Faoi chuimsiú an Chomhaontaithe lena mbunaítear Comhlachas idir an tAontas Eorpach agus a Bhallstáit, ar thaobh amháin, agus Meiriceá Láir (1) ar an taobh eile (2), chuir údaráis Chósta Ríce tásc geografach breise i láthair atá le cur leis na tásca geografacha a liostaítear in Iarscríbhinn XVIII a ghabhann leis an gComhaontú, chun iad a chosaint san Aontas. Tá measúnú á dhéanamh ag an gCoimisiún faoi láthair maidir le cé acu ba cheart nó nár cheart an tásc geografach sin a chosaint san Aontas.

Iarrann an Coimisiún ar aon Bhallstát nó ar aon tríú tír nó ar aon duine nádúrtha nó dlítheanach a bhfuil leas dlisteanach aige ann, atá ina chónaí i mBallstát nó i dtríú tír nó atá bunaithe i mBallstát nó i dtríú tír agóidí in aghaidh na cosanta sin a chur isteach trí ráiteas cuí-réasúnaithe a thaisceadh.

Ní mór na ráitis freasúra a bheith faighte ag an gCoimisiún laistigh de 2 mhí ó dháta an fhoilsithe seo. Ba cheart ráitis freasúra a chur chuig an seoladh ríomhphoist seo a leanas:

AGRI-THE-AMERICAS@ec.europa.eu

Ní dhéanfar scrúdú ar ráitis freasúra ach amháin má fhaightear laistigh den teorainn ama a leagtar amach thuas iad agus má léirítear an méid seo a leanas iontu:

1.	bheadh cosaint an ainm atá beartaithe ar neamhréir le hainm cineáil planda nó póir ainmhí agus mar gheall air sin gur dócha go gcuirfeadh sé an tomhaltóir amú maidir le fíorthionscnamh an táirge;

2.

go mbeadh an t-ainm a mholtar comhainmneach go hiomlán nó i bpáirt: a. le hainm atá faoi chosaint san Aontas cheana faoi Rialachán (AE) 2024/1143 ó Pharlaimint na hEorpa agus ón gComhairle (3); nó b. le ceann de na tásca geografacha ó thíortha nach Ballstáit den Aontas iad atá faoi chosaint san Aontas faoi chomhaontuithe déthaobhacha a bhfuil fáil orthu ag an seoladh seo a leanas: https://www.tmdn.org/giview/;

3.	i bhfianaise an chlú agus na cáile atá ar thrádmharc agus an fad atá sé in úsáid, go mbeadh an baol ann go gcuirfeadh cosaint an ainm atá beartaithe an tomhaltóir amú maidir le fíorchéannacht an táirge;

4.	go gcuirfeadh cosaint an ainm atá beartaithe an méid seo a leanas i mbaol: a. ainm atá comhionann ina iomláine nó i bpáirt a bheith ann, b. trádmharc a bheith ann, c. nó táirgí a bheith ann atá ar an margadh go dleathach le 5 bliana ar a laghad roimh dháta foilsithe an fhógra seo;

5.	leis na sonraí atá iontu, is féidir a chinneadh gur ainm cineálach é an t-ainm a bhfuil cosaint á meas ina leith.

Cuirfear na critéir dá dtagraítear thuas i bhfeidhm i ndáil le críoch an Aontais, nach dtagraíonn, i gcás cearta maoine intleachtúla, ach don chríoch nó do na críocha ina gcosnaítear na cearta sin. Tá cosaint na n-ainmneacha sin ar deireadh san Aontas faoi réir thabhairt i gcrích rathúil na caibidlíochta agus an ghnímh dhlíthiúil ina dhiaidh sin.

Liosta na dtásc geografach  (4)

Níl	An chatagóir táirgí agus tuairisc ghairid	Ainm faoi chosaint i gCósta Ríce
1.	Cáis	Queso Turrialba

---

(1)  Cósta Ríce, an tSalvadóir, Guatamala, Hondúras, Nicearagua agus Panamaa.

(2)   IO L 346 an 15.12.2012, lch. 3.

(3)  Rialachán (AE) 2024/1143 ó Pharlaimint na hEorpa agus ón gComhairle an 11 Aibreán 2024 maidir le tásca geografacha le haghaidh fíona, deochanna biotáilleacha agus táirgí talmhaíochta, chomh maith le sainearraí traidisiúnta faoi ráthaíocht agus téarmaí roghnacha cáilíochta le haghaidh táirgí talmhaíochta, lena leasaítear Rialacháin (AE) Uimh. 1308/2013, (AE) 2019/787 agus (AE) 2019/1753 agus lena n-aisghairtear Rialachán (AE) Uimh. 1151/2012 (IO L, 2024/1143, 23.4.2024, ELI: http://data.europa.eu/eli/reg/2024/1143/oj).

(4)  Liosta de na tásca geografacha a sholáthair údaráis Chósta Ríce faoi chuimsiú imeachtaí de réir Airteagal 247 den Chomhaontú.