—

Rialachán Cur Chun Feidhme (AE) 2025/1330 ón gCoimisiún an 10 Iúil 2025 lena bhforchuirtear dleacht frithdhumpála chinntitheach ar allmhairí lísín de thionscnamh Dhaon-Phoblacht na Síne agus lena mbailítear go cinntitheach an dleacht shealadach arna forchur ar na hallmhairí sin (IO L 2025/1330) a chur ar neamhní, a mhéid a bhaineann sé leis an iarratasóir; agus,

—

a ordú don Choimisiún na costais mar thoradh ar na himeachtaí seo a íoc.

1.

An chéad saincheist dlí lena n-éilítear gur sháraigh an Coimisiún cearta cosanta an iarratasóra agus prionsabal an dea-riaracháin a chumhdaítear in Airteagal 41 de Chairt um Chearta Bunúsacha an Aontais Eorpaigh, a líomhnaítear gurb ionann gach ceann acu agus sárú ar cheanglas riachtanach nós imeachta. Mar sin, líomhnaítear freisin gur sáraíodh Airteagal 2(6a) den bhun-Rialachán frithdhumpála (1).

—

Baineann an chéad saincheist dlí le bunú lochtach dlí an Choimisiúin maidir leis na costais agus na tagarmharcanna margaidh le haghaidh gaile mar cheann de na tosca riachtanacha táirgthe lísín, an táirge lena mbaineann an beart frithdhumpála atá faoi chonspóid. Cuirtear torthaí an Choimisiúin maidir leis an tagarmharc le haghaidh gaile ó bhail mar gheall ar na sáruithe líomhnaithe ar na cearta cosanta agus ar phrionsabal an dea-riaracháin.

Tar éis na sáruithe líomhnaithe sin, bunaíodh costas boilscithe monaraíochta an iarratasóra, rud a úsáideadh ina dhiaidh sin chun an gnáthluach ríofa, an corrlach dumpála agus an dleacht frithdhumpála don iarratasóir a mhéadú.

Mar thoradh ar na neamhdhleathachtaí líomhnaithe sin, sáraíodh Airteagal 2(6a) den bhun-Rialachán frithdhumpála freisin, ós rud é nár shuigh an Coimisiún gnáthluach ríofa go heisiach ar bhonn costais táirgthe agus díola a léiríonn praghsanna nó tagarmharcanna neamhshaofa, agus úsáid á baint as foinsí, lena n-áirithítear praghsanna, costais nó tagarmharcanna idirnáisiúnta neamhshaofa, nó costais intíre sa tSín, a mhéid atá siad suite go dearfach agus neamhshaofa, de bhun fianaise chruinn agus iomchuí.

2.

An dara saincheist dlí lena n-éilítear sárú ar an riail maidir le comparáid chóir in Airteagal 2(10) den bhun-Rialachán frithdhumpála a dhéanann difear do chinneadh an phraghais onnmhairiúcháin, agus lena líomhnaítear earráidí follasacha measúnaithe i ndiúltú an Choimisiúin d’éileamh an iarratasóra maidir le heintiteas eacnamaíoch aonair a bheith ann a bhfuil baint ag an iarratasóir agus a chuideachta ghaolmhar leis san Áise Thoir Theas.

—

Sa dara saincheist dlí, maíonn an t-iarratasóir gur mhainnigh an Coimisiún comparáid chóir a dhéanamh idir an gnáthluach agus an praghas onnmhairiúcháin mar a cheanglaítear le hAirteagal 2(10) den bhun-Rialachán frithdhumpála, le coigeartú anuas gan údar ar chostais agus ar bhrabús ó phraghas onnmhairiúcháin an iarratasóra, rud a líomhnaíonn an Coimisiún go mícheart bunaithe ar Airteagal 2(10)(i) den bhun-Rialachán frithdhumpála.

Áitíonn an t-iarratasóir freisin earráidí follasacha measúnaithe i ndiúltú an Choimisiúin d’eintiteas eacnamaíoch aonair a bheith ann idir an t-iarratasóir agus a chuideachta ghaolmhar san Áise Thoir Theas, ag tabhairt aghaidh ar na gnéithe, a d’agair an Coimisiún don diúltú sa Rialachán atá faoi chonspóid.

3.

An tríú saincheist dlí lena n-éilítear sárú ar phrionsabal an dea-riaracháin ag an gCoimisiún, a líomhnaítear gur chuir sé dualgas cruthúnais míréasúnta ar an iarratasóir. Maíonn an t-iarratasóir freisin gur sáraíodh an riail maidir le comparáid chóir in Airteagal 2(10) den bhun-Rialachán frithdhumpála, ós rud é go líomhnaítear nár chuir an Coimisiún costais réasúnta díola, ghinearálta agus riaracháin san áireamh i ngnáthluach ríofa an iarratasóra.

—

Sa tríú saincheist dlí, maíonn an t-iarratasóir gur fhorchuir an Coimisiún ualach míréasúnta air, trína cheangal ar an iarratasóir faisnéis níos mionsonraithe a sholáthar maidir le foinse sonraí tríú tír ná mar atá ina sheilbh ag an gCoimisiún féin.

Braitheann an t-iarratasóir ar chásdlí le déanaí, a ndearna an Coimisiún féin agóid ina choinne. Agraíonn an t-iarratasóir prionsabal an dea-riaracháin, agus an prionsabal maidir le comparáid chóir a chumhdaítear in Airteagal 2(10) den bhun-Rialachán frithdhumpála.