1.

An gá Airteagal 4 de Rialachán Uimh. 883/2004/CE (1), Airteagal 24 de Threoir 2004/38/CE (2) agus Airteagal 7 de Rialachán (AE) Uimh. 492/2011 (3), lena gcumhdaítear prionsabal na córa comhionainne do shaoránaigh an Aontais Eorpaigh, a léiriú sa chaoi go gcuirtear cosc leo ar reachtaíocht náisiúnta lena gcuirtear deonú liúntas teaghlaigh faoi réir an choinníll nach mór don leanbh lena mbaineann, ar saoránach den Aontas Eorpach é nó í, a bheith i dteideal cead cónaithe sa Bhallstát inniúil ina bhfuil cónaí air nó uirthi iarbhír lena thuismitheoirí nó lena tuismitheoirí, rud a fhágann go n-eisiatar ó dheonú na liúntas sin tuismitheoir an linbh sin, ar náisiúnach de Bhallstát den Aontas Eorpach é nó í freisin ach nach bhfuil cead cónaithe den sórt sin aige nó aici (nó a thuilleadh), cé go bhfuil cónaí air nó uirthi iarbhír ann agus go saothraíonn sé nó sí gníomhaíocht eacnamaíoch ann (duine fostaithe sa chás seo), rud a rannchuidíonn le maoiniú bheartais shóisialta an Stáit sin?

2.

Má thugtar freagra dearfach ar an gcéad cheist: an ndéantar cóir neamh-chomhionann den sórt sin, atá contrártha d’Airteagal 4 de Rialachán Uimh. 883/2004/CE, d’Airteagal 24 de Threoir 2004/38/CE agus d’Airteagal 7 de Rialachán (AE) Uimh. 492/2011, a leigheas go leordhóthanach toisc go ndíolmhaítear an leanbh céanna ó thairbhe ceada cónaithe le foráil eile den reachtaíocht atá i gceist, rud a cheadaíonn don tuismitheoir céanna liúntais teaghlaigh a fháil, dá bhrí sin, ar feadh uastréimhse 6 mhí ón dáta a thagann an leanbh sin isteach i gcríoch an Bhallstáit lena mbaineann?