(1)

Foráiltear in Airteagal 54a(1) de Threoir 2001/83/CE go mbeidh gnéithe sábháilteachta ag táirgí íocshláinte a bheidh faoi réir oidis.

(2)

De bhun Airteagal 22(a) de Rialachán Tarmligthe (AE) 2016/161 ón gCoimisiún (2), tá an mórdhíoltóir le haitheantóir uathúil táirgí íocshláinte a bhfuil sé beartaithe aige iad a dháileadh lasmuigh den Aontas a dhíchoimisiúnú.

(3)

An 1 Feabhra 2020, tharraing an Ríocht Aontaithe siar as an Aontas Eorpach agus as an gComhphobal Eorpach do Fhuinneamh Adamhach. De bhun Airteagail 126 agus 127 den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (“an Comhaontú um Tharraingt Siar”), is infheidhme dlí an Aontais maidir leis an Ríocht Aontaithe agus sa Ríocht Aontaithe le linn idirthréimhse a dtiocfaidh deireadh léi an 31 Nollaig 2020 (“idirthréimhse”).

(4)

I gcomhréir le hAirteagal 185 den Chomhaontú um Tharraingt Siar agus Airteagal 5(4) den Phrótacal maidir le hÉirinn/Tuaisceart Éireann, tá feidhm ag reachtaíocht an Aontais i dTuaisceart Éireann tar éis dheireadh na hidirthréimhse.

(5)

Mura mbeadh maolú ó na rialacha is infheidhme déanta, bheadh d’éifeacht ag tarraingt siar na Ríochta Aontaithe ón Aontas ar an gcaoi sin gur ghá na haitheantóirí uathúla a dhíchoimisiúnú le haghaidh táirgí íocshláinte atá ceaptha le dáileadh sa Ríocht Aontaithe.

(6)

Déantar roinnt táirgí íocshláinte a sholáthar don Chipir, d’Éirinn, do Mhálta nó do Thuaisceart Éireann tríd an mBreatain Mhór. Tar éis dheireadh na hidirthréimhse, i gcomhréir le hAirteagal 54a(1) de Threoir 2001/83/CE, is faoi allmhaireoirí a bhfuil údarú monaraíochta acu sna réimsí sin a bheadh sé aitheantóir uathúil nua a ghreamú de na táirgí íocshláinte nuair a chuirfí ar an margadh iad. Níl aon allmhaireoir a bhfuil údarú monaraíochta aige ann faoi láthair sa Chipir, in Éirinn, i Málta ná i dTuaisceart Éireann áfach agus dá bhrí sin, níl aon allmhaireoir sna limistéir sin a d’fhéadfadh an oibleagáid sin a chomhlíonadh ón 1 Eanáir 2021. Chun soláthairtí a áirithiú i gcomhréir leis an oibleagáid i dtaobh aitheantóir uathúil nua a ghreamú, is gá na slabhraí soláthair a athdhearadh.

(7)

Chun a áirithiú go ndéanfar táirgí íocshláinte a mhargú agus aitheantóir uathúil acu sna margaí beaga atá i dtuilleamaí na Ríochta Aontaithe faoi láthair le haghaidh a gcuid soláthairtí táirgí íocshláinte, is gá dá bhrí sin maolú sealadach a dheonú do mhórdhíoltóirí ón oibleagáid i dtaobh aitheantóir uathúil na dtáirgí a bhfuil sé beartaithe acu iad a dháileadh sa Ríocht Aontaithe a dhíchoimisiúnú mar go bhféadfar na táirgí sin a athonnmhairiú chuig an Aontas. Níor cheart go gcuirfeadh an maolú sin isteach ar chur i bhfeidhm dhlí an Aontais maidir leis an Ríocht Aontaithe agus sa Ríocht Aontaithe i gcomhréir le hAirteagal 5(4) den Phrótacal maidir le hÉirinn/Tuaisceart Éireann a ghabhann leis an gComhaontú um Tharraingt Siar i gcomhar le hIarscríbhinn 2 den Phrótacal sin.

(8)

Ba cheart, dá bhrí sin, Rialachán Tarmligthe (AE) 2016/161 a leasú dá réir sin.

(9)

Ag féachaint don deireadh atá ar tí teacht leis an idirthréimhse, ba cheart go dtiocfadh an Rialachán seo i bhfeidhm mar ábhar práinne. Ós rud é go dtiocfaidh deireadh le hidirthréimhse an chomhaontaithe um tharraingt siar an 31 Nollaig 2020, ba cheart feidhm a bheith ag an Rialachán seo ón 1 Eanáir 2021,

(1)

De bhua na chéad fhomhíre d’Airteagal 53(1) de Rialachán (AE) Uimh. 1151/2012, tá scrúdú déanta ag an gCoimisiún ar iarratas na Gréige ar fhormheas ar leasú ar shonraíocht an táisc gheografaigh faoi chosaint “Πατάτα Νάξου” (Patata Naxou), atá cláraithe faoi Rialachán Cur Chun Feidhme ( AE) Uimh. 1250/2011 ón gCoimisiún (2).

(2)

Ós rud é gur leasú nach mion atá sa leasú atá i gceist de réir bhrí Airteagal 53(2) de Rialachán (AE) Uimh. 1151/2012, d’fhoilsigh an Coimisiún an t-iarratas ar leasú in Iris Oifigiúil an Aontais Eorpaigh faoi mar a cheanglaítear le hAirteagal 50(2)(a) den Rialachán sin (3).

(3)

I gcomhréir le hAirteagal 51 de Rialachán (AE) Uimh. 1151/2012, ós rud é nár tugadh aon fhógra faoi ráiteas freasúra don Choimisiún, ní mór an leasú ar an tsonraíocht a fhormheas,

(1)

Le Rialachán Cur Chun Feidhme (AE) Uimh. 595/2012 (2) rinneadh feinpiorasaimín a fhormheas mar shubstaint ghníomhach i gcomhréir le Rialachán (CE) Uimh. 1107/2009 faoi réir coinníollacha áirithe, ina gceanglaítear ar an mBallstát scrúdúcháin go háirithe, an Coimisiún a chur ar an eolas, i gcomhréir le hAirteagal 38 de Rialachán (CE) Uimh. 1107/2009 maidir le sonraíocht an ábhair theicniúil mar ábhar a mhonaraítear ar bhonn tráchtála.

(2)

I mí na Nollag 2013, chuir an t-iarratasóir isteach sainchomhad nuashonraithe lena mbeartaítear an fhaisnéis faoi shonraíocht an ábhair theicniúil a mhonaraítear ar bhonn tráchtála a sholáthar don Ostair, an Ballstát is rapóirtéir laistigh den tréimhse iarratais. Rinne an Ballstát is rapóirtéir meastóireacht ar an sainchomhad nuashonraithe i bhfoirm Aguisín a ghabhann leis an Dréacht-Tuarascáil.

(3)

An 23 Aibreán 2014, rinne an Ostair an t-aguisín a leithdháileadh ar na Ballstáit, ar an iarratasóir agus ar an Údarás Eorpach um Shábháilteacht Bia (“an tÚdarás”) chun barúlacha a fháil uathu, agus rinneadh iad a chomhthiomsú leis na barúlacha uile i bhformáid tábla tuairiscithe, a cuireadh faoi bhráid an Údaráis an 7 Iúil 2014. Sa tábla tuairiscithe, thug an tÚdarás a thuairimí eolaíocha faoi phointí sonracha a ardaíodh le linn na céime tráchta.

(4)

An 13 Lúnasa 2014, d’fhoilsigh an tÚdarás tuarascáil theicniúil (3) ina bhfuil achoimre ar thoradh an phróisis comhairliúcháin sin i dtaca le feinpiorasaimín.

(5)

Rinne na Ballstáit agus an Coimisiún athbhreithniú ar an dréacht-tuarascáil mheasúnaithe, ar an aguisín agus ar an tuarascáil theicniúil laistigh den Bhuanchoiste um Plandaí, Ainmhithe, Bia agus Beatha agus cuireadh bailchríoch orthu an 18 Bealtaine 2020 i bhformáid tuarascáil athbhreithniúcháin ón gCoimisiún, maidir le feinpiorasaimín.

(6)

D’iarr an Coimisiún ar an iarratasóir a bharúlacha a chur isteach maidir leis an tuarascáil athbhreithniúcháin ón gCoimisiún maidir le feinpiorasaimín.

(7)

Ina thuarascáil athbhreithniúcháin, mheas an Coimisiún gur gá an tsonraíocht theicniúil a moladh san fhormheas ar fheinpiorasaimín a athrú ó tháirgeadh píolótach go táirgeadh tráchtála. Sainaithníodh an t-eisíontas hiodraisín, ar ábhar tosaigh é, mar eisíontas ábhartha, le linn an mheasúnaithe, ós rud é gur aimsíodh é sna baisceanna plandaí píolótacha ar a ndearnadh athmheasúnú agus sna baisceanna plandaí ó na láithreáin tráchtála. Ag cur san áireamh go bhfuil an t-eisíontas ábhartha hiodraisín ina chúis imní ó thaobh na tocsaineolaíochta de, chinn an Coimisiún nár chóir go rachadh uasmhéid an eisíontais sin san ábhar teicniúil thar 0,0001 % (1 mg/kg).

(8)

Chun ardleibhéal cosanta a áirithiú do thomhaltóirí, is iomchuí dá bhrí sin, uasleibhéal a bhunú don eisíontas sin sa tsubstaint ghníomhach a mhonaraítear ar bhonn tráchtála.

(9)

Ba cheart, dá bhrí sin, an Iarscríbhinn a ghabhann le Rialachán Cur Chun Feidhme (AE) Uimh. 540/2011 (4) a leasú dá réir.

(10)

Ba cheart a ndóthain ama a thabhairt do na Ballstáit chun údaruithe a leasú nó a tharraingt siar maidir le táirgí cosanta plandaí ina bhfuil feinpiorasaimín údaraithe, agus nach gcomhlíonann sonraíocht an ábhair theicniúil a mhonaraítear ar bhonn tráchtála ná na coinníollacha srianta formheasa.

(11)

Maidir le táirgí cosanta plandaí ina bhfuil feinpiorasaimín, agus i gcás ina gceadóidh na Ballstáit aon tréimhse chairde i gcomhréir le hAirteagal 46 de Rialachán (CE) Uimh. 1107/2009, ba cheart an tréimhse sin dul in éag, ar a dhéanaí, 15 mhí tar éis don Rialachán seo a theacht i bhfeidhm.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Le Rialachán (CE) Uimh. 798/2008 ón gCoimisiún (3) leagtar síos ceanglais deimhniúcháin tréidliachta maidir le héanlaith chlóis agus táirgí éineola (“na tráchtearraí”) a allmhairiú isteach san Aontas agus a bheith faoi bhealach tríd, lena n-áirítear a stóráil le linn an idirthurais. Is éard a fhoráiltear leis nach ndéanfar na tráchtearraí a allmhairiú isteach san Aontas agus iad a bheith faoi bhealach tríd ach amháin ó na tríú tíortha, críocha, criosanna nó deighleoga a liostaítear i gcolúin 1 agus 3 den tábla i gCuid 1 d’Iarscríbhinn I a ghabhann leis.

(2)

Le Rialachán (CE) Uimh. 798/2008, leagtar síos na coinníollacha freisin maidir le tríú tír, críoch, crios nó deighleog a mheastar a bheith saor ó fhliú ardphataigineach na n-éan (HPAI).

(3)

Liostaítear an Úcráin sa tábla i gCuid 1 d’Iarscríbhinn I a ghabhann le Rialachán (CE) Uimh. 798/2008 mar thríú tír óna n-údaraítear tráchtearraí áirithe éanlaithe clóis a allmhairiú isteach san Aontas agus na hearraí sin a bheith faoi bhealach tríd ó chodanna áirithe dá críoch, de réir mar atá HPAI ann nó mura bhfuil. Is i gCuid 1 d’Iarscríbhinn I a ghabhann le Rialachán (CE) Uimh. 798/2008 a leagadh an réigiúnú sin amach, arna leasú le Rialachán Cur Chun Feidhme (AE) 2020/352 (4), ó deimhníodh ráig HPAI den fhochineál H5N8 an 19 Eanáir 2020.

(4)

Ó tharla ráig HPAI, tá beartas díothaithe curtha chun feidhme ag an Úcráin chun leathadh an ghalair sin a rialú agus a theorannú. Chomh maith leis sin, thug an Úcráin chun críche na bearta glantacháin agus díghalraithe is gá tar éis chur chun feidhme an bheartais díothaithe ar an ngabháltas éanlaithe clóis inar deimhníodh ráig HPAI i mí Eanáir 2020. Tá faisnéis nuashonraithe curtha faoi bhráid an Choimisiúin ag an Úcráin maidir leis an staid eipidéimeolaíoch ar a críoch féin agus na bearta atá glactha aici chun leathadh HPAI a chosc, bearta a ndearna an Coimisiún meastóireacht orthu,.

(5)

Ar bhonn na meastóireachta sin, is é conclúid ar thángthas air go bhfuil an ráig sin faoi smacht agus nach bhfuil aon riosca ann go dtabharfaí tráchtearraí éanlaithe clóis isteach san Aontas ó na limistéir sin san Úcráin a liostaítear i gCuid 1 d’Iarscríbhinn I a ghabhann le Rialachán (CE) Uimh. 798/2008 ónar cuireadh allmhairí ar fionraí leis an Rialachán sin, arna leasú le Rialachán Cur Chun Feidhme (AE) 2020/352.

(6)

An 4 Nollaig 2020, áfach, dheimhnigh an Úcráin go raibh HPAI d’fhochineál H5 i ngabháltas éanlaithe clóis ar a críoch féin. Mar gheall ar ráig HPAI atá deimhnithe, ní féidir a mheas go bhfuil críoch na hÚcráine ina hiomláine saor a thuilleadh ón ngalar sin agus dá bhrí sin, ní féidir le húdaráis tréidliachta na hÚcráine coinsíneachtaí tráchtearraí éanlaithe a dheimhniú a thuilleadh le hallmhairiú isteach san Aontas, nó a bheith faoi bhealach tríd, ó na limistéir atá buailte leis an ráig sin. Ó tharla an ráig sin, dheimhnigh an Úcráin tuilleadh ráigeanna HPAI d’fhochineál H5 i ngabháltas éanlaithe clóis ar a críoch féin.

(7)

Ó tharla an ráig i mí na Nollag 2020, is éard atá dearbhaithe ag údaráis tréidliachta na hÚcráine, na deimhnithe le haghaidh coinsíneachtaí tráchtearraí ar beartaíodh a n-allmhairiú isteach san Aontas, sin nó iad a bheith faoi bhealach tríd, is deimhnithe iad a chuir na húdaráis sin ar fionraí, agus chuir siad beartas díbeartha chun feidhme chun HPAI a rialú agus chun leathadh an ghalair sin a theorannú.

(8)

Ina theannta sin, chuir an Úcráin faisnéis faoi bhráid an Choimisiúin maidir leis an staid eipidéimeolaíoch ar a críoch féin, agus léirigh sí na limistéir a cuireadh faoi shrianta, chomh maith leis na bearta atá déanta aici chun cosc a chur ar leathadh HPAI lasmuigh de na limistéir sin atá faoi shrianta. Tá meastóireacht déanta ag an gCoimisiún ar an bhfaisnéis sin anois, agus ar bhonn na meastóireachta sin, agus ar bhonn na ráthaíochtaí a thug an Úcráin, is é an chonclúid ba cheart a bheith ann gur leor srianta ar choinsíneachtaí tráchtearraí éanlaithe clóis a thabhairt isteach san Aontas a chur i bhfeidhm sna limistéir atá buailte le HPAI amháin, limistéir atá curtha faoi shrianta ag údaráis tréidliachta na hÚcráine mar gheall ar na ráigeanna atá ann faoi láthair, chun na rioscaí a bhaineann le tabhairt isteach na dtráchtearraí sin san Aontas a chumhdach.

(9)

Dá bhrí sin, ba cheart iontráil na hÚcráine sa tábla i gCuid 1 d’Iarscríbhinn I a ghabhann le Rialachán (CE) Uimh. 798/2008 a leasú chun an staid eipidéimeolaíoch atá sa tríú tír sin faoi láthair a chur san áireamh.

(10)

Dá bhrí sin, ba cheart Iarscríbhinn I a ghabhann le Rialachán (CE) Uimh. 798/2008 a leasú dá réir sin.

(11)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(1)

Le Rialachán (AE) 2018/848 ó Pharlaimint na hEorpa agus ón gComhairle (2) leagtar síos go gcuirfear scéim i dtaobh údarás rialaithe agus comhlachtaí rialaithe a aithníonn an Coimisiún ar mhaithe le táirgí comhlíontacha a allmhairiú in ionad na scéime i dtaobh údarás rialaithe agus comhlachtaí rialaithe a aithníonn an Coimisiún ar bhonn Airteagal 33(3) de Rialachán (CE) Uimh. 834/2007 chun rialuithe a dhéanamh agus deimhnithe a eisiúint i dtríú tíortha chun táirgí a bhfuil ráthaíochtaí coibhéiseacha ag baint leo a allmhairiú.

(2)

De dheasca ráig phaindéim COVID-19 agus na géarchéime sláinte poiblí a bhaineann léi, cuireadh siar ar feadh aon bhliana amháin, le Rialachán (AE) 2020/1693 ó Pharlaimint na hEorpa agus ón gComhairle (3), dáta chur i bhfeidhm Rialachán (AE) 2018/848 agus dátaí áirithe eile dá dtagraítear sa Rialachán sin. Mar thoradh air sin, beidh feidhm ag Rialachán (AE) 2018/848 ón 1 Eanáir 2022.

(3)

D’fhonn a áirithiú go raibh na hacmhainní riaracháin is gá ar fáil chun foráil a dhéanamh maidir le haitheantas pras a thabhairt ar na húdaráis rialaithe agus ar na comhlachtaí rialaithe faoin scéim nua, rinneadh Airteagal 11(1) de Rialachán (CE) Uimh. 1235/2008 ón gCoimisiún (4) a leasú le Rialachán Cur Chun Feidhme (AE) Uimh. 2020/25 ón gCoimisiún (5) chun dáta deiridh a leagan síos maidir le hiarrataí nua a fháil ar aitheantas a thabhairt d’údaráis rialaithe agus comhlachtaí rialaithe chun críche coibhéise faoin tsean-scéim. Is é an 30 Meitheamh 2020 an dáta deiridh sin.

(4)

Is gá, dá bhrí sin, Airteagal 11(1) de Rialachán (CE) Uimh. 1235/2008 a leasú arís chun an dáta maidir le hiarrataí nua a fháil ar aitheantas a thabhairt d’údaráis rialaithe agus comhlachtaí rialaithe chun críche coibhéise faoin tsean-scéim allmhairithe a ailíniú leis an dáta maidir le bunú an chórais nua allmhairithe i Rialachán (AE) 2018/848.

(5)

Ba cheart, dá bhrí sin, Rialachán (CE) Uimh. 1235/2008 a leasú dá réir sin.

(6)

Chun deis a thabhairt do na húdaráis rialaithe agus do na comhlachtaí rialaithe lena mbaineann tairbhiú go hiomlán den tréimhse ama atá fágtha go dtí an 30 Meitheamh 2021 tar éis athghníomhachtú na huirlise ábhartha TF, ba cheart don Rialachán seo teacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh.

(7)

Tá na bearta dá bhforáiltear sa Rialachán seo i gcomhréir leis an tuairim ón gCoiste um tháirgeadh orgánach,