Breithiúnais na Cúirte (an Cúigiú Dlísheomra) an 16 Aibreán 2026 (iarraidh ar reamhrialú ón Ard-Chúirt (Éire) – Éire) – NE, MY, HJ, XF, WB, UV, VK, JU, RJ, DZ v an Coimisiún Pleanála, an Bord Pleanála roimhe seo, Minister for Housing, Local Government and Heritage, Ireland, The Attorney General

(Cás C-58/24,  (1) Drumakilla)

(Tarchur chun réamhrialú - Comhshaol - Treoir 92/43/CEE - Gnáthóga nádúrtha agus fána agus flóra fiáine a chaomhnú - Airteagal 12 - Córas um dhianchosaint do speicis áirithe ainmhithe - Airteagal 16 - Cinneadh maidir le maolú a dheonú in oirchill iarratais ar chead pleanála le haghaidh tionscadal a chumhdaítear faoi Threoir 2011/92/AE - Airteagal 11 - Coinbhinsiún Aarhus - Airteagal 9 - Neamhspleáchas ó thaobh nósanna imeachta de - Prionsabail na coibhéise agus na héifeachtachta - Cinneadh maidir le maolú arna aicmiú mar ghníomh dlí neamhspleách - Rialacha nós imeachta lena bhforáiltear do thréimhse 3 mhí chun a iarraidh go gcuirfí ceadúnas maolaithe ar neamhní)

(C/2026/3136)

Teanga an cháis: an Béarla

An chúirt a rinne an tarchur

An Ard-Chúirt (Éire)

Páirtithe sna príomhimeachtaí

Iarratasóirí: NE, MY, HJ, XF, WB, UV, VK, JU, RJ, DZ

Cosantóirí: An Coimisiún Pleanála, an Bord Pleanála roimhe seo, Minister for Housing, Local Government and Heritage, Ireland, The Attorney General

Idiragraí: Drumakilla Limited

An chuid oibríochtúil

Maidir le hAirteagal 11 de Threoir 2011/92/AE ó Pharlaimint na hEorpa agus ón gComhairle an 13 Nollaig 2011 maidir le measúnú a dhéanamh ar éifeachtaí tionscadal poiblí agus príobháideach áirithe ar an gcomhshaol, arna leasú le Treoir 2014/52/AE ó Pharlaimint na hEorpa agus ón gComhairle an 16 Aibreán 2014, arna léamh i bhfianaise Airteagal 9 den Choinbhinsiún maidir le Rochtain ar Fhaisnéis, Rannpháirtíocht Phoiblí i gCinnteoireacht agus Rochtain ar Cheartas i gCúrsaí Comhshaoil, a síníodh in Aarhus an 25 Meitheamh 1998 agus arna fhormheas thar ceann an Chomhphobail Eorpaigh le Cinneadh 2005/370/CE ón gComhairle an 17 Feabhra 2005, agus Airteagal 47 den Chairt um Chearta Bunúsacha an Aontais Eorpaigh,

ní mór léiriú a dhéanamh mar seo a leanas:

ní chuirtear cosc ar riail arna leagan síos le dlí Ballstáit ar dá réir nach mór caingean le haghaidh neamhniú a thionscnamh i leith ceadúnas maolaithe, arna eisiúint faoi Airteagal 16 de Threoir 92/43/CEE ón gComhairle an 21 Bealtaine 1992, maidir le gnáthóga nádúrtha agus fána agus flóra fiáine a chaomhnú, agus a thagann faoin nós imeachta údaraithe tionscadail de réir bhrí Airteagal 1(2)(a) de Threoir 2011/92, arna leasú le Treoir 2014/52, a thionscnamh ag an bpobal lena mbaineann laistigh de 3 mhí ón tráth a raibh an pobal sin ar an eolas nó a bhféadfadh sé a bheith ar an eolas go réasúnta, faoi mhaolú den sórt sin, ar an gcoinníoll nach bhfuil riail dlí den sórt sin níos lú fabhraí ná na rialacha a bhaineann le caingne intíre comhchosúla (prionsabal na coibhéise) agus nach ndéantar feidhmiú na gceart arna dtabhairt le dlíchóras an Aontais dodhéanta nó ródheacair sa chleachtas (prionsabal na héifeachtachta).

---

(1)  IO C, C/2024/2290.