Breithiúnas na Cúirte Breithiúnais (an Seachtú Dlísheomra) an 19 Deireadh Fómhair 2023 (iarraidh ar réamhrialú ón College van Beroep voor het bedrijfsleven – an Ísiltír) – L. VOF v Minister van Landbouw, Natuur en Voedselkwaliteit

(Cás C-591/22 (1), L. (Gallus gallus))

(Tarchur chun réamhrialú - Sláinteachas bia - Laghdú salmonella in ealtaí pórúcháin Gallus gallus - Rialachán (AE) Uimh. 200/2010 - Iarscríbhinn - Pointe 2.2.2.2(c) - Gnáthshampláil - Toradh deimhneach - Sampláil dheimhnitheach - Cásanna eisceachtúla - Amhras maidir leis na torthaí - Raon feidhme)

(C/2023/1112)

Teanga an cháis: an Ollainnis

An chúirt a rinne an tarchur

College van Beroep voor het bedrijfsleven

Páirtithe sna príomhimeachtaí

Iarratasóir: L. VOF

Cosantóir: Minister van Landbouw, Natuur en Voedselkwaliteit

An chuid oibríochtúil

Maidir le Pointe 2.2.2.2(c) den Iarscríbhinn a ghabhann le Rialachán (AE) Uimh. 200/2010 ón gCoimisiún an 10 Márta 2010 lena gcuirtear chun feidhme Rialachán (AE) Uimh. 2160/2003 ó Pharlaimint na hEorpa agus ón gComhairle maidir le sprioc an Aontais chun leitheadúlacht séiritíopaí salmonella in ealtaí éanlaith phórúcháin fásta Gallus gallus a laghdú, arna leasú le Rialachán (AE) 2019/268 ón gCoimisiún an 15 Feabhra 2019,

ní mór léiriú a dhéanamh mar seo a leanas:

féadfar a mheas go dtagann staid gabháltais ealtaí pórúcháin Gallus gallus a ndearnadh tástáil orthu trí ghnáthshampláil, ar léirigh a dtorthaí go bhfuil salmonella ann, faoi réim an choincheapa ‘cásanna eisceachtúla ina bhfuil cúis ag an údarás inniúil amhras a bheith ann faoi thorthaí na dtástálacha’, de réir bhrí na forála sin, i gcás ina gcinnfidh an t-údarás inniúil gur tharla teagmhais nó eachtraí a chuireann feidhmíocht chuí na bpróiseas samplála agus anailíse le haghaidh samplaí i mbaol nó ina measann sé, ag féachaint don leibhéal barr feabhais a baineadh amach le coinníollacha uile an ghabháltais agus saintréithe eipidéimeolaíocha salmonella á gcur san áireamh, go bhfuil riosca tromchúiseach ann go dtarlódh teagmhais nó eachtraí den sórt sin.

Maidir le roinnt torthaí diúltacha a bheith ann don chineál salmonella a braitheadh, a fuarthas ó shamplaí a tógadh ina dhiaidh sin ar thionscnamh an oibreora lena mbaineann agus a cuireadh ar aghaidh chuig an údarás inniúil tar éis don údarás sin cinneadh a ghlacadh, agus ós rud é nár léiríodh ach ag tithe éanlaithe áirithe torthaí dearfacha agus nach raibh ach ceann amháin den dá shampla a tógadh i ngach teach éanlaithe dearfach, ní imthosca ábhartha iad chun críche staid den sórt sin a aicmiú mar chás a thagann faoi réim an choincheapa sin. Bíonn stádas vacsaínithe na healta agus stair an ghabháltais i dtéarmaí leitheadúlacht an chineáil salmonella a braitheadh, nuair a bhíonn siad sármhaith, le cur san áireamh mar imthosca chun na críche sin, ach ní féidir leo féin an staid sin a aicmiú mar a thagann faoin gcoincheap sin.

---

(1)   IO C 472, 12.12.2022.