—

ag féachaint don Chonradh ar an Aontas Eorpach (CAE), go háirithe Airteagail 2, 4, 6 agus 21 de,

—

ag féachaint d’Airteagail 16, 223, 225 agus 226 den Chonradh ar Fheidhmiú an Aontais Eorpaigh (CFAE),

—

ag féachaint do Chairt um Chearta Bunúsacha an Aontais Eorpaigh (‘an Chairt’) agus go háirithe Airteagail 7, 8, 11, 17, 21, 41, 42 agus 47 di,

—

ag féachaint do Threoir 2002/58/CE ó Pharlaimint na hEorpa agus ón gComhairle an 12 Iúil 2002 maidir le sonraí pearsanta a phróiseáil agus maidir le príobháideachas a chosaint san earnáil cumarsáide leictreonaí (an Treoir maidir le príobháideachas agus cumarsáid leictreonach) (1) (‘an Treoir maidir le ríomh-Phríobháideachas’),

—

ag féachaint do Rialachán (AE) 2016/679 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil agus maidir le saorghluaiseacht na sonraí sin, agus lena n-aisghairtear Treoir 95/46/CE (an Rialachán Ginearálta maidir le Cosaint Sonraí) (2),

—

ag féachaint do Threoir (AE) 2016/680 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le próiseáil sonraí pearsanta ag údaráis inniúla chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, agus maidir le saorghluaiseacht na sonraí sin, agus lena n-aisghairtear Cinneadh Réime 2008/977/CGB ón gComhairle (3),

—

ag féachaint do Threoir 2013/40/AE ó Pharlaimint na hEorpa agus ón gComhairle an 12 Lúnasa 2013 maidir le hionsaithe ar chórais faisnéise agus lena n-ionadaítear Cinneadh Réime 2005/222/CGB (4) ón gComhairle (‘Treoir maidir le Cibearshlándáil’).

—

ag féachaint do Rialachán (AE) 2021/821 ó Pharlaimint na hEorpa agus ón gComhairle an 20 Bealtaine 2021 lena mbunaítear córas Aontais chun onnmhairiú, bróicéireacht, cúnamh teicniúil, idirthuras agus aistriú ítimí dé-úsáide a rialú (5) (‘an Rialachán maidir le Dé-Úsáid’),

—

ag féachaint do Chinneadh (CBES) 2019/797 ón gComhairle an 17 Bealtaine 2019 maidir lebearta sriantacha i gcoinne cibirionsaithe a chuireann an tAontas nó a Bhallstáit (6) i mbaol, arna leasú le Cinneadh (CBES) 2021/796 ón gComhairle an 17 Bealtaine 2021  (7),

—

ag féachaint don Ionstraim maidir le toghadh fheisirí Pharlaimint na hEorpa trí vótáil chomhchoiteann dhíreach (8),

—

ag féachaint do Chinneadh 95/167/CE, Euratom, CEGC ó Pharlaimint na hEorpa, ón gComhairle agus ón gCoimisiún an 06 Márta 1995 maidir leis na forálacha mionsonraithe lena rialaítear feidhmiú cheart fiosrúcháin Pharlaimint na hEorpa (9),

—

ag féachaint do Cinneadh (AE) 2022/480 ó Pharlaimint na hEorpa an 10 Márta 2022 maidir le coiste fiosrúcháin a chur ar bun chun imscrúdú a dhéanamh ar úsáid earraí spiaireachta faireachais Pegasus agus earraí spiaireachta faireachais coibhéiseacha, agus lena sainítear ábhar an fhiosrúcháin, mar aon le freagrachtaí, líon comhaltaí agus téarma oifige an choiste (10),

—

ag féachaint do Threoir (AE) 2018/843 ó Pharlaimint na hEorpa agus ón gComhairle an 30 Bealtaine 2018 lena leasaítear Treoir (AE) 2015/849 maidir le cosc a chur le húsáid an chórais airgeadais chun críocha sciúrtha airgid nó maoinithe sceimhlitheoireachta, agus lena leasaítear Treoracha 2009/138/CE agus 2013/36/AE (11) (an Treoir maidir leis an Sciúradh Airgid),

—

ag féachaint don togra le haghaidh rialachán ó Pharlaimint na hEorpa agus ón gComhairle an 16 Meán Fómhair 2022 lena mbunaítear creat comhchoiteann le haghaidh seirbhísí meán sa mhargadh inmheánach (An Gníomh Eorpach um Shaoirse na Meán) agus lena leasaítear Treoir 2010/13/AE (COM(2022)0457),

—

ag féachaint d’Airteagal 12 de Dhearbhú Uilechoiteann Chearta an Duine,

—

ag féachaint don bhreithiúnas ó Chúirt Bhreithiúnais an Aontais Eorpaigh (CBAE) i gcás C-37/20 (12) maidir leis an treoir i gcoinne sciúradh airgid i ndáil leis an bhforáil trína ndéantar rialú go bhfuil an fhaisnéis maidir le húinéireacht thairbhiúil cuideachtaí atá corpraithe laistigh de chríoch na mBallstát neamhbhailí i ngach cás d’aon duine den phobal i gcoitinne,

—

ag féachaint d’Airteagal 17 den Chúnant Idirnáisiúnta ar Chearta Sibhialta agus Polaitiúla,

—

ag féachaint do Chairt na Náisiún Aontaithe agus do Phrionsabail Threoracha na Náisiún Aontaithe maidir le Gnó agus Cearta an Duine (13),

—

ag féachaint don ráiteas ó Michelle Bachelet, Ard-Choimisinéir na Náisiún Aontaithe um Chearta an Duine, an 19 Iúil 2022 dar teideal ‘Use of spyware to surveil journalists and human rights defenders’[Úsáid earraí spiaireachta chun iriseoirí agus cosantóirí chearta an duine a shárú],

—

ag féachaint do bharúil ó Choimisinéir Chomhairle na hEorpa um Chearta an Duine Dunja Mijatovic an 27 Eanáir 2023 dar teideal ‘Highly intrusive spyware threatens the essence of human rights’[Earraí spiaireachta an-chunórach ag bagairt ar bhunbhrí chearta an duine] (14),

—

ag féachaint do Réamhbharúlacha an Mhaoirseora Eorpaigh ar Chosaint Sonraí maidir le hEarraí Spiaireachta Nua-Aimseartha an 15 Feabhra 2022  (15),

—

ag féachaint don Choinbhinsiún Eorpach chun Cearta an Duine agus Saoirsí Bunúsacha a Chosaint, agus go háirithe Airteagail 8, 10, 13, 14 agus 17 de, agus do na prótacail a ghabhann leis an gCoinbhinsiún sin,

—

ag féachaint do Mheasúnú Europol ar Bhagairt na Coireachta Tromchúisí agus Eagraithe (SOCTA) 2021 dar teideal ‘A Corrupting Influence: the Infiltration and Undermining of Europe’s Economy and Society by Organised Crime’ [Tionchar Éillitheach: Geilleagar agus Sochaí na hEorpa a Insíothlú agus An Bonn a Bhaint dóibh trí Choireacht Eagraithe],

—

ag féachaint do thuarascáil 2017 ó Ghníomhaireacht an Aontais Eorpaigh um Chearta Bunúsacha (FRA) dar teideal ‘Surveillance by intelligence services: fundamental rights safeguards and remedies in the EU’ [Faireachas arna dhéanamh ag seirbhísí faisnéise: coimircí agus leigheasanna maidir le cearta bunúsacha in AE’, agus ar na nuashonruithe a cuireadh faoi bhráid an Choiste Fiosrúcháin an 28 Feabhra 2023 chun úsáid Pegasus agus earraí spiaireachta faireachais comhchosúla (PEGA) a imscrúdú,

—

ag féachaint do rún uaithi an 12 Márta 2014 maidir le clár faireachais Údarás Slándála Náisiúnta SAM, comhlachtaí faireachais i mBallstáit éagsúla agus an tionchar atá acu ar chearta bunúsacha shaoránaigh AE agus ar chomhar trasatlantach i gceartas agus Gnóthaí Baile (16) agus go háirithe do na moltaí atá ann maidir le slándáil TF a neartú in institiúidí, comhlachtaí agus gníomhaireachtaí AE,

—

ag féachaint do thuairim 24/2022 ó MECS an 11 Samhain 2022 maidir leis an nGníomh Eorpach um Shaoirse na Meán,

—

ag féachaint don ghluais maidir le bogearraí mailíseacha agus bogearraí spiaireachta arna tarraingt suas ag Gníomhaireacht an Aontais Eorpaigh um Chibearshlándáil (ENISA),

—

ag féachaint do Chinneadh an Ombudsman Eorpaigh maidir leis an gcaoi a ndearna an Coimisiún Eorpach measúnú ar an tionchar ar chearta an duine sula dtugann sé tacaíocht do thíortha na hAfraice chun cumais faireachais a fhorbairt (cás 1904/2021/MHZ),

—

ag féachaint do ráiteas an 2 Feabhra 2023 ó Irene Kahn, ó Rapóirtéir Speisialta na Náisiún Aontaithe maidir le saoirse tuairimíochta agus cainte agus ón Uasal Fernand de Varennes, Rapóirtéir Speisialta na Náisiún Aontaithe maidir le saincheisteanna mionlaigh lena n-éilítear imscrúdú ar an gclár spiaireachta líomhnaithe atá dírithe ar cheannairí na Catalóine (17),

—

ag féachaint don tuarascáil ón gCoimisiún Eorpach um Dhaonlathas tríd an Dlí (Coimisiún na Veinéise) maidir le maoirseacht dhaonlathach ar na seirbhísí slándála (18) agus dá thuairim dar teideal ‘Poland – Opinion on the Act of 15 January 2016 amending the Police Act and Certain Other Acts’ [An Pholainn — Tuairim maidir le Gníomh an 15 Eanáir 2016 lena leasaítear an Gníomh Póilíneachta agus Gníomhartha Áirithe Eile] (19),

—

ag féachaint don tuarascáil ón gCoiste Fiosrúcháin chun imscrúdú a dhéanamh ar úsáid Pegasus agus earraí spiaireachta faireachais comhchosúla (A9-0189/2023),

—

ag féachaint do Riail 208(12) dá Rialacha Nós Imeachta,

A.

de bhrí, a bhuí le hiarrachtaí CitizenLab agus Amnesty Tech agus le hiliomad iriseoirí iniúchacha, gur léiríodh gur bhain comhlachtaí rialtais i roinnt tíortha, idir Bhallstáit AE agus tíortha nach bhfuil in AE araon, úsáid as Pegasus agus as earraí spiaireachta faireachais coibhéiseacha i gcoinne iriseoirí, polaiteoirí, oifigigh forfheidhmithe dlí, taidhleoirí, dlíodóirí, lucht gnó, gníomhaithe na sochaí sibhialta agus gníomhaithe eile, chun críocha polaitiúla agus fiú chun críocha coiriúla; de bhrí gur cúis mhór imní iad na cleachtais sin agus go léiríonn siad an baol go mbainfí mí-úsáid as teicneolaíochtaí faireachais chun an bonn a bhaint de chearta bunúsacha an duine, den daonlathas agus de phróisis toghcháin;

B.

de bhrí, aon uair a luaitear an téarma ‘earra spiaireachta’ sa tuarascáil, go gciallaíonn sé ‘Pegasus agus earraí spiaireachta faireachais coibhéiseacha’ mar a shainmhínítear i gCinneadh na Parlaiminte Coiste PEGA a chur ar bun;

C.

de bhrí gur tugadh faoi deara gur bhain gníomhaithe stáit úsáid as earraí spiaireachta d’aon turas ar bhealach míthreorach trí úsáid a bhaint as earraí spiaireachta a d’fhéadfadh é féin a cheilt mar chlár, comhad nó inneachar dlisteanach (‘capall Trojan’), amhail teachtaireachtaí bréige ó institiúidí poiblí; de bhrí, i gcásanna áirithe, gur bhain údaráis phoiblí úsáid as oibreoirí teileafóin chun inneachar mailíseach a tharchur chuig gléas an duine a bhfuiltear ag díriú air; de bhrí gur féidir earraí spiaireachta a imscaradh trí leochaileachtaí nialasacha a shaothrú gan idirghníomhaíocht na sprice le hinneachar ionfhabhtaithe, gur féidir leo gach rian dá láithreacht a bhaint tar éis a dhíshuiteála agus gur féidir leo an nasc idir oibreoirí cianda agus freastalaí a anaithnidiú;

D.

de bhrí, sna laethanta tosaigh den chumarsáid mhóibíleach, go ndearnadh cúléisteacht trí ghlaonna a idircheapadh agus, ina dhiaidh sin, trí theachtaireachtaí téacs a idircheapadh i bhformáid shimplí;

E.

de bhrí gur tháinig tionscal na spiaire chun cinn mar thoradh ar theacht chun cinn feidhmchlár cumarsáide soghluaiste criptithe, rud a bhain leas as na leochaileachtaí atá ann cheana i gcórais oibriúcháin fóin chliste chun bogearraí a shuiteáil a dhéanann earraí spiaireachta a iompórtáil ar an bhfón, lena n-áirítear trí ionfhabhtuithe ‘neamh-chliceáil’ gan eolas an úsáideora nó aon ghníomhaíocht a rinne an t-úsáideoir, lenar féidir sonraí a asbhaint roimh chriptiú; de bhrí go bhfágann na hearraí spiaireachta neamh-chliceáil sin, trína dearadh, go bhfuil sé deacair grinnscrúdú éifeachtach agus fóinteach a dhéanamh ar a úsáid;

F.

de bhrí go ndéantar eolas faoi leochaileachtaí i gcórais bogearraí a thrádáil go díreach idir páirtithe, nó go n-éascaíonn bróicéirí é; de bhrí go n-áirítear gníomhaithe neamhstáit agus eagraíochtaí coiriúla sa trádáil sin;

G.

de bhrí go mbaintear an bonn ó shláine agus slándáil na cumarsáide agus ó chibearshlándáil shaoránaigh AE ó éadáil, ó thrádáil agus ó thaisceadh leochaileachtaí nialasacha;

H.

de bhrí gur cheart go leanfadh earraí spiaireachta faireachais de bheith ina eisceacht agus go n-éileodh sé réamhúdarú breithiúnach éifeachtach, ceangailteach agus fóinteach ó údarás breithiúnach neamhchlaonta agus neamhspleách, nach mór dó a áirithiú go bhfuil an beart riachtanach, comhréireach agus teoranta go docht do chásanna a dhéanann difear don tslándáil náisiúnta nó a bhaineann le sceimhlitheoireacht agus coireacht thromchúiseach; de bhrí gur dócha go mbainfear mí-úsáid as teicnící faireachais i dtimpeallachtaí gan seiceálacha agus ceartúcháin éifeachtacha;

I.

de bhrí nach mór d’údarás maoirseachta neamhspleách ex post grinnscrúdú a dhéanamh ar aon earraí spiaireachta faireachais, nach mór dó a áirithiú go ndéanfar aon fhaireachas údaraithe i gcomhréir le cearta bunúsacha agus i gcomhréir leis na coinníollacha arna leagan amach ag Cúirt Bhreithiúnais an Aontais Eorpaigh (CBAE), ag an gCúirt Eorpach um Chearta an Duine (ECtHR) agus ag Coimisiún na Veinéise; de bhrí gur cheart don údarás maoirseachta ex post sin a ordú go gcuirfí deireadh leis anbhfaireachas láithreach má chinnteargo bhfuil sé ar neamhréir leis na cearta agus na coinníollacha thuasluaite;

J.

de bhrí, i gcás earraí spiaireachta faireachais nach gcomhlíonann ceanglais a leagtar amach i ndlí an Aontais agus i ndlí-eolaíocht CBAE agus ECtHR, go bhfuil sé contrártha leis na luachanna a chumhdaítear in Airteagal 2 CAE agus ar na cearta bunúsacha a chumhdaítear sa Chairt i gceist agus, go háirithe iad siúd in Airteagail 7, 8, 11, 17, 21 agus 47 di, lena n-aithnítear na cearta, na saoirsí agus na prionsabail shonracha amhail urraim don saol príobháideach agus saol teaghlaigh, cosaint sonraí pearsanta, an tsaoirse chun tuairimí a nochtadh agus faisnéis a fháil, an ceart chun maoine, an ceart chun neamh-idirdhealú, mar aon leis an gceart chun leigheas éifeachtach, triail chóir a fháil agus toimhde na neamhchiontachta;

K.

de bhrí sa Chairt agus i gcoinbhinsiúin idirnáisiúnta go leagtar síos cearta na ndaoine ar díríodh orthu, go háirithe an ceart chun príobháideachais agus an ceart chun triail chóir a fháil, agus i rialacha an Aontais maidir le cearta daoine atá faoi dhrochamhras agus daoine cúisithe; de bhrí go bhfuil na cearta sin deimhnithe ag cásdlí CBAE agus ECtHR;

L.

de bhrí go bhféadfadh tionchar an fhaireachais spriocdhírithe ar mhná a bheith thar a bheith díobhálach, ós rud é go bhféadfadh na húdaráis leas a bhaint as an iniúchadh sóisialta méadaithe atá ar mhná chun arm a dhéanamh as sonraí príobháideacha agus dlúthchaidrimh a bhaintear trí earraí spiaireachta le haghaidh feachtais clúmhillte;

M.

de bhrí gur léir ó teistiméireachtaí na ndaoine ar díríodh orthu fiú má tá leigheas dlí agus cearta sibhialta ar pháipéar, go mbíonn siad den chuid is mó ar neamhní in ainneoin bac a bheith á chur ag comhlachtaí rialtais, easpa nó neamhchur chun feidhme cheart na ndaoine ar díríodh orthu go gcuirfí ar an eolas iad agus an bac riaracháin atá ar dhaoine aonair a chruthú gur díríodh orthu; de bhrí, fiú i gcórais a bhfuil nósanna imeachta tapa agus oscailte acu, go bhfágann nádúr na n-earraí spiaireachta go bhfuil sé an-deacair údar a chruthú agus conas mar a díríodh ar an duine aonair agus a mhéid a díríodh ar an duine sin;

N.

de bhrí nár ghlac cúirteanna le fianaise fhóiréinseach saineolaithe neamhspleácha ach le fianaise atá bunaithe ar scrúdú a dhéanamh ar na húdaráis, ar an tslándáil nó ar fhorfheidhmiú an dlí a líomhnaítear a bheith taobh thiar d’ionsaí; de bhrí go bhfágann sé sin spriocanna i gcás paradacsúil gan aon rogha inmharthana chun ionfhabhtú earraí spiaireachta a chruthú;

O.

de bhrí go ndearna rialtas na Polainne coimircí institiúideacha agus dlíthiúla a lagú agus a dhíchur, lena n-áirítear nósanna imeachta maoirseachta agus grinnscrúdaithe cuí, rud a fhágann daoine ar díríodh orthu gan aon leigheas fóinteach; de bhrí gur imscaradh earraí spiaireachta faireachais Pegasus go neamhdhleathach chun críocha polaitiúla chun spiaireacht a dhéanamh ar iriseoirí, ar pholaiteoirían fhreasúra, ar dhlíodóirí, ar ionchúisitheoirí agus ar ghníomhaithe na sochaí sibhialta;

P.

de bhrí go ndearna rialtas na hUngáire coimircí institiúideacha agus dlíthiúla a lagú agus a dhíchur, lena n-áirítear nósanna imeachta maoirseachta agus grinnscrúdaithe cuí, rud a fhágann go héifeachtach daoine a díríodh orthu gan aon leigheas fóinteach; de bhrí gur imscaradh earraí spiaireachta faireachais Pegasus go neamhdhleathach chun críocha polaitiúla chun spiaireacht a dhéanamh ar iriseoirí, ar pholaiteoirían fhreasúra, ar dhlíodóirí, ar ionchúisitheoirí agus ar ghníomhaithe na sochaí sibhialta;

Q.

de bhrí gur deimhníodh go hoifigiúil go ndearna Seirbhís Faisnéise Náisiúnta na Gréige (EYP) cúléisteacht ar Fheisire Pharlaimint na hEorpa (FPE) don Ghréig agus ar iriseoir Gréagach araon agus gur díríodh orthu le hearraí spiaireachta Predator; de bhrí go ndearna EYP cúléisteacht ar iarfhostaí de chuid na Stát Aontaithe-na Gréige ag Meta ag an am céanna agus gur díríodh air le hearraí spiaireachta Predtaor, a bhfuil a úsáid neamhdhleathach faoi dhlí na Gréige; de bhrí, de réir tuarascálacha ó na meáin, gur líomhnáiodh gur díríodh ar Fheisirí de chuid pháirtithe an fhreasúra agus de chuid pháirtithe an rialtais sa Ghréig, ar ghníomhaithe páirtí agus ar iriseoirí freisin le hearraí spiaireachta Predator nó le gnáthchineál cúléisteachta nó leis an dá rud ag EYP; de bhrí go séanann rialtas na Gréige gur cheannaigh nó gur úsáid rialtas na Gréige Predator, ach gur dócha go raibh Predator in úsáid ag daoine nó thar ceann daoine atá an-ghar d’oifig an Phríomh-Aire; de bhrí gur admhaigh rialtas na Gréige gur dheonaigh sé ceadúnais onnmhairiúcháin do Intellexa chun earraí spiaireachta Predator a dhíol le rialtais dhiansmachtúla, amhail Madagascar agus an tSúdáin; de bhrí gur fhreagair an rialtas don scannal le leasuithe reachtacha lena laghdaítear tuilleadh cearta daoine a bhfuiltear ag díriú orthu a chur ar an eolas tar éis faireachas a bheith déanta orthu agus go bhfuil sé ag cur bac breise ar obair na n-údarás neamhspleách;

R.

de bhrí gur sainaithníodh trí nochtadh dhá chatagóir daoine sa Spáinn ar díríodh earraí spiaireachta orthu; de bhrí go n-áirítear ar an gcéad dul síos an Príomh-Aire agus an tAire Cosanta, an tAire Gnóthaí Baile agus Ardoifigigh eile; de bhrí go bhfuil an dara catagóir mar chuid de chatagóir dá ngairtear ‘CatalanGate’ ag an eagraíocht Citizen Lab, agus go n-áirítear ann 65 duine spriocdhírithe, lena n-áirítear daoine polaitiúla ó Rialtas réigiúnach na Catalóine, Feisirí de ghluaiseacht neamhspleáchais pro-Catalan, Feisirí de Pharlaimint na hEorpa, dlíodóirí, acadóirí agus gníomhaithe na sochaí sibhialta; de bhrí, i mí na Bealtaine 2022, gur thug údaráis na Spáinne cead díriú ar 18nduine a bhfuil údarú cúirte acu, cé nár nocht siad na barántais ná aon fhaisnéis eile go dtí seo, agus iad ag agairt na slándála náisiúnta nuair a bhí siad freagrach as úsáid earraí spiaireachta faireachais sa Spáinn; de bhrí go líomhnaítear gur díríodh ar 47 nduine eile freisin, ach nach bhfuair siad aon fhaisnéis seachas ó Citizen Lab;

S.

de bhrí nár deimhníodh aon líomhaintí maidir le hionfhabhtuithe earraí spiaireachta sa Chipir; de bhrí gur mol onnmhairiúcháin Eorpach tábhachtach do thionscal an fhaireachais í an Chipir agus gur suíomh tarraingteach do chuideachtaí a dhíolann teicneolaíochtaí faireachais í;

T.

de bhrí go bhfuil comharthaí láidre ann go bhfuil rialtais Mharacó agus Ruanda, i measc nithe eile, tar éis díriú ar shaoránaigh ardphróifíle de chuid an Aontais a bhfuil earraí spiaireachta acu, lena n-áirítear Uachtarán na Fraince, an Príomh-Aire, an tAire Cosanta agus Aire Gnóthaí Baile na Spáinne, Príomh-Aire na Beilge an tráth sin, iar-Uachtarán an Choimisiúin agus iar-Phríomh-Aire na hIodáile, agus Carine Kanimba, iníon Paul Rusesabagina;

U.

de bhrí gur féidir glacadh leis go cinnte gur cheannaigh nó gur úsáid na Ballstáit uile córas earraí spiaireachta amháin nó níos mó; de bhrí go staonfaidh formhór na rialtas san Aontas Eorpach ó úsáid neamhdhlisteanach spiaireachta, ach go bhfuil an baol mí-úsáide an-sochreidte in éagmais creata láidir dlí lena n-áirítear coimircí agus maoirseacht, agus i bhfianaise na ndúshlán teicniúil maidir le hionfhabhtuithe a bhrath agus a rianú;

V.

de bhrí nár chuir formhór de rialtais na mBallstát agus parlaimintí na mBallstát faisnéis fhóinteach ar fáil do Pharlaimint na hEorpa faoina gcreataí dlíthiúla lena rialaítear úsáid spiaireachta thar an méid a bhí ar eolas go poiblí cheana féin, d’ainneoin oibleagáid a bheith ann déanamh amhlaidh de bhun Airteagal 3(4) den Chinneadh ó Pharlaimint na hEorpa, ón gComhairle agus ón gCoimisiún an 6 Márta 1995 maidir leis na forálacha mionsonraithe lena rialaítear feidhmiú cheart fiosrúcháin Pharlaimint na hEorpa; de bhrí go bhfuil sé deacair measúnú a dhéanamh ar fhorfheidhmiú reachtaíocht an Aontais agus ar na coimircí, an mhaoirseacht agus na modhanna sásaimh lena gcuirtear cosc ar chosaint leormhaith chearta bunúsacha na saoránach;

W.

de bhrí de réir Airteagal 4(3) CAE, ‘de bhua phrionsabal an chomhair dhílis, beidh an tAontas agus na Ballstáit de chúnamh ag a chéile, agus lánurraim fhrithpháirteach á tabhairt acu dá chéile, i dtaca le cúraimí a chineann ó na Conarthaí a chur i gcrích’;

X.

de bhrí go bhfuil saoránacht Mhálta faighte ag roinnt príomhfhigiúirí ó thionscal na n-earraí spiaireachta, rud a éascaíonn a n-oibríochtaí laistigh den Aontas agus uaidh;

Y.

de bhrí go bhfuil nó go raibh go leor forbróirí agus díoltóiríearraí spiaireachta cláraithe i mBallstát amháin nó níos mó; de bhrí go n-áirítear ar shamplaí Grúpa NSO a bhfuil láithreacht chorparáideach aige i Lucsamburg, sa Chipir, san Ísiltír agus sa Bhulgáir; máthairchuideachta Intellexa, Thalestris Limited, in Éirinn, sa Ghréig, san Eilvéis agus sa Chipir; DSIRF san Ostair; QuaDream sa Chipir; Amesys agus Nexa Technologies sa Fhrainc; Tykelab agus RCS Lab san Iodáil; agus FinFisher (neamhghnóthach anois) sa Ghearmáin;

Z.

de bhrí nach bhfuil an tAontas Eorpach rannpháirteach i gComhshocraíocht Wassenaar maidir le Rialuithe Onnmhairiúcháin le haghaidh Gnáth-Arm agus Earraí agus Teicneolaíochtaí Dé-Úsáide; de bhrí go bhfuil na Ballstáit uile, seachas an Chipir, rannpháirteach i gComhshocraíocht Wassenaar, cé gur thíolaic an Chipir iarraidh ar dhul isteach i gComhshocraíocht Wassenaar i bhfad ó shin; de bhrí go bhfuil an Chipir faoi cheangal ag an Rialachán maidir le Dé-Úsáid

AA.

de bhrí go bhfuil feidhm i bprionsabal ag córas onnmhairiúcháin Iosrael (20) maidir le saoránaigh uile Iosrael, fiú, agus iad ag oibriú as an Aontas; de bhrí nach tír rannpháirteach é Iosrael i gComhshocraíocht Wassenaar ach go maíonn sé go gcuireann sé an caighdeáin lena mbaineann i bhfeidhm mar sin féin;

AB.

de bhrí go ndéantar onnmhairiú earraí spiaireachta ón Aontas chuig tíortha nach baill den Aontas iad a rialáil sa Rialachán maidir le Dé-úsáid, a athbhreithníodh in 2021; de bhrí gur fhoilsigh an Coimisiún a chéad tuarascáil cur chun feidhme i mí Mheán Fómhair 2022 (21);

AC.

de bhrí go mbunaíonn roinnt táirgeoirí earraí spiaireachta a onnmhairíonn chuig tríú tíortha iad féin laistigh den Aontas chun meas a bhaint amach agus iad ag trádáil in earraí spiaireachta le réimis dhiansmachtúla; de bhrí go bhfuil onnmhairí ón Aontas chuig réimis dhiansmachtúla nó gníomhaithe neamhstáit ag tarlú, rud a sháraíonn rialacha onnmhairiúcháin AE;

AD.

de bhrí go bhfuil Amesys agus Nexa Technologies á n-ionchúiseamh faoi láthair sa Fhrainc as teicneolaíocht faireachais a onnmhairiú chuig an Libia, chuig an Éigipt agus chuig an Araib Shádach; de bhrí gur tuairiscíodh gur onnmhairigh cuideachtaí Intellexa atá lonnaithe sa Ghréig a gcuid táirgí go dtí an Bhanglaidéis, an tSúdáin, Madagascar agus tír Arabach amháin ar a laghad; de bhrí go bhfuil bogearraí FinFisher á n-úsáid ag na scórtha tíortha ar fud an domhain, lena n-áirítear Angóla, Bairéin, an Bhanglaidéis, an Éigipt, an Aetóip, an Ghabúin, an Iordáin, an Chasacstáin, Maenmar, Oman, Catar, an Araib Shádach, an Tuirc agus seirbhísí faisnéise Mharacó, ar cuireadh ina leith go raibh earraí spiaireachta Pegasus á n-úsáid acu i gcoinne iriseoirí, chosantóirí chearta an duine, na sochaí sibhialta agus polaiteoirí ag Amnesty International agus Forbidden Stories; de bhrí nach eol ar deonaíodh ceadúnais onnmhairiúcháin chun earraí spiaireachta a onnmhairiú chuig na tíortha sin go léir; de bhrí gur chúisigh oifig an ionchúisitheora phoiblí in München iarfheidhmeannaigh FinFisher toisc gur onnmhairíodh teicneolaíocht faireachais chuig an Tuirc gan ceadúnas onnmhairiúcháin;

AE.

de bhrí go léiríonn líon na ndaoine a fhreastalaíonn ar aontaí arm agus ar ISSWorld a raibh acmhainneachtaí earraí spiaireachta á margú acu leitheadúlacht na soláthraithe earraí spiaireachta agus táirgí agus seirbhísí gaolmhara ó thríú tíortha, a bhfuil ceanncheathrú líon suntasach díobh in Iosrael (e.g. NSO Group, Wintego, Quadream agus Cellebrite), agus go nochtann sé táirgeoirí móra san India (ClearTrail), sa Ríocht Aontaithe (BAe Systems agus Black Cube) agus in Aontas na nÉimíríochtaí Arabacha (DarkMatter), cé go dtugann Liosta Eintiteas na Stát Aontaithe ina ndúliostaítear táirgeoirí earraí spiaireachta atá lonnaithe in Iosrael (NSO Group agus Candiru), sa Rúis (Positive Technologies) agus i Singeapór (Computer Security Initiative Consultancy PTE LTD.) chun suntais tuilleadh éagsúlacht tionscnaimh i measc táirgeoirí earraí spiaireachta; de bhrí go bhfreastalaíonn raon leathan údarás poiblí Eorpach ar an aonach freisin, lena n-áirítear fórsaí póilíneachta áitiúla;

AF.

de bhrí go bhforáiltear le hAirteagal 4(2) CAE go leanfaidh an tslándáil náisiúnta de bheith ina freagracht ar gach Ballstát faoi leith agus air siúd amháin;

AG.

de bhrí, áfach, gur rialaigh CBAE (cás C-623/17) cé gur faoi na Ballstáit atá sé a leasanna slándála bunriachtanacha a shainiú agus bearta iomchuí a ghlacadh chun a slándáil inmheánach agus sheachtrach a áirithiú, díreach ós rud é go ndearnadh beart náisiúnta chun slándáil náisiúnta a chosaint, ní féidir dlí AE a dhéanamh neamh-infheidhme agus na Ballstáit a dhíolmhú ón oibleagáid atá orthu an dlí sin a chomhlíonadh;

AH.

de bhrí gur rialaigh CBAE (cás C-203/15) ‘nach mór Airteagal 15(1) de Threoir 2002/58/CE ó Pharlaimint na hEorpa agus ón gComhairle an 12 Iúil 2002 maidir le maidir le próiseáil sonraí pearsanta agus cosaint príobháideachais san earnáil cumarsáide leictreonaí (an Treoir maidir le príobháideachas agus cumarsáid leictreonach), arna leasú le Treoir 2009/136/CE ó Pharlaimint na hEorpa agus ón gComhairle an 25 Samhain 2009, arna léamh i bhfianaise Airteagail 7, 8 agus 11 agus Airteagal 52(1) den Chairt, a léirmhíniú mar chosc a chur ar reachtaíocht náisiúnta lena ndéantar foráil, chun críche coireacht a chomhrac, do choinneáil ghinearálta agus neamh-idirdhealaitheach sonraí tráchta agus suímh uile na suibscríobhaithe agus úsáideoirí cláraithe uile a bhaineann le gach modh cumarsáide leictreonaí;

AI.

de bhrí gur rialaigh CBAE (cás C-203/15) nach mór Airteagal 15(1) de Threoir 2002/58/CE, arna leasú le Treoir 2009/136/CE, arna léamh i bhfianaise Airteagail 7, 8 agus 11 agus Airteagal 52(1) den Chairt, a léirmhíniú mar chosc a chur ar reachtaíocht náisiúnta lena rialaítear cosaint agus slándáil sonraí tráchta agus suímh agus, go háirithe, rochtain na n-údarás inniúil náisiúnta ar na sonraí arna gcoinneáil, i gcás nach bhfuil an cuspóir a shaothraítear leis an rochtain sin, i gcomhthéacs na coireachta a chomhrac, srianta go heisiach do choireacht thromchúiseach a chomhrac, i gcás nach bhfuil an rochtain faoi réir athbhreithniú roimh ré ag cúirt nó ag údarás riaracháin neamhspleách, agus i gcás nach bhfuil aon cheanglas ann gur cheart na sonraí lena mbaineann a choinneáil laistigh den Aontas Eorpach;

AJ.

de bhrí go soiléirítear i gcásdlí ECtHR nach mór gach faireachas a dhéanamh i gcomhréir leis an dlí, go bhfónann sé d’aidhm dhlisteanach agus go mbeidh sé riachtanach agus comhréireach: de bhrí, thairis sin, nach mór don chreat dlíthiúil coimircí beachta, éifeachtacha agus cuimsitheacha a sholáthar maidir le deiseanna ordaithe, forghníomhaithe agus sásaimh a d’fhéadfadh a bheith ann i gcoinne bearta faireachais, ar coimircí iad nach mór a bheith faoi réir athbhreithniú breithiúnach leormhaith agus maoirseacht éifeachtach (22);

AK.

de bhrí go bhfuil feidhm ag Coinbhinsiún Chomhairle na hEorpa chun Daoine Aonair a Chosaint maidir le Sonraí Pearsanta a Phróiseáil go hUathoibríoch (Coinbhinsiún 108), a nuachóiríodh le déanaí mar Choinbhinsiún 108+, maidir le próiseáil sonraí pearsanta chun críocha slándála stáit (náisiúnta), lena n-áirítear cosaint; de bhrí gur páirtithe sa choinbhinsiún sin iad na Ballstáit uile;

AL.

de bhrí go dtagann gnéithe tábhachtacha d’úsáid earraí spiaireachta chun cionta coiriúla a chosc, a imscrúdú, a bhrath nó a ionchúiseamh agus pionóis choiriúla a fhorghníomhú, lena n-áirítear coimirciú in aghaidh bagairtí ar an tslándáil phoiblí agus na bagairtí sin a chosc, faoi raon feidhme dhlí AE;

AM.

de bhrí go leagtar síos sa Chairt na coinníollacha maidir le teorannú ar fheidhmiú na gceart bunúsach, lena gceanglaítear nach mór foráil a dhéanamh dó leis an dlí, ní mór bunbhrí na gceart agus na saoirsí lena mbaineann a urramú, ní mór dó a bheith faoi réir phrionsabal na comhréireachta, agus ní fhorchuirfear é ach amháin má tá gá leis agus má chomhlíonann sé go fírinneach cuspóirí leasa ghinearálta arna n-aithint ag an Aontas nó an gá atá le cearta agus saoirsí daoine eile a chosaint; de bhrí, i gcás ina úsáidtear úsáid earraí spiaireachta, go bhfeadfadh an leibhéal trasnaíochta ar an gceart chun príobháideachais a bheith chomh holc sin, is deimhin go bhfuil an ceart á bhaint den duine aonair agus nach féidir a mheas go bhfuil an úsáid comhréireach, gan beann ar cé acu is féidir nó nach féidir a mheas gur gá an beart chun cuspóirí dlisteanacha stáit dhaonlathaigh a ghnóthú;

AN.

de bhrí go bhforáiltear leis an Treoir maidir le Ríomhphríobháideachas nach mór do na Ballstáit rúndacht na cumarsáide a áirithiú; de bhrí gurb ionann úsáid uirlisí faireachais agus srian ar an gceart chun trealamh teirminéil a chosaint ceart a thugtar leis an Treoir maidir le ríomhphríobháideachas; de bhrí go gcuireann na srianta sin dlíthe náisiúnta maidir le hearraí spiaireachta faoi raon feidhme na Treorach maidir le ríomh-Phríobháideachas ar bhealach atá cosúil leis na dlíthe náisiúnta maidir le coinneáil sonraí; de bhrí nach mbeadh imscaradh rialta na teicneolaíochta earraí spiaireachta ionsaithí comhoiriúnach le dlíchóras an Aontais;

AO.

de bhrí, faoin dlí idirnáisiúnta, go bhfuil sé de cheart ag stát imscrúdú a dhéanamh ar choireanna a d’fhéadfadh a bheith ann laistigh dá dhlínse agus nach mór dó dul i muinín cúnamh ó stáit eile ina gcaithfear an t-imscrúdú a dhéanamh i stáit eile mura bhfuil bonn ann chun imscrúduithe a dhéanamh i ndlínsí eile faoi chomhaontú idirnáisiúnta nó i ndlí an Aontais, i gcás na mBallstát;

AP.

de bhrí go dtarlaíonn ionfhabhtú feiste le hearraí spiaireachta agus bailiú sonraí ina dhiaidh sin trí fhreastalaithe soláthraithe seirbhíse soghluaiste; de bhrí, mar thoradh ar fhánaíocht saor in aisce laistigh den Aontas, go bhfuil conarthaí soghluaiste ag daoine uaireanta ó Bhallstáit eile seachas an Ballstát ina bhfuil cónaí orthu, nach bhfuil aon bhunús dlí faoi láthair i ndlí an Aontais chun sonraí a bhailiú sa Bhallstát eile trí úsáid a bhaint as earraí spiaireachta;

AQ.

de bhrí gur iarr David Kaye, iar-Rapóirtéir Speisialta na Náisiún Aontaithe maidir leis an gceart chun tuairimí a nochtadh (23) a chur chun cinn agus a chosaint agus Irene Khan, Rapóirtéir Speisialta reatha na Náisiún Aontaithe maidir leis an gceart chun tuairimí a nochtadh (24) a chur chun cinn agus a chosaint, moratóir láithreach ar úsáid, aistriú agus díol uirlisí faireachais go dtí go gcuirfear dianchoimircí maidir le cearta an duine i bhfeidhm chun cleachtais a rialáil agus chun a ráthú go n-úsáidfidh Rialtais agus gníomhaithe neamhstáit na huirlisí sin ar bhealaí dlisteanacha;

AR.

de bhrí go bhfuil cásanna ann ina bhfuil cuideachtaí earraí spiaireachta, go háirithe Intellexa, tar éis an teicneolaíocht idircheaptha agus eastósctha féin a dhíol, ach an tseirbhís ar fad freisin, dá ngairtear ‘haiceáil mar sheirbhís’ nó ‘cibearfhaisnéis ghníomhach’ freisin, lena gcuirtear pacáiste modhanna teicneolaíochta faireachais agus idircheaptha ar fáil, chomh maith le hoiliúint don fhoireann agus tacaíocht theicniúil, oibríochtúil agus mhodheolaíoch; de bhrí go bhféadfadh an tseirbhís sin ligean don chuideachta smacht a bheith aici ar an oibríocht faireachais ina hiomláine agus na sonraí faireachais a chomhiomlánú; de bhrí go bhfuil beagnach dodhéanta do na húdaráis ábhartha maoirseacht agus rialú a dhéanamh ar an gcleachtas sin; de bhrí go bhfágann sé sin go bhfuil sé deacair cloí le prionsabail na comhréireachta, an riachtanais, na dlisteanachta, na dlíthiúlachta agus na leormhaitheasa; de bhrí nach bhfuil an tseirbhís sin ceadaithe ag gníomhaireacht onnmhairithe cosanta Iosrael (DECA); de bhrí gur úsáideadh an Chipir chun na teorainneacha atá ann cheana faoi dhlí Iosrael a sheachaint chun haiceáil a chur ar fáil mar sheirbhís;

AS.

de bhrí nach mór do na Ballstáit Treoir 2014/24/AE agus Treoir 2009/81/CE maidir le soláthar poiblí agus cosanta a chomhlíonadh, faoi seach; de bhrí nach mór údar leormhaith a thabhairt le maoluithe faoi Airteagal 346(1)(b) CFAE, toisc go gcuirtear san áireamh go sainráite i dTreoir 2009/81/CE saintréithe íogaire an tsoláthair cosanta agus go gcomhlíonann siad Comhaontú EDT maidir le Soláthar Rialtais, arna leasú 30 Márta 2012 (25) má tá siad ina bpáirtí ann;

AT.

de bhrí gur chuir MECS i bhfios go láidir nach mór do na Ballstáit an Coinbhinsiún Eorpach um Chearta an Duine agus dlí-eolaíocht ECtHR a urramú, lena leagtar síos teorainneacha do ghníomhaíochtaí faireachais don tslándáil náisiúnta; de bhrí, thairis sin, nuair a úsáidtear é chun críocha fhorfheidhmiú an dlí, nach mór don fhaireachas dlí AE a chomhlíonadh agus go háirithe Cairt agus treoracha AE amhail an Treoir maidir le ríomh-Phríobháideachas agus an Treoir maidir le Forfheidhmiú an Dlí;

AU.

de bhrí gur tuairiscíodh go ndearna institiúidí móra airgeadais iarracht táirgeoirí earraí spiaireachta a spreagadh chun staonadh ó chaighdeáin iomchuí maidir le cearta an duine agus le dícheall cuí a chur i bhfeidhm agus leanúint d’earraí spiaireachta a dhíol le réimis dhiansmachtúla;

AV.

de bhrí, sa chlár Fís 2020, go bhfuil Iosraelrangaithe sa tríú háit i measc Tíortha Comhlachaithe le haghaidh rannpháirtíocht fhoriomlán sa chlár; de bhrígo bhfuil buiséad foriomlán EUR 95,5 billiún ag an gComhaontú Fís Eorpach le hIosrael do 2021-27 (26); de bhrí gur cuireadh roinnt cistí ar fáil do chuideachtaí míleata agus slándála Iosrael trí na Cláir Eorpacha sin (27);

AW.

de bhrí gurb é Rialachán (AE) 2021/947 (28) (‘an Rialachán maidir leis an Eoraip Dhomhanda’) an phríomhionstraim reachtach le haghaidh bheartais forbartha an Aontais agus go bhféadfar cistiú ón Aontas a sholáthar trí na cineálacha maoinithe dá bhforáiltear leis an Rialachán Airgeadais; de bhrí gur féidir cúnamh a chur ar fionraí i gcás díghrádú ar an daonlathas, ar chearta an duine nó ar an smacht reachta i dtríú tíortha;