European flag

Iris Oifigiúil
an Aontais Eorpaigh

GA

Sraith C


C/2026/4370

19.8.2026

An Ghníomhaireacht Eorpach um Shábháilteacht Mhuirí (EMSA)

Foilsiú folúntais le haghaidh fheidhm an Stiúrthóra Feidhmiúcháin

(Gníomhaire Sealadach – Grád AD 14)

COM/2026/20124

(C/2026/4370)

 

Cé sinn

Is in 2002 a bunaíodh an Ghníomhaireacht Eorpach um Shábháilteacht Mhuirí (EMSA). Tugadh a sainordú (Rialachán (CE) 1406/2002 ó Pharlaimint na hEorpa agus ón gComhairle (1)) cothrom le dáta in imeacht na mblianta, agus rinneadh an raon feidhme a leathnú go mór in 2013 (Rialachán (AE) Uimh. 100/2013 ó Pharlaimint na hEorpa agus ón gComhairle (2)) agus a fhíorú a thuilleadh in 2025 trí Rialachán (AE) 2025/2434 ó Pharlaimint na hEorpa agus ón gComhairle (3), gníomh a ghabhann leis an bPacáiste maidir leis an tSábháilteacht Mhuirí. Tugann EMSA cúnamh teicniúil, oibríochtúil agus eolaíoch don Choimisiún Eorpach agus do na Ballstáit sna réimsí seo a leanas: an tsábháilteacht mhuirí, an tslándáil mhuirí, inbhuanaitheacht chomhshaoil na hearnála muirí, cosc truaillithe de dheasca long agus freagairt ar an truailliú sin, agus freagairt ar thruailliú muirí de dheasca suiteálacha ola agus gáis.

Tá clár cuimsitheach cuairteanna agus cigireachtaí ar bun ag EMSA chun tacú le cur chun feidhme éifeachtach agus comhchuibhithe reachtaíocht mhuirí an Aontais. Cuimsíonn sé sin cuairteanna rialta ar údaráis riaracháin mhuirí na mBallstát chun measúnú a dhéanamh ar a gcumas ceanglais AE a chur chun feidhme agus a fhorfheidhmiú, réimsí a shainaithint a bhféadfaí feabhas a chur orthu, agus dea-chleachtais a chur chun cinn. Óstálann an Ghníomhaireacht raon leathan feidhmchlár agus bunachar sonraí TF a thacaíonn leis na cuspóirí sin freisin.

Déanann an Ghníomhaireacht cigireachtaí ar eagraíochtaí aitheanta (cumainn aicmiúcháin) chun a fhíorú go gcomhlíonann siad caighdeáin infheidhme an Aontais agus iad ag gníomhú thar ceann na mBallstát, rud a chuireann le sábháilteacht agus iontaofacht chabhlach an Aontais. Ina theannta sin, déanann EMSA meastóireacht ar chórais tríú tíortha maidir le hoiliúint agus deimhniú maraithe, i gcomhréir le ceanglais an Choinbhinsiúin maidir le Caighdeáin Oiliúna, Deimhniúcháin agus Faireacháin. Áirithítear leis na measúnuithe sin go gcomhlíonann deimhnithe arna n-eisiúint ag tríú tíortha agus a aithnítear laistigh den Aontas, go gcomhlíonann siad caighdeáin idirnáisiúnta agus caighdeáin an Aontais, agus ar an gcaoi sin go gcosnaítear inniúlacht na maraithe a oibríonn ar bord longa an Aontais.

Mar chomhlánú ar na gníomhaíochtaí iniúchóireachta sin, tá ról tábhachtach ag EMSA ó thaobh fothú acmhainneachta agus comhroinnt eolais de. Trí Acadamh EMSA, cuireann an Ghníomhaireacht réimse leathan oiliúna, ceardlann agus cúnaimh theicniúil ar fáil do na Ballstáit, do thíortha comharsanachta an Aontais agus do chomhpháirtithe eile. Tacaíonn na gníomhaíochtaí sin le cur i bhfeidhm comhsheasmhach rialacha an Aontais agus rialacha idirnáisiúnta, cuireann siad leis an acmhainneacht riaracháin, agus cuireann siad comhthuiscint chun cinn maidir le forbairtí rialála agus teicniúla atá ag teacht ar an bhfód.

Tugann EMSA cúnamh teicniúil ríthábhachtach ó thaobh fhorbairt leanúnach reachtaíocht an Aontais agus ghníomhaíocht chomhpháirteach an Choimisiúin agus na mBallstát laistigh Eagraíocht Mhuirí Idirnáisiúnta (IMO). Cuidíonn EMSA ó thaobh cothrom iomaíochta a áirithiú, sábháilteacht mhuirí a fheabhsú, agus tacú le forfheidhmiú comhsheasmhach agus éifeachtach rialacha muirí an Aontais agus rialacha muirí idirnáisiúnta ar fud an Aontais agus níos faide i gcéin.

Réimse ríthábhachtach atá á fhorbairt go leanúnach – agus réimse a bhfuil ag méadú ar an tábhacht straitéiseach atá leis – is ea seirbhísí faireacháin mhuirí, digiteacha agus faisnéise EMSA. Cuimsíonn sé sin forbairt agus oibriú córas agus ardán mórscála lena dtacaítear leis an bhfaireachas muirí, leis an tsábháilteacht, le comhlíontacht chomhshaoil agus le foirmiúlachtaí tuairiscithe simplithe (amhail timpeallacht Eorpach Ionaid Ilfhreastail Mhuirí (EMSWe) agus córais ghaolmhara). Chomh maith leis sin, rannchuidíonn an Ghníomhaireacht leis an gcomhar Eorpach maidir le feidhmeanna garda cósta, agus oibríonn sí i ndlúthchomhar le gníomhaireachtaí eile de chuid an Aontais faoi chuimsiú an tSocraithe Oibre Thrípháirtigh.

Tar éis glacadh leagain cothrom le dáta den Rialachán lena mbunaítear EMSA (Rialachán (AE) 2025/2434), cuireadh leis na réimsí a bhfuil sainordú ag an nGníomhaireacht gníomhú ina leith. Is é an toradh a bhí air sin gur tháinig athrú ar thosaíochtaí agus ar chúraimí, rud a tharla i gcás réimse na mbreoslaí malartacha agus i gcás an cheanglais lárionad faireacháin 24/7 a bhunú, mar shampla. Dá réir sin, ní mór don Ghníomhaireacht freastal ar na cúraimí nua sin ar bhealach éifeachtúil neamhshuaiteach.

Is i Liopsóin na Portaingéile atá EMSA lonnaithe. In 2027 beidh buiséad iomlán EUR 119 mhilliún ag an nGníomhaireacht agus beidh thart ar 300 ball foirne inti. Tá méadú le teacht ar bhuiséad na Gníomhaireachta mar gheall ar ar sannadh as an nua don Ghníomhaireacht de réir Rialachán (AE) 2025/2434.

Chun tuilleadh eolais a fháil, féach an suíomh gréasáin seo a leanas: http://www.emsa.europa.eu.

An tairiscint

Is éard atá á tairiscint againn Feidhm Stiúrthóir Feidhmiúcháin na Gníomhaireachta.

Is é an Stiúrthóir Feidhmiúcháin ionadaí dlíthiúil na Gníomhaireachta agus tá sé freagrach don Bhord Bainistíochta.

Beidh an Stiúrthóir Feidhmiúcháin i gceannas ar an nGníomhaireacht agus ina bhainisteoir uirthi, agus glacfaidh sé freagracht fhoriomlán as a cuid oibríochtaí lena áirithiú go mbainfear amach cuspóirí na Gníomhaireachta féin.

Áireofar na nithe seo a leanas ar fhreagrachtaí sonracha an Stiúrthóra Feidhmiúcháin:

—

Cuspóirí na Gníomhaireachta agus na straitéise ilbhliantúla arna leagan síos ag Bord Bainistíochta na Gníomhaireachta a bhaint amach,

—

Comhar éifeachtach éifeachtúil a fhorbairt agus a choimeád ar bun leis na ranna ábhartha den Choimisiún Eorpach, leis na Ballstáit, le tríú tíortha agus le páirtithe leasmhara, de réir mar is iomchuí, i gcomhréir le cúraimí na Gníomhaireachta,

—

Comhoibriú leis na húdaráis de chuid na mBallstát atá freagrach as cur chun feidhme bheartas iompair mhuirí an Aontais,

—

Comhoibriú le Stiúrthóirí Feidhmiúcháin gníomhaireachtaí eile (an Ghníomhaireacht Eorpach um an nGarda Teorann agus Cósta (Frontex) agus an Ghníomhaireacht Eorpach um Rialú ar Iascach (EFCA)) faoi chuimsiú an chomhair maidir leis an ngarda cósta, go háirithe faoin Socrú Oibre Trípháirteach,

—

Freagra a thabhairt ar iarrataí ar chúnamh ón gCoimisiún Eorpach nó ó na Ballstáit i gcomhréir le cúraimí na Gníomhaireachta,

—

Próifíl na Gníomhaireachta a fhorbairt, lena n-áirítear a gníomhaíochtaí idirnáisiúnta agus, i gcás inarb iomchuí, comhar le lucht tionsclaíochta agus leis an tsochaí shibhialta,

—

An doiciméad clársceidealaithe aonair ilbhliantúil a ullmhú, sin agus an clár oibre bliantúil agus na pleananna mionsonraithe maidir le gníomhaíochtaí ullmhachta agus freagartha na Gníomhaireachta i ndáil le truailliú, chomh maith leis na bearta is gá a dhéanamh chun iad sin a chur chun feidhme, i gcomhar leis an gCoimisiún Eorpach,

—

An Tuarascáil Eorpach maidir leis an tSábháilteacht Mhuirí (EMSAFE) agus an Tuarascáil Eorpach Chomhshaoil maidir leis an Iompar Muirí (EMTER) a ullmhú go rialta agus iad a chur faoi bhráid Pharlaimint na hEorpa,

—

Buiséad na Gníomhaireachta a ullmhú agus a fheidhmiú i gcomhar leis an gCoimisiún Eorpach,

—

An tuarascáil bhliantúil ar ghníomhaíochtaí na Gníomhaireachta a ullmhú,

—

Bainistiú laethúil na Gníomhaireachta a dhéanamh. Foireann na Gníomhaireachta a earcú agus a mheasúnú, i gcomhréir le Rialacháin Foirne an Aontais, agus dea-spiorad foirne agus timpeallacht oibre dhearfach a chothú,

—

Straitéisí acmhainní daonna a ullmhú agus a chur chun feidhme, chun tarraingteacht na Gníomhaireachta mar fhostóir a chaomhnú agus a mhéadú.

—

Beartas cumarsáide le haghaidh na Gníomhaireachta a fhorbairt agus a chur chun feidhme chun a cuid oibre a chur chun cinn go héifeachtach, agus dul i mbun gníomhaíochtaí cumarsáide maidir leis na hábhair uile a thagann faoi inniúlacht na Gníomhaireachta.

Cad atá á lorg againn (na critéir roghnúcháin)

Ba cheart na nithe seo a leanas a bheith ag na hiarrthóirí:

Scileanna bainistíochta

—

Sárchumas gníomhaireacht dhíláraithe a bhainistiú, ar an leibhéal straitéiseach agus ar an leibhéal inmheánach bainistíochta araon;

—

An cumas aghaidh a thabhairt ar na dúshláin a chastar ar chomhlacht a bhíonn ag idirghníomhú le páirtithe leasmhara iomadúla;

—

Eolas, taithí, agus dea-theist maidir le hacmhainní móra airgeadais a bhainistiú, i dtimpeallacht náisiúnta, Eorpach agus/nó idirnáisiúnta, lena n-áirítear pleanáil bhuiséadach agus rialú inmheánach;

—

Dea-theist chruthaithe maidir le foirne móra a bhainistiú ar leibhéal ard bainistíochta, lena n-áirítear an cumas foireann ilnáisiúnta ildisciplíneach a stiúradh agus a spreagadh, agus cumas na foirne sin a fhorbairt; bheadh taithí a fuarthas i dtimpeallacht ilchultúrtha ina buntáiste.

Sainscileanna agus saintaithí

—

Tuiscint mhaith ar institiúidí an Aontais Eorpaigh agus ar an gcaoi a n-oibríonn agus a n-idirghníomhaíonn siad,

—

Eolas ar bheartas muirí na hEorpa, go háirithe beartas agus reachtaíocht iompair mhuirí,

—

Taithí chruthaithe ar bheartais iompair agus ar bheartais mhuirí; bheadh buntáiste ag an té a mbeadh taithí oibre faighte aige in údarás riaracháin poiblí náisiúnta, Eorpach nó idirnáisiúnta freisin,

—

An cumas fís straitéiseach a fhorbairt le haghaidh na hearnála muiriompair agus na Gníomhaireachta, lena n-áirítear sábháilteacht, slándáil, digitiú agus inbhuanaitheacht chomhshaoil an mhuiriompair.

Buanna pearsanta

—

An cumas cumarsáid éifeachtach líofa a dhéanamh le páirtithe leasmhara inmheánacha agus seachtracha ar bhealach trédhearcach oscailte, lena n-áirítear cumarsáid leis na meáin, leis an bpobal, le húdaráis Eorpacha, náisiúnta agus idirnáisiúnta, le heagraíochtaí idirnáisiúnta, agus chun ionadaíocht a dhéanamh ar an nGníomhaireacht i bhfóraim sheachtracha,

—

Cumas cruthaithe caidreamh oibre éifeachtach a choimeád ar bun le hinstitiúidí an Aontais, le húdaráis inniúla na mBallstát agus le páirtithe leasmhara eile,

—

Taithí mhaith ar an idirbheartaíocht i dtimpeallacht idirnáisiúnta.

Ní mór d’iarrthóirí na ceanglais seo a leanas a chomhlíonadh (ceanglais incháilitheachta)

Ní chuirfear san áireamh le haghaidh na céime roghnúcháin ach iarrthóirí a chomhlíonfaidh na ceanglais fhoirmiúla seo a leanas faoin sprioc-am maidir le hiarratais:

—

Náisiúntacht: ní ghlacfar le hiarratas ach ó dhaoine a bhfuil saoránacht ceann de Bhallstáit an Aontais Eorpaigh acu (4).

—

Céim ollscoile nó dioplóma: ní mór d’iarrthóirí:

—

leibhéal oideachais a bheith acu is comhionann le cúrsa iomlán ollscoile ar baineadh dioplóma amach dá bharr i gcás ina maireann an ghnáth-thréimhse oideachais ollscoile 4 bliana nó níos mó;

—

sin nó leibhéal oideachais a bheith acu is comhionann le cúrsa iomlán ollscoile ar baineadh dioplóma amach dá bharr agus taithí ghairmiúil iomchuí dar fad bliain amháin ar a laghad i gcás ina maireann an ghnáth-thréimhse oideachais ollscoile 3 bliana ar a laghad (ní féidir an bhliain sin de thaithí ghairmiúil a chur san áireamh sa taithí ghairmiúil iarchéime a iarrtar thíos).

Ní ghlacfar ach le dioplómaí a bronnadh i mBallstát den Aontas Eorpach nó a bhfuil teastais chomhluacha ag gabháil leo a d’eisigh na húdaráis i gceann de na Ballstáit sin.

—

Taithí ghairmiúil: ní mór d’iarrthóirí taithí oibre iarchéime 15 bliana ar a laghad a bheith acu (5) ar leibhéal ar féidir tosú air leis na cáilíochtaí dá dtagraítear thuas. Ní mór 5 bliana ar a laghad den taithí oibre sin a bheith faighte i réimse ghníomhaíochtaí na Gníomhaireachta.

—

Taithí bhainistíochta: ní mór 5 bliana ar a laghad den taithí oibre iarchéime a bheith faighte i bhfeidhm bainistíochta ardleibhéil (6) i réimse atá ábhartha don phost seo.

—

Teangacha: ní mór d’iarrthóirí eolas cuimsitheach a bheith acu ar cheann de theangacha oifigiúla an Aontais Eorpaigh (7) agus eolas sásúil a bheith acu ar cheann eile de na teangacha oifigiúla sin. Deimhneoidh na painéil roghnúcháin le linn na n-agallamh go gcomhlíonann iarrthóirí an ceanglas maidir le heolas sásúil ar cheann eile de theangacha oifigiúla an Aontais Eorpaigh. Mar chuid den tástáil chéanna d’fhéadfaí an t-agallamh nó cuid den agallamh a dhéanamh sa teanga eile sin.

—

Teorainn aoise: ní mór d’iarrthóirí a bheith ábalta, ag an sprioc-am le hiarratais a dhéanamh, an tréimhse oifige iomlán 5 bliana a chur i gcrích sula mbainfidh siad aois scoir amach. I gcás baill foirne shealadacha de chuid an Aontais Eorpaigh, sainítear an aois scoir mar dheireadh na míosa ina mbeidh 66 bliana slán ag an duine (féach Airteagal 47 de Choinníollacha Fostaíochta Sheirbhísigh eile an Aontais Eorpaigh (8)).

Roghnúchán agus ceapachán

Is é Bord Bainistíochta EMSA a cheapfaidh an Stiúrthóir Feidhmiúcháin ar bhonn gearrliosta a chuirfidh an Coimisiún Eorpach ar fáil.

Chun an gearrliosta sin a thiomsú, eagróidh an Coimisiún Eorpach an roghnú de réir a nósanna imeachta roghnúcháin agus earcaíochta (féach an Doiciméad maidir leis an mBeartas um Oifigigh Shinsearacha (9)).

Mar chuid den phróiseas roghnúcháin seo, cuirfidh an Coimisiún Eorpach painéal réamhroghnúcháin ar bun. Déanfaidh an painéal sin anailís ar na hiarratais go léir, déanfaidh siad an chéad fhíorú incháilitheachta ina dhiaidh sin agus sainaithneoidh siad na hiarrthóirí a bhfuil na próifílí is fearr acu i bhfianaise na gcritéar roghnúcháin atá luaite thuas, agus a bhféadfaí cuireadh a thabhairt dóibh agallamh a dhéanamh leis an bpainéal réamhroghnúcháin. Féadfaidh an Coimisiún Eorpach a iarraidh ar iarrthóirí doiciméid a thacaíonn leis an eolas a thugtar ina n-iarratas a chur ar fáil tráth ar bith le linn an nós imeachta. Mura gcuirfear na doiciméid sin ar fáil laistigh den sprioc-am atá leagtha síos san iarraidh, d’fhéadfaí iad a chur as an áireamh ón roghnúchán.

Tar éis na n-agallamh sin, déanfaidh an painéal réamhroghnúcháin a gcuid conclúidí a tharraingt suas, agus molfaidh siad liosta iarrthóirí le haghaidh agallaimh eile le Coiste Comhairleach an Choimisiúin Eorpaigh um Cheapacháin. Cuirfidh an Coiste Comhairleach um Cheapacháin conclúidí an phainéil réamhroghnúcháin san áireamh agus é ag cinneadh cé na hiarrthóirí a dtabharfar cuireadh chun agallaimh dóibh.

Na hiarrthóirí a dtabharfar cuireadh chun agallaimh leis an gCoiste Comhairleach um Cheapacháin dóibh, glacfaidh siad páirt in ionad measúnaithe bainistíochta a mhairfidh lá iomlán agus a reáchtálfaidh comhairleoirí earcaíochta seachtracha. Agus torthaí an agallaimh agus an tuarascáil ón ionad measúnaithe á gcur san áireamh aige, tiomsóidh CCA gearrliosta d’iarrthóirí a mheasann sé a bheadh oiriúnach do bheith ag feidhmiú mar Stiúrthóir Feidhmiúcháin na Gníomhaireachta.

Is é/iad Comhalta/Comhaltaí an Choimisiúin atá i gceannas ar an Ard-Stiúrthóireacht a bhfuil caidreamh leis an nGníomhaireacht faoina cúram a chuirfidh na hiarrthóirí atá ar ghearrliosta CCA faoi agallamh (10).

I ndiaidh na n-agallamh sin, glacfaidh an Coimisiún Eorpach gearrliosta de na hiarrthóirí is oiriúnaí, agus cuirfear an gearrliosta sin in iúl do Bhord Bainistíochta EMSA. Féadfaidh an Bord Rialaithe cinneadh a dhéanamh na hiarrthóirí a chur faoi agallamh sula ndéanfaidh siad an Stiúrthóir Feidhmiúcháin a cheapadh as na hiarrthóirí ar ghearrliosta an Choimisiúin. Ní hionann duine a bheith ar an ngearrliosta sin agus ráthaíocht a bheith aige go gceapfar é.

D’fhéadfaí a iarraidh ar iarrthóirí dul faoi agallaimh bhreise agus/nó tástálacha breise a dhéanamh, sa bhreis orthu siúd a luaitear thuas. D’fhéadfadh sé go n-iarrfaí orthu freisin ráiteas a dhéanamh os comhair an choiste nó na gcoistí ábhartha de chuid Pharlaimint na hEorpa.

Ba cheart don iarrthóir a roghnófar deimhniú bailí imréitigh slándála óna údarás náisiúnta slándála a bheith aige nó a bheith in ann an deimhniú sin a fháil. Is éard atá in imréiteach slándála pearsanta cinneadh riaracháin a dhéantar i ndiaidh d’údarás náisiúnta slándála inniúil an duine grinnfhiosrúchán slándála a chur i gcrích i gcomhréir leis na dlíthe agus na rialacháin náisiúnta slándála is infheidhme, agus lena ndeimhnítear go bhféadfar cead a thabhairt don duine sin rochtain a fháil ar fhaisnéis rúnaicmithe suas le leibhéal áirithe. (Tabhair do d’aire gur ar iarraidh an fhostóra amháin is féidir tús a chur leis an nós imeachta is gá maidir le himréiteach slándála a fháil, agus nach féidir sin a dhéanamh ar iarraidh an iarrthóra).

Ní bheidh rochtain ag an iarrthóir ar fhaisnéis rúnaicmithe AE (FRAE) ar an leibhéal CONFIDENTIEL UE/EU CONFIDENTIAL nó os a chionn sin, ná ní fhreastalóidh sé ar aon chruinniú ag a bpléifear FRAE den sórt sin, go dtí go dtabharfaidh an Ballstát lena mbaineann an t-imréiteach slándála pearsanta agus go gcuirfear an nós imeachta imréitigh i gcrích leis an seisiún faisnéise ó Stiúrthóireacht Slándála an Choimisiúin, seisiún atá ina cheanglas dlí.

Comhdheiseanna

Tá cuspóir straitéiseach á shaothrú ag an gCoimisiún agus ag an nGníomhaireacht an comhionannas inscne a bhaint amach ar gach leibhéal bainistíochta faoi dheireadh a thréimhse oifige reatha agus cuireann siad beartas comhdheiseanna agus neamh-idirdhealaithe i bhfeidhm, i gcomhréir le hAirteagal 1d de na Rialacháin Foirne (11), lena spreagtar iarratais a d’fhéadfadh cur leis an éagsúlacht, leis an gcomhionannas inscne agus leis an gcothromaíocht gheografach fhoriomlán.

Coinníollacha fostaíochta

Tá na tuarastail agus na coinníollacha fostaíochta leagtha síos i gCoinníollacha Fostaíochta Sheirbhísigh Eile an Aontais Eorpaigh.

Déanfaidh EMSA an t-iarrthóir ar éirigh leis a fhostú mar Ghníomhaire Sealadach ag an ngrád AD14 (12). Rangófar an t-iarrthóir rathúil i gcéim 1 nó i gcéim 2 laistigh den ghrád sin, de réir fhad a thaithí gairmiúla roimhe sin.

Déanfar an t-iarrthóir ar éirigh leis a cheapadh le haghaidh tréimhse oifige thosaigh 5 bliana, agus an fhéidearthacht ann síneadh 5 bliana ar a mhéad a chur léi de réir an Rialacháin lena mbunaítear an Ghníomhaireacht de réir mar is infheidhme tráth an cheapacháin.

Ba chóir d’iarratasóirí a thabhairt dá n-aire go gceanglaítear de réir Choinníollacha Fostaíochta Sheirbhísigh Eile an Aontais Eorpaigh nach mór do gach ball foirne nua tréimhse phromhaidh 9 mí a chur i gcrích agus toradh sásúil a bheith uirthi.

Is i Liospóin, an Phortaingéil, atá an t-ionad oibre.

Eolas tábhachtach d’iarrthóirí

Cuirtear i gcuimhne d’iarrthóirí gur faoi rún atá an obair a dhéanann na painéil roghnúcháin. Tá cosc ar iarrthóirí dul i dteagmháil, bíodh sí díreach nó indíreach, le comhaltaí na bpainéal sin, agus tá cosc ar aon duine eile déanamh amhlaidh thar a gceann. Ní mór gach fiosrúchán a sheoladh chuig rúnaíocht an phainéil lena mbaineann.

Cosaint sonraí pearsanta

Cinnteoidh an Coimisiún go bpróiseálfar sonraí pearsanta na n-iarrthóirí mar a cheanglaítear le Rialachán (AE) 2018/1725 ó Pharlaimint na hEorpa agus ón gComhairle (13). Baineann sé sin go háirithe le rúndacht agus le slándáil na sonraí sin.

Neamhspleáchas agus dearbhú leasanna

Sula rachaidh Stiúrthóir Feidhmiúcháin i mbun a chuid dualgas, beidh air dearbhú a thabhairt go bhfuil sé tiomanta do bheith ag gníomhú go neamhspleách ar mhaithe leis an bpobal, agus dearbhú a thabhairt maidir le haon leas atá aige a d’fhéadfaí a mheas a bheith dochrach dá neamhspleáchas.

Nós imeachta um iarratais

Sula gcuirfidh tú an t-iarratas isteach, ba cheart duit a sheiceáil go cúramach an gcomhlíonann tú gach ceann de na ceanglais incháilitheachta (‘Ní mór d’iarrthóirí na ceanglais seo a leanas a chomhlíonadh’), go háirithe iad siúd a bhaineann leis na cineálacha dioplóma, leis an taithí ghairmiúil ardleibhéil agus leis an acmhainn teangacha atá ag teastáil. Má bhíonn aon cheann de na riachtanais incháilitheachta gan comhlíonadh, eisiafar an t-iarrthóir go huathoibríoch ón bpróiseas roghnúcháin.

Más mian leat iarratas a dhéanamh, ní mór duit clárú tríd an idirlíon ar an suíomh gréasáin seo thíos agus na treoracha maidir leis na céimeanna éagsúla den phróiseas a leanúint:

https://ec.europa.eu/dgs/human-resources/seniormanagementvacancies/.

Ní mór seoladh ríomhphoist bailí a bheith agat. Bainfear úsáid as an seoladh ríomhphoist sin chun do chlárúchán a dheimhniú agus chun dul i dteagmháil leat ag céimeanna éagsúla den phróiseas. Dá bhrí sin, coinnigh an Coimisiún Eorpach ar an eolas faoi aon athrú ar do sheoladh ríomhphoist.

Chun iarratas a chríochnú, ní mór duit CV a uaslódáil i bhformáid PDF, i bhformáid CV Europass más féidir (14), agus litir inspreagtha a líonadh isteach ar líne (uasmhéid 8 000 carachtar). Is féidir leat an CV agus an litir inspreagtha a chur isteach in aon cheann de theangacha oifigiúla an Aontais Eorpaigh.

Is chun do leasa é a chinntiú go bhfuil d’iarratas cruinn, críochnúil agus fírinneach.

Ar chríochnú do chlárúcháin ar líne duit, gheobhaidh tú ríomhphost a dheimhneoidh gur cláraíodh d’iarratas. Mura bhfaighidh tú ríomhphost deimhnithe, níor cláraíodh d’iarratas!

Tabhair do d’aire nach féidir monatóireacht a dhéanamh ar dhul chun cinn d’iarratais ar líne. Rachaidh an Coimisiún Eorpach i dteagmháil go díreach leat maidir le stádas d’iarratais.

Ní ghlacfar le hiarratais a sheolfar le ríomhphost. Má bhíonn tuilleadh eolais uait nó má bhíonn fadhbanna teicniúla agat, seol ríomhphost chuig:

HR-MANAGEMENT-ONLINE@ec.europa.eu.

Is fútsa atá sé do chlárúchán ar líne a chríochnú in am. Moltar go láidir duit gan fanacht go dtí cúpla lá roimh an dáta deiridh chun iarratas a dhéanamh, mar go bhféadfadh trácht trom ar an idirlíon nó fadhb a bhaineann leis an nasc idirlín deireadh a chur leis an gclárúchán ar líne sula mbeidh sé críochnaithe agat, rud a d’fhágfadh go mbeidh ort an próiseas iomlán a dhéanamh athuair. Nuair a bheidh an sprioc-am le hiarratas a chur isteach thart, ní bheidh tú in ann tuilleadh sonraí a chur isteach. Ní ghlacfar le clárúcháin dhéanacha.

Dáta deiridh

Is é an 29 Meán Fómhair 2026, 12.00 meán lae, am na Bruiséile, an sprioc-am le clárú. Ní féidir clárú ina dhiaidh sin.


(1)  Rialachán (CE) Uimh. 1406/2002 ó Pharlaimint na hEorpa agus ón gComhairle an 27 Meitheamh 2002 lena mbunaítear Gníomhaireacht Eorpach um Shábháilteacht Mhuirí (IO L 208, 5.8.2002, lch. 1, ELI: http://data.europa.eu/eli/reg/2002/1406/oj).

(2)  Rialachán (AE) Uimh. 100/2013 ó Pharlaimint na hEorpa agus ón gComhairle an 15 Eanáir 2013 lena leasaítear Rialachán (CE) Uimh. 1406/2002 lena mbunaítear Gníomhaireacht Eorpach um Shábháilteacht Mhuirí, tá sé le hionchorprú i gComhaontú LEE (IO L 39, 9.2.2013, lch. 30, ELI: http://data.europa.eu/eli/reg/2013/100/oj).

(3)  Rialachán (AE) 2025/2434 ó Pharlaimint na hEorpa agus ón gComhairle an 26 Samhain 2025 maidir leis an nGníomhaireacht Eorpach um Shábháilteacht Mhuirí agus lena n-aisghairtear Rialachán (CE) Uimh. 1406/2002 (IO L, 2025/2434, 29.12.2025, ELI: http://data.europa.eu/eli/reg/2025/2434/oj).

(4)  Faoi réir cinneadh le Bord Bainistíochta EMSA chun eisceacht a údarú i gcomhréir le hAirteagal 12.2(a) de Choinníollacha Fostaíochta Sheirbhísigh eile an Aontais Eorpaigh, más gá, le haghaidh cheapadh an Stiúrthóra (Feidhmiúcháin), féadfaidh saoránaigh de chuid na dtíortha seo a leanas ar baill de Chomhlachas Saorthrádála na hEorpa iad ag an dáta deiridh le haghaidh clárúcháin iarratais a chur isteach freisin: an Íoslainn agus an Iorua.

(5)  Ní chuirtear taithí ghairmiúil san áireamh ach amháin más caidreamh oibre iarbhír atá i gceist léi, caidreamh arb é an sainmhíniú atá air fíorobair a bhfuarthas pá aisti i gcáil fostaí (ar aon chineál conartha) nó soláthraí seirbhíse. Gníomhaíochtaí gairmiúla a rinneadh ar bhonn páirtaimseartha, is ar bhonn pro rata a dhéanfar iad a ríomh, de réir an chéatadáin dheimhnithe de na huaireanta lánaimseartha a d’oibrigh an t-iarrthóir. Cuirtear san áireamh saoire mháithreachais/saoire tuismitheora/saoire chun páiste a uchtú, más faoi chuimsiú conradh oibre atá sí. Is cuid den taithí ghairmiúil í dochtúireacht, fiú amháin nuair nach dochtúireacht ar pá í, ach tá uastréimhse 3 bliana i gceist leis sin, agus ní mór an dochtúireacht a bheith curtha i gcrích. Ní féidir aon tréimhse ar leith a chomhaireamh ach uair amháin.

(6)  Maidir leis na blianta uile ina bhfuair na hiarrthóirí taithí bhainistíochta, ba cheart dóibh a léiriú go soiléir ina curriculum vitae: 1. teideal agus ról na bpost bainistíochta a bhí acu; 2. an líon ball foirne a ndearna siad maoirseacht orthu agus na poist sin acu; 3. méid na mbuiséad a bhainistigh siad; 4. an líon sraitheanna ordlathais os a gcionn agus faoina mbun; agus 5. líon a bpiaraí.

(7)   http://data.europa.eu/eli/reg/1958/1(1)/2013-07-01.

(8)   http://data.europa.eu/eli/reg/1962/31(1)/2025-05-13.

(9)   Microsoft Word - Doiciméad Tiomsúcháin ar Bheartas Oifigeach Sinsearach SEC_2004_1352.doc (europa.eu)(ar fáil i mBéarla amháin).

(10)  Ach amháin i gcás ina ndéanfaidh an Comhalta den Choimisiún lena mbaineann, i gcomhréir leis an gCinneadh ón gCoimisiún an 5 Nollaig 2007 (PV(2007) 1811) agus an 30 Meán Fómhair 2020 (PV(2020) 2351) an cúram sin a tharmligean.

(11)   http://data.europa.eu/eli/reg/1962/31(1)/2014-07-01.

(12)  Tá an chomhéifeacht cheartúcháin is infheidhme don Phortaingéil maidir le luach saothair agus pinsin oifigeach agus seirbhíseach eile de chuid an Aontais socraithe ag 92.4 % ón 1 Iúil 2025. Tá an chomhéifeacht sin faoi réir athbhreithniú bliantúil.

(13)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).

(14)  Tá eolas le fáil faoi conas CV Europass a chruthú ar líne ag: https://europa.eu/europass/ga/create-europass-cv.


ELI: http://data.europa.eu/eli/C/2026/4370/oj

ISSN 1977-107X (electronic edition)