European flag

Iris Oifigiúil
an Aontais Eorpaigh

GA

Sraith C


C/2025/473

22.1.2025

Foilsiú leasaithe chaighdeánaigh fhormheasta ar shonraíocht táirge le haghaidh ainmniúchán tionscnaimh faoi chosaint nó tásc geografach faoi chosaint san earnáil táirgí talmhaíochta agus táirgí bia, dá dtagraítear in Airteagal 6b(2) agus (3) de Rialachán Tarmligthe (AE) Uimh. 664/2014 ón gCoimisiún

(C/2025/473)

Foilsítear an teachtaireacht seo i gcomhréir le hAirteagal 6b(5) de Rialachán Tarmligthe (AE) Uimh. 664/2014 (1) ón gCoimisiún.

FORMHEAS AR LEASÚ CAIGHDEÁNACH AR AN TSONRAÍOCHT TÁIRGE LE hAGHAIDH AINMNIÚCHÁN TIONSCNAIMH FAOI CHOSAINT NÓ TÁSC GEOGRAFACH FAOI CHOSAINT DE THIONSCNAMH BALLSTÁIT A CHUR IN IÚL

‘Focaccia di Recco col formaggio’

Uimh. AE: PGI-IT-0944-AM01 - 30 Deireadh Fómhair 2024

ATFC ( ) TGFC (X)

1.   Ainm an táirge

‘Focaccia di Recco col formaggio’

2.   Ballstát ar leis an limistéar críochaithe

An Iodáil

3.   Údarás an Bhallstáit a bhfuil an leasú caighdeánach á chur in iúl aige

MASAF [Aireacht Talmhaíochta, Biafhlaithis agus Foraoiseachta]

4.   Tuairisc ar an leasú (nó ar na leasuithe) formheasta

Míniú ar an gcúis a dtagann an leasú (nó na leasuithe) faoin sainmhíniú ar leasú caighdeánach dá ndéantar foráil in Airteagal 53(2) de Rialachán (AE) Uimh. 1151/2012

Is leasuithe caighdeánacha iad sa mhéid nach bhfuil i gceist leo athrú ar an ainm, nach bhfuil baol ann go n-athrófar an nasc leo agus nach mbeidh méadú ar na srianta ar thrádáil sa táirge dá mbarr.

1.

Baineann an leasú seo le hAirteagal 2 den tsonraíocht táirge agus le pointe 3.2 den doiciméad aonair maidir le toisí an táirge.

An leagan atá ann faoi láthair:

‘Cruth dronuilleogach: Taobh fada: 120 cm ar a mhéad; Taobh gearr: 25 cm ar a laghad’

Leagan nua:

‘Cruth dronuilleogach: Taobh fada: 120 cm ar a mhéad; Taobh gearr: 13 cm ar a laghad’

Cúis:

I bhfianaise an mhéadaithe atá ag teacht ar éileamh an mhargaidh ar TGFC ‘Focaccia di Recco col formaggio’, lena n-áirítear i sciartha aonair, tá sé tábhachtach do tháirgeoirí a soláthar a oiriúnú ionas gur féidir leo an sciar sin de na tomhaltóirí a chumhdach freisin, sciar atá ag fás go tapa.

Chuige sin, déantar an cruth dronuilleogach a choigeartú trí thoisí an taoibh is giorra a athrú.

Déanann an leasú sin difear don doiciméad aonair.

2.

Baineann an leasú le hAirteagal 5, pointí 5.1 agus 5.2 den tsonraíocht táirge agus le pointe 3.3 den doiciméad aonair a mhéid a bhaineann le hamhábhair

Sa tsonraíocht agus sa doiciméad aonair:

An leagan atá ann faoi láthair:

‘5.1 Le táirgthe “Focaccia di Recco col formaggio” baintear úsáid as: plúr cruithneachta boige de chineál “00” ag a bhfuil na saintréithe seo a leanas: W: > 300; P/L: nach lú ná 0,50 nó, de rogha air sin, plúr de chineál Manitoba 00;’

Leagan nua:

‘Le modh táirgthe “Focaccia di Recco col formaggio”, baintear úsáid as: plúr cruithneachta boige ag a bhfuil na saintréithe seo a leanas: W: > 300; P/L: nach lú ná 0,50 nó plúr Manitoba mar mhalairt air sin;’

Leis an bhforbairt ar theicnící táirgthe plúir, tá plúr ar fáil ar an margadh anois atá oiriúnach chun ‘Focaccia di Recco col formaggio’ a tháirgeadh, fiú mura cineál 00 é, agus na saintréithe fíor-riachtanacha is gá fós á gcoinneáil, amhail: W: > 300; P/L: plúr cruithneachta boige ag a bhfuil P/L nach lú ná 0,50 nó plúr Manitoba mar mhalairt air sin.

Déanann an leasú sin difear don doiciméad aonair.

3.

Baineann an leasú seo le hAirteagal 5, pointe 5.1 den tsonraíocht táirge agus pointe 3.3 den doiciméad aonair maidir le cruth, toisí agus mais an táirge.

An leagan atá ann faoi láthair:

‘Ní mór na saintréithe seo a leanas a bheith ag an gcáis a úsáidtear chun “Focaccia di Recco col formaggio” a ullmhú:

Cruth: comhthreomharóid le taobhanna slíoctha.

Toisí: bun le taobhanna atá 15-20 cm agus 8-10 cm faoi seach; i dtéarmaí airde, sáil dhíreach le haghaidheanna cothroma 4-5 cm.

Meáchan: idir 0,7 kg agus 2 kg

Saintréithe an taois: bog ach beagán teann, uigeacht sheasmhach bhainniúil gan aon pholl.

Dath: bán, le himireacha snasta

Cion taise (ar bhonn fliuch): 57-60 %

Próitéiní (ar bhonn fliuch): 13-15 %

Saill (ar bhonn fliuch): 21-24 %

Cion saille (d’ábhar tirim): 48-60 %’

Leagan nua:

‘Ní mór na saintréithe seo a leanas a bheith ag an gcáis a úsáidtear chun “Focaccia di Recco col formaggio” a ullmhú:

Saintréithe an taois: bog ach beagán teann, uigeacht sheasmhach bhainniúil gan aon pholl.

Dath: bán, le himireacha snasta

Cion taise (ar bhonn fliuch): 57-60 %

Próitéiní (ar bhonn fliuch): 13-15 %

Cion saille (ar bhonn fliuch): 21-24 %

Cion saille (d’ábhar tirim): 48-60 %’

Cúis:

Tá gá leis an leasú seo anois mar cé go mbíonn na saintréithe céanna a mhéid a bhaineann le taos, dath, taise, próitéin agus cion saille ag an gcáis a úsáidtear chun ‘Focaccia di Recco col formaggio’ a tháirgeadh, is mó agus is mó a bhíonn sí ar an margadh i bhformáidí nach formáidí traidisiúnta iad.

Dá bhrí sin, cinneadh na paraiméadair a bhaineann le cruth, méid agus meáchan an táirge a bhaint.

Déanann an leasú sin difear don doiciméad aonair.

4.

Leasú a bhaineann le hAirteagal 5, pointe 5.2.4 den tsonraíocht táirge maidir leis an teocht chócaireachta le haghaidh an mhodha mhalartaigh ullmhúcháin

An leagan atá ann faoi láthair:

‘Modh malartach ullmhúcháin

De rogha air sin, is féidir “Focaccia di Recco col formaggio” a ullmhú ar dhiosca adhmaid gan imill, agus sraith thanaí de phlúr gráin bhuí croite air. Sa chás sin, chun an dá shraith taois a tháthú le chéile, ba cheart an dá fhlapa a fhilleadh chun imeall a dhéanamh. Sleamhnaítear an ullmhóid a dhéantar ar an gcaoi sin isteach san oigheann ansin.’

Leagan nua:

‘Modh malartach ullmhúcháin

De rogha air sin, is féidir “Focaccia di Recco col formaggio” a ullmhú ar dhiosca adhmaid gan imill, agus sraith thanaí de phlúr gráin bhuí croite air.

Sa chás sin, chun an dá shraith taois a tháthú le chéile, ba cheart an dá fhlapa a fhilleadh chun imeall a dhéanamh. Sleamhnófar an ullmhóid a dhéantar ar an gcaoi sin isteach san oigheann ansin, a fhéadfaidh a bheith ag teocht níos ísle ná an teocht a shonraítear sa mhír roimhe seo.’

Cúis:

Léiríodh le blianta seiceálacha go bhfuil, sa mhodh malartach ullmhúcháin, na teochtaí cócaireachta is fearr i gcásanna áirithe níos ísle ná na teochtaí a leagtar síos i bpointe 5.2.4. Dá bhrí sin, cinneadh é sin a chur sa tsonraíocht.

Ní dhéanann an leasú sin difear don doiciméad aonair.

DOICIMÉAD AONAIR

‘Focaccia di Recco col formaggio’

Uimh. AE: PGI-IT-0944-AM01 - 30 Deireadh Fómhair 2024

ATFC ( ) TGFC (X)

1.   Ainm nó ainmneacha (an ATFC nó an TGFC)

‘Focaccia di Recco col formaggio’

2.   Ballstát nó tríú tír

An Iodáil

3.   Tuairisc ar an táirge talmhaíochta nó táirge bia

3.1.   Cód Ainmníochta Comhcheangailte

—

19 - ULLMHÓIDÍ GRÁNACH, PLÚIR, STÁIRSE NÓ BAINNE; TÁIRGÍ CÓCAIRÍ TAOSRÁIN

1905 - Arán, taosrán, cácaí, brioscaí agus táirgí eile báicéirí, bíodh cócó iontu nó ná bíodh; abhlanna, capsúil fholmha de chineál atá oiriúnach d’úsáid chógaisíochta, sliseoga séalaithe, ríspháipéar agus táirgí comhchosúla

3.2.   Tuairisc ar an táirge lena mbaineann an t-ainm in (1)

Is táirge bácáilte in oigheann é ‘Focaccia di Recco col formaggio’ a dhéantar trí ola olóige úríon, salann agus uisce a chumasc isteach i dtaos plúir cruithneachta boige, a líontar ansin le cáis bhog úr.

Nuair a scaoiltear lena dtomhailt é, tá na saintréithe seo a leanas ag ‘Focaccia di Recco col formaggio’:

Cruth: ciorclach, cearnógach nó dronuilleogach.

tomhais:

—

cruth ciorclach: trastomhas íosta 25 cm,

—

cruth cearnógach: gach taobh idir 25 cm agus 120 cm ar fhad

—

cruth dronuilleogach: taobh fada: 120 cm ar a mhéad; taobh gearr: 13 cm ar a laghad,

—

airde: níos lú ná 1 cm arna tomhas ar na taobhanna

cuma:

—

dromchla: míchothrom, le bolgáin,

—

an chuid uachtarach: dath órga le paistí nó stríoca dúdhonna,

—

an chuid íochtarach: buí ómra, seachas bán

—

líonadh: cáis leáite ag a bhfuil uigeacht uachtarúil,

—

uigeacht nuair a dhéantar teagmháil leis: cuid uachtair grabhrógach agus bog taobh istigh.

Tá sé cumhra agus briosc sa bhéal, tá an taos saillte go héadrom agus boladh d’arán úr-chócaráilte agus de bhainne agus de cháis úr air, agus tá an cháis bog le ruainnín taitneamhach searbhais.

3.3.   Beatha (i gcás táirgí de thionscnamh ainmhíoch amháin) agus amhábhair (i gcás táirgí próiseáilte amháin)

Úsáidtear na comhábhair seo a leanas chun ‘Focaccia di Recco col formaggio’ a tháirgeadh:

—

plúr cruithneachta boige ag a bhfuil na saintréithe seo a leanas: W: > 300 P/L: nach lú ná 0,50 nó plúr Manitoba mar mhalairt air sin.

—

uisce nádúrtha,

—

ola olóige úríon,

—

salann mín,

—

cáis bhog úr.

Déantar an cháis a úsáidtear chun ‘Focaccia di Recco col formaggio’ a tháirgeadh as bainne bó paistéartha úr.

Níl aon srian geografach ar an áit ina ndéantar an bainne a phróiseáil.

Ní mór uigeacht uachtarúil gan aon uachtar breise a bheith ag an gcáis a úsáidtear chun ‘Focaccia di Recco col formaggio’ a líonadh agus ní mór di a bheith frithsheasmhach in aghaidh strus teasa agus í cócaráilte gan snáitheanna ná boilgeoga a chruthú ná meadhg a scaoileadh.

Ní mór na saintréithe seo a leanas a bheith ag an gcáis a úsáidtear chun ‘Focaccia di Recco col formaggio’ a ullmhú:

Tréithe an taois: bog, dlúth go híogair, bainniúil le huigeacht aonchineálach, saor ó shúile.

Dath: Bán, le himireacha snasta

Cion taise (ar bhonn fliuch): 57 % go 60 %

Próitéiní (ar bhonn fliuch): 13 % go 15 %

Cion saille (ar bhonn fliuch): 21 % go 24 %

Cion saille (d’ábhar tirim): 48 % go 60 %

3.4.   Céimeanna sonracha táirgthe nach mór a dhéanamh sa limistéar geografach sainithe

Ní mór na céimeanna uile a bhaineann le táirgeadh ‘Focaccia di Recco col formaggio’, ó ullmhú agus fuineadh an taois go líonadh agus cócaireacht, a dhéanamh sa limistéar geografach ar a dtugtar tuairisc i bpointe 4 thíos.

3.5.   Rialacha sonracha maidir le sliseadh, grátáil, pacáistiú, etc. an táirge dá dtagraíonn an t-ainm cláraithe

Is féidir ‘Focaccia di Recco col formaggio’ a mhargú ina iomláine nó i sciartha.

Tá cosc ar réamhchócaireacht, domhainreo, reo agus ar theicnící caomhnaithe eile.

3.6.   Rialacha sonracha maidir le lipéadú an táirge dá dtagraíonn an t-ainm cláraithe

Is féidir an táirge a shainaithint trí bhíthin lipéad a dhéantar as sliseog stáirse atá curtha i gceangal le sraith uachtair an taosráin. Ní mór ainm an táirge, ‘Focaccia di Recco col formaggio’ a bheith ar an lipéad in aice leis na focail ‘Tásc Geografach faoi Chosaint’, atá scríofa amach ina n-iomláine agus mar acrainm (TGFC).

4.   Sainmhíniú achomair ar an limistéar geografach

Tá limistéar táirgeachta ‘Focaccia di Recco col formaggio’ comhdhéanta de chríoch iomlán bhardas Recco agus de bhardais chomharsanacha Avegno, Sori agus Camogli.

5.   Nasc leis an limistéar geografach

Sainiúlacht an limistéir gheografaigh

Tá na bardais atá lonnaithe i limistéar táirgeachta ‘Focaccia di Recco col formaggio’ mar chuid den rud ar a dtugann staraithe áitiúla ‘gleann Recco’, crios a shíneann ó Mount Portofino san oirthear (bardas Camogli) go baile beag Sori san iarthar, lena n-áirítear bardas Recco, agus bardas Avegno sa tuaisceart.

Chuaigh báicéirí ceardaíochta ó Recco ar imirce chuig na limistéir sin agus thosaigh siad ag déanamh ‘Focaccia di Recco col formaggio’ sna 1960idí agus sna 1970idí tar éis thraidisiún Recco.

Éilítear leis an traidisiún go mbeidh na báicéirí ardoilte chun an taos a ullmhú. Déantar an taos a shíneadh ar dtús agus ansin é a fhuineadh de láimh go dtí go bhfaightear dhá leathán ar leithligh, an-tanaí agus beagnach trédhearcach. Sainiúlacht den limistéar geografach is ea an bealach speisialta sin chun an taos a ullmhú ina dhá leathán mhíne.

Sainiúlacht an táirge

Is éard atá in ‘Focaccia di Recco col formaggio’ dhá leathán an-tanaí a líontar le cáis. Is éasca idirdhealú amhairc a dhéanamh air ó chineálacha tipiciúla focaccia de thraidisiúin na hIodáile agus Liguria mar go bhfuil sé thar a bheith tanaí agus líonta le sraith de cháis leáite. Gné eile a bhaineann go sonrach le ‘Focaccia di Recco col formaggio’ is ea an cháis bhog taobh istigh de, a bhfuil uigeacht uachtarúil agus blas taitneamhach searbh uirthi.

Nasc cúisíoch idir an limistéar geografach agus cáilíocht nó saintréithe an táirge (i gcás ATFC) nó cáilíocht shonrach an táirge, an cháil atá air nó saintréith eile atá aige (i gcás TGFC)

Is fianaise iad na himeachtaí stairiúla atá tiomnaithe le blianta fada do ‘Focaccia di Recco col formaggio’ go bhfuil cáil air, mar aon le léirmheasanna móra a fhoilsítear in irisí agus i dtreoracha bia Iodálacha agus eachtrannacha, a thagraíonn ina dtuairisc ar an táirge do thaosrán mín agus do bhlas taitneamhach na cáise atá mar shaintréith dó.

Ceann de na himeachtaí is tábhachtaí ná ‘Festa della focaccia’ le linn na seachtaine deireanaí de mhí na Bealtaine, lenar tugadh an deis is fearr ó bhí 1955 ann ‘Focaccia di Recco col formaggio’ a cheiliúradh agus a bhlaiseadh.

Tá méadú as cuimse tagtha ar cháil ‘Focaccia di Recco col formaggio’ a bhuí lena láithreacht ag mórimeachtaí náisiúnta amhail ‘Salone del Gusto’ in Torino, imeacht ‘Cáis’ in Brà, ‘Artigiano in Fiera’ in Milano agus ‘Salone Nautico’ in Genova.

Ó thús na 1960idí, a bhuí leis an mborradh eacnamaíoch san Iodáil agus le fás na turasóireachta sa cheantar, tháinig méadú de réir a chéile ar cháil agus ar éileamh ‘Focaccia di Recco col formaggio’, mar a léirítear le roinnt alt ar an táirge a foilsíodh i nuachtáin laethúla agus in irisí ag an am. Tarraingíodh aird bheadaithe Mheiriceá ar an táirge freisin in 1967 sa ‘Daily American’, inar tugadh tuairisc air mar tháirge ‘aoibhinn amach is amach’.

Is sampla eile iad na chéad treoraithe bia Iodálacha den chaoi ar tháinig ‘Focaccia di Recco col formaggio’ chun bheith ina tháirge tipiciúil agus aitheanta (Guide Veronelli all’Italia piacevole, arna foilsiú ag Garzanti, Milano, 1968 agus Guida gastronomica d’Italia, arna foilsiú ag TCI, Milano, 1969).

Ó shin i leith, agus go dtí an lá atá inniu ann, tagraíonn beagnach gach treoir bia áitiúil agus réigiúnach, gach treoir bia agus fíona agus roinnt irisí a bhaineann leis an earnáil do ‘Focaccia di Recco col formaggio’ mar speisialtacht áitiúil bharántúil.

Tagairt d’fhoilsiú na sonraíochta táirge

https://www.politicheagricole.it/flex/cm/pages/ServeAttachment.php/L/IT/D/1%252F2%252F0%252FD.33597ea435ee831fecbf/P/BLOB%3AID%3D3347/E/pdf?mode=download.


(1)   IO L 179, 19.6.2014, lch. 17.


ELI: http://data.europa.eu/eli/C/2025/473/oj

ISSN 1977-107X (electronic edition)