‘(55)

Leis an ionsaí a rinne an Rúis in aghaidh na hÚcráine agus a thionchair dhíreacha agus indíreacha, lena n-áirítear na smachtbhannaí eacnamaíocha arna bhforchur agus na frithbhearta arna ndéanamh ag an Rúis, mar shampla, measann an Coimisiún gur cruthaíodh éiginnteachtaí suntasacha eacnamaíocha, gur cuireadh isteach ar shreafaí trádála agus ar shlabhraí soláthair agus gur tháinig méaduithe móra eisceachtúla ar phraghsanna, méaduithe nach raibh coinne leo, go háirithe ar phraghsanna gáis nádúrtha agus leictreachais, ach ar phraghsanna ábhar ionchuir agus amhábhar agus earraí príomhúla eile freisin. I dteannta a chéile, tá na héifeachtaí sin ina gcúis le suaitheadh tromchúiseach ar an ngeilleagar sna Ballstáit uile. Bíonn éifeachtaí díreacha nó indíreacha ag suaitheadh sa slabhra soláthair agus ag an méadú ar an éiginnteacht, agus bíonn tionchar acu ar go leor earnálacha. Ina theannta sin, bíonn tionchar ag ardú ar phraghsanna fuinnimh ar nach mór gach gníomhaíocht eacnamaíoch i ngach Ballstát. Dá réir sin, measann an Coimisiún go mbíonn tionchar ag suaitheadh tromchúiseach eacnamaíoch ar réimse leathan earnálacha eacnamaíocha i ngach Ballstát. Ar an mbonn sin, measann an Coimisiún gurb iomchuí na critéir a leagan síos chun measúnú a dhéanamh ar bhearta státchabhrach a fhéadfaidh na Ballstáit a ghlacadh chun an suaitheadh tromchúiseach sin a leigheas.’

‘(56)

Tá bonn cirt faoi leith le Státchabhair agus is féidir a dhearbhú go bhfuil sí comhoiriúnach leis an margadh inmheánach ar bhonn Airteagal 107(3)(b) CFAE, ar feadh tréimhse teoranta, más rud é go réitíonn sí an ganntanas leachtachta a bhfuil gnóthais ag dul i ngleic leis, gnóthais a bhfuil tionchar díreach nó indíreach ag suaitheadh tromchúiseach an gheilleagair orthu arb iad ionsaí míleata na Rúise in aghaidh na hÚcráine agus a thionchair dhíreacha agus indíreacha is cúis leis, lena n-áirítear na smachtbhannaí arna bhforchur agus na frithbhearta arna ndéanamh ag an Rúis, mar shampla. Sa chomhthéacs sin, tugann an Coimisiún dá aire, cé go ndéanann an suaitheadh eacnamaíoch difear don gheilleagar go forleathan ar fud na mBallstát, go bhféadfadh sé go mbeadh níos mó ama ag teastáil chun bearta áirithe a chur chun feidhme chun na héifeachtaí sin a leigheas go héifeachtach, go sonrach in earnálacha an táirgthe phríomhúil táirgí talmhaíochta, na hiascaireachta agus an dobharshaothraithe. Sna hearnálacha sonracha sin, ina bhfuil sciar an-ard de ghnóthais bheaga, tá am breise ag teastáil le haghaidh an phróisis coigeartaithe chun an ghéarchéim reatha a shárú go héifeachtach. Ina theannta sin, i gcás táirgeadh príomhúil táirgí talmhaíochta go háirithe agus i gcás an dobharshaothraithe go pointe áirithe, is gnéithe earnáilsonracha ábhartha iad an spleáchas ar na séasúir fáis bhliantúla agus na timthriallta buainte, go háirithe an gá ionchuir a fháil tráth atá praghsanna an-ard agus na táirgí deiridh a dhíol ansin ar na praghsanna atá íseal faoi láthair. Is iad sin a thugann údar leis an tréimhse cur chun feidhme a bheith an-fhada sna hearnálacha sin.’

‘c.

deonaítear an chabhair faoin 30 Meitheamh 2024 (*1) , cé is moite de chabhair a dheonaítear do ghnóthais atá gníomhach i dtáirgeadh príomhúil táirgí talmhaíochta, mar aon le gnóthais atá gníomhach sna hearnálacha iascaireachta agus dobharshaothraithe, ar féidir cabhair a dheonú dóibh go dtí an 31 Nollaig 2024;