Caingean arna tabhairt an 13 Meán Fómhair 2023 – Aurelia Stiftung v an Coimisiún

(Cás T-565/23)

(C/2023/988)

Teanga an cháis: an Ghearmáinis

Páirtithe

Iarratasóir: Aurelia Stiftung (Beirlín, an Ghearmáin) (ionadaí: A. Willand, Dlíodóir)

Cosantóir: an Coimisiún Eorpach

An t-ordú atá á lorg

Iarrann an t-iarratasóir ar an gCúirt Ghinearálta:

—	Cinneadh Ares (2023) 4611321 ón gCoimisiún an 3 Iúil 2023 a chur ar neamhní; agus

—	a ordú don chosantóir costais na n-imeachtaí a íoc.

Saincheisteanna dlí agus príomhargóintí

Maíonn an t-iarratasóir go ndearna an Coimisiún earráid dlí san athbhreithniú ar an Rialachán lena gcuirtear síneadh le tréimhse formheasa na substainte gníomhaí gliofosáit go dtí an 15 Nollaig 2023. (1) Cáineann an t-iarratasóir an Coimisiún as síneadh formheasa do gliofosáit a choimeád ar bun, atá contrártha le dlí an Aontais, dar leis an iarratasóir, agus as sárú ar a cheart chun athbhreithniú cuí faoi Airteagal 10 de Rialachán (CE) Uimh. 1367/2006, dá réir sin. (2)

Mar thaca leis an gcaingean, ardaíonn an t-iarratasóir na saincheisteanna dlí seo a leanas:

An chéad saincheist dlí: sárú ar Airteagal 17 de Rialachán (CE) Uimh. 1107/2009 (3) trí chríoch neamhdhleathach a shaothrú (céim neamhrialta sa nós imeachta)

Ní féidir an tréimhse formheasa le haghaidh substaint ghníomhach a shíneadh faoi Airteagal 17 de Rialachán (CE) Uimh. 1109/2009 ach amháin chun céim sa nós imeachta dá bhforáiltear sa Rialachán sin nó i Rialachán Cur Chun Feidhme (AE) Uimh. 844/2012 (4) a chur chun feidhme. Níor chéim rialta den nós imeachta é fanacht ar chonclúid an Údaráis Eorpaigh um Shábháilteacht Bia (EFSA) ar dhul in éag na teorann ama faoi Airteagal 13 de Rialachán Cur Chun Feidhme (AE) Uimh. 844/2012. Dá réir sin, ní chuimsítear síneadh na formheasa do ghliofosáit le bonn dlí Airteagal 17 de Rialachán (CE) Uimh. 1107/2009.

An dara saincheist dlí: sárú ar Airteagal 17 de Rialachán (CE) Uimh. 1107/2009 trí scrúdú a dhéanamh go mícheart an raibh an t-iarratasóir ar athnuachan freagrach as na fáthanna nárbh fhéidir cinneadh maidir le hathnuachan a ghlacadh

Ba chóir don Choimisiún scrúdú sonrach a dhéanamh ar a mhéid a bhí bearnaí sna sonraí agus na bearnaí a bhí ann dá bharr sin sa mheasúnú riosca don tsubstaint ghníomhach gliofosáit ina gcúis le moilleanna a raibh an t-iarratasóir ar athnuachan freagrach astu. I gcodarsnacht leis sin, rinne an Coimisiún earráid dlí nuair a ghlac sé leis nach raibh an t-iarratasóir ar athnuachan freagrach go ginearálta as moilleanna tar éis d’inghlacthacht an iarratais ar athnuachan bheith deimhnithe.

An tríú saincheist dlí: sárú ar Airteagal 17 de Rialachán (CE) Uimh. 1107/2009, toisc nár tugadh aird chuí ar chúiseanna imní sláinte agus comhshaoil

Le hAirteagal 17 de Rialachán (CE) Uimh. 1107/2009, tugtar corrlach breithmheasa don Choimisiún. Ba chóir don Choimisiún staonadh ón tréimhse formheasa a shíneadh má chuirtear cosc air sin mar gheall ar chúiseanna imní sláinte nó comhshaoil. Rinne an Coimisiún earráid dlí, áfach, toisc nár chuir sé na cúiseanna imní sin san áireamh agus nach ndearna sé iad a mheá mar chuid de bhainistíocht riosca.

4.	An ceathrú saincheist dlí: sárú ar phrionsabal an réamhchúraim Trí neamhaird a dhéanamh de chúiseanna imní sláinte agus comhshaoil, mhainnigh an Coimisiún prionsabal an réamhchúraim a urramú lena shíneadh ar an tsubstaint ghníomhach gliofosáit.

An cúigiú saincheist dlí: sárú ar an dualgas cúiseanna a lua

Bhí ráiteas neamhleor ar na cúiseanna ag gabháil leis an gcinneadh ón gCoimisiún i gcoinne an iarratasóra (an dara mír d’Airteagal 296 CFAE). Ar bhonn an chur i bhfeidhm mhícheart a rinne sé d’Airteagal 17 de Rialachán (CE) Uimh. 1107/2009, níor thug an cosantóir aon mhíniú intuigthe ar an gcúis a raibh an méid a rinne sé sa nós imeachta athnuachana dleathach.

(1) Rialachán Cur Chun Feidhme (AE) 2022/2364 ón gCoimisiún an 2 Nollaig 2022 lena leasaítear Rialachán Cur Chun Feidhme (AE) Uimh. 540/2011 a mhéid a bhaineann le síneadh a chur le tréimhse formheasa na substainte gníomhaí gliofosáit (IO 2022 L 312, lch. 99).

(2) Rialachán (CE) Uimh. 1367/2006 ó Pharlaimint na hEorpa agus ón gComhairle an 6 Meán Fómhair 2006 maidir le forálacha Choinbhinsiún Aarhus maidir le Rochtain ar Fhaisnéis, Rannpháirtíocht Phoiblí i gCinnteoireacht agus Rochtain ar Cheartas i gCúrsaí Comhshaoil a chur i bhfeidhm ar institiúidí agus comhlachtaí an Chomhphobail (IO 2006 L 264, lch. 13).

(3) Rialachán (CE) Uimh. 1107/2009 ó Pharlaimint na hEorpa agus ón gComhairle an 21 Deireadh Fómhair 2009 maidir le táirgí cosanta plandaí a chur ar an margadh agus lena n-aisghairtear Treoir 79/117/CEE agus Treoir 91/414/CEE ón gComhairle (IO 2009 L 309, lch. 1).

(4) Rialachán Cur Chun Feidhme (AE) Uimh 844/2012 ón gCoimisiún an 18 Meán Fómhair 2012 lena leagtar amach na forálacha is gá chun an nós imeachta athnuachana um shubstaintí gníomhacha a chur chun feidhme, dá bhforáiltear i Rialachán (CE) Uimh. 1107/2009 ó Pharlaimint na hEorpa agus ón gComhairle maidir le táirgí cosanta plandaí a chur ar an margadh (IO 2012 L 252, lch. 26).