1)

Chun go gcumhdófar dearadh le córas cosanta Rialachán (CE) Uimh. 6/2002 ón gComhairle an 12 Nollaig 2001 (1), an gá fíorghníomhaíocht dearaidh a bheith ann ar chaoi go mbeadh an dearadh ina thoradh ar iarracht intleachtúil do chruthaitheora? Agus, i ndáil leis sin, an féidir an teaglaim de chomhpháirteanna ar bhonn dearaí a bhfuil a saintréithe cuma, den chuid is mó, réamhchinntithe ag cuideachtaí trádála, a mheas mar fhíorghníomhaíocht dearaidh, ionas nach mór modhnuithe ar eilimintí áirithe a mheas mar mhodhnú aonuaire agus coimhdeach?

2)

I bhfianaise a bhfuil thuas, an féidir a mheas go bhfuil tréithe ar leith ag baint le gach gné de chuma táirge mar thoradh ar shaincheapadh dearaí arna dtairiscint ag cuideachtaí trádála Síneacha i gcomhréir le catalóga na ngnóthas sin de réir bhrí Airteagal 6 de Rialachán (CE) Uimh. 6/2002 ón gComhairle an 12 Nollaig 2001, i gcás ina bhfuil gníomhaíocht an dearthóra teoranta do mhargú na ndearaí sin in LEE gan mhodhnú nó le modhnuithe sonracha ar chomhpháirteanna (amhail na comhpháirteanna aonair, seamanna, sreangáin tarraingthe, búclaí, etc.) agus gur cuideachtaí trádála den chuid is mó a dhéanann na gnéithe a bhaineann leis an gcuma a réamhchinneadh? An bhfuil sé ábhartha chun na críche sin nach é an margóir Eorpach a dhear na comhpháirteanna, ach gur comhpháirteanna iad a thairgeann an chuideachta trádála féin ina catalóg?

3)

An gcaithfear Airteagal 14 de Rialachán (CE) Uimh. 6/2002 ón gComhairle an 12 Nollaig 2001 a léiriú ar chaoi go bhféadfaí duine a mheas mar dhearthóir más rud é, ar bhonn dearadh arna thairiscint ag cuideachtaí trádála i gcomhréir le catalóg, nach ndearna sé ach an dearadh sin a shaincheapadh trí chomhpháirteanna a thairgeann an déileálaí freisin nach bhfuil deartha ag an déileálaí Eorpach a athrú? I ndáil leis sin, an gá méid áirithe saincheaptha a dhéanamh chun a léiriú go n-imíonn an cruth deiridh go suntasach ón mbundearadh chun a bheith in ann údar a éileamh?

4)

D’ainneoin an méid thuas, i gcás amhail an ceann seo, i bhfianaise shaintréithe speisialta coisbhirt a dearadh ó shamplaí d’oibreoirí trádála agus, a mhéid atá an ‘dearadh’ teoranta do réamhdhearthaí a roghnú le haghaidh sampla agus, i gcás inarb iomchuí, d’athrú cuid dá chomhpháirteanna, laistigh den chatalóg a thairgeann an monaróir féin (cuideachta trádála), iad uile i gcomhréir le treochtaí faisin, an gcaithfear a thuiscint maidir leis na treochtaí faisin sin: (a) go gcuirtear teorainn le saoirse an dearthóra leo ar chaoi go bhféadfadh difríochtaí beaga idir an dearadh cláraithe (nó neamhchláraithe) agus dearadh eile a bheith leordhóthanach chun tuiscint fhoriomlán ar leith a thabhairt nó, os a choinne sin, (b) difear a dhéanamh do shaintréith aonair an dearaidh chláraithe (nó neamhchláraithe) ionas gur beag an tábhacht a bheidh leis na heilimintí nó na comhpháirteanna sin sa tuiscint fhoriomlán a dtugtar don úsáideoir eolach leo a mhéid a eascraíonn siad as treochtaí faisin aitheanta i gcomparáid le dearaí eile?