(1)

Fuair an Coimisiún Eorpach iarraidh ar dhíolúine ó na bearta frithdhumpála agus frithchúitimh is infheidhme maidir le hallmhairí bithdhíosail arna gcur chun bealaigh ó Cheanada, bíodh dearbhú ann gur de thionscnamh Cheanada iad nó ná bíodh, a mhéid a bhaineann leis an gcuideachta Verbio Diesel Canada Corporation (“an t-iarratasóir”). Rinneadh an t-iarratas de bhun Airteagal 13(4) de Rialachán (AE) 2016/1036 agus de bhun Airteagal 23(6) de Rialachán (AE) 2016/1037 agus taisceadh é an 13 Iúil 2020.

(2)

Rinne an Coimisiún scrúdú ar an bhfianaise a bhí ar fáil san iarratas agus chinn sé gur leor an fhianaise a bhí ann chun údar cuí a thabhairt le himscrúdú a thionscnamh de bhun Airteagal 13(4) de Rialachán (AE) 2016/1036 agus de bhun Airteagal 23(6) de Rialachán (AE) 2016/1037 chun a chinneadh an féidir díolúine ó na bearta leathnaithe a thabhairt don iarratasóir.

(3)

An 16 Nollaig 2020 le Rialachán Cur Chun Feidhme (AE) 2020/2098 ón gCoimisiún (5), chuir an Coimisiún tús le hathbhreithniú ar Rialacháin Chur Chun Feidhme (AE) Uimh. 443/2011 (6) agus (AE) Uimh. 444/2011 (7) ón gComhairle. Le Rialachán Cur Chun Feidhme (AE) 2020/2098 ón gCoimisiún, aisghaireadh na dleachtanna frithdhumpála a forchuireadh le Rialachán Cur Chun Feidhme (AE) 2015/1518 ón gCoimisiún (8) a mhéid a bhaineann le hallmhairí bithdhíosail ag an iarratasóir, agus ordaíodh do na húdaráis chustaim na céimeanna iomchuí a thabhairt chun na hallmhairí sin a chlárú. D’iarr an Coimisiún ar na páirtithe leasmhara teagmháil a dhéanamh leis chun bheith rannpháirteach san imscrúdú.

(4)

Bhí deis ag na páirtithe leasmhara uile barúil a thabhairt maidir le tionscnamh an imscrúdaithe agus éisteacht a iarraidh leis an gCoimisiún nó leis an Oifigeach Éisteachta in imeachtaí trádála, nó leis an dá cheann acu, laistigh den tréimhse ama a leagtar síos le Rialachán Cur Chun Feidhme (AE) 2020/2098. Ní bhfuarthas aon bharúil ná iarraidh ar éisteacht.

(5)

I litir an 2 Iúil 2021, tharraing an t-iarratasóir an iarraidh siar go hoifigiúil, iarraidh a taisceadh an 13 Iúil 2020.

(6)

I gcomhréir le hAirteagal 9(1) de Rialachán (AE) 2016/1036 agus le hAirteagal 14(1) de Rialachán (AE) 2016/1037, féadfar imeachtaí a fhoirceannadh i gcás ina ndéanfar an iarraidh a tharraingt siar, ach amháin mura mbeadh an foirceannadh sin chun leas an Aontais. Níor tháinig aon chúinse chun cinn le linn an imscrúdaithe a léirigh go mbeadh sé chun leas an Aontais leanúint ar aghaidh leis an gcás.

(7)

Dá bhrí sin, is é conclúid an Choimisiúin gur cheart an t-imscrúdú athbhreithniúcháin a fhoirceannadh. Dá réir sin, ba cheart deireadh a chur le clárú allmhairí an iarratasóra, agus an dleacht frithdhumpála ar leibhéal na tíre ar fad is infheidhme i leith ‘gach cuideachta eile’ in Airteagal 1(2) de Rialachán Cur Chun Feidhme (AE) 2015/1518 ón gCoimisiún agus Rialachán Cur Chun Feidhme (AE) 2021/1266 ón gCoimisiún.(172,2 EUR/tona), ba cheart an dleacht sin a thobhach go cúlghabhálach ar na hallmhairí sin ó dháta tionscnaimh an imscrúdaithe athbhreithniúcháin.

(8)

Cuireadh na páirtithe leasmhara ar an eolas dá réir sin agus tugadh deis dóibh a mbarúlacha a chur in iúl. Ní bhfuarthas aon bharúil.

(9)

Na bearta a leagtar síos leis an gCinneadh seo, is i gcomhréir le tuairim an Choiste arna bhunú le hAirteagal 15(1) de Rialachán (AE) 2016/1036 atá siad, rud dá dtagraíonn Airteagal 25(1) de Rialachán (AE) 2016/1037 freisin.