IARSCRÍBHINN

CONAS IARRATAS A DHÉANAMH?

Iarrtar ar iarrthóirí a n-iarratais a sheoladh chuig an seoladh ríomhphoist seo a leanas:

Chairpersonrecruitment@eba.europa.eu faoi 23.59 (Am Lár na hEorpa) ar an dáta deiridh.

Tabharfar neamhaird ar iarratais a chuirfear isteach ar aon mhodh eile nó tar éis an spriocdháta. Moltar go láidir d’iarrthóirí gan fanacht go dtí an nóiméad deireanach toisc go bhféadfadh trácht trom idirlín nó fadhbanna maidir le nascadh leis an idirlíon a bheith ina gcúis le deacrachtaí agus iad ag cur a n-iarratas isteach. Ní féidir an locht a chur ar ÚBE as moill ar bith de bharr na ndeacrachtaí sin.

Ní ghlacfar ach le hiarratais atá comhlánaithe go hiomlán agus ní bhreithneofar ach iadsan amháin, i.e.:

—	Curriculum vitae i mBéarla, i bhformáid Eorpach más féidir é. AGUS

—	Litir inspreagtha i mBéarla, agus dáta agus síniú uirthi, nach mó ná dhá leathanach, ina mínítear an fáth a bhfuil spéis agat sa phost agus an breisluach a thabharfá do ÚBE dá roghnófaí thú.

Ag an gcéim seo, ná seol doiciméid tacaíochta (cóipeanna de chártaí aitheantais, pasanna, dioplómaí, etc.). Ní mór doiciméid tacaíochta a chur isteach ag céim níos déanaí den nós imeachta nuair a iarrfar sin ort.

Ba cheart d’iarrthóirí a mheas agus a sheiceáil sula gcuirfidh siad a n-iarratas isteach an gcomhlíonann siad na ceanglais uile a shonraítear san fhógra folúntais, go háirithe ó thaobh cáilíochtaí agus taithí oibre ábhartha de. Ní mór na ceanglais sin a chomhlíonadh faoin spriocdháta chun iarratais a chur isteach.

Tabhair ar aird gur i mBéarla, ar an ríomhphost, a dhéanfar an comhfhreagras go léir, agus mar sin ba cheart d’iarrthóirí a chinntiú go bhfuil an seoladh ríomhphoist ceart agus go ndéantar é a sheiceáil go rialta.

Aithneofar an seoladh a luaitear san iarratas mar chruthúnas cónaithe atá le húsáid chun aisíocaíochtaí taistil a shainiú, etc. (más infheidhme).

COTHROMAS, ÉAGSÚLACHT AGUS CUIMSIÚ

Is fostóir comhdheiseanna é ÚBE, atá tiomanta do lucht saothair éagsúil, cumasach a earcú, a fhorbairt agus a choinneáil trí chloí le prionsabail an chomhionannais deiseanna agus na neamhchlaontachta. Chuige sin, cuireann ÚBE fáilte chroíúil roimh iarratais ó gach iarrthóir cáilithe, beag beann ar aois, féiniúlacht inscne nó léiriú inscne, gnéaschlaonadh nó féiniúlacht ghnéis, míchumas, bunús eitneach nó sóisialta, reiligiún nó creideamh, agus cúlra cultúrtha. Tá baill foirne uile ÚBE tiomanta do chultúr oscailte, cuimsitheach san ionad oibre a chothú. Spreagann ÚBE iarratais ó mhná ar phoist ina bhfuil siad tearcionadaithe faoi láthair.

Má theastaíonn aon socruithe speisialta uait le linn an nós imeachta roghnúcháin a bhaineann le míchumas fisiceach, meabhrach, intleachtúil nó céadfach, cuir é sin in iúl i d’iarratas, agus rachaidh an Rannóg Acmhainní Daonna i dteagmháil leat chun aon choigeartuithe nó socruithe is gá a dhéanamh maidir le do mhíchumas, ionas gur féidir do rannpháirtíocht iomlán, chomhionann sa phróiseas roghnúcháin a chinntiú.

Is eagraíocht atá cláraithe le EMAS é UBÉ agus mar sin tá sé tiomanta do bheith seasta ag feabhsú a fheidhmíochta comhshaoil agus ag laghdú a loirg carbóin.

SOCHAIR

Mairfidh do chonradh cúig bliana agus ní féidir síneadh ama a chur leis ach uair amháin, go ceann tréimhse bhreise cúig bliana.

Earcófar thú mar Ghníomhaire sealadach 2(a) i ngrád riarthóra (AD) 15 , i gcéim 1 nó i gcéim 2 (le buntuarastal EUR 20 536,29 i gcéim 1 nó EUR 21 399,27 i gcéim 2), faoi réir athbhreithniú bliantúil ar an luach saothair dá bhforáiltear in Airteagal 64 agus in Airteagal 65(1) de na Rialacháin Foirne . Tá tuarastail faoi réir cháin an Aontais a asbhaintear ag an bhfoinse, agus tá siad díolmhaithe ó chánachas náisiúnta.

Anuas ar an mbuntuarastal , beidh tú i dteideal comhéifeacht cheartúcháin is infheidhme maidir leis an bhFrainc (114,2 % faoi láthair) a fháil, rud a léiríonn dálaí maireachtála na cathrach.

Beidh tú i dteideal liúntas bainistíochta (4,2 % den bhuntuarastal) a fháil faoi réir chur i gcrích rathúil na tréimhse promhaidh naoi mí.

D’fhéadfá a bheith i dteideal teidlíochtaí sonracha , ag brath ar an staid teaghlaigh agus ar an áit bhunaidh, mar seo a leanas: liúntas easaoránachta (16 % den bhuntuarastal), liúntas teaghlaigh, liúntas linbh chleithiúnaigh, liúntas oideachais, liúntas réamhscoile, liúntas suiteála, aisíocaíocht na gcostas aistrithe, liúntas cothaithe laethúil sealadach tosaigh, agus sochair eile.

Tabharfar cumhdach cuimsitheach árachais sláinte duit: tá cumhdach an-leathan ar sheirbhísí cúraim sláinte, chomh maith le tionóiscí agus máithreachas, á chur ar fáil faoin gComhscéim Árachais Breoiteachta.

Bainfidh tú tairbhe freisin as cothromaíocht oibre is saoil le solúbthacht ó thaobh teilea-oibre de, deiseanna foghlama agus forbartha amhail oiliúint teanga, chomh maith le lánpháirtiú sóisialta (amhail clubanna Sóisialta agus Spóirt ÚBE), áiseanna ceaintín, ranníocaíocht airgeadais i leith seirbhísí iompair phoiblí agus rochtain saor in aisce do leanaí ar an scoil Eorpach i bPáras.

Féadfaidh tú tairbhe a bhaint as Scéim Pinsin an Aontais Eorpaigh (tar éis 10 mbliana seirbhíse).

CAD É AN NÓS IMEACHTA ROGHNÚCHÁIN?

Bunófar Bord Réamhroghnúcháin  (1) chun anailís a dhéanamh ar dhoiciméid iarratais na n-iarrthóirí maidir leis na critéir incháilitheachta agus roghnúcháin.

Maidir le hiarrthóirí nach gcomhlíonann gach ceann de na critéir incháilitheachta, eisiafar iad ón bpróiseas roghnúcháin. Ina dhiaidh sin, déanfar iarrthóirí incháilithe a scóráil de réir na gcritéar bunriachtanach. Déanfar iad siúd a chomhlíonann na critéir bhunriachtanacha go léir a scóráil in aghaidh na gcritéar buntáisteach. Ní dhéanfar measúnú breise ar na hiarrthóirí nach gcomhlíonfaidh na critéir bhunriachtanacha go léir.

Dréachtóidh an Bord Réamhroghnúcháin liosta ar a mbeidh suas le deichniúr (10) iarrthóirí (2), arb iad na hiarrthóirí is fearr iad a chomhfhreagraíonn don phróifíl atá á lorg le haghaidh agallaimh.

Tar éis na n-agallamh, cuirfidh an Bord Réamhroghnúcháin réamh-ghearrliosta ar a mbeidh suas le seisear (6) de na hiarrthóirí is oiriúnaí agus tuarascáil mheasúnaithe faoi bhráid Bhord Maoirseoirí ÚBE .

Ansin iarrfar ar na hiarrthóirí sin ar an réamh-ghearrliosta cur i láthair ar ábhar réamhshainithe a thabhairt do Bhord Maoirseoirí ÚBE, agus cuirfear faoi agallamh iad ina dhiaidh sin.

Ar an lá céanna a dhéanfar an cur i láthair agus na hagallaimh. Cuirfear topaic an chuir i láthair in iúl do na hiarrthóirí ar an réamh-ghearrliosta sa chuireadh chun agallaimh leis an mBord Maoirseoirí. Cuirfidh an Bord Maoirseoirí gearrliosta le chéile de na hiarrthóirí is cáilithe do phost Chathaoirleach ÚBE, le cúnamh ón gCoimisiún Eorpach.

Cuirfidh ÚBE an gearrliosta faoi bhráid Pharlaimint na hEorpa agus Chomhairle an Aontais Eorpaigh. Ceapfar Cathaoirleach an ÚBE ag an gComhairle tar éis do Pharlaimint na hEorpa an ceapachán a dheimhniú. Ní hionann áit ar an ngearrliosta agus ráthaíocht go gceapfar duine. Ba cheart d’iarrthóirí a thabhairt faoi deara go bhféadfadh an gearrliosta a bheith poiblí.

D'fhéadfadh sé go mbeadh ar iarrthóirí tabhairt faoi agallaimh bhreise agus/nó tástálacha breise a dhéanamh, sa bhreis ar a bhfuil thuasluaite.

OIBLEAGÁIDÍ EITICE

Tá neamhspleáchas agus ardchaighdeáin ó thaobh iompar gairmiúil de ríthábhachtach chun ardchaighdeáin agus barr feabhais a áirithiú d’obair ÚBE (3). Déanann an Ghníomhaireacht a dícheall freisin a áirithiú nach bhfuil aon leasanna ag a baill foirne a d’fhéadfadh difear a dhéanamh dá neamhchlaontacht.

I gcomhréir le hAirteagal 11 agus Airteagal 11a de na Rialacháin Foirne (RF) agus Airteagal 11 de Choinníollacha Fostaíochta Sheirbhísigh Eile an Aontais Eorpaigh (CEOS), ceanglófar ar na hiarrthóirí a n-éireoidh leo áit a fháil ar an réamh-ghearrliosta dearbhú a dhéanamh maidir le coinbhleacht leasa roimh an agallamh leis an mBord Maoirseoirí. Go háirithe, ceanglófar ar na hiarrthóirí atá ar an réamh-ghearrliosta a dhearbhú go bhfuil siad tiomanta do ghníomhú go neamhspleách ar mhaithe le leas an phobail agus dearbhú a dhéanamh maidir le haon leas a d’fhéadfaí a mheas a bheith dochrach dá neamhspleáchas, rud a scrúdófar i gcomhréir le Creat Eitice ÚBE. Ní mór do gach iarratasóir a dheimhniú, sa dearbhú a chuirfidh sé nó sí isteach lena iarratas nó lena hiarratas, go bhfuil sé nó sí toilteanach a bheith comhlíontach i gcás ina n-éireoidh leis nó léi an post a fháil.

Ina theannta sin, beidh an t-iarrthóir a n-éireoidh leis nó léi faoi cheangal rúndacht ghairmiúil agus ceanglais rúndachta agus é nó í ag obair in ÚBE, agus tar éis dó nó di imeacht ó ÚBE.

Ceanglaítear ar iarbhaill foirne imréiteach a lorg ó ÚBE sula rachaidh siad i mbun gníomhaíocht eile go ceann dhá bhliain tar éis dóibh an Ghníomhaireacht a fhágáil. Má bhaineann an ghníomhaíocht sin leis an obair a rinneadh le linn na trí bliana dheireanacha seirbhíse ag ÚBE, agus má chreideann ÚBE go bhféadfadh coinbhleacht le leasanna dlisteanacha UBÉ a bheith ina thoradh uirthi, féadfaidh an Ghníomhaireacht a formheas a thabhairt faoi réir aon choinníollacha is cuí léi, nó cosc a chur ar an ngníomhaíocht (4).

COSAINT SONRAÍ

Áirithíonn ÚBE go bpróiseálfar sonraí pearsanta na n-iarrthóirí mar a cheanglaítear le Rialachán (AE) 2018/1725 (5). Baineann sé sin go háirithe le rúndacht agus le slándáil na sonraí sin. I gcomhair tuilleadh eolais faoin gcaoi a bpróiseálfar sonraí pearsanta, iarrtar ar iarrthóirí féachaint ar an bhFógra um Chosaint Sonraí.

I gCÁS GEARÁIN AGUS ACHOMHAIRC

I gcás iarrthóirí a mheasann go ndearnadh dochar dá leasanna le haon chinneadh a bhaineann leis an nós imeachta roghnúcháin, féadfaidh siad na gníomhaíochtaí seo a leanas a dhéanamh:

Iarraidh ar athbhreithniú ar na cinntí a rinne an Coiste Réamhroghnúcháin

Laistigh de 10 lá féilire ó dháta na litreach lena gcuirtear in iúl don iarrthóir an cinneadh a rinne an Coiste Roghnúcháin, féadfaidh sé nó sí iarraidh i scríbhinn ar athbhreithniú ar an gcinneadh sin, ina leagfar amach na cúiseanna atá leis an iarraidh, a chur chuig an seoladh ríomhphoist seo a leanas: EBA-vacancies@eba.europa.eu

Achomhairc

a)

Féadfaidh an t-iarrthóir gearán a dhéanamh faoi Airteagal 90(2) de na Rialacháin Foirne laistigh de na teorainneacha ama dá bhforáiltear, ag an seoladh seo a leanas: An Stiúrthóir Feidhmiúcháin An tÚdarás Baincéireachta Eorpach An nós imeachta roghnúcháin: Tagairt: ÚBE TA-01-2025 DEFENSE 4 – EUROPLAZA 20 Avenue André Prothin CS 30154 92927 Paris La Défense CEDEX An Fhrainc

b)

Féadfaidh an t-iarrthóir achomharc breithiúnach a chur faoi bhráid na Cúirte Ginearálta faoi Airteagal 270 den Chonradh ar Fheidhmiú an Aontais Eorpaigh agus faoi Airteagal 91 de na Rialacháin Foirne. I gcomhair sonraí maidir le conas achomharc a dhéanamh, féach ar shuíomh gréasáin na Cúirte Ginearálta: http://curia.europa.eu/.

Gearán a dhéanamh leis an Ombudsman Eorpach

Is féidir gearán a dhéanamh leis an Ombudsman Eorpach freisin de bhun Airteagal 228(1) den Chonradh ar Fheidhmiú an Aontais Eorpaigh agus i gcomhréir leis na coinníollacha a leagtar síos sa Chinneadh ó Pharlaimint na hEorpa an 9 Márta 1994 maidir leis na Rialacháin Foirne agus na coinníollacha ginearálta lena rialaítear comhlíonadh dhualgais an Ombudsman (6). I gcomhair sonraí maidir le conas gearán a dhéanamh, féach ar shuíomh gréasáin an Ombudsman Eorpaigh:

http://www.ombudsman.europa.eu/.

Tabhair do d’aire nach bhfuil aon éifeacht fionraíochta ag gearáin a dhéantar leis an Ombudsman Eorpach ar an tréimhse a leagtar síos in Airteagal 90(2) agus in Airteagal 91 de na Rialacháin Foirne, faoi seach, maidir le gearán nó achomharc a thaisceadh leis an gCúirt Ghinearálta. Thairis sin, faoi Airteagal 2(4) de na coinníollacha ginearálta lena rialaítear feidhmíocht dhualgais an Ombudsman Eorpaigh, ní mór gur leanadh na cineálacha cur chuige cuí riaracháin atá i bhfeidhm sna hinstitiúidí agus sna comhlachtaí lena mbaineann sula bhféadfar aon ghearán a dhéanamh leis an Ombudsman Eorpach.

---

(1)  Tabhair do d’aire go bhfuil obair agus plé an Bhoird Réamhroghnúcháin faoi rún daingean agus go bhfuil cosc iomlán ar aon teagmháil a dhéanamh lena bhaill. Cuirfear comhdhéanamh an Bhoird Réamhroghnúcháin in iúl d’iarrthóirí a dtabharfar cuireadh chun agallaimh dóibh.

(2)  I gcás feidhmíocht chomhionann, déanfar líon na n-iarrthóirí a choigeartú dá réir.

(3)  Tá tuilleadh eolais faoi na ceanglais eitice, lena n-áirítear Treoir Eitice ÚBE, beartas maidir le coinbhleachtaí leasa agus an Cód um Dhea-Iompraíocht Riaracháin le fáil ag https://www.eba.europa.eu/about-us/organisation-and-governance/accountability/ethics-eba.

(4)  Tá tuilleadh eolais maidir le gníomhaíochtaí gairme tar éis ÚBE a fhágáil, lena n-áirítear treoir maidir leis an gcaoi a ndéantar measúnú ar shrianta agus toirmisc iarfhostaíochta, le fáil ag https://www.eba.europa.eu/about-us/organisation-and-governance/accountability/ethics-eba/occupational-activities-after.

(5)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39).

(6)  Cinneadh 94/262/CEGC, EC, Euratom ó Pharlaimint na hEorpa an 9 Márta 1994 maidir leis na rialacháin agus na coinníollacha ginearálta lena rialaítear comhlíonadh dhualgais an Ombudsman (IO L 113, 4.5.1994, lch. 15).