Breithiúnas na Cúirte Breithiúnais (an Séú Dlísheomra) an 25 Eanáir 2024 (iarraidh ar réamhrialú ó Consiglio di Stato – an Iodáil) – GC agus páirtithe eile v Croce Rossa Italiana, Ministero della Difesa, Ministero della Salute, Ministero dell'Economia e delle Finanze, Presidenza del Consiglio dei ministri

(Cás C-389/22 (1), Croce Rossa Italiana agus páirtithe eile)

(Tarchur chun réamhrialú - Airteagal 267 CFAE - Raon feidhme na hoibleagáide atá ar chúirteanna náisiúnta a bhreithníonn ag an gcéim dheiridh tarchur a dhéanamh - Eisceachtaí ar an oibleagáid sin - Cásanna ina bhfuil an léiriú ceart ar dhlí an Aontais Eorpaigh chomh soiléir sin nach bhfágann sé aon amhras réasúnta - Coinníoll chun go sásóidh an chúirt náisiúnta atá ag breithniú ag an gcéim dheiridh go mbeadh sé chomh soiléir céanna do na cúirteanna den chéim dheiridh de chuid na mBallstát agus don Chúirt Bhreithiúnais - Treoir 1999/70/CE - Creat-chomhaontú maidir le hobair théarma shocraithe a thug ETUC, UNICE agus CEEP i gcrích - Clásail 2 agus 3 - An coincheap ‘oibrí ar théarma seasta’ - Baill de chor míleata na Croise Deirge na hIodáile - Clásal 5 - Bearta chun mí-úsáid a chosc, agus i gcás inarb iomchuí, pionós a ghearradh orthu a eascraíonn as conarthaí fostaíochta nó caidrimh ar théarma seasta a úsáid - Athrú ar stádas ‘oibrithe ar théarma seasta’ chuig ‘oibrithe ar feadh thréimhse éiginnte - Clásal 4 - Prionsabal an neamh-idirdhealaithe)

(C/2024/1823)

Teanga an cháis: an Iodáilis

An chúirt a rinne an tarchur

Consiglio di Stato

Páirtithe sna príomhimeachtaí

Iarratasóir: GC agus páirtithe eile

Cosantóirí: Croce Rossa Italiana, Ministero della Difesa, Ministero della Salute, Ministero dell'Economia e delle Finanze, Presidenza del Consiglio dei ministri

An chuid oibríochtúil

Ní mór Airteagal 267 CFAE a léiriú sa chaoi go bhféadfaidh cúirt náisiúnta nach bhfuil a cinntí faoi réir athbhreithniú breithiúnach faoin dlí náisiúnta staonadh ó cheist maidir le léiriú ar dhlí an Aontais a chur faoi bhráid na Cúirte agus í a réiteach ar a freagracht féin i gcás ina bhfuil an léiriú ceart ar dhlí an Aontais chomh soiléir sin nach bhfágtar aon amhras réasúnta. Ní mór measúnú a dhéanamh ar an bhféidearthacht sin a bheith ann i bhfianaise shaintréithe sonracha dhlí an Aontais Eorpaigh, na ndeacrachtaí ar leith a bhaineann lena léiriú agus an riosca go mbeadh éagsúlachtaí sa chásdlí laistigh den Aontas Eorpach. Ní cheanglaítear ar an gcúirt náisiúnta sin a chruthú go mion go ndéanfadh cúirteanna eile na rogha deiridh de chuid na mBallstát agus an Chúirt an léiriú céanna, ach ní mór, ar bhonn measúnaithe ina gcuirtear na tosca sin san áireamh, tagtha ar an gcreideamh go mbeadh sé chomh soiléir céanna do na cúirteanna náisiúnta eile sin agus don Chúirt Bhreithiúnais.

Maidir le Clásal 5(1) den Chreat-Chomhaontú maidir le hobair théarma shocraithe, a tugadh i gcrích an 18 Márta 1999, mar a leagtar amach in iarscríbhinn a ghabhann le Treoir 1999/70/CE an 28 Meitheamh 1999 ón gComhairle i dtaca leis an gCreat-chomhaontú maidir le hobair théarma shocraithe a thug ETUC, UNICE agus CEEP i gcrích

Ní mór léiriú a dhéanamh mar seo a leanas:

—

go mbaineann sé le caidreamh cosúil leis an gcaidreamh a bunaíodh idir foireann cóir mhíleata an Croce Rossa Italiana (Cros Dhearg na hIodáile) lena n-iarrtar orthu seirbhís shealadach a chomhlíonadh, sa mhéid gur féidir an caidreamh sin a shonrú mar ‘conarthaí nó caidrimh ar thréimhse socraithe i ndiadh a chéile’ de réir bhrí an chreat-chomhaontú agus,

—

i gcás ina mbaineann an foráil sin le caidreamh den sórt sin, cuirtear cosc leis an reachtaíocht náisiúnta lena gceadaítear an síneadh agus an athnuachan ar feadh roinnt blianta as a chéile ar orduithe glao na foirne sin, sa mhéid nach n-áirítear leis an reachtaíocht seo aon cheann do na bearta a bhfuil mar aidhm leo cosc a chur ar mhí-úsáid conarthaí ar théarma seasta i ndiaidh a chéile agus, i gcás inarb iomchuí, pionós a ghearradh ina leith, mar a leagtar amach i gClásal 5(1)(a) go (c), nó bearta dlíthiúla coibhéiseacha

Maidir le prionsabal an neamh-idirdhealaithe, arna chur chun feidhme agus a tugadh foirm nithiúil le Clásal (4)(1) de Chreat-Chomhaontú maidir le hobair théarma shocraithe, a tugadh i gcrích an 18 Márta 1999, mar a leagtar amach in Iarscríbhinn a ghabhann le Treoir 1999/70,

ní mór léiriú a dhéanamh mar seo a leanas:

nach gcuirtear cosc ar reachtaíocht náisiúnta lena gceadaítear do dhaoine amhail foireann a chór míleata a iarrtar orthu seirbhís leanúnach a chomhlíonadh, tar éis atheagrú a dhéanamh ar eintiteas amhail Cros Dhearg na hIodáile, leanúint ar aghaidh lena ngníomhaíocht a dhéanamh i seirbhís an eintitis sin ach nach gcuirtear ar fáil an fhéidearthacht do dhaoine amhail foireann a chor míleata a iarrtar orthu seirbhís sealadach a chomhlíonadh agus go bhfuil a ngníomhaíocht tagtha chun críche i seirbhís an eintitis sin ar an dáta a leagadh síos chun na críche sin.

(1) IO C 35, 30.1.2023