Caingean arna tabhairt an 19 Bealtaine 2026 – an Coimisiún Eorpach v Ríocht na Spáinne

(Cás C-504/26)

(C/2026/3405)

Teanga an cháis: an Spáinnis

Páirtithe

Iarratasóir: an Coimisiún Eorpach (ionadaithe: I. Galindo Martín, P. Carlin agus M. Herold, Gníomhairí)

Cosantóir: Ríocht na Spáinne

An t-ordú atá á lorg

Iarrann an t-iarratasóir ar an gCúirt Bhreithiúnais:

—

a dhearbhú, toisc nár glacadh na dlíthe, na rialacháin agus na forálacha riaracháin go léir is gá chun Treoir (AE) 2020/285 ón gComhairle an 18 Feabhra 2020 lena leasaítear Treoir 2006/112/CE maidir leis an gcóras coiteann cánach breisluacha a chomhlíonadh, a mhéid a bhaineann leis an scéim speisialta d’fhiontair bheaga (1), nó, in aon chás, trí mhainneachtain na bearta sin a chur in iúl, gur mhainnigh Ríocht na Spáinne a cuid oibleagáidí a chomhlíonadh faoi Airteagal 3(1) den Treoir sin;

—

a ordú do Ríocht na Spáinne cnapshuim a íoc leis an gCoimisiún arb ionann í agus an ceann is mó díobh seo a leanas: (i) méid laethúil EUR 32 430 arna iolrú faoi líon na laethanta a leanfar den sárú idir an lá tar éis dhul in éag an spriocdháta trasuí a leagtar amach in Airteagal 3(1) den Treoir agus an dáta a chuirfidh Ríocht na Spáinne deireadh leis an sárú nó, ina éagmais sin, dáta seachadta an bhreithiúnais faoi Airteagal 260(3) CFAE; (ii) cnapshuim íosta EUR 7 540 000;

—

i gcás ina leantar den mhainneachtain oibleagáidí a chomhlíonadh go dtí dáta fógartha an bhreithiúnais sna himeachtaí seo, a ordú do Ríocht na Spáinne íocaíocht phionósach laethúil EUR 135 811,20 a íoc leis an gCoimisiún ó dháta an bhreithiúnais sna himeachtaí seo go dtí go gcomhlíonfaidh Ríocht na Spáinne a hoibleagáid faoi Airteagal 3(1) de Threoir (AE) 2020/285 fógra a thabhairt don Choimisiún faoi na bearta lena dtrasuitear an Treoir sin;

—	a ordú do Ríocht na Spáinne na costais a íoc.

Saincheisteanna dlí agus príomhargóintí

Le Treoir (AE) 2020/285 ó Pharlaimint na hEorpa agus ón gComhairle an 18 Feabhra 2020, leasaítear, go háirithe, Treoir 2006/112/CE maidir leis an gcomhchóras cánach breisluacha (2), a mhéid a bhaineann leis an scéim speisialta d’fhiontair bheaga. Foráiltear le Treoir (AE) 2020/285, i gcás ina ndeonaíonn Ballstát díolúine ó cháin bhreisluacha (CBL) atá dlite ar a chríoch d’fhiontair bheaga nach sáraíonn a láimhdeachas tairseacha áirithe, gur cheart d’fhiontair bheaga atá bunaithe i mBallstáit eile a bheith in ann tairbhe a bhaint as an díolúine sin. Dá bhrí sin, cé go bhféadfaidh na Ballstáit cinneadh a dhéanamh gan an díolúine ó CBL atá dlite ina gcríoch a dheonú d’fhiontair bheaga, ceanglaítear orthu na bearta is gá a dhéanamh ionas go mbeidh fiontair bheaga atá bunaithe ina gcríoch in ann tairbhe a bhaint as an díolúine arna glacadh ag Ballstáit eile. Faoi Airteagal 3(1) de Threoir (AE) 2020/285, ceanglaíodh ar na Ballstáit na dlíthe, na rialacháin agus na forálacha riaracháin is gá chun an Treoir a chomhlíonadh a thabhairt i bhfeidhm faoin 31 Nollaig 2024, téacs na bhforálacha sin a chur in iúl don Choimisiún gan mhoill agus iad a chur i bhfeidhm ón 1 Eanáir 2025. Níor chomhlíon Ríocht na Spáinne an oibleagáid sin.

Glacadh Treoir (AE) 2020/285 i gcomhréir leis an nós imeachta reachtach agus, dá bhrí sin, tagann sí faoi raon feidhme Airteagal 260(3) CFAE.

Sa chomhthéacs sin, iarrann an Coimisiún ar an gCúirt a ordú do Ríocht na Spáinne cnapshuim agus íocaíocht phionósach a íoc faoi Airteagal 260(3) CFAE, ar ríomh an Coimisiún a méid i gcomhréir leis an Teachtaireacht maidir le pionóis airgeadais in imeachtaí um shárú (3) agus i bhfianaise chásdlí na Cúirte.

---

(1)  Treoir (AE) 2020/285 ón gComhairle an 18 Feabhra 2020 lena leasaítear Treoir 2006/112/CE maidir leis an gcomhchóras cánach breisluacha a mhéid a bhaineann leis an scéim speisialta d’fhiontair bheaga agus Rialachán (AE) Uimh. 904/2010 a mhéid a bhaineann leis an gcomhar riaracháin agus leis an malartú faisnéise chun faireachán a dhéanamh ar chur i bhfeidhm ceart na scéime speisialta d’fhiontair bheaga (IO 2020 L 62, lch. 13).

(2)   IO 2006 L 347, lch. 1.

(3)   IO 2023 C 2, lch. 1.