliotán, athruithe struchtúracha fadtéarmacha sa mhargadh agus in iompraíocht na dtomhaltóirí a chur san áireamh freisin, ionas go mbeidh an margadh in ann oiriúnú de réir a chéile don éileamh atá ag athrú agus acmhainneacht a dhíghlasáil do thréimhse sceidealaithe gheimhreadh 2022/2023. Go háirithe, ó tharla gur bhain roinnt aerlínte úsáid as sliotáin ad hoc in 2020 agus i dtús 2021 gan sliotáin stairiúla a fháil.

(14)

Dá bhrí sin, ba cheart an ráta úsáide sliotán do thréimhse sceidealaithe gheimhreadh 2021/2022 a shocrú ag 50 %.

(15)

Cé go nglactar leis go ginearálta go n-oibreodh aeriompróirí arís chomh luath agus a bheadh éileamh ann arís, tá an baol ann mar gheall ar thairseach úsáide níos ísle a bheith ann go ndéanfadh roinnt iompróirí oibríochtaí ag aerfoirt áirithe a theorannú go dtí an leibhéal íosta is gá chun cearta stairiúla sna sliotáin sin a choinneáil, rud a rachadh chun dochair d’iomaitheoirí, d’oibreoirí aerfoirt agus do thomhaltóirí. Dá ndéanfaí roinnt acmhainne aerfoirt a scaoileadh i ngeall ar an ráta úsáide nua sin, ní dócha go gcuirfear isteach go mór ar oibríochtaí ná ar líonraí aerlínte, ach sin mar a bheadh i gcás ráta úsáide níos airde.

(16)

Chun críocha na deimhneachta dlíthiúla, go háirithe i gcás comhordaitheoirí sliotán agus oibreoirí aeir, ba cheart don Rialachán seo teacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh,

(1)

In Iarscríbhinn I a ghabhann le Rialachán Cur Chun Feidhme (AE) Uimh. 543/2011 ón gCoimisiún (2), leagtar síos rialacha mionsonraithe maidir le caighdeáin mhargaíochta maidir le torthaí agus glasraí.

(2)

Ó 2018 go 2020, rinne Meitheal um Chaighdeáin Cháilíochta Talmhaíochta Choimisiún Eacnamaíochta na Náisiún Aontaithe don Eoraip (UNECE) athbhreithniú ar chaighdeáin UNECE maidir le piobair (2018 & 2020), le fíonchaora boird (2019 & 2020), le húlla agus le piorraí (2020). Chun bacainní neamhriachtanacha ar thrádáil a sheachaint, na caighdeáin mhargaíochta ghinearálta agus shonracha maidir leis na torthaí agus na glasraí sin dá bhforáiltear i Rialachán Cur Chun Feidhme (AE) Uimh. 543/2011, ba cheart iad a ailíniú le caighdeáin nua UNECE.

(3)

Na caighdeáin sin de chuid UNECE a athbhreithníodh, cuireadh iad faoi bhráid na mBallstát go rathúil agus rinneadh iad a fhormheas de réir an nós imeachta a leagtar síos i gCinneadh (AE) 2017/2104 ón gComhairle an 6 Samhain 2017 maidir leis an seasamh atá le glacadh thar ceann an Aontais Eorpaigh laistigh de Mheitheal UNECE um Chaighdeáin Cháilíochta Talmhaíochta (UNECE-WP.7) (3).

(4)

Ba cheart, dá bhrí sin, Rialachán (AE) Uimh. 543/2011 a leasú dá réir,