Achomharc arna thabhairt an 31 Deireadh Fómhair 2025 ag Philippe Latombe i gcoinne bhreithiúnas na Cúirte Ginearálta (an Deichiú Dlísheomra, Comhdhéanamh Méadaithe) a fógraíodh an 3 Meán Fómhair 2025 i gCás T-553/23 Latombe v an Coimisiún

(Cás C-703/25 P)

(C/2025/6610)

Teanga an cháis: an Fhraincis

Páirtithe

Achomharcóir: Philippe Latombe (ionadaithe: J.-B. Soufron, T. Lamballe, avocats)

Páirtithe eile sna himeachtaí: an Coimisiún Eorpach, Éire agus Stát Aontaithe Mheiriceá

An t-ordú atá á lorg

Iarrann an t-achomharcóir ar an gCúirt Bhreithiúnais:

—

go príomha, — go gcuirfear Breithiúnas Chúirt Ghinearálta an Aontais Eorpaigh an 3 Meán Fómhair 2025, Latombe v an Coimisiún (T-553/23, ‘an breithiúnas atá faoi achomharc’ ECLI:EU:T:2025:831) ar ceal; agus — breith a thabhairt in ionad na Cúirte Ginearálta de bhun Airteagal 170(1) de Rialacha Nós Imeachta na Cúirte Breithiúnais, lena ndéantar an t-ordú atá á lorg ag an gcéad chéim a dheonú agus, dá bhrí sin, Cinneadh Cur Chun Feidhme (AE) 2023/1795 ón gCoimisiún an 10 Iúil 2023 a chur ar neamhní, lena gcinntear, i gcomhréir le Rialachán (AE) 2016/679 ó Pharlaimint na hEorpa agus ón gComhairle, go n-áirithítear leibhéal cosanta leordhóthanach do shonraí pearsanta faoi Chreat Príobháideachais Sonraí AE-SAM (IO 2023, L 231, lch. 118, ‘an cinneadh leordhóthanachta CPS’);

—	nó mar mhalairt ar sin: — an breithiúnas atá faoi achomharc a chur ar ceal; agus — an cás a tharchur ar ais chun na Cúirte Ginearálta.

—	i gcás ar bith, a ordú don Choimisiún na costais a íoc.

Saincheisteanna dlí agus príomhargóintí

Mar thaca leis an gcaingean, maíonn an t-achomharcóir ceithre shaincheist dlí:

An chéad saincheist dlí

Éilítear leis an gcéad saincheist dlí go ndearna an Chúirt Ghinearálta earráid fhollasach measúnaithe, go ndearna sí earráid dlí, gur mhainnigh sí cúiseanna leordhóthanacha a lua agus gur shaobh sí an fhianaise sa cháschomhad trí dhiúltú don tsaincheist dlí san iarratas lena n-éilítear sárú ar an dara mír d’Airteagal 47 den Chairt um Chearta Bunúsacha an Aontais Eorpaigh agus ar Airteagal 45(2) de Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht sonraí den sórt sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí) (IO 2016 L 119, lch. 1, ‘RGCS’), ar an bhforas nach dtugtar na coimircí sin faoi cheist leis na rialacha maidir le breithiúna an Data Protection Review Court (an Chúirt um Athbhreithniú ar Chosaint Sonraí, ‘DPRC’) a cheapadh agus a chur as oifig.

An dara saincheist dlí

Líomhnaítear leis an dara saincheist dlí go ndearna an Chúirt Ghinearálta earráid dlí nuair a chinn sí, d’fhonn a mheas an gcomhlíontar na ceanglais a eascraíonn as an dara mír d’Airteagal 47 den Chairt um Chearta Bunúsacha, gur leor a chinneadh an bhforáiltear leis an téacs lena mbunaítear binse agus lena sainítear a rialacha oibriúcháin do choimircí leordhóthanacha chun a neamhspleáchas agus a neamhchlaontacht a áirithiú maidir le cumhachtaí eile, lena n-áirítear an feidhmeannas, agus nach gá measúnú a dhéanamh ar chineál foirmiúil an téacs sin chun diúltú don dara cuid den tríú saincheist dlí san iarratas, ar dá réir a sháraíonn cinneadh leordhóthanachta CPS an dara mír d’Airteagal 47 den Chairt um Chearta Bunúsacha agus Airteagal 45(2) de RGCS toisc nach binse arna bhunú roimhe sin le dlí é an DPRC.

An tríú saincheist dlí

Éilítear leis an tríú saincheist dlí go bhfuil cinneadh na Cúirte Ginearálta curtha ó bhail ag trí earráid dlí a rinne an Chúirt Ghinearálta chun diúltú don dara cuid den dara saincheist dlí san iarratas, ar dá réir a sháraíonn cinneadh leordhóthanachta CPS Airteagail 7 agus 8 den Chairt um Chearta Bunúsacha toisc nach gcuireann dlí na Stát Aontaithe bulcbhailiú sonraí pearsanta faoi réir údarú roimh ré ó údarás breithiúnach nó riaracháin, agus an méid seo a leanas á mhaíomh:

(i)

ar dtús, go ndearna an Chúirt Ghinearálta earráid nuair a chinn sí nach dtugtar le fios le haon ní i mbreithiúnas an 16 Iúil 2020, Facebook Ireland agus Schrems (C-311/18, EU:C:2020:559), nach mór bulcbhailiú sonraí pearsanta a bheith faoi réir údarú roimh ré arna eisiúint ag údarás neamhspleách agus, os a choinne sin, gur léir ón mbreithiúnas sin gur leor an cinneadh lena n-údaraítear bulcbhailiú a bheith faoi réir athbhreithniú breithiúnach ina dhiaidh sin amháin;

(ii)

anuas air sin, go ndearna an Chúirt Ghinearálta earráid freisin nuair a chinn sí nach mbaineann na tagairtí do na torthaí a bhí ann le breithiúnais na Cúirte Breithiúnais an 6 Deireadh Fómhair 2020, La Quadrature du Net agus páirtithe eile (C-511/18, C-512/18 agus C-520/18, EU:C:2020:791), agus an 30 Aibreán 2024, La Quadrature du Net agus páirtithe eile (Sonraí pearsanta agus an comhrac in aghaidh an ghóchumtha) (C-470/21, EU:C:2024:370) le hábhar;

(iii)

ar deireadh, go ndearna an Chúirt Ghinearálta earráid freisin nuair a chinn sí nach féidir teacht ar an gconclúid gur leor nach bhfuil aon cheanglas maidir le réamhúdarú infheidhme maidir le bulcbhailiú tosaigh sonraí pearsanta faoi bhealach ón Aontas Eorpach, ag gníomhaireachtaí faisnéise na Stát Aontaithe, chun tacú le cinneadh, i bhfianaise an teagaisc ó bhreithiúnas na Cúirte Eorpaí um Chearta an Duine an 25 Bealtaine 2021, Big Brother Watch agus páirtithe eile v an Ríocht Aontaithe (CE:ECHR:2021:0525JUD005817013), nach bhforáiltear le dlí Stáit Aontaithe Mheiriceá do choimircí atá coibhéiseach go substaintiúil leo siúd dá bhforáiltear le dlí an Aontais.

An ceathrú saincheist dlí

Maítear leis an gceathrú saincheist dlí go gcuirtear cinneadh na Cúirte Ginearálta ó mhaith le réasúnaíocht chontrártha agus earráid dlí toisc go gcinneann an Chúirt Ghinearálta nach féidir a chinneadh go bhfuil an chumhacht a thugtar d’Uachtarán na Stát Aontaithe liosta na gcuspóirí sonracha maidir le bulcbhailiú a thabhairt cothrom le dáta contrártha do na ceanglais a shainaithin an ECtHR i mbreithiúnas na Cúirte Eorpaí um Chearta an Duine an 4 Nollaig 2015, Roman Zakharov v an Rúis (CE:ECHR:2015:1204JUD004714306), chun diúltú don tríú cuid den dara saincheist dlí, ar dá réir a sháraíonn cinneadh leordhóthanachta CPS Airteagail 7 agus 8 den Chairt um Chearta Bunúsacha toisc go dtugtar le hOrdú Feidhmiúcháin 14086 (Executive Order 14086) an 7 Deireadh Fómhair 2022 cumhacht d’Uachtarán na Stát Aontaithe nuashonrú rúnda a údarú ar na hoibleagáidí sonracha a bhaineann le bulcbhailiú.