|
Iris Oifigiúil |
GA Sraith C |
|
C/2026/290 |
26.1.2026 |
Iarraidh ar réamhrialú ó Sąd Rejonowy w Brodnicy (an Pholainn) a taisceadh an 27 Deireadh Fómhair 2025 – K.M. v A.B. S.A.
(Cás C-684/25, Bryścki) (1)
(C/2026/290)
Teanga an cháis: an Pholainnis
An chúirt a rinne an tarchur
Sąd Rejonowy w Brodnicy
Páirtithe sna príomhimeachtaí
Iarratasóir: K.M.
Cosantóir: A.B. S.A.
Na ceisteanna a tharchuirtear:
|
1) |
An bhfuil Airteagal 10(2)(k) de Threoir 2008/48/CE (2) le léiriú sa chaoi, ar mhaithe leis an gceanglas a chomhlíonadh nach mór faisnéis maidir le muirir a théann le comhaontuithe creidmheasa tomhaltóirí a bheith soiléir sothuigthe, gur féidir leis an gcreidiúnaí cloí leis na húdair atá leis an bhféidearthacht athruithe a chur ar na muirir sin, ar nós athruithe de chineál maicreacnamaíoch nó rialála, a shonrú go ginearálta tuairisciúil nó an gceanglaítear air sásra níos cruinne a shonrú chun na muirir sin a shocrú ina ionad sin, ina n-áirítear, i gcás inarb infheidhme, srian nó teorainn a chur le méaduithe ar mhuirir, ar dá réir is féidir leis an tomhaltóir measúnú a dhéanamh ar iarmhairtí féideartha airgeadais an chomhaontaithe? |
|
2) |
An bhfuil Airteagal 23 de Threoir 2008/48/CE, arna léamh i gcomhar le haithris 47 di, le léiriú sa chaoi go gcuirtear cosc ar fhoráil náisiúnta (Airteagal 45 den ustawa o kredycie konsumenckim (an tAcht maidir le Creidmheas Tomhaltóirí, an Pholainn)) lena bhforáiltear go gceilfí go huathoibríoch an ceart ar ús agus costais chreidmheasa ar an gcreidiúnaí i ngach cás ina sáraítear an ceanglas um thuairisciú dá dtagraítear in Airteagal 10(2)(k) den Treoir sin, ina n-áirítear i gcás inar tugadh an t-eolas don tomhaltóir mar is ceart faoi bhunghnéithe an chomhaontaithe creidmheasa (an méid iomlán creidmheasa, costas iomlán an chreidmheasa, an ráta úis, an ráta céatadánach bliantúil agus na rialacha maidir le hús a ríomh) agus nach mbaineann an sárú líomhainte ach leis an gcur síos neamhbheacht ar na coinníollacha maidir le muirir bheaga a athrú agus nach ndeachthas i bhfeidhm i ndáiríre leis ar an gcinneadh ón tomhaltóir an comhaontú a dhéanamh? |
|
3) |
An bhfuil Airteagal 23 de Threoir 2008/48/CE le léiriú sa chaoi gur féidir le cúirt náisiúnta staonadh ón bpionós dá bhforáiltear de réir dlí náisiúnta a chur i bhfeidhm (an t-ús agus costais chreidmheasa a cheilt) i gcás ina measann sí gur féidir cuspóirí na Treorach sin a bhaint amach ar bhealach eile cosanta tomhaltóirí, go háirithe trína dhearbhú go bhfuil an téarma conarthach i gceist éagórach de réir bhrí Threoir 93/12/CEE (3) agus trína n-ordú nach n-aisíocfaí ach muirir arna ngearradh go míchuí? |
|
4) |
An bhfuil Airteagail 22 agus 23 de Threoir 2008/48/CE, arna léamh i gcomhar le hAirteagal 6(1) de Threoir 93/13/CEE, le léiriú sa chaoi, i gcás ina nglacann Cúirt Bhreithiúnais an Aontais Eorpaigh leis gurb inghlactha staonadh ón bpionós maidir le creidmheas neamhúsmhar a chur i bhfeidhm ar son cosaint tomhaltóirí de réir Threoir 93/13/CEE (Ceist 3), nach mór don chúirt náisiúnta, agus scrúdú á dhéanamh aici as a stuaim féin ar iarmhairtí sáraithe ar an gceanglas um thuairisciú, eolas a thabhairt do na páirtithe sna himeachtaí gur féidir a leithéid de bheart a chur i bhfeidhm agus faoi na difríochtaí ó thaobh éifeachtaí dlí atá ann idir an pionós maidir le creidmheas neamhúsmhar agus dearbhú go bhfuil téarma éagórach, go háirithe i gcás ina dtagann an chúirt náisiúnta ar an tuairim nach mbeadh údar leis an bpionós maidir le creidmheas neamhúsmhar nó go mbeadh sé díréireach de réir imthosca an cháis agus nach mór di cead a thabhairt do na páirtithe a gcuid barúlacha a thíolacadh maidir leis an mbeart cosanta iomchuí le roghnú? |
(1) Is ainm bréige é ainm an cháis seo. Ní fhreagraíonn sé d’fhíorainm aon pháirtí sna himeachtaí.
(2) Treoir 2008/48/CE ó Pharlaimint na hEorpa agus ón gComhairle an 23 Aibreán 2008 maidir le comhaontuithe creidmheasa do thomhaltóirí agus lena n-aisghairtear Treoir 87/102/CEE ón gComhairle (IO 2008 L 133, lch. 66).
(3) Treoir 93/13/CEE ón gComhairle an 5 Aibreán 1993 maidir le téarmaí éagóracha i gconarthaí tomhaltóra (IO 1993 L 95, lch. 29).
ELI: http://data.europa.eu/eli/C/2026/290/oj
ISSN 1977-107X (electronic edition)