1.

An féidir a mheas, ar bhonn léiriú leathan ar aithris 46 agus ar Airteagal 33(2)(c), i gcomhar le hAirteagal 38, de Threoir 2013/32/AE (2), nach mór na rialacha a leagtar síos sna forálacha sin, lena gceadaítear iarratas ar chosaint idirnáisiúnta a mheas a bheith do-ghlactha agus a bheith bainteach leis an gcoincheap tríú tír shábháilte de réir bhrí Airteagal 38 de [Threoir 2013/32], a chur i bhfeidhm i nós imeachta faoi Chaibidil III den Treoir sin i gcomhréir leis na bunphrionsabail agus na ráthaíochtaí a leagtar amach i gCaibidil II den Treoir sin, is é sin le rá, i gcomhthéacs scrúdú substainteach ar iarratas ar chosaint idirnáisiúnta?

2.

An bhfuil aithris 46 agus Airteagal 33(2)(c) de Threoir 2013/32, arna léamh i gcomhar le hAirteagal 38 di, le léiriú sa chaoi go gceadaítear reachtaíocht náisiúnta, amhail an reachtaíocht dá dtagraítear in Airteagal 75(2) den Zakon za ubezhishteto i bezhantsite (an Dlí ar thearmainn agus dídeanaithe), agus cleachtas riaracháin agus dlínse faoinar féidir diúltú d’iarratas ar chosaint idirnáisiúnta a scrúdaíodh de bhua tuillteanais gan an t-iarratas a dhearbhú go bhfuil sé gan bhunús go follasach nó do-inghlactha, ar an bhforas amháin go bhfuil an deis ag an iarratasóir leas a bhaint as cosaint tríú tír shábháilte gan an mhodheolaíocht dá bhforáiltear in Airteagal 38(2)(b) de Threoir 2013/32 a bheith forbartha agus curtha i bhfeidhm sa dlí náisiúnta agus i gcás ina n-aithníonn an t-údarás riaracháin go bhfuil coinbhleacht armtha i dtír thionscnaimh an iarratasóra agus go gcomhlíontar coinníollacha Airteagal 15(c) de Threoir 2011/95 (3)?

3.

An bhfuil Airteagal 38(2)(b) de Threoir 2013/32, arna léamh i gcomhar le haithris 46 di, le léiriú sa chaoi go bhféadfaidh an t-údarás riaracháin a dhéanann scrúdú ar shubstaint iarratais ar chosaint idirnáisiúnta an coincheap tríú tír shábháilte a chur i bhfeidhm maidir le tír ar leith agus maidir le hiarratasóir ar leith ar bhonn faisnéise ó fhoinsí atá ar fáil go poiblí amháin agus cinneadh ó chomhlacht feidhmiúcháin (Comhairle na nAirí) gur tríú tír shábháilte í tríú tír ar leith, gan foráil a dhéanamh sa dlí náisiúnta do mhodheolaíocht, de réir bhrí na forála sin, trína bhfuil an t-údarás riaracháin sásta go bhféadfar an coincheap tríú tír shábháilte a chur i bhfeidhm maidir le tír ar leith agus maidir le hiarratasóir ar leith?

4.

An bhfuil Airteagal 38(2)(a) de Threoir 2013/32 le léiriú sa chaoi go gceanglaítear ar na Ballstáit, ina ndlí náisiúnta, critéir a leagan síos a bhféadfaí a mheas go gcruthaíonn siad nasc idir an t-iarratasóir agus an tríú tír lena mbaineann, ionas go ndealródh sé a bheith réasúnta, ar bhonn an naisc sin, go rachadh an duine sin chuig an tír sin?

5.

An bhfuil Airteagal 38(2)(c) de Threoir 2013/32, lena rialaítear an fhéidearthacht don iarratasóir agóid a dhéanamh os comhair na gcúirteanna maidir le nasc a bheith ann idir an t-iarratasóir agus tríú tír a aithnítear a bheith sábháilte, i gcomhréir le pointe (a), le léiriú sa chaoi, in éagmais foráil den dlí náisiúnta lena bhforáiltear d’athbhreithniú breithiúnach ar dhlíthiúlacht naisc a bheith ann idir an t-iarratasóir agus an tríú tír lena mbaineann, nach mór don chúirt a éisteann caingean i gcoinne an chinnidh riaracháin lena ndiúltaítear cosaint idirnáisiúnta a dheonú don iarratasóir ar an bhforas go n-aithnítear tríú tír mar thír shábháilte, a dhearbhú go bhfuil sí inniúil agus rialú a thabhairt ar dhlíthiúlacht naisc den sórt sin a bheith ann mar a ghlacann an t-údarás riaracháin leis?