1)

An gcaithfear prionsabail dhlí an Aontais maidir leis an gceart chun dea-riaracháin, a chumhdaítear in Airteagal 41 den Chairt um Chearta Bunúsacha an Aontais Eorpaigh (‘an Chairt’), agus an ceart chun leigheas éifeachtach agus triail chóir a fháil, a ráthaítear in Airteagal 47 den Chairt, agus prionsabal na deimhneachta dlíthiúla a leagtar amach i mbrollach Chonradh an Aontais, a léiriú sa chaoi nach gcuirtear cosc leo ar roinnt forálacha reachtacha náisiúnta, eadhon: Airteagal 127, mír 5, b) agus Airteagal 127 mír 6 den az adóigazgatási rendtartásról szóló 2017. évi CLI. törvény (Dlí CLI 2017 maidir le Riarachán Cánach); ‘an Dlí maidir le Riarachán Cánach’) – nó leis an gcleachtas náisiúnta maidir leis na forálacha sin a léiriú agus a chur i bhfeidhm, ar dá réir, i gcás ina gcinneann an t-údarás cánach ag an dara céim bearta a dhéanamh chun na fíorais a chur i gcrích agus, sa chomhthéacs sin, go n-ordaíonn sé don údarás cánach céadchéime –gan rialú ar thuillteanais an cháis – na bearta nós imeachta is gá chun na críche sin a chur i gcrích, rud a chuireann ar an duine inchánach áitimh fhorlíontacha a chur isteach agus tréimhse cúig lá oibre a thabhairt dó chun na críche sin, cé nach bhforáiltear leis an Dlí maidir le Riarachán Cánach ná le haon fhoráil eile maidir le nós imeachta cánach do choincheap maidir le ‘háitimh fhorlíontacha’ agus nach leagtar síos an teorainn ama le haghaidh na n-áitimh forlíontach sin leis an Dlí maidir le Riarachán cánach agus gur de rogha an údaráis cánach chéadchéime féin é an tréimhse cúig lá oibre chun iad a chur isteach a shocrú?

2)

An gcaithfear prionsabail dhlí an Aontais maidir leis an gceart chun dea-riaracháin, a chumhdaítear in Airteagal 41 den Chairt, agus an ceart chun leigheas éifeachtach agus triail chóir a fháil, a ráthaítear in Airteagal 47 den Chairt, agus prionsabal na deimhneachta dlíthiúla, a leagtar amach i mbrollach Chonradh an Aontais, a léiriú sa chaoi nach gcuirtear cosc leo ar chóras nach bhforáiltear le hAirteagal 127, mír 5, b) agus Airteagal 127 mír 6 den Dlí maidir le Riarachán Cánach go dtabharfaí fógra don duine inchánach maidir le cinneadh eatramhach an údaráis cánach ag an dara céim, lena n-ordaítear na cinntí fíorais a chur i gcrích; sa chás nach bhfuil forálacha sa dlí sin lena leagtar síos cearta agus cumhachtaí an duine inchánach maidir le cinneadh breise a dhéanamh maidir leis na fíorais, ná maidir leis an nós imeachta atá le leanúint chun na cearta sin a fheidhmiú agus an tréimhse chun amhlaidh a dhéanamh, agus nach sonraítear leis an dlí sin cumhachtaí agus oibleagáidí na n-údarás cánach ach oiread?

3)

An bhfuil prionsabail dhlí an Aontais maidir leis an gceart chun dea-riaracháin, a chumhdaítear in Airteagal 41 den Chairt, agus an ceart chun leigheas éifeachtach agus triail chóir a fháil, a ráthaítear in Airteagal 47 den Chairt, chomh maith leis na cearta cosanta a aithnítear don duine inchánach agus prionsabal chomhionannas na n-arm, le léiriú sa chaoi nach gcuirtear cosc leo ar reachtaíocht agus ar chleachtas náisiúnta faoina ndeonaíonn an t-údarás cánach tréimhse cúig lá oibre don duine inchánach chun a bharúlacha a chur isteach (trí ‘áitimh forlíontacha’) i gcomhthéacs an nós imeachta chun cinneadh breise a dhéanamh maidir leis na fíorais, cé go bhforáiltear le hAirteagal 127, mír 6 den Dlí maidir le Riarachán Cánach do thréimhse 90 lá chun na fíorais a chinneadh, tréimhse nach n-áirítear sa tréimhse 60 lá faoina gcaithfear an nós imeachta achomhairc a sheoladh?