Sampla 1: Tosaíonn táirgeoir de bheith ag deimhniú go bhfuil a chuid sútha talún go léir saor ó lotnaidicídí agus gearrann sé préimh ar a ndíol. Tugann táirgeoir iomaíoch faoi deara go bhfuil a shútha talún uile á ndíol amach ag an gcéad táirgeoir ar phraghas níos airde agus tosaíonn seisean ar an rud céanna a dhéanamh. Is gearr go dtosaíonn táirgeoirí eile ag déanamh an rud ceanna agus is féidir leo préimh a ghearradh toisc go ndeimhníonn siad go léir go bhfuil a gcuid sútha talún saor ó lotnaidicídí. I gcás den sórt sin, níl aon chomhaontú ann: tá gach táirgeoir ag gníomhú go neamhspleách, agus iompar reatha nó iompar a bhfuil coinne leis óna a chuid iomaitheoirí á chur san áireamh.

Sampla 2: Tagann grúpa tairgeoirí le chéile chun idirphlé a dhéanamh ar na bealaí chun saothrú sútha talún a dhéanamh níos inbhuanaithe. Déanann siad idirphlé ar an gcaoi ina gcuirfidís stop le lotnaidicídí a úsáid ar a gcuid sútha talún, ach is údar imní dóibh é go ndéanfaidh iomaitheoirí eile iad a shladghearradh maidir le praghsanna má stopann siad sin as a stuaim féin. Deir siad go léir nach n-úsáidfidh siad lotnaidicídí sa séasúr dár gcionn má chomhaontaíonn na táirgeoirí eile leis an ngealltanas céanna. Ní dhéanann siad doiciméad scríofa ina ndéantar taifeadadh ar ghealltanas den sórt sin. Ní úsáideann aon cheann de na táirgeoirí lotnaidicídí ar a sútha talún an bhliain dár gcionn. Is comhaontú é sin. Cé nár cuireadh i scríbhinn é, chuir na táirgeoirí in iúl go soiléir go raibh sé beartaithe acu iad féin a iompar ar an margadh ar bhealach sonrach, tríd na ráitis a thug siad ag an gcruinniú mar aon le trí bheart a dhéanamh de réir a mbriathar.

Sampla: D’fhéadfadh comhaontú cothrománach a bheith bainteach le, mar shampla, gealltanas idir táirgeoirí iomaíocha i leith éanlaith chlóis a thógáil ach i gcomhréir le caighdeáin áirithe leasa ainmhithe atá níos airde ná mar a shainordaítear le dlí an Aontais nó leis an dlí náisiúnta agus i gcomhréir leis na caighdeáin sin amháin. D’fhéadfadh comhaontú ingearach a bheith bainteach, mar shampla, le gealltanas idir táirgeoirí agus dáileoirí áirithe i ndáil le héanlaith chlóis a thógtar i gcomhréir le caighdeáin inbhuanaitheachta áirithe agus leo siúd amháin, ar caighdeáin iad atá níos airde ná mar a shainordaítear le dlí an Aontais nó leis an dlí náisiúnta.

Sampla: Déanann Eagraíocht Idirchraoibhe cáise ionadaíocht ar thrí leibhéal sa slabhra soláthair agraibhia: táirgeoirí bainne, táirgeoirí cáise agus dáileoirí. Foráiltear le rialacha na hEagraíochta Idirchraoibhe go bhféadfaidh an Eagraíocht Idirchraoibhe comhaontú a dhéanamh nó teacht ar chinneadh ar fhormheas ó thromlach na gcomhaltaí ar gach leibhéal. Agus comhaontú inbhuanaitheachta á thabhairt i gcrích san Eagraíocht Idirchraoibhe maidir le táirgeadh agus dáileadh níos inbhuanaithe cáise, vótálann tromlach 70 % de tháirgeoirí bainne (an chéad leibhéal), 60 % de tháirgeoirí cáise (an dara leibhéal) agus 55 % de dháileoirí bainne agus cáise (tríú leibhéal) i bhfabhar. Sa chás seo, is féidir le comhlachtaí cinnteoireachta na hEagraíochta Idirchraoibhe comhaontú inbhuanaitheachta a thabhairt i gcrích atá ceangailteach ar a gcomhaltaí uile. Chun críocha Airteagal 210a a chur i bhfeidhm, tá gach táirgeoir agus dáileoir atá ina gcomhaltaí den Eagraíocht Idirchraoibhe, go díreach nó go hindíreach trína gcomhlachtaí ionadaíocha agus trína gcomhlachais ionadaíocha, ina bpáirtithe sa chomhaontú inbhuanaitheachta, lena n-áirítear iad siúd nár vótáil i bhfabhar an chomhaontaithe.

Sampla 1: Chun go gcuirfear saothrú inbhuanaithe úll chun cinn, comhaontaíonn grúpa sraitheanna ollmhargaí a dhéanann, le chéile, 70 % de na ceannacháin mhórdhíola úll i mBallstát, nach gceannóidh siad ach úlla a ndeimhnítear ina leith go bhfuil siad saor ó lotnaidicídí. Ós rud é gurb é an grúpa seo a dhéanann sciar mór de na ceannacháin, mothaíonn formhór na dtáirgeoirí úill nach bhfuil aon rogha acu ach cloí leis an gcaighdeán arna leagan síos ag an ngrúpa sraitheanna ollmhargaí chun a áirithiú nach n-eisiatar a gcuid táirgí ón margadh. Scoireann siad de lotnaidicídí a úsáid agus deimhníonn siad go bhfuil a gcuid úll saor ó lotnaidicídí, seachas dul i mbaol gan a bheith in ann a dtáirgeacht úll a dhíol. Is follasach gur ann do chomhaontú idir na sraitheanna ollmhargaí. Mar sin féin, ní páirtithe iad táirgeoirí úill i gcomhaontú den sórt sin. Cé go bhfuil na táirgeoirí ag soláthar táirgí a chomhlíonann caighdeán inbhuanaitheachta, ní dhearna siad iad féin aon chomhaontú leis na sraitheanna ollmhargaí maidir le hábhar an chaighdeáin agus níl an rogha a rinne siad an caighdeán a chomhlíonadh coinníollach ar tháirgeoirí úll eile a bheith ag comhlíonadh an chaighdeáin sin. Mar thoradh air sin, ní bheidh na táirgeoirí ina bpáirtithe sa chomhaontú arna thabhairt i gcrích idir an grúpa sraitheanna ollmhargaí. Mar sin féin, ní chuireann sé sin cosc ar tháirgeoirí a bheith ina bpáirtithe i gcomhaontú inbhuanaitheachta leis na sraitheanna ollmhargaí amach anseo.

Sampla 2: I gcás atá beagán difriúil, aontaíonn grúpa sraitheanna ollmhargaí nach gceannóidh siad ach úlla atá deimhnithe saor ó lotnaidicídí. Forbraíonn eagraíocht de tháirgeoirí úll marc deimhniúcháin lena ndeimhnítear gur den chineál saor ó lotnaidicídí iad táirgí a gcuid comhaltaí. Soláthraíonn an eagraíocht ceadúnas le haghaidh an mhairc deimhniúcháin lena úsáid ar an bpacáistiú de chuid na n-ollmhargaí agus ina n-ábhair mhargaíochta. Leithdháiltear na táillí ceadúnais ar na táirgeoirí ar comhaltaí den eagraíocht iad. Sa chás sin, is comhlachas de tháirgeoirí í an eagraíocht a ghlac cinneadh an marc deimhniúcháin a ghlacadh agus a sholáthar. Is comhaontú inbhuanaitheachta idir táirgeoirí é an cinneadh sin. Ina theannta sin, d’fhéadfaí an comhaontú ceadúnaithe a síníodh idir an eagraíocht agus na hollmhargaí a áireamh sa chomhaontú inbhuanaitheachta céanna.

Sampla 1: Tugann táirgeoirí piorraí agus grúpa mórdhíoltóirí comhaontú i gcrích. Faoin gcomhaontú, glacfaidh táirgeoirí teicnící táirgthe, a chuirfidh deireadh le húsáid cóireálacha ceimiceacha a chuireann feabhas ar sheilfré na bpiorraí, rud a fhágfaidh go dtiocfaidh méadú ar dhramhaíl bia mar go méadóidh teicnící táirgthe den sórt sin an riosca go mbeidh na piorraí loite nó millte sula sroicheann siad an tomhaltóir. Chun a áirithiú go bhfanfaidh na piorraí i riocht maith sula seachadtar chuig miondíoltóirí iad, ní mór do na mórdhíoltóirí na coinníollacha maidir le saoráidí stórála a oiriúnú agus na modhnuithe forléirithe is gá a dhéanamh. I gcás den sórt sin, baineann na feabhsuithe inbhuanaitheachta le táirgeadh agus le trádáil táirgí talmhaíochta araon. Bheadh feidhm ag Airteagal 210a maidir leis an gcuid sin den chomhaontú inbhuanaitheachta a bhaineann le modhnuithe stórála mórdhíoltóirí, toisc go mbeadh dlúthbhaint ag an gcuid sin le táirge níos inbhuanaithe a chur ar fáil ar an margadh.

Sampla 2: Aontaíonn grúpa miondíoltóirí agus mórdhíoltóirí córas coimeádán athchúrsáilte a úsáid chun torthaí agus glasraí úra a iompar agus a chur i láthair sa stór. Cé go mbaineann an comhaontú le caighdeán inbhuanaitheachta a d’fhéadfadh dul thar an méid atá sainordaithe sa dlí, ní bheidh feidhm ag Airteagal 210a, toisc nach mbeidh baint ag aon táirgeoir leis an gcomhaontú.

Sampla 3: Comhaontaíonn grúpa miondíoltóirí agus táirgeoirí bia ar thionscnamh geilleagair chiorclaigh chun comhchóras bailithe dramhaíola a chruthú. Geallann miondíoltóirí a gcuid dramhaíola a bhailiú agus leasacháin a dhéanamh astu níos déanaí agus geallann táirgeoirí go n-úsáidfidh siad na leasacháin ina dtáirgeadh. Ós rud é go mbaineann an comhaontú le gealltanas na dtáirgeoirí an leasachán a ghintear tríd an gcóras bailithe dramhaíola a úsáid, beidh feidhm ag Airteagal 210a.

Sampla 1: Baineann comhaontú le pacáistiú inbhuanaithe braiche i málaí loingseoireachta uiscedhíonacha atá go hiomlán in-athchúrsáilte, agus le pacáistiú beorach i gcascaí atá déanta go hiomlán as miotail athchúrsáilte. Ní bheidh feidhm ag Airteagal 210a ach amháin maidir leis an gcuid den chomhaontú i ndáil le braich ós rud é gur táirge í an bheoir nach bhfuil liostaithe in Iarscríbhinn I.

Sampla 2: Baineann comhaontú le soláthar dramhaíola bia ó roinnt bialann agus ó na táirgeoirí a sholáthraíonn na bialanna sin. Úsáidfear an dramhaíl sin ansin chun bithbhreoslaí a tháirgeadh agus a thráchtálú. Ní bheidh feidhm ag Airteagal 210a ach amháin maidir leis an gcuid sin den chomhaontú i ndáil le soláthar dramhaíola chun bithbhreoslaí a tháirgeadh agus ní bheidh feidhm aige maidir le tráchtálú bithbhreoslaí nach n-áirítear in Iarscríbhinn I.

Sampla 3: Baineann comhaontú le soláthar éanlaithe clóis a tháirgtear go hinbhuanaithe do sheirbhísí ceaintín. Baineann an comhaontú le táirgeoirí éanlaithe clóis a sholáthraíonn éanlaith chlóis do tháirgeoirí béile ullmhaithe, agus eagraíocht a dhéanann ionadaíocht ar cheaintíní bia a cheannaíonn béilí ullmhaithe ó na táirgeoirí béilí. Ní bheadh feidhm ag Airteagal 210a ach amháin maidir leis an gcuid den chomhaontú a bhaineann le héanlaith chlóis a sholáthar do na táirgeoirí béilí ullmhaithe agus ní bheadh aige maidir leis an gcuid a bhaineann le béilí ullmhaithe a sholáthar do cheaintíní. Tá feoil éanlaithe clóis amháin ina tháirge atá liostaithe in Iarscríbhinn I; níl na béilí ullmhaithe ina bhfuil an fheoil sin iontu liostaithe.

Sampla 4: Baineann comhaontú le trátaí, beacáin, glasraí agus luibheanna inbhuanaithe a sholáthar lena bpróiseáil ina anlainn éagsúla, amhail peisteo, trátaí le beacáin, trátaí le hubhthoradh, oinniúin agus caprais, agus anlainn den sórt sin a thráchtálú. Ní bheadh feidhm ag Airteagal 210a ach amháin maidir leis an gcuid sin den chomhaontú a bhaineann le trátaí, beacáin agus luibheanna inbhuanaithe a tháirgeadh agus a sholáthar, agus ní bheadh feidhm aige maidir le tráchtálú na n-anlann, toisc gur táirgí nach bhfuil liostaithe in Iarscríbhinn I iad na hanlainn.

Sampla: D’fhéadfadh sé gurb é cuspóir na hinbhuanaitheachta creimeadh ithreach a chosc. Bheadh sé d’aidhm ag an gcomhaontú inbhuanaitheachta caighdeán a chur i bhfeidhm lena bhféadfaí spriocanna intomhaiste a leagan síos i bhfoirm critéir chainníochtúla nó cháilíochtúla a théann thar na caighdeáin éigeantacha, mar shampla, trí bharra cumhdaigh a úsáid sa gheimhreadh chun creimeadh ithreach a sheachaint. D’fhéadfaí bearta sonracha cur chun feidhme a áireamh leis an gcomhaontú, amhail oibleagáidí i leith innealra nó trealamh ar leith a úsáid, i leith uirlisí bainistithe riosca nó i leith tacú le scaipeadh eolais theicniúil, lena n-áirítear oiliúint, comhairle, comhar agus malartú eolais, i leith teicneolaíochtaí digiteacha nó i leith cleachtais i ndáil le bainistiú inbhuanaithe cothaitheach.

Samplaí de chuspóirí inbhuanaitheachta a chumhdaítear faoi Airteagal 210a:

Samplaí de chomhaontuithe inbhuanaitheachta atá dírithe ar chuspóirí a chumhdaítear le hAirteagal 210a:

Sampla: Is é is aidhm do chomhaontú inbhuanaitheachta úsáid lotnaidicídí a laghdú 8 %. Tá táirgeoir, atá ina pháirtí sa chomhaontú, gníomhach i ndá shuíomh gheografacha éagsúla. Ag ceann de na suíomhanna, geallann an táirgeoir an caighdeán a chomhlíonadh ach, ag an gceann eile, leanann an táirgeoir ag úsáid na lotnaidicídí a mhéid is féidir. Féadfaidh an suíomh ina bhfuil sé d’aidhm ag an táirgeoir an caighdeán a chomhlíonadh, agus an suíomh sin amháin, tairbhiú den eisiamh a leagtar síos in Airteagal 210a.

Sampla 1: I gcomhaontú a bhfuil sé de chuspóir aige lotnaidicídí a laghdú, leagtar síos caighdeán lena bhforordaítear laghdú 40 % ar úsáid lotnaidicídí. Sa chás sin, bheadh sé riachtanach a léiriú go mbeidh laghdú intomhaiste ar úsáid lotnaidicídí mar thoradh ar an gcaighdeán a chur i bhfeidhm. Ní bheadh sé riachtanach a léiriú, áfach, gur tháinig feabhas ar cháilíocht an uisce sa réigiún mar gheall ar an laghdú ar úsáid lotnaidicídí ag táirgeoirí aonair, amhail laghdú ar sceitheadh lotnaidicídí i screamhuisce.

Sampla 2: Má tá sé d’aidhm ag comhaontú inbhuanaitheachta an bhithéagsúlacht a mhéadú trí phlandaí fiáine áirithe atá fabhrach d’fheithidí agus do bhunchineálacha áirithe a shaothrú, d’fhéadfadh sé nach bhféadfaí torthaí na bithéagsúlachta feabhsaithe a chainníochtú i dtéarmaí uimhriúla. Mar sin féin, ní mór na hiarrachtaí a rinneadh, agus na torthaí a baineadh amach, a bheith inscríofa, cé nach gá go mbeadh siad i dtéarmaí uimhriúla: mar shampla, ba cheart do na páirtithe a shainaithint cé hiad na plandaí atá níos cairdiúla d’fheithidí, nó cé hiad na bunchineálacha gur cheart a phlandáil.

Sampla de sprioc atá ina cheangal ar na Ballstáit, ach gan a bheith ina cheangal ar dhaoine aonair: Leis an togra ón gCoimisiún le haghaidh rialachán maidir le húsáid inbhuanaithe lotnaidicídí (29) leagtar síos spriocanna chun úsáid agus riosca foriomlán lotnaidicídí ceimiceacha agus úsáid lotnaidicídí ‘níos guaisí’ a laghdú 50 % faoi 2030. Cé go mbeadh na spriocanna sin ceangailteach ar na Ballstáit, ní bheadh siad ina gceangal ar dhaoine aonair. Dá bhrí sin, ní mheasfaí gur caighdeáin éigeantacha iad na spriocanna sin chun críocha Airteagal 210a.

Sampla de sprioc atá ina cheangal ar réigiún, ach gan a bheith ina cheangal ar dhaoine aonair: I gcás ina nglactar an togra le haghaidh rialachán maidir le húsáid inbhuanaithe lotnaidicídí, d’fhéadfadh réigiún cinneadh a dhéanamh sprioc a fhorchur air féin chun úsáid lotnaidicídí a laghdú 50 % de réir a chéile faoi 2030. Cé go mbeadh na spriocanna sin ina gceangal ar na Ballstáit, ní bheidís ina gceangal ar dhaoine aonair. Dá bhrí sin, ní mheasfaí gur caighdeáin éigeantacha iad na spriocanna sin chun críocha Airteagal 210a.

Sampla de sprioc atá ina cheangal ar dhaoine aonair: I gcás ina nglactar an togra le haghaidh rialachán maidir le húsáid inbhuanaithe lotnaidicídí, d’fhéadfadh Ballstát cinneadh a dhéanamh ceanglas ceangailteach a chur chun feidhme ar tháirgeoirí úsáid lotnaidicídí a laghdú de réir a chéile faoi leibhéil éagsúla (mar shampla 30/50/70 %) in earnálacha éagsúla faoi 2030. Bheadh forálacha náisiúnta den sórt sin ina gceangal ar dhaoine aonair agus, dá bhrí sin, mheasfaí gur caighdeáin éigeantacha iad chun críocha Airteagal 210a.

Sampla 1: Déanann táirgeoir cócó neamh-AE comhaontú inbhuanaitheachta le monaróir seacláide de chuid an Aontais a bhfuil sé d’aidhm aige dul níos faide ná caighdeán éigeantach de chuid an Aontais nó de chuid na mBallstát. Dá bhrí sin, féadfaidh an comhaontú inbhuanaitheachta tairbhiú den eisiamh faoi Airteagal 210a.

Sampla 2: Déanann táirgeoir cócó neamh-AE comhaontú inbhuanaitheachta le monaróir seacláide de chuid an Aontais a bhfuil sé d’aidhm aige dul thar caighdeán éigeantach tíre nach bhfuil san Aontas. Ní fhéadfaidh an comhaontú inbhuanaitheachta tairbhiú den eisiamh faoi Airteagal 210a ach amháin a mhéid a théann sé thar chaighdeán éigeantach de chuid an Aontais nó, ina éagmais sin, caighdeán éigeantach de chuid Ballstáit.

Sampla 1: Comhaontaíonn táirgeoirí agus oibreoirí laghdú 50 % a dhéanamh ar an méid bia a chuirtear amú i dtáirgeadh agus próiseáil piseanna trí na teicnící buainte a bharrfheabhsú, infheistíocht a dhéanamh in acmhainneacht stórála níos éifeachtúla agus pacáistiú a fheabhsú. Níl aon chaighdeán inbhuanaitheachta sainordaitheach i ndáil le cur amú bia leagtha síos ar leibhéal an Aontais ná aon chaighdeán inbhuanaitheachta náisiúnta is infheidhme. I gcás den sórt sin, bheadh an caighdeán inbhuanaitheachta níos airde de facto ná mar a shainordaítear le dlí an Aontais nó leis an dlí náisiúnta.

Sampla 2: Comhaontaíonn táirgeoirí bainne agus miondíoltóirí tacú leis an athrú go dtí táirgeadh bainne orgánaigh mar a shonraítear i Rialachán (AE) 2018/848 ó Pharlaimint na hEorpa agus ón gComhairle (32). Cé go leagtar síos modhanna táirgthe i Rialachán (AE) 2018/848 ar gá d’fheirmeoirí iad a leanúint ionas go mbeidh siad in ann a gcuid táirgí a mharcáil mar tháirgí orgánacha, ní caighdeáin éigeantacha ar leibhéal an Aontais nó ar an leibhéal náisiúnta iad na modhanna táirgthe sin. Sa chás seo, bheadh caighdeán lena gceanglaítear bainne a tháirgeadh i gcomhréir le modhanna táirgthe orgánacha níos airde ná an caighdeán a shainordaítear le dlí an Aontais nó leis an dlí náisiúnta.

Sampla de chomhaontú a chuireann srian ar iomaíocht: Chun truailliú a laghdú agus córais uisce a chosaint, is mian le feirmeoirí soighe i réigiún scor de leasacháin cheimiceacha a úsáid. Mar sin féin, mar gheall ar an laghdú ar an toradh a d’fhéadfadh a bheith ann agus caillteanais airgeadais dá gcuirfidís tionscnamh den sórt sin chun feidhme as a stuaim féin, comhaontaíonn siad ní hamháin stop a chur le leasacháin cheimiceacha a úsáid ach a bpraghsanna in aghaidh an tona a mhéadú freisin chun an leibhéal brabúsachta a bhí ann roimhe sin a choinneáil. Is dócha go gcuirfear srian ar an iomaíocht leis an gcomhaontú inbhuanaitheachta trí theorainn a chur le cumas na bhfeirmeoirí a bpraghsanna féin a shocrú.

Sampla de chomhaontú nach dócha go gcuirfidh sé srian ar an iomaíocht: Cruthaíonn grúpa feirmeoirí ar mian leo scoir de leasacháin cheimiceacha a úsáid marc cáilíochta le haghaidh ‘soighe inbhuanaithe’ a táirgeadh gan aon leasachán ceimiceach. Is dócha go laghdófar an táirgeacht trí úsáid leasachán ceimiceach a dhíothú, agus mar sin go bhféadfaí go laghdófaí ioncaim na bhfeirmeacha. Dá bhrí sin, chun cur ina luí ar thomhaltóirí go bhfuil soighe inbhuanaithe níos luachmhaire ná soighe a tháirgtear le leasachán ceimiceach, infheistíonn an grúpa go trom i bhfeasacht tomhaltóirí ar an marc cáilíochta a ardú agus a bhfeasacht ar na tairbhí comhshaoil a bhaineann le díothú leasacháin cheimiceacha. Aon fheirmeoir a dheimhníonn gur táirgeadh a chuid soighe gan aon leasachán ceimiceach, is féidir leis a bheith rannpháirteach sa scéim, agus is féidir leis an scéim a fhágáil tráth ar bith. Murab ionann agus an sampla roimhe seo, níl aon fhoráil ann lena socraítear praghsanna.

Ní dócha go gcuirfidh an comhaontú inbhuanaitheachta srian ar iomaíocht. D’fhéadfadh sé go mbeidh éifeacht ag an scéim sa chaoi go gcuirfear srian ar iomaíocht má théann an-chuid táirgeoirí soighe isteach sa scéim, agus mar sin go gcuirfear teorainn le cumas custaiméirí nár mhian leo soighe inbhuanaithe a cheannach gan é sin a dhéanamh. Más rud é, áfach, nach dtéann ach méid beag táirgeoirí soighe isteach sa scéim, mar shampla táirgeoirí arb ionann a gcuid táirgí agus níos lú ná 10 % den soláthar, toisc go mbeidh laghdú neamhshuntasach ar leibhéal na n-ionchur dá thoradh sin, is dócha go mbeidh aon srian iomaíochta neamhshuntasach agus go leanfaidh custaiméirí de roghanna malartacha a bheith acu mura bhfuil fonn orthu níos mó a íoc as soighe inbhuanaithe nó mura bhfuil siad in ann íoc as.

Sampla 1: Déanann táirgeoirí fíonchaor a oibríonn ar chorrlaigh ísle agus atá lonnaithe i réigiún áirithe cinneadh i gcomhpháirt laghdú 52 % a dhéanamh ar úsáid lotnaidicídí ceimiceacha cé nach gceanglaítear leis an gcaighdeán a shainordaítear leis an dlí ach laghdú 50 %. Cinneann siad an laghdú sin a bhaint amach trí lotnaidicídí orgánacha a cheannach ina n-ionad. Tá na costais bhreise a leagtar ar na táirgeoirí chun lotnaidicídí orgánacha a cheannach beagán níos airde ná na costais a leagfaí orthu sa chás go gceannóidís lotnaidicídí ceimiceacha. Chun an caighdeán a bhaint amach, aontaíonn na táirgeoirí i gcomhpháirt maidir le praghas seasta a ghearrfaidh siad le haghaidh na bhfíonchaor níos inbhuanaithe.

Ós rud é go bhfuil na lotnaidicídí orgánacha beagán níos costasaí agus go n-oibríonn táirgeoirí ar chorrlaigh ísle agus mar sin nach bhfuil aon spreagadh iontu na costais seo a ionsú ar bhonn aonair, is dóchúil go mbeidh gá le comhar. Ní dócha, áfach, go mbeidh gá le praghas seasta a ghearradh go hiartheachtach, mar gheall ar an bhfeabhsú i dtéarmaí inbhuanaitheachta a ndírítear air sa chomhaontú inbhuanaitheachta. Cé go soláthrófaí luach saothair leordhóthanach do na táirgeoirí le comhaontú ar phraghas seasta agus go n-áiritheofaí go mbainfí an caighdeán amach, tá an chuma ar an scéal go bhfuil rogha mhalartach ann nach bhfuil chomh sriantach. Sa chás sin, tá an chuma ar an scéal gurb é comhaontú chun úsáid lotnaidicídí a laghdú faoi 2 % breise an bealach is lú srian chun an caighdeán a bhaint amach, ós rud é go bhfuil na costais bhreise le haghaidh lotnaidicídí orgánacha íseal agus go leagfaí iad ar na tairgeoirí uile sa réigiún. Choiscfí, leis an méid sin, staid nach mbeadh cuid de na táirgeoirí iomaíoch a thuilleadh mar gheall ar na costais bhreise a leagfaí orthu.

Sampla 2: Chun feabhas a chur ar leas sicíní a thógtar le haghaidh a gcuid feola, comhaontaíonn táirgeoirí go ndéanfaidh siad seiceálacha in aghaidh na bliana ar cháilíocht an uisce a ólann na sicíní. Is é is aidhm do na seiceálacha measúnú a dhéanamh ar leibhéal na n-éilleán atá san uisce amhail miotal trom agus ceimiceáin, agus aghaidh a thabhairt ar leibhéil iomarcacha na n-éilleán sin, i gcás ina bhfaightear iad. Faoin gcomhaontú, ní mór do na táirgeoirí na seiceálacha a dhéanamh iad féin ag úsáid trealaimh atá inacmhainne, nach mór é a cheannach ach uair amháin agus nach bhfuil saineolas eolaíoch riachtanach lena úsáid. Níl aon chaighdeán sonrach de chuid an Aontais ná aon chaighdeán náisiúnta lena sainordaítear nach mór seiceálacha den sórt sin a dhéanamh, ach amháin ceanglas ginearálta go bhfaighidh ainmhithe uisce óil. Mar gheall ar na seiceálacha in aghaidh na bliana ar uisce, méadaítear na costais táirgthe beagán. Mar thoradh air sin, comhaontaíonn táirgeoirí éanlaithe clóis ar oibleagáidí ceannaigh eisiacha le haghaidh éineola a bheith ar cheannaitheoirí chun go ndéanfaí na costais bhreise a aisghabháil trí ráthaíocht a bheith acu go gceannófaí a gcuid táirgeachta.

Ní dócha go mbeidh gá le comhar idir táirgeoirí éanlaithe clóis ós rud é go bhfuil an chuma ar an scéal nach dtugann an feabhsú i dtéarmaí leasa ainmhithe údar cuí leis na srianta atáthar ag brath a dhéanamh. D’fhéadfadh gach táirgeoir an caighdeán a bhaint amach ina aonair go héifeachtach, toisc nach gá do thairgeoirí eolas nó saineolas a n-iomaitheoirí a bheith acu chun an caighdeán a bhaint amach. Thairis sin, d’fhéadfadh táirgeoir aonair an caighdeán inbhuanaitheachta a bhaint amach gan aon chostas breise suntasach a thabhú lena gcuirfí faoi míbhuntáiste é ina mhalairt de chás i gcomparáid le táirgeoirí eile nach gcuireann an caighdeán chun feidhme. Ina theannta sin, fiú i gcás inar measadh go raibh an comhar riachtanach, ní dócha go mbeadh sé fíor-riachtanach ó thaobh táirgeoirí a bheith ag comhaontú le ceannaitheoirí maidir le hoibleagáidí ceannaigh eisiacha, ós rud é go dtabhódh na táirgeoirí costais ísle a bheag nó a mhór as cáilíocht an uisce a thástáil.

Sampla: Beartaíonn táirgeoirí i mBallstát comhaontú inbhuanaitheachta a dhéanamh ina leagtar síos sprioc maidir le 25 % dá gcuid talún a chur i leataobh do chuspóirí bithéagsúlachta. Cuireann na táirgeoirí cuid mhór dá gcuid talún i leataobh do chuspóirí bithéagsúlachta cheana féin. Tá éileamh ann ó cheannaitheoirí lena gcumhdaítear an líon táirgí a bheidh na táirgeoirí in ann a shaothrú ón 75 % eile dá gcuid talún. Íocfaidh ceannaitheoirí na dtáirgí sin praghas freisin a thabharfaidh cúiteamh airgid do tháirgeoirí as na feabhsuithe bithéagsúlachta a dhéanfaidh siad.

I gcás den sórt sin, níl aon ní a chuireann cosc ar tháirgeoirí an caighdeán inbhuanaitheachta a bhaint amach as a stuaim féin toisc go bhfuil an taithí agus an t-eolas a theastaíonn ag gach táirgeoir cheana féin chun na feabhsuithe bithéagsúlachta a chur chun feidhme. Ina theannta sin, bheadh táirgeoirí in ann na costais a bhainfeadh leis an gcaighdeán inbhuanaitheachta a bhaint amach a aisghabháil ó na ceannaitheoirí.

Sampla 1: Comhaontaíonn táirgeoirí déiríochta ó réigiún i mBallstát le monaróir cáise nach dtáirgfidh siad ach cáis bhog agus úr toisc go leanann astaíochtaí CO2 sách ard as táirgeadh cáiseanna crua. Ina theannta sin, comhaontaíonn na táirgeoirí déiríochta an bualtrach a úsáid le haghaidh táirgeadh fuinnimh agus córas díleáiteora meatáin anaeróbach á úsáid. Chun laghdú a dhéanamh ar an lorg carbóin a bhaineann leis an gcáis a iompar, leagtar amach freisin sa chomhaontú nach ndíolfar an cháis bhog agus an cháis úr ach amháin laistigh den Bhallstát ina bhfuil na táirgeoirí lonnaithe. Mar sin féin, tá roinnt Ballstát in aice láimhe suite ag an bhfad céanna le réigiúin eile sa Bhallstát ina bhfuil na táirgeoirí bunaithe.

Ní bheidh comhaontú den sórt sin fíor-riachtanach chun an caighdeán a bhaint amach maidir le hastaíochtaí CO2 atá bainteach le táirgeadh agus trádáil cáise a laghdú toisc gur ann do bhealach nach bhfuil chomh sriantach céanna chun an laghdú ar astaíochtaí CO2 a áirithiú, is é sin, coinníoll fadbhunaithe oibiachtúil a chinneadh arna ríomh ón limistéar táirgeachta go dtí an limistéar díolacháin, mar shampla 200 km.

Sampla 2: Tá an cás mar an gcéanna le Sampla 1. Mar sin féin, cinneann na táirgeoirí déiríochta srian a chur ar rannpháirtíocht sa chomhaontú do tháirgeoirí déiríochta atá bunaithe sa Bhallstát céanna: tá sé sin á dhéanamh ionas go mbeidh sé níos éasca iniúchadh a dhéanamh ar chomhlíontacht leis na critéir táirgeachta toisc go raibh comhar ann le fada an lá le hiniúchóir náisiúnta nach n-oibríonn lasmuigh den Bhallstát sin.

Ní bheidh comhaontú den sórt sin fíor-riachtanach chun an caighdeán a bhaint amach toisc gur ann do bhealach nach bhfuil chomh sriantach céanna chun an laghdú ar astaíochtaí CO2 a áirithiú, is é sin, go bhféadfaí an próiseas iniúchóireachta a dhéanamh i mBallstáit eile nó go bhféadfadh an t-iniúchóir céanna nó iniúchóir eile, atá toilteanach an tseirbhís a dhéanamh, é a dhéanamh.

Sampla: Cé go bhfuil éileamh ar shútha talún saor ó lotnaidicídí, is beag glacadh a bhíonn ag tomhaltóirí le praghsanna níos airde. Theastódh tuilleadh infheistíochta i dtrealamh agus chruthófaí costais bhreise saothair le sútha talún saor ó lotnaidicídí a tháirgeadh agus as sin leanfadh méaduithe ar phraghsanna. Bheadh níos lú seans ann go gceannódh tomhaltóirí na sútha talún níos daoire atá saor ó lotnaidicídí agus dá thoradh sin d’fhéadfadh laghdú teacht ar dhíolacháin na dtáirgeoirí. Thairis sin, mura gceannaíonn tomhaltóirí na sútha talún saor ó lotnaidicídí, lobhfadh cion níos mó de na sútha talún. As sin leanann míbhuntáiste an cheannródaí d’aon duine ar mian leis sútha talún saor ó lotnaidicídí a tháirgeadh.

Forbraíonn grúpa táirgeoirí agus miondíoltóirí tionscnamh faoina ngeallann miondíoltóirí EUR 1,20 sa bhreis in aghaidh an chileagraim a íoc le feirmeoirí rannpháirteacha ar shútha talún saor ó lotnaidicídí. Tá an íocaíocht dreasachta bunaithe ar staidéar ina bhfuarthas an méid a leanas:

Tá an praghas bisigh foriomlán EUR 1,20 in aghaidh an chileagraim níos airde ná an EUR 1 in aghaidh an chileagraim de chostais a tabhaíodh agus den ioncam a ligeadh thar ceal chun an caighdeán inbhuanaitheachta a bhaint amach. Mar sin féin, cuimsítear freisin leis an bpraghas bisigh íocaíocht dreasachta suas le 20 % den chúiteamh as costais a tabhaíodh agus ioncam a ligeadh thar ceal, atá cothrom le EUR 0,20 in aghaidh an chileagraim sa chás seo. Tá sé sin fíor-riachtanach: (i) chun a áirithiú go nglacfaidh na táirgeoirí go héifeachtach leis an gcaighdeán inbhuanaitheachta, (ii) agus an riosca go bhféadfaidh na táirgeoirí an comhaontú a fhoirceannadh i ngeall go bhféadfadh tomhaltóirí spéis a chailleadh i sútha talún inbhuanaithe a cheannach agus ag cur an mhéadaithe ar chostais táirgthe san áireamh agus (iii) ag cur san áireamh gur féidir le táirgeoirí toradh a fháil ar infheistíocht mhalartach EUR 0,05 in aghaidh an chileagraim má roghnaíonn siad gan an comhaontú inbhuanaitheachta a dhéanamh. Is ionann an méid EUR 0,12 in aghaidh an chileagraim atá leithdháilte le haghaidh éiginnteachta (féach pointe (b) thuas), agus an méadú a bhfuil coinne leis ar chostais agus ar an ioncam a ligeadh thar ceal. Is mó an méid atá leithdháilte ar thoradh ar infheistíocht de EUR 0,08 in aghaidh an chileagraim (féach pointe (c) thuas) ná an deis infheistíochta neamh-inbhuanaithe mhalartach de EUR 0,05 in aghaidh an chileagraim.

Mar sin féin, dá mba mhó ná EUR 0,20 in aghaidh an chileagraim an íocaíocht dreasachta, chaithfí measúnú cás ar chás a dhéanamh maidir le comhoiriúnacht an mhéadaithe ar an bpraghas leis an gcoinníoll maidir le fíor-riachtanas.

Sampla 1: Geallann miondíoltóirí go n-íocfaidh siad praghas bisigh le feirmeoirí mealbhacán uisce ionas gur féidir leo uirlisí uisciúcháin nuálacha a cheannach. Tá íocaíocht an phraghais bhisigh ag teastáil ar feadh 3 bliana toisc nach bhfuil an tsuim a theastaíonn ag na feirmeoirí láithreach. Tar éis 3 bliana, bheadh éirithe leis na feirmeoirí na costais a tabhaíodh i ndáil le ceannach an trealaimh a aisghabháil agus bheadh tosaithe acu coigilteas a dhéanamh maidir lena n-úsáid uisce mar gheall ar na huirlisí. Dá bhrí sin, ní bheadh sé fíor-riachtanach, i dtéarmaí an fhaid, leanúint d’íocaíocht an phraghais bhisigh tar éis 3 bliana.

Sampla 2: I gcás atá cosúil le Sampla 1, comhaontaíonn feirmeoirí mealbhacán uisce, in éineacht le miondíoltóirí, go dtáirgfidh siad mealbhacáin uisce gan lotnaidicídí, agus go n-úsáidfidh siad lotnaidicídí orgánacha seachas lotnaidicídí ceimiceacha nuair nach bhfuil aon rogha eile acu. Comhaontaíonn miondíoltóirí go n-íocfaidh siad praghas bisigh níos airde ná an ceann dá dtagraítear i Sampla 1. Soláthraítear cúiteamh freisin le híocaíocht an phraghais bhisigh chun uirlisí uisciúcháin a cheannach. Mar sin féin, toisc gur costas athfhillteach é d’fheirmeoirí mealbhacán uisce gan lotnaidicídí orgánacha a úsáid nó gan ach lotnaidicídí orgánacha a úsáid, caithfear an chuid d’íocaíocht an phraghais bhisigh a bhaineann le neamhúsáid lotnaidicídí, nó le húsáid roghanna orgánacha i gcás inar gá, a íoc go leanúnach ar feadh fhad an chomhaontaithe inbhuanaitheachta, agus caithfidh deireadh teacht leis an íocaíocht a bhaineann leis na huirlisí uisciúcháin tar éis 3 bliana.

Sampla 1: cinneann 10 dtáirgeoir as Eacuadór feabhas a chur ar chaighdeáin saothraithe cócó trí chócó orgánach amháin a tháirgeadh. Comhaontaíonn siad le monaróir seacláide íocaíocht praghais bhisigh de EUR 0,50 in aghaidh an chileagraim de chócó orgánach a fháil, a úsáidfear mar chomhábhar do na táirgí seacláide ar a bhfuil lógó inbhuanaithe. Sula gcuirtear an comhaontú chun feidhme, léiríonn grúpa eile táirgeoirí agus monaróir seacláide eile spéis a bheith rannpháirteach. Measann an chéad 10 dtáirgeoir go bhféadfadh na 10 dtáirgeoir agus an monaróir seacláide a chinn an comhaontú a chruthú ar dtús an caighdeán a bhaint amach astu féin (mar ghrúpa) gan cuidiú ón dara grúpa táirgeoirí agus monaróir seacláide. Mar sin féin, tugann siad cuireadh don ghrúpa eile a bheith páirteach.

Sa sampla seo, ní chuirtear bac leis an tástáil fíor-riachtanais ar na táirgeoirí leasmhara agus ar na monaróirí seacláide uile a bheith rannpháirteach sa chomhaontú. Tá sé sin amhlaidh toisc go léirítear le bunú an chomhaontaithe go gcaithfidh, ionas go mbainfear amach an caighdeán, táirgeoirí dul i bpáirt le ceannaitheoir amháin ar a laghad (monaróir seacláide – sa chás seo). Ní saincheist faoin tástáil fíor-riachtanais é go bhfuil an grúpa tosaigh táirgeoirí agus an ceannaitheoir leathnaithe, rud as a leanann cumhdach margaidh níos airde den chomhaontú.

Sampla 2: Sa chás céanna le Sampla 1, tar éis do na 10 dtáirgeoir agus don mhonaróir seacláide an comhaontú a chur chun feidhme, tugann soláthraí ionchuir síolta le fios gur mian leis dul isteach sa chomhaontú.

Sa sampla seo, cuireann an tástáil fíor-riachtanais cosc ar rannpháirtíocht an tsoláthraí ionchuir ina dhiaidh sin. Tá sé sin amhlaidh toisc gur tugadh le fios san anailís fíor-riachtanais gur leor rannpháirtíocht táirgeoirí agus ceannaitheora amháin ar a laghad. Níl rannpháirtíocht an tsoláthraí ionchuir fíor-riachtanach dá bhrí sin.

Sampla 1: Úsáideann teicníc saothraithe ríse áirithe níos lú uisce ná teicnící traidisiúnta saothraithe ríse, ní úsáideann sé leasacháin shaorga, agus tá sé saor ó lotnaidicídí. Cuireann úsáid teicníce den sórt sin le húsáid agus cosaint inbhuanaithe tírdhreach, uisce agus ithreach, agus laghdaítear úsáid lotnaidicídí leis. Leis an teicníc seo éilítear infheistíocht bhreise acmhainní airgeadais agus ama ó na táirgeoirí ríse, áfach, agus ní bhíonn sé brabúsach ach amháin má chuirtear an teicníc i bhfeidhm ar mheánscála nó mórscála. Comhaontaíonn na comharchumainn ríse ‘rís inbhuanaithe’ a tháirgeadh i gcomhréir leis an teicníc saothraithe réamhluaite. Geallann an miondíoltóir go gceannóidh sé méid áirithe ríse inbhuanaithe – 100 tona in aghaidh na bliana ar feadh 3 bliana.

Tá ríofa ag na trí chomharchumann go mbeadh orthu 95 thona de rís ar a laghad a tháirgeadh in aghaidh na bliana ar feadh 3 bliana ionas go mbainfeadh a gcuid infheistíochta an arainneacht scála is gá amach chun an caighdeán inbhuanaitheachta a bhaint amach agus toradh réasúnach ar infheistíocht a fháil. Chun spreagadh a thabhairt do thomhaltóirí an rís inbhuanaithe a cheannach, aontaíonn na trí chomharchumann agus an miondíoltóir nach mbeidh praghas athdhíola an mhiondíoltóra níos mó ná 15 % os cionn an mheánphraghais a ghearrann an miondíoltóir ar ghnáthrís. Mar sin féin, mar gheall ar chostas na n-ionchur agus ar chostas saothair, cosnaíonn an rís inbhuanaithe 30 % níos mó ar an miondíoltóir ná an gnáthrís.

Bíonn spéis ag formhór na gceannaitheoirí eile sa mhargadh, amhail miondíoltóirí, monaróirí, mórdhíoltóirí gnáthrís a cheannach, rís a dhíoltar ar phraghas níos ísle. Léiríonn tomhaltóirí go bhfuil spéis acu rís atá níos inbhuanaithe a cheannach ach ní heol dóibh a mhéid a thugtar úsáid leasachán agus lotnaidicídí agus an méid uisce a úsáidtear chun na críche sin le fios le táirgeadh na gnáthríse.

Céim 1:

An féidir an caighdeán inbhuanaitheachta a bhaint amach le gníomh aonair?

Ní bheadh na comharchumainn ríse in ann táirgeadh na ríse inbhuanaithe a mhaoiniú ina n-aonar. Sin toisc nach mbeadh aon chinnteacht acu go bhféadfaidís an rís a chur ar an margadh, toisc go mbíonn formhór na gceannaitheoirí ag iarraidh gnáthrís a cheannach, rís a dhíoltar ar phraghas níos ísle. Ní féidir leis na trí chomharchumann an caighdeán a ghlacadh go héifeachtach ar bhonn aonair, dá bhrí sin. Sa chás sin, is dócha go mbeadh comhaontú le miondíoltóir go gceannódh an miondíoltóir 100 tona ar a laghad den rís inbhuanaithe in aghaidh na bliana fíor-riachtanach.

Ní mór measúnú ar leithligh a dhéanamh ar an gcomhaontú nach mbeadh praghas athdhíolacháin an mhiondíoltóra as an rís inbhuanaithe os cionn 15 % de mheánphraghas na gnáthríse. Cosnaíonn rís inbhuanaithe 30 % níos mó ná gnáthrís, agus tá baol ann nach gceannódh tomhaltóirí méideanna leordhóthanacha den rís. Is dócha go mbeadh comhaontú chun an rís inbhuanaithe a chur chun cinn fíor-riachtanach dá bhrí sin toisc nach mbeadh an miondíoltóir in ann leanúint air ag ceannach ó na trí chomharchumann murach sin. Ní féidir le haon cheann de na trí chomharchumann ná an miondíoltóir an rís a chur chun cinn go haonarach mar go dteastaíonn cúnamh a chéile chun déanamh amhlaidh, toisc go bhfuil táirgeadh agus díol na ríse inbhuanaithe idirnasctha.

Fíor-riachtanas na forála sa chomhaontú inbhuanaitheachta

Is dócha go mbeidh an comhaontú méid áirithe ríse inbhuanaithe a cheannach in aghaidh na bliana fíor-riachtanach toisc nach bhfuil ach miondíoltóir amháin páirteach sa chomhaontú inbhuanaitheachta agus tuigtear go mbíonn costais bhreise ag baint le táirgeadh ríse inbhuanaithe ar na táirgeoirí. Cineál eile forála lena bhféadfaí aghaidh a thabhairt ar an tsaincheist maidir le costais a chumhdach ná go bhféadfadh an miondíoltóir díreach gealltanas a thabhairt chun an rís inbhuanaithe a chur chun cinn gan gealltanas a thabhairt íosmhéid a cheannach. Ní thabharfaí leis sin go leor cinnteachta do na trí chomharchumann, áfach, toisc go bhfuil gnáthrís 30 % níos saoire agus ní bhíonn tomhaltóirí feasach maidir leis an méid a bhaineann le táirgeadh na gnáthríse de ghnáth.

I gcás an chomhaontaithe i ndáil le praghas athdhíolacháin nach mó ná 15 % níos airde ná praghas na gnáthríse a ghearradh ar rís inbhuanaithe, tá bealach ann nach bhfuil chomh sriantach céanna chun ceannach ríse inbhuanaithe a chur chun cinn. Ós é easpa feasachta na dtomhaltóirí i ndáil le tairbhí na ríse inbhuanaithe croí na saincheiste, d’fhéadfadh na trí chomharchumann agus an miondíoltóir comhaontú deimhniúcháin a thabhairt i gcrích, mar shampla chun lipéad don rís inbhuanaithe a fhorbairt le seirbhísí tríú páirtí. Dhéanfadh an tríú páirtí measúnú ar chomhlíontacht na ríse i ndáil leis na modhanna táirgthe inbhuanaithe agus dheimhneofaí a comhlíontacht. D’fhéadfadh an lipéad tomhaltóirí a chur ar an eolas maidir le tionchar comhshaoil tháirgeadh na gnáthríse. Faoin miondíoltóir a bheadh sé dá bhrí sin praghas athdhíola na ríse inbhuanaithe a chinneadh agus, trí úsáid an lipéid, bheadh sé in ann éileamh na dtomhaltóirí ar rís inbhuanaithe a chomhlíonadh go héifeachtach.

Céim 2: Fíor-riachtanas chineál agus dhéine an tsriain

Agus measúnú á dhéanamh ar chineál an ghealltanais chun 100 tona de rís inbhuanaithe a cheannach in aghaidh na bliana, d’fhéadfadh gealltanas ón miondíoltóir, an rís inbhuanaithe uile is gá don athdhíol a cheannach ó na trí chomharchumann, a bheith ina rogha mhalartach. Ní bhainfí amach an caighdeán inbhuanaitheachta leis sin, áfach, toisc nach mbeadh cinnteacht ag na trí chomharchumann go gceannódh an miondíoltóir an méid is gá den rís a táirgeadh iarbhír. Tharlódh sé sin toisc go bhféadfadh sé nach mbeadh gá ag an miondíoltóir leis na 100 tona uile de rís inbhuanaithe i mbliain faoi leith agus ní bheadh an dreasacht ag na comharchumainn an infheistíocht is gá a dhéanamh, dá bhrí sin.

Agus measúnú á dhéanamh ar dhéine an tsriain chun gealltanas a thabhairt 100 tona de rís inbhuanaithe a cheannach in aghaidh na bliana ar feadh 3 bliana, dealraítear go bhfuil an srian fíor-riachtanach toisc go bhfuil ar na trí chomharchumann 95 thona ar a laghad de rís inbhuanaithe a tháirgeadh in aghaidh na bliana ar feadh 3 bliana chun toradh a fháil ar a n-infheistíocht bhreise. De bharr úrnuacht agus éiginnteacht an chaighdeáin inbhuanaitheachta, trí na 5 thona breise de rís inbhuanaithe a cheannach, is é is aidhm don mhiondíoltóir beart sábháilteachta a sholáthar i gcás ina ndéanfaí míríomh. Is dócha go mbeadh an gealltanas 100 tona de rís inbhuanaithe fíor-riachtanach maidir le baint amach an chaighdeáin inbhuanaitheachta i gceist, dá bhrí sin.

Sampla 2: Tá tionscnamh réigiúnach ann chun dálaí maireachtála muc a fheabhsú. Déanann feirmeoirí rannpháirteacha comhaontú le seamlas agus le dhá phróiseálaí feola, an méid spáis in aghaidh na muice ar a bhfeirmeacha a mhéadú os cionn an spáis íosta de réir an dlí. De bharr dlíthe áitiúla maidir le cothabháil talún chun críocha bithéagsúlachta, is deacair d’fhormhór na bhfeirmeoirí an méid spáis atá tiomnaithe do mhuca a thógáil a mhéadú, toisc go gcuirfeadh sé iallach orthu an líon muc a thógtar a laghdú chun an caighdeán a chomhlíonadh. Mar thoradh air sin, bheadh feirmeoirí rannpháirteacha faoi mhíbhuntáiste airgeadais i gcomparáid le feirmeoirí nach mbeadh páirteach sa tionscnamh.

Déantar foráil leis an tionscnamh, dá bhrí sin, go n-íocfaidh na próiseálaithe EUR 1 sa bhreis, in aghaidh an chileagraim d’fheoil a dhíoltar mar phraghas bisigh, leis na feirmeoirí chun iad a chúiteamh as a n-aschur laghdaithe agus a gcostais mhéadaithe. Comhfhreagraíonn íocaíocht an phraghais bhisigh don bhrabús a bheadh saothraithe ag feirmeoirí ina mhalairt de chás dá mbeadh níos mó muc tógtha acu ar an ngnáthbhealach agus do chorrlach beag chun na feirmeoirí a spreagadh dul isteach sa chomhaontú. Bheadh próiseálaí amháin in ann táirgeacht iomlán an fheirmeora a phróiseáil agus an t-ualach airgeadais lena mbaineann a chumhdach. Tá an dara próiseálaí tar éis dul leis an tionscnamh anois, áfach, toisc gur mhian leis a bheith páirteach sa mhargadh le haghaidh táirgí atá níos inbhuanaithe. Chomh maith leis sin, leagtar amach sa tionscnamh nach maródh an seamlas atá páirteach ach muca a thógtar i gcomhréir leis na caighdeáin leasa ainmhithe lena mbaineann ionas nach meascfaí a gcuid feola le feoil na n-ainmhithe a thógtar ar an ngnáthbhealach.

Céim 1:

An féidir an caighdeán inbhuanaitheachta a bhaint amach trí ghníomhú go haonarach?

An chéad rogha mhalartach nach mór a chur san áireamh ná cé acu a bheadh nó nach mbeadh rannpháirtithe an chomhaontaithe in ann an caighdeán inbhuanaitheachta a bhaint amach agus iad ag gníomhú ina n-aonar in ionad a bheith ag obair as lámh a chéile. Maidir le feirmeoir a mhéadódh an méid spáis in aghaidh na muice ar a fheirm, agus an beart sin á dhéanamh aige ina aonar, chaillfeadh sé cuid dá ioncam, agus b’fhéidir go gcaillfeadh sé a chuid rochtana ar na ceannaitheoirí freisin, a ghabhfadh le feirmeoirí eile, de bharr an laghdaithe ar mhéid sholáthar an fheirmeora nó méadú ar an bpraghas díolacháin. An tráth céanna, cé go mbeadh feirmeoirí, a ghníomhaíonn le chéile gan aon bhaint ag próiseálaí leo, in iomaíocht le chéile ar théarmaí comhionanna, bheidís fós faoi mhíbhuntáiste i gcomparáid leis na feirmeoirí a rinne an cinneadh gan a bheith páirteach sa chomhaontú inbhuanaitheachta. Bheadh deacrachtaí acu ceannaitheoirí, a d’aontódh praghas níos airde a íoc as an bhfeoil ó na hainmhithe a tógadh go hinbhuanaithe, freisin. Dá bhrí sin, is dócha go mbeadh comhaontú idir na feirmeoirí iad féin agus comhaontú idir na feirmeoirí agus na próiseálaithe, arb iad ceannaitheoirí an táirge feola iad, fíor-riachtanach, murab ionann agus gníomhaíocht aontaobhach. Ar deireadh, tá gá le rannpháirtíocht an tseamlais i bprionsabal toisc go n-áirithítear leis go scartar an fheoil a fhaightear ó na muca atá faoi réir an chomhaontaithe agus an fheoil a fhaightear uathu siúd nach bhfuil faoina réir.

Fíor-riachtanas fhoráil an chomhaontaithe inbhuanaitheachta

Maidir le híocaíocht an phraghais bhisigh ansin, rogha mhalartach a d’fhéadfadh a bheith ann is ea go bhféadfadh na próiseálaithe gealltanas a thabhairt go gceannóidís an fheoil uile de thionscnamh na muc a thógtar i gcomhréir leis an tionscnamh ar phraghas na ngnáthmhuc. Ní gnách go mbíonn deacrachtaí ag feirmeoirí ceannaitheoirí a aimsiú agus bheidís in ann na táirgí feola a thagann óna gcuid muc a dhíol go héasca. Dá mbeidís in ann na critéir inbhuanaitheachta a chur i bhfeidhm, bheadh orthu an fheoil a dhíol faoina luach, áfach, toisc go gcaithfidís an líon ainmhithe a laghdú agus gan dada a fháil ina áit. Is dócha go mbeadh íocaíocht praghais bhisigh fíor-riachtanach, dá bhrí sin.

Maidir leis an ngealltanas ón seamlas, gan ach ainmhithe a thógtar i gcomhréir leis an gcaighdeán inbhuanaitheachta a mharú, rogha mhalartach a d’fhéadfadh a bheith ann go n-iarrfadh feirmeoirí ar an seamlas an fheoil a thagann óna gcuid muc a scaradh ón bhfeoil eile agus í a shainaithint go soiléir. Is dócha go leanfadh costais bhreise as sin toisc go bhféadfadh an chothabháil a bheadh ag teastáil ó dhá líne ar leithligh i seamlas neamhéifeachtúlachtaí a chruthú maidir le marú na n-ainmhithe. Mar sin féin, ar choinníoll go n-éiríonn leis an seamlas bealach éifeachtúil a aimsiú chun an dá líne a bhainistiú, ach an dá chineál ainmhí a mharú bheadh sé in ann láimhdeachas níos airde a bhaint amach agus cúiteamh a fháil dá bharr sin as na costais maidir leis an dá chineál feola a scaradh le haghaidh próiseála. Ní dócha, dá bhrí sin, go mbeadh an comhaontú leis an seamlas, gan ach ainmhithe a tógadh go hinbhuanaithe a mharú, fíor-riachtanach.

Céim 2: Fíor-riachtanas chineál agus dhéine an tsriain

I gcás íocaíocht an phraghais bhisigh a fhaigheann feirmeoirí chun tuilleadh spáis a thabhairt do mhuca, d’fhéadfadh comhaontú maidir leis an bpraghas iomlán nó maidir le híosphraghas ar na táirgí feola a bheith mar shrian malartach. Mar sin féin, dá ndéanfaí comhaontú maidir leis an bpraghas iomlán chumhdófaí roinnt mhaith de ghnéithe an chostais táirgthe nach mbaineann leis an gcaighdeán inbhuanaitheachta, mar shampla, praghsanna ionchuir, teagmhais aimsire agus galair. Thairis sin, cé go bhféadfaí a áirithiú le híosphraghas, arna shocrú ag leibhéal a bheadh sách ard le go dtabharfaí cuntas ar na costais maidir leis an bhfeabhsú inbhuanaitheachta, go gcúitítear táirgeoirí as a gcuid iarrachtaí, dhéanfadh sé neamhaird don fhéidearthacht go bhféadfadh na heilimintí eile den phraghas ar mhuiceoil, amhail ionchuir, bonneagar agus séasúracht an táirge, athrú amach anseo agus nach léireodh an t-íosphraghas a comhaontaíodh costais feirmeoirí go cruinn a thuilleadh. Is dócha dá bhrí sin go bhfuil íocaíocht an phraghais bhisigh fíor-riachtanach toisc go gcomhfhreagraíonn an íocaíocht do chaillteanas brabúis a thabhaíonn feirmeoirí toisc go dtógann siad níos lú muc agus go gcoinnítear an fhéidearthacht go n-athródh na comhpháirteanna praghais eile go neamhspleách faoi réir athruithe sa mhargadh.

Is dócha go bhfuil socrú íocaíocht an phraghais bhisigh ag EUR 1 in aghaidh an chileagraim den fheoil a tháirgtear fíor-riachtanach freisin. Bheadh sé sin amhlaidh dá léireofaí leis an íocaíocht an caillteanas brabúis a thabhódh feirmeoirí toisc nach mbeadh an t-aschur céanna acu, a bheadh acu dá dtógfaidís a muca ar an ngnáthbhealach chomh maith le corrlach beag, níos lú ná 20 % den chúiteamh as costais a tabhaíodh agus ioncam a ligeadh thar ceal, chun feirmeoirí a spreagadh chun an comhaontú a dhéanamh. In éagmais an chorrlaigh sin, agus i gcás nach ndéanfaí ach feirmeoirí a chúiteamh as na costais bhreise a tabhaíodh agus an t-ioncam a ligeadh thar ceal, d’fhéadfadh sé nach mbeadh spéis acu na hiarrachtaí is gá a dhéanamh chun an caighdeán inbhuanaitheachta a fháil.

Ní gá measúnú a dhéanamh ar cé acu atá an líon feirmeoirí nó próiseálaithe a chuaigh isteach sa tionscnamh fíor-riachtanach, mar a mhínítear i Roinn 5.4.2.3.

Sampla 3: Forbraíonn grúpa de thrí chomharchumann déiríochta marc cáilíochta le haghaidh cáise. Leis an marc cáilíochta, ceanglaítear ar tháirgeoirí a dheimhniú go dtáirgtear an bainne a úsáidtear ina gcáiseanna ag úsáid modhanna orgánacha, agus modhanna orgánacha amháin. Éilítear leis an marc cáilíochta go ndéantar táirgeadh uile an bhainne sa cháis ag úsáid liosta sonrach réamhshainithe de mhodhanna orgánacha chun a dhearbhú nach measctar aon bhainne orgánach le cineálacha eile bainne. Tugtar le fios le modh táirgthe den sórt sin go mbeidh costais bhreise i gceist do tháirgeoirí, go laghdaítear an tsaoirse atá acu modhanna malartacha de tháirgeadh cáis orgánaí a roghnú agus a gcumas leanúint ag tairiscint gnáthbhainne le haghaidh táirgí cáise. Seoladh go rathúil cheana féin méideanna comhchosúla táirgí leis na cinn atá beartaithe ag an gcomharchumann déiríochta agus a táirgeadh trí mhodhanna táirgthe comhchosúla. Tá éileamh tomhaltóirí ar cháis orgánach ard agus tá tomhaltóirí ag íoc praghas níos airde as an gcáis sin cheana féin. As sin, leanann éileamh i measc chustaiméirí na gcomharchumann chun cáis orgánach a aimsiú agus is féidir leis na comharchumainn déiríochta na costais a bhaineann leis na ceanglais bhreise a aisghabháil.

Céim 1: An féidir an caighdeán inbhuanaitheachta a bhaint amach trí ghníomhú go haonarach?

Cuireann táirgeoirí áirithe caighdeáin inbhuanaitheachta atá níos airde ná mar atá sainordaithe le dlí an Aontais nó leis an dlí náisiúnta i bhfeidhm go haonarach cheana féin agus tá na táirgí a tháirgtear i gcomhréir leis na caighdeáin sin ar cháilíocht agus ar mhéideanna atá inchomparáide leis na cinn atá beartaithe leis an gcomhaontú. Tá éileamh ar cháis orgánach freisin i measc tomhaltóirí agus ceannaitheoirí araon. Beidh na comharchumainn in ann dá bhrí sin an caighdeán a chur i bhfeidhm go haonarach agus an t-éileamh méadaithe ó chustaiméirí ar cháis inbhuanaithe a chomhlíonadh trína lipéad féin a chruthú. Ní dhealraítear, dá bhrí sin, go bhfuil an gá le haghaidh comhair fíor-riachtanach.

Sampla 4: Bíonn méid glasraí áirithe a bhíonn ar fáil níos mó ná an t-éileamh ag tráthanna áirithe den bhliain. Mar thoradh air sin, téann idir 7 % agus 15 % de bhuaint bhliantúil an spionáiste amú. Tá iarracht déanta ag comharchumainn straitéisí éagsúla a chur chun feidhme go haonarach chun fuílleach an tsoláthair a phleanáil nó a stóráil ach níl éirithe leo a gcuid caillteanas a choinneáil faoi bhun 7 % ar an meán. Tá iarracht déanta acu freisin an spionáiste a thriomú agus é a dhíol ach níl aon éileamh i measc custaiméirí ar tháirge den sórt sin.

Chun cur amú den sórt sin a laghdú, beartaíonn grúpa comharchumann spionáiste faisnéis a mhalartú lena chéile maidir le seachadtaí míosúla spionáiste chuig custaiméirí ionas gur féidir leo an soláthar agus an t-éileamh a phleanáil ar bhealach níos cruinne. Is é an réasúnú a thugann na comharchumainn leis an malartú sin go gcuirfidh siad i bhfeidhm córas uainíochta ina mbeidh a mbabhtaí féin ag na comharchumainn éagsúla gach mí a tháirgeacht a laghdú faoi chéatadán faoi leith chun teacht leis an éileamh measta ar spionáiste don mhí dár gcionn.

Céim 1:

An féidir an caighdeán inbhuanaitheachta a bhaint amach trí ghníomhú go haonarach?

Dealraítear go bhfuil an gá le haghaidh comhair fíor-riachtanach toisc go bhfuil teipthe ar ghníomhaíocht aonair i ndáil le cur amú bia a réiteach.

Fíor-riachtanas fhoráil an chomhaontaithe inbhuanaitheachta

Is é is aidhm do na comharchumainn spionáiste an caighdeán a bhaint amach trí mhalartú faisnéise maidir le soláthar agus éileamh. De rogha air sin, d’fhéadfaidís teacht ar chomhaontú maidir le méideanna táirgeachta laghdaithe le haghaidh gach comharchumainn. Ní rachadh sé sin i ngleic leis an tsaincheist, áfach, toisc go mbeadh sé deacair a mhéad táirgeachta ba cheart don chomharchumann a laghdú a thuar go cinnte. Anuas air sin, bheadh tréimhsí ann fós nuair a bheadh an t-éileamh níos airde mar sin ní bheadh na comharchumainn in ann orduithe a gcustaiméirí a chomhlíonadh. Thairis sin, bheadh comhaontú maidir le méideanna táirgeachta níos sriantaí ná comhaontú maidir le malartú faisnéise.

Maidir leis an gcomhaontú chun faisnéis a mhalartú, téitear i ngleic leis an tsaincheist trí fhaisnéis thráthrialta a sholáthar maidir le staid an mhargaidh agus bítear in ann an soláthar a choigeartú go beacht don mhí dár gcionn. Dá bhrí sin, dealraítear go bhfuil gá réasúnach leis chun an caighdeán maidir leis an gcur amú bia a laghdú a bhaint amach.

Céim 2: Fíor-riachtanas chineál agus dhéine an tsriain

Maidir le fíor-riachtanas an tsriain iomaíochta a thagann as an gcomhaontú, is srian suntasach ar iomaíocht é an malartú faisnéise ar pharaiméadar amhail seachadtaí míosúla chuig custaiméirí. Rogha eile réalaíoch nach mbeadh chomh sriantach céanna is ea faisnéis chomhiomlán a roinnt gach dara nó gach tríú mí in ionad a bheith á dhéanamh ar bhonn míosúil. Toisc nach ndéantar na sonraí a chomhiomlánú agus a thiomsú chomh minic ní bhíonn díolacháin na gcomharchumann aonair le custaiméirí aonair chomh héasca a shainaithint. An tráth céanna, trí shonraí a roinnt gach dara nó tríú mí bheadh táirgeoirí fós ar an eolas maidir leis an éileamh a bhí ar spionáiste sa mhargadh sa 2-3 mhí roimhe ionas go bhféadfaidís a dtáirgeadh féin a choigeartú sna míonna ina dhiaidh sin.

Dá thoradh sin, ní éireodh leis an gcomhaontú maidir le faisnéis a roinnt ar bhonn míosúil céim 2 den tástáil fíor-riachtanais a chomhlíonadh.

Sampla: Déanann roinnt táirgeoirí comhaontú sula bhfoilsítear na treoirlínte seo. Geallann siad go stopfaidh siad d’úsáid luibhicíde údaraithe, a bhraitear go minic i soláthairtí uisce óil. Chun an t-aistriú chuig an modh táirgthe níos inbhuanaithe seo a mhaoiniú, aontaíonn siad go socróidh siad a bpraghsanna ag EUR 0,50 in aghaidh an chileagraim a tháirgtear ar bhonn sealadach.

Tar éis fhoilsiú na dtreoirlínte seo, is léir do na páirtithe gur leor íocaíocht praghais bhisigh chun an caighdeán a chomhlíonadh. Dá bhrí sin, ní chomhlíonann an comhaontú céim 2 den tástáil fíor-riachtanais. Dá thoradh sin, ba cheart do na páirtithe a gcomhaontú a thabhairt cothrom le dáta a luaithe is féidir chun Airteagal 210a a chomhlíonadh, trí íocaíocht praghais bhisigh a chur in ionad socrú praghsanna.

Sampla: D’aontaigh roinnt táirgeoirí talmhaíochta i mí Eanáir 2023 a modh táirgthe a athrú chun stop a chur le húsáid luibhicídí truailliúcháin údaraithe a aimsítear go minic i soláthairtí uisce óil. Toisc go raibh gá le roinnt ama chun an modh táirgthe a athrú, tá coinne le seoladh an táirge deiridh ar lú an truailliú uaidh i mí Mheán Fómhair 2023. D’aontaigh na táirgeoirí ar íocaíocht praghais bhisigh ar an táirge ag úsáid na luibhicíde a raibh fadhb léi ó mhí Eanáir 2023 amach, chun an infheistíocht is gá le haghaidh an aistrithe a mhaoiniú.

Féadfar íocaíocht an phraghais bhisigh a dheonú ó mhí Eanáir 2023 mura bhfuil na táirgeoirí in ann ach amháin a gcostais infheistíochta a chumhdach trí íocaíocht an phraghais bhisigh a dheonú ó mhí Mheán Fómhair 2023, tar éis an táirge malartach a sheoladh. In éagmais an phraghais bhisigh a bheadh ag tosú ó mhí Eanáir 2023, ní smaoineoidís ina mhalairt de chás tabhairt faoin tionscnamh inbhuanaitheachta. Mar sin féin, más féidir leis na páirtithe a gcostais infheistíochta a chumhdach trí íocaíocht an phraghais bhisigh a dheonú ó mhí Mheán Fómhair 2023, ansin níl sé fíor-riachtanach an praghas bisigh a chur i bhfeidhm roimh an dáta sin.

Sampla: Tá aontaithe ag dhá tháirgeoir infheistíocht a dhéanamh le chéile i dtaighde agus forbairt modha nua táirgthe lena ngealltar inbhuanaitheacht níos mó. Tuigtear leis sin go gcaithfear praghsanna a shocrú chun infheistíocht nua den sórt sin a mhaoiniú. Toisc gur thosaigh géarchéim eacnamaíoch tar éis dóibh an comhaontú a thabhairt i gcrích, ní féidir leis na páirtithe an taighde a mhaoiniú a thuilleadh agus cinneann siad deireadh a chur leis an infheistíocht taighde.

Ós rud é nár éirigh leis na páirtithe an caighdeán a chur chun feidhme ar chúis nach mbaineann le force majeure, ní féidir leo leanúint ar aghaidh ag cur srian ar an iomaíocht, is é sin le rá socrú praghsanna.

Sampla: Comhaontaíonn táirgeoirí agus miondíoltóirí go bhfásfaidh siad cineál nua grán buí atá níos frithsheasmhaí in aghaidh lotnaidí agus a n-éilítear níos lú lotnaidicídí leo ná cineálacha eile grán buí, dá bhrí sin. Tá na síolta don chineál nua níos daoire áfach agus díoltar iad ag EUR 6 in aghaidh an chileagraim. Comhaontaíonn miondíoltóirí go maoineoidh siad ceannach na síolta níos daoire trí íocaíocht praghais bhisigh a thairiscint ar an ngrán buí a fásadh. I gcéimeanna deireanacha chur chun feidhme an chomhaontaithe inbhuanaitheachta, titeann costas na síolta go EUR 1 in aghaidh an chileagraim de réir mar a éiríonn an tóir ar an mbarr, agus bíonn níos mó síolta le fáil ar an margadh.

Mar gheall ar an athrú ar phraghas na síolta, arb iad an t-ionchur don ghrán buí, ní mór do na páirtithe athbhreithniú a dhéanamh ar an bpraghas bisigh ba cheart a bheith ann agus cé acu atá nó nach bhfuil ar mhiondíoltóirí tacú leis an gcomhaontú le híocaíocht praghais bhisigh a thuilleadh in aon chor.

Sampla: Comhaontaíonn táirgeoirí, próiseálaithe agus miondíoltóirí ar íocaíocht praghais bhisigh as ainmhithe a thógáil gan cásanna a úsáid. Éilítear leis an dlí go mbeidh 0.2 m2 spáis ar a laghad ag gach ainmhí. Uair éigin ina dhiaidh sin, leasaítear an reachtaíocht shainordaitheach agus forfheidhmítear leis ceanglas nua de 0.5 m2.

D’fhéadfadh go mbeadh údar ann, de bharr an chaighdeáin inbhuanaitheachta lena bhforfheidhmítear ceanglas go dtógfaí ainmhithe i ‘saor-raon’, praghas bisigh a chur i bhfeidhm. Toisc go bhfuil an caighdeán sainordaitheach ardaithe ag an dlí, áfach, ní mór athbhreithniú a dhéanamh ar leibhéal an phraghais bhisigh, agus d’fhéadfadh praghas níos ísle a bheith mar thoradh air sin i gcásanna áirithe.

Sampla: Le comhaontú idir eagraíocht táirgeoirí agus monaróirí cuirtear ar a gcumas do mhonaróirí infheistiú i dteicneolaíocht intleachta saorga (‘AI’) lenar féidir galair i bplandaí a bhrath go luath, rud as a dtagann táirgeacht níos mó. Comhaontaíonn na monaróirí an teicneolaíocht a cheannach do na táirgeoirí agus costais oibriúcháin na teicneolaíochta a chumhdach trí chomhaontú ar íosphraghas ar na táirgí arna dtáirgeadh ag an eagraíocht táirgeoirí. As sin, éilítear leis an gcomhaontú ar chomhaltaí na heagraíochta táirgeoirí an teicneolaíocht a cheadúnú, chun a áirithiú go bhfuil dóthain ceadúnaithe ann, agus táillí ceadúnais dá réir sin, chun costais na hinfheistíochta a chumhdach.

Nuair a bheidh tástáil déanta ar an teicneolaíocht agus nuair a bheidh táirgeachtaí níos airde ann dá bharr, beidh ar na táirgeoirí measúnú a dhéanamh arís ar fhíor-riachtanas an íosphraghais. Toisc go bhfuil siad ag táirgeadh níos mó anois, d’fhéadfadh sé go mbeidís in ann astu féin costais oibriúcháin na teicneolaíochta a chumhdach.

Sampla: Comhaontaíonn feirmeoirí éanlaithe clóis áitiúla go comhpháirteach go soláthróidh siad níos mó spás maireachtála in aghaidh an ainmhí. Chun a gcostais idirthréimhseacha a laghdú, déanann siad comhaontú lena gceannaitheoirí, faoina gcomhaontóidh na ceannaitheoirí ar phraghas bisigh seasta, chun an costas breise a thagann leis an gcaighdeán inbhuanaitheachta nua a chumhdach. Sínítear an comhaontú i mí an Mhárta 2024, agus tá tréimhse fógra fhoirmiúil de 1 bhliain amháin ann i gcásanna d’fhoirceannadh aontaobhach. Áirithítear leis an tréimhse fógra go mbeidh na ceannaitheoirí in ann pleanáil leordhóthanach a dhéanamh, ionas go mbeidh siad in ann seasamh a ghlacadh ar an margadh mar sholáthróirí éanlaithe clóis inbhuanaithe agus a bhfuil infheistíochtaí déanta acu chun é sin a dhéanamh. Glactar reachtaíocht nua áitiúil i mí an Mheithimh 2024 agus beidh feidhm aige ó mhí na Nollag 2024. Éilítear leis go dtabharfaidh an táirgeadh talmhaíochta uile sa réigiún sin an méid spáis céanna d’ainmhithe, a ndéantar foráil dó sa chomhaontú, a leithdháileadh.

Toisc go mbeidh an ceanglas maidir le spás íosta ina oibleagáid dhlíthiúil i mí na Nollag 2024, níl an srian ar iomaíocht fíor-riachtanach a thuilleadh. Dá bhfoirceannfaí an comhaontú leis na ceannaitheoirí roimh dheireadh na tréimhse fógra foirmiúla, áfach, d’fhéadfadh iarmhairtí tromchúiseacha airgeadais a bheith i gceist do na páirtithe. Bhí na páirtithe ag gníomhú de mheon macánta toisc nach raibh an dlí nua intuartha tráth ar thug siad an comhaontú i gcrích. Is féidir leo, dá bhrí sin, leanúint de bheith ag tairbhiú den eisiamh a leagtar síos in Airteagal 210a go dtí go dtiocfaidh deireadh leis an bhfógra foirmiúil, i.e. go dtí mí an Mheithimh 2025.

Sampla: Chun úsáid lotnaidicídí a laghdú faoi mhéid níos mó ná mar a shainordaítear le dlí an Aontais agus leis an dlí náisiúnta, déanann trí tháirgeoir gráin bhuí, a léiríonn cuid bheag de líon na dtáirgeoirí ar an margadh, comhaontú le táirgeoir beatha go n-aistreoidh siad chuig modhanna orgánacha táirgthe. Toisc go dtiocfaidh méadú ar a gcostais leis an aistriú sin, aontaíonn siad i gcomhpháirt go socróidh na trí tháirgeoir gráin bhuí a gcuid praghsanna ar feadh tréimhse 2 bhliain. Tar éis 1 bhliain amháin de chur chun feidhme an chomhaontaithe inbhuanaitheachta, tugann na trí tháirgeoir gráin bhuí faoi deara go ndearna siad gannmheas ar a mhéid a mhéadódh an t-aistriú chuig táirgeadh orgánach a gcostais, agus nach gcumhdaíonn an praghas bisigh na costais bhreise sin. Laghdaíonn na trí tháirgeoir gráin bhuí a gcuid ioncaim chun na costais sin a chumhdach, dá bhrí sin, ag glacadh leis nach féidir leo an praghas seasta a mhéadú.

Sa sampla seo, laghdaítear an t-ioncam de bharr míríomh arna dhéanamh ag na trí tháirgeoir gráin bhuí. Anuas air sin, ní bhaineann sé sin ach le líon teoranta táirgeoirí. Dá thoradh sin, ní dócha go gcuirfí cuspóirí CBT a leagtar síos in Airteagal 39, CFAE, i mbaol leis sin.

Sampla: Geallann roinnt táirgeoirí síolta gráin, a tháirgeann 80 % den ghrán a tháirgtear sa limistéar geografach ábhartha, go stopfaidh siad de shíolta gráin, a chóireáiltear le cineál áirithe lotnaidicíde ceimicí, a dhíol. Cruthaítear leis sin ganntanas ionchur do phróiseálaithe a úsáideann na gráin toisc go mbíonn na táirgeoirí ag gabháil do sciar mór de tháirgeadh síolta, rud as a leanann méadú substaintiúil ar phraghas aráin. Is dócha go gcuirfeadh sé sin na cuspóirí maidir le hinfhaighteacht soláthairtí agus praghsanna réasúnacha do thomhaltóirí i mbaol.

Sampla 1: Aontaíonn táirgeoirí éanlaithe clóis, a bhfuil thart ar 50 % den mhargadh acu, comhaontú ceannaigh a dhéanamh chun beatha de cháilíocht níos airde a cheannach i gcomhpháirt don éanlaith chlóis. De bharr choigilteas costais an cheannaigh chomhpháirtigh, éiríonn leis na táirgeoirí praghas beatha atá cothrom leis an bpraghas beatha don éanlaith chlóis nach gcumhdaítear leis an gcomhaontú inbhuanaitheachta, a bheag nó a mhór, a choinneáil. Aontaíonn siad freisin go maoineoidh siad feachtas fógraíochta i gcomhpháirt chun feasacht a ardú maidir leis an mbealach a bhfuil éanlaith chlóis, a dtugtar beatha níos fearr dóibh, níos fearr do shláinte an duine agus do leas ainmhithe. De thoradh an fheachtais, déanann formhór na dtomhaltóirí an cinneadh aistriú chuig feoil éanlaithe clóis, a dtugtar beatha níos fearr dóibh, a cheannach. Mar gheall ar an méadú sin ar éileamh, cruthaítear dreasacht do tháirgeoirí eile dul leis an gcomhaontú agus a modhanna táirgthe a athrú. Leis an gceannach comhpháirteach, mealltar táirgeoirí beaga go háirithe chuig an gcaighdeán níos airde toisc nach mbeadh sé d’acmhainn acu an beatha de cháilíocht níos airde a cheannach murach sin. Mar thoradh air sin, aistríonn táirgeoirí, lena léirítear breis agus 90 % den soláthar iomlán, chuig an gcaighdeán níos inbhuanaithe.

Cé go mbaintear, leis an gcomhaontú, as an margadh, nach mór gach éanlaith chlóis nach dtáirgtear ar bhealach chomh hinbhuanaithe, ní dócha go gcuimseofar eisiamh ar iomaíocht leis faoi Airteagal 210a(7). Tá sé sin amhlaidh toisc nach é is aidhm do Airteagal 210a cosc a chur ar chomhaontuithe atá chomh héifeachtach sin ag seachadadh táirgí inbhuanaithe gur mian le tomhaltóirí iad a cheannach agus gur mian le hoibreoirí eile an caighdeán céanna a ghlacadh.

Sampla 2: Cinneann póraitheoirí turcaithe ag a bhfuil 60 % den mhargadh dálaí maireachtála a gcuid turcaithe a fheabhsú trí chaighdeán nua leasa ainmhithe a leagan síos a ghabhann níos faide ná mar a fhorordaítear leis an dlí sainordaitheach. Leis sin méadaítear spás maireachtála na dturcaithe agus déantar córais athnuachana aeir agus cóireála uisce a shuiteáil. Éilítear freisin leis an gcaighdeán nua inbhuanaitheachta na turcaithe a bheathú le táirgí cáilíochta bisigh amháin. Aontaíonn na táirgeoirí le ceannaitheoirí go bhfaighidh siad uathu praghas bisigh chun costais an turcaí inbhuanaithe a chumhdach.

De thoradh íocaíocht an phraghais bhisigh bíonn an praghas ar fheoil turcaí a táirgeadh go hinbhuanaithe 150 % níos airde ná an praghas ar an bhfeoil turcaí nach dtáirgtear go hinbhuanaithe. Tá gá leis an méadú sin mar gheall ar an ngá atá lena áirithiú go ndéanfar costais mhóra breise an chaighdeáin nua a aisghabháil. Laistigh de chúpla mí, téann na póraitheoirí turcaithe eile uile sa mhargadh i gceist leis an gcomhaontú nua inbhuanaitheachta. Fágann na bacainní maidir le hallmhairiú na feola turcaí go dteorannaítear go mór an líon feoil turcaí allmhairithe nach dtáirgtear go hinbhuanaithe ar an margadh. Dá thoradh sin, níl aon fheoil turcaí nach dtáirgtear go hinbhuanaithe ar fáil a thuilleadh. Ina theannta sin, méadaítear tuilleadh le 200 % praghas na feola turcaí a tháirgtear go hinbhuanaithe i gcomparáid leis an bpraghas tosaigh a bhí ar an bhfeoil turcaí nach dtáirgtear go hinbhuanaithe.

Léirítear i bhfianaise nach bhfuil idir 45 % go 50 % de thomhaltóirí turcaithe in acmhainn aon turcaí a cheannach níos mó mar gheall ar an gcomhaontú.

Mar thoradh air sin, tomhaltóirí nach raibh sásta ach íoc as an rogha mhalartach níos saoire - agus nach bhfuil chomh inbhuanaithe, ní bheidh siad in ann aon turcaí a cheannach, toisc nach bhfuil siad in acmhainn íoc as an méadú 200 % ar an bpraghas. Is dócha go mbeidh eisiamh ar iomaíocht i gceist le cás den sórt sin faoi Airteagal 210a(7).