Caingean arna tabhairt an 5 Meitheamh 2024 – an Coimisiún Eorpach v Poblacht na hIodáile

(Cás C-394/24)

(C/2024/4318)

Teanga an cháis: an Iodáilis

Páirtithe

Iarratasóir: an Coimisiún Eorpach (ionadaithe: G. Gattinara, M. Ioan, Gníomhairí)

Cosantóir: Poblacht na hIodáile

An t-ordú atá á lorg

Iarrann an t-iarratasóir ar an gCúirt Bhreithiúnais:

a dhearbhú,

—

trí Airteagal 168a(1) d’Fhoraithne Uachtarán na Poblachta (DPR) an 30 Bealtaine 2002 Uimh. 115 a léiriú agus a chur i bhfeidhm sa chaoi nach meastar gur idirbheart tráchtála de réir bhrí Airteagal 2(1) de Threoir 2011/7/AE ó Pharlaimint na hEorpa agus ón gComhairle an 16 Feabhra 2011 maidir le cur in aghaidh íocaíochtaí déanacha in idirbhearta tráchtála (1) é soláthar na seirbhíse chun fearais cúléisteachta teileafóin agus bugála seomra a ligean ar cíos ar luach saothair, agus

—

trí mhainneachtain a áirithiú ó 2018 go 2023 gur chomhlíon a riaracháin phoiblí go héifeachtach na téarmaí íocaíochta atá leagtha amach in Airteagal 4(3) de Threoir 2011/7/AE maidir le híocaíocht as soláthar na seirbhíse chun fearais cúléisteachta teileafóin agus bugála seomra a ligean ar cíos ar luach saothair,

gur mhainnigh Poblacht na hIodáile a hoibleagáidí a chomhlíonadh faoi na forálacha sin den Treoir;

2)	a ordú do Phoblacht na hIodáile costais na n-imeachtaí a íoc.

Saincheisteanna dlí agus príomhargóintí

Leis an gcéad saincheist dlí dá chaingean, áitíonn an Coimisiún nach bhfuil léiriú agus cur i bhfeidhm Airteagal 168a(1) de DPR Uimh. 115/2002 an 30 Bealtaine 2002 ar bhealach a fhágann go n-eisiafar soláthar na seirbhíse chun fearais cúléisteachta teileafóin agus bugála seomra a ligean ar cíos ar luach saothair ón gcoincheap ‘idirbheart tráchtála’ de réir bhrí Airteagal 2(1) de Threoir 2011/7/AE ag luí le hoibleagáidí na hIodáile faoin bhforáil sin. De réir an Choimisiúin, is toradh é seo ar léiriú litriúil, comhthéacsúil agus teileaeolaíoch ar an bhforáil atá i gceist.

Leis an dara saincheist dlí dá chaingean, aitíonn an Coimisiún go sáraíonn an meán-am a thógann údaráis na hIodáile íoc as fearais cúléisteachta teileafóin agus bugála seomra a fháil ar cíos ó 2018 go 2023 thar an tréimhse 30 lá a leagtar síos in Airteagal 4(3) den Treoir sin. Dá bhrí sin, dar leis an gCoimisiún, níl a hoibleagáidí faoin bhforáil sin comhlíonta ag Poblacht na hIodáile.

(1) IO 2011 L 48, lch. 1.