Caingean arna tabhairt an 27 Feabhra 2026 – BT v EDA

(Cás T-146/26)

(C/2026/2264)

Teanga an cháis: an Béarla

Páirtithe

Iarratasóir: BT (ionadaí: L. Heisten, Dlíodóir)

Cosantóir: An Ghníomhaireacht Eorpach um Chosaint

An t-ordú atá á lorg

Iarrann an t-iarratasóir ar an gCúirt Ghinearálta:

—	Cinneadh an 28 Samhain 2025 agus, a mhéid is gá, cinneadh an 28 Aibreán 2025 a chur ar neamhní, lenar bhris an Ghníomhaireacht Eorpach um Chosaint an t-iarratasóir as a post;

—	a rialú nár foirceannadh conradh fostaíochta an iarratasóra riamh agus go bhféadfaidh an t-iarratasóir dul i mbun na ndualgas ag an nGníomhaireacht Eorpach um Chosaint arís;

—	a éileamh ar an nGníomhaireacht Eorpach um Chosaint timpeallacht oibre saor ó chiapadh ar áirithiú;

—	a cheangal ar an nGníomhaireacht Eorpach um Chosaint cinneadh inmheánach a dhéanamh lena n-admhaítear go ndearna sí éagóir ar an iarratasóir, chun dea-cháil an iarratasóra a chur uirthi arís;

—	a cheangal ar an nGníomhaireacht Eorpach um Chosaint an t-ionchódú in SYSPER, faoin rannóg gairme, maidir le dífhostú an iarratasóra an 31 Bealtaine 2025 a aisiompú;

—	in aon chás, suim EUR 1 769 i leith damáiste ábhartha a dhámhachtain don iarratasóir;

—	suim EUR 57 954 a dhámhachtain don iarratasóir, ar cheart ús a chur léi de réir na rátaí arna gcur i bhfeidhm ag an mBanc Ceannais Eorpach, i gcás ina ndéanfaí an cinneadh atá faoi chonspóid a neamhniú gan a ordú go n-athbhunófaí an t-iarratasóir ina post;

—	suim EUR 15 000 a dhámhachtain don iarratasóir i leith damáiste neamhábhartha;

—	a ordú don Ghníomhaireacht Eorpach um Chosaint na costais a íoc.

Saincheisteanna dlí agus príomhargóintí

Mar thaca leis an gcaingean, maíonn an t-iarratasóir sé shaincheist dlí.

1.	An chéad saincheist dlí lena n-éilítear sárú ar Airteagal 107 de Chinneadh (AE) 2016/1351 (1), sa mhéid is gur cuireadh síneadh leis an tréimhse phromhaidh gan bunús dlí.

2.	An dara saincheist dlí lena n-éilítear sárú ar phrionsabal an dea-riaracháin, agus é á áitiú aici nach raibh an measúnú ar a cuid oibre neamhchlaonta, oibiachtúil ná cothrom, toisc go raibh sé ag brath ar bhreithnithe suibiachtúla agus go ndearna sé neamhaird de thosca comhthéacsúla tábhachtacha.

An tríú saincheist dlí lena n-éilítear sárú ar phrionsabal na deimhneachta dlíthiúla, ós rud é gur chuir lucht an riaracháin critéir mheastóireachta nua i bhfeidhm nár fógraíodh tar éis creat sonrach a shainiú chun síneadh a chur leis an tréimhse phromhaidh, rud a bhain an bonn dá hionchais dhlisteanacha.

4.	An ceathrú saincheist dlí lena n-éilítear mí-úsáid cumhachtaí, agus é á áitiú aici gur úsáideadh an síneadh ar an tréimhse phromhaidh, a raibh údar leis mar gheall ar chuspóir sonrach (caidreamh idirphearsanta a fheabhsú), chun measúnú a dhéanamh ar chritéir éagsúla nár nochtadh roimhe sin.

5.	An cúigiú saincheist dlí lena n-éilítear sárú ar phrionsabal na comhréireachta, agus é á áitiú aici gur beart díréireach é dífhostú i ndáil leis na heasnaimh a líomhnaítear, ós rud é go raibh roghanna malartacha ann nach raibh chomh sriantach céanna.

An séú saincheist dlí lena n-éilítear sárú ar an dualgas cúraim agus cosanta (ciapadh síceolaíoch), agus é á áitiú aici gur theip ar lucht an riaracháin teannas a bhainistiú agus go raibh sé ag brath ar cháineadh suibiachtúil, rud a chruthaigh timpeallacht oibre dhíobhálach agus a rinne difear do dhlíthiúlacht an chinnidh.

Chomh maith le neamhniú an chinnidh a iarraidh, éilíonn an t-iarratasóir damáistí:

—	damáistí ábhartha de mhéid EUR 1 769 as costais bhogtha agus stórála agus, mura n-athbhunaítear ina post í, EUR 57 954 as caillteanas tuarastail go dtí deireadh a conartha, tar éis an cúiteamh arna fháil cheana a asbhaint;

—	Damáistí neamhábhartha de mhéid EUR 15 000 as ciapadh agus damáiste dá clú.

Forchoimeádann sí freisin an ceart na méideanna sin a mhéadú ag céim níos déanaí, mar aon le hús ar ráta de chuid BCE.

(1) Cinneadh (AE) 2016/1351 ón gComhairle an 4 Lúnasa 2016 maidir le Rialacháin Foirne na Gníomhaireachta Eorpaí um Chosaint, agus lena n-aisghairtear Cinneadh 2004/676/CE (IO 2016 L 219, lch. 1).