(1)

Maidir le hAirteagal 101(1) CFAE, ní mór léiriú a dhéanamh sa chaoi go gcuirtear cosc leis ar rialacha arna nglacadh ag comhlachas atá freagrach as comórtais sacair a eagrú ar leibhéal na hEorpa agus arna gcur chun feidhme ag an gcomhlachas sin agus ag na cumainn sacair náisiúnta is baill den chomhlachas sin, agus lena gceanglaítear ar gach club a ghlacann páirt sna comórtais sin líon íosta imreoirí arna dtraenáil ag an gclub sin féin nó laistigh de dhlínse chríche an chumainn náisiúnta lena bhfuil an club sin cleamhnaithe a chur ar liosta na n-imreoirí agus ar liosta an scuaid cluiche, agus go gcuirtear cosc leis ar rialacha arna nglacadh ag cumann atá freagrach as comórtais sacair a eagrú ar an leibhéal náisiúnta, lena gceanglaítear ar gach club a ghlacann páirt sna comórtais sin líon íosta imreoirí traenáilte i ndlínse chríche an chumainn sin a áireamh ar liosta na n-imreoirí agus ar liosta an scuaid cluiche, más rud é go bhfuil sé suite, ar an gcéad dul síos, go bhféadfadh cinntí na gcomhlachas gnóthas dul i gcion ar an trádáil idir na Ballstáit agus, ar an dara dul síos, go bhfuil sé de chuspóir nó d’éifeacht acu srian a chur leis an iomaíocht idir clubanna sacair ghairmiúil, ach amháin, sa dara ceann de na cásanna sin, má léirítear, trí argóintí áititheacha agus fianaise áititheach, go bhfuil bonn cirt leo trí chuspóir dlisteanach amháin nó níos mó a shaothrú agus go bhfuil siad fíor-riachtanach chun na críche sin.

(2)

Maidir le hAirteagal 101(3) CFAE, ní mór léiriú a dhéanamh sa chaoi nach gceadaítear leis díolúine a fháil ó chur i bhfeidhm mhír 1 den Airteagal sin le haghaidh a leithéide de chinntí ó chomhlachais gnóthas, más rud é go bhfuil na cinntí ar neamhréir leis an mír sin, ach i gcás ina léirítear, trí argóintí áititheacha agus fianaise áititheach, go bhfuil na coinníollacha go léir is gá chuige sin á gcomhlíonadh.

(3)

Maidir le hAirteagal 45 CFAE, ní mór léiriú a dhéanamh sa chaoi go gcuirtear cosc leis ar rialacha arna nglacadh ag cumann atá freagrach as comórtais sacair a eagrú ar leibhéal náisiúnta lena gceanglaítear ar gach club a ghlacann páirt sna comórtais sin líon íosta imreoirí arna dtraenáil i ndlínse chríche an chumainn sin a chur le liosta a imreoirí agus a chuimsiú ar liosta an scuaid cluiche, mura suitear gurb iomchuí na rialacha le baint amach an chuspóra maidir le hearcaíocht agus traenáil imreoirí óga sacair ghairmiúil a spreagadh go háitiúil a áirithiú go comhsheasmhach córasach agus nach dtéitear leo thar a bhfuil riachtanach leis an gcuspóir sin a bhaint amach.