(1)

Ní mór don Aontas a áirithiú go ndéanfar cosaint éifeachtach ar shláine agus ar fheidhmiú cuí a chórais airgeadais agus an mhargaidh inmheánaigh ar sciúradh airgid agus ar mhaoiniú na sceimhlitheoireachta. Foráiltear le Treoir (AE) 2015/849 gur cheart don Choimisiún tíortha a shainaithint a bhfuil easnaimh straitéiseacha acu ina gcórais maidir le frithsciúradh airgid agus maoiniú na sceimhlitheoireachta a chomhrac (“AML/CFT”) ar bagairtí suntasacha iad ar chóras airgeadais an Aontais.

(2)

Le Rialachán Tarmligthe (AE) 2016/1675 ón gCoimisiún (2) sainaithnítear tríú tíortha ardriosca a bhfuil easnaimh straitéiseacha acu. Ba cheart an Rialachán seo a athbhreithniú i gcás inarb iomchuí i bhfianaise an dul chun cinn atá déanta ag na tríú tíortha ardriosca sin i ndáil le deireadh a chur leis na heasnaimh straitéiseacha ina gcóras maidir le frithsciúradh airgid agus maoiniú na sceimhlitheoireachta a chomhrac. Ba cheart don Choimisiún faisnéis nua ó eagraíochtaí idirnáisiúnta agus ó cheannródaithe caighdeán, amhail na cinn sin arna n-eisiúint ag an Tascfhórsa um Ghníomhaíocht Airgeadais (FATF) a chur san áireamh ina chuid measúnuithe.

(3)

I bhfianaise leibhéal ard an chomhtháthaithe sa chóras airgeadais idirnáisiúnta, an dlúthnaisc idir oibreoirí margaidh, líon ard na n-idirbheart trasteorann chuig an Aontas nó ón Aontas, chomh maith le hoscailteacht an mhargaidh, meastar, dá bhrí sin, gur bagairt ar chóras airgeadais an Aontais í aon bhagairt AML/CFT ar an gcóras airgeadais idirnáisiúnta.

(4)

I gcomhréir leis na critéir a leagtar amach i dTreoir (AE) 2015/849, cuirfidh an Coimisiún san áireamh an fhaisnéis is déanaí atá ar fáil, go háirithe Ráitis Phoiblí FATF a rinneadh le déanaí, doiciméid FATF “Feabhas a chur ar Chomhlíonadh Domhanda AML/CFT: Ráiteas maidir le Próiseas Leanúnach”, agus tuarascálacha FATF ón nGrúpa Athbhreithnithe um Chomhar Idirnáisiúnta maidir leis na rioscaí a bhaineann le tríú tíortha aonair, i gcomhréir le hAirteagal 9(4) de Threoir (AE) 2015/849.

(5)

I mí Dheireadh Fómhair 2019, shainaithin FATF an Mhongóil mar dhlínse a raibh easnaimh straitéiseacha AML/CFT aici, ar easnaimh iad a raibh plean gníomhaíochta forbartha ag an Mongóil le FATF ina leith. Ar an mbonn sin agus i gcomhréir leis an bhfaisnéis ábhartha is déanaí, de réir mheasúnú an Choimisiúin i mí na Bealtaine 2020 ba cheart an Mhongóil a mheas mar dhlínse tríú tír a raibh easnaimh straitéiseacha aici ina córas AML/CFT, easnaimh a bhí ina mbagairtí suntasacha ar chóras airgeadais an Aontais, i gcomhréir leis na critéir a leagtar amach in Airteagal 9 de Threoir (AE) 2015/849. Tugadh faoi deara freisin go raibh gealltanais pholaitiúla ardleibhéil i scríbhinn curtha ar fáil ag an Mongóil chun aghaidh a thabhairt ar na heasnaimh a sainaithníodh agus go raibh plean gníomhaíochta forbartha aici le FATF.

(6)

Tá sé ríthábhachtach go ndéanfadh an Coimisiún faireachán buan ar thríú tíortha agus go ndéanfadh sé measúnú ar fhorbairtí ina gcreataí dlíthiúla agus institiúideacha, ar chumhachtaí agus nósanna imeachta na n-údarás inniúil, agus ar éifeachtacht a gcóras AML/CFT, d'fhonn an Iarscríbhinn a ghabhann le Rialachán Tarmligthe (AE) 2016/1675 a thabhairt cothrom le dáta.

(7)

Ba dhíol sásaimh do FATF an dul chun cinn suntasach a rinne an Mhongóil maidir le feabhas a chur ar a córas AML/CFT agus thug sé dá aire gur bhunaigh an tír sin an creat dlíthiúil agus rialála chun na gealltanais ina plean gníomhaíochta a chomhlíonadh maidir leis na heasnaimh straitéiseacha a bhí sainaitheanta ag FATF. Dá bhrí sin, níl an tír sin faoi réir phróiseas faireacháin FATF a thuilleadh mar chuid dá phróiseas leanúnach comhlíontachta AML/CFT ar an leibhéal domhanda. Leanfaidh an tír sin de bheith ag obair le Comhlachtaí Réigiúnacha de chineál FATF chun a córas AML/CFT a fheabhsú tuilleadh.

(8)

Rinne an Coimisiún measúnú ar an bhfaisnéis a bhaineann leis an dul chun cinn atá déanta chun aghaidh a thabhairt ar easnaimh straitéiseacha na Mongóile.

(9)

De réir mheasúnú an Choimisiúin, i bhfianaise na faisnéise atá ar fáil, níl easnaimh straitéiseacha ag an Mongóil a thuilleadh ina córas AML/CFT. Tá éifeachtacht a córais AML/CFT neartaithe ag an Mongóil agus tá aghaidh tugtha aici ar easnaimh theicniúla ghaolmhara chun na gealltanais ina plean gníomhaíochta a chomhlíonadh maidir leis na heasnaimh straitéiseacha a bhí sainaitheanta ag FATF. Tá na bearta sin cuimsitheach go leor agus comhlíonann siad na ceanglais is gá chun go measfar gur tugadh aghaidh ar easnaimh straitéiseacha a sainaithníodh faoi Airteagal 9 de Threoir (AE) 2015/849.

(10)

Ba cheart, dá bhrí sin, Rialachán Tarmligthe (AE) 2016/1675 a leasú dá réir sin,

(1)

I gconclúidí an 16 Meán Fómhair 2019 uaithi a bhaineann leis an athbhreithniú ar Chomhsheasamh 2008/944/CBES ón gComhairle (1), geallann an Chomhairle breithniú ar chinneadh maidir le deimhnithe úsáideora deiridh le haghaidh onnmhairiú mionarm agus armán éadrom (SALW) agus a n-armlón.

(2)

Luaitear i gComhsheasamh 2008/944/CBES nach bhfuiltear chun ceadúnais onnmhairiúcháin a dheonú ach amháin ar bhonn réamheolas iontaofa ar úsáid deiridh sa tír is ceann scríbe. Luaitear chomh maith i gComhsheasamh 2008/944/CBES go n-éilítear deimhniú úsáideora deiridh nó doiciméadacht iomchuí agus/nó cineál éigin údarúcháin arna eisiúint ag an tír is ceann scríbe a seiceáladh go grinn de ghnáth.

(3)

Le cur chuige comhchoiteann uile-Aontais maidir le rialú úsáideora deiridh le haghaidh SALW agus a n-armlón, laghdófar an riosca atreoraithe, cruthófar cothroime iomaíochta agus méadófar soiléireacht don tionscal cosanta agus dá chliaint maidir leis na ceanglais ábhartha.

(4)

Sa Treoir nuashonraithe d’Úsáideoirí maidir le Comhsheasamh 2008/944/CBES ón gComhairle, a d’fhormhuinigh an Chomhairle an 16 Meán Fómhair 2019, soláthraítear na cleachtais is fearr i réimse na ndeimhnithe úsáideora deiridh.

(5)

I straitéis an Aontais i gcoinne airm thine, mionairm agus armáin éadroma aindleathacha, a glacadh an 19 Samhain 2018, geallann an Chomhairle breithniú ar chinneadh maidir le deimhnithe úsáideora deiridh maidir le honnmhairiú SALW, agus obair na hEagraíochta um Shlándáil agus Comhar san Eoraip i ndáil leis sin á cur san áireamh aici.

(6)

Le Cinneadh (CBES) 2020/979 ón gComhairle (2), tacaítear le córas a fhorbairt a aithnítear go hidirnáisiúnta chun bainistiú arm agus armlóin a bhailíochtú lena gceadófaí bailíochtú nó deimhniú neamhspleách um chomhlíonadh caighdeán idirnáisiúnta oscailte maidir le stoc-chairn náisiúnta SALW agus armlón a bhainistiú go slán sábháilte.

(7)

I gcomhréir leis an dara fomhír d’Airteagal 21(3) den Chonradh ar an Aontas Eorpach, tá an tAontas le comhsheasmhacht a áirithiú idir réimsí éagsúla a ghníomhaíochta seachtraí. I ndáil leis sin, tugann an Chomhairle dá haire, inter alia, a Rialachán (CE) Uimh. 428/2009 (3) agus Rialacháin (AE) Uimh. 258/2012 (4) agus (AE) 2019/125 (5) ó Pharlaimint na hEorpa agus ón gComhairle.

(8)

Sna conclúidí ón gComhairle maidir le seasamh an Aontais i ndáil leis an trádáil aindleathach i mionairm agus armáin éadroma a chomhrac, i bhfianaise an Tríú Comhdháil Athbhreithniúcháin chun athbhreithniú a dhéanamh ar chur chun feidhme Chlár Gníomhaíochta NA maidir le SALW, a ghlac an Chomhairle an 28 Bealtaine 2018, iarrtar go gcuirfí chun cinn cur i bhfeidhm deimhnithe úsáideora deiridh i gcomhthéacs an rialaithe ar onnmhairí SALW.

(9)

I gClár Gníomhaíochta na Náisiún Aontaithe (NA) chun Gach Gné den Trádáil Aindleathach i Mionairm agus in Armáin Éadroma a Chosc, a Chomhrac agus a Dhíothú, a glacadh an 20 Iúil 2001, geallann na Stáit rannpháirteacha go gcuirfidh siad dlíthe, rialacháin agus nósanna imeachta riaracháin leordhóthanacha i bhfeidhm agus go gcuirfidh siad chun feidhme iad chun rialú éifeachtach ar onnmhairiú agus idirthuras SALW a áirithiú, lena n-áirítear úsáid deimhnithe úsáideora deiridh fíordheimhnithe agus bearta éifeachtacha dlíthiúla agus forfheidhmithe.

(10)

Luaitear sa Chonradh Trádála Arm, a ghlac Comhthionól Ginearálta NA an 2 Aibreán 2013, go bhfuil an Stát is Páirtí is onnmhaireoir le cosc a chur ar aistriú gnáth-arm a atreorú, i gcás inarb iomchuí, trí pháirtithe a bhfuil baint acu leis an onnmhairiú a scrúdú, trí dhoiciméadacht bhreise, deimhnithe, dearbhuithe a éileamh, trí gan an t-onnmhairiú a údarú nó trí bhearta iomchuí eile.

(11)

Dearbhaítear i gClár Oibre 2030 don Fhorbairt Inbhuanaithe de chuid NA gur gá cur i gcoinne na trádála aindleathaí i SALW chun go leor de na spriocanna forbartha inbhuanaithe a bhaint amach, lena n-áirítear iad siúd a bhaineann leis an tsíocháin, leis an gceartas agus le hinstitiúidí láidre, leis an mbochtaineacht a laghdú, leis an bhfás eacnamaíoch, leis an tsláinte, le comhionannas inscne agus le cathracha sábháilte. Dá bhrí sin, i Sprioc Forbartha Inbhuanaithe 16.4 den Chlár Oibre sin, gheall Stáit NA uile go ndéanfadh siad na sreafaí aindleathacha airgeadais agus arm a laghdú go suntasach.

(12)

I gClár Oibre NA um Dhí-armáil dar teideal “Securing our Common Future” [“Ár dTodhchaí Comhchoiteann a Shlánú”], a cuireadh i láthair an 24 Bealtaine 2018, d’iarr Ardrúnaí NA go dtabharfaí aghaidh ar charnadh iomarcach agus ar thrádáil aindleathach gnáth-arm.

(13)

Is bealach é an t-athonnmhairiú neamhúdaraithe fós chun SALW agus a n-armlón a atreorú isteach ar an margadh aindleathach.

(14)

Is eilimint thábhachtach iad na deimhnithe úsáideora deiridh chun rialuithe éifeachtacha úsáideoirí deiridh a bhunú agus chun an riosca maidir le hatreorú neamh-inmhianaithe SALW agus a n-armlón a íoslaghdú. Ní ghlacann deimhnithe den sórt sin ionad measúnaithe iomláin réamh-ante ar riosca, áfach, a dhéantar ar bhonn cás ar chás agus cinneadh á dhéanamh cé acu a dheonófar nó nach ndeonófar ceadúnas onnmhairiúcháin,