(1)

Le Treoir (AE) 2016/798 ó Pharlaimint na hEorpa agus ón gComhairle (3), ceanglaítear ar gach Ballstát údarás náisiúnta sábháilteachta a bhunú a bhfuil cúraimí a shonraítear maidir le sábháilteacht iarnróid le cur de chúram air. I gcomhréir leis an Treoir sin, féadfaidh údarás náisiúnta sábháilteachta a bheith ina chomhlacht arna bhunú go haontaobhach ag an mBallstát lena mbaineann nó, de rogha air sin, ina chomhlacht a gcuireann roinnt Ballstát de chúram air na cúraimí sin a dhéanamh chun córas sábháilteachta aontaithe a áirithiú.

(2)

Leis an gConradh idir an Fhrainc agus Ríocht Aontaithe na Breataine Móire agus Thuaisceart Éireann maidir le Tógáil agus Oibriú Nasc Seasta Mhuir nIocht a dhéanann Lamháltóirí Príobháideacha a síníodh in Canterbury an 12 Feabhra 1986 (“Conradh Canterbury”), bunaíodh Coimisiún Idir-Rialtasach chun maoirseacht a dhéanamh ar na hábhair uile a bhaineann le tógáil agus oibriú Nasc Seasta Mhuir nIocht (“an Coimisiún Idir-Rialtasach”).

(3)

Go dtí deireadh na hidirthréimhse dá bhforáiltear sa Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (4) (“an idirthréimhse”), is é an Coimisiún Idir-Rialtasach an t‐údarás náisiúnta sábháilteachta de réir bhrí Threoir (AE) 2016/798 atá freagrach as Nasc Seasta Mhuir nIocht.

(4)

Ag deireadh na hidirthréimhse, tiocfaidh an Coimisiún Idir-Rialtasach chun bheith ina chomhlacht arna bhunú trí chomhaontú idirnáisiúnta idir Ballstát, eadhon an Fhrainc, agus tríú tír, eadhon Ríocht Aontaithe na Breataine Móire agus Thuaisceart Éireann (“an Ríocht Aontaithe”). Mura bhforálfar a mhalairt le comhaontú idirnáisiúnta a bheidh ina cheangal ar an Ríocht Aontaithe, ní bheidh sé ina údarás náisiúnta sábháilteachta a thuilleadh faoi dhlí an Aontais agus ní bheidh dlí an Aontais infheidhme a thuilleadh maidir leis an gcuid de Nasc Seasta Mhuir nIocht atá faoi dhlínse na Ríochta Aontaithe.

(5)

Chun oibriú sábháilte agus éifeachtúil Nasc Seasta Mhuir nIocht a áirithiú, is iomchuí an Coimisiún Idir-Rialtasach a choimeád mar an t‐údarás sábháilteachta aonair atá freagrach as an mbonneagar sin ina iomláine.

(6)

Chun na críche sin, le Cinneadh (AE) 2020/1531 ó Pharlaimint na hEorpa agus ón gComhairle (5), cumhachtaítear an Fhrainc, faoi choinníollacha áirithe, comhaontú idirnáisiúnta, lena ndéantar forlíonadh ar Chonradh Canterbury, a chaibidliú, a shíniú agus a thabhairt i gcrích, faoina gcoinneofar an Coimisiún Idir-Rialtasach mar an t‐údarás sábháilteachta aonair atá inniúil chun dlí an Aontais a chur i bhfeidhm laistigh de Nasc Seasta Mhuir nIocht.

(7)

Chuige sin, ba cheart rialacha sonracha a bhunú maidir le húdaráis sábháilteachta shonracha, agus maidir le dualgais an Bhallstáit lena mbaineann na bearta uile is gá a dhéanamh chun a áirithiú go gcuirfidh an t‐údarás sábháilteachta sonrach dlí an Aontais i bhfeidhm i gcónaí nó, ina éagmais sin, go gcuirfidh údarás sábháilteachta an Bhallstáit sin dlí an Aontais i bhfeidhm.

(8)

D’fhéadfadh sé, le réiteach díospóidí idir an Ballstát lena mbaineann agus an tríú tír i réimse na sábháilteachta iarnróid, go dtabharfaí ceisteanna ar aird maidir le léiriú dhlí an Aontais. Dá bhrí sin, ba cheart Cúirt Bhreithiúnais an Aontais Eorpaigh a dhéanamh inniúil chun réamhrialuithe a thabhairt maidir leis na ceisteanna sin.

(9)

Ba cheart, dá bhrí sin, Treoir (AE) 2016/798 a leasú dá réir.

(10)

Ós rud é nach féidir leis na Ballstáit cuspóir an Rialacháin seo, eadhon oibiriú sábháilte agus éifeachtúil Nasc Seasta Mhuir nIocht ag deireadh na hidirthréimhse a áirithiú, a ghnóthú go leordhóthanach agus, de bharr fhairsinge agus éifeachtaí na gníomhaíochta atá beartaithe, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(11)

Ba cheart an Rialachán seo a theacht i bhfeidhm mar ábhar práinne an lá tar éis lá a fhoilsithe in Iris Oifigiúil an Aontais Eorpaigh.

(1)

Leis an gConradh idir an Fhrainc agus Ríocht Aontaithe na Breataine Móire agus Thuaisceart Éireann maidir le Tógáil agus Oibriú Nasc Seasta Mhuir nIocht a dhéanann Lamháltóirí Príobháideacha, a síníodh in Canterbury an 12 Feabhra 1986 (“Conradh Canterbury”), bunaíodh Coimisiún Idir-Rialtasach chun maoirseacht a dhéanamh ar gach ceist a bhaineann le tógáil agus oibriú Nasc Seasta Mhuir nIocht (“an Coimisiún Idir-Rialtasach”).

(2)

Go dtí deireadh na hidirthréimhse dá bhforáiltear leis an gComhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (3) (“an idirthréimhse”), is é atá sa Choimisiún Idir-Rialtasach comhlacht ar a gcuireann roinnt Ballstát cúraimí maidir le sábháilteacht iarnróid i leith Nasc Seasta Mhuir nIocht. Chuige sin, is é atá sa Choimisiún Idir-Rialtasach dá bhrí sin an t‐údarás náisiúnta sábháilteachta de réir bhrí Threoir (AE) 2016/798 ó Parlaimint na hEorpa agus ón gComhairle (4). Sa cháil sin, cuireann sé i bhfeidhm forálacha de chuid dhlí an Aontais is ábhartha do shábháilteacht iarnróid agus, faoi Threoir (AE) 2016/797 ó Pharlaimint na hEorpa agus ón gComhairle (5), idir-inoibritheacht iarnróid.

(3)

Ag deireadh na hidirthréimhse, tiocfaidh an Coimisiún Idir-Rialtasach chun bheith ina chomhlacht a bhunaítear trí chomhaontú idirnáisiúnta idir Ballstát, eadhon an Fhrainc, agus tríú tír, eadhon Ríocht Aontaithe na Breataine Móire agus Thuaisceart Éireann (“An Ríocht Aontaithe”). Ina theannta sin, agus mura bhforálfar a mhalairt i gcomhaontú idirnáisiúnta atá ceangailteach ar an Ríocht Aontaithe, ní bheidh dlí an Aontais infheidhme a thuilleadh maidir leis an gcuid de Nasc Seasta Mhuir nIocht atá faoi dhlínse na Ríochta Aontaithe.

(4)

Maidir le comhaontú idirnáisiúnta le tríú tír i ndáil le rialacha sábháilteachta agus idir-inoibritheachta iarnróid a chur i bhfeidhm i gcásanna trasteorann, d’fhéadfadh comhaontú den chineál sin difear a dhéanamh do limistéar a chumhdaítear de chuid mhaith le dlí an Aontais agus go háirithe le Rialachán (AE) 2016/796 ó Pharlaimint na hEorpa agus ón gComhairle (6), agus Treoracha (AE) 2016/797 agus (AE) 2016/798. Dá bhrí sin, tagann aon chomhaontú den chineál sin faoi inniúlacht sheachtrach eisiach an Aontais. Ní fhéadfaidh na Ballstáit comhaontú den chineál sin a chaibidliú, ná a thabhairt i gcrích, ach amháin má chumhachtaíonn an tAontas iad déanamh amhlaidh i gcomhréir le hAirteagal 2(1) den Chonradh ar Fheidhmiú an Aontais Eorpaigh (CFAE). Mar gheall ar an idirghníomhaíocht le reachtaíocht an Aontais atá ann cheana, tá sé riachtanach freisin gurb é an reachtóir de chuid an Aontais a thabharfaidh an cumhachtú sin i gcomhréir leis an nós imeachta reachtach dá dtagraítear in Airteagal 91 CFAE.

(5)

I litir uaithi dar dáta an 16 Iúil 2020, d’iarr an Fhrainc cumhachtú ar an Aontas chun comhaontú idirnáisiúnta leis an Ríocht Aontaithe a chaibidliú agus a thabhairt i gcrích lena ndéantar forlíonadh ar Conradh Canterbury.

(6)

Chun a áirithiú go mbeidh oibriú Nasc Seasta Mhuir nIocht sábháilte éifeachtúil, is iomchuí an Coimisiún Idir-Rialtasach a choimeád mar an t‐údárás sábháilteachta aonair a bheidh freagrach as an mbonneagar sin ar fad. I bhfianaise stádas speisialta Nasc Seasta Mhuir nIocht, ar nasc iarnróid é a bhaineann le struchtúr innealtóireachta aonair casta agus é lonnaithe go páirteach i gcríoch na Fraince agus go páirteach i gcríoch tríú tír, is iomchuí an Fhrainc a chumhachtú chun comhaontú idirnáisiúnta leis an Ríocht Aontaithe maidir le rialacha sábháilteachta iarnróid an Aontais a chur i bhfeidhm i ndáil le Nasc Seasta Mhuir nIocht a shíniú, a chaibidliú agus a thabhairt i gcrích chun córas sábháilteachta aontaithe a choinneáil, faoi réir coinníollacha áirithe.

(7)

Tá an Coimisiún Idir-Rialtasach in ann ról an údaráis náisiúnta sábháilteachta a bheadh freagrach as an gcuid sin de Nasc Seasta Mhuir nIocht atá faoi dhlínse na Fraince a chomhlíonadh, ar choinníoll go ndéantar Treoir (AE) 2016/798 a leasú agus go gcomhlíonfar coinníollacha áirithe.

(8)

Ba cheart don Choimisiún Idir-Rialtasach na rialacha céanna a chur i bhfeidhm maidir le Nasc Seasta Mhuir nIocht ar fad. Is é ba cheart a bheith sna rialacha sin forálacha ábhartha dhlí an Aontais, agus go háirithe Rialachán (AE) 2016/796 agus Treoracha (AE) 2016/797 agus (AE) 2016/798, arna leasú nó arna n‐ionadú, chomh maith leis na gníomhartha a glacadh ar bhonn na ngníomhartha dlí sin.

(9)

I gcomhréir le Conradh Canterbury, is trí bhíthin binse eadrána atá díospóidí idir an Fhrainc agus an Ríocht Aontaithe a bhaineann leis an gConradh sin a léiriú nó a chur i bhfeidhm le réiteach. I gcásanna ina dtugtar ar aird le díospoidí den sórt sin ceisteanna maidir le léiriú dhlí an Aontais, chun cur i bhfeidhm ceart dhlí an Aontais a áirithiú, ba cheart don bhinse eadrána a iarraidh ar Chúirt Bhreithiúnais an Aontais Eorpaigh (“an Chúirt Bhreithiúnais”) réamhrialú a thabhairt ar na ceisteanna sin agus ba cheart dó a bheith faoi cheangal ag an rialú ón gCúirt.

(10)

Is gá rialacha sonracha a leagan síos maidir le cur chun feidhme dhlí an Aontais i ndáil leis an gcuid sin de Nasc Seasta Mhuir nIocht atá faoi dhlínse na Fraince, chun a áirithiú go gcuirfear dlí an Aontais chun feidhme mar is ceart i gcónaí agus chun gur féidir leis an gCoimisiún maoirseacht a dhéanamh ar a chur i bhfeidhm faoi rialú na Cúirte Breithiúnais, lena n‐áirítear in imthosca práinne nó i gcás ina mainneoidh an Coimisiún Idir-Rialtasach cinneadh ón mbinse eadrána a chomhlíonadh. Chuige sin, ba cheart don Fhrainc an ceart a choimeád chun gníomhú go haontaobhach, i gcás inar gá, d’fhonn a áirithiú go gcuirfear dlí an Aontais i bhfeidhm go hiomlán, i gceart agus go gasta sa chuid de Nasc Seasta Mhuir nIocht atá faoina dlínse.

(11)

Chun cosaint dlí éifeachtach sna réimsí a chumhdaítear le dlí an Aontais a áirithiú, ba cheart do chúirteanna nó do bhinsí a bhfuil feidhm ag Airteagal 19(1) de Chonradh ar an Aontas Eorpach (CAE) maidir leo a bheith inniúil go heisiach i ndáil le hiarratais a dhéanfaidh lamháltóirí agus úsáideoirí Nasc Seasta Mhuir nIocht in aghaidh cinntí ón gCoimisiún Idir-Rialtasach.

(12)

Ba cheart na gnéithe a thuairiscítear in Aithrisí (8) go (11) a léiriú sna comhaontuithe idirnáisiúnta idir an Fhrainc agus an Ríocht Aontaithe maidir le Nasc Seasta Mhuir nIocht. Ba cheart na comhaontuithe idirnáisiúnta sin a bheith comhoiriúnach le dlí an Aontais ar gach bealach,

(1)

Le Cinneadh 87/369/CEE ón gComhairle (1) d’fhormheas an tAontas an Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí (2), agus an Prótacal lena ndéantar leasú air (Coinbhinsiún CC) (3), rud a bhunaigh an Coiste um an gCóras Comhchuibhithe (CCC).

(2)

De bhun phointí (b) agus (c) d’Airteagal 7(1) de Choinbhinsiún CC, tá CCC freagrach, inter alia, as Nótaí Míniúcháin, Tuairimí maidir le Rangú, comhairle eile faoi léiriú an Chórais Chomhchuibhithe a ullmhú agus as moltaí chun aonfhoirmeacht a áirithiú maidir le léiriú agus cur i bhfeidhm an Chórais Chomhchuibhithe a ullmhú.

(3)

Táthar ag súil go bhfuil CCC chun cinneadh a dhéanamh i ndáil le Tuairimí maidir le Rangú, cinntí maidir le rangú, leasuithe ar na Nótaí Míniúcháin nó comhairle eile maidir le léiriú an Chórais Chomhchuibhithe agus moltaí a chinneadh chun aonfhoirmeacht a áirithiú maidir le léiriú an Chórais Chomhchuibhithe faoi Choinbhinsiún CC le linn a sheisiún i mí Mheán Fómhair 2020.

(4)

Tá sé tábhachtach a mheabhrú go bhfuiltear chun an critéar cinntitheach maidir le rangú earraí, chun críche custaim, a lorg, i gcoitinne, ina ngnéithe agus a sainghnéithe oibiachtúla mar a shainítear i bhfoclaíocht na gceannteideal ábhartha san ainmníocht chustaim agus i nótaí na roinne agus na caibidle ábhartha, de réir cásdlí socair Chúirt Bhreithiúnais an Aontais Eorpaigh, ar mhaithe le deimhneacht dhlíthiúil agus fíorú réidh.

(5)

I bhfianaise na dTuairimí maidir le Rangú, na gcinntí maidir le rangú, na leasuithe ar na Nótaí Míniúcháin nó na comhairle eile maidir le léiriú an Chórais Chomhchuibhithe, agus moltaí chun aonfhoirmeacht a áirithiú maidir le léiriú an Chórais Chomhchuibhithe faoin gCoinbhinsiún ar CC, is iomchuí an seasamh atá le glacadh thar ceann an Aontais a bhunú, mar, a luaithe a ghlacfar leo, foilseofar na Tuairimí maidir le Rangú agus cuid áirithe de na cinntí sin agus de na leasuithe sin maidir le rangú ar na Nótaí Míniúcháin i dTeachtaireacht ón gCoimisiún faoi phointe (a)(iii) d’Airteagal 34 de Rialachán (AE) 952/2013 ó Pharlaimint na hEorpa agus ón gComhairle (4), agus tiocfaidh siad chun bheith infheidhme maidir le Ballstáit. Cuirfear an seasamh in iúl sa CCC.

(6)

Déantar Cinneadh (AE) 2020/1410 (5) a fhorlíonadh leis an gCinneadh seo,