(1)

I gcomhréir leis an gcéad fhomhír d’Airteagal 53(1) de Rialachán (AE) Uimh. 1151/2012, tá scrúdú déanta ag an gCoimisiún ar iarratas na hIodáile ar fhormheas ar leasú ar shonraíocht an táisc gheografaigh faoi chosaint “Burrata di Andria” atá cláraithe faoi Rialachán Cur Chun Feidhme (AE) 2016/2103 ón gCoimisiún (2).

(2)

Ós rud é gur leasú nach mion atá sa leasú atá i gceist de réir bhrí Airteagal 53(2) de Rialachán (AE) Uimh. 1151/2012, d’fhoilsigh an Coimisiún an t-iarratas ar leasú in Iris Oifigiúil an Aontais Eorpaigh faoi mar a cheanglaítear le hAirteagal 50(2)(a) den Rialachán sin (3).

(3)

I gcomhréir le hAirteagal 51 de Rialachán (AE) Uimh. 1151/2012, ós rud é nár tugadh aon fhógra faoi ráiteas freasúra don Choimisiún, ní mór an leasú ar an tsonraíocht a fhormheas,

(1)

Le Rialachán (CE) Uimh. 1831/2003 foráiltear d’údarú breiseán lena n-úsáid i gcothú ainmhithe agus don fhoras agus do na nósanna imeachta chun an t-údarú sin a dheonú. Le hAirteagal 10(2) den Rialachán sin foráiltear d’athmheastóireacht ar bhreiseáin a údaraítear de bhun Threoir 70/524/CEE ón gComhairle (2).

(2)

I gcomhréir le Treoir 70/524/CEE údaraíodh bláthola sinséir, oiléaroisín sinséir agus tintiúr sinséir ó Zingiber officinale Roscoe gan teorainn ama, mar bhreiseáin bheathaithe le haghaidh gach speicis ainmhíoch. Ina dhiaidh sin cuireadh na breiseáin sin i gClár na mbreiseán beathaithe mar tháirgí a bhí ann cheana, i gcomhréir le hAirteagal 10(1)(b) de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas chun athmheastóireacht a dhéanamh ar bhláthola sinséir ó Zingiber officinale Roscoe le haghaidh gach speicis ainmhíoch, ar oiléaroisín sinséir ó Zingiber officinale Roscoe le haghaidh na n-ainmhithe seo a leanas: sicíní lena ramhrú, béaróga, turcaithe lena ramhrú, bainbh, muca lena ramhrú, cránacha muice, ba déiríochta, laonna feola (bainne púdrach), eallaí lena ramhrú, caoirigh, gabhair, capaill, coiníní, éisc agus peataí agus ar thintiúr sinséir ó Zingiber officinale Roscoe le haghaidh capall agus madraí.

(4)

D’iarr an t-iarratasóir go ndéanfaí bláthola sinséir, oiléaroisín sinséir, agus tintiúr sinséir ó Zingiber officinale Roscoe a údarú lena n-úsáid in uisce óil freisin. Mar sin féin, le Rialachán (CE) Uimh. 1831/2003 ní cheadaítear “comhdhúile blaistithe” a údarú lena n-úsáid in uisce óil. Dá bhrí sin, níor cheart úsáid bláthola sinséir, oiléaroisín sinséir ná tintiúr sinséir ó Zingiber officinale Roscoe in uisce óil a cheadú.

(5)

D’iarr an t-iarratasóir go n-aicmeofaí na breiseáin sin i gcatagóir na mbreiseán “breiseáin chéadfacha” agus san fheidhmghrúpa “comhdhúile blaistithe”. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(6)

Chinn an tÚdarás Eorpach um Shábháilteacht Bia (“an tÚdarás”) ina thuairim an 7 Bealtaine 2020 (3), faoi na coinníollacha úsáide atá beartaithe, nach bhfuil tionchar díobhálach ag bláthola sinséir, ag oiléaroisín sinséir ná ag tintiúr sinséir ó Zingiber officinale Roscoe ar shláinte ainmhithe, ar shláinte an duine ná ar an gcomhshaol. Chinn an tÚdarás freisin gur cheart bláthola sinséir, oiléaroisín sinséir agus tintiúr sinséir ó Zingiber officinale Roscoe a mheas mar ghreannaitheoirí craicinn agus súl, mar ghreannaitheoirí don chonair riospráide agus mar íogróirí craicinn. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe maidir le húsáideoirí an bhreiseáin.

(7)

Chinn an tÚdarás go bhfuil bláthola sinséir, oiléaroisín sinséir agus tintiúr sinséir ó Zingiber officinale Roscoe aitheanta chun bia a bhlaistiú agus go mbeadh an fheidhm atá leo in ábhar beatha go bunúsach mar a chéile leis an bhfeidhm atá leo i mbia, dá bhrí sin, meastar nach bhfuil gá le haon léiriú éifeachtúlachta breise. Ní mheasann an tÚdarás go bhfuil gá le ceanglais shonracha maidir le faireachán iarmhargaidh. Rinne sé an tuarascáil maidir leis na modhanna anailíse ar an breiseán beathaithe in ábhar beatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003 a fhíorú freisin.

(8)

Léirítear leis an measúnú ar bhláthola sinséir, ar oiléaroisín sinséir agus ar thintiúr sinséir ó Zingiber officinale Roscoe go gcomhlíontar na coinníollacha maidir le húdarú, dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na substaintí sin a údarú [mar a shonraítear san Iarscríbhinn a ghabhann leis an Rialachán seo].

(9)

Ba cheart foráil a dhéanamh maidir le srianta agus coinníollacha chun rialú níos fearr a cheadú. Go háirithe, ba cheart cion molta a léiriú ar lipéad na mbreiseán beathaithe. I gcás ina sárófar an cion sin, ba cheart eolas áirithe a shonrú ar lipéad na réamh-mheascán.

(10)

Cé nach n-údaraítear bláthola sinséir, oiléaroisín sinséir ná tintiúr sinséir ó Zingiber officinale Roscoe lena n-úsáid mar bhlastáin in uisce óil, ní chuirtear bac ar a n-úsáid i mbeatha cumaisc a thugtar trí uisce.

(11)

Ós rud é nach gá, ar chúiseanna sábháilteachta, na modhnuithe ar na coinníollacha údaraithe maidir leis na substaintí lena mbaineann a chur i bhfeidhm láithreach, is iomchuí idirthréimhse a cheadú do na páirtithe leasmhara chun gur féidir leo iad féin a ullmhú chun na ceanglais nua a eascraíonn as an údarú a chomhlíonadh.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Tá feidhm san Aontas ag na treoirlínte atá sa Socrú maidir leis na Creidmheasanna Onnmhairiúcháin arna dTacú go hOifigiúil, lena n-áirítear an Tuiscint Earnála maidir le Creidmheasanna Onnmhairiúcháin le haghaidh Aerárthaí Sibhialta (“Tuiscint Earnála maidir le hAerárthaí”) atá in Iarscríbhinn III a ghabhann leis an Socrú, de bhua Rialachán (AE) Uimh. 1233/2011 ó Pharlaimint na hEorpa agus ón gComhairle (1).

(2)

De bhun Airteagal 28 den Tuiscint Earnála maidir le hAerárthaí, díríter moltaí maidir le Líne Choiteann chuig Rúnaíocht na hEagraíochta um Chomhar agus Forbairt Eacnamaíochta.

(3)

Tá tionscal na heitlíochta sibhialta buailte go trom mar thoradh ar phaindéim COVID-19 agus ar an ngéarchor eacnamaíoch a d’eascair aisti, ar tionscal é a bhfuil a ghnó faoi bhagairt ag na fadhbanna leachtachta gearrthéarmacha atá ag oibreoirí aerárthaí agus ceannaitheoirí aerárthaí agus inneall nua. I bhfianaise an choir chun donais eacnamaíoch atá ann faoi láthair agus atá ag géarú agus d'fhonn tromchúis an tionchair atá aige a laghdú, ba cheart don Aontas Line Choiteann a mholadh maidir le haisíocaíocht phríomhshuim na hiasachta a chur síar go sealadach i gcás ceannaitheoirí aerárthaí agus inneall nua (“an Líne Choiteann mholta”).

(4)

I gcomhréir le Cuid 4, Roinn 3 den Tuiscint Earnála maidir le hAerárthaí, tá Rannpháirtithe na Tuisceana Earnála maidir le hAerárthaí le cinneadh a dhéanamh, trí nós imeachta i scríbhinn, maidir leis an Líne Choiteann mholta.

(5)

Leis an Líne Choiteann mholta, cheadófaí do cheannaitheoirí aerárthaí nua mar a shainmhínítear in Airteagal 8 a) 1) den Tuiscint Earnála maidir le hAerárthaí, agus do cheannaitheoirí innill spártha agus páirteanna spártha mar a shainmhínítear in Airteagal 20 a), b) agus c) de, aisíocaíocht phríomhshuim na hiasachta a chur siar ar feadh 12 mhí tar éis sheachadadh na n-earraí ceannaithe, nó, má chomhlíontar coinníollacha áirithe, ar feadh 18 mí tar éis sheachadh na n-earraí ceannaithe.

(6)

Is iomchuí an seasamh atá le glacadh thar ceann an Aontais a mhéid a bhaineann leis an Líne Choiteann mholta sa nós imeachta i scríbhinn ag Rannpháirtithe na Tuisceana Earnála maidir le hAerárthaí, a bhunú, mar go mbeidh an Líne Choiteann mholta, tráth a mbeidh sí comhaontaithe, ina ceangal i leith an Aontais agus beidh sí in ann tionchar cinntitheach a imirt ar inneachar dhlí an Aontais, eadhon Rialachán (AE) Uimh. 1233/2011,

(1)

Chun críocha na n-oibríochtaí sibhialtacha bainistithe géarchéime, ba cheart freastal ar riachtanais mhear-imscartha agus oibríochtúla.

(2)

An 26 Aibreán 2018, ghlac an Chomhairle Cinneadh (CBES) 2018/653 maidir le cumas stórais a bhunú do mhisin shibhialtacha bainistithe géarchéime (1).

(3)

Tá foráil déanta in Airteagal 6 de Chinneadh (CBES) 2018/653 maidir le hathbhreithniú chun an méid tagartha airgeadais dá dtagraítear in Airteagal 4(1) den Chinneadh sin a mheasúnú a mhéid a bhaineann leis an méid a mheastar a bheidh riachtanach chun freastal ar iarrataí ó mhisin comhbheartas slándála sibhialta agus cosanta, agus chun riachtanais athraitheacha mhisin den sórt sin, riachtanais athraitheacha ghníomhaíochtaí oibríochtúla eile an Aontais agus riachtanais athraitheacha Ionadaithe Speisialta an Aontais Eorpaigh a chur san áireamh. Tá a leithéid de mheasúnú déanta ag Ardionadaí an Aontais do Ghnóthaí Eachtracha agus don Bheartas Slándála (“an tArdionadaí”) agus ag an gCoimisiún Eorpach. Ba é toradh an athbhreithnithe sin, mar a pléadh agus mar a comhaontaíodh é laistigh de chomhlachtaí ullmhúcháin ábhartha de chuid na Comhairle i mí na Nollag 2019 agus i mí Eanáir 2020, nár ghá an méid tagartha airgeadais a athbhreithniú.

(4)

De bhun Airteagal 7 de Chinneadh (CBES) 2018/653, lena bhforáiltear go bhféadfaidh an Chomhairle a chinneadh síneadh a chur leis an gCinneadh sin, mhol an tArdionadaí agus an Coimisiún, ina dtuarascáil leathbhliantúil chuig an gComhairle, gur cheart síneadh 18 mí a chur le Cinneadh (CBES) 2018/653, lena n-áirítear tréimhse 6 mhí chun an cumas stórais a bunaíodh leis an gCinneadh sin a thabhairt i gcrích ó thaobh an riaracháin agus an airgeadais de.

(5)

Tá an tArdionadaí agus an Coimisiún chun na hullmhúcháin is gá a dhéanamh le haghaidh na socruithe stórasaithe a dhéanfar amach anseo agus cuirfidh siad a moladh tosaigh faoi bhráid na Comhairle tráth nach déanaí ná mí an Mheithimh 2021,

(1)

An 9 Iúil 2020, chuir na monaróirí Škoda Auto a.s, Ford-Werke GmbH, Groupe Renault, FCA Italy S.p.A, SEAT S.A., Volkswagen AG, Automobiles Citroen, Automobiles Peugeot, PSA Automobiles SA agus OPEL Automobile GmbH iarraidh isteach go comhpháirteach, de bhun Airteagal 12a de Rialachán Cur Chun Feidhme (AE) Uimh. 725/2011 ón gCoimisiún (2) agus Rialachán Cur Chun Feidhme (AE) Uimh. 427/2014 ón gCoimisiún (3), iarraidh ar Chinneadh Cur Chun Feidhme (AE) 2020/174 ón gCoimisiún (4) a leasú chun ailtéarnóirí éifeachtúla 12 Volta arna bhformheas mar theicneolaíocht nuálach faoin gCinneadh sin a úsáid freisin i ngluaisteáin paisinéirí a chumhachtaítear le hinnill dócháin inmheánaigh agus i bhfeithiclí tráchtála éadroma atá in ann oibriú le gás peitriliam leachtaithe (GPL), le gás nádúrtha comhbhrúite (GNC) agus le E85.

(2)

An 11 Nollaig 2020, chuir na monaróirí Ford-Werke GmbH, Honda Motor Europe Ltd agus Renault SA iarraidh isteach go comhpháirteach, de bhun Airteagal 12a de Rialachán Cur Chun Feidhme (AE) Uimh. 725/2011 agus Rialachán Cur Chun Feidhme (AE) Uimh. 427/2014, iarraidh ar Chinneadh Cur Chun Feidhme (AE) 2020/1167 ón gCoimisiún (5) a leasú chun mótar-ghineadóirí éifeachtúla 48 Volta atá cumaiscthe le tiontairí 48 Volta/DC 12 Volta/DC, arna bhformheas mar theicneolaíocht nuálach faoin gCinneadh sin, a úsáid freisin in innill dócháin inmheánaigh agus i ngluaisteáin paisinéirí hibrideacha leictreacha agus i bhfeithiclí tráchtála éadroma atá in ann oibriú le GPL, GNC agus E85.

(3)

Rinne an Coimisiún measúnú ar an dá iarraidh i gcomhréir le hAirteagal 11 de Rialachán (AE) 2019/631, Rialachán Cur Chun Feidhme (AE) Uimh. 725/2011, Rialachán Cur Chun Feidhme (AE) Uimh. 427/2014 chomh maith leis na Treoirlínte Teicniúla maidir le hiarratais ar fhormheas teicneolaíochtaí nuálacha a ullmhú de bhun Rialachán (CE) Uimh. 443/2009 agus Rialachán (AE) Uimh. 510/2011 (leagan Iúil 2018) (6).

(4)

Ós rud é go mbaineann an dá iarraidh le soiléiriú maidir le húsáid teicneolaíochtaí nuálacha i bhfeithiclí atá in ann oibriú le GPL, GNC agus E85, is iomchuí aghaidh a thabhairt ar na hiarrataí sin in aon Chinneadh Cur Chun Feidhme amháin.

(5)

A mhéid a bhaineann leis an dá iarraidh, is iomchuí a shoiléiriú go bhféadfar coigiltis CO2 ó na teicneolaíochtaí nuálacha a chinneadh freisin nuair a bheidh siad feistithe ar fheithiclí a chaitheann GPL, GNC agus E85. Faoi réir fachtóirí áirithe a chur isteach a bhaineann go sonrach le breosla, meastar dá bhrí sin gurb iomchuí na modheolaíochtaí chun na coigiltis CO2 a chinneadh, mar a leagtar amach iad i gCinntí Cur Chun Feidhme (AE) 2020/174 agus (AE) 2020/1167, chun na coigiltis CO2 a chinneadh a bhaineann le húsáid na dteicneolaíochtaí nuálacha faoi seach le haghaidh feithiclí a chumhachtaítear leis na breoslaí sin.

(6)

A mhéid a bhaineann le E85, toisc nach bhfuil sé ar fáil ach go teoranta ar mhargadh an Aontais ina iomláine, ní iomchuí, áfach, idirdhealú a dhéanamh idir an cineál breosla sin agus peitreal chun críche na modheolaíochtaí chun na coigiltis CO2 a chinneadh.

(7)

Dá bhrí sin, ba cheart Cinntí Cur Chun Feidhme (AE) 2020/174 agus (AE) 2020/1167 a leasú dá réir sin,