(1)

Leis na critéir faoina bhféadfaidh údaráis inniúla a cheangal go ndéanfar athruithe ar an ráiteas comhlíontachta dá dtagraítear in Airteagal 26(3) den Rialachán sin, ba cheart cineál fhorálacha Rialachán (AE) 2016/1011 a chur san áireamh, ar forálacha iad a bhféadfaidh riarthóirí tagarmharcanna neamhshuntasacha, i gcomhréir le hAirteagal 26(1) den Rialachán sin, a roghnú gan a chur i bhfeidhm. Ós rud é go mbaineann roinnt de na ceanglais a leagtar amach sna forálacha sin le struchtúr eagraíochtúil an riarthóra, agus cé go mbaineann cinn eile leis an tagarmharc nó leis an bhfine tagarmharcanna lena mbaineann, tá feidhm ag an idirdhealú céanna maidir leis na critéir faoina bhféadfaidh údaráis inniúla a cheangal go ndéanfar athruithe ar an ráiteas comhlíontachta.

(2)

I ndáil le ceanglais a bhaineann le struchtúr eagraíochtúil an riarthóra, ba cheart d’údaráis inniúla a bheith in ann a cheangal go ndéanfar athruithe ar an ráiteas comhlíontachta maidir le tagarmharc neamhshuntasach i gcás ina measann siad go bhfuil an ráiteas comhlíontachta doiléir maidir leis an bhfáth ar cheart cead a bheith ag an riarthóir lena mbaineann gan na ceanglais a leagtar síos in Airteagail 4, 5 agus 6 de Rialachán (AE) 2016/1011 a chomhlíonadh. Ba cheart an méid sin a bheith amhlaidh go háirithe i gcás ina bhfuil easpa soiléireachta ann maidir le struchtúr eagraíochtúil an riarthóra lena mbaineann, le sainaithint coinbhleachtaí leasa féideartha a fhéadfaidh eascairt idir na daoine a bhfuil baint acu le soláthar an tagarmhairc agus na fostaithe eile nó codanna d’eagraíocht an riarthóra, le próiseas formhaoirseachta sholáthar an tagarmhairc neamhshuntasaigh, nó leis an gcreat rialaithe chun an tagarmharc neamhshuntasach a sholáthar nó a fhoilsiú nó chun é a chur ar fáil.

(3)

I ndáil le ceanglais a bhaineann leis an tagarmharc nó leis an bhfine tagarmharcanna, ba cheart d’údaráis inniúla a bheith in ann a cheangal go ndéanfar athruithe ar an ráiteas comhlíontachta maidir le tagarmharc neamhshuntasach i gcás ina measann siad go bhfuil an ráiteas comhlíontachta doiléir maidir leis an bhfáth ar cheart cead a bheith ag an riarthóir lena mbaineann gan na ceanglais a leagtar síos in Airteagal 11 agus in Airteagail 13 go 16 de Rialachán (AE) 2016/1011 a chomhlíonadh. Ba cheart an méid sin a bheith amhlaidh go háirithe i gcás ina bhfuil easpa soiléireachta ann maidir leis an leibhéal rialaithe ar sholáthar na sonraí ionchuir, le trédhearcacht na nósanna imeachta chun comhairliúchán a dhéanamh ar aon athrú ábhartha ar mhodheolaíocht an tagarmhairc neamhshuntasaigh, leis an bpróiseas a bhaineann le cásanna cúblála nó iarrachtaí ar chúbláil ar an tagarmharc neamhshuntasach a thuairisciú, leis an gcód iompair i gcás ina bhfuil an tagarmharc neamhshuntasach bunaithe ar shonraí ionchuir ó rannchuiditheoirí, le hinniúlacht an riarthóra athbhreithniú a dhéanamh agus tuairisc a thabhairt ar a chomhlíontacht le modheolaíocht an tagarmhairc neamhshuntasaigh agus le Rialachán (AE) 2016/1011, agus, i gcás ina ndéanann rannchuiditheoir faoi mhaoirseacht sonraí ionchuir a rannchuidiú, cibé acu an ndéantar sin le rialuithe iomchuí chun cruinneas, sláine agus iontaofacht na sonraí ionchuir a áirithiú.

(4)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ESMA) faoi bhráid an Choimisiúin.

(5)

Reáchtáil ESMA comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí féideartha agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2).

(6)

Chun comhsheasmhacht le dáta chur i bhfeidhm Airteagal 5 de Rialachán (AE) 2019/2175 ó Pharlaimint na hEorpa agus ón gComhairle (3) a áirithiú, rud a thugtar isteach i Rialachán (AE) 2016/1011 Airteagal 26(6) leis an Rialachán sin, ba cheart feidhm a bheith ag an Rialachán seo ón 1 Eanáir 2022,

(1)

Baineann measúnú na n-údarás inniúil dá dtagraítear in Airteagal 21(2), pointe (b), de Rialachán (AE) 2016/1011 le conas is ceart tagarmharc criticiúil a thrasdul chuig riarthóir nua nó conas is ceart scor den tagarmharc sin a sholáthar. Dá bhrí sin, is iomchuí sonrú a dhéanamh ar dhá shraith critéar a bheidh le meas ag na húdaráis inniúla, de réir an cháis a bheidh á mheasúnú acu.

(2)

I gcás ina mbeidh tagarmharc criticiúil le trasdul chuig riarthóir nua, ba cheart don riarthóir nua a bheith in ann leanúnachas maidir le soláthar an tagarmhairc chriticiúil a áirithiú ar bhealach ina bhféadfaidh eintitis faoi mhaoirseacht leanúint d’úsáid a bhaint as gan bhriseadh agus i gcomhréir le Rialachán (AE) 2016/1011. Dá bhrí sin, is gá sonrú a dhéanamh ar na critéir ar cheart d’údarás inniúil iad a chur san áireamh le linn measúnú a dhéanamh ar cibé acu an féidir leis an riarthóir nua an leanúnachas sin a áirithiú.

(3)

Ba cheart an mhaoirseacht a dhéantar ar thagarmharc criticiúil a áirithiú ar feadh thrasdul an tagarmhairc sin chuig riarthóir nua. Is airde an riosca a bhaineann le neamhleanúnachas sa mhaoirseacht a dhéantar ar an tagarmharc sin i gcás ina bhfuil an riarthóir nua lonnaithe i mBallstát atá éagsúil le Ballstát an údaráis inniúil ag a mbeidh an measúnú á dhéanamh ar conas is ceart an tagarmharc criticiúil a thrasdul chuig an riarthóir nua sin. Ba cheart do na húdaráis inniúla lena mbaineann dul i gcomhar chun a áirithiú go bhfaighidh an t-údarás inniúil ag a bhfuil an measúnú á dhéanamh an fhaisnéis uile is gá chun a chinneadh an ndéanfar an leanúnachas sa mhaoirseacht ar an tagarmharc a áirithiú ar feadh an trasdula sin, lena n-áirítear anailís atá dírithe ar shuíomh an riarthóra nua agus ar a stádas údaraithe.

(4)

Agus measúnú á dhéanamh ar conas is ceart tagarmharc criticiúil a thrasdul chuig riarthóir nua, ba cheart d’údarás inniúil anailís a dhéanamh, ó thaobh oibríochtúil de, ar conas a dhéanfar soláthar an tagarmhairc chriticiúil a aistriú ón riarthóir reatha chuig an riarthóir nua. Ba cheart don údarás inniúil lena mbaineann nithe ar leith a chur san áireamh, is iad sin foilseachán an tagarmhairc gan bhriseadh, infhaighteacht sonraí ionchuir, an mhodheolaíocht maidir le ríomh an tagarmhairc agus aon rannpháirtíocht is gá le haon rannchuiditheoir, úsáideoir agus geallsealbhóir eile.

(5)

Maidir le húdarás inniúil a dhéanann measúnú ar conas is ceart scor de thagarmharc criticiúil a sholáthar, ba cheart dó a bheith deimhin de gur féidir scor den tagarmharc a sholáthar ar bhealach rianúil, ag féachaint, inter alia, don nós imeachta um scor den tagarmharc arna bhunú ag a riarthóir i gcomhréir le hAirteagal 28(1) de Rialachán (AE) 2016/1011. Dá bhrí sin, is gá sonrú a dhéanamh ar na critéir ar cheart d’údarás inniúil iad a chur san áireamh chun a chinneadh an mar sin atá.

(6)

Maidir le húdarás inniúil a dhéanann measúnú ar conas is ceart scor de thagarmharc criticiúil a sholáthar, ba cheart dó na pleananna i scríbhinn maidir le scor den tagarmharc dá dtagraítear in Airteagal 28(2) de Rialachán (AE) 2016/1011 a chur san áireamh freisin. Is féidir nach mbeidh na pleananna i scríbhinn sin de chuid úsáideoirí éagsúla tagarmhairc chriticiúil ailínithe i gcónaí agus is féidir nach mbeidh siad comhsheasmhach má chuirtear i bhfeidhm an tráth céanna iad. Dá bhrí sin, is den tábhacht go gcuirfidh na húdaráis inniúla san áireamh a mhéid atá na pleananna i scríbhinn sin comhoiriúnach i dtaca le húsáideoirí éagsúla an tagarmhairc, lena n-áirítear i leith na n-eachtraí tucaide maidir le scor den tagarmharc a bheartaítear leis na pleananna sin i scríbhinn, agus conas is féidir na pleananna i scríbhinn sin a úsáid chun go n-áiritheofar go scoirfear den tagarmharc criticiúil ar bhealach rianúil.

(7)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ÚEUM) faoi bhráid an Choimisiúin.

(8)

Reáchtáil ÚEUM comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus na tairbhí féideartha agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2).

(9)

Chun comhsheasmhacht le dáta chur i bhfeidhm Airteagal 5 de Rialachán (AE) 2019/2175 ó Pharlaimint na hEorpa agus ón gComhairle (3) a áirithiú, rud a thug isteach i Rialachán (AE) 2016/1011 Airteagal 21(5) den Rialachán sin, ba cheart feidhm a bheith ag an Rialachán seo ón 1 Eanáir 2022,

(1)

Chun a bheith láidir, le socruithe rialachais riarthóirí tagarmharcanna ba cheart foráil a dhéanamh maidir le struchtúr eagraíochtúil lena sonraítear, ar bhealach soiléir agus doiciméadaithe, nósanna imeachta um chinnteoireacht bainistíochta, línte tuairiscithe inmheánacha agus leithdháileadh fheidhmeanna agus fhreagrachtaí na ndaoine ag a bhfuil baint le soláthar tagarmhairc.

(2)

Le socruithe rialachais láidre ba cheart a bheith in ann coinbhleachtaí leasa féideartha a shainaithint agus a bhainistiú, ar coinbhleachtaí iad a fhéadfaidh eascairt laistigh de struchtúr eagraíochtúil riarthóirí tagarmharcanna. Dá bhrí sin, le socruithe rialachais riarthóirí tagarmharcanna ba cheart go háirithe struchtúr an chomhlachta bainistíochta agus a róil agus a fhreagrachtaí a shonrú.

(3)

Le himthoisc a bhféadfaidh coinbhleacht leasa eascairt aisti ní dhéantar duine, ag a bhfuil baint leis an gcoinbhleacht leasa sin, a eisiamh go huathoibríoch ó bheith bainteach le soláthar tagarmhairc. Mar sin féin, ba cheart do riarthóirí tagarmharcanna na himthosca uile a shainaithint, ar imthosca iad a bhféadfaidh coinbhleacht leasa fhéideartha nó iarbhír eascairt astu, measúnú a dhéanamh orthu agus cinneadh a dhéanamh, i gcás inarb iomchuí, ar bhearta maolaitheacha.

(4)

Ba cheart do riarthóirí tagarmharcanna atá mar chuid de ghrúpa measúnú iomchuí a dhéanamh ar aon impleacht a bhaineann le struchtúr an ghrúpa le haghaidh a socruithe rialachais féin. Leis an measúnú sin ba cheart a mheas cibé acu an bhféadfar dochar a dhéanamh, leis na coinbhleachtaí leasa a thagann chun cinn, dá gcumas a n-oibleagáidí rialála a chomhlíonadh. Ina theannta sin, leis an measúnú sin ba cheart measúnú a dhéanamh ar cibé acu an bhféadfaí dochar a dhéanamh do neamhspleáchas na riarthóirí le struchtúr an ghrúpa nó de dheasca go bhfuil comhalta de chomhlacht bainistíochta na riarthóirí ina chomhalta freisin den bhord de chuid eintitis eile den ghrúpa céanna. Ba cheart do na riarthóirí tagarmharcanna sin nósanna imeachta sonracha a ghlacadh chun coinbhleachtaí leasa, a fhéadfaidh eascairt as an struchtúr grúpa sin, a chosc agus a bhainistiú.

(5)

Ba cheart do riarthóirí a oibríonn mar chuid de ghrúpa a bheith in ann sineirgí a lorg ar leibhéal grúpa. Mar sin féin, le feidhmeanna a sheachfhoinsítear laistigh de ghrúpa ba cheart Airteagal 10 de Rialachán (AE) 2016/1011, agus na forálacha ábhartha uile eile den Rialachán sin, a chomhlíonadh.

(6)

I gcomhréir le prionsabal na comhréireachta, níor cheart do riarthóirí tagarmharcanna neamhshuntasacha a bheith faoi réir ualach riaracháin iomarcach. Maidir lena dtagarmharcanna neamhshuntasacha, ba cheart do na riarthóirí sin a bheith in ann, dá bhrí sin, diúltú do cheanglais áirithe maidir lena struchtúr eagraíochtúil. Ina theannta sin, i gcás ina bhfuil údar leis i bhfianaise chineál, scála agus chastacht a ngníomhaíochtaí, na dóchúlachta go n-eascródh coinbhleacht leasa idir soláthar an tagarmhairc agus aon ghníomhaíocht eile de chuid an riarthóra, agus an leibhéal discréide a bhaineann le próiseas sholáthar an tagarmhairc, ba cheart do riarthóirí tagarmharcanna áirithe a bheith in ann diúltú don cheanglas a bhaineann leis an nós imeachta um cheapadh an chomhlachta bainistíochta a shonrú ina socruithe rialachais.

(7)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ÚEUM) faoi bhráid an Choimisiúin.

(8)

Reáchtáil ÚEUM comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí gaolmhara féideartha agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2).

(9)

Chun comhsheasmhacht le dáta chur i bhfeidhm Airteagal 5 de Rialachán (AE) 2019/2175 ó Pharlaimint na hEorpa agus ón gComhairle (3) a áirithiú, rud a thug isteach i Rialachán (AE) 2016/1011 Airteagal 4(9) den Rialachán sin, ba cheart feidhm a bheith ag an Rialachán seo ón 1 Eanáir 2022,

(1)

Ba cheart a áirithiú go ndéanfar cúbláil ar thagarmharc nó iarracht ar chúbláil ar thagarmharc a bhrath ar bhealach éifeachtach agus leordhóthanach. Dá bhrí sin, is gá go mbeidh na córais agus na rialuithe de chuid riarthóir tagarmhairc comhréireach le cineál agus castacht an tagarmhairc arna sholáthar, agus leis an riosca cúblála a bhaineann leis, agus go ndéanfar meastóireacht ar an riosca cúblála ar bhonn measúnú oibiachtúil lena gcuirtear bunús, cineál, tréith ar leith agus déine an riosca sin san áireamh.

(2)

Chun a áirithiú go ndéanfar brath aon iompair, a bhféadfaidh cúbláil ar thagarmharc nó iarracht ar chúbláil ar thagarmharc a bheith ag baint leis, ar bhealach éifeachtach, is gá foráil a dhéanamh maidir le córais uathoibrithe iomchuí chun faireachán a dhéanamh ar shonraí ionchuir. Mar sin féin, ní leor córais uathoibrithe amháin chun a áirithiú go mbraithfear iompraíocht ionramhálach go héifeachtach. Dá bhrí sin ba cheart córais uathoibrithe a chomhlánú le leibhéal iomchuí anailíse daonna, rud a bheidh le déanamh ag comhaltaí foirne ar a gcuirfear oiliúint iomchuí.

(3)

Chun a áirithiú go bhféadfaidh údaráis inniúla measúnú éifeachtach a dhéanamh ar bhearta arna ndéanamh chun mí-iompar a shainaithint agus a thuairisciú, ba cheart do riarthóirí, arna iarraidh sin, faisnéis a sholáthar don údarás inniúil maidir le cineál agus castacht an tagarmhairc lena mbaineann, agus leis an riosca cúblála a bhaineann leis, agus bunús a thabhairt lena iomchuí atá an leibhéal uathoibrithe agus anailíse daonna arna roghnú.

(4)

Ba cheart d’fhostaithe riarthóra tagarmhairc, atá i gceannas ar chórais agus rialuithe an riarthóra a oibriú, oiliúint iomchuí a fháil chun é a chur ar a gcumas dóibh anailís a dhéanamh ar cibé acu an bhfuil ionchur sonraí ar leith amhrasta. Leis an oiliúint sin ba cheart a áirithiú go mbeidh na fostaithe sin ar an eolas faoi na saintréithe a bhaineann le sonraí ionchuir a chur isteach go hiomchuí agus faoi neamhréireachtaí i sonraí ionchuir arna ndéanamh, b’fhéidir, de dheasca cúblála nó iarracht ar chúbláil. Ba cheart oiliúint éifeachtach a chur in oiriúint do chineál agus castacht an tagarmhairc arna sholáthar agus don riosca cúblála a bhaineann leis sin.

(5)

Is féidir gur fearr le riarthóirí feidhmeanna a bhaineann leis na córais agus leis na rialuithe a sheachfhoinsiú. Níor cheart an seachfhoinsiú sin a bheith indéanta ach a mhéid nach ndéantar díobháil ábhartha leis do rialú an riarthóra ar sholáthar an tagarmhairc ná do chumas an údaráis inniúil ábhartha maoirseacht a dhéanamh ar an tagarmharc, agus tá sé in aon chás faoi réir cheanglais Airteagal 10 de Rialachán (AE) 2016/1011.

(6)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ESMA) faoi bhráid an Choimisiúin.

(7)

Reáchtáil ESMA comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí gaolmhara féideartha agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2).

(8)

Chun comhsheasmhacht le dáta chur i bhfeidhm Airteagal 5 de Rialachán (AE) 2019/2175 ó Pharlaimint na hEorpa agus ón gComhairle (3) a áirithiú, rud a thugtar isteach i Rialachán (AE) 2016/1011 Airteagal 14(4) leis an Rialachán sin, ba cheart feidhm a bheith ag an Rialachán seo ón 1 Eanáir 2022,

(1)

Ionas go mbeidh an mhodheolaíocht lena gcinntear tagarmharc láidir agus iontaofa, ba cheart a shonrú leis an modheolaíocht sin cineál na sonraí ionchuir arna úsáid agus aon chritéar atá le bheith infheidhme in imthosca ina dtiteann cainníocht nó cáilíocht na sonraí ionchuir faoi bhun na gcaighdeán is gá chun go ndéanfar an tagarmharc a chinneadh go cruinn agus go hiontaofa leis an modheolaíocht, ba cheart í a bheith faoi réir measúnú ar an gcaidreamh idir na príomhthoimhdí arna n-úsáid agus íogaireacht an tagarmhairc arna ríomh leis an modheolaíocht sin, ba cheart a bheith in ann léiriú a thabhairt léi ar an mbunmhargadh nó ar an bhfíorchás eacnamaíoch lena bhféachtar lena thomhas agus ba cheart fachtóirí a ionchorprú léi lena n-áirítear paraiméadair agus sonraí ionchuir is ábhartha chun an bunmhargadh a thomhas.

(2)

Ríomhtar tagarmharc trí úsáid a bhaint as foirmle nó as modheolaíocht ríofa eile bunaithe ar luachanna foluiteacha. Bíonn méid áirithe discréide ag riarthóirí maidir leis an bhfoirmle a chur le chéile, leis an ríomh is gá a dhéanamh agus leis na sonraí ionchuir a chinneadh. Cruthaítear riosca cúblála leis an méid discréide sin. Dá bhrí sin, ba cheart do riarthóirí a áirithiú go mbeidh córas rialaithe iomchuí i bhfeidhm nuair a úsáidtear an discréid sin. Le Rialachán (AE) 2016/1011 aithnítear go mb’fhéidir go leabófaí an discréid arna feidhmiú ag gach riarthóir, agus sin trí mhodheolaíocht tagarmhairc a chur le chéile. Tá sé tábhachtach go n-áireofar rialacha soiléire sa mhodheolaíocht lena sainaithnítear conas agus cathain a cheadaítear an discréid sin a fheidhmiú agus go háirithe cibé acu an bhfuil an discréid sin bunaithe ar algartam nó ar mhodheolaíocht réamhshainithe. Thairis sin, leis an modheolaíocht ba cheart soiléiriú a thabhairt ar na himthosca ina measfaí nár leordhóthanach sonraí idirbhirt sa bhunmhargadh.

(3)

Tá sé tábhachtach go mbeidh riarthóir in ann modheolaíocht tagarmhairc a chur le chéile atá athléimneach ó thaobh dálaí margaidh éagsúla de agus lena gceadaítear an tagarmharc a ríomh sa mhéid is leithne imthosca margaidh agus is féidir. Dá bhrí sin, ba cheart an mhodheolaíocht tagarmharc arna húsáid a bheith ag brath ar luachanna stairiúla leordhóthanacha agus iomchuí de chuid an tagarmhairc. Ar an gcúis chéanna, agus go háirithe chun ríomh an tagarmhairc a bhailíochtú agus chun meastóireacht a dhéanamh ar fheidhmíocht na modheolaíochta ex post, ba cheart iarthástáil a dhéanamh ar an modheolaíocht tagarmhairc in aghaidh sonraí idirbhirt atá ar fáil. Ba cheart an iarthástáil sin a bheith ina cleachtas ex post lena n-úsáidtear sonraí breise atá ar fáil agus nár úsáideadh le haghaidh ríomh an tagarmhairc nó foinsí eile sonraí idirbhirt, nó lena n-atógtar luachanna stairiúla an tagarmhairc. Chun a áirithiú go bhféadfar bailíochtú a dhéanamh leis an modheolaíocht tagarmhairc, tá sé tábhachtach go ndéanfar iarthástáil tráth gach athbhreithnithe bhliantúil ar an modheolaíocht tagarmhairc agus, de réir chineál an tagarmhairc, tar éis gach athraithe ábhartha a dhéantar ar an modheolaíocht sin, ar bhonn leanúnach, nó nuair a sholáthraítear an tagarmharc den chéad uair. Ba cheart torthaí na hiarthástála a léiriú sa mhodheolaíocht.

(4)

Ba cheart a bheith in ann modheolaíocht tagarmhairc atá athléimneach a úsáid chun an tagarmharc a ríomh sa mhéid is leithne imthosca agus is féidir, lena n-áirítear i ndálaí struis margaidh. Dá bhrí sin, tá sé tábhachtach go ndéanfaidh riarthóirí measúnú ar thionchar dálaí margaidh éagsúla ar an modheolaíocht trí úsáid a bhaint as sonraí stairiúla ó dhálaí struis sa mhargadh a réadaíodh, agus i gcás tagarmharcanna criticiúla, go n-úsáidfear sonraí hipitéiseacha le haghaidh dálaí struis margaidh nár réadaíodh.

(5)

Le modheolaíocht tagarmhairc atá inrianaithe agus infhíoraithe ba cheart foráil a dhéanamh maidir le seiceáil agus rialú leanúnach ar gach ríomh a dhéantar ar an tagarmharc. Leis an inrianaitheacht ba cheart doiciméadacht ar na bearta éagsúla den mhodheolaíocht a áireamh agus ba cheart í a bheith mar bhunús le hinfhíoraitheacht rud a d’fhágfadh go bhféadfaí luachanna stairiúla an tagarmhairc a atógáil.

(6)

I gcomhréir le prionsabal na comhréireachta, maidir le riarthóirí tagarmharcanna neamhshuntasacha agus tagarmharcanna sonraí rialáilte, níor cheart dóibh a bheith faoi réir ualach riaracháin iomarcach. Dá bhrí sin, is iomchuí go mbeadh na riarthóirí sin in ann diúltú do cheanglais cháilíochta áirithe le haghaidh an dtagarmharcanna sin. Ina theannta sin, i gcás ina bhfuil údar leis i bhfianaise chineál, scála agus chastacht a ngníomhaíochtaí, na dóchúlachta go n-eascródh coinbhleacht leasa idir soláthar an tagarmhairc agus aon ghníomhaíocht eile de chuid an riarthóra, agus an leibhéal discréide a bhaineann le próiseas sholáthar an tagarmhairc, ba cheart do riarthóirí tagarmharcanna áirithe a bheith in ann diúltú do cheanglais áirithe maidir le hathléimneacht mhodheolaíocht an tagarmhairc.

(7)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (ÚEUM) faoi bhráid an Choimisiúin.

(8)

Reáchtáil ÚEUM comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí gaolmhara féideartha agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (2).

(9)

Chun comhsheasmhacht le dáta chur i bhfeidhm Airteagal 5 de Rialachán (AE) 2019/2175 ó Pharlaimint na hEorpa agus ón gComhairle (3) a áirithiú, rud a thugtar isteach i Rialachán (AE) 2016/1011 Airteagal 12(4) leis an Rialachán sin, ba cheart feidhm a bheith ag an Rialachán seo ón 1 Eanáir 2022,

(1)

Anailísí, tástálacha agus diagnóisí saotharlainne ar shamplaí a glacadh le linn rialuithe oifigiúla agus gníomhaíochtaí oifigiúla eile, foráiltear le Rialachán (AE) 2017/625 gur saotharlanna oifigiúla a dhéanfaidh na nithe sin, saotharlanna a bheidh ainmnithe ina saotharlanna oifigiúla ag údaráis inniúla na mBallstát.

(2)

I gcomhréir le hAirteagal 37(4), pointe (e) de Rialachán (AE) 2017/625, ní mór do shaotharlanna oifigiúla critéir chreidiúnaithe áirithe bunaithe ar chaighdeáin idirnáisiúnta a chomhlíonadh, inter alia. Foráiltear in Airteagal 37(5) go gcuimseofar i raon feidhme an chreidiúnaithe sin na modhanna anailíse, tástála nó diagnóise saotharlainne is gá a úsáid le linn oibríochtaí oifigiúla saotharlainne.

(3)

An oibleagáid maidir le saotharlanna agus modhanna a chreidiúnú, is é is cuspóir di a áirithiú go mbeidh saotharlanna oifigiúla inniúil ar thorthaí iontaofa agus inatáirgthe a sholáthar ionas go mbeidh bonn ann do rialuithe oifigiúla agus gníomhaíochtaí oifigiúla comhchuibhithe eile laistigh den Aontas.

(4)

Ag an am céanna, éilíonn an próiseas creidiúnaithe go leor ama agus acmhainní.

(5)

Le hAirteagal 41 de Rialachán (AE) 2017/625, dá bhrí sin, saotharlanna nach gcomhlíonann coinníollacha Airteagal 37(4), pointe (e) den Rialachán sin i ndáil leis na modhanna ar fad a úsáideann siad le haghaidh rialuithe oifigiúla agus gníomhaíochtaí oifigiúla eile, tugtar de chumhacht don Choimisiún gníomhartha tarmligthe a ghlacadh lena sonraítear na cásanna ina bhféadfaidh údaráis inniúla na saotharlanna sin a ainmniú ina saotharlanna oifigiúla, agus na coinníollacha faoina bhféadfaidh siad sin a dhéanamh. Féadfar saotharlanna den sórt sin a ainmniú de réir na gcoinníollacha a shonraítear faoin gcumhachtú sin ar choinníoll go gcomhlíonann siad na critéir a bhunaítear in Airteagal 41, pointí (a) agus (b) de Rialachán (AE) 2017/625.

(6)

Tá gá le tuilleadh iarrachtaí sna réimsí seo a leanas chun próiseas an chreidiúnaithe a thabhairt chun críche - sláinte plandaí, ábhair a bhíonn i dtadhall le bia, breiseáin bhia, einsímí bia, blastáin agus breiseáin bheathaithe. Tá na tascanna a bhaineann leis an méid sin casta, mar an líon substaintí a d’fhéadfadh a bheith ann agus a bhíonn le fíorú i maitrís ar leith nó sna comhcheangail éagsúla maitríse/anailíte, ciallaíonn sé go mbíonn raon leathan agus líon ard modhanna tástála i gceist. Cuireann creidiúnú na gcomhcheangal féideartha uile ualach díréireach ó thaobh ama agus acmhainní de ar shaotharlanna sna réimsí sin.

(7)

Dá bhrí sin, na saotharlanna sin nach bhfuil creidiúnaithe i leith na modhanna ar fad a úsáideann siad le haghaidh rialuithe oifigiúla agus gníomhaíochtaí oifigiúla eile, ba cheart na húdaráis inniúla a bheith in ann na saotharlanna sin a ainmniú ina saotharlanna oifigiúla ar choinníoll go bhfuil scéim dearbhaithe cáilíochta i bhfeidhm acu agus go mbaineann siad úsáid as modhanna arb é is bunús dóibh na critéir ábhartha a leagtar amach in Iarscríbhinn III a ghabhann le Rialachán (AE) 2017/625 iad, agus na módúlachtaí maidir leis na critéir sin a chur i bhfeidhm.

(8)

I réimse shláinte na bplandaí, na saotharlanna sin ar mian leo úsáid a bhaint as modh nach bhfuil creidiúnú acu ina leith, ba cheart údaráis inniúla a bheith in ann na saotharlanna sin a ainmniú ina saotharlanna oifigiúla ach creidiúnú a bheith acu cheana i leith modh amháin ar a laghad atá le húsáid ar lotnaid ar den ghrúpa orgánach céanna ise agus an lotnaid ar a n-úsáidtear an modh neamhchreidiúnaithe, mar atá néimeatóidí, baictéir, fungais agus úimícéití, víris, víoróidigh agus fíteaplasmaí, feithidí agus fíneoga.

(9)

I gcomhréir le hAirteagal 167(2) de Rialachán (AE) 2017/625, i réimse shláinte na bplandaí, beidh feidhm ag Airteagal 37(4), pointe (e) agus ag Airteagal 37(5) den Rialachán sin ón 29 Aibreán 2022. Maidir le saotharlanna oifigiúla a ainmniú i réimse shláinte na bplandaí, ba cheart, dá bhrí sin, feidhm a bheith ag an Rialachán seo freisin ón 29 Aibreán 2022,

(1)

Chun coinníollacha aonfhoirmeacha a áirithiú le haghaidh ríomh forálacha teicniúla agus bunchistí dílse ag gnóthais árachais agus athárachais chun críocha Threoir 2009/138/CE, ba cheart faisnéis theicniúil a leagan síos le haghaidh gach dáta tagartha maidir le struchtúir téarma ábhartha agus ráta úis atá saor ó riosca agus maidir le raonta difríochta bunúsacha chun an coigeartú meaitseála agus na coigeartuithe luaineachta a ríomh.

(2)

Ba cheart do ghnóthais árachais agus athárachais úsáid a bhaint as an bhfaisnéis theicniúil atá bunaithe ar shonraí margaidh a bhaineann le deireadh na míosa roimhe sin a thagann roimh an gcéad dáta tagartha maidir le tuairisciú a bhfuil feidhm ag an Rialachán maidir leis. An 5 Iúil 2021 chuir an tÚdarás Eorpach um Árachas agus Pinsin Cheirde an fhaisnéis theicniúil a bhaineann le sonraí margaidh go dtí deireadh mhí an Mheithimh 2021 ar fáil don Choimisiún. Foilsíodh an fhaisnéis sin an 5 Iúil 2021 i gcomhréir le hAirteagal 77e(1) de Threoir 2009/138/CE.

(3)

I bhfianaise an ghá an fhaisnéis theicniúil a bheith ar fáil láithreach, tá sé tábhachtach go dtiocfaidh an Rialachán seo i bhfeidhm ar bhonn práinne.

(4)

Ar chúiseanna stuamachta, ní mór go n-úsáidfidh gnóthais árachais agus athárachais an fhaisnéis theicniúil chéanna chun forálacha teicniúla agus cistí dílse bunúsacha a ríomh gan beann ar an dáta a thuairiscíonn siad dá n-údaráis inniúla. Ba cheart dá bhrí sin go mbeadh feidhm ag an Rialachán seo ón gcéad dáta tagartha tuarascála a bhfuil feidhm ag an Rialachán seo maidir leis.

(5)

D’fhonn deimhneacht dhlíthiúil a chur ar fáil a luaithe is féidir, ar mhórchúiseanna práinne a bhaineann le hinfhaighteacht an struchtúir téarma ábhartha agus ráta úis atá saor ó riosca, tá bonn cirt cuí le bearta dá bhforáiltear sa Rialachán seo a ghlacadh i gcomhréir le hAirteagal 8, i gcomhar le hAirteagal 4 de Rialachán (AE) Uimh. 182/2011 ó Pharlaimint na hEorpa agus ón gComhairle (2),