Breithiúnas na Cúirte Breithiúnais (an Séú Dlísheomra) an 23 Eanáir 2025 (iarraidh ar réamhrialú ón Bundesgerichtshof – an Ghearmáin) – Bundesverband der Verbraucherzentralen und Verbraucherverbände – Verbraucherzentrale Bundesverband e.V. v NEW Niederrhein Energie und Wasser GmbH

(Cás C-518/23  (1) , NEW Niederrhein Energie und Wasser)

(Tarchur chun réamhrialú - Cosaint tomhaltóirí - Cleachtais trádála éagóracha - Treoir 2005/29/CE - Airteagal 7 - Easnaimh mhíthreoracha - Cuireadh chun ceannaigh - Faisnéis ábhartha - Faisnéis atá le soláthar don tomhaltóir maidir leis an gcaoi a ríomhtar an praghas - Tairiscint ar líne chun leictreachas a sholáthar - Ionsamhlóir taraife - Léiriú ar mhéadú céatadáin ar an bpraghas do thomhaltóirí)

(C/2025/1516)

Teanga an cháis: an Ghearmáinis

An chúirt a rinne an tarchur

Bundesgerichtshof

Páirtithe sna príomhimeachtaí

Iarratasóir: Bundesverband der Verbraucherzentralen und Verbraucherverbände - Verbraucherzentrale Bundesverband e.V.

Cosantóir: NEW Niederrhein Energie und Wasser GmbH

An chuid oibríochtúil

Maidir le hAirteagal 7(1) agus (4)(c) de Threoir 2005/29/CE ó Pharlaimint na hEorpa agus ón gComhairle an 11 Bealtaine 2005 maidir le cleachtais tráchtála éagóracha idir gnólachtaí agus tomhaltóirí sa mhargadh inmheánach agus lena leasaítear Treoir 84/450/CEE ón gComhairle, Treoracha 97/7/CE, 98/27/CE agus 2002/65/CE ó Pharlaimint na hEorpa agus ón gComhairle agus Rialachán (CE) Uimh. 2006/2004 ó Pharlaimint na hEorpa agus ón gComhairle (‘an Treoir maidir le cleachtais tráchtála éagóracha’),

ní mór léiriú a dhéanamh mar seo a leanas:

i gcás cuireadh chun ceannaigh arna dhéanamh trí mhodh cumarsáide tráchtála ar líne, ní gá go mbeadh san fhaisnéis a bhaineann leis an gcaoi a ríomhtar an praghas an céatadán cruinn de chomhpháirt athraitheach amhail méid an chúitimh a chuireann an soláthróir leictreachais i bhfeidhm ar an tomhaltóir lena mbaineann, ionas gur féidir leis an tomhaltóir, a luaithe is eol dó a thomhaltas leictreachais, an praghas sin a ríomh go neamhspleách, ar choinníoll go léirítear san fhógra sin infheidhmeacht an chéatadáin sin i bprionsabal, in éineacht le haon ordú méide agus eilimintí a dhéanann difear dó, rud a chuireann ar chumas an mheántomhaltóra cinneadh idirbhirt eolach a dhéanamh.

---

(1)  IO C, C/2023/641.