FÓGRAÍ Ó INSTITIÚIDÍ, Ó CHOMHLACHTAÍ, Ó OIFIGÍ, AGUS Ó GHNÍOMHAIREACHTAÍ AN AONTAIS EORPAIGH

21.4.2023

Iris Oifigiúil an Aontais Eorpaigh

C 138/2

Rátaí malairte an euro (1)

20 Aibreán 2023

(2023/C 138/02)

1 euro =

	Airgeadra	Ráta malairte
USD	dollar na Stát Aontaithe	1,0944
JPY	yen na Seapáine	147,46
DKK	krone na Danmhairge	7,4524
GBP	punt steirling	0,88153
SEK	krona na Sualainne	11,3280
CHF	franc na hEilvéise	0,9810
ISK	króna na hÍoslainne	149,50
NOK	krone na hIorua	11,6040
BGN	lev na Bulgáire	1,9558
CZK	koruna Phoblacht na Seice	23,502
HUF	forint na hUngáire	377,68
PLN	zloty na Polainne	4,6110
RON	leu na Rómáine	4,9308
TRY	lira na Tuirce	21,2348
AUD	dollar na hAstráile	1,6290
CAD	dollar Cheanada	1,4757
HKD	dollar Hong Cong	8,5907
NZD	dollar na Nua-Shéalainne	1,7763
SGD	dollar Shingeapór	1,4599
KRW	won na Cóiré Theas	1 450,34
ZAR	rand na hAfraice Theas	19,8552
CNY	renminbi-yuan na Síne	7,5298
IDR	rupiah na hIndinéise	16 364,81
MYR	ringgit na Malaeisia	4,8564
PHP	peso na nOileán Filipíneach	61,429
RUB	rúbal na Rúise
THB	baht na Téalainne	37,609
BRL	real na Brasaíle	5,5484
MXN	peso Mheicsiceo	19,8156
INR	rúipí na hIndia	89,9365

(1) Foinse: ráta malairte tagartha arna fhoilsiú ag an mBanc Ceannais Eorpach (BCE).

NÓSANNA IMEACHTA A BHAINEANN LEIS AN gCOMHBHEARTAS TRÁCHTÁLA A CHUR CHUN FEIDHME

21.4.2023

Iris Oifigiúil an Aontais Eorpaigh

C 138/9

Foilsiú teachtaireachta maidir le leasú caighdeánach a fhormheas, ar leasú é ar shonraíocht táirge atá ann le haghaidh ainm in earnáil an fhíona, dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún

(2023/C 138/07)

Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).

FORMHEAS LEASAITHE CHAIGHDEÁNAIGH A CHUR IN IÚL

“Toro”

PDO-ES-A0886-AM05

Dáta teachtaireachta: 2.2.2023

TUAIRISC AR AN LEASÚ FORMHEASTA AGUS CÚISEANNA LEIS

1. Feabhas ar an bhFoclaíocht

Tuairisc

Maidir leis na catagóirí de tháirgí fíniúna a áirítear, tá tagairt chineálach do reachtaíocht an Aontais Eorpaigh ann in ionad tagairt do Rialachán (AE) Uimh. 1308/2013.

Leasaíodh pointe 1 den tsonraíocht, ach ní dhéantar difear don doiciméad aonair.

Is leasú caighdeánach é toisc nach meastar go dtagann sé faoi cheann ar bith de na catagóirí dá ndéantar foráil in Airteagal 105(2) de Rialachán (AE) Uimh. 1308/2013.

Cúis

Ionas nach mbeadh gá le leasú na sonraíochta dá n-athródh an Rialachán réamhluaite.

2. Cuimsiú cineálacha nua fíona: leath-thirim, leath-mhilis agus milis i gCatagóir 1 - Fíon

Tuairisc

Anuas ar fhíon tirim, a áiríodh cheana féin, tá fíonta leath-thirime, leathmhilse agus milse (de réir an chion siúcra) curtha isteach, chomh maith le tuairiscí anailíseacha agus orgánaileipteacha.

Baineann an leasú seo le pointí 2(a) agus (b) den tsonraíocht agus le pointe 4 den doiciméad aonair.

Cineál leasaithe: CAIGHDEÁNACH (baineann an leasú le doiciméad aonair). Ní thagann an leasú seo faoi aon cheann de na catagóirí dá ndéantar foráil in Airteagal 105(2) de Rialachán (AE) Uimh. 1308/2013. Ar deireadh, tá na saintréithe agus an phróifíl ar a dtugtar tuairisc sa nasc mar an gcéanna, agus tá siad mar thoradh ar an idirghníomhaíocht idir tosca nádúrtha agus daonna.

Cúis

Tá na cineálacha nua fíona seo curtha isteach de thoradh leasú roimhe seo ar an tsonraíocht, lenar cuireadh cineálacha stairiúla fíonchaor geal amhail Moscatel de Grano Menudo agus Albillo Real, chomh maith leis an rogha fíonta aonchineálacha a tháirgeadh ó Garnacha Tinta. Bhí na fíonta sin á dtáirgeadh ag fíonlanna sa cheantar cheana, agus iad ag úsáid fíonchaor a fhástar i bhfíonghoirt a chumhdaítear san STFC sin, ach níorbh fhéidir iad a chur ar an margadh agus STFC Toro ar an lipéad.

Tá léirithe ag an anailís go bhfuil blas cumhachtach bláthach nó torthaíoch agus carachtar dian sa bhéal: tá struchtúr ag baint leo. Tá sé sin ar fad nasctha leis an terroir. Baineann na saintréithe sin go sonrach le fíonta a chumhdaítear le STFC. I mbeagán focal, coinníonn siad carachtar sonrach na bhfíonta a chumhdaítear le STFC Toro ach tá éagsúlachtaí fíneálta ag baint leo de bharr an cion siúcra atá acu, atá níos airde.

Ar an gcaoi chéanna, is gá saintréithe bunúsacha fisiceacha, ceimiceacha agus orgánaileipteacha a leagan síos, de réir cheanglais Rialachán Cur Chun Feidhme (AE) 2019/34 ón gCoimisiún lena leagtar síos rialacha mionsonraithe le haghaidh chur i bhfeidhm Rialachán (AE) Uimh. 1308/2013 ó Pharlaimint na hEorpa agus ón gComhairle.

3. Oiriúnú dálaí táirgthe fíona (cleachtais fhíon eolaíocha: srianta maidir le fíonóireacht) chun na cineálacha nua fíona a chur san áireamh

Tuairisc

Tarscaoileadh an neart íosta dóchúil alcóil i gcás fíonchaora atá beartaithe le haghaidh fíonta leath-thirime, leathmhilse agus milse nach féidir a úsáid ar bhealach eile. Sonraíodh an modh táirgthe le haghaidh fíonta milse.

Baineann an leasú seo le pointe 3.b.1 den tsonraíocht táirge agus le pointe 5.1 den doiciméad aonair.

Cineál leasaithe: CAIGHDEÁNACH (baineann an leasú le doiciméad aonair). Tagann saintréithe fíor-riachtanacha an táirge, fíon a bhfuil STFC Toro aige, as meascán d’fhachtóirí nádúrtha agus daonna. Ní bhaineann athruithe ar na saintréithe sin leis an leasú toisc go gcoinníonn na fíonta nua a chuirtear san áireamh carachtar sonrach na bhfíonta ón gceantar, ach tá éagsúlachtaí fíneálta ag baint leo de bharr an cion siúcra atá acu, atá níos airde. Ní dhéanann an leasú difear don nasc agus, dá bhrí sin, ní mheastar go dtagann sé faoi aon cheann de na catagóirí dá ndéantar foráil in Airteagal 105(2) de Rialachán (AE) 1308/2013.

Cúis

Ní mór na cleachtais fhíoneolaíocha a oiriúnú chun na modhanna táirgthe nua le haghaidh fíonta leath-thirime, leathmhilse agus milse a chur san áireamh. Tá na coinníollacha nua sin i gcomhréir leis an reachtaíocht agus tosaíochtaí an mhargaidh.

4. Nithe breise a chur leis an nasc le hAghaidh fionnta leath-thirime, leath mhilse agus milse

Tuairisc

Toisc go bhfuil cineálacha nua fíona i gceist, ní mór tuairisc a thabhairt orthu. Cuireadh tagairtí do na fíonta sin isteach sna foranna a leanas dá bhrí sin: b) Sonraí faoin táirge agus c) Nasc cúisíoch. Déantar na fíonta sin agus na fíonta tirime as na cineálacha céanna. Coinníonn siad an phróifíl chéadfach, fhisiceach agus cheimiceach chéanna, chomh maith le héagsúlachtaí fíneálta de bharr an tsiúcra atá iontu.

Rinneadh ceartúcháin ar na tagairtí don chineál geal, Malvasía, ar a dtugtar a ainm iomlán anois, Malvasía Castellana, chun go seachnófar aon mhearbhall maidir le cineálacha eile a dtugtar Malvasía orthu.

Baineann an leasú seo le hAirteagal 7 den tsonraíocht agus le pointe 8 den doiciméad aonair.

Cineál leasaithe: CAIGHDEÁNACH (baineann an leasú le doiciméad aonair). Cé gur cuireadh leis an bhfoclaíocht sa roinn maidir leis an nasc, tá an nasc cúisíoch mar an gcéanna agus níl aon difear air. Tá an roinn á leathnú chun an tuairisc ar na fíonta nua a chur san áireamh agus chun an nasc cúisíoch do na fíonta sin a mhíniú, agus ar na cúiseanna sin amháin. Dá bhrí sin, ní féidir an leasú a aicmiú seo faoi aon cheann de na catagóirí dá ndéantar foráil in Airteagal 105(2) de Rialachán (AE) Uimh.1308/2013.

Cúis

Rinneadh na fíonta sin sa cheantar freisin ach níor cuireadh ar an margadh iad agus STFC Toro orthu. Ba ghá na fíonta sin a chur san áireamh sa tsonraíocht toisc go léirítear leo táirge ardcháilíochta, agus léiriú iontach ar charachtar barántúil fhíonta Toro, a fheabhsaítear leis an gcion siúcra atá iontu.

5. Leasuithe ar na forálacha maidir le buidéalú

Tuairisc agus cúiseanna

Is i mbuidéil ghloine amháin a phacáistítear é, agus tá an cineál stopalláin faoi réir rialacháin.

Baineann an leasú seo le pointe 8.b.2) den tsonraíocht ach ní dhéanann sé difear don doiciméad aonair.

Cineál leasaithe: CAIGHDEÁN. Tagann saintréithe fíor-riachtanacha an táirge, fíon a bhfuil STFC Toro aige, as meascán d’fhachtóirí nádúrtha agus daonna. Ní bhaineann aon athrú ar na saintréithe sin leis an leasú. Ní dhéanann an leasú an nasc neamhbhailí agus, dá bhrí sin, ní mheastar go dtagann sé faoi aon cheann de na catagóirí dá ndéantar foráil in Airteagal 105(2) de Rialachán (AE) Uimh. 1308/2013.

Cúis

Is gá an cineál ábhair a úsáidtear sa bhuidéalú a shonrú, chomh maith leis an gcineál stopalláin a úsáidtear, chun cáilíocht agus íomhá na bhfíonta ar a bhfuil STFC Toro a chaomhnú, i gcomhréir le ceanglais reatha an mhargaidh i ndáil le fíon ar ardchaighdeán.

6. Feabhas ar fhoclaíocht na bhForálacha lipéadaithe

Tuairisc

Is leis an bhfoclaíocht amháin a bhaineann an leasú. Ní bhaineann athruithe ar na forálacha lipéadaithe leis.

Baineann an leasú seo le pointe 8.b.3) den tsonraíocht agus le pointe 9 den doiciméad aonair.

Cineál leasaithe: CAIGHDEÁNACH (baineann an leasú le doiciméad aonair). Toisc go ndéanann an t-athrú difear don fhoirm amháin, agus ní don ábhar, ní mheastar go dtagann sé faoi cheann ar bith de na catagóirí dá ndéantar foráil in Airteagal 105(2) de Rialachán (AE) Uimh. 1308/2013.

Cúis

Feabhas ar an bhfoclaíocht.

7. Nuashonrú ar an roinn maidir le seiceálacha

Tuairisc

Tugadh sonraí teagmhála an údaráis inniúil agus an chomhlachta tarmligthe cothrom le dáta. Tá tagairt chineálach do reachtaíocht an Aontais ann in ionad tagairt do Rialachán (AE) Uimh. 1308/2013.

Baineann an leasú seo le pointe 9 a) agus b.1) den tsonraíocht ach ní dhéanann sé difear don doiciméad aonair.

Cineál leasaithe: CAIGHDEÁNACH (ní bhaineann an leasú seo leis an doiciméad aonair). Ní thagann sé faoi aon cheann de na catagóirí dá ndéantar foráil in Airteagal 105(2) de Rialachán (AE) Uimh. 1308/2013.

Cúis

Fuair an Bord Rialaithe le haghaidh STFC Toro creidiúnú caighdeánach ISO/IEC 17065:2012. I ndiaidh an chreidiúnaithe sin, tarmligfidh Instituto Tecnológico Agrario de Castilla y León [Institiúid Teicneolaíochta Talmhaíochta na Caistíle agus León] na cúraimí a bhaineann le seiceálacha comhréireachta chuig an mBord Rialaithe i gcomhréir le hAirteagal 116a de Rialachán (AE) Uimh. 1308/2013.

DOICIMÉAD AONAIR

1. Ainm(neacha)

Toro

2. Cineál an táisc gheografaigh

STFC – Sonrúchán Tionscnaimh faoi Chosaint

3. Catagóirí táirgí fíniúna

Fíon

4. Tuairisc ar an bhfíon nó ar na fionnta

1. FÍON – FÍONTA TIRIME GEALA AGUS ROSÉ

TUAIRISC THÉACSÚIL GHAIRID

Fíonta geala

Cuma: dath buí idir éadrom agus órga air, gan bheith modartha. Dea-bholadh: láidir in éineacht le dea-bholaithe torthaíocha agus/nó bláthacha agus/nó dea-bholadh féir agus láidreacht idir measartha agus measartha ard. Blas: tathag éadrom sa bhéal, iarbhlas idir measartha agus fada, aigéadacht idir measartha agus measartha ard agus cothromaíocht mhaith idir alcól agus aigéadacht.

Fíonta geala a choiptear i mbairillí nó a aosaítear i mbairillí

Cuma: dath buí idir éadrom agus órga air, gan bheith modartha. Dea-bholadh: láidir in éineacht le dea-bholaithe torthaíocha agus/nó bláthacha agus/nó dea-bholadh féir chomh maith le dea-bholaithe treasach is saintréith den aosú i mbairillí. Láidreacht idir measartha agus measartha ard. Blas: iarbhlas idir measartha agus fada, aigéadacht measartha ard agus idir tathag measartha agus tathagach sa bhéal. Dea-bholaithe treasacha cothroma d’adhmad.

Fíonta rosé

Cuma: dath idir bándearg éadrom agus dath an bhradáin air, gan bheith modartha. Dea-bholadh: láidir, in éineacht le dea-bholaithe úra (gan bheith ró-aibí) de thorthaí dearga agus/nó torthaí dubha, láidreacht idir measartha agus measartha ard. Blas: tathag éadrom sa bhéal, iarbhlas idir measartha agus fada, aigéadacht idir measartha agus measartha ard agus cothromaíocht mhaith idir alcól agus aigéadacht.

(*)	Más é 5 ghram/lítear, nó níos mó, an cion de shiúcraí iarmharacha sna fíonta, is é 250 milleagram/lítear an t-uasmhéid dé-ocsaíde sulfair is ceadmhach iontu.

(**)	In aon chás, ní mór do na paraiméadair fhisiceacha agus cheimiceacha a shuitear sa roinn seo na huasteorainneacha a leagtar síos i rialacha an Aontais a chomhlíonadh.

Saintréithe anailíseacha ginearálta
Uasmhéid nirt alcóil iomláin (mar % den toirt)
Íosmhéid nirt alcóil iarbhír (mar % den toirt)	11
Íosmhéid aigéadachta iomláine	3,5 gram in aghaidh an lítir, arna léiriú mar aigéad tartarach
Uasmhéid aigéadachta luainí (mar mhilleachoibhéisí in aghaidh an lítir)	18
Uasmhéid dé-ocsaíde sulfair iomláine (mar mhilleagraim in aghaidh an lítir)	200

2. FÍON – FÍONTA DEARGA TIRIME

TUAIRISC THÉACSÚIL GHAIRID

Fíon dearg óg

Cuma: dath idir caordhearg agus dath an rúibín air, gan bheith modartha. Dea-bholadh: láidir, in éineacht le dea-bholaithe de thorthaí dearga agus/nó torthaí dubha, agus láidreacht idir measartha agus measartha ard. Blas: idir tathag measartha agus tathagach sa bhéal, chomh maithe le hiarbhlas idir measartha agus measartha fada agus cothromaíocht mhaith idir alcól agus aigéadacht.

Fíon dearg a aosaítear i mbairillí (lena n-áirítear iad siúd a bhfuil an lipéad “Roble” [Dair], “Crianza”, “Reserva” agus “Gran Reserva” orthu)

Cuma: dath idir caordhearg agus terracotta air, gan bheith modartha. Dea-bholadh: láidir, in éineacht le dea-bholaithe de thorthaí dearga agus/nó torthaí dubha agus/nó torthaí aibí, agus láidreacht mheasartha. Dea-bholaithe is saintréith den aosú i mbairillí, chomh maith le láidreacht idir measartha agus measartha ard, ag brath ar an aosú. Blas: idir tathag measartha agus tathagach chomh maith le hiarbhlas atá idir measartha agus fada agus cothromaithe.

(*)	In aon chás, comhlíonfaidh na paraiméadair fhisiceacha agus cheimiceacha a shuitear sa roinn seo na teorainneacha a leagtar síos i rialacha an Aontais.

Saintréithe anailíseacha ginearálta
Uasmhéid nirt alcóil iomláin (mar % den toirt)
Íosmhéid nirt alcóil iarbhír (mar % den toirt)	12,5
Íosmhéid aigéadachta iomláine	3,5 gram in aghaidh an lítir, arna léiriú mar aigéad tartarach
Uasmhéid aigéadachta luainí (mar mhilleachoibhéisí in aghaidh an lítir)	20
Uasmhéid dé-ocsaíde sulfair iomláine (mar mhilleagraim in aghaidh an lítir)	150

3. Fíonta leath-thirime, leathmhilse agus milse (geal, rosé agus dearg)

TUAIRISC THÉACSÚIL GHAIRID

Fíonta geala: dath buí idir éadrom agus órga air, gan bheith modartha. Láidir in éineacht le dea-bholaithe torthaíocha agus/nó bláthacha agus/nó dea-bholadh féir agus láidreacht idir measartha agus measartha ard. Tathag: tathag measartha (fíonta leath-thirime), idir tathag measartha agus tathagach (fíonta leathmhilse) agus tathagach (fíonta milse); meán-iarbhlas go hiarbhlas fada; aigéadacht idir measartha agus measartha ard (fíonta leath-thirime agus leathmhilse) agus aigéadacht mheasartha (fíonta milse); alcól agus aigéadacht atá cothromaithe.

Fíonta rosé: dath idir bándearg éadrom agus dath an bhradáin air, gan bheith modartha. láidir, in éineacht le dea-bholaithe úra (gan bheith ró-aibí) de thorthaí dearga agus/nó torthaí dubha, láidreacht idir measartha agus ard (fíonta leath-thirime) agus idir measartha agus measartha ard (fíonta leathmhilse agus milse). Tathag: tathagach measartha (fíonta leath-thirime), idir tathagach measartha agus tathagach (fíonta leathmhilse) agus tathagach (fíonta milse); iarbhlas: idir measartha agus fada (fíonta leath-thirime agus milse) agus idir measartha agus measartha fada (fíonta leathmhilse); aigéadacht: idir measartha agus measartha ard (fíonta leath-thirime agus leathmhilse) agus aigéadacht mheasartha (fíonta milse); agus alcól agus aigéadacht atá cothromaithe.

Fíonta dearga: dath idir caordhearg agus dath an rúibín orthu, gan bheith modartha. Láidir, in éineacht le dea-bholaithe de thorthaí dearga agus/nó torthaí dubha, láidreacht idir measartha agus ard (fíonta leath-thirime) agus láidreacht mheasartha (fíonta leathmhilse agus milse). Tathag: tathag measartha (fíonta leath-thirime agus leathmhilse) agus tathagach (fíonta milse); iarbhlas idir measartha agus fada, alcól agus aigéadacht atá cothromaithe.

*	In aon chás, comhlíonfaidh na paraiméadair fhisiceacha agus cheimiceacha a shuitear sa roinn seo na huasteorainneacha a shuitear i rialacha an Aontais.

Saintréithe anailíseacha ginearálta
Uasmhéid nirt alcóil iomláin (mar % den toirt)
Íosmhéid nirt alcóil iarbhír (mar % den toirt)	9
Íosmhéid aigéadachta iomláine	3,5 gram in aghaidh an lítir, arna léiriú mar aigéad tartarach
Uasmhéid aigéadachta luainí (mar mhilleachoibhéisí in aghaidh an lítir)	18
Uasmhéid dé-ocsaíde sulfair iomláine (mar mhilleagraim in aghaidh an lítir)	200

5. Cleachtais fíon oireachta

5.1. Cleachtais fhíoneolaíocha shonracha

1. Cleachtas fíoneolaíochta sonrach

—	Neart alcóil dóchúil íosta na bhfíonchaor: 10.5 %, ach amháin i gcás fíonchaor atá beartaithe le haghaidh tháirgeadh na bhfíonta leath-thirime, leathmhilse agus milse, cás ina mbíonn sé ag 9 %. Ní féidir na fíonchaora réamhluaite a úsáid chun aon chineál fíona eile a dhéanamh.

—	Uastáirgeacht: 72 lítear in aghaidh 100 cileagram d’fhíonchaora.

—	Déantar fíonta milse nuair a choinnítear cuid de na siúcraí nádúrtha atá sna fíonchaora nuair a bhristear isteach ar an gcoipeadh alcólach, ag úsáid modhanna a údaraítear leis an reachtaíocht atá i bhfeidhm. Ní áirítear leis sin alcól a chur leis.

2. Srian maidir le fíon a dhéanamh

Ní mór na fíonta geala a tháirgeadh le cineálacha geala amháin (Malvasía Castellana, Verdejo, Moscatel de Grano Menudo agus Albillo Real).

Ní mór na fíonta rosé a tháirgeadh le cineálacha dearga agus geala údaraithe (cineálacha príomhúla agus tánaisteacha).

Ní mór na fíonta dearga a tháirgeadh le cineálacha Tinta de Toro agus Garnacha Tinta amháin, agus tá an táirgeadh teoranta ar dhá chineál fíonta dearga: fíon dearga a dhéantar le 85 % d’fhíonchaora Garnacha Tinta ar a laghad agus fíon dearg a dhéantar le 75 % d’fhíonchaora Tinta de Toro ar a laghad.

3. An modh saothraithe

—	Dlús íosta plandaithe: 500 fíniúin/heicteár

—	Is féidir an fhíniúin a threorú ag úsáid an mhodha cuachphrúnála nó an mhodha fíniúnacha ar laitís.

—	Ní cheadaítear plandálacha measctha nach féidir na cineálacha éagsúla a bhuain ar leithligh leo.

5.2. Uastáirgeacht

1.	Garnacha Tinta, Malvasía Castellana (Doña Blanca), Verdejo, Albillo Real agus Moscatel de Grano Menudo. 9 000 cileagram fíonchaor in aghaidh an heicteáir

2.	64,80 heictilítear in aghaidh an heicteáir

3.	Tinta de Toro 7 500 cileagram fíonchaor in aghaidh an heicteáir

4.	54 heictilítear in aghaidh an heicteáir

6. Limistéar geografach críochaithe

Tá limistéar geografach STFC “Toro” suite sa chuid is faide siar de réigiún Castile agus Leon, soir ó dheas ó chúige Zamora, agus cuimsítear ann cuid de na limistéir nádúrtha de Tierra del Vino, Valle del Guareña agus Tierra de Toro. Tá teorainn aige le mánna Tierra del Pan agus Tierra de Campos agus tá 62 000 heicteár talún ann.

Áirítear na bardais a leanas leis:

I gCúige Zamora:

Argujillo, La Bóveda de Toro, Morales de Toro, El Pego, Peleagonzalo, El Piñero, San Miguel de la Ribera, Sanzoles, Toro, Valdefinjas, Venialbo agus Villabuena del Puente.

I gCúige Valladolid:

San Román de Hornija, Villafranca del Duero, dúichí fíonsaothrúcháin Villaester de Arriba agus Villaester de Abajo agus bardas Pedrosa del Rey.

7. Cineál/cineálacha fíonchaor

DOÑA BLANCA – MALVASÍA CASTELLANA

TEMPRANILLO – TINTA DE TORO

VERDEJO

8. Tuairisc ar an nasc (na naisc)

Tá an dálaí aeráide thar a bheith fuar sa gheimhreadh a bhfuil roinnt mhaith uaireanta gréine agus teochtaí foircneacha, rud a chuireann teorainn le táirgiúlacht na bhfíniúnacha. Is iad na cineálacha éagsúla ithreach (dúrabhán gainmheach) a chinneann cé acu cineálacha a chuireann na saothraithe fíniúna. Is iad na tosca sin, pH neodrach, ábhar orgánach teoranta agus feabhsaitheoirí ithreach a chuireann na saothraithe fíniúna a chinneann dea-bholadh, struchtúr agus neart alcóil na bhfíonta, atá ard. Anuas air sin, maidir leis an gcion ard iarainn san ithir, chomh maith le húsáid an chórais treoraithe fíniúnacha cuachphrúnála agus aois shuntasach an fhíonghoirt, cuireann siad sin leis an méid suntasach lí sna fíonta sin.

Thairis sin, i gcás fíonta milse agus leathmhilse, cruthaíonn na blianta taithí i dtáirgeadh na gcineálacha fíona sin in STFC Toro an acmhainneacht táirgeachta. Cloítear leis na caighdeáin cháilíochta is déine nuair a dhéantar na fíonta sin agus coinnítear próifíl thipiciúil orgánaileipteach fhíonta traidisiúnta Toro. Is léiriú iontach ar charachtar barántúil fhíonta Toro iad na fíonta sin, rud a fheabhsaítear leis an gcion siúcra atá iontu.

9. Coinníollacha breise fíor-riachtanacha (pacáistiú, lipéadú, ceanglais eile)

Creat dlíthiúil

Sa reachtaíocht náisiúnta

Cineál an choinníll bhreise

Pacáistiú laistigh den limistéar geografach críochaithe

Tuairisc ar an gcoinníoll

Áirítear sa phróiseas fíonóireachta buidéalú agus aosú na bhfíonta. Dá réir sin, ní féidir na saintréithe orgánaileipteacha agus fisiceacha agus ceimiceacha ar a dtugtar tuairisc sa tsonraíocht seo a ráthú ach amháin má tharlaíonn gach ceann de na hoibríochtaí láimhseála fíona laistigh den limistéar táirgthe. Tá buidéalú na bhfíonta a chumhdaítear faoi STFC “Toro” ar cheann de na tosca atá criticiúil chun na saintréithe a leagtar amach sa tsonraíocht a bhaint amach. Mar iarmhairt air sin, agus d’fhonn an cháilíocht a áirithiú agus ráthaíocht a sholáthar maidir le tionscnamh agus rialú, ní mór buidéalú a dhéanamh i bhfíonlanna atá lonnaithe i monarchana buidéalaithe sa limistéar táirgthe.

Creat dlíthiúil

Sa reachtaíocht náisiúnta

Cineál an choinníll bhreise

Forálacha breise a bhaineann le lipéadú

Tuairisc ar an gcoinníoll

Féadfaidh an téarma traidisiúnta “DENOMINACIÓN DE ORIGEN” [SONRÚCHÁN TIONSCNAIMH] agus na túslitreacha “D.O.” a úsáid ar an lipéad in ionad “DENOMINACIÓN DE ORIGEN PROTEGIDA”.

Féadfar a áireamh ar lipéadú na bhfíonta na tagairtí “ROBLE” [Dair] agus “FERMENTADO EN BARRICA” [COIPTHE I mBAIRILLÍ]. Féadfar na téarmaí traidisiúnta “CRIANZA”, “RESERVA” agus “GRAN RESERVA” a úsáid ar fhíonta dearga, ar choinníoll go gcomhlíonann siad na coinníollacha a leagtar síos sa reachtaíocht atá i bhfeidhm.

Nasc chuig an tsonraíocht táirge

www.itacyl.es/documents/20143/342640/PCC+DO+TORO+Rev+en+vigor.docx/38b794e5-f14e-cd14-70d2-bcd031712969

(1) IO L 9, 11.1.2019, lch. 2.

21.4.2023

Iris Oifigiúil an Aontais Eorpaigh

C 138/17

Foilsiú iarratais ar ainm a chlárú de bhun Airteagal 50(2)(a) de Rialachán (AE) Uimh. 1151/2012 ó Pharlaimint na hEorpa agus ón gComhairle maidir le scéimeanna cáilíochta do tháirgí talmhaíochta agus do bhia-earraí

(2023/C 138/08)

Leis an bhfoilseachán seo, tugtar an ceart chun cur i gcoinne an iarratais de bhun Airteagal 51 de Rialachán (AE) Uimh. 1151/2012 ó Pharlaimint na hEorpa agus ón gComhairle (1) laistigh de 3 mhí ó dháta an fhoilseacháin seo.

DOICIMÉAD AONAIR

“Cerdo de Teruel”

Uimh. AE: PGI-ES-2633 — 16.9.2020

STFC ( ) TGFC (X)

1. Ainm nó ainmneacha [STFC nó TGFC]

“Cerdo de Teruel”

2. Ballstát nó Tríú Tír

An Spáinn

3. Tuairisc ar an táirge talmhaíochta nó ar an táirge bia

3.1. An cineál táirge

Aicme 1.1. Feoil úr (agus scairteach)

3.2. Tuairisc ar an táirge lena mbaineann an t-ainm in (1)

Úsáidtear an tásc geografach faoi chosaint “Cerdo de Teruel” chun muiceoil – i.e. feoil mhucúil – a chomhlíonann na ceanglais seo a leanas a chur in iúl:

—	feoil atá idir scoth-bhándearg agus dearg arna marmarú le saill ionmhatánach;

—	feoil ar a bhfuil blas éadrom, agus í súmhar agus bog sa bhéal.

Is féidir an mhuiceoil a chur i láthair i mbunghearrthacha nó i ngearrthacha miondíola nó i bhfilléid.

Faightear muiceoil “Cerdo de Teruel” nuair a bhaintear an chos agus an ghualainn de chonablach na muice (is féidir “Jamón de Teruel” a dhéanamh as an gcos agus “Paleta de Teruel” as an ngualainn – is ionann na ceanglais maidir le conablaigh le haghaidh na dtáirgí STFC sin agus le haghaidh an TGFC seo).

Ní mór di teacht ó mhuca ag a bhfuil an géinitíopa seo a leanas: Lanrásach (cineál “caighdeánach”) nó Mórmhuc Bhán – nó crosantaigh den dá chineál – mar líne na máthar agus Duroc mar líne an athar.

Ní mór na ceanglais seo a leanas a chomhlíonadh leis na conablaigh i ndiaidh an mharaithe:

—	meáchan te 86 kg ar a laghad;

—	tiús saille droma, arna thomhas sa réigiún lumbach ar aon líne le barr na coise, idir 16 mm agus 45 mm.

3.3. Beatha (maidir le táirgí de thionscnamh ainmhíoch amháin) agus amhábhair (maidir le táirgí próiseáilte amháin)

Tá réim bia na muc bunaithe ar ghránaigh go bunúsach agus tá céatadáin bhunaithe ann de na hamhábhair a chomhdhéanann a mbeatha: ní mór gurb ionann gránaigh agus 50 % ar a laghad, a mhéid is féidir, agus ní mór do na gránaigh sin teacht ón limistéar geografach sainithe.

Má chothaítear na muca as a dtagann an fheoil TGFC le beatha chumaisc, ní mór gur monaróirí atá lonnaithe laistigh den limistéar geografach nó sna cúigí máguaird a tháirg an bheatha chumaisc sin: Zaragoza, Guadalajara, Cuenca, Valencia, Castellón agus Tarragona.

Is gá an srian geografach sin ar shuíomh na monaróirí beatha toisc go n-úsáidtear na conablaigh mhuice chéanna a úsáidtear don TGFC seo chun liamhása STFC “Jamón de Teruel” / “Paleta de Teruel” a dhéanamh freisin. Is ionann na ceanglais don dá lipéad cáilíochta ag an gcéim seo den táirgeadh toisc gur féidir na codanna den chonablach nach gcumhdaítear leis an TGFC – na cosa agus na guaillí – a úsáid le haghaidh “Jamón de Teruel” (cosa) agus “Paleta de Teruel” (guaillí). Dá bhrí sin, rinneadh na ceanglais maidir le táirgeadh príomhúil a leagtar síos sa tsonraíocht táirge le haghaidh STFC “Jamón de Teruel” / “Paleta de Teruel” a mhacasamhlú sa tsonraíocht táirge le haghaidh STFC “Cerdo de Teruel”.

3.4. Céimeanna sonracha sa táirgeadh nach mór dóibh tarlú sa limistéar geografach sainithe

Déantar na céimeanna seo a leanas sa táirgeadh laistigh den limistéar geografach sainithe:

—	Táirgeadh muc: tógáil agus ramhrú;

—

Marú;

—	An conablach a ghearradh chun na cosa agus na guaillí a bhaint

3.5. Rialacha sonracha maidir le slisniú, grátáil, agus pacáistiú etc. an táirge dá dtagraíonn an t-ainm cláraithe

Féadfar an táirge a ghearradh, a fhilléadú, a phacáistiú agus a lipéadú ag gléasraí próiseála feola atá cláraithe leis an gcomhlacht bainistíochta agus atá lonnaithe laistigh den limistéar geografach, nó ag bunaíochtaí lasmuigh den limistéar geografach faoi chomhaontuithe comhair arna síniú le hoibreoirí deimhnithe ach formheas a fháil roimh ré ón gcomhlacht bainistíochta.

3.6. Rialacha sonracha maidir le lipéadú an táirge dá dtagraíonn an t-ainm cláraithe

Is féidir muiceoil TGFC “Cerdo de Teruel” a dhíol i mbunghearrthacha nó i ngearrthacha miondíola nó i bhfilléid.

Gach conablach, lúide na cosa agus na guaillí, arna sholáthar ag oibreoir cláraithe, ní mór é a shainaithint le lipéad atá sonrach don TGFC ar gach taobh, ar a mbeidh lógó sonrach an TGFC agus na focail Indicación Geográfica Protegida Cerdo de Teruel [“Tásc Geografach Faoi Chosaint Cerdo de Teruel”] nó IGP Cerdo de Teruel [TGFC “Cerdo de Teruel”].

Is féidir le hoibreoirí údaraithe amháin gearrthacha agus filléid a sheoladh (i.e. iad siúd atá údaraithe marcanna comhréireachta an TGFC a úsáid) agus ní féidir iad a sheoladh ach amháin go dtí go mbeidh siad lipéadaithe le lipéad deimhniúcháin uimhrithe ar a bhfuil ar a laghad lógó sonrach an TGFC agus na focail Indicación Geográfica Protegida [Tásc Geografach Faoi Chosaint] agus “Cerdo de Teruel”. Ní mór an lipéad sin a ghreamú go díreach ar bhunghearrthacha agus é a chur i gceangal le pacáistíocht na ngearrthacha miondíola agus na bhfilléad.

4. Sainmhíniú achomair ar an limistéar geografach

Is é Cúige Teruel an limistéar geografach ina dtáirgtear na muca (fás agus críochnú) agus ina maraítear iad agus ina ndéantar na cosa agus na guaillí a bhaint ó na conablaigh.

5. Nasc leis an limistéar geografach

Tá clárú an táisc gheografaigh faoi chosaint seo bunaithe ar an gcáil atá tuillte ag an táirge.

Téann tagairtí doiciméadaithe do “Cerdo de Teruel” siar go fada toisc go bhfuil baint láidir stairiúil ag cúige Teruel le tógáil muc agus le táirgí muiceola mar fhoinse ioncaim do mhuintir na háite.

Cuirtear béim ar thábhacht na muice agus ar thábhacht na feirmeoireachta muc sa chúige i ndoiciméid éagsúla. Bunaíodh rialacha maidir le tógáil muc agus íocaíochtaí i gCairt Ríoga Teruel 1177, arna bronnadh ag Alfonso II (Castañé, J., 1991: El Fuero de Teruel. Edición Crítica con introducción y traducción [“Cairt Teruel. Eagrán criticiúil le réamhrá agus aistriúchán”]).

In Historia de la Economía Política de Aragón [“Stair Gheilleagar Polaitiúil Aragón”] (1978), scríobh an nádúraí, an dlí-eolaí agus an staraí Jordán de Asso: “is mór an tóir atá ar na muca a thógtar i ndúiche Albarracín as a sócamas”.

Mar thoradh ar an mbaint áitiúil thraidisiúnta sin le tógáil beostoic, cláraíodh “Jamón de Teruel” mar shonrúchán tionscnaimh faoi chosaint in 1984. Chuidigh sé sin le táirgeadh muc in Teruel a dhaingniú le himeacht ama, agus úsáid á baint as eolas ón am atá thart. Iarracht a bhí ann luach saothair a thabhairt d’iarrachtaí feirmeoirí coinsiasacha chun na córais táirgthe a chaomhnú, ar chórais iad a thug a n-ainm do na táirgí ina dhiaidh sin, agus tosaíodh leis na táirgí feola leasaithe (“Jamón de Teruel” agus “Paleta de Teruel”), agus anois táthar ag bogadh ar aghaidh go dtí an chuid eile den fheoil úr a fhaightear ar chonablach.

Tá tionchar díreach ag an gcomhdhlúthú sin a rinneadh ar an ngníomhaíocht tógála muc agus ag an bhfíoras go ndéanann comhlachtaí deimhniúcháin faireachán ar an ngníomhaíocht sin ar chonablaigh na muc. Ós rud é go dtagann sí ó mhuca atá faoi réir roghnú géiniteach, leis an réim bia ghránachbhunaithe lena gcothaítear iad agus leis an am ramhraithe (chun go mbeidh meáchan conablaigh 86 kg ar a laghad ann), tá cáil ag an bhfeoil úr anois mar tháirge ag a bhfuil breisluach, rud a thugann aitheantas cuí do na tosca daonna go háirithe: pórú, réim bia agus tógáil.

Is í an ghéineolaíocht an chéad cheann de na tosca sin: leis an bpróiseas crosphóraithe ráthaítear go mbeidh muc “Cerdo de Teruel” 50 % Duroc (taobh an athar) agus 50 % Mórmhuc Bhán, Lanrásach nó crosantach den dá cheann (taobh na máthar) i gcónaí, agus leis na pórtha sin, nuair a dhéantar iad a chrosphórú mar ba cheart, tairgtear feoil úr ag a bhfuil leibhéal ard marmaraithe le saill ionmhatánach (Garitano, I. et al., 2013).

Is é an dara ceann an cinneadh réim bia ghránachbhunaithe a thabhairt do na muca (50 % gránaigh ar a laghad) ar feadh na tréimhse fáis ina hiomláine – agus ní hamháin ag na tráthanna den bhliain a bhíonn amhábhair áirithe ar fáil - rud atá fabhrach d’fhás níos céimsí. Mar shampla, maítear i staidéir freisin go bhféadfaí an cion aigéid shailligh sa tsaill ionmhatánach a mhéadú ach muca a chothú le réim bia nach bhfuil inti ach eorna ghráinithe ag an gcéim chríochnaitheora (Daza, A. et al., 2010b) agus léirítear sna staidéir sin (Daza, A. et al., 2012 agus Garitano, I. et al., 2012) go mbíonn tionchar ag an réim bia sin freisin ar pharaiméadair áirithe a bhaineann le cáilíocht na feola, amhail an dath agus an toilleadh coinneála uisce.

Is é an tríú cúis an bealach a dtógtar na muca chun beomheáchain 110-140 kg a bhaint amach tráth a maraithe, beomheáchain níos mó ná an caighdeán tráchtála 85-100 kg, chun a áirithiú go gcomhlíontar na ceanglais a bunaíodh don TGFC seo leis na conablaigh theo agus go mbíonn an fheoil marmaraithe le saill. Ina theannta sin, is amhlaidh go bhfuil na seamlais agus na feirmeacha lonnaithe gar dá chéile, rud a laghdaíonn amanna iompair agus dá bhrí sin an strus a chuirtear ar na muca roimh a marú freisin, rud atá fabhrach don fhordhath idir bándearg agus dearg a bhíonn ar fheoil “Cerdo de Teruel” lenar féidir idirdhealú soiléir a dhéanamh idir í agus muiceoil eile a bhíonn níos trua agus níos éadroime.

Dá bhrí sin, le cur i bhfeidhm leantach na dtrí mhodh fhoghlamtha sin is féidir an cineál feola a mbíonn cosaint á lorg ina leith a tháirgeadh, mar a thuairiscítear i bpointe 3.2, feoil arb iad an dathú agus an marmarú saille is saintréithe di.

Tacaíonn na húdaráis phoiblí le haitheantas “Cerdo de Teruel”. Idir 2004 agus 2010, chistigh Comhairle Cúige Teruel taighde ar fheabhsú agus ar bharrfheabhsú na gcóras táirgthe le haghaidh muca a gcumhdaítear a bhfeoil leis an TGFC seo faoi chomhaontú comhpháirtíochta arna shíniú freisin ag Cumann Thionscal Agraibhia Teruel agus ag an mBord Rialála le haghaidh STFC “Jamón de. Teruel” / “Paleta de Teruel”.

Déantar scrúdú i dtionscadail eile ar éifeachtaí tosca éagsúla, amhail coilleadh, cothú agus an ghéineolaíocht ar shaintréithe conablach. Tagtar ar an gconclúid sna tionscadail taighde sin go bhfuil borraí agus céiseanna araon oiriúnach le haghaidh feoil úr (Latorre et al, 2009a), go bhfuil tionchar ag réim bia ghránachbhunaithe ar an tsaill ar chonablaigh (Daza, A. et al., 2010b), agus go mbaineann tionchar dearfach le Duroc a úsáid mar líne an athar ar thorthaí táirgeachta, rud a thugann méadú beag ar chumhdach saille conablaigh (Garitano, I. et al., 2013).

Spreag stair “Cerdo de Teruel” agus an tábhacht a bhaineann léi ar an margadh taighde ar shaintréithe sainiúla na muiceola freisin: tá Dámh na Tréidliachta de chuid Ollscoil Zaragoza ag fiosrú na saintréithe fisiceacha agus ceimiceacha a bhaineann le gearrthacha áirithe muiceola (an luan agus an luan bog agus na gearrthacha ar a dtugtar sa Spáinn secreto [ó chúl alt na gualainne] agus presa [thíos laistigh den ghualainn]) ó mhuca a bhfuil na saintréithe is gá acu don TGFC seo (Saintréithe fisiciceimiceacha matán ó mhuca atá ceaptha le haghaidh liamhás tirimleasaithe ó Teruel (an Spáinn), Calvo et al, 2011). Ina cuid taighde cuireann an Dr Virginia Resconi i dtábhacht luach cothaitheach mhuiceoil “Cerdo de Teruel” ó mhuca a thógtar agus a chothaítear ar bhealach áirithe (mar a tuairiscíodh ar an suíomh gréasáin Portal Veterinario in 2011 faoin gceannlíne Luach cothaitheach mhuiceoil Teruel).

Thairis sin, in 2015, an tAonad Teicneolaíochta um Tháirgeadh Beostoic (cuid de Lárionad Taighde agus Teicneolaíochta Agraibhia Aragón nó CITA de réir a acrainm Spáinnise), d’fhoilsigh sé torthaí tionscadail taighde dar teideal Éifeacht na réime bia, an phacáistithe agus an ama nochta ar mheasúnú amhairc agus an rún muiceoil TGFC“Cerdo de Teruel” a cheannach (Panea, B. et al, 2015). Is díol suntais i measc chonclúidí an taighde seo an toradh go bhfuair an grúpa cóimheasa – muiceoil “Cerdo de Teruel” ó mhuca a cothaíodh lena ngnáthréim bia – scór níos airde ná na grúpaí eile, inar tugadh cineálacha éagsúla beatha do na hainmhithe.

In 2016 rinne taighdeoirí CITA tionscadal, faoi chuimsiú Chiste Infheistíochta Teruel, dar teideal Roghanna malartacha maidir le bainistíocht sláinte, táirgeadh agus margú le haghaidh mhuiceoil “Cerdo de Teruel”: togra le haghaidh inbhuanaitheachta (Panea, B. et al., 2016).

Rinneadh tuilleadh taighde le rannpháirtíocht ó CITA ó shin agus cuireadh i láthair é do chláir arna gcómhaoiniú ag Ciste Forbraíochta Réigiúnaí na hEorpa: Ispíní sláintiúla déanta as muiceoil ó Teruel: Cion laghdaithe saille sáithithe agus salainn (Panea, B. et al., 2019).

Tá “Cerdo de Teruel” le feiceáil freisin i bhfoilseacháin atá de chineál atá sách difriúil, agus tá lucht léitheoireachta mór agus aitheantas forleathan ann, is é sin an litríocht. Sampla amháin ar leith is ea caibidil den úrscéal Animales urbanos [Ainmhithe Uirbeacha] (Leiz, K. 2018) dar teideal Del cerdo de Teruel y del amor [Maidir le “Cerdo de Teruel” agus leis an nGrá].

In éineacht leis an traidisiún agus na foilseacháin eolaíochta agus faisnéise a thacaíonn léi, léirítear an cháil atá ar “Cerdo de Teruel” tuilleadh leis an aitheantas atá ann di ar an margadh. Is é “Cerdo de Teruel” an t-ainm a úsáideann táirgeoirí agus díoltóirí chun tagairt a dhéanamh don fheoil seo a bhfuil an-tóir uirthi, agus tá sé in úsáid go forleathan ar an margadh agus i hipearmhargaí agus siopaí búistéirí ar fud na Spáinne.

Tá miasa a dhéantar le “Cerdo de Teruel” le feiceáil i gcónaí ar bhiachláir ar fud na tíre freisin.

Thairis sin, is féidir oidis ina n-úsáidtear “Cerdo de Teruel” a fháil ar ardáin dhigiteacha chlúiteacha. Sampla amháin is ea oideas le haghaidh luan bog mhuiceoil “Cerdo de Teruel” le prúnaí agus cnónna péine ó El Gran Libro de la Cocina Aragonesa [Leabhar Mór Bhia Aragón] (Aneto Publicaciones, SL, 2011), arna phostáil i roinn an bhia agus na ndeochanna de RedAragón, tairseach idirlín le haghaidh réigiún Aragón. Tá oidis roinnte ag cócairí freisin amhail Secreto mhuiceoil “Cerdo de Teruel” le hanlann ubhthoraidh agus seacláide báine (ar shuíomh gréasáin ar a gcuirtear bia Aragón chun cinn darb ainm Comparte el Secreto. Aragón, alimentos nobles [Roinn an Rún: Aragón, miasa uaisle]) agus leicne mhuiceoil “Cerdo de Teruel” faoi anáil Altamiras [tagairt don bhráthair agus don chócaire ón 18ú céad Juan Altamiras atá i gceist le “faoi anáil Altamiras”] (roinn an bhia agus na ndeochanna den nuachtán Heraldo).

Déantar trácht ar a fheabhas atá “Cerdo de Teruel” sna meáin freisin:

—

Mar thoradh ar dhea-cháilíocht na réime bia lena gcothaítear na muca a úsáidtear chun Sonrúchán Tionscnaimh “Jamón de Teruel” a tháirgeadh, ní hamháin go mbíonn liamhása den scoth ann ach bíonn feoil úr ardcháilíochta ann freisin, ar a mbíonn dath bándearg dorcha, blas éadrom agus a bhíonn bog agus an-súmhar ó thaobh na raimhre de (2011, Indisa; 2014, A la carta para dos, [Dinnéar beirte à la carte]);

—	Cáilíocht, táirgeadh agus margú mhuiceoil Teruel (2016, “Aragón hoy” [“Aragón inniu”]).

A bhuí leis an gcáil uasal atá ar “Cerdo de Teruel”, is mór an aird atá tugtha uirthi i roinnt mhaith imeachtaí i gcaitheamh na mblianta.

Is minic a bhí ról mór ag “Cerdo de Teruel” i gcomórtas cócaireachta Teruel Gusto Mudéjar [blasanna Mudéjar], a bhíonn ar siúl ó bhí 2006 ann agus a mbíonn comórtas náisiúnta ina ndírítear ar chócaireacht “faoi bhlas Mudéjar” mar phríomhghníomhaíocht ann. Ba é “Cerdo de Teruel” - prátaí Cella stuáilte le strufal dubh Périgord (Tuber melanosporum) an t-oideas ar tugadh dúshlán do chócairí gairmiúla agus do na réaltaí atá ag teacht chun cinn sa ghastranómachas athléiriú a dhéanamh ina leith ag an séú eagrán den imeacht cócaireachta sin.

In 2012 reáchtáladh an chéad eagrán de Jornada Gastronómica de Cerdo de Teruel, féile a bhain le “Cerdo de Teruel” ina raibh níos mó ná 40 bunaíocht i gcúige Teruel páirteach. Ba é mana an imeachta Amharc nua ar an muiceoil. Bealaí eile le taitneamh a bhaint as an turas agus níos mó….

In 2020, bhí “Cerdo de Teruel” páirteach san aonach idirnáisiúnta “Madrid Fusión” mar scéim cáilíochta: Muiceoil “Cerdo de Teruel” ag aonach bia agus deochanna Madrid Fusión (nuachtán La Comarca).

Mar gheall air seo ar fad – agus go háirithe an fonn chun táirge a bhfuil baint láidir áitiúil aige a chosaint – bhunaigh na táirgeoirí Cumann Táirgeoirí “Cerdo de Teruel” d'fhonn cáil an táirge a chosaint, a áirithiú go gcuirtear tomhaltóirí ar an eolas go cuí agus táirgeadh mhuiceoil “Cerdo de Teruel” a bhainistiú.

An tábhacht a bhaineann le táirgeadh “Cerdo de Teruel” don cheantar áitiúil, tiomantas na n-údarás chun traidisiúin agus cleachtais feirmeoireachta a chosaint, an obair a dhéanann taighdeoirí ar an táirge seo, tiomantas na dtáirgeoirí chun táirgí ardchaighdeáin a fháil agus an cháil tráchtála atá ar an táirge, a bhuí leis an méid sin ar fad, is féidir “Cerdo de Teruel” a mhargú mar fheoil bhreisluacha, ag cosaint leasanna táirgeoirí trí aitheantas a aimsiú dá dtáirgí.

Leis an aitheantas sin chun an t-ainm a chosaint –“Cerdo de Teruel” – beifear in ann an cháil atá air ar an margadh a chosaint, rud a chaomhnóidh na critéir tháirgeachta a thugann a saintréithe sonracha don mhuiceoil, ag cur ar a gcumas do thomhaltóirí an táirge a shainaithint go soiléir agus rialú a ráthú.

Tagairt d’fhoilsiú na sonraíochta

https://www.aragon.es/-/indicacion-geografica-protegida-cerdo-teruel

(faoin gceannteideal Propuesta del Documento Único y del Pliego de condiciones [Dréacht-doiciméad aonair agus sonraíocht táirge] agus ansin Fecha: Junio de 2022 [dáta: Nollaig 2022]).

(1) IO L 343, 14.12.2012, lch. 1.

		ISSN 1977-107X
Iris Oifigiúil an Aontais Eorpaigh		C 138

An t-eagrán Gaeilge	Faisnéis agus Fógraí	66 21 Aibreán 2023

Clár		Leathanach
	I Rúin, moltaí agus tuairimí
	MOLTAÍ
	An Banc Ceannais Eorpach
2023/C 138/01	Moladh ón mBanc Ceannais Eorpach An 13 Aibreán 2023 chuig Comhairle an Aontais Eorpaigh maidir le hiniúchóirí seachtracha Nationale Bank van België/Banque Nationale de Belgique (BCE/2023/10)	1

	IV Fógraí
	FÓGRAÍ Ó INSTITIÚIDÍ, Ó CHOMHLACHTAÍ, Ó OIFIGÍ, AGUS Ó GHNÍOMHAIREACHTAÍ AN AONTAIS EORPAIGH
	An Coimisiún Eorpach
2023/C 138/02	Rátaí malairte an euro — 20 Aibreán 2023	2
	FÓGRAÍ Ó BHALLSTÁIT
2023/C 138/03	Teachtaireacht ón gCoimisiún de bhun Airteagal 17(5) de Rialachán (CE) Uimh. 1008/2008 ó Pharlaimint na hEorpa agus ón gComhairle maidir le rialacha comhchoiteanna le haghaidh oibriú aersheirbhísí sa Chomhphobal — Glao ar thairiscintí i leith oibriú aersheirbhísí sceidealaithe i gcomhréir le hoibleagáidí seirbhíse poiblí ( 1 )	3

	V Fógairtí
	NÓSANNA IMEACHTA A BHAINEANN LEIS AN gCOMHBHEARTAS TRÁCHTÁLA A CHUR CHUN FEIDHME
	An Coimisiún Eorpach
2023/C 138/04	Fógra maidir le dul in éag atá le tarlú i dtaca le bearta frithdhumpála áirithe	4
	NÓSANNA IMEACHTA A BHAINEANN LEIS AN mBEARTAS IOMAÍOCHTA A CHUR CHUN FEIDHME
	An Coimisiún Eorpach
2023/C 138/05	Réamhfhógra faoi chomhchruinniú (Cás M.11087 – PAI PARTNERS / GEGENBAUER GROUP) — Cás a d'fhéadfaí a chur faoin nós imeachta simplithe ( 1 )	5
2023/C 138/06	Réamhfhógra faoi chomhchruinniú (Cás M.11097 – ROCKY / CENTERBRIDGE / INDUS REIT) — Cás a d'fhéadfaí a chur faoin nós imeachta simplithe ( 1 )	7
	GNÍOMHARTHA EILE
	An Coimisiún Eorpach
2023/C 138/07	Foilsiú teachtaireachta maidir le leasú caighdeánach a fhormheas, ar leasú é ar shonraíocht táirge atá ann le haghaidh ainm in earnáil an fhíona, dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún	9
2023/C 138/08	Foilsiú iarratais ar ainm a chlárú de bhun Airteagal 50(2)(a) de Rialachán (AE) Uimh. 1151/2012 ó Pharlaimint na hEorpa agus ón gComhairle maidir le scéimeanna cáilíochta do tháirgí talmhaíochta agus do bhia-earraí	17


	(1) Téacs atá ábhartha maidir le LEE.