(1)

Le Rialachán (CEE) Uimh. 3730/87 ón gComhairle an 10 Nollaig 1987 lena leagtar síos na rialacha ginearálta maidir le bia a sholáthar ó stoic idirghabhála chuig eagraíochtaí ainmnithe lena dháileadh ar na daoine is díothaí sa Chomhphobal (4), ar Rialachán é a aisghaireadh ina dhiaidh sin agus a ionchorpraíodh i Rialachán (CE) Uimh. 1234/2007 ón gComhairle an 22 Deireadh Fómhair 2007 lena mbunaítear comheagrú na margaí talmhaíochta agus maidir le forálacha sonracha i gcás táirgí áirithe talmhaíochta (an Rialachán maidir le CEM Aonair) (5), tá scéim iontaofa le táirgí bia a dháileadh ar na daoine is díothaí san Aontas (scéim um dháileadh bia) á cur ar fáil le breis agus 20 bliain agus is rannchuidiú tábhachtach é le comhtháthú sóisialta an Aontais trí éagothromaíocht shóisialta agus eacnamaíoch a laghdú.

(2)

Áirítear ar chuspóirí an chomhbheartais talmhaíochta (CBT), a shainmhínítear in Airteagal 39(1) den Chonradh, margaí a chobhsú agus a áirithiú go mbeidh soláthairtí á bhfáil ag tomhaltóirí ar phraghsanna réasúnta. I gcaitheamh na mblianta, d’éirigh leis an scéim um dháileadh bia tacú le comhlíonadh an dá chuspóir agus, trí easlándáil an tsoláthair bhia i measc na ndaoine is díothaí san Aontas a laghdú, tá sé léirithe gur uirlis fhíor-riachtanach í a rannchuidíonn lena ráthú go mbíonn bia ar fáil go forleathan laistigh den Aontas agus stoic idirghabhála á laghdú ag an am céanna.

(3)

Ina rún an 7 Iúil 2011, d’iarr Parlaimint na hEorpa ar an gCoimisiún agus ar an gComhairle réiteach idirthréimhseach a fhorbairt i gcomhair na mblianta atá fágtha den chreat airgeadais ilbhliantúil reatha, d’fhonn ciorrú trom ar chúnamh bia a sheachaint de dheasca an laghdaithe ar chistiú ó EUR 500 milliún go EUR 113 milliún agus d’fhonn a áirithiú nach mbainfidh ocras do dhaoine atá ag brath ar chúnamh bia.

(4)

Leis an scéim reatha um dháileadh bia, táthar ag brath ar dháileadh táirgí ó stoic idirghabhála an Aontais agus, ar bhonn sealadach, ar cheannacháin ar an margadh a chuirtear leis na táirgí sin. Mar sin féin, is é an toradh atá ar na hathbhreithnithe a rinneadh ar an CBT agus ar fhorbairtí fabhracha ar phraghsanna táirgeoirí go bhfuil laghdú de réir a chéile tagtha ar na stoic idirghabhála agus ar réimse na dtáirgí atá ar fáil. Leis an leagan reatha de Rialachán (CE) Uimh. 1234/2007, ní cheadaítear ceannacháin ar an margadh ach amháin i gcás nach mbeadh táirgí ar fáil ar bhonn sealadach. I bhfianaise bhreithiúnas na Cúirte Ginearálta i gCás T-576/08 (6), ní féidir ceannacháin bia ar mhargadh an Aontais a chur go tráthrialta in ionad stoic idirghabhála laghdaithe. Sna cúinsí sin, is cosúil gur iomchuí deireadh a chur leis an scéim um dháileadh bia. Ionas go mbeidh dóthain ama ag eagraíochtaí carthanachta sna Ballstáit a bhfuil leas á bhaint acu as an scéim um dháileadh bia atá ann faoi láthair iad féin a chur in oiriúint don staid nua, ba cheart an scéim um dháileadh bia a leasú sa tslí is go ndéanfar foráil do thréimhse chéimniú-amach, ar lena linn ar cheart do cheannacháin ar an margadh a bheith mar ghnáthfhoinse soláthair don scéim um dháileadh bia d’fhonn stoic idirghabhála a chomhlánú i gcás nach mbeidh stoic idirghabhála oiriúnacha ar fáil. Ba cheart go dtiocfadh deireadh leis an tréimhse chéimniú-amach tráth a dtabharfar plean bliantúil 2013 chun críche.

(5)

Ba cheart go mbeadh feidhm ag scéim an Aontais um dháileadh bia gan dochar d’aon scéimeanna náisiúnta um dháileadh bia.

(6)

Chun bainistiú buiséadach fónta a áirithiú, is gá uasteorainn sheasta a leagan síos do chúnamh ón Aontas. Ba cheart an scéim um dháileadh bia a chur leis an liosta de chaiteachas in Airteagal 3(1) de Rialachán (CE) Uimh. 1290/2005 ón gComhairle an 21 Meitheamh 2005 maidir le maoiniú an chomhbheartais talmhaíochta (7), a mhaoineofar leis an gCiste Eorpach um Ráthaíocht Talmhaíochta (CERT).

(7)

Léirítear le taithí go bhfuil gá le feabhsuithe áirithe ar bhainistiú na scéime um dháileadh bia. Ba cheart don Choimisiún, dá bhrí sin, pleananna bliantúla a bhunú chun an scéim um dháileadh bia a chur chun feidhme sa bhliain 2012 agus sa bhliain 2013, ar pleananna iad a bheadh bunaithe ar iarrataí ó Bhallstáit arna gcur chuig an gCoimisiún agus ar fhaisnéis eile a mheastar a bheith ábhartha. Ba cheart do na Ballstáit a n-iarrataí ar tháirgí bia a bhunú ar chláir náisiúnta um dháileadh bia, ina leagtar amach cuspóirí agus tosaíochtaí na mBallstát maidir le bia a dháileadh ar na daoine is díothaí, lenar cheart breithnithe cothaitheacha a áireamh. Sa chomhthéacs sin, is iomchuí é a bheith de rogha ag na Ballstáit cóir fhabhrach a thabhairt do tháirgí de thionscnamh an Aontais. Ar deireadh, chun a áirithiú go gcumhdófar go cuí na costais a bhaineann le cur chun feidhme na bpleananna bliantúla, is gá foráil a dhéanamh go mbeidh sé de rogha ag na Ballstáit a chinneadh costais áirithe a thabhaíonn eagraíochtaí ainmnithe i dtaobh riaracháin, iompair agus stórála de a aisíoc faoi chuimsiú na n-acmhainní a chuirtear ar fáil trí na pleananna bliantúla.

(8)

Ba cheart do na Ballstáit rialuithe riaracháin agus fisiceacha atá leormhaith a dhéanamh agus pionóis a fhorchur i gcás neamhrialtachtaí chun a áirithiú go gcuirfear na pleananna bliantúla chun feidhme i gcomhréir leis na rialacha is infheidhme.

(9)

Chun a áirithiú go mbeidh an scéim reatha um dháileadh bia ag feidhmiú i gcónaí, ionas gur féidir é a chéimniú amach ar bhealach éifeachtúil, ba cheart go mbeadh feidhm ag an Rialachán seo ón 1 Eanáir 2012 go dtí go dtabharfar plean bliantúil 2013 chun críche.

(10)

Ba cheart, dá bhrí sin, Rialachán (CE) Uimh. 1290/2005 agus Rialachán (CE) Uimh. 1234/2007 a leasú dá réir,

“(g)

an scéim um dháileadh bia ar na daoine is díothaí san Aontas dá bhforáiltear in Airteagal 27 de Rialachán (CE) Uimh. 1234/2007.”.

(1)

cuirtear an méid seo a leanas in ionad Airteagal 27:

(2)

in Airteagal 204, cuirtear isteach an mhír seo a leanas: