1.   Beidh Bonneagar Taighde Eorpach ann ar a dtabharfar an Réadlann um Eagar Teileascóp Cherenkov (CTAO).

2.   Beidh foirm dhlíthiúil de Chuibhreannas don Bhonneagar Taighde Eorpach (ERIC) ag CTAO arna ionchorprú faoi fhoráil Rialachán (CE) Uimh. 723/2009 agus tabharfar ERIC maidir leis an Réadlann um Eagar Teileascóp Cherenkov (CTAO ERIC) air.

3.   Beidh oifig chláraithe agus ceanncheathrú CTAO ERIC in Bologna na hIodáile.

1.   Beidh sé de chúram ar CTAO ERIC réadlann a thógáil le haghaidh réalteolaíocht gháma-ghathach thalamhbhunaithe mar a thuairiscítear sa ‘Tuairisc Eolaíoch agus Theicniúil ar an Réadlann um Eagar Teileascóp Cherenkov’, (cumraíocht Alfa) agus an tsaoráid sin a oibriú, a uasghrádú agus a dhíchoimisiúnú a thuilleadh. Leagtar síos na costais tógála i Leabhar Costais CTAO.

2.   Déanfaidh CTAO ERIC na gníomhaíochtaí seo a leanas, i measc cinn eile:

3.   Saothróidh CTAO ERIC a phríomhchúram ar bhonn neamheacnamaíoch. Féadfaidh sé gníomhaíochtaí teoranta eacnamaíocha a dhéanamh, áfach, ar choinníoll go bhfuil dlúthbhaint acu lena phríomhchúram agus nach gcuireann siad baint amach an chúraim sin i mbaol. Déanfaidh CTAO ERIC costais agus ioncaim a ghníomhaíochtaí eacnamaíocha a thaifeadadh ar leithligh, agus gearrfaidh sé praghsanna margaidh orthu, nó, mura féidir iad sin a áirithiú, gearrfaidh sé costais iomlána móide corrlach réasúnach.

1.   Soláthróidh CTAO ERIC rochtain éifeachtach do thaighdeoirí Eorpacha agus idirnáisiúnta (Úsáideoirí) bunaithe ar fhiúntas eolaíoch, indéantacht theicniúil agus/nó critéir ábhartha eile a bhaineann le haidhm CTAO ERIC. Cuirfear méid teoranta Ama Breathnóireachta ar fáil do thograí a bhfuil fiúntas eolaíoch ag baint leo ó thaighdeoirí nach mbaineann le Comhalta, Comhpháirtí Straitéiseach, Tríú Páirtí ná Breathnóir, dá ngairtear Úsáideoirí Eile anseo feasta, faoi théarmaí rochtana sonracha, mar a shainíonn an Chomhairle.

2.   Is féidir rochtain ar CTAO a bheith i bhfoirm rochtana ar Am Breathnóireachta CTAO, nó i bhfoirm rochtana ar Tháirgí Sonraí cartlainne CTAO (Airteagal 33). Déanfar mionsonraí rochtana a shainiú i mBeartas Rochtana, arna ghlacadh ag an gComhairle (Airteagal 25(13)(j)), lena saineofar na cineálacha éagsúla tograí agus lena ndéanfar foráil maidir le leibhéal iomchuí deiseanna do chláir mhóra leagáide (Príomhthionscadail Eolaíochta).

3.   Tá an tArd-Stiúrthóir freagrach as leithdháileadh ama trí phróiseas athbhreithnithe piaraí a eagrú agus a bhainistiú ina ndéanfar meastóireacht ar bharrfheabhas eolaíochta agus indéantacht tograí. Cuirfear nósanna imeachta agus critéir mheastóireachta ar fáil go poiblí ar shuíomh gréasáin CTAO ERIC. Cuirfidh an tArd-Stiúrthóir tuarascáil ar an leithdháileadh ama faoi bhráid na Comhairle go bliantúil.

4.   Is é a chiallaíonn Am Úsáideoirí an tAm Breathnóireachta atá ar fáil tar éis Breathnuithe Ama Ráthaithe a eascraíonn as oibleagáidí conarthacha CTAO ERIC a chur san áireamh. Déanfar Am Úsáideoirí a roinnt idir Am Oscailte do Thograí Caighdeánacha agus Am do Phríomhthionscadail Eolaíochta i gcás cláir mhóra leagáide, Am Breathnóireachta don Phobal Idirnáisiúnta i gcás Úsáideoirí Eile agus Am Lánroghnach an Ard-Stiúrthóra. Tá na sainmhínithe sa Tuairisc Eolaíoch agus Theicniúil ar an Réadlann um Eagar Teileascóp Cherenkov.

5.   Rannchuideoidh Úsáideoirí Eile leis na costais oibriúcháin a bhaineann leis an úsáid a bhaineann siad as CTAO, mar a shainmhínítear sa Bheartas Rochtana agus sna comhaontuithe comhpháirtíochta faoi seach.

6.   Ní bheidh feidhm ag an bhforáil in Airteagal 3(5) maidir leis na leithdháiltí ama a dheonaíonn CTAO ERIC trí chomhaontuithe speisialta (e.g. comhaontuithe óstála).

1.   Beidh CTAO ERIC ina éascaitheoir taighde agus spreagfaidh sé, mar riail ghinearálta, rochtain oscailte ar shonraí taighde. Gan beann ar an bprionsabal sin, cuirfidh CTAO ERIC taighde ar ardchaighdeán chun cinn agus tacóidh sé le cultúr an ‘dea-chleachtais’ trí ghníomhaíochtaí oiliúna.

2.   Iarrfaidh CTAO ERIC ar úsáideoirí a dtorthaí taighde a chur ar fáil go poiblí agus torthaí a chur ar fáil trí CTAO ERIC.

3.   Glacfaidh CTAO ERIC a Bheartas féin um Scaipeadh (Airteagal 25(13)(l)). Tabharfar tuairisc sa Bheartas um Scaipeadh ar na spriocghrúpaí éagsúla, agus úsáidfidh CTAO ERIC roinnt cainéal chun teagmháil a dhéanamh leis an spriocphobal, amhail tairseacha gréasáin, nuachtlitreacha, ceardlanna, láithreacht i gcomhdhálacha agus ailt in irisleabhair, irisí agus nuachtáin laethúla.

1.   Tuigfear an téarma ‘Maoin Intleachtúil’ de réir Airteagal 2 den Choinbhinsiún lena mbunaítear an Eagraíocht Dhomhanda um Maoin Intleachtúil a síníodh an 14 Iúil 1967.

2.   Glacfaidh CTAO ERIC a Bheartas féin um Chearta Maoine Intleachtúla (Airteagal 25(13)(m)).

3.   Beidh CTAO ERIC ina úinéir ar an Maoin Intleachtúil uile a eascraíonn as a ghníomhaíochtaí faoi na Reachtanna seo, lena n-áirítear Maoin Intleachtúil arna táirgeadh ag baill foirne atá fostaithe ag CTAO ERIC, ach gan a bheith teoranta di, ach amháin má chumhdaítear iad le comhaontuithe conarthacha ar leithligh nó i gcás ina sonraítear a mhalairt i reachtaíocht shainordaitheach nó sna Reachtanna seo.

4.   Is leis na Comhaltaí nó na heintitis a dhéanann ionadaíocht orthu a bheidh an Mhaoin Intleachtúil a bhí acu cheana. Déanfar í a cheadúnú faoi CTAO ERIC más gá agus le comhaontuithe sonracha.

1.   Beidh CTAO ERIC ina fhostóir comhionannais deiseanna. Is le dlíthe na tíre nó na críche ina bhfuil an fhoireann fostaithe a rialófar conarthaí fostaíochta.

2.   Faoi réir cheanglais na reachtaíochta náisiúnta, féachfaidh gach Comhalta laistigh dá dhlínse le gluaiseacht agus cónaí náisiúnaigh na gComhaltaí, na mBreathnóirí agus na gComhpháirtithe Straitéiseacha a bhfuil baint acu le cúraimí CTAO ERIC agus gluaiseacht agus cónaí bhaill teaghlaigh na náisiúnach sin a éascú.

3.   Beidh na nósanna imeachta roghnúcháin le haghaidh phoist foirne CTAO ERIC trédhearcach agus neamh-idirdhealaitheach agus urramófar leo comhionannas deiseanna. Ní bheidh an earcaíocht agus an fhostaíocht idirdhealaitheach.

4.   Spreagfaidh CTAO ERIC cruthú ionadaíochta fostaithe institiúidithe.

1.   Caithfidh CTAO ERIC le hiarrthóirí agus tairgeoirí soláthair go cothrom agus gan idirdhealú, bíodh siad bunaithe laistigh den Aontas Eorpach nó ná bíodh. Déanfar rialacha mionsonraithe maidir le nósanna imeachta soláthair agus critéir sholáthair a leagan amach sa Bheartas um Sholáthar arna ghlacadh ag an gComhairle (Airteagal 25(12)(i)). Leis an mBeartas sin um Sholáthar, urramófar prionsabail na trédhearcachta, na hiomaíochta, na comhréireachta, an aitheantais fhrithpháirtigh, na córa comhionainne, an neamh-idirdhealaithe agus na hinbhuanaitheachta.

2.   Déanfaidh Comhaltaí, Breathnóirí, Comhpháirtithe Straitéiseacha agus Tríú Páirtithe soláthar i ndáil le gníomhaíochtaí CTAO ERIC ar bhealach ina dtabharfar aird chuí ar riachtanais CTAO ERIC, ar cheanglais theicniúla agus ar shonraíochtaí arna n-eisiúint ag na comhlachtaí ábhartha.

3.   Sonrófar sa Bheartas um Sholáthar nach mbeidh feidhm ag a fhorálacha maidir le soláthairtí arna ndéanamh ag CTAO ERIC agus úsáid á baint aige as cistí a sheoltar trí CTAO ERIC de réir Airteagal 21(4) de na Reachtanna seo. Sna cásanna sin, is iad na Bunphrionsabail maidir le Ranníocaíochtaí Comhchineáil le CTAO ERIC agus an Creat Ranníocaíochtaí Comhchineáil (Iarscríbhinn B) a chuirfear i bhfeidhm in ionad an Bheartais um Sholáthar.

1.   Déanfaidh an Chomhairle cinneadh maidir le foirceannadh CTAO ERIC i gcomhréir le hAirteagal 25(13)(h).

2.   Gan moill mhíchuí agus in aon chás, laistigh de 10 lá tar éis ghlacadh an chinnidh maidir le CTAO ERIC a fhoirceannadh, tabharfaidh CTAO ERIC fógra don Choimisiún faoin gcinneadh.

3.   Gan moill mhíchuí agus, in aon chás, laistigh de 10 lá ó dhúnadh an nós imeachta foirceanta, tabharfaidh CTAO-ERIC fógra faoi sin don Choimisiún.

4.   Tiocfaidh deireadh le CTAO ERIC an lá a fhoilseoidh an Coimisiún an fógra iomchuí in Iris Oifigiúil an Aontais Eorpaigh.

1.   Ar CTAO ERIC a dhíscaoileadh nó ar scor dá phribhléidí cánach agus dá liúntais chánach, ní bhfaighidh na Comhaltaí aon rud níos mó ná a ranníocaíochtaí airgid thirim íoctha agus luach iarbhír a ranníocaíochtaí comhchineáil.

2.   Ar CTAO ERIC a dhíscaoileadh nó ar scor dá phribhléidí cánach agus dá liúntais chánach, déanfar sócmhainní CTAO ERIC ar mó iad ná na ranníocaíochtaí airgid thirim íoctha agus luach iarbhír na ranníocaíochtaí comhchineáil a aistriú chuig eintiteas dlíthiúil poiblí eile nó chuig corparáid eile faoi phribhléid chánach nó chuig eintiteas dlíthiúil eile a shaothraíonn cuspóirí atá comhchosúil le cuspóirí CTAO ERIC chun eolaíocht agus taighde a chur chun cinn.

1.   Beidh CTAO ERIC faoi dhliteanas i leith a chuid fiach.

2.   Níl na Comhaltaí faoi dhliteanas comhpháirteach i leith fhiacha CTAO ERIC. Beidh dliteanas airgeadais na gComhaltaí i leith fhiacha CTAO ERIC teoranta dá ranníocaíocht bhliantúil faoi seach.

3.   Gheobhaidh CTAO ERIC árachas iomchuí chun na rioscaí a bhaineann go sonrach le tógáil agus oibriú CTAO a chumhdach.

1.   Féadfaidh na heintitis seo a leanas teacht chun bheith ina gComhaltaí de CTAO ERIC nó ina mBreathnóirí gan cearta vótála:

Sonraítear in Airteagal 14 na coinníollacha maidir le Comhaltaí agus Breathnóirí a ligean isteach.

2.   Ní mór Ballstát amháin ar a laghad den Aontas agus dhá thír eile ar Ballstáit den Aontas nó tíortha comhlachaithe iad a bheith san áireamh i gcomhaltas CTAO ERIC.

3.   Beidh tromlach na gceart vótála sa Chomhairle ag Ballstáit an Aontais agus ag tíortha comhlachaithe go comhpháirteach.

4.   Féadfaidh eintiteas poiblí amháin nó níos mó ionadaíocht a dhéanamh ar aon Chomhalta nó aon Bhreathnóir, lena n-áirítear réigiúin nó eintitis phríobháideacha a bhfuil misean seirbhíse poiblí acu, dá rogha féin agus arna gceapadh de réir a rialacha agus a nósanna imeachta féin.

5.   Liostaítear Comhaltaí agus Breathnóirí CTAO ERIC agus na heintitis a dhéanann ionadaíocht orthu in Iarscríbhinn D, rud a choimeádfaidh Cathaoirleach na Comhairle cothrom le dáta.

1.   Is iad seo a leanas na téarmaí maidir le ligean isteach Comhaltaí nua:

2.   Eintitis dá dtagraítear in Airteagal 13(1) atá toilteanach rannchuidiú le CTAO ERIC, ach nach bhfuil in ann dul isteach mar Chomhaltaí go fóill, féadfaidh siad iarratas ar stádas breathnóra a chur faoi bhráid na Comhairle. Is iad seo a leanas na téarmaí maidir le ligean isteach Breathnóirí:

3.   I dtaca le heintitis dá dtagraítear in Airteagal 13(1), a théann isteach in CTAO ERIC agus stádas breathnóra acu ón uair a bhunaítear é agus a gheallann go rannchuideoidh siad le tógáil CTAO, is é an sainmhíniú atá orthu Breathnóirí Bunaidh agus liostaítear i mBrollach na Reachtanna seo iad.

4.   Is féidir le Breathnóirí Bunaidh a stádas mar Bhreathnóirí a choinneáil ar bun ar feadh tréimhse 3 bliana ó bhunaítear CTAO ERIC; i gcásanna eisceachtúla, féadfaidh an Chomhairle síneadh a chur le tréimhse an stádais breathnóra.

1.   Faoi réir fhormheas na Comhairle, féadfaidh CTAO ERIC comhaontuithe comhpháirtíochta straitéisí a thabhairt i gcrích le Ballstáit nach Ballstáit den Aontas iad nó le heagraíochtaí idir-rialtasacha.

2.   Déanfar ranníocaíochtaí na gComhpháirtithe Straitéiseacha de bhun na gcomhaontuithe comhpháirtíochta straitéisí a thaifeadadh ar leithligh i mbuiséad bliantúil CTAO ERIC.

3.   Liostaítear in Iarscríbhinn A ranníocaíochtaí na gcomhpháirtithe a shíníonn litir ghealltanais go dtiocfaidh siad chun bheith ina gComhpháirtithe Straitéiseacha agus go mbeidh siad rannpháirteach i dtógáil CTAO ERIC ón uair a bhunaítear é.

4.   Tá na cearta agus na hoibleagáidí céanna ag Comhpháirtithe Straitéiseacha agus atá ag Comhaltaí mar a luaitear in Airteagail 16 agus 17, cé is moite den cheart vótála sa Chomhairle.

5.   Iarrann CTAO ERIC ar ionadaithe ó Chomhpháirtithe Straitéiseacha freastal ar chruinnithe na Comhairle agus a seasamh a lua maidir le haon ábhar vótála sa Chomhairle sula gcaithfear na vótaí. Rachfar i gcomhairle leis na Comhpháirtithe Straitéiseacha sula bhféadfar aon vóta a chaitheamh sa Chomhairle a bhaineann le cinneadh a dhéanfadh difear dá ranníocaíochtaí.

6.   Féadfaidh eintiteas poiblí amháin nó níos mó ionadaíocht a dhéanamh ar chomhpháirtithe straitéiseacha, lena n-áirítear réigiúin nó eintitis phríobháideacha a bhfuil misean seirbhíse poiblí acu, dá rogha féin agus arna gceapadh de réir a rialacha agus a nósanna imeachta féin.

7.   Féadfar a iarraidh ar ionadaithe ó Chomhpháirtithe Straitéiseacha freastal ar choistí eile de chuid CTAO ERIC i gcomhréir le rialacha nós imeachta gach coiste.

8.   Glacfaidh an Chomhairle beartas lena sonrófar coinníollacha na gcomhaontuithe comhpháirtíochta straitéisí, Airteagal 25(13)(n).

1.   Féadfaidh éifeacht a bheith ag gabháil le tarraingt siar comhaltaí ag deireadh na céime tógála ar a luaithe nó 10 mbliana tar éis theacht i bhfeidhm na Reachtanna seo. Féadfaidh aon Chomhalta tarraingt siar as CTAO ERIC ag deireadh bliana airgeadais, tar éis fógra i scríbhinn a thabhairt don Chomhairle 3 bliana roimh an tarraingt siar.

2.   Féadfaidh Breathnóirí tarraingt siar ag deireadh bliana airgeadais, tar éis fógra i scríbhinn a thabhairt don Chomhairle 6 mhí roimh an tarraingt siar.

3.   Déanfaidh an Chomhairle cinneadh maidir leis na coinníollacha agus na héifeachtaí a bhainfidh le tarraingt siar Comhalta as CTAO ERIC, go háirithe a sciar de na costais a ghabhfaidh le CTAO a dhíchoimisiúnú (Airteagal 23(4)).

4.   Beidh sé de chumhacht ag an gComhairle comhaltas Comhalta nó stádas breathnóra Breathnóra a fhoirceannadh má chomhlíontar na coinníollacha seo a leanas:

5.   Gan dochar d’Airteagal 16(1) agus d’Airteagal 16(3), féadfaidh Comhaltaí agus Breathnóirí, ar tíortha comhlachaithe, tríú tíortha seachas tíortha comhlachaithe nó eagraíochtaí idir-rialtasacha iad, tarraingt siar as CTAO ERIC tar éis athruithe ar Rialachán (CE) Uimh. 723/2009 ón gComhairle a dhéanfadh difear ábhartha dá gcearta agus dá n-oibleagáidí i ndáil le CTAO ERIC. Meastar go bhfuil athruithe den sórt sin ábhartha i gcás ina dtugann siad le tuiscint go mbeidh táillí méadaithe ann (lena n-áirítear ranníocaíochtaí bliantúla nó costais um dhíchoimisiúnú), i gcás ina leasaíonn siad scaireanna vótála, i gcás ina bhforchuireann siad ceanglais atá contrártha do na dlíthe is infheidhme de réir Airteagal 36 de na Reachtanna seo, i gcás ina gcuireann siad deireadh leis an gceart go ndéanfar ionadaíocht sa Chomhairle nó i gcoistí eile orthu nó i gcás ina n-athraíonn siad na cearta acu a bhaineann le hionadaíocht nó le húsáid na saoráide. Is i gcomhréir le hAirteagal 16(3), faoi réir vóta d’aon toil ó Chomhairle CTAO, a dhéanfar cinneadh ar dtús maidir leis na dliteanais agus na héifeachtaí a bhainfidh le tarraingt siar as CTAO ERIC, lena n-áirítear sciar an Chomhalta nó an Bhreathnóra a tharraingíonn siar de na costais a ghabhfaidh le CTAO a dhíchoimisiúnú. D’ainneoin Airteagal 16(1), tabharfaidh an Comhalta nó an Breathnóir dá ndéantar difear (laistigh de 6 mhí ón athrú ábhartha ar Rialacháin ERIC) fógra 3 mhí ar a laghad don Chomhairle faoina tharraingt siar chun go mbeidh éifeacht leis aon tráth tar éis dheireadh na céime tógála nó 10 mbliana tar éis theacht i bhfeidhm na Reachtanna seo.

1.   Áireofar le cearta na gComhaltaí:

2.   Déanfaidh gach Comhalta na nithe seo a leanas

3.   Déanfaidh na Comhaltaí bunaidh na ranníocaíochtaí seo a leanas ag praghsanna 2021, in airgead tirim nó i gcomhchineál, i leith na gcostas tógála (Airteagail 2(1), 21(1)):

Rannchuideoidh ESO trí limistéar talún a chur ar fáil do CTAO agus tríd an úsáid, na cearta agus na seirbhísí a sholáthar mar a shainítear sa Chomhaontú maidir le Tógáil, Coimisiúnú agus Oibriú CTAO ar Láithreán Paranal, ar láithreán de chuid Réadlann La Silla Paranal ESO sa tSile é, arna shíniú an 19 Nollaig 2018.

4.   Liostaítear in Iarscríbhinn A aon ranníocaíocht eile le tógáil CTAO a thagann ó Bhreathnóirí Bunaidh, ó Chomhpháirtithe Straitéiseacha nó ó Thríú Páirtithe, a d’fhógair don Stát Óstach ainmnithe go bhfuil rún daingean acu rannchuidiú le tógáil CTAO sular mbunófar é, agus tiocfaidh ann don ranníocaíocht sin trí shocruithe conarthacha díreacha le CTAO ERIC tar éis a bhunaithe.

5.   I dteannta na ranníocaíochtaí dá dtagraítear in Airteagal 17(3) agus lasmuigh den Leabhar Costais, soláthróidh na Comhaltaí seo a leanas na nithe seo a leanas saor in aisce mar phréimh óstaigh:

Tugtar tuairisc in Iarscríbhinn A ar na gnéithe fíor-riachtanacha agus ar choinníollacha phréimheanna an óstaigh.

1.   Áireofar le cearta na mBreathnóirí:

2.   Tá na cearta agus na hoibleagáidí céanna ag Breathnóirí Bunaidh mar a shainmhínítear in Airteagal 14(3) agus atá ag Breathnóirí mar a shonraítear in Airteagal 18(1).

3.   Liostaítear in Iarscríbhinn A na ranníocaíochtaí le tógáil CTAO lena bhfuil coinne ó na Breathnóirí Bunaidh.

4.   Soláthróidh gach Breathnóir Bunaidh agus gach Breathnóir ranníocaíocht bhliantúil le buiséad bliantúil CTAO ERIC tar éis thabhairt chun críche na céime tógála (céim oibríochta), mar a shainmhínítear in Iarscríbhinn C.

1.   Le linn na céime tógála, déanfaidh CTAO ERIC CTAO a thógáil agus a choimisiúnú mar a thuairiscítear sa doiciméad S&T (Iarscríbhinn A). Féadfaidh sé gníomhaíochtaí eolaíocha luatha a dhéanamh freisin agus úsáid á baint as píosaí trealaimh CTAO arna gcur chun úsáide. Tiocfaidh deireadh leis an gcéim thógála ar an dáta a chinnfidh an Chomhairle de réir Airteagal 25(12)(f).

2.   Déanfaidh an Chomhairle athbhreithniú go bliantúil ar a laghad ar na costais tógála iarbhír agus réamh-mheasta. Más rud é, tráth ar bith agus ar chúis ar bith, go ndealraíonn sé don Chomhairle go bhfuil tabhairt chun críche CTAO faoi bhagairt, déanfaidh an Chomhairle, ar thogra ón Ard-Stiúrthóir, cinneadh maidir le bearta maolaithe.

1.   Ranníocaíochtaí ó Chomhaltaí, ó Bhreathnóirí, ó Chomhpháirtithe Straitéiseacha nó ó Thríú Páirtithe ar mó iad ná na cinn a luaitear in Airteagal 17, tá coinne leis go sainaithneofar iad chun go mbeidh CTAO ERIC in ann CTAO a fheabhsú de réir an Doiciméid S&T.

1.   Leagtar síos na meastacháin ar chostais tógála i Leabhar Costais CTAO dar dáta an 22 Meitheamh 2021 ag praghsanna 2021 lena gcumhdaítear an caiteachas foriomlán. Is é an leabhar costais sin an doiciméad tagartha le haghaidh ranníocaíochtaí na gcomhaltaí in airgead tirim agus i gcomhchineál.

Na costais tógála go dtí go dtabharfar CTAO chun críche, ní bheidh siad níos mó ná

EUR 351 319 000 ag praghsanna 2021.

Féadfaidh an Chomhairle, ag gníomhú di d’aon toil, modhnú ar na costais sin a fhormheas (Airteagal 25(12)(a)).

2.   Is éard a bheidh sna costais tógála suim na nithe seo a leanas:

3.   Féadfaidh na Comhaltaí, na Comhpháirtithe Straitéiseacha agus na Breathnóirí na ranníocaíochtaí leis na costais tógála a sheachadadh mar ranníocaíochtaí airgid thirim nó mar ranníocaíochtaí comhchineáil mar a thuairiscítear sna Bunphrionsabail maidir le Ranníocaíochtaí Comhchineáil le CTAO ERIC (Iarscríbhinn B). Déanfaidh an Chomhairle cinneadh maidir le leithdháileadh ranníocaíochtaí comhchineáil (Airteagal 25(13)(e)).

4.   Mar riail ghinearálta, seachadann an Comhalta ranníocaíochtaí comhchineáil chuig CTAO ERIC. Féadfaidh an Comhalta a iarraidh ar CTAO ERIC an cistiú is gá chun na críche sin a threorú thar a cheann (airgead tirim tiomnaithe). Sa chás sin, cuirfidh an Comhalta an cistiú is gá ar fáil in am trátha do CTAO ERIC.

5.   Seachadfaidh na Comhaltaí ranníocaíochtaí airgid thirim chuig CTAO ERIC de réir próifílí íocaíochta arna gcomhaontú go sonrach. A mhéid is féidir, ba cheart na próifílí íocaíochta a bheith ag teacht le próifíl chaiteachais CTAO ERIC. Áirítear sa Leabhar Costais an tábla a léiríonn na teagmhais chaiteachais bhliantúla a mheastar a bheith ann le linn na céime tógála.

1.   Tar éis tógáil CTAO a thabhairt chun críche, oibreoidh CTAO ERIC an réadlann agus saothróidh sé clár taighde agus forbartha chun tuilleadh forbartha inbhuanaithe a dhéanamh uirthi.

2.   Maoineofar oibriú CTAO ó bhuiséad bliantúil CTAO ERIC.

3.   Déantar ranníocaíochtaí na gComhaltaí le buiséad bliantúil CTAO ERIC a chionroinnt de réir na scéime a leagtar amach in Iarscríbhinn C.

1.   Déanann an Chomhairle cinneadh maidir le díchoimisiúnú CTAO in am trátha i gcomhréir le hAirteagal 25(12)(g).

2.   Roimh dheireadh na céime tógála agus le linn na céime oibríochta, coimeádfaidh an Chomhairle meastachán cothrom le dáta ar na costais agus ar an am is gá chun CTAO a dhíchoimisiúnú.

3.   Déanfar na costais um dhíchoimisiúnú a roinnt idir na Comhaltaí de réir beartas arna ghlacadh ag an gComhairle.

4.   Má fhágann Comhalta CTAO ERIC roimh chinneadh na Comhairle CTAO a dhíchoimisiúnú, aistreoidh sé méid réasúnta chuig CTAO ERIC a chomhfhreagraíonn dá sciar teoiriciúil de na costais um dhíchoimisiúnú ar lá a imeachta ó CTAO ERIC.

1.   Is í an Chomhairle comhlacht rialaithe CTAO ERIC agus beidh sí comhdhéanta de suas le beirt ionadaithe oifigiúla (toscairí) ó gach ceann de Chomhaltaí agus Breathnóirí CTAO ERIC. Féadfaidh suas le beirt saineolaithe cúnamh a thabhairt do na toscairí.

2.   Ceapfar toscairí chuig an gComhairle agus déanfar a gceapacháin a fhoirceannadh de réir prionsabail a chinnfidh gach Comhalta. Cuirfidh gach Comhalta Cathaoirleach na Comhairle ar an eolas i scríbhinn, gan moill mhíchuí, faoi cheapachán aon cheann dá thoscairí chuig an gComhairle nó faoi fhoirceannadh an cheapacháin sin.

3.   Le linn na céime tógála, déanfar roinnt vótaí doroinnte sa Chomhairle a chionroinnt ar na Comhaltaí i gcomhréir lena ngealltanais ranníocaíocht a dhéanamh i leith na gcostas tógála mar a thuairiscítear in Iarscríbhinn A.

4.   Le linn na céime oibríochta, féachfaidh an Chomhairle an athuair ar an gcionroinnt sin de gach líon doroinnte vótaí mar a thuairiscítear in Iarscríbhinn C. Déanfaidh an Chomhairle an cinneadh maidir leis an athbhreithniú ar chionroinnt vótaí (Airteagal 25(12)(h)).

5.   Tiocfaidh an Chomhairle le chéile faoi dhó sa bhliain ar a laghad agus beidh sí freagrach, i gcomhréir le forálacha na Reachtanna seo, as treo foriomlán CTAO ERIC agus as maoirseacht a dhéanamh air. Féadfaidh an Chomhairle treoracha a thabhairt don Ard-Stiúrthóir.

6.   Is é an Cathaoirleach a chomórfaidh cruinnithe na Comhairle. Déanfaidh an Cathaoirleach cruinniú den Chomhairle a chomóradh freisin arna iarraidh sin do dhá Chomhalta ar a laghad.

7.   Toghfaidh an Chomhairle Cathaoirleach agus Leas-Chathaoirleach as toscaireachtaí na gComhaltaí. Glacfaidh an Leas-Chathaoirleach ionad an Chathaoirligh má bhíonn an Cathaoirleach as láthair agus i gcás coinbhleacht leasa. Ar a dtoghadh dóibh, tagann an Cathaoirleach agus an Leas-Chathaoirleach chun bheith supra-partes agus fágann siad a dtoscaireachtaí. Toghfar an Cathaoirleach agus an Leas-Chathaoirleach ar feadh tréimhse oifige nach faide ná 2 bhliain. Ceadófar atoghadh faoi dhó.

8.   Déanfaidh an Chomhairle cinneadh maidir lena Rialacha Nós Imeachta faoi réir na bhforálacha sna Reachtanna seo.

9.   Féadfaidh an Chomhairle coistí a bhunú de réir mar is gá chun cúram CTAO ERIC a bhaint amach. Saineoidh an Chomhairle sainordú na gcoistí sin.

10.   Is í an Chomhairle, i gcomhairle leis an Ard-Stiúrthóir, a cheapfaidh baill foirne shinsearacha shonracha, mar a shainíonn an Chomhairle.

11.   Ba cheart don Chomhairle dul ar aghaidh leis an vótáil i gcomhréir leis na prionsabail seo a leanas:

Ní áirítear staonadh ó vótáil mar vóta.

12.   Beidh formheas ón gComhairle trí vótáil d’aon toil ag teastáil i gcás na n-ábhar seo a leanas:

Beidh aon leasú ar na Reachtanna faoi réir na bhforálacha a leagtar amach in Airteagal 9(3) agus Airteagal 11 de Rialachán (CE) Uimh. 723/2009 arna leasú ag an gComhairle an 2 Nollaig 2013 (Rialachán (AE) Uimh. 1261/2013 ón gComhairle).

13.   Maidir le cinntí a bhaineann leis na nithe seo a leanas, beidh tromlach cáilithe de na vótaí ag teastáil ina leith:

14.   Beidh tromlach simplí ag teastáil i gcás gach cinnidh eile ón gComhairle.

1.   Ceapfaidh an Chomhairle Ard-Stiúrthóir CTAO ERIC de réir nós imeachta arna ghlacadh ag an gComhairle. Ní bheidh téarma an Ard-Stiúrthóra níos faide ná 5 bliana; is féidir athcheapadh a dhéanamh. Beidh gnéithe fíor-riachtanacha an chonartha fostaíochta faoi réir a bhformheasta ag an gComhairle.

2.   Beidh an tArd-Stiúrthóir cuntasach don Chomhairle agus is é a bheidh ina ionadaí dlíthiúil ar CTAO ERIC. Déanfaidh an tArd-Stiúrthóir bainistíocht laethúil ar CTAO ERIC le dícheall cuí agus i gcomhréir leis na Reachtanna seo, le treoracha agus rúin na Comhairle agus leis na ceanglais dlí is infheidhme.

3.   Tá sé d’údarás ag an Ard-Stiúrthóir idirbhearta a fhormheas suas le luachanna a shaineofar sna Rialacha Airgeadais. Ní mór formheas a fháil ón gCoiste Riaracháin agus Airgeadais le haghaidh idirbhearta os cionn na luachanna socraithe.

4.   Cuirfidh an tArd-Stiúrthóir an Chomhairle ar an eolas go tráthrialta faoi chinntí an Ard-Stiúrthóra maidir le hábhair straitéiseacha, theicniúla, eolaíocha, dhlíthiúla, bhuiséadacha agus riaracháin. Cuirfidh an tArd-Stiúrthóir tuarascáil bhliantúil ar ghníomhaíochtaí faoi bhráid na Comhairle.

5.   Ullmhóidh an tArd-Stiúrthóir na cinntí a bheidh le déanamh ag an gComhairle agus na cinntí a bheidh le déanamh ag na coistí.

6.   I gcás ina dtiocfaidh post an Ard-Stiúrthóra chun bheith folamh, féadfaidh an Chomhairle duine a ainmniú, a gcinnfidh sí a chumhachtaí agus a fhreagrachtaí, chun gníomhú in ionad an Ard-Stiúrthóra.

1.   Beidh Coiste Riaracháin agus Airgeadais (CRA) ann ar a mbeidh suas le beirt toscairí arna n-ainmniú ag gach Comhalta. Is í an Chomhairle a cheapfaidh Cathaoirleach an CRA agus beidh an Cathaoirleach supra-partes. Tabharfaidh an Coiste comhairle don Chomhairle maidir le cúrsaí riaracháin, dlí agus airgeadais.

2.   Is é an CRA a fhormheasfaidh idirbhearta os cionn na luachanna a shocraítear d’údarás an Ard-Stiúrthóra (Airteagal 26(3)) mar a shainítear sna Rialacha Airgeadais.

3.   Déanfaidh an Chomhairle Téarmaí Tagartha an Choiste sin agus a Rialacha Nós Imeachta a ghlacadh agus a ionchorprú sna Rialacha Airgeadais (Airteagal 25(13)(g)).

4.   Cuirfidh an tArd-Stiúrthóir na doiciméid bhuiséid faoi bhráid an CRA mar a shonraítear sna Rialacha Airgeadais a ndéanfar athbhreithniú orthu agus a chuirfear faoi bhráid na Comhairle ina dhiaidh sin in éineacht le barúlacha agus moltaí CRA.

1.   Beidh Coiste Comhairleach Eolaíoch agus Teicniúil (CCET) ann. Ar an gCoiste sin beidh eolaithe den scoth nach bhfuil fostaithe ag CTAO ERIC nó nach bhfuil baint dhíreach acu ar aon bhealach eile leis, agus cuirfidh an Coiste comhairle ar an gComhairle maidir le hábhair eolaíocha agus theicniúla agus ábhair eile atá tábhachtach do CTAO ERIC.

2.   Ceapfaidh an Chomhairle comhaltaí CCET i gcomhréir leis na Rialacha Nós Imeachta. Féachfaidh an Chomhairle le CCET éagsúil a bhaint amach ina mbeidh cothromaíocht idir saineolas eolaíoch agus saineolas teicniúil, lena léireofar rannpháirtíocht leathan i dtionscadal Eagar Teileascóp Cherenkov.

3.   Is í an Chomhairle a cheapfaidh Cathaoirleach CCET.

4.   Glacfaidh an Chomhairle Téarmaí Tagartha agus Rialacha Nós Imeachta CCET (Airteagal 25(13)(i)).

1.   Is iad seo a leanas a bheidh in acmhainní CTAO ERIC:

2.   Ní úsáidfear acmhainní CTAO ERIC ach amháin chun na gcríoch a dtugtar tuairisc orthu sna Reachtanna. Ní bhfaighidh Comhaltaí CTAO ERIC aon scaireanna brabúis ná aon ní luachmhar eile ó acmhainní CTAO ERIC.

1.   Tosóidh bliain airgeadais CTAO ERIC an 1 Eanáir agus críochnóidh sí an 31 Nollaig gach bliain.

2.   Bliain ghearr airgeadais a bheidh sa chéad bhliain ghnó, dar tús dáta theacht i bhfeidhm an Chinnidh Cur Chun Feidhme ón gCoimisiún lena mbunaítear CTAO ERIC agus dar críoch an 31 Nollaig den bhliain sin.

1.   Ceapfaidh an Chomhairle iniúchóirí seachtracha a bheidh ina bpost ar feadh tréimhse 4 bliana agus a fhéadfar a athcheapadh. Déanfaidh na hiniúchóirí iniúchadh ar ráiteas airgeadais bliantúil CTAO ERIC agus déanfaidh siad na feidhmeanna sin a leagtar amach sna Rialacha Airgeadais.

2.   Cuirfidh an tArd-Stiúrthóir cibé faisnéis agus cúnamh ar fáil do na hiniúchóirí a bheadh ag teastáil uathu chun a ndualgais a chomhlíonadh.

3.   Beidh tuarascáil ar bhainistíocht bhuiséadach agus airgeadais na bliana airgeadais ag gabháil le cuntais CTAO ERIC.

4.   Leagfar síos sna Rialacha Airgeadais gach socrú eile a bhaineann le buiséad CTAO ERIC, caighdeáin chuntasaíochta agus airgeadas, lena n-áirítear rialacha maidir le cuntais a ullmhú, a chomhdú, a iniúchadh agus a fhoilsiú, agus nós imeachta a bhaineann le formheas idirbheart os cionn na luachanna a shocraítear d’údarás an Ard-Stiúrthóra (Airteagail 26(3), 27(2)).

1.   Díolúintí CBL bunaithe ar Airteagail 143(1)(g) agus 151(1)(b) de Threoir 2006/112/CE ón gComhairle agus i gcomhréir le hAirteagail 50 agus 51 de Rialachán Cur Chun Feidhme (AE) Uimh. 282/2011 ón gComhairle, beidh siad teoranta do cheannacháin earraí nó seirbhísí a dhéanfaidh CTAO ERIC agus Comhaltaí ERIC, mar a shainítear in Airteagal 9(1) de Rialachán (CE) Uimh. 723/2009 ón gComhairle an 25 Meitheamh 2009 maidir le creat dlíthiúil an Chomhphobail le haghaidh Cuibhreannas don Bhonneagar Taighde Eorpach (ERIC), atá le húsáid go hoifigiúil agus go heisiach ag CTAO ERIC, ar choinníoll go ndéanfar ceannachán den sórt sin le haghaidh ghníomhaíochtaí neamheacnamaíocha CTAO ERIC i gcomhréir lena ghníomhaíochtaí agus lena n-aghaidh sin amháin.

2.   Beidh díolúintí CBL teoranta do cheannacháin ar mó a luach ná EUR 300.

3.   Díolúintí ó Dhleacht Mháil bunaithe ar Airteagal 11 de Threoir (AE) 2020/262 ón gComhairle (Airteagal 12 de Threoir 2008/118/CE ón gComhairle), beidh siad teoranta do cheannacháin a dhéanfaidh CTAO ERIC atá le húsáid go hoifigiúil agus go heisiach ag CTAO ERIC, ar choinníoll go ndéanfar ceannachán den sórt sin le haghaidh ghníomhaíochtaí neamheacnamaíocha CTAO ERIC i gcomhréir lena ghníomhaíochtaí agus lena n-aghaidh sin amháin agus gur mó luach an cheannacháin ná EUR 300.

4.   Ní chumhdaítear leis na díolúintí ceannacháin arna ndéanamh ag baill foirne CTAO ERIC.

1.   Tabharfar tús áite do phrionsabail Foinse Oscailte agus Rochtana Oscailte i gcoitinne.

2.   Glacfaidh CTAO ERIC a Bheartas Sonraí féin lena n-aithneofar prionsabail FAIR (so-aimsitheacht, inrochtaineacht, idir-inoibritheacht, agus in-athúsáidteacht (Airteagal 25(13)(o)).

3.   Beidh na sonraí a bhaileofar mar thoradh ar úsáid CTAO faoi úinéireacht CTAO ERIC. Déanfaidh CTAO ERIC na sonraí loma a phróiseáil agus scaoilfidh sé sonraí i bhfoirm a bheidh oiriúnach d’anailís ag an Úsáideoir (Táirgí Sonraí CTAO).

4.   Beidh rochtain ar Tháirgí Sonraí CTAO oscailte, neamhshrianta agus saor in aisce. Féadfaidh an Chomhairle tréimhse theoranta a shainiú ina bhféadfaí rochtain eisiach a dheonú d’Úsáideoir ar Tháirgí Sonraí CTAO a leanann as an Am Breathnóireachta a leithdháiltear ar an Úsáideoir sin (an Tréimhse Dílseánaigh).

5.   Taighde a dhéantar agus úsáid á baint as ábhar a chuirtear ar fáil trí CTAO ERIC, soláthróidh CTAO ERIC treoraíocht d’úsáideoirí chun a áirithiú go ndéanfar an taighde sin laistigh de chreat lena n-aithnítear cearta úinéirí sonraí agus príobháideachas daoine aonair.

6.   Áiritheoidh CTAO ERIC go n-aontóidh Úsáideoirí leis na téarmaí agus na coinníollacha lena rialaítear rochtain agus go mbeidh socruithe slándála oiriúnacha i bhfeidhm maidir le stóráil inmheánach agus láimhseáil faisnéise agus sonraí cosanta.

7.   Saineoidh CTAO ERIC socruithe chun imscrúdú a dhéanamh ar líomhaintí maidir le sáruithe slándála agus nochtaí rúndachta i ndáil le sonraí taighde.

1.   Bunóidh an Chomhairle, i gcomhréir le hAirteagal 25(13)(p), beartas ginearálta maidir leis na coinníollacha faoina bhféadfaidh CTAO ERIC comhaontuithe a dhéanamh le haon duine dlítheanach. Sonrófar sa chomhaontú sin cearta agus oibleagáidí uile na bpáirtithe.

2.   Tríú Páirtithe a thugann gealltanas comhaontú a dhéanamh le CTAO ERIC sula mbunófar é agus ranníocaíocht a dhéanamh le tógáil CTAO, féadfar a ranníocaíocht a liostú in Iarscríbhinn A.

3.   Ní bheidh cearta vótála ag tríú páirtithe sa Chomhairle.

1.   Cuirfidh CTAO ERIC tuarascáil bhliantúil ar ghníomhaíochtaí ar fáil, tuarascáil ina mbeidh gnéithe eolaíocha, oibríochtúla agus airgeadais a ghníomhaíochtaí. Déanfaidh an Chomhairle an tuarascáil a fhormheas agus a tharchur chuig an gCoimisiún agus chuig na húdaráis phoiblí ábhartha laistigh de 6 mhí ó dheireadh na bliana airgeadais comhfhreagraí. Cuirfear an tuarascáil sin ar fáil go poiblí.

2.   Cuirfidh CTAO ERIC an Coimisiún ar an eolas faoi aon imthoisc a d’fhéadfadh baint amach chúraimí CTAO ERIC a chur i mbaol go mór nó bac a chur ar CTAO ERIC na ceanglais a leagtar síos i Rialachán (CE) Uimh. 723/2009 a chomhlíonadh.

1.   Is leis na nithe seo a leanas a rialófar bunú agus feidhmiú inmheánach CTAO ERIC:

2.   Ní léirmhíneofar aon ní sna Reachtanna seo mar tharscaoileadh aon phribhléide nó aon díolúine a thugtar do ESO lena dhoiciméid bhunaithe nó leis an dlí idirnáisiúnta. Tá an méid sin gan dochar d’Airteagal 37 de na Reachtanna seo.

1.   Beidh dlínse ag Cúirt Bhreithiúnais an Aontais Eorpaigh maidir le dlíthíocht i measc na gComhaltaí i ndáil le CTAO ERIC, idir na Comhaltaí agus CTAO ERIC agus maidir le haon dlíthíocht ina bhfuil an tAontas ina pháirtí.

2.   Beidh feidhm ag reachtaíocht an Aontais Eorpaigh maidir le dlínse i ndáil le díospóidí idir CTAO ERIC agus Tríú Páirtithe. I gcásanna nach gcumhdaítear le reachtaíocht an Aontais Eorpaigh, is faoi dhlí an Stáit ina bhfuil oifig chláraithe CTAO-ERIC a chinnfear an dlínse inniúil chun na díospóidí sin a réiteach.

1.   Déanfaidh Poblacht na hIodáile cruinniú bunreachtúil den Chomhairle a ghairm a luaithe is féidir ach tráth nach déanaí ná 45 lá féilire tar éis theacht i bhfeidhm an chinnidh ón gCoimisiún CTAO ERIC a bhunú.

2.   Tabharfaidh Poblacht na hIodáile fógra do na Comhaltaí Bunaidh faoi aon chaingean dlí phráinneach shonrach is gá a dhéanamh thar ceann CTAO ERIC sula dtionólfar an cruinniú bunreachtúil. Mura ndéanfaidh Comhalta Bunaidh agóid laistigh de 5 lá oibre tar éis fógra a fháil, déanfaidh duine arna údarú go cuí ag Poblacht na hIodáile an chaingean dlí.

1.   Beidh trí áit oibriúcháin bhreise ag CTAO ERIC: an Lárionad um Bainistiú Sonraí Eolaíochta (SDMC) atá lonnaithe in Zeuthen na Gearmáine, an t-eagar teileascóp ó thuaidh atá lonnaithe in Observatorio del Roque de Los Muchachos in La Palma na Spáinne, agus an t-eagar teileascóp ó dheas atá lonnaithe ag Réadlann La Silla Paranal sa tSile.

2.   Is é an Béarla an teanga oibre a bheidh ag CTAO ERIC.