Iarraidh ar réamhrialú ó Curtea de Apel Constanța (an Rómáin) a taisceadh an 17 Samhain 2025 – Rompetrol Energy SA și Rompetrol Quality Control SRL v Agenția Națională de Administrare Fiscală, Ministerul Finanțelor – Direcția Generală de Soluționare a Contestațiilor, Administrația Județeană a Finanțelor Publice Constanța agus Direcția Regională Antifraudă Fiscală 2 Constanța

(Cás C-731/25, Rompetrol Energy și Rompetrol Quality Control)

(C/2026/1063)

Teanga an cháis: an Rómáinis

An chúirt a rinne an tarchur

Curtea de Apel Constanţa

Páirtithe sna príomhimeachtaí

Iarratasóirí: Rompetrol Energy SA agus Rompetrol Quality Control SRL

Cosantóirí: Agenția Națională de Administrare Fiscală, Ministerul Finanțelor – Direcția Generală de Soluționare a Contestațiilor, Administrația Județeană a Finanțelor Publice Constanța agus Direcția Regională Antifraudă Fiscală 2 Constanța

Na ceisteanna a tharchuirtear

Ar an gcéad dul síos, an bhfuil Airteagail 14, 15 agus 16 de Rialachán (AE) 2022/1854 (1) neamhbhailí, ós rud é gur glacadh iad de shárú ar:

—	phrionsabal na tabhartha inniúlachtaí atá leagtha amach in Airteagal 4(1) agus Airteagal 5(1) [CAE] agus/nó

—	an nós imeachta reachtach dá bhforáiltear in Airteagal 194(3) CFAE agus/nó

—	prionsabal ginearálta na deimhneachta dlíthiúla agus prionsabal na neamh-aisghníomhaíochta agus/nó

—	prionsabal ginearálta na comhréireachta atá leagtha síos in Airteagal 5(4) CAE agus/nó

—	Airteagail 16, 17, 20 agus 21 den Chairt um Chearta Bunúsacha an Aontais Eorpaigh?

Más freagra diúltach a thabharfar ar cheist 1, an gcaithfear Airteagal 14(1) de Rialachán (AE) 2022/1854, Airteagal 15 de Rialachán (AE) 2022/1854, prionsabal na comhréireachta agus prionsabal na trédhearcachta tráth athúsáid na cánach, a leagtar síos i Rialachán (AE) 2022/1854, a léiriú sa chaoi go gcuirtear cosc leo ar reachtaíocht náisiúnta, amhail an reachtaíocht a tugadh isteach le OUG Uimh. 186/2022, lena bhforchuirtear ranníocaíocht (i) lena leathnaítear raon feidhme daoine inchánacha freisin chuig daoine atá cleamhnaithe le cuideachtaí atá gníomhach i dtionscal an pheitriliam amh, an gháis nádúrtha, an ghuail agus na scaglann agus (ii) ag ráta iomarcach gan measúnú tionchair a dhéanamh, gan a chur san áireamh go bhfuil bearta náisiúnta coibhéiseacha ann agus gan soiléiriú a dhéanamh ar an gcaoi a leithdháilfear na méideanna a bhailítear?

Beag beann ar an bhfreagra ar cheist 1:

An gcuirtear cosc leis na cuspóirí Eorpacha maidir le haeráidneodracht a bhaint amach faoi 2050 agus neamhspleáchas fuinnimh an Aontais Eorpaigh a áirithiú, a chumhdaítear in Airteagal 2(1) agus (2) agus Airteagal 4(1) de Rialachán 2021/1119 (2) agus Airteagal 3(1) de Threoir 2018/2001 (3), ar reachtaíocht náisiúnta amhail an reachtaíocht a tugadh isteach le OUG Uimh. 186/2022 nach gceadaítear léi, trí ranníocaíocht ag ráta iomarcach a fhorchur, brabúis na gcuideachtaí lena mbaineann a infheistiú sa phróiseas dícharbónaithe?

(1) Rialachán (AE) 2022/1854 ón gComhairle an 6 Deireadh Fómhair 2022 maidir le hidirghabháil éigeandála chun aghaidh a thabhairt ar phraghsanna arda fuinnimh (IO 2022 L 261I, lch. 1).

(2) Rialachán (AE) 2021/1119 ó Pharlaimint na hEorpa agus ón gComhairle an 30 Meitheamh 2021 lena mbunaítear creat chun an neodracht aeráide a bhaint amach agus lena leasaítear Rialachán (CE) Uimh. 401/2009 agus Rialachán (AE) 2018/1999 (‘Dlí Aeráide na hEorpa’) (IO 2021 L 243, lch. 1).

(3) Treoir (AE) 2018/2001 ó Pharlaimint na hEorpa agus ón gComhairle an 11 Nollaig 2018 maidir le húsáid fuinnimh ó fhoinsí inathnuaite a chur chun cinn (IO 2018 L 328, lch. 82).