Gan cur i gcoinne comhchruinniú ar tugadh fógra faoi

(Cás M.10678 – AIP / MACQUARIE / ABERDEEN / ONIVIA)

(Téacs atá ábhartha maidir le LEE)

(2022/C 167/01)

An 7 Aibreán 2022, chinn an Coimisiún gan cur i gcoinne an chomhchruinnithe thuas ar tugadh fógra faoi agus a dhearbhú go bhfuil sé comhoiriúnach leis an margadh inmheánach. Tá an cinneadh sin bunaithe ar Airteagal 6(1)(b) de Rialachán (CE) Uimh. 139/2004 ón gComhairle (1). Is i mBéarla amháin atá an cinneadh ar fáil agus déanfar é a phoibliú ach a mbeidh aon rún gnó a d’fhéadfadh a bheith ann a bainte as. Beidh sé ar fáil:

—

i roinn na gcumasc ar an suíomh gréasáin faoin “mBeartas iomaíochta” atá ag an gCoimisiún (http://ec.europa.eu/competition/mergers/cases/). Cuireann an suíomh gréasáin sin saoráidí éagsúla ar fáil chun cuidiú cinntí aonair cumaisc a aimsiú trí úsáid ainm na cuideachta, cásuimhreacha, dátaí agus earnálacha gníomhaíochta,

—	i bhfoirm leictreonach ar shuíomh gréasáin EUR-Lex (http://eur-lex.europa.eu/homepage.html?locale=en) faoin uimhir dhoiciméid 32022M10678. Is é EUR-Lex an tairseach ar líne chuig dlí an Aontais Eorpaigh.

---

(1)  IO L 24, 29.1.2004, lch. 1.

Conclúidí ón gComhairle maidir le soghluaisteacht múinteoirí agus oiliúnóirí a fheabhsú, go háirithe soghluaisteacht Eorpach, le linn a n-oideachais agus a n-oiliúna tosaigh agus inseirbhíse

(2022/C 167/02)

TÁ COMHAIRLE AN AONTAIS EORPAIGH,

I gCOMHTHÉACS AN MHÉID SEO A LEANAS:

An cúlra polaitiúil Á MHEABHRÚ DI, mar a leagtar amach san Iarscríbhinn é,

I bhFIANAISE AN MHÉID SEO A LEANAS:

AITHNÍONN SÍ AN MÉID SEO A LEANAS:

AONTAÍONN SÍ LEIS AN MÉID SEO A LEANAS:

IARRANN SÍ AR NA BALLSTÁIT AN MÉID SEO A LEANAS A DHÉANAMH I gCOMHRÉIR LEIS NA hIMTHOSCA NÁISIÚNTA AGUS LE PRIONSABAL NA COIMHDEACHTA:

18.

Deiseanna a chothú le haghaidh soghluaisteacht Eorpach múinteoirí agus oiliúnóirí, trí, mar shampla, deireadh a chur leis na baic atá ann cheana i gcás inarb iomchuí, tacaíocht eagraíochtúil agus airgeadais a chur ar fáil nuair is féidir, réitigh a chomhroinnt maidir le múinteoirí agus oiliúnóirí ionaid a eagrú, agus cláir shoghluaisteachta a chur chun cinn.

19.

Deiseanna a chothú le haghaidh soghluaisteacht ceannairí scoile agus an tsoghluaisteacht sin a spreagadh ina measc, ar mhaithe leis na tairbhí dá ngairm féin agus dá n-institiúidí oideachais agus oiliúna, ach mar mhodh freisin chun tacú le soghluaisteacht múinteoirí agus oiliúnóirí agus í a chur chun cinn.

20.

An tsoghluaisteacht a chomhtháthú i gcórais oideachais agus oiliúna do mhúinteoirí agus d’oiliúnóirí, i gcás inarb iomchuí, le haghaidh oideachas agus oiliúint tosaigh agus inseirbhíse araon. Rannpháirtíocht i ngníomhaíochtaí Erasmus+ a chur chun cinn, e.g. Acadaimh Múinteoirí Erasmus+ agus Ollscoileanna Eorpacha. D’fhéadfadh an taithí dhéthaobhach ar an gcomhar a bheith mar thúsphointe agus mar spreagadh chun tuilleadh forbartha a dhéanamh.

21.

Aitheantas foirmiúil a éascú, i gcás inarb iomchuí, do thorthaí tréimhsí soghluaisteachta, go háirithe do thréimhsí múinteoireachta agus oiliúna thar lear, in oideachas tosaigh múinteoirí agus oiliúnóirí, le haghaidh forbairt ghairmiúil nó dul chun cinn gairme.

22.

Féachaint ar bhealaí chun foghlaim teangacha iasachta ar ardchaighdeán a chothú i gcórais oideachais agus oiliúna tosaigh agus inseirbhíse do mhúinteoirí agus d’oiliúnóirí, i gcás inarb iomchuí, chun a rannpháirtíocht i gcláir shoghluaisteachta a mhéadú, chun na hinniúlachtaí a theastaíonn chun obair a dhéanamh le hacmhainní eachtracha agus le hábhair eachtracha a fhorbairt.

23.

Chun ligean do mhúinteoirí agus d’oiliúnóirí ar mian leo a bheith soghluaiste, idirthréimhsí soghluaisteachta a shainaithint agus a chur chun cinn, i gcás inarb iomchuí agus aird chuí á tabhairt ar neamhspleáchas na n-institiúidí, le haghaidh múinteoirí agus oiliúnóirí atá i mbun a ngairme agus múinteoirí agus oiliúnóirí ionchasacha araon, is é sin, tréimhsí den scoilbhliain agus/nó de curaclaim oideachais tosaigh múinteoirí agus oiliúnóirí a mholtar a ceapadh chun rannpháirtíocht sa tsoghluaisteacht a chumasú. D’fhéadfaí a áireamh leis sin tréimhsí a shainaithint a bheadh oiriúnach d’institiúidí oideachais agus oiliúna chun gníomhaíochtaí oiliúna ionscoile a óstáil le haghaidh múinteoirí atá i mbun a ngairme agus múinteoirí ionchasacha araon chomh maith le gníomhaíochtaí conaire oideachais d’oiliúnóirí.

24.

Úsáid modúl oiliúna is ábhartha agus atá dírithe ar an Eoraip a chur chun cinn, i gcás inarb iomchuí, san oideachas agus san oiliúint tosaigh agus inseirbhíse do mhúinteoirí agus oiliúnóirí, lena bhféadfaí cláir amhail gníomhaíochtaí Jean Monnet a áireamh freisin maidir le bunoideachas agus oideachas meánscoile.

25.

Fothú acmhainneachta a chothú, i gcás inarb iomchuí, trí chomhar áitiúil agus réigiúnach de chineálacha éagsúla a chur chun cinn, amhail cuibhreannais Erasmus+, faoi stiúir údaráis scoile/institiúidí réigiúnacha a áirithíonn go mbeidh tionchar níos leithne ag tionscadail soghluaisteachta agus go dtacóidh siad le rannpháirtíocht fhisiciúil nó ar líne múinteoirí agus oiliúnóirí ó institiúidí oideachais agus oiliúna níos lú nó níos iargúlta i ndáil le deiseanna forbartha gairmiúla thar lear.

26.

Tacaíocht a thabhairt, i gcás inarb iomchuí, d’institiúidí oideachais agus oiliúna agus feabhas á chur ar a n-acmhainneacht a bheith ina n-óstach ar agus tairbhe a bhaint as gníomhaíochtaí soghluaisteachta na múinteoirí agus na n-oiliúnóirí atá i mbun a ngairme agus na múinteoirí agus na n-oiliúnóirí ionchasacha araon.

27.

Úsáid uirlisí agus ardáin dhigiteacha a chur chun cinn, lena n-áirítear r-Nascadh agus EPALE, chun an tsoghluaisteacht fhisiciúil a chomhlánú agus a ullmhú, chun scileanna agus inniúlachtaí digiteacha a fheabhsú agus chun tuilleadh comhar trasnáisiúnta a chur chun cinn.

28.

Deiseanna do mhúinteoirí agus d’oiliúnóirí a spreagadh i ndáil le forbairt ghairmiúil fhianaisebhunaithe inseirbhíse, a d’fhéadfadh tairbhe a bhaint as gníomhaíochtaí soghluaisteachta, agus a d’fhéadfadh staidéir a chur chun cinn a bhaineann le hiarrachtaí Bhallstáit an Aontais maidir le soghluaisteacht múinteoirí, agus gnéithe eile sineirge a lorg le taighde.

IARRANN SÍ AR AN gCOIMISIÚN, I gCOMHRÉIR LEIS NA CONARTHAÍ AGUS LE LÁN-URRAIM Á TABHAIRT AR AN gCOIMHDEACHT, AN MÉID SEO A LEANAS A DHÉANAMH:

29.

Deiseanna a chur chun cinn maidir le soghluaisteacht múinteoirí agus oiliúnóirí tríd an gclár Erasmus+, lena n-áirítear tríd an tacaíocht is gá a chur ar fáil do ghníomhaíocht Acadaimh Múinteoirí Erasmus+, a mbeidh meastóireacht le déanamh orthu i bhfianaise tuilleadh forbairtí tar éis 2025.

30.

Na huirlisí atá ann cheana chun soghluaisteacht do mhúinteoirí agus d’oiliúnóirí a spreagadh a mhapáil, agus na huirlisí sin a chur chun cinn trí úsáid a bhaint, mar shampla, as ardáin amhail an tArdán Eorpach um Oideachas Scoile a bheidh ann amach anseo, (lena n-áireofar r-Nascadh agus an Tairseach Oideachais Scoile atá ann faoi láthair), agus EPALE.

31.

Féachaint an bhféadfaí creat beartais a fhorbairt ar an leibhéal Eorpach, i gcomhar leis na Ballstáit, chun líon agus cáilíocht na ndeiseanna soghluaisteachta foghlama a mhéadú do mhúinteoirí agus d’oiliúnóirí ionchasacha agus iad siúd atá i mbun a ngairme san Eoraip araon, bunaithe ar a bhfíor-riachtanas soghluaisteachta. D’fhéadfadh creat den chineál sin, mar shampla, tacú le haghaidh a thabhairt ar na baic ar an tsoghluaisteacht, tacaíocht a thabhairt do na Ballstáit chun an tsoghluaisteacht agus gné Eorpach den mhúinteoireacht a chur chun cinn san oideachas agus san oiliúint tosaigh múinteoirí inseirbhíse, deiseanna soghluaisteachta foghlama a fhorbairt a thuilleadh, agus faisnéis a chur ar fáil maidir le cistiú agus deiseanna soghluaisteachta.

32.

Aghaidh a thabhairt ar shoghluaisteacht san obair lena bhfiosrófar an fhorbairt a d’fhéadfaí a dhéanamh, ar bhonn deonach, ar threoir Eorpach chun creataí náisiúnta gairme agus treoir ar feadh an tsaoil a fhorbairt, agus ar an gcaoi sin, tacú le dul chun cinn gairme múinteoirí agus oiliúnóirí.

33.

Leanúint d’aitheantas frithpháirteach uathoibríoch do cháilíochtaí a chur chun cinn, agus go háirithe do thréimhsí soghluaisteachta thar lear agus oideachas agus oiliúint á gcur ar mhúinteoirí agus oiliúnóirí (6).

34.

A bheith ag comhoibriú leis na Ballstáit maidir le hanailís a dhéanamh ar indéantacht agus breisluach na n-idirthréimhsí soghluaisteachta i gcláir staidéir do mhúinteoirí agus d’oiliúnóirí ionchasacha.

35.

Dul ar ais chuig an gCoiste Oideachais le haghaidh cinntí breise i dtaca le torthaí obair an Bhuanghrúpa maidir le Táscairí agus Tagarmharcanna maidir le faireachán a dhéanamh ar shoghluaisteacht múinteoirí agus oiliúnóirí, d’fhonn an poitéinseal le haghaidh na soghluaisteachta a chur chun cinn agus a leathnú.

---

(1)  I gcomhréir leis an sainmhíniú a leagtar amach sna conclúidí ón gComhairle maidir le múinteoirí agus oiliúnóirí Eorpacha don todhchaí (IO C 193, 9.6.2020, lch. 11), chun críocha na gconclúidí seo, is ionann múinteoir agus duine a aithnítear stádas múinteora (nó a chomhionann) a bheith aige nó aici de réir na reachtaíochta agus an chleachtais náisiúnta, agus is éard is oiliúnóir ann aon duine a chomhlíonann gníomhaíocht amháin nó níos mó atá nasctha leis an bhfeidhm oiliúna (teoiriciúil nó praiticiúil), in institiúid oideachais nó oiliúna nó san ionad oibre. Cuimsíonn sé sin múinteoirí san oideachas ginearálta agus san ardoideachas, múinteoirí agus oiliúnóirí sa ghairmoideachas agus gairmoiliúint, idir thosaigh agus leanúnach, mar aon le gairmithe oideachais agus cúraim luath-óige agus oideachasóirí aosach.

Tá éagsúlacht mhór idir cúlra oideachais agus struchtúir ghairme na múinteoirí agus na n-oiliúnóirí ó thaobh réimsí éagsúla oideachais agus oiliúna de. Dá réir sin, tá ábharthacht roinnt gnéithe de na conclúidí seo ag brath ar struchtúr na gcóras náisiúnta agus na n-earnálacha aonair oideachais agus oiliúna.

(2)  Chun críocha na gconclúidí seo, comhfhreagraíonn “soghluaisteacht” do choincheap na “soghluaisteacht foghlama” mar a shainmhínítear í i Rialachán (AE) 2021/817 ó Pharlaimint na hEorpa agus ón gComhairle an 20 Bealtaine 2021 lena mbunaítear Erasmus+: clár an Aontais um oideachas, um oiliúint, um an óige agus um spórt agus lena n-aisghairtear Rialachán (AE) Uimh. 1288/2013, eadhon bogadh go fisiciúil go tír nach í an tír chónaithe í, chun staidéar, oiliúint nó foghlaim sheachfhoirmiúil nó neamhfhoirmiúil a dhéanamh. Féadfar í a chomhcheangal le “foghlaim fhíorúil”, rud a chiallaíonn eolas, scileanna agus inniúlachtaí a shealbhú trí úsáid a bhaint as uirlisí teicneolaíochta faisnéise agus cumarsáide a ligeann do rannpháirtithe taithí foghlama fóinteach trasnáisiúnta nó idirnáisiúnta a bheith acu.

(3)  Eurydice, “Múinteoirí san Eoraip: Gairmeacha, Forbairt agus Dea-bhail”, 2021, lch. 21.

(4)  Léiríonn an iarscríbhinn staidrimh a ghabhann le tuarascáil bhliantúil Erasmus+ 2019 gur réamh-mheasadh go mbeadh thart ar 40 600 duine páirteach i dtionscadail KA 101 (soghluaisteacht foirne in oideachas scoile) a ndearnadh conradh ina leith in 2019, i gcúrsaí agus in imeachtaí oiliúna (isteach agus amach ar 75 % de na gníomhaíochtaí soghluaisteachta), go mbeadh 13 209 rannpháirtí i bpostscáthú (thart ar 24 % de na gníomhaíochtaí soghluaisteachta) agus go mbeadh 389 rannpháirtí i bpoist mhúinteoireachta (níos lú ná 1 % de na gníomhaíochtaí soghluaisteachta).

(5)  Mar a cuireadh i dtreis sa Rún ón gComhairle maidir le creat straitéiseach le haghaidh comhar Eorpach san oideachas agus san oiliúint i dtreo an Limistéir Eorpaigh Oideachais agus níos faide anonn (2021-2030), foilseoidh an Coimisiún tuarascáil iomlán maidir le LEE in 2025. “Ar bhonn na meastóireachta sin, déanfaidh an Chomhairle athbhreithniú ar an gcreat straitéiseach – lena n-áirítear spriocanna ar leibhéal an Aontais, struchtúr rialachais agus modhanna oibre” (aistriúchán neamhoifigiúil) (IO C 66, 26.2.2021, lch. 10).

(6)  I gcomhréir le Moladh ón gComhairle an 26 Samhain 2018 maidir le haitheantas frithpháirteach uathoibríoch a chur chun cinn do cháilíochtaí ardoideachais agus meánoideachais shinsearaigh agus do thorthaí tréimhsí foghlama thar lear (IO C 444, 10.12.2018, lch. 1).

Conclúidí ón gComhairle maidir le straitéis Eorpach lena gcumhachtaítear institiúidí ardoideachais ar mhaithe le todhchaí na hEorpa

(2022/C 167/03)

DÉANANN COMHAIRLE AN AONTAIS EORPAIGH AN MÉID SEO A LEANAS,

Agus an cúlra polaitiúil a bhaineann leis an tsaincheist seo, mar a leagtar amach é san Iarscríbhinn a ghabhann leis na conclúidí seo, á mheabhrú di,

AGUS AN MÉID SEO A LEANAS Á MHEABHRÚ DI:

MEASANN SÍ AN MÉID A LEANAS:

IARRANN SÍ AR AN gCOIMISIÚN AGUS AR NA BALLSTÁIT, I gCOMHRÉIR LENA nINNIÚLACHTAÍ FAOI SEACH AGUS AIRD CHUÍ Á TABHAIRT AR PHRIONSABAL NA COIMHDEACHTA, DUL I dTEAGMHÁIL LE hINSTITIÚIDÍ ARDOIDEACHAIS AGUS LE GEALLSEALBHÓIRÍ D’FHONN NA PRÍOMHCHUSPÓIRÍ SEO A LEANAS A BHAINT AMACH:

An ghné Eorpach a neartú san ardoideachas, sa taighde agus sa nuálaíocht agus na sineirgí eatarthu a neartú freisin

15.

Cuidíonn comhar trasnáisiúnta níos doimhne leis an Limistéar Eorpach Oideachais agus an Limistéar Eorpach Taighde nua a bhaint amach ar bhonn sineirge iomlán, trí institiúidí ardoideachais a neartú agus trí cháilíocht an ardoideachais, an taighde agus na nuálaíochta san Eoraip a ardú ina hiomláine. Trí bhíthin gnéithe, formáidí agus deiseanna nua don tsoghluaisteacht idir disciplíní agus earnálacha agus thar theorainneacha, trí bhíthin gairmeacha tarraingteacha inbhuanaithe acadúla agus taighde agus trí bhíthin oideachas oscailte agus eolaíocht oscailte, is fearr a fhéadfar dul i ngleic le dúshláin shochaíocha agus an t-eolas, na scileanna agus na hinniúlachtaí cearta a thabhairt do mhic léinn, do lucht foghlama ar feadh an tsaoil agus do thaighdeoirí, ar mhaithe lena bhforbairt ghairmiúil agus phearsanta amach anseo. Ba cheart aird ar leith a thabhairt ar mhic léinn agus ar thaighdeoirí óga a bhfuil tionchar mór á imirt ag an bpaindéim ar a gcuid staidéir agus ar a ngairmeacha, agus orthu siúd ó cheantair thuaithe agus iargúlta, amhail na réigiúin is forimeallaí.

16.

Léiríonn comhghuaillíochtaí institiúidí ardoideachais, amhail “Ollscoileanna Eorpacha”, na buntáistí a leanfadh comhar fairsing fadtéarmach i measc institiúidí ardoideachais. Tá sé d’acmhainn ag na comhghuaillíochtaí sin fíor-bhreisluach Eorpach a chruthú trí mhais chriticiúil a bhaint amach ar scála Eorpach a bhuí le tiomantas fadtéarmach na bpáirtithe uile lena mbaineann. Éascaíonn siad saorghluaiseacht fud fad na hEorpa chun críocha staidéir, oibre agus taighde bunaithe ar leasanna coiteanna. Trí leibhéal láidir lánpháirtíochta, trédhearcachta agus oscailteachta, bíonn tionchar claochlaitheach acu laistigh den Eoraip agus ar mhaithe leis an Eoraip. Trí chomhordú agus trí chomhlántacht le tionscnaimh agus líonraí Eorpacha, náisiúnta, réigiúnacha, áitiúla agus, i gcás inarb ábhartha, le tionscnaimh agus líonraí idirnáisiúnta, feabhsófar a dtionchar claochlaitheachta.

17.

Má táthar le lántairbhe a bhaint as breisluach comhghuaillíochtaí institiúidí ardoideachais amhail “Ollscoileanna Eorpacha”, beidh tuilleadh tacaíochta de dhíth ar an leibhéal Eorpach agus, i gcás inarb iomchuí, ar an leibhéal náisiúnta trí bhíthin cur chuige céim ar chéim. Mar chatalaígh don chlaochlú institiúideach, ba cheart tacú leis na comhghuaillíochtaí sin, i gcás inarb iomchuí, chun gné láidir taighde agus nuálaíochta a fhorbairt agus chun cláir chomhpháirteacha oideachasúla nuálacha a chur chun feidhme ar gach leibhéal, faoi chuimsiú chur chuige atá dírithe ar mhic léinn, ar an taighde agus ar an nuálaíocht, lena bhféadfaí céimeanna comhpháirteacha a bhronnadh bunaithe ar chritéir Eorpacha a chruthófaí i gcomhar leis na Ballstáit agus le geallsealbhóirí ábhartha, i gcomhréir le hionstraimí Phróiseas Bologna. Ba cheart tacú leis na comhghuaillíochtaí sin, i gcás inarb iomchuí, chun bainistiú acmhainní daonna a fheabhsú, i dtaobh lucht léinn agus taighdeoirí a earcú i gcomhpháirt, dá mb’fhéidir é; chun forbairt gairmeacha tarraingteacha agus inbhuanaithe a chur chun cinn; agus chun acmhainní agus struchtúir, amhail saotharlanna agus ardáin mar shampla, a fhrithpháirtiú.

18.

Cé go n-aithnítear go hiomlán an luach a bhaineann le foghlaim aghaidh ar aghaidh agus le soghluaisteacht fhisiciúil, mar aon leis an ngá atá le cúrsaíocht chothrom daoine oilte, ba cheart institiúidí ardoideachais a spreagadh le tuilleadh tacaíochta a thabhairt do gach cineál soghluaisteachta i gcás na mac léinn, ball foirne agus taighdeoirí, rud a chuireann leis an rath acadúil agus le gnóthachtáil phearsanta, trína chur ar chumas na mac léinn uile, na mball foirne uile agus na dtaighdeoirí uile inniúlachtaí idirnáisiúnta agus idirchultúrtha a ghnóthachtáil trí bhíthin idirnáisiúnú na gcuraclam nó trí bheith rannpháirteach i dtimpeallachtaí nuálacha idirnáisiúnta in institiúidí ina dtír dúchais.

19.

Tá ról cumasúcháin ag Bliain Eorpach na hÓige ina leith sin. Is fiú an méid seo a leanas a mheabhrú: an sprioc maidir le gur cheart tréimhse staidéir nó tréimhse oiliúna thar lear a bheith déanta ag 20 % ar a laghad de na céimithe i Limistéar Eorpach an Ardoideachais, mar a athdhearbhaíodh i Communiqué Aireachta na Róimhe an 19 Samhain 2020, agus an tacaíocht atá le tabhairt do thionscnamh na nOllscoileanna Eorpacha chun an sprioc uaillmhianach go mbeadh 50 % de na mic léinn soghluaiste a bhaint amach, mar a leagtar amach sna conclúidí ón gComhairle maidir le tionscnamh na nOllscoileanna Eorpacha – An t-ardoideachas, an taighde, an nuálaíocht agus an tsochaí a nascadh: An bealach a réiteach do ghné nua san ardoideachas Eorpach.

20.

Chun na spriocanna sin a bhaint amach, ba cheart do na Ballstáit agus don Choimisiún, i gcomhar le hinstitiúidí ardoideachais, a ndícheall a dhéanamh nósanna imeachta riaracháin a shimpliú d’institiúidí, lena n-áirítear trí chur chun feidhme thionscnamh an Chárta Eorpaigh Mic Léinn a leathnú a thuilleadh agus trí aitheantas frithpháirteach uathoibríoch cáilíochtaí acadúla agus tréimhsí staidéir thar lear a chur chun feidhme a thuilleadh, i gcomhar leis na Lárionaid Náisiúnta Faisnéise um Aitheantas Acadúil (NARIC). Ba cheart institiúidí ardoideachais a spreagadh le leas iomlán a bhaint as uirlisí digiteacha le haghaidh soghluaisteachta agus aitheantais, leis an ilteangachas, leis an idirchultúrthacht agus leis an gcuimsiú a chur chun cinn i measc na mac léinn sin ar a gcampais ar lú na deiseanna atá acu, agus leis an tsoghluaisteacht a leabú ina gcuraclam.

Ról agus ceannaireacht an Aontais ar an leibhéal domhanda a chur chun cinn

21.

Tá tábhacht straitéiseach gheopholaitiúil ag roinnt le hidirnáisiúnú an ardoideachais agus an taighde i gcás na hEorpa, mar a leagtar amach sa teachtaireacht chomhpháirteach maidir le The Global Gateway [An Tairseach Dhomhanda]. Ní mór bunluachanna agus bunphrionsabail a bheith mar bhunús leis an gcomhoibriú domhanda san ardoideachas, agus ní mór an tsaoirse acadúil, an neamhspleáchas institiúideach, an t-oideachas oscailte agus an eolaíocht oscailte a bheith lárnach iontu. Ba cheart prionsabail na cómhalartachta agus na cothroime iomaíochta a bheith ina réamhriachtanas don chomhar idirnáisiúnta. Ba cheart cloí leis an treoirphrionsabal “a oscailte is féidir, a iata is gá” i gcaidrimh taighde agus nuálaíochta agus sa chaibidlíocht le comhpháirtithe domhanda. Ba cheart tacú le hinstitiúidí ardoideachais trí bhíthin cur chuige Eorpach comhordaithe chun na luachanna agus na prionsabail Eorpacha sin a chur chun cinn ar an leibhéal domhanda d’fhonn comhar cothrom, a rachaidh chun tairbhe dóibh uile, a bhaint amach, ar cuid de chumhacht bhog agus d’acmhainneacht na hEorpa é ina cáil mar bhunaitheoir caighdeán domhanda. Ní mór don chomhar le tríú tíortha i réimse an ardoideachais agus an taighde a bheith fothaithe ar chomhthuiscint agus ar chomhroinnt na luachanna agus na bprionsabal sin a chuirtear chun cinn ar an leibhéal Eorpach i gcomhréir le leasanna straitéiseacha eile an Aontais i gcomhréir le Comhdháil Marseille maidir leis an gCur Chuige Domhanda.

22.

Is féidir leis an gcomhar Eorpach níos doimhne a bheith tairbheach chun tacú le hinstitiúidí ardoideachais agus chun na huirlisí is gá a thabhairt do thaighdeoirí, d’oiliúnóirí, do mhic léinn agus do bhaill foirne chun déileáil leis na dúshláin a bhaineann le comhoibriú cothrom domhanda, amhail éagothromas, cur isteach eachtrach, agus bacainní ar an eolaíocht oscailte. Tá sé de dhíth freisin chun tuiscint fheasach neamhspleách ar chontrapháirtithe tríú tíortha a chur chun cinn. Chun go mbeidh an tAontas Eorpach ina thearmann sábháilte do shaoirse an taighde eolaíoch agus na luachanna daonlathacha, ba cheart tacú le hinstitiúidí ardoideachais trí scéimeanna Eorpacha agus náisiúnta, agus prionsabal an bharr feabhais á urramú go hiomlán, chun fáilte a chur roimh mhic léinn, taighdeoirí agus acadóirí a bhfuil a saoirse faoi bhagairt.

23.

Chun feabhas a chur ar a n-iomaíochas ar an leibhéal domhanda, ba cheart institiúidí ardoideachais a spreagadh chun éiceachórais áitiúla nó réigiúnacha a shlógadh, agus comhtháthú críochach á chothú ar an gcaoi sin, trí chomhpháirtíochtaí láidre le heagraíochtaí taighde, gníomhaithe nuálaíochta, lucht cistiúcháin agus comhpháirtithe eacnamaíocha agus sóisialta, agus dlúth-idirghníomhaíochtaí le húdaráis áitiúla, réigiúnacha agus náisiúnta á bhfeabhsú ag an am céanna. Chun éagsúlacht agus barr feabhais na n-institiúidí ardoideachais Eorpacha a chur chun cinn ar an leibhéal domhanda, ba cheart tuilleadh oibre a dhéanamh agus tuilleadh tacaíochta a chur ar fáil ar an leibhéal Eorpach do na Ballstáit chun beartais náisiúnta a chur chun cinn, mar shampla trí thionscnaimh barr feabhais agus trí mhoil réigiúnacha agus áitiúla.

24.

Leis an gcomhar trasnáisiúnta idir institiúidí ardoideachais Eorpacha, cuirtear lena mhealltaí atá na hinstitiúidí sin do mhic léinn idirnáisiúnta, do thaighdeoirí agus do chomhpháirtithe domhanda, agus méadaítear an cháilíocht tairiscintí oideachais agus an acmhainneacht taighde agus nuálaíochta. Ba cheart cláir Eorpacha atá ann cheana, amhail Erasmus+, ionstraimí gníomhaíochta seachtraí an Aontais agus Fís Eorpach, a úsáid faoi chuimsiú na ngníomhaíochtaí a áirítear ina mbunúis dlí agus ba cheart meastóireacht a dhéanamh orthu de réir a gcritéar meastóireachta faoi seach chun tacú le comhghuaillíochtaí institiúidí ardoideachais amhail na “Ollscoileanna Eorpacha” agus na Pobail Eolais agus Nuálaíochta (PENanna) chun gníomhaíochtaí agus straitéisí comhpháirteacha idirnáisiúnúcháin a fhorbairt ar fud an ardoideachais, an taighde agus na nuálaíochta. Chuideodh sé sin leo iad féin a chur chun cinn go hidirnáisiúnta, líonraí a thógáil le comhpháirtithe tábhachtacha ar fud an domhain, inniúlachtaí comhpháirtithe i dtríú tíortha a neartú agus soghluaisteacht idirnáisiúnta (isteach agus amach) mac léinn, taighdeoirí, acadóirí agus foirne a threisiú. Ba cheart lántairbhe a bhaint as Coinbhinsiún Domhanda UNESCO 2019 maidir le hAitheantas do Cháilíochtaí a bhaineann leis an Ardoideachas toisc go n-éascaíonn sé soghluaisteacht idirnáisiúnta mac léinn agus ar an gcaoi sin réitíonn sé an chonair chun go bhféadfaí an t-ardoideachas Eorpach a idirnáisiúnú. Le hiarrachtaí coiteanna Eorpacha ionsar thríú tíortha, d’fhéadfaí freisin, trí chur chuige “Foireann na hEorpa”, tairiscint ardoideachais na hEorpa a chur chun cinn a thuilleadh agus páirt a ghlacadh i ngníomhaíochtaí fothaithe acmhainneachta a bheadh chun tairbhe an dá thaobh.

Téarnamh na hEorpa agus freagairt na hEorpa ar an aistriú digiteach agus ar an aistriú glas a neartú

25.

Ba cheart institiúidí ardoideachais a spreagadh a thuilleadh chun scileanna, inniúlachtaí agus nuálaíocht a dhéanamh d’eolas. Is féidir é sin a dhéanamh agus lánurraim á tabhairt don tsaoirse acadúil trí dhlúthchomhar a fhorbairt le comhpháirtithe eacnamaíocha, sóisialta agus tionsclaíocha laistigh d’éiceachórais thaighde agus nuálaíochta áitiúla agus réigiúnacha, agus trí shoghluaisteacht idirearnálach idir institiúidí ardoideachais agus comhpháirtithe eile a éascú, ag tógáil go háirithe ar straitéisí um speisialtóireacht chliste agus ar an Institiúid Eorpach um Nuálaíocht agus Teicneolaíocht (EIT) agus ar na PENanna. D’fhéadfadh an comhar sin a bheith an-tairbheach freisin do ghnólachtaí áitiúla agus d’fhiontair bheaga agus mheánmhéide (FBManna) agus deis a thabhairt do mhic léinn, do thaighdeoirí, d’acadóirí, d’oiliúnóirí agus don fhoireann oiliúint a fháil, e.g. i mbainistíocht maoine intleachtúla, in aistriú eolais agus i bhfiontraíocht, lena n-áirítear rochtain ar mhaoiniú, ag céim ar bith dá ngairmréim. Ní mór éagsúlacht iomlán na ngníomhaíochtaí acadúla laistigh den saol acadúil agus lasmuigh de, maidir le gach gné de mhisin na n-institiúidí ardoideachais, a chur san áireamh ina measúnuithe gairme. Ba cheart d’institiúidí ardoideachais freisin feabhas a chur ar a gcumas teagmháil a dhéanamh lena n-éiceachórais tríd an eolas, na scileanna agus na hinniúlachtaí is gá a chothú, go háirithe le haghaidh earnálacha straitéiseacha tionsclaíocha agus trí aistrithe eolais agus teicneolaíochta agus cruthú seach-chuideachtaí a chothú.

26.

D’fhéadfaí tacú le hinstitiúidí ardoideachais chun go bhfeabhsófaí an fhoghlaim atá dírithe ar mhic léinn agus an fhoghlaim atá bunaithe ar thaighde, lena bhfuil sé d’aidhm inniúlachtaí, scileanna agus eolas atá cothrom le dáta a thabhairt do mhic léinn chomh maith lena gcuid scileanna taighde agus taithí a fhorbairt. Ba cheart tacaíocht a thabhairt do mhic léinn freisin agus iad ag obair i ndisciplíní éagsúla i gcuir chuige atá bunaithe ar dhúshláin.

27.

Is féidir le hinstitiúidí ardoideachais ról lárnach a bheith acu san fhoghlaim ar feadh an tsaoil agus maidir le freagairt ar chlaochlú mhargadh an tsaothair trí oscailt suas do gach cineál foghlaimeoirí agus trína n-infhostaitheacht a chothú, lena n-áirítear trí athsciliú agus uas-sciliú. Chuige sin, ba cheart tacú le hinstitiúidí ardoideachais agus an digiteáil á húsáid acu chun modhanna nuálacha foghlama agus teagaisc a chothú, agus conairí foghlama solúbtha agus saincheaptha á ndearadh agus á gcur chun feidhme acu, lena n-áirítear, i gcás inarb iomchuí, cúrsaí níos giorra nó eispéiris foghlama a bhféadfadh micridhintiúir a bheith mar thoradh orthu agus, ag an am céanna, gan imeacht ó chroíphrionsabal na gclár céime iomláine. D’fhonn scileanna, inniúlachtaí, dearcthaí agus meon fiontraíochta ábhartha foghlaimeoirí a fhorbairt, ba cheart institiúidí ardoideachais a spreagadh le comhoibriú lena n-éiceachórais, chun eispéiris obairbhunaithe amhail intéirneachtaí, printíseachtaí agus deiseanna saorálaíochta a chur chun cinn agus, i gcás inarb iomchuí, raonta fiontraíochta a fhorbairt a thuilleadh lena gcuirfear ar chumas mac léinn tionscadail fiontraíochta a dhéanamh le linn a gcuid staidéir.

28.

Tá ról lárnach ag institiúidí ardoideachais maidir le tacú leis an aistriú glas agus i leith aghaidh a thabhairt ar na Spriocanna Forbartha Inbhuanaithe mar ghné cháilíochta ar leith ar an leibhéal domhanda. I ndáil leis sin, ba cheart tacú le hinstitiúidí ardoideachais ar fud na hEorpa cuir chuige inbhuanaitheachta agus ghlasa a thabhairt isteach agus leas á bhaint as cur chuige institiúide iomláine mar chuid dá misin, dá mbonneagair agus dá n-oibríochtaí, i gcás inarb ábhartha.

29.

Chun aghaidh a thabhairt ar an aistriú glas, ba cheart institiúidí ardoideachais a spreagadh eolas, scileanna agus inniúlachtaí idirdhisciplíneacha a fhorbairt, tacú le heolas faoi inbhuanaitheacht a fháil agus a úsáid i measc na bhfoghlaimeoirí agus na bpobal uile, agus oideachas inbhuanaitheachta a leabú mar chuid de churaclaim sna hearnálacha ábhartha go léir. Ba cheart iad a spreagadh chun taighde a choimisiúnú agus a dhéanamh lena gcuirfí leis an mbonn eolais maidir le hinbhuanaitheacht.

30.

Mar a léirítear le linn phaindéim COVID-19, is uirlis chumhachtach claochlaithe iad na teicneolaíochtaí digiteacha do chórais ardoideachais san Eoraip, agus tá na hinstitiúidí ardoideachais lárnach maidir le dlús a chur leis an aistriú digiteach san Eoraip.

31.

Is gá seirbhísí digiteacha agus bonneagair dhigiteacha ardfheidhmíochta le nascacht láidir a sholáthar d’institiúidí ardoideachais, ar bonneagair agus seirbhísí iad ar cheart dóibh a bheith, a mhéid is féidir, idir-inoibritheach agus comhroinnte ar fud na hEorpa, a bheith ag brath ar chaighdeáin Eorpacha (3), agus ar cheart dóibh teicneolaíochtaí iontaofa a úsáid, i gcomhréir le riachtanais shonracha institiúidí ardoideachais, amhail sonraí slán.

32.

Chun dlús a chur le haistriú digiteach na hEorpa, is gá litearthacht dhigiteach agus litearthacht sonraí a chur ar fáil do gach mac léinn, oiliúnóir, foireann, acadóirí agus taighdeoir agus, i gcás inarb ábhartha, don phobal i gcoitinne. Tá ról lárnach ag institiúidí ardoideachais chuige sin i ndáil le hinniúlachtaí digiteacha atá ag teacht chun cinn agus i ndáil leis an ngné eiticiúil a bhaineann leis na hinniúlachtaí sin – amhail maoirseacht sonraí, intleacht shaorga, ríomhaireacht ardfheidhmíochta agus cibearshlándáil – a thabhairt d’fhoghlaimeoirí agus ó thaobh taighde agus nuálaíocht a dhéanamh.

33.

Agus an luach a ghabhann leis an bhfoghlaim aghaidh ar aghaidh á aithint acu, ba cheart d’institiúidí ardoideachais leas iomlán a bhaint as modhanna digiteacha chun cáilíocht an eispéiris foghlama a fheabhsú do mhic léinn, don fhoireann, d’acadóirí agus do thaighdeoirí agus chun aghaidh a thabhairt ar neamhionannais shóisialta. Chun an bhearna dhigiteach a dhúnadh, ba cheart tacú le tionscnaimh lena dtugtar rochtain chomhionann ar dheiseanna foghlama indibhidiúlaithe do chách, agus úsáid á baint, mar shampla, as teagasc fíorúil nó hibrideach in áiteanna cianfhoghlama. Ba cheart tacú le hinstitiúidí ardoideachais agus iarrachtaí á ndéanamh acu ardáin agus uirlisí idir-inoibritheacha a chomhroinnt lenar féidir sonraí a mhalartú agus, ag an am céanna, acmhainní oideachais ardcháilíochta atá furasta le húsáid, amhail cúrsaí ar líne, a chur ar fáil.

An muintearas Eorpach a dhoimhniú ar bhonn luachanna coiteanna

34.

Chun an muintearas Eorpach a dhoimhniú agus chun ár slí mhaireachtála Eorpach a chur chun cinn, tá sé ríthábhachtach luachanna daonlathacha na hEorpa a chaomhnú agus a chosaint, éagsúlacht, cuimsitheacht agus comhionannas inscne a chothú agus cáilíocht agus ábharthacht an ardoideachais a neartú do scileanna a sheasfaidh an aimsir. Tá institiúidí ardoideachais uathrialaitheach agus is croíphrionsabal dá misean agus dá ngníomhaíochtaí í an tsaoirse acadúil agus eolaíoch.

35.

Ba cheart tacú le hinstitiúidí ardoideachais agus iad i mbun iarrachta an t-oideachas agus an eolaíocht a chosaint i gcoinne na bréagaisnéise, tacú leis an eolaíocht oscailte agus luachanna daonlathacha a chosaint. Chuige sin, is coimirce don daonlathas agus príomhfhóram don eolaíocht saoránach iad na hinstitiúidí ardoideachais, agus mic léinn a ullmhú le haghaidh na saoránachta gníomhaí agus na rannpháirtíochta poiblí.

36.

Is féidir le hinstitiúidí ardoideachais dlús a chur le díospóireacht phoiblí le heolas praiticiúil léirsteanach, trí rochtain níos leithne ar fhoilseacháin agus ar shonraí taighde agus trí imeachtaí poiblí a eagrú chun torthaí taighde a scaipeadh agus a phlé. Is féidir le hinstitiúidí ardoideachais a bheith ina bpríomhghníomhaithe maidir le dul i ngleic le leas saofa a bhaint as taighde, agus is féidir leo a bheith ina gcomhéadan idir oideachas, taighde, nuálaíocht, údaráis phoiblí agus an tsochaí shibhialta. D’fhéadfadh institiúidí ardoideachais an ról sin a neartú agus a úsáid a thuilleadh chun dul i dteagmháil ar bhealach níos córasaí leis na gníomhaithe sochaíocha uile, lena n-áirítear nuálaithe poiblí agus príobháideacha, údaráis phoiblí réigiúnacha agus áitiúla, lena n-áirítear scoileanna, na meáin, eagraíochtaí cur chun cinn na heolaíochta i measc an phobail, agus eagraíochtaí na sochaí sibhialta amhail comhlachais tomhaltóirí agus úsáideoirí nó cumainn othar.

37.

Ba cheart d’institiúidí ardoideachais a áirithiú go mbíonn mic léinn, acadóirí, taighdeoirí agus an fhoireann rannpháirteach sa rialachas orthu, mar chomhaltaí iomlána agus mar chomhpháirtithe cuiditheacha den phobal ardoideachais. Chuige sin, d’fhéadfadh mic léinn a bheith páirteach i sásraí cinnteoireachta, lena n-áirítear maidir le curaclaim, mar ghné de bhunluachanna acadúla, mar chomhartha daonlathais agus mar chultúr idirphlé in institiúidí ardoideachais.

38.

Ba cheart tacú le hinstitiúidí ardoideachais agus iad a spreagadh ina gcuid iarrachtaí cuimsiú agus rath a gcuid mac léinn, acadóirí, taighdeoirí agus foirne a áirithiú, agus comhdheiseanna a chur chun cinn, gan beann ar inscne, ar thionscnamh ciníoch nó eitneach, ar reiligiún nó creideamh, cúlra sóisialta agus eacnamaíoch, sláinte, míchumas, aois, gnéaschlaonadh, cúlra imirceach agus ar shuíomh geografach. Chuige sin, ba cheart tacaíocht a thabhairt d’institiúidí ardoideachais chun dea-bhail gach duine a áirithiú i gcomhréir le héagsúlacht shóisialta níos mó. I ndáil leis sin, ba cheart institiúidí ardoideachais a spreagadh chun dul i dteagmháil le grúpaí atá faoi ghannionadaíocht chun feabhas a chur ar an rochtain atá acu ar an ardoideachas agus chun cabhrú leo a gcuid staidéir a chur i gcrích, agus aird chuí á tabhairt ar mhic léinn agus ar thaighdeoirí óga a raibh tionchar mór ag an bpaindéim ar a gcuid staidéir agus ar a ngairmeacha, agus orthu siúd ó cheantair thuaithe agus ó cheantair iargúlta, amhail na réigiúin is forimeallaí.

39.

Ba cheart tacaíocht agus spreagadh a thabhairt d’institiúidí ardoideachais bearta ábhartha a dhéanamh chun cothromaíocht inscne a fheabhsú ina gcuid comhlachtaí mac léinn agus foirne, lena n-áirítear i gcomhthéacs dul chun cinn sa ghairm acadúil.

40.

Féadfaidh institiúidí ardoideachais úsáid a bhaint as uirlisí teagaisc agus oideolaíochtaí nuálacha, lena n-áirítear uirlisí digiteacha, chun cur chuige foghlama atá dírithe ar mhic léinn a chur ar fáil gan beann ar an gcúlra socheacnamaíoch nó foghlama. Chun an neamhionannas a laghdú agus an ghnóthachtáil phearsanta a chur chun cinn, ba cheart institiúidí ardoideachais a spreagadh chun seirbhísí saincheaptha treorach agus tacaíochta a sholáthar, go háirithe do dhaoine nuathagtha, agus stíl agus conair foghlama á gcur san áireamh chomh maith le cúlra socheacnamaíoch gach foghlaimeora.

NÍOS SONRAÍ FÓS, IARRANN SÍ AR NA BALLSTÁIT AGUS AR AN gCOIMISIÚN, I gCOMHRÉIR LENA nINNIÚLACHTAÍ FAOI SEACH AGUS AIRD CHUÍ Á TABHAIRT AR PHRIONSABAL NA COIMHDEACHTA, TACAÍOCHT A THABHAIRT DO CHOMHGHUAILLÍOCHTAÍ INSTITIÚIDÍ ARDOIDEACHAIS AMHAIL NA “hOLLSCOILEANNA EORPACHA”:

41.

Ba cheart tuilleadh tacaíochta a thabhairt do gach cineál comhghuaillíochta d’institiúidí ardoideachais trí na modhanna iomchuí ábhartha uile chun gníomhaíochtaí comhair a éascú bunaithe ar ardchaighdeán, barr feabhais, tionchar, cuimsitheacht agus cothromaíocht gheografach, agus chun constaicí agus réitigh a d’fhéadfadh a bheith i gcoiteann ag gach comhghuaillíocht a shainaithint. Go sonrach, ar bhonn an athbhreithnithe mheántéarma ar na chéad chomhghuaillíochtaí píolótacha, ba cheart tionscnamh na nOllscoileanna Eorpacha a chur i bhfeidhm a thuilleadh. Leis sin d’fhéadfaí gníomhaíochtaí a bhraisliú chun dea-chleachtais maidir le hardoideachas, taighde agus nuálaíocht agus seirbhís don tsochaí a chomhroinnt.

42.

Ar an gcéad dul síos, ba cheart comhghuaillíochtaí institiúidí ardoideachais a spreagadh chun leas iomlán a bhaint as na cláir chistiúcháin atá ann cheana agus as uirlisí cumasúcháin ar an leibhéal Eorpach, ar an leibhéal náisiúnta agus ar an leibhéal réigiúnach d’fhonn an comhar eatarthu a mhéadú agus a dhoimhniú.

43.

I gcás inarb ábhartha agus i ndlúthchomhar leis na húdaráis náisiúnta, na comhghuaillíochtaí institiúidí ardoideachais agus na geallsealbhóirí, ba cheart bearta a dhéanamh chun na bacainní ar chomhar trasnáisiúnta níos doimhne, fadtéarmach agus solúbtha a shárú agus chun ionstraimí comhair institiúidithe a dhearadh, bunaithe ar réamh-mheasúnú cuimsitheach ar an ngá atá leo, ar a dtairbhí agus ar a n-indéantacht. Is é an aidhm spás a thabhairt do chomhghuaillíochtaí, ar bhonn deonach, chun gníomhú le chéile, comhchinntí straitéiseacha a dhéanamh, earcaíocht chomhpháirteach a dhéanamh, curaclaim chomhpháirteach a dhearadh nó acmhainní agus inniúlachtaí daonna, teicniúla, sonraí, oideachais, taighde agus nuálaíochta a chomhthiomsú.

44.

Agus béim á leagan ar chur chun feidhme an Chur Chuige Eorpaigh um Dhearbhú Cáilíochta Clár Comhpháirteach, ba cheart céimeanna breise a ghlacadh chun an luach a bhaineann le heispéiris foghlama trasnáisiúnta nuálacha a aithint agus chun infheictheacht, tarraingteacht agus clú na gclár comhpháirteach sin arna soláthar ag comhghuaillíochtaí institiúidí ardoideachais a mhéadú san Eoraip agus níos faide i gcéin. Ba cheart critéir chomhchoiteanna a fhiosrú a d’fhéadfadh lipéad Eorpach a chruthú le haghaidh cláir chomhpháirteacha. Ina dhiaidh sin, d’fhéadfaí féachaint le céimeanna comhpháirteacha ar gach leibhéal a cheapadh agus a sheachadadh, ar bhonn deonach, ar an leibhéal náisiúnta, réigiúnach nó institiúideach, bunaithe ar na critéir Eorpacha chomhchruthaithe sin, i gcomhréir le hionstraimí Phróiseas Bologna atá ann cheana. Ba cheart an próiseas sin a dhéanamh i ndlúthchomhar leis na húdaráis náisiúnta, na comhghuaillíochtaí institiúidí ardoideachais agus leis na geallsealbhóirí.

45.

Ag gach céim, chuirfí torthaí na bpróiseas fiosrúcháin a luaitear i míreanna 43 agus 44 faoi bhráid na Comhairle le go ndéanfaí cinneadh eile ina leith.

46.

Ba cheart próisis dearbhaithe cáilíochta atá éifeachtúil agus éifeachtach a chumasú ar an leibhéal náisiúnta chun cur chuige Eorpach um Dhearbhú Cáilíochta a éascú do chláir chomhpháirteacha, de réir na gCaighdeán agus na dTreoirlínte maidir le Dearbhú Cáilíochta sa Limistéar Eorpach Ardoideachais (LEO), agus tábhacht na cáilíochta, an taighde agus na hinfhostaitheachta á gcur san áireamh.

47.

Chun go mbeidh comhghuaillíochtaí institiúidí ardoideachais in ann a n-acmhainneacht iomlán a bhaint amach trí aghaidh a thabhairt ar na costais airgeadais a bhaineann le comhar trasnáisiúnta chun a misin uile a chlúdach san fhadtéarma, ba cheart bearta a dhéanamh chun dul i dtreo peirspictíocht chistiúcháin Aontais a bheidh níos inbhuanaithe, níos iomlánaíche agus níos comhtháite. I ndáil leis sin, ba cheart don Choimisiún tástáil a dhéanamh ar bhealaí cuir chuige píolótacha i ndáil le réitigh fhéideartha i ndlúthchomhar leis na Ballstáit agus leis na geallsealbhóirí ábhartha faoi 2024, agus ba cheart beart tuairiscithe chuig an gComhairle a dhéanamh ina dhiaidh sin chun go ndéanfar cinneadh breise ina leith.

TRÍ BHÍTHIN NA gCÉAD CHÉIMEANNA EILE, AGUS AIRD CHUÍ Á TABHAIRT DO PHRIONSABAIL NA COIMHDEACHTA AGUS DO PHRIONSABAL AN NEAMHSPLEÁCHAIS INSTITIÚIDIGH, AGUS I gCOMHRÉIR LEIS NA hIMTHOSCA NÁISIÚNTA:

48.

IARRANN SÍ ar an gCoimisiún agus ar na Ballstáit luachanna bunúsacha acadúla a chur chun cinn agus a chosaint, lena n-áirítear an tsaoirse agus an tsláine acadúil i gcomhréir le Communiqué Aireachta na Róimhe 2020 agus le dearbhú Bonn maidir le saoirse an taighde eolaíoch.

49.

IARRANN SÍ ar an gCoimisiún agus ar na Ballstáit, i gcomhar leis na geallsealbhóirí ábhartha, gníomhaíochtaí a thabhairt ar aghaidh go comhpháirteach chun sineirgí a chruthú idir an t-ardoideachas, an taighde agus an nuálaíocht laistigh den chreat straitéiseach le haghaidh comhar Eorpach san oideachas agus san oiliúint agus struchtúir rialachais an Limistéir Eorpaigh Taighde. Ba cheart fíor-bhreisluach a léiriú leis na gníomhaíochtaí sin ar an leibhéal Eorpach agus obair a dhéanamh i dtreo na bpríomhchuspóirí thuasluaite, agus ba cheart don Choimisiún, agus do na Ballstáit, ar bhonn deonach, iad a chur i gcrích trí aon mhodh iomchuí i gcomhréir leis na comhthéacsanna náisiúnta.

50.

IARRANN SÍ ar an gCoimisiún treochlár a chur faoi bhráid na Comhairle faoi lár 2022 chun na hionstraimí nua a chomhdhearadh, chun faisnéis a fháil agus chun cinneadh breise a dhéanamh. Léireodh an treochlár na príomh-gharspriocanna agus na grúpaí saineolaithe lena mbaineann. Agus na príomhchuspóirí á gcur chun feidhme, cuirfear an méid seo a leanas san áireamh: gníomhaíochtaí arna sainaithint sa Teachtaireacht ón gCoimisiún maidir le straitéis Eorpach d’ollscoileanna; an rún ón gComhairle maidir le creat straitéiseach le haghaidh comhar Eorpach san oideachas agus oiliúint i dtreo an Limistéir Eorpaigh Oideachais agus thairis sin (2021-2030); agus na gníomhaíochtaí ábhartha a sainaithníodh i gclár oibre beartais an Limistéir Eorpaigh Taighde 2022-2024 atá i gceangal leis na conclúidí ón gComhairle maidir le rialachas an Limistéir Eorpaigh Taighde (LET) amach anseo chomh maith leis na luachanna agus na prionsabail a leagtar amach sa Mholadh ón gComhairle maidir leis an gComhaontú um Thaighde agus Nuálaíocht san Eoraip.

51.

IARRANN SÍ ar an gCoimisiún, ar na Ballstáit agus ar na geallsealbhóirí páirt a ghlacadh i gcomhar feabhsaithe chun na sineirgí sin a chur chun feidhme, ag tógáil ar na struchtúir rialachais atá sa chreat straitéiseach le haghaidh comhar Eorpach san oideachas agus oiliúint agus sa Limistéar Eorpach Taighde cheana, i ndlúthshineirgíocht leis an Limistéar Eorpach Ardoideachais, agus trí leas a bhaint as dea-chleachtais na n-institiúidí ardoideachais. I ndáil leis sin, d’fhéadfaí cruinnithe comhpháirteacha na nArd-Stiúrthóirí ardoideachais agus an Coiste um an Limistéar Eorpach Taighde agus um Nuálaíocht a mheas i gcás inarb ábhartha agus ina mbeadh topaicí comhleasa agus cuspóir coiteann sainithe go soiléir.

52.

IARRANN SÍ ar an gCoimisiún agus ar na Ballstáit obair a dhéanamh chun na príomhchuspóirí sin a bhaint amach trí dhlúthchomhar le brateagraíochtaí ar leibhéal an Aontais agus ar an leibhéal idirnáisiúnta, nó le heagraíochtaí iomchuí eile atá ábhartha ar leibhéal an Aontais, agus le hionadaí na ngeallsealbhóirí, amhail: Institiúidí ardoideachais, lena n-áirítear comhghuaillíochtaí Institiúidí Ardoideachais na hEorpa, cumainn mac léinn, gníomhaireachtaí dearbhaithe cáilíochta, eagraíochtaí a dhéanann taighde agus teicneolaíocht, gnólachtaí dian-T&N, lena n-áirítear FBManna, taighdeoirí agus nuálaithe aonair, bonneagair thaighde, eagraíochtaí cistiúcháin T&I agus acadaimh eolaíochtaí. D’fhéadfaí cruinnithe rialta amhail Fóram na nOllscoileanna do thodhchaí na hEorpa a mheas chun plé a dhéanamh ar chur chun feidhme na straitéise agus chun comhroinnt dea-chleachtas a chothú. Ba cheart do thorthaí an Fhóraim sin tuilleadh forbairtí agus tuilleadh oibre a spreagadh ó na grúpaí ábhartha den chreat straitéiseach le haghaidh comhar Eorpach san oideachas agus oiliúint agus leis an Limistéar Eorpach Taighde, i sineirgíocht leis an Limistéar Eorpach Ardoideachais.

53.

IARRANN SÍ ar na Ballstáit leas a bhaint as malartuithe iltaobhacha le tacaíocht ón gCoimisiún chun comhroinnt dea-chleachtas agus foghlama piaraí ó Bhallstáit eile a chothú.

54.

TUGANN SÍ DÁ hAIRE go bhfuil sé ar intinn ag an gCoimisiún na huirlisí faireacháin ardoideachais a chuíchóiriú. D’fhéadfadh sé sin feabhas a chur ar a n-acmhainneacht agus ar a n-ábharthacht do lucht déanta beartas, d’institiúidí ardoideachais, do mhic léinn agus do thaighdeoirí, gan an t-ualach riaracháin ar na Ballstáit ná ar na hinstitiúidí ardoideachais a mhéadú, chun faisnéis a chur ar fáil maidir leis an dul chun cinn atá déanta i gcur chun feidhme na straitéise Eorpaí lena dtugtar cumhacht d’institiúidí ardoideachais agus chun cuidiú leis na Ballstáit ar mian leo na gníomhaíochtaí a cheapadh a bhfuil sé beartaithe acu rannchuidiú leo bunaithe ar fhianaise agus sonraí daingne. Is ar bhonn deonach a ghlacfaidh na Ballstáit páirt sa phróiseas sin. MOLANN SÍ go mbunófaí tuilleadh plé ar staidéar mapála i ndáil le creat féideartha dlíthiúil na n-uirlisí ábhartha faireacháin. CUIREANN SÍ I bhFIOS GO LÁIDIR gur cheart an cúram sin a fhorbairt i sineirgíocht le próiseas comhordaithe beartais agus faireacháin LET, lena n-áirítear deais LET.

55.

IARRANN SÍ ar an gCoimisiún nuashonrú rialta a chur faoi bhráid na mBallstát maidir leis an dul chun cinn atá déanta i ndáil le cur chun feidhme na ngníomhaíochtaí thuasluaite, agus forléargas cuimsitheach a thíolacadh sa tuarascáil iomlán ón gCoimisiún maidir leis an Limistéar Eorpach Oideachais in 2025, agus aird á tabhairt freisin ar an dul chun cinn a rinneadh maidir leis an Limistéar Eorpach Taighde a chur chun feidhme.

---

(1)  Chun críocha na gconclúidí seo, is chun tagairt don earnáil iomlán a úsáidtear an téarma “institiúidí ardoideachais”, agus cuimsítear leis réimse iomlán an oideachais threasaigh agus, dá bhrí sin, gach cineál institiúide ardoideachais, lena n-áirítear, i gcomhréir leis an dlí náisiúnta nó leis an gcleachtas náisiúnta, ollscoileanna taighde, coláistí ollscoile, ollscoileanna eolaíochtaí feidhmeacha, institiúidí ardoideachais gairmoideachais agus gairmoiliúna, agus institiúidí ardoideachais ealaíon.

(2)  ECFE (2020), Resourcing Higher Education: Challenges, Choices and Consequences, [Acmhainní a chur ar fáil don Ardoideachas: Dúshláin, Roghanna agus Iarmhairtí] an tArdoideachas, Foilsitheoireacht ECFE, Páras.

(3)  Carretero Gomez, S., Vuorikari, R. agus Punie, Y., DigComp 2.1: The Digital Competence Framework for Citizens with eight proficiency levels and examples of use [Creat na hInniúlachta Digití do Shaoránaigh le hocht leibhéal inniúlachta agus samplaí úsáide], Oifig Foilseachán an Aontais Eorpaigh, Lucsamburg, 2017.

Rátaí malairte an euro (1)

20 Aibreán 2022

(2022/C 167/04)

1 euro =

	Airgeadra	Ráta malairte
USD	dollar na Stát Aontaithe	1,0830
JPY	yen na Seapáine	138,53
DKK	krone na Danmhairge	7,4405
GBP	punt steirling	0,82965
SEK	krona na Sualainne	10,2300
CHF	franc na hEilvéise	1,0254
ISK	króna na hÍoslainne	139,20
NOK	krone na hIorua	9,5443
BGN	lev na Bulgáire	1,9558
CZK	koruna Phoblacht na Seice	24,409
HUF	forint na hUngáire	371,36
PLN	zloty na Polainne	4,6338
RON	leu na Rómáine	4,9436
TRY	lira na Tuirce	15,8892
AUD	dollar na hAstráile	1,4581
CAD	dollar Cheanada	1,3579
HKD	dollar Hong Cong	8,4940
NZD	dollar na Nua-Shéalainne	1,5950
SGD	dollar Shingeapór	1,4779
KRW	won na Cóiré Theas	1 337,89
ZAR	rand na hAfraice Theas	16,3019
CNY	renminbi-yuan na Síne	6,9448
HRK	kuna na Cróite	7,5610
IDR	rupiah na hIndinéise	15 537,05
MYR	ringgit na Malaeisia	4,6415
PHP	peso na nOileán Filipíneach	56,747
RUB	rúbal na Rúise
THB	baht na Téalainne	36,567
BRL	real na Brasaíle	5,0481
MXN	peso Mheicsiceo	21,6392
INR	rúipí na hIndia	82,6348

---

(1)  Foinse: ráta malairte tagartha arna fhoilsiú ag an mBanc Ceannais Eorpach (BCE).

FÓGRA COMÓRTAIS OSCAILTE

(2022/C 167/05)

Tá an Oifig Eorpach um Roghnú Foirne (EPSO) ag eagrú an chomórtais oscailte seo a leanas:

EPSO/AST/152/22 - Cúntóirí teanga (AST 1) le haghaidh na dteangacha seo a leanas:

Eastóinis (ET), Cróitis (HR), Iodáilis (IT), Ollainnis (NL), Polainnis (PL), Portaingéilis (PT)

Tá an fógra comórtais seo foilsithe i 24 theanga in Iris Oifigiúil an Aontais Eorpaigh C 167 A an 21 Aibreán 2022.

Tá tuilleadh eolais ar shuíomh gréasáin EPSO: https://epso.europa.eu/

Fógra tionscnaimh maidir le hathbhreithniú éaga ar na bearta frithdhumpála is infheidhme i dtaca le hallmhairí táirgí de shnáithín gloine filiméadach leanúnach de thionscnamh Dhaon-Phoblacht na Síne

(2022/C 167/06)

Tar éis fhoilsiú an Fhógra maidir le dul in éag (1) atá le tarlú i dtaca leis na bearta frithdhumpála atá i bhfeidhm ar allmhairí táirgí de shnáithín gloine filiméadach leanúnach de thionscnamh Dhaon-Phoblacht na Síne (“an tír lena mbaineann” nó “an tSín”), fuair an Coimisiún Eorpach (“an Coimisiún”) iarraidh ar athbhreithniú de bhun Airteagal 11(2) de Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (2) (“an bun-Rialachán”).

1.   Iarraidh ar athbhreithniú

Is é Cumann Táirgeoirí Snáithín Gloine na hEorpa (“an t-iarratasóir”) a chuir an iarraidh isteach an 19 Eanáir 2022 thar ceann thionscal an Aontais i leith allmhairí táirgí de shnáithín gloine filiméadach leanúnach de bhrí Airteagal 5(4) den bhun-Rialachán.

Tá leagan oscailte den iarraidh mar aon le hanailís ar a mhéid a thacaíonn táirgeoirí de chuid an Aontais leis an iarraidh ar fáil sa chomhad lena iniúchadh ag na páirtithe leasmhara. I roinn 5.6 den Fhógra seo, tá faisnéis le fáil faoi rochtain ar an gcomhad le haghaidh páirtithe leasmhara.

2.   An táirge faoi athbhreithniú

Is é an táirge atá faoi réir an athbhreithnithe seo snáitheanna snáithín gloine mionghearrtha, nach bhfuil níos faide ná 50 mm; caisirníní snáithín gloine, seachas caisirníní snáithín gloine atá tuilte agus brataithe agus ar mó ná 3 % a gcaillteanas ar a n-adhaint (arna chinneadh le Caighdeán ISO 1887); agus mataí atá déanta as filiméid snáithín gloine seachas mataí olla gloine (“an táirge faoi athbhreithniú” nó “GFR”) a thagann faoi láthair faoi chóid AC 7019 11 00, ex 7019 12 00 (cóid TARIC 7019120022, 7019120025, 7019120026, 7019120039) agus 7019 14 00 agus 7019 15 00 (3). Is chun críoch faisnéise amháin a thugtar cóid AC agus TARIC.

3.   Bearta atá ann cheana

Is dleacht chinntitheach frithdhumpála a fhorchuirtear le Rialachán Cur Chun Feidhme (AE) 2017/724 ón gCoimisiún iad na bearta atá i bhfeidhm faoi láthair (4).

4.   Foras an athbhreithnithe

Tá an iarraidh bunaithe ar na forais gur dócha go leanfar den dumpáil agus den díobháil do thionscal an Aontais de thoradh dhul in éag na mbeart.

4.1.    An líomhain gur dócha go leanfar den dumpáil

4.1.1.   An líomhain gur dócha go leanfar den dumpáil ó Dhaon-Phoblacht na Síne

Mhaígh an t-iarratasóir nach iomchuí praghsanna agus costais intíre a úsáid i nDaon-Phoblacht na Síne, i ngeall gurb ann do shaobhadh suntasach de réir bhrí phointe (b) d’Airteagal 2(6a) den bhun-Rialachán.

Chun bunús a thabhairt leis na líomhaintí maidir le saobhadh suntasach, bhí an t-iarratasóir ag brath ar an bhfaisnéis atá sa tuarascáil tíre a chuir seirbhísí an Choimisiúin ar fáil an 20 Nollaig 2017 ina ndearnadh cur síos ar imthosca sonracha an mhargaidh i nDaon-Phoblacht na Síne (5). Go háirithe, thagair an t-iarratasóir do shaobhadh amhail idirghabháil ón stát sa gheilleagar go ginearálta, agus in earnáil an táirge atá faoi athbhreithniú go sonrach, sin agus do shaobhadh a bhaineann le talamh, fuinneamh, caipiteal, amhábhair agus saothar.

Ina theannta sin, bhí an t-iarratasóir ag brath ar fhaisnéis a bhí ar fáil go poiblí, go háirithe ar an 13ú Plean Forbartha 5 Bliana maidir le Tionscal na nÁbhar Tógála, ar an bPlean Forbartha um Monaraíocht Chliste, ar an 13ú Plean 5 Bliana um Fhorbairt Náisiúnta Eacnamaíoch agus Shóisialta Dhaon-Phoblacht na Síne, ar an 14ú Plean 5 Bliana agus ar an tionscnamh Made in China 2025. Dar leis an iarratasóir, is pleananna iad sin a spreagann údaráis de chuid an rialtais ar gach leibhéal agus institiúidí airgeadais atá faoi úinéireacht an stáit cur chun cinn thionscal na bhfiliméad snáithín gloine a chothú i nDaon-Phoblacht na Síne. Rinne an t-iarratasóir tagairt freisin do na torthaí ar ar tháinig an Coimisiúin san imscrúdú frith-fhóirdheontais a rinneadh roimhe seo maidir le filiméid snáithín gloine ó Dhaon-Phoblacht na Síne (6), agus sna himscrúduithe frithdhumpála agus frith-fhóirdheontais maidir le fabraicí de shnáithín gloine ó Dhaon-Phoblacht na Síne agus ón Éigipt (7), a mhéid a bhaineann le saobhadh sonrach in earnáil na bhfiliméad snáithín gloine.

I bhfianaise na faisnéise atá ar fáil, measann an Coimisiún gur leor an fhianaise atá ann de bhun Airteagal 5(9) den bhun-Rialachán a léiríonn de ghnáth, i ngeall ar shaobhadh suntasach a dhéanann difear do phraghsanna agus do chostais, go bhfuil úsáid na bpraghsanna agus na gcostas náisiúnta sa tír lena mbaineann míchuí, rud a fhágann gur gá imscrúdú a thionscnamh de bhun Airteagal 2(6a) den bhun-Rialachán.

Tá an tuarascáil tíre ar fáil sa chomhad lena iniúchadh ag páirtithe leasmhara agus ar shuíomh gréasáin Ard-Stiúrthóireacht na Trádála (8).

Dá bhrí sin, i bhfianaise Airteagal 2(6a)(a) den bhun-Rialachán, an líomhain go bhfuiltear ag leanúint den dumpáil ó Dhaon-Phoblacht na Síne, tá sí bunaithe ar chomparáid idir gnáthluach ríofa ar bhonn costais táirgthe agus díola a léiríonn praghsanna nó tagarmhairc neamhshaofa i dtír ionadaíoch iomchuí, agus praghas onnmhairiúcháin an táirge faoi athbhreithniú (ar leibhéal an phraghais díreach ón monarcha) ón tír lena mbaineann nuair a dhíoltar an táirge lena onnmhairiú chuig an Aontas.

Na corrlaigh dhumpála a ríomhtar ar mbonn sin, is corrlaigh mhóra iad, rud a léiríonn go bhfuiltear ag leanúint den dumpáil.

4.2.    An líomhain gur dócha go leanfar den díobháil

Líomhnaíonn an t-iarratasóir gur dócha go bhfuiltear ag leanúint den díobháil. I ndáil leis sin, chuir an t-iarratasóir fianaise leordhóthanach ar fáil go bhfuil allmhairí an táirge faoi athbhreithniú ón tír lena mbaineann chuig an Aontas fós suntasach i ndearbhthéarmaí agus i dtéarmaí sciar den mhargadh.

I measc iarmhairtí eile, is éard a léiríonn an fhianaise a chuir an t-iarratasóir ar fáil go raibh tionchar diúltach ar leibhéal na bpraghsanna a bhí á ngearradh ag tionscal an Aontais agus ar na cainníochtaí a dhíol tionscal an Aontais de dheasca an mhéid den táirge faoi athbhreithniú a allmhairíodh, rud a d’fhág go raibh tionchar substaintiúil diúltach ar fheidhmíocht fhoriomlán agus ar staid airgeadais tionscal an Aontais, sin agus ar an gcás atá ann sa tionscal sin ó thaobh na fostaíochta de.

Líomhnaíonn an t-iarratasóir freisin gur dócha go leanfar den díobháil amach anseo. I ndáil leis sin, chuir an t-iarratasóir fianaise ar fáil freisin gur dócha, dá ligfí do na bearta dul i éag, go dtiocfaidh méadú ar leibhéal reatha allmhairithe an táirge atá faoi athbhreithniú ón tír lena mbaineann chuig an Aontas de bharr gur ann d’acmhainn neamhúsáidte i nDaon-Phoblacht na Síne.

Ina theannta sin, líomhnaíonn an t-iarratasóir gur dócha go ndéanfadh aon mhéadú suntasach eile ar allmhairí ar phraghsanna dumpáilte ón tír lena mbaineann tuilleadh díobhála do thionscal an Aontais, agus ba cheart go gceadófaí na bearta a ligean i léig.

5.   Nós imeachta

Arna chinneadh don Choimisiún, tar éis dó dul i gcomhairle leis an gCoiste arna bhunú le hAirteagal 15(1) den bhun-Rialachán, gur leor an fhianaise atá ann gur dócha go bhfuil dumpáil agus díobháil ann chun údar maith a thabhairt le tionscnamh an athbhreithnithe éaga, tá an Coimisiún, leis seo, ag tionscnamh athbhreithniú i gcomhréir le hAirteagal 11(2) den bhun-Rialachán.

Is éard a chinnfear leis an athbhreithniú éaga an amhlaidh gur dócha go leanfar leis an táirge atá faoi athbhreithniú agus go leanfadh díobháil do thionscal an Aontais nó go leanfadh an díobháil sin arís nó go leanfadh an díobháil a dhéantar don tionscal de chuid an Aontais mar thoradh ar dhul in éag na mbeart.

Tarraingíonn an Coimisiún aird na bpáirtithe ar an bhFógra (9) arna fhoilsiú maidir le hiarmhairtí ráig COVID-19 ar imscrúduithe frithdhumpála agus frith-fhóirdheontais, iarmhairtí a d’fhéadfadh a bheith infheidhme maidir leis an imeacht seo.

5.1.    Tréimhse an imscrúdaithe athbhreithniúcháin agus an tréimhse faoi bhreathnú

An t-imscrúdú chun a fháil amach an leanfar den dumpáil nó an dtarlóidh sí arís, cumhdóidh sé an tréimhse ón 1 Eanáir 2021 go dtí an 31 Nollaig 2021 (“tréimhse an imscrúdaithe athbhreithniúcháin”). An t-imscrúdú ar threochtaí atá ábhartha maidir leis an measúnú ar an dóchúlacht go leanfar den díobháil nó go dtarlóidh sí arís, cumhdóidh sé an tréimhse ón 1 Eanáir 2018 go deireadh thréimhse an imscrúdaithe athbhreithniúcháin (“an tréimhse faoi bhreathnú”).

5.2.    Barúlacha faoin iarraidh agus faoi thionscnamh an imscrúdaithe

Ní mór do na páirtithe leasmhara uile ar mian leo barúil a thabhairt ar an iarraidh (lena n-áirítear ábhair a bhaineann le leanúint den díobháil agus le cúisíocht) nó aon ghné a bhaineann le tionscnamh an imscrúdaithe (lena n-áirítear an méid tacaíochta atá ann don iarraidh) é sin a dhéanamh laistigh de 37 lá ó dháta foilsithe an Fhógra seo in Iris Oifigiúil an Aontais Eorpaigh (10).

Ní mór aon iarraidh ar éisteacht maidir le tionscnamh an imscrúdaithe a chur isteach laistigh de 15 lá ó dháta foilsithe an Fhógra seo.

5.3.    Nós imeachta um chinneadh na dóchúlachta go leanfar den dumpáil nó go dtarlóidh sí arís

In imscrúdú éaga, déanann an Coimisiún scrúdú ar onnmhairí a cuireadh chuig an Aontas i dtréimhse an imscrúdaithe athbhreithniúcháin agus, gan beann ar onnmhairí chuig an Aontas, measann sé an rud é, de thoradh staid na gcuideachtaí a tháirgeann agus a dhíolann an táirge faoi athbhreithniú sa tír lena mbaineann, gur dócha go leanfar den onnmhairiú chuig an Aontas ar phraghsanna dumpáilte nó go dtarlóidh sé arís má théann na bearta in éag.

Dá bhrí sin, iarrtar ar na táirgeoirí uile (11) an táirge faoi athbhreithniú ón tír lena mbaineann, lena n-áirítear iad siúd nár chomhoibrigh san imscrúdú/sna himscrúduithe as a dtiocfaidh na bearta atá i bhfeidhm, páirt a ghlacadh in imscrúdú an Choimisiúin.

5.3.1.   Imscrúdú a dhéanamh ar tháirgeoirí sa tír lena mbaineann

I bhfianaise an líon mór táirgeoirí a d’fhéadfadh a bheith i nDaon-Phoblacht na Síne atá páirteach san athbhreithniú éaga seo, agus chun an t-imscrúdú a thabhairt chun críche laistigh de na teorainneacha ama reachtúla, féadfaidh an Coimisiún na táirgeoirí a bhfuil imscrúdú le déanamh orthu a theorannú do líon réasúnta trí shampla a roghnú (tugtar “sampláil” ar an bpróiseas sin freisin). Déanfar an tsampláil i gcomhréir le hAirteagal 17 den bhun-Rialachán.

Chun gur féidir leis an gCoimisiún a chinneadh an bhfuil gá le sampláil agus, má tá, chun sampla a roghnú, iarrtar ar gach táirgeoir, nó ionadaithe atá ag gníomhú thar a cheann, lena n-áirítear na táirgeoirí nár chomhoibrigh leis an imscrúdú arb iad na bearta atá faoi réir an athbhreithnithe seo ba thoradh air, faisnéis faoina chuideachtaí a chur ar fáil don Choimisiún laistigh de 7 lá ó dháta foilsithe an Fhógra seo. Ní mór an fhaisnéis sin a chur ar fáil trí TRON.tdi ag an seoladh seo a leanas: https://tron.trade.ec.europa.eu/tron/tdi/form/R767_SAMPLING_FORM_FOR_EXPORTING_PRODUCER

I roinn 5.6 agus roinn 5.9 thíos, tá faisnéis le fáil faoi rochtain ar TRON.

An fhaisnéis a mheasann an Coimisiún a bheith riachtanach chun sampla na dtáirgeoirí a roghnú, chun an fhaisnéis sin a fháil, déanfaidh sé teagmháil le húdaráis na tíre lena mbaineann freisin agus is féidir go ndéanfaidh sé teagmháil le haon chomhlachas aitheanta de tháirgeoirí de chuid na tíre lena mbaineann.

Má tá gá le sampla, roghnófar na tairgeoirí ar bhonn an mhéid ionadaíoch is mó de tháirgeacht, díolacháin nó onnmhairí ar féidir imscrúdú a dhéanamh air go réasúnta le linn an ama atá ar fáil. Gach táirgeoir aitheanta de chuid na tíre lena mbaineann, údaráis na tíre lena mbaineann, agus comhlachais táirgeoirí, tabharfaidh an Coimisiún fógra dóibh, trí údaráis na tíre lena mbaineann más iomchuí, faoi na cuideachtaí a roghnaíodh le bheith sa sampla.

Nuair a gheobhaidh an Coimisiún an fhaisnéis is gá chun sampla de na táirgeoirí a roghnú, cuirfidh sé na páirtithe lena mbaineann ar an eolas faoina chinneadh iad a roghnú nó gan iad a roghnú le bheith sa sampla. Beidh ar na táirgeoirí sampláilte ceistneoir comhlánaithe a chur isteach laistigh de 30 lá ón dáta a tugadh fógra dóibh faoin gcinneadh iad a roghnú le bheith sa sampla, mura sonraítear a mhalairt.

Cuirfidh an Coimisiún nóta leis an gcomhad lena iniúchadh ag páirtithe leasmhara a léireoidh roghnú an tsampla. Aon bharúil maidir le roghnú an tsampla, ní mór í a bheith faighte laistigh de 3 lá ón dáta a fógraíodh an cinneadh faoin sampla.

Tá an ceistneoir do tháirgeoirí sa tír lena mbaineann ar fáil sa chomhad atá le hiniúchadh ag páirtithe leasmhara agus ar shuíomh gréasáin Ard-Stiúrthóireacht na Trádála https://trade.ec.europa.eu/tdi/case_details.cfm?id=2595

Gan dochar do chur i bhfeidhm féideartha Airteagal 18 den bhun-Rialachán, na cuideachtaí a bhí toilteanach a bheith sa sampla ach nár roghnaíodh iad le bheith ann, measfar gur cuideachtaí comhoibríocha atá iontu.

5.3.2.   Nós imeachta breise maidir le Daon-Phoblacht na Síne a bhfuil saobhadh suntasach inti

Faoi réir fhorálacha an Fhógra seo, leis seo, iarrtar ar gach páirtí leasmhar a chuid tuairimí a chur in iúl, faisnéis a chur isteach, agus fianaise thacaíochta a chur ar fáil maidir le cur i bhfeidhm Airteagal 2(6a) den bhun-Rialachán. Mura sonraítear a mhalairt, ní mór an fhaisnéis agus an fhianaise thacaíochta sin a bheith faighte ag an gCoimisiún laistigh de 37 lá ó dháta foilsithe an Fhógra seo.

Go háirithe, iarrann an Coimisiún ar na páirtithe leasmhara uile a dtuairim a chur in iúl maidir leis na hionchuir agus maidir le cóid an Chórais Chomhchuibhithe (HS) a sholáthraítear san iarraidh, tír ionadaíoch nó tíortha ionadaíocha iomchuí a mholadh agus céannacht táirgeoirí an táirge faoi athbhreithniú sna tíortha sin a chur ar fáil. Ní mór an fhaisnéis agus an fhianaise thacaíochta sin a bheith faighte ag an gCoimisiún laistigh de 15 lá ó dháta foilsithe an Fhógra seo.

De bhun Airteagal 2(6a), pointe (e), den bhun-Rialachán, go luath tar éis dó an t-imscrúdú a thionscnamh, cuirfidh an Coimisiún na páirtithe san imscrúdú ar an eolas faoi na foinsí ábhartha a bhfuil sé beartaithe aige a úsáid chun an gnáthluach sa tSín a chinneadh de bhun Airteagal 2(6a) den bhun-Rialachán, agus déanfaidh sé amhlaidh trí bhíthin nóta a ghabhann leis an gcomhad iniúchadh ag na páirtithe leasmhara. Cuimseoidh sé sin na foinsí uile, lena n-airítear, i gcás inarb iomchuí, tír iomchuí a roghnú. Nuair a chuirfear an nóta leis an gcomhad sin, beidh 10 lá ag na páirtithe san imscrúdú ón dáta sin chun a gcuid barúlacha a chur isteach.

De réir na faisnéise atá ar fáil don Choimisiún, d’fhéadfadh an Bhrasaíl agus an Tuirc a bheith ina dtír ionadaíoch don tSín sa chás seo. D’fhonn an tír ionadaíoch iomchuí a roghnú ar deireadh, scrúdóidh an Coimisiún an bhfuil tíortha ann a bhfuil leibhéal forbartha eacnamaíche acu atá cosúil le leibhéal na Síne, ina bhfuil táirgeadh agus díolacháin an táirge faoi athbhreithniú agus ina bhfuil sonraí ábhartha ar fáil go héasca. I gcás ina bhfuil níos mó ná rogha amháin ann i ndáil le tír ionadaíoch, tabharfar tús áite, i gcás inarb iomchuí, do thíortha inar leordhóthanach leibhéal na cosanta sóisialta agus comhshaoil atá iontu.

Maidir leis na foinsí ábhartha, iarrann an Coimisiún ar tháirgeoirí uile na Síne faisnéis a chur ar fáil maidir leis na hábhair (amh agus próiseáilte) agus an fuinneamh a úsáidtear chun an táirge faoi athbhreithniú a tháirgeadh laistigh de 15 lá ó dháta foilsithe an Fhógra seo. Ní mór an fhaisnéis sin a chur ar fáil trí TRON.tdi ag an seoladh seo a leanas: https://tron.trade.ec.europa.eu/tron/tdi/form/R767_INFO_ON_INPUTS_FOR_EXPORTING_PRODUCER_FORM

Is féidir teacht ar fhaisnéis faoi rochtain ar Tron i roinn 5.6 agus i roinn 5.9 thíos.

Thairis sin, ní mór aon fhaisnéis fhíorasach a chuirtear isteach chun luach a chur ar chostais agus ar phraghsanna de bhun phointe (a) d’Airteagal 2(6a) den bhun-Rialachán a chomhdú laistigh de 65 lá ó dháta foilsithe an Fhógra seo. Níor cheart faisnéis fhíorasach den sórt sin a thógáil ach amháin ó fhoinsí atá ar fáil go poiblí.

An fhaisnéis a mheasann an Coimisiún a bheith riachtanach le haghaidh a imscrúdaithe i ndáil le saobhadh suntasach de réir bhrí Airteagal 2(6a), pointe (b), den bhun-Rialachán, chun an fhaisnéis sin a fháil, cuirfidh an Coimisiún ceistneoir ar fáil do Rialtas na Síne freisin.

5.3.3.   Imscrúdú a dhéanamh ar allmhaireoirí neamhghaolmhara (12) (13)

Allmhaireoirí neamhghaolmhara a allmhairíonn an táirge faoi athbhreithniú chuig an Aontas ón tSín, lena n-áirítear na hallmhaireoirí nár chomhoibrigh leis an imscrúdú arb iad na bearta atá i bhfeidhm ba thoradh air, iarrtar orthu a bheith rannpháirteach san imscrúdú seo.

Ó tharla go bhféadfadh líon mór allmhaireoirí neamhghaolmhara a bheith bainteach leis an athbhreithniú éaga seo, agus chun an t-imscrúdú a thabhairt chun críche le linn na dteorainneacha ama reachtúla, féadfaidh an Coimisiún teorainn a chur leis an líon allmhaireoirí neamhghaolmhara a ndéanfar imscrúdú orthu, trí shampla a roghnú, chun go mbeidh líon réasúnta ann (tugtar “sampláil” ar an bpróiseas sin freisin). Is i gcomhréir le hAirteagal 17 den bhun-Rialachán a dhéanfar an tsampláil.

Chun gur féidir leis an gCoimisiún a chinneadh an bhfuil gá le sampláil agus, má tá, chun sampla a roghnú, iarrtar ar gach allmhaireoir neamhghaolmhar, nó ionadaithe atá ag gníomhú thar a cheann, lena n-áirítear na hallmhaireoirí nár chomhoibrigh leis an imscrúdú arb iad na bearta atá faoi réir an athbhreithnithe reatha seo ba thoradh air, iad féin a chur in aithne don Choimisiún. Ní mór do na páirtithe sin déanamh amhlaidh laistigh de 7 lá ó dháta foilsithe an Fhógra seo, tríd an bhfaisnéis faoina gcuideachta nó faoina gcuideachtaí arna hiarraidh san Iarscríbhinn a ghabhann leis an bhFógra seo a thabhairt don Choimisiún.

Chun faisnéis a fháil a mheasann sé a bheith riachtanach do roghnú an tsampla d’allmhaireoirí neamhghaolmhara, féadfaidh an Coimisiún dul i dteagmháil freisin le haon chomhlachas aitheanta d’allmhaireoirí.

Má tá gá le sampla, féadfar na hallmhaireoirí a roghnú ar bhonn an mhéid ionadaíoch is mó de dhíolacháin an táirge faoi athbhreithniú ón tír lena mbaineann san Aontas, ar méid é ar féidir imscrúdú a dhéanamh air go réasúnta le linn an ama atá ar fáil. Tabharfaidh an Coimisiún fógra do gach allmhaireoir neamhghaolmhar aitheanta agus do gach comhlachas aitheanta d’allmhaireoirí faoi na cuideachtaí a roghnaíodh le bheith sa sampla.

Ina theannta sin, cuirfidh an Coimisiún nóta leis an gcomhad lena iniúchadh ag na páirtithe leasmhara a léireoidh roghnú an tsampla. Aon bharúil maidir le roghnú an tsampla, ní mór í a bheith faighte laistigh de 3 lá ón dáta a fógraíodh an cinneadh faoin sampla.

An fhaisnéis a mheasann an Coimisiún a bheith riachtanach le haghaidh a imscrúdaithe, chun an fhaisnéis sin a fháil, cuirfidh sé ceistneoirí chuig na hallmhaireoirí neamhghaolmhara sampláilte. Ní mór do na páirtithe sin ceistneoir comhlánaithe a chur isteach laistigh de 30 lá ón dáta a tugadh fógra faoi roghnú an tsampla, mura sonraítear a mhalairt.

Tá an ceistneoir le haghaidh allmhaireoirí neamhghaolmhara ar fáil sa chomhad lena iniúchadh ag páirtithe leasmhara agus ar shuíomh gréasáin na hArd-Stiúrthóireachta Trádála ag https://trade.ec.europa.eu/tdi/case_details.cfm?id=2595

5.4.    Nós imeachta um chinneadh na dóchúlachta go leanfar den díobháil nó go dtarlóidh sí arís

Chun a chinneadh an dócha go leanfar den díobháil do thionscal an Aontais nó go dtarlóidh sí arís, iarrann an Coimisiún ar tháirgeoirí an táirge faoi athbhreithniú san Aontas a bheith rannpháirteach san imscrúdú.

5.4.1.   Táirgeoirí de chuid an Aontais a imscrúdú

Ó tharla go bhféadfadh líon mór táirgeoirí de chuid an Aontais a bheith bainteach leis an athbhreithniú éaga seo, agus chun an t-imscrúdú a thabhairt chun críche le linn na dteorainneacha ama reachtúla, féadfaidh an Coimisiún teorainn a chur leis an líon táirgeoirí de chuid an Aontais a dhéanfar imscrúdú orthu, trí shampla a roghnú, chun go mbeidh líon réasúnta ann (tugtar “sampláil” ar an bpróiseas seo freisin). Is i gcomhréir le hAirteagal 17 den bhun-Rialachán a dhéantar an tsampláil.

Roghnaigh an Coimisiún sampla de tháirgeoirí de chuid an Aontais go sealadach. Is féidir na sonraí a fháil sa chomhad lena iniúchadh ag páirtithe leasmhara.

Leis seo, iarrtar ar pháirtithe leasmhara a gcuid barúlacha a thabhairt ar an sampla sealadach. Ina theannta sin, táirgeoirí eile de chuid an Aontais, nó ionadaithe atá ag gníomhú thar a gceann, lena n-airítear táirgeoirí de chuid an Aontais nár chomhoibrigh san imscrúdú/sna himscrúduithe arb iad na bearta atá i bhfeidhm faoi láthair ba thoradh air/orthu, ar táirgeoirí iad a mheasann go bhfuil cúiseanna ann ar cheart dóibh a bheith sa sampla, ní mór dóibh dul i dteagmháil leis an gCoimisiún laistigh de 7 lá ó dháta fhoilsithe an Fhógra seo. Na barúlacha uile maidir leis an sampla sealadach, ní mór iad a bheith faighte laistigh de 7 lá ó dháta foilsithe an Fhógra seo, mura sonraítear a mhalairt.

Tabharfaidh an Coimisiún fógra do gach táirgeoir de chuid an Aontais agus/nó do gach comhlachas aitheanta de tháirgeoirí de chuid an Aontais faoi na cuideachtaí a roghnaíodh ar deireadh le bheith sa sampla.

Beidh ar na táirgeoirí sampláilte de chuid an Aontais ceistneoir comhlánaithe a chur isteach laistigh de 30 lá ón dáta a tugadh fógra dóibh faoin gcinneadh iad a roghnú le bheith sa sampla, mura sonraítear a mhalairt.

Tá an ceistneoir le haghaidh táirgeoirí de chuid an Aontais ar fáil sa chomhad lena iniúchadh ag na páirtithe leasmhara agus ar shuíomh gréasáin na hArd-Stiúrthóireachta Trádála: https://trade.ec.europa.eu/tdi/case_details.cfm?id=2595

5.5.    Nós imeachta um measúnú a dhéanamh ar leas an Aontais

Má dheimhnítear gur dócha go leanfar den dumpáil agus den díobháil, déanfar cinneadh, de bhun Airteagal 21 den bhun-Rialachán, an mbeadh sé in aghaidh leas an Aontais dá gcoinneofaí na bearta frith-dhumpála i bhfeidhm.

Táirgeoirí de chuid an Aontais agus a gcomhlachais ionadaíocha, úsáideoirí agus a gcomhlachais ionadaíocha, ceardchumainn agus eagraíochtaí tomhaltóirí ionadaíocha, iarrfar orthu faisnéis a thabhairt don Choimisiún maidir le leas an Aontais.

Aon fhaisnéis maidir le measúnú ar leas an Aontais, ní mór í a chur isteach laistigh de 37 lá ó dháta foilsithe an Fhógra seo, mura sonraítear a mhalairt. Féadfar an fhaisnéis sin a chur in iúl i bhformáid shaor, sin nó trí cheistneoir a d’ullmhaigh an gCoimisiún a líonadh isteach.

Tá na ceistneoirí, lena n-áirítear an ceistneoir le haghaidh úsáideoirí an táirge faoi imscrúdú, ar fáil sa chomhad lena iniúchadh ag na páirtithe leasmhara agus ar shuíomh gréasáin na hArd-Stiúrthóireachta Trádála https://trade.ec.europa.eu/tdi/case_details.cfm?id=2595.

In aon chás, aon fhaisnéis a chuirtear isteach de bhun Airteagal 21 den bhun-Rialachán, ní chuirfear san áireamh í ach amháin má tá fianaise fhíorasach ag teacht léi tráth a chuirtear isteach í, ar fianaise í a thugann bunús lena bailíocht.

5.6.    Páirtithe leasmhara

Chun bheith rannpháirteach san imscrúdú, ní mór do pháirtithe leasmhara, amhail táirgeoirí sa tír lena mbaineann, táirgeoirí de chuid an Aontais, allmhaireoirí agus a gcomhlachais ionadaíocha, úsáideoirí agus a gcomhlachais ionadaíocha, ceardchumainn agus eagraíochtaí tomhaltóirí ionadaíocha, ní mór dóibh a léiriú i dtús báire gurb ann do nasc oibiachtúil idir a gcuid gníomhaíochtaí agus an táirge faoi athbhreithniú.

Táirgeoirí sa tír lena mbaineann, táirgeoirí de chuid an Aontais, allmhaireoirí agus comhlachais ionadaíocha a chuir faisnéis ar fáil i gcomhréir leis na nósanna imeachta a shonraítear i ranna 5.3.1, 5.3.3 agus 5.4.1, measfar gur páirtithe leasmhara atá iontu má tá nasc oibiachtúil idir a gcuid gníomhaíochtaí agus an táirge faoi athbhreithniú.

Ní bheidh páirtithe eile in ann a bheith rannpháirteach san imscrúdú mar pháirtithe leasmhara go dtí go gcuirfidh siad iad féin in aithne, agus ar choinníoll gurb ann do nasc oibiachtúil idir a gcuid gníomhaíochtaí agus an táirge faoi imscrúdú. Má mheastar gur páirtí leasmhar é páirtí, ní dochar é sin do chur i bhfeidhm Airteagal 18 den bhun-Rialachán.

Is féidir an comhad lena iniúchadh ag na páirtithe leasmhara a rochtain trí Tron.tdi ag an seoladh seo a leanas: https://tron.trade.ec.europa.eu/tron/TDI. Lean na treoracha ar an leathanach sin chun rochtain a fháil (14).

5.7.    Aighneachtaí eile i scríbhinn

Faoi réir fhorálacha an Fhógra seo, iarrtar ar gach páirtí leasmhar, leis seo, a chuid tuairimí a chur in iúl, faisnéis a chur isteach, agus fianaise thacaíochta a sholáthar. Mura sonraítear a mhalairt, ní mór an fhaisnéis agus an fhianaise thacaíochta sin a bheith faighte ag an gCoimisiún laistigh de 37 lá ó dháta foilsithe an Fhógra seo.

5.8.    An deis éisteacht a fháil le seirbhísí imscrúdúcháin an Choimisiúin

Féadfaidh gach páirtí leasmhar éisteacht a iarraidh le seirbhísí imscrúdúcháin an Choimisiún. Aon iarraidh ar éisteacht, ní mór í a dhéanamh i scríbhinn agus ní mór cúiseanna na hiarrata a shonrú inti mar aon le hachoimre ar an méid ar mian leis an bpáirtí leasmhar a phlé le linn na héisteachta. Beidh an éisteacht teoranta do na saincheisteanna a leagann na páirtithe leasmhara amach i scríbhinn roimh ré.

I bprionsabal, ní úsáidfear éisteachtaí chun faisnéis fhíorasach nach bhfuil sa chomhad go fóill a chur i láthair. Mar sin féin, ar mhaithe le dea-riarachán agus chun go mbeidh seirbhísí an Choimisiúin in ann dul ar aghaidh leis an imscrúdú, féadfar treoir a thabhairt do pháirtithe leasmhara faisnéis fhíorasach nua a sholáthar tar éis na héisteachta.

5.9.    Treoracha maidir le haighneachtaí i scríbhinn a dhéanamh, agus maidir le ceistneoirí comhlánaithe agus comhfhreagras a sheoladh

Maidir le faisnéis a chuirfear faoi bhráid an Choimisiúin chun críche imscrúduithe cosanta trádála, beidh an fhaisnéis sin saor ó chóipcheart. Ní mór do pháirtithe leasmhara, sula gcuirfidh siad faisnéis agus/nó sonraí atá faoi réir cóipchearta tríú páirtí faoi bhráid an Choimisiúin, cead a iarraidh go sonrach ar shealbhóir an chóipchirt lena gceadaítear don Choimisiún a) an fhaisnéis agus na sonraí a úsáid chun críoch an nós imeachta cosanta trádála seo agus b) an fhaisnéis agus/nó na sonraí a chur ar fáil do pháirtithe leasmhara san imscrúdú sin i bhfoirm a fhágfaidh go mbeidh siad in ann a gcearta cosanta a fheidhmiú.

Gach aighneacht i scríbhinn, lena n-áirítear an fhaisnéis a iarrtar san fhógra seo, ceistneoirí comhlánaithe agus comhfhreagras arna gcur ar fáil ag páirtithe leasmhara a n-iarrtar gur i modh rúin a chaithfear leo, is mar “Íogair” a dhéanfar iad a lipéadú (15). Páirtithe a chuireann faisnéis isteach le linn an imscrúdaithe seo, iarrtar orthu cúis a thabhairt lena n-iarraidh go gcaithfí i modh rúin leo.

Ní mór do pháirtithe a sholáthraíonn faisnéis “Íogair” achoimrí neamhrúnda uirthi a chur ar fáil de bhun Airteagal 19(2) den bhun-Rialachán ar a gcuirfear an lipéad “Le hiniúchadh ag na páirtithe leasmhara”. Ní mór do na hachoimrí sin a bheith mionsonraithe a ndóthain le go bhféadfar bunús na faisnéise a cuireadh isteach faoi rún a thuiscint go réasúnta. Mura féidir leis an bpáirtí a sholáthraíonn faisnéis rúnda cúis mhaith a thabhairt lena iarraidh gur i modh rúin a gcaithfí léi nó mura dtugann sé achoimre neamhrúnda uirthi san fhormáid agus sa cháilíocht a iarradh, féadfaidh an Coimisiún neamhaird a thabhairt ar an bhfaisnéis sin mura féidir a thaispeáint go sásúil ó fhoinsí iomchuí go bhfuil an fhaisnéis ceart.

Iarrtar ar pháirtithe leasmhara gach aighneacht agus iarraidh a dhéanamh trí TRON.tdi (https://tron.trade.ec.europa.eu/tron/TDI) lena n-áirítear iarrataí ar chlárú mar pháirtithe leasmhara agus cóipeanna scanta de chumhachtaí aturnae agus de bhileoga deimhniúcháin. Trí úsáid a bhaint as TRON.tdi nó ríomhphost, cuireann páirtithe leasmhara in iúl go n-aontaíonn siad leis na rialacha is infheidhme maidir le haighneachtaí leictreonacha atá sa doiciméad “COMHFHREAGRAS LEIS AN gCOIMISIÚN EORPACH I gCÁSANNA COSANTA TRÁDÁLA”, doiciméad a foilsíodh ar shuíomh gréasáin Ard-Stiúrthóireacht na Trádála: http://trade.ec.europa.eu/doclib/docs/2011/june/tradoc_148003.pdf . Ní mór do na páirtithe leasmhara a n-ainm, a seoladh, a n-uimhir teileafóin agus seoladh ríomhphoist bailí a thabhairt, agus ba cheart dóibh a áirithiú gur ríomhphost oifigiúil feidhmiúil gnó é an seoladh ríomhphoist a chuireann siad ar fáil, agus gur seoladh é a sheiceáiltear gach lá. Tráth a chuirfear sonraí teagmhála ar fáil, ní dhéanfaidh an Coimisiún cumarsáid le páirtithe leasmhara ach amháin trí TRON.tdi nó trí ríomhphost, mura n-iarrfaidh siad go sainráite na doiciméid uile ón gCoimisiún trí mheán eile cumarsáide , nó mura gá post cláraithe a úsáid mar gheall ar chineál an doiciméid atá le seoladh. Le haghaidh tuilleadh rialacha agus faisnéise maidir le comhfhreagras leis an gCoimisiún, lena n-áirítear prionsabail a bhaineann le haighneachtaí trí TRON.tdi nó trí ríomhphost, ba cheart do pháirtithe leasmhara féachaint ar na treoracha maidir le cumarsáid le páirtithe leasmhara dá dtagraítear thuas.

Seoladh an Choimisiúin le haghaidh comhfhreagrais:

an Coimisiún Eorpach

Ard-Stiúrthóireacht na Trádála

Stiúrthóireacht G

Oifig: CHAR 04/039

1049 An Bhruiséil

BELGIQUE/BELGIË/AN BHEILG

TRON.tdi: https://tron.trade.ec.europa.eu/tron/tdi

Ríomhphost le haghaidh saincheisteanna dumpála:

TRADE-R767-GFR-DUMPING@ec.europa.eu

Ríomhphost le haghaidh saincheisteanna faoin díobháil agus faoi leas an Aontais:

TRADE-R767-GFR-INJURY@ec.europa.eu

6.   Sceideal an imscrúdaithe

De ghnáth, cuirfear an t-imscrúdú i gcrích laistigh de 12 mhí agus in aon chás tráth nach déanaí ná 15 mhí ó dháta foilsithe an Fhógra seo, de bhun Airteagal 11(5) den bhun-Rialachán.

7.   Faisnéis a chur isteach

Go hiondúil, ní fhéadfaidh na páirtithe leasmhara faisnéis a chur isteach ach amháin laistigh de na creata ama a shonraítear i roinn 5 den Fhógra seo.

D’fhonn an t-imscrúdú a thabhairt chun críche laistigh de na sprioc-amanna éigeantacha, ní ghlacfaidh an Coimisiún le haighneachtaí ó pháirtithe leasmhara tar éis an sprioc-am chun barúlacha a thabhairt faoin nochtadh deiridh nó, más infheidhme, tar éis an spriocdháta chun barúlacha a thabhairt maidir leis an nochtadh deiridh breise.

8.   An deis barúlacha a thabhairt maidir le haighneachtaí páirtithe eile

Chun cearta na cosanta a ráthú, ba cheart an deis a bheith ag páirtithe leasmhara barúlacha a thabhairt maidir le faisnéis a chuir páirtithe leasmhara eile isteach. Agus sin á dhéanamh acu, ní fhéadfaidh páirtithe leasmhara aghaidh a thabhairt ach ar na saincheisteanna a ardaítear in aighneachtaí na bpáirtithe leasmhara eile agus ní fhéadfaidh siad saincheisteanna nua a tharraingt anuas.

Barúlacha maidir leis an bhfaisnéis a chur páirtithe leasmhara eile ar fáil mar fhreagairt ar nochtadh na dtorthaí cinntitheacha, ba cheart iad a chur isteach laistigh de 5 lá ón sprioc-am chun barúlacha a thabhairt maidir leis na torthaí cinntitheacha, mura sonraítear a mhalairt. Más ann do nochtadh deiridh breise, na barúlacha a rinne páirtithe leasmhara eile mar fhreagairt ar an nochtadh breise sin, ba cheart iad sin a chur isteach laistigh de 1 lá ón sprioc-am chun tuairim a thabhairt ar an nochtadh breise sin, ach amháin má shonraítear a mhalairt.

Tá an tráthchlár a leagtar amach gan dochar do cheart an Choimisiúin faisnéis bhreise a iarraidh ar pháirtithe leasmhara i gcásanna a bhfuil údar cuí leo.

9.   Síneadh ama leis na teorainneacha ama a shonraítear san Fhógra seo

Féadfar síntí ar theorainneacha ama dá bhforáiltear san Fhógra seo a dheonú arna iarraidh sin do pháirtithe leasmhara a léiríonn cúis chuí.

Níor cheart aon síneadh maidir leis na teorainneacha ama dá bhforáiltear san Fhógra seo a iarraidh ach amháin in imthosca eisceachtúla, agus ní dhéanfar é a dheonú ach amháin má tá údar cuí leis. In aon chás, aon síneadh a chuirfear leis an sprioc-am chun freagra a thabhairt ar cheistneoirí, beidh sé teoranta do 3 lá, agus mar riail ghinearálta ní rachaidh sé thar 7 lá. Maidir le teorainneacha ama le haghaidh faisnéis eile seachas an fhaisnéis a shonraítear san Fhógra tionscnaimh a chur isteach, ní rachaidh aon síneadh ama thar 3 lá, mura léirítear gurb ann d’imthosca eisceachtúla.

10.   Neamh-chomhoibriú

I gcásanna ina ndiúltaíonn aon pháirtí leasmhar rochtain a thabhairt ar an bhfaisnéis is gá nó mura gcuireann sé an fhaisnéis sin ar fáil laistigh de na teorainneacha ama, nó má chuireann sé bac suntasach ar an imscrúdú, féadfar torthaí deimhneacha nó diúltacha a thabhairt ar bhonn na bhfíoras atá ar fáil i gcomhréir le hAirteagal 18 den bhun-Rialachán.

I gcás inar léir gur sholáthair páirtí leasmhar faisnéis bhréagach nó mhíthreorach, féadfar neamhaird a thabhairt ar an bhfaisnéis sin agus féadfar úsáid a bhaint as na fíorais atá ar fáil.

Mura gcomhoibríonn páirtí leasmhar nó mura gcomhoibríonn sé ach i bpáirt agus, dá bhrí sin, más ar na fíorais atá ar fáil atá na torthaí bunaithe i gcomhréir le hAirteagal 18 den bhun-Rialachán, d’fhéadfadh sé nach mbeadh an toradh chomh fabhrach céanna don pháirtí sin agus a bheadh dá mbeadh comhoibriú déanta aige.

Mura dtugtar freagra leictreonach, ní mheasfar gur neamh-chomhoibriú é sin, ar choinníoll go léireoidh an páirtí leasmhar go mbeadh ualach breise nó costas breise mí-réasúnach air mar thoradh ar an bhfreagra a thabhairt ar an mbealach a iarradh é. Ba cheart don pháirtí leasmhar teagmháil a dhéanamh leis an gCoimisiún láithreach.

11.   Oifigeach Éisteachta

Féadfaidh páirtithe leasmhara idirghabháil an Oifigigh Éisteachta in imeachtaí tráchta a iarraidh. Déanann an tOifigeach Éisteachta athbhreithniú ar iarrataí ar rochtain ar an gcomhad, ar dhíospóidí maidir le rúndacht doiciméad, ar iarrataí ar shíneadh teorainneacha ama agus ar aon iarraidh eile a bhaineann le cearta cosanta páirtithe leasmhara agus tríú páirtithe a d’fhéadfadh teacht chun cinn le linn an imeachta.

Féadfaidh an tOifigeach Éisteachta éisteachtaí a eagrú agus idirghabháil a dhéanamh idir an páirtí nó na páirtithe leasmhara agus seirbhísí an Choimisiúin chun a áirithiú go bhfuil cearta cosanta na bpáirtithe leasmhara á bhfeidhmiú ina n-iomláine. Is i scríbhinn ba cheart iarraidh ar éisteacht leis an Oifigeach Éisteachta a dhéanamh agus ba cheart na cúiseanna atá leis an iarraidh a shonrú inti. Déanfaidh an tOifigeach Éisteachta scrúdú ar na cúiseanna atá leis na hiarrataí. Níor cheart na héisteachtaí sin a reáchtáil ach amháin murar réitíodh na saincheisteanna le seirbhísí an Choimisiúin in am trátha.

Ní mór aon iarraidh a chur isteach in am trátha agus go gasta ionas nach gcuirfear stiúradh ordúil na n-imeachtaí i mbaol. Chuige sin, ba cheart do na páirtithe leasmhara idirghabháil an Oifigigh Éisteachta a iarraidh a luaithe is féidir tar éis an teagmhais arb é is údar le hidirghabháil den sórt sin a bheith ann. I gcás ina gcuirtear iarrataí éisteachta isteach lasmuigh de na tréimhsí ábhartha, déanfaidh an tOifigeach Éisteachta scrúdú freisin ar na cúiseanna leis na hiarrataí déanacha sin, ar chineál na saincheisteanna a tarraingíodh anuas agus ar thionchar na saincheisteanna sin ar chearta cosanta, ag féachaint go cuí do leasanna dea-riaracháin agus do chríochnú tráthúil an imscrúdaithe.

Chun tuilleadh faisnéise agus sonraí teagmhála a fháil, féadfaidh páirtithe leasmhara féachaint ar leathanaigh ghréasáin an Oifigigh Éisteachta ar shuíomh gréasáin Ard-Stiúrthóireacht na Trádála: http://ec.europa.eu/trade/trade-policy-and-you/contacts/hearing-officer/.

12.   An deis athbhreithniú a iarraidh faoi Airteagal 11(3) den bhun-Rialachán

Ó tharla go dtionscnaítear an t-athbhreithniú éaga seo i gcomhréir le forálacha Airteagal 11(2) den bhun-Rialachán, ní leasófar na bearta atá i bhfeidhm faoi láthair i ngeall ar thorthaí an athbhreithnithe, ach déanfar na bearta sin a aisghairm nó a choinneáil ar bun i gcomhréir le hAirteagal 11(6) den bhun-Rialachán.

Má mheasann aon pháirtí leasmhar go bhfuil údar le hathbhreithniú ar na bearta ar dhóigh a d’fhágfadh go bhféadfaí na bearta a leasú, féadfaidh an páirtí sin athbhreithniú a iarraidh de bhun Airteagal 11(3) den bhun-Rialachán.

Aon pháirtí ar mian leis athbhreithniú den sórt sin a iarraidh, ar athbhreithniú é a dhéanfaí go neamhspleách ar an athbhreithniú a luaitear san Fhógra seo, féadfaidh sé dul i dteagmháil leis an gCoimisiún ag an seoladh a shonraítear thuas.

13.   Sonraí pearsanta a phróiseáil

Is i gcomhréir le Rialachán (AE) 2018/1725 ó Pharlaimint na hEorpa agus ón gComhairle a chaithfear le haon sonraí pearsanta a bhaileofar san imscrúdú seo (16).

Tá fógra cosanta sonraí ar fáil ar shuíomh gréasáin Ard-Stiúrthóireacht na Trádála, fógra a chuireann gach duine aonair ar an eolas faoi phróiseáil sonraí pearsanta faoi chuimsiú ghníomhaíochtaí cosanta trádála an Choimisiúin: http://ec.europa.eu/trade/policy/accessing- markets/trade-defence/

---

(1)  IO C 311, 3.8.2021, lch. 5.

(2)  IO L 176, 30.6.2016, lch. 21.

(3)  Ón 1 Eanáir 2022, tá aicmiú mataí athraithe ó chód AC 7019 31 00 go cóid AC 7019 14 00 agus 7019 15 00. Go dtí an 31 Nollaig 2021, ba iad na cóid TARIC ab infheidhme 7019310010 agus 7019310090. Ón 1 Eanáir 2022, tá cóid TARIC 7019140010, 7019140090, 7019150010 agus 7019150090 ina n-ionad.

(4)  Rialachán Cur Chun Feidhme (AE) 2017/724 ón gCoimisiún an 24 Aibreán 2017 lena bhforchuirtear dleacht frithdhumpála chinntitheach ar allmhairí de tháirgí áirithe de shnáithín gloine filiméadach de thionscnamh Dhaon-Phoblacht na Síne tar éis athbhreithniú éaga de bhun Airteagal 11(2) de Rialachán (AE) 2016/1036 ó Pharlaimint na hEorpa agus ón gComhairle (IO L 107, 25.4.2017, lch. 4).

(5)  Doiciméad Inmheánach Oibre de chuid an Choimisiúin maidir le Saobhadh Suntasach i nGeilleagar Dhaon-Phoblacht na Síne chun Críoch Imscrúduithe Cosanta Trádála, an 20 Nollaig 2017, SWD(2017) 483 final/2, ar fáil faoi: https://trade.ec.europa.eu/doclib/docs/2017/december/tradoc_156474.pdf

(6)  Rialachán Cur Chun Feidhme (AE) 2021/328 ón gCoimisiún an 24 Feabhra 2021 lena bhforchuirtear dleacht frithchúitimh chinntitheach ar allmhairí táirgí de shnáithín gloine filiméadach leanúnach de thionscnamh Dhaon-Phoblacht na Síne tar éis athbhreithniú éaga de bhun Airteagal 18 de Rialachán (AE) 2016/1037 ó Pharlaimint na hEorpa agus ón gComhairle (IO L 65, 25.2.2021, lch. 1)

(7)  Rialachán Cur Chun Feidhme (AE) 2020/492 ón gCoimisiún an 1 Aibreán 2020 lena bhforchuirtear dleachtanna cinntitheacha frithdhumpála ar allmhairí d’fhabraicí snáithíní gloine fite agus/nó fuaite áirithe de thionscnamh Dhaon-Phoblacht na Síne agus na hÉigipte (IO L 108, 6.4.2020, lch. 1)

(8)  Doiciméad Inmheánach Oibre de chuid an Choimisiúin maidir le Saobhadh Suntasach i nGeilleagar Dhaon-Phoblacht na Síne chun Críoch Imscrúduithe Cosanta Trádála, an 20 Nollaig 2017, SWD(2017) 483 final/2, ar fáil faoi: https://trade.ec.europa.eu/doclib/docs/2017/december/tradoc_156474.pdf.

(9)  https://eur-lex.europa.eu/legal-content/EN/TXT/?uri=CELEX%3A52020XC0316%2802%29

(10)  Is ionann gach tagairt d’fhoilsiú an Fhógra seo agus tagairt d’fhoilsiú an Fhógra seo in Iris Oifigiúil an Aontais Eorpaigh, ach amháin má shonraítear a mhalairt.

(11)  Is éard is táirgeoir ann aon chuideachta sa tír lena mbaineann a tháirgeann an táirge faoi athbhreithniú, lena n-áirítear aon cheann dá chuideachtaí gaolmhara a bhfuil baint aici le táirgeadh, díolacháin náisiúnta nó onnmhairí an táirge faoi athbhreithniú.

(12)  Ní féidir ach allmhaireoirí nach bhfuil gaol acu leis na táirgeoirí sa tír lena mbaineann a shampláil. Ní mór d’allmhaireoirí atá gaolmhar le táirgeoirí Iarscríbhinn I a ghabhann leis an gceistneoir le haghaidh na dtáirgeoirí sin a líonadh isteach. I gcomhréir le hAirteagal 127 de Rialachán Cur Chun Feidhme (AE) 2015/2447 ón gCoimisiún an 24 Samhain 2015 lena leagtar síos rialacha mionsonraithe maidir le forálacha áirithe de Rialachán (AE) Uimh. 952/2013 ó Pharlaimint na hEorpa agus ón gComhairle lena leagtar síos Cód Custaim an Aontais a chur chun feidhme, measfar beirt a bheith gaolmhar: (a) más oifigeach nó stiúrthóir duine acu i ngnólacht an duine eile; (b) más comhpháirtithe gnó iad a bhfuil aitheantas dlíthiúil acu; (c) más fostóir agus fostaí iad; (d) más le tríú páirtí 5 % nó níos mó de na stoic nó de na scaireanna le cearta vótála de chuid na beirte acu, nó má rialaíonn nó má choinníonn tríú páirtí iad, go díreach nó go hindíreach; (e) má stiúrann ceann amháin acu an ceann eile go díreach nó go hindíreach; (f) má tá an dá cheann acu faoi stiúradh díreach nó indíreach ag tríú páirtí; (g) má rialaíonn siad tríú duine go díreach nó go hindíreach le chéile; nó (h) gur baill den teaghlach céanna iad (IO L 343, 29.12.2015, lch. 558). Ní mheasfar daoine a bheith den teaghlach céanna ach amháin má tá siad in aon ghaol acu seo a leanas le chéile: (i) fear céile agus bean chéile, (ii) tuismitheoir agus leanbh, (iii) deartháir agus deirfiúr (más ionann athair agus máthair dóibh nó más ionann tuismitheoir amháin dóibh), (iv) seantuismitheoir agus garleanbh, (v) uncail nó aintín agus nia nó neacht, (vi) tuismitheoir céile agus cliamhain nó banchliamhain, (vii) deartháir céile agus deirfiúr chéile. I gcomhréir le hAirteagal 5(4) de Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais, ciallaíonn “duine” duine nádúrtha, duine dlítheanach agus aon chomhlachas daoine nach duine dlítheanach é ach a n-aithnítear faoi dhlí an Aontais nó faoin dlí náisiúnta go bhfuil an inniúlacht aige gníomhartha dlí a dhéanamh (IO L 269, 10.10.2013, lch. 1).

(13)  Féadfar na sonraí a chuireann allmhaireoirí neamhghaolmhara ar fáil a úsáid freisin i ndáil le gnéithe den imscrúdú sin seachas an dumpáil a chinneadh.

(14)  I gcás fadhbanna teicniúla, is féidir teagmháil a dhéanamh leis an Deasc Seirbhíse Trádála trí ríomhphost a sheoladh chuig trade-service-desk@ec.europa.eu nó ar an nguthán + 32 22979797.

(15)  Is éard is doiciméad “Íogair” ann doiciméad a meastar é a bheith rúnda de bhun Airteagal 19 den bhun-Rialachán agus Airteagal 6 de Chomhaontú EDT maidir le cur chun feidhme Airteagal VI de GATT 1994 (An Comhaontú Frithdhumpála). Is doiciméad é freisin atá cosanta de bhun Airteagal 4 de Rialachán (CE) Uimh. 1049/2001 ó Pharlaimint na hEorpa agus ón gComhairle (IO L 145, 31.5.2001, lch. 43).

(16)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh 1247/2002/CE (IO L 295, 21.11.2018, lch. 39).

Réamhfhógra faoi chomhchruinniú

(Cás M.10634 – CVC / GAMING1)

Cás a d’fhéadfaí a chur faoin nós imeachta simplithe

(Téacs atá ábhartha maidir le LEE)

(2022/C 167/07)

---

(1)  IO L 24, 29.1.2004, lch. 1 (an “Rialachán um Chumaisc”).

Réamhfhógra faoi chomhchruinniú

(Cás M.10571 – HSBC SINGAPORE / TEMASEK / JV)

Cás a d’fhéadfaí a chur faoin nós imeachta simplithe

(Téacs atá ábhartha maidir le LEE)

(2022/C 167/08)

---

(1)  IO L 24, 29.1.2004, lch. 1 (an “Rialachán um Chumaisc”).

(2)  IO C 366, 14.12.2013, lch. 5.

Réamhfhógra faoi chomhchruinniú

(Cás M.10645 – ETEX / XI (INSMAT) HOLDINGS)

Cás a d’fhéadfaí a chur faoin nós imeachta simplithe

(Téacs atá ábhartha maidir le LEE)

(2022/C 167/09)

---

(1)  IO L 24, 29.1.2004, lch. 1 (an “Rialachán um Chumaisc”).

(2)  IO C 366, 14.12.2013, lch. 5.

Foilsiú teachtaireachta maidir le formheas leasaithe chaighdeánaigh le sonraíocht táirge i ndáil le hainm in earnáil an fhíona dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún

(2022/C 167/10)

Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).

TEACHTAIREACHT MAIDIR LE LEASÚ CAIGHDEÁNACH AG ATHRÚ AN DOICIMÉID AONAIR

“Vallegarcía”

PDO-ES-02085-AM01

Dáta na cumarsáide: 25.1.2022

TUAIRISC AR AN LEASÚ FORMHEASTA AGUS AR NA CÚISEANNA INA LEITH

1.   Ailíniú na téarmaíochta a úsáidtear le haghaidh an pharaiméadair anailísigh le haghaidh “siúcra iarmharach” leis an reachtaíocht i bhfeidhm.

TUAIRISC:

Athainmníodh an paraiméadar anailíseach le haghaidh “siúcra iarmharach” go “siúcra iomlán arna shloinneadh mar ghlúcós agus fruchtós”.

Baineann an leasú seo le pointe 2.1.1 den tsonraíocht táirge agus ní leis an doiciméad aonair.

Oiriúnaítear leis an leasú an téarmaíocht a úsáidtear le haghaidh na saintréithe fisiceacha agus ceimiceacha. Ní dhéanann sé aon athrú ar an táirge deiridh, a choimeádann na saintréithe agus an phróifíl arb iad is toradh leis an idirghníomhaíocht idir tosca nádúrtha agus daonna, mar a thugtar tuairisc air sa nasc. Measaimid dá bhrí sin gur leasú caighdeánach é, ós rud é nach gcomhfhreagraíonn sé d’aon cheann de na cineálacha a liostaítear in Airteagal 14(1) de Rialachán Tarmligthe (AE) 2019/33.

CÚISEANNA:

Rinneamar an leasú seo chun Airteagal 20 de Rialachán Cur Chun Feidhme (AE) 2019/34 ón gCoimisiún an 17 Deireadh Fómhar 2018, ina sonraítear nach mór na siúcraí iomlána arna shloinneadh i dtéarmaí fruchtóis agus glúcóis a thomhas.

2.   Athbhreithniú ar na paraiméadair anailíseacha

TUAIRISC:

An íosteorainn datha le haghaidh fíonta dearga a laghdaítear ó 12 go 10 AU.

Leasaíodh pointí 2 agus 7 den tsonraíocht táirge agus pointe 8 den doiciméad aonair dá réir.

Ní dhéanann an leasú seo aon athrú ar an táirge deiridh, a choimeádann na saintréithe agus an phróifíl mar thoradh an idirghníomhaíocht idir tosca nádúrtha agus daonna, mar a thugtar tuairisc air sa nasc. Measaimid dá bhrí sin gur leasú caighdeánach é, ós rud é nach gcomhfhreagraíonn sé d’aon cheann de na cineálacha a liostaítear in Airteagal 14(1) de Rialachán Tarmligthe (AE) 2019/33.

CÚISEANNA:

Fásann cineálacha difriúla fíonchaor le chéile sa limistéar táirgthe le haghaidh “Vallegarcía” DO. Ar thaobh amháin, tá Cabernet Sauvignon ann, a dhéanann fíonta go nádúrtha ag a mbíonn poitéinseal datha an-ard, ach, ar thaobh eile, tá Monastrell agus Garnacha Tinta ann, a dhéanann fíonta níos boige ar a mbíonn déine datha mheánach.

Go ginearálta, le deich mbliana anuas, tá na margaí ag éileamh fíonta níos torthaíche, a mheallann glúine nua de thomhaltóirí atá ag dul i dtaithí ar fhíon.

Ní mór go mbeadh na huirlisí riachtanacha ag fíoneolaithe chun fíonta a tháirgeadh atá mealltach do mhargaí náisiúnta agus idirnáisiúnta, ach ag an am céanna ag coinneáil na saintréithe atá iontu de bharr an limistéir táirgthe agus na gcineálacha.

Laghdú ar theorainn na déine íosta datha le haghaidh fíonta dearga, ní chuireann sé isteach ar an gcáilíocht; go contrártha, leathnaíonn sé an raon roghanna a sholáthraíonn na cineálacha difriúla fíonchaor sa limistéar, agus mar sin is féidir fíonta níos fíneálta, casta agus mealltaí a tháirgeadh.

Toisc go luaitear an déine datha agus teorainn na déine datha sa roinn ar an nasc, b’éigean an fhoclaíocht sin a leasú freisin de thoradh an athraithe ar an teorainn.

3.   Cineálacha a chur leis

TUAIRISC:

Cuireadh na cineálacha fíonchaor a leanas a úsáidtear chun na fíonta a dhéanamh leis an tsonraíocht táirge. Garnacha Tinta, Mazuela nó Cariñena agus Monastrell.

Leasaíodh pointe 6 den tsonraíocht táirge agus pointe 7 den doiciméad aonair dá réir.

Ní dhéanann an leasú seo aon athrú ar an táirge deiridh, a choimeádann na saintréithe agus an phróifíl mar thoradh an idirghníomhaíocht idir tosca nádúrtha agus daonna, mar a thugtar tuairisc air sa nasc. Measaimid dá bhrí sin gur leasú caighdeánach é, ós rud é nach gcomhfhreagraíonn sé d’aon cheann de na cineálacha a liostaítear in Airteagal 14(1) de Rialachán Tarmligthe (AE) 2019/33.

CÚISEANNA:

Fástar na cineálacha thuasluaite in Vallegarcía le roinnt blianta anuas, agus tá sé léirithe go ndéanann na cineálacha sin fíonta ar ardchaighdeán. Tá an coiste blaiste le haghaidh “Vallegarcía” DO i mbun faireachán a dhéanamh ar fhorbairt agus cáilíocht na bhfíonta sin ar feadh na mblianta. Tá sé léirithe go ndéanann na cineálacha fíonchaora fíonta a choimeádann an cháilíocht a éilíonn ár sonraíocht, a chiallaíonn gur féidir iad a áireamh i measc na gcineálacha a cheadaítear le haghaidh “Vallegarcía” DO.

DOICIMÉAD AONAIR

1.   Ainm an táirge

Vallegarcía

2.   Cineál táisc gheografaigh

STFC – Sonrúchán Tionscnaimh Faoi Chosaint

3.   Catagóirí táirgí fíniúna

1.

Fíon

4.   Tuairisc ar an bhfíon nó ar na fíonta

1.   Fíon bán

TUAIRISC THÉACSÚIL GHAIRID

Fíon bán le dath dian buí agus torthaí cloiche, torthaí trópaiceacha agus dea-bholaithe de bhláth bán ar dhéine mheán-ard. Dea-bholaithe de luibheanna – labhandar, marós – sa chúlra, agus críoch thóstáilte. Ionsaí bog, ungthach, gan aon imill, úr agus corr. Aoibhiúil ar an meán-charball le dea-bholaithe de thorthaí cloiche agus críoch thóstáilte agus leath-shearbh.

*	Ní mór an neart alcóil iomlán uasta de réir toirte a bheith laistigh de na teorainneacha dlíthiúla a leagtar síos i reachtaíocht ábhartha an Aontais.

Saintréithe anailíseacha ginearálta
Neart alcóil iomlán uasta (de réir % toirte)
Neart alcóil iarbhír íosta (de réir % toirte)	12,5
Aigéadacht iomlán íosta	4,1 gram in aghaidh an lítir, arna shloinneadh mar aigéad tartarach
Aigéadacht luaineach uasta (i milleachoibhéisí in aghaidh an lítir)	12,5
Dé-ocsaíd sulfair iomlán uasta (i milleagraim in aghaidh an lítir)	160

2.   Fíon dearg

TUAIRISC THÉACSÚIL GHAIRID

Fíon dearg ar a bhfuil dath tréan dearg, le himeall gairnéad nó rúibín-gairnéad agus róba maith. Déine mheán-ard, torthaí dearga agus scrobarnach Mheánmhara agus dea-bholaithe mianraí nó tadhall balsamach labhandair nó dea-bholaithe d’adhmad tóstáilte. Corr, le hionsaí éasca, cothrom, cuíosach tainneach.

*	Ní mór an neart alcóil iomlán uasta de réir toirte a bheith laistigh de na teorainneacha dlíthiúla a leagtar síos i reachtaíocht ábhartha an Aontais.

Saintréithe anailíseacha ginearálta
Neart alcóil iomlán uasta (de réir % toirte)
Neart alcóil iarbhír íosta (de réir % toirte)	12
Aigéadacht iomlán íosta	4,2 gram in aghaidh an lítir, arna shloinneadh mar aigéad tartarach
Aigéadacht luaineach uasta (i milleachoibhéisí in aghaidh an lítir)	20
Dé-ocsaíd sulfair iomlán uasta (i milleagraim in aghaidh an lítir)	150

5.   Cleachtais maidir le fíonóireacht

5.1.   Cleachtais fhíoneolaíocha shonracha

1.   Cleachtas saothraithe

Buaintear na fíonchaora go hiomlán de lámh agus cuirtear i gciseanna iad. Sórtáiltear ar dtús iad san fhíonghort nuair a ghearrtar na táthanna agus den dara huair ar an mbord sórtáilte sa bhá faighte fíonchaor san fhíonlann.

2.   Srianadh ábhartha maidir leis na fíonta a dhéanamh

Faightear na fíonchaora ag leibhéal os cionn ionraon uachtarach an umair, rud a chiallaíonn nach bhfuil aon bhrú sa phíobú agus tá na fíonchaora faoi réir cóireáil nach bhfuil chomh crua sin.

Le linn tancála, téann an laíon trí mhalartóir teasa, agus íslítear an teocht. Fágann sé sin an t-umar fuar ar feadh tréimhse ama a d’fhéadfadh athrú de réir dhiscréid na foirne fíoneolaithe, más gá. Mar gheall ar an tanú réamhchoipthe sin is féidir na dea-bholaithe go léir atá sna fíonchaora a bhaint agus tuaslagán uiscí a dhéanamh díobh, rud a dhéanann an dath níos forasta.

Tar éis próiseas an tanaithe fhuair, brúitear na fíonchaora bána agus neadaítear an úrfhíon a fhaightear as go bhfaightear moirtiúlacht iomchuí de 400-800 NTU. Nuair a thosaíonn an coipeadh, aistrítear cion athraitheach den úrfhíon chuig dair-bhairillí Francacha neamhúsáidte, áit a gcoipeann sé agus a dtugtar chun cineáil é ar an moirt ar feadh 4-6 mhí. Úsáidtear giosta nádúrtha agus giosta roghnaithe i gcoipeadh alcólach na bhfíonta bána agus dearga. Coipeann na fíonta bána ag teochtaí ísle: 15 oC ar a laghad, 26 oC ar a mhéad. Caithfear cion na húrfhíona atá ag coipeadh sna bairillí a chur san áireamh freisin. Coiptear na fíonta dearga ag teocht 15 oC ar a laghad agus ag teocht 30 oC ar a mhéad. Bíonn na hamanna tancála agus tanaithe difriúil de réir mheasúnaithe teicniúla na foirne fíoneolaithe ach idir 7 agus 28 lá a bhíonn i gceist.

3.   Srianadh ábhartha maidir leis na fíonta a dhéanamh

Scoitear na fíonta dearga de lámh. Téann an marc isteach i bpreas neomatach trí dhomhantarraingt, gan caidéil a úsáid, agus aistrítear é go bairillí úsáidte go dtí an blaiseadh. Nuair a fhaightear gach cineál fíona, idir shaor-rith agus bhrúite, agus tá coipeadh malalachtach réidh, blaiseann an coiste fíoneolaithe de na fíonta go léir agus ullmhaítear na cumaisc dhifriúla. Tugtar chun cineáil iad ansin i ndair-bhairillí Francacha.

Tugtar na fíonta chun cineáil sa bhuidéal ar feadh tréimhsí ama éagsúla sula gcuirtear ar an margadh iad.

5.2.   Uastáirgeacht

1.	Viognier, Cabernet Franc, Garnacha Tinta, Mazuela nó Cariñena agus cineálacha Monastrell 11 500 cileagram fíonchaor in aghaidh an heicteáir

2.	75 heictilítear in aghaidh an heicteáir

3.	Cineál Syrah 9 250 cileagram fíonchaor in aghaidh an heicteáir

4.	60 heictilítear in aghaidh an heicteáir

5.	Cineálacha Merlot agus Cabernet Sauvignon 8 500 cileagram fíonchaor in aghaidh an heicteáir

6.	55 heictilítear in aghaidh an heicteáir

7.	Cineál Petit Verdot 14 600 cileagram fíonchaor in aghaidh an heicteáir

8.	95 heictilítear in aghaidh an heicteáir

6.   Limistéar geografach críochaithe

Tá an limistéar geografach ionann le beart cadastrach 448 i zón 9 de bhardas Retuerta del Bullaque, atá lonnaithe i gcúige Ciudad Real. Cumhdaítear1 521 heicteár.

7.   Príomhchineál(acha) fíonchaor

CABERNET FRANC

CABERNET SAUVIGNON

GARNACHA TINTA

MAZUELA – CARIÑENA

MERLOT

MONASTRELL

PETIT VERDOT

SYRAH

VIOGNIER

8.   Tuairisc ar an nasc, ar na naisc

8.1.   Timpeallacht (tosca nádúrtha agus daonna)

Tá tréithe an limistéir gheografaigh ag a mbíonn tionchar tábhachtach ar cháilíocht na bhfíonta mar a leanas:

a)

An tsubstráit gheografach ar a bhfuil an fíonghort curtha, ar a dtugtar Raña del Fresno, is foirmíocht í atá uathúil sa domhan agus nach bhfaightear ach sa limistéar seo. Mar thoradh air sin, na fíonchaora a fhástar sa limistéar, bíonn roinnt saintréithe uathúla acu (déine mhór, cáilíocht dea-bholaidh agus fada ar an gcarball). Thairis sin, tá ard-aigéadacht agus pH íseal ithreacha Vallegarcía neamhghnách i gcomparáid le limistéir aeráide chomhchosúla. Is fíonghort é Vallegarcía atá curtha in ithreacha a bhfuil aicmiú eidifeolaíochta uathúil acu i gcomparáid le fíonghoirt eile Castile-La Mancha. I dtionscadal taighde a rinne Ollscoil Castile-La Mancha (UCLM) dar teideal “ Winegrowing soils in Castile-La Mancha: influence on the composition of the grape”, aicmíodh na próifílí ar a ndearnadh staidéar in Vallegarcía mar Typic Palexerult de réir na Tacsanomaíochta Ithreach (Foireann Suirbhé Ithreach, 2006) agus aimsíodh go raibh an t-ordú Ultasail tipiciúil d’ithreacha raña (Vidal et al., 2004). As na hithreacha ina bhfástar fíon ar a ndearnadh staidéar sa tionscadal taighde, níor bhain ach na trí phróifíl Vallegarcía leis an ordú seo. Faoi chóras aicmithe FAO (2007), aicmíodh P1, P2 agus P3 – na trí phróifíl a anailísíodh i dtuarascáil UCLM – mar Alisol Cúitine (Feireach, Crómach), Alisol Cúitine (Feireach, Cnámharlaigh) agus Alisol Cúitine (Feireach, Cnámharlaigh) faoi seach. Thairis sin, déanann an éagsúlacht leathan i pH na n-ithreacha uathúil iad. Ag féachaint ar pH gach próifíle, is é an chéad rud a sheasann amach ná an éagsúlacht shuntasach idir luachanna pH. Léirítear é sin i leibhéil pH na bhfíonta agus a gcothromaíocht ar an gcarball. Ní thagann an cion íseal cailciam agus an cion ard silice, iarainn agus alúmanaim ar chor ar bith le saintréithe na n-ithreacha ina bhfástar fíon in Castile-La Mancha. Tá sé suimiúil na leibhéil sin a chur i gcomparáid le leibhéil ithreacha aolchloiche an limistéir, a úsáidtear de ghnáth chun fíniúnacha a fhás. De réir sonraí ó Amorós et al. (2012b), tá cion cailciam ithreacha Vallegarcía an-difriúil leis na leibhéil a aimsítear i sraitheanna barrithreach d’ithreacha aolchloiche (10,4 g•kg-1 in aghaidh 230 g•kg-1). Os a choinne sin, tá na leibhéil sileacain (345,9 g•kg-1) agus iarainn (26,5 g•kg-1) i bhfad níos airde in ithreacha an limistéir chríochaithe i gcomparáid le hithreacha aolchloiche Castile-La Mancha ina bhfástar fíon (127.5 agus 16,65 g•kg-1 faoi seach). Tá an leibhéal alúmanaim atá i láthair i sraith barrithreach na hithreach aolchloiche ag thart 33,4 g•kg-1, agus tá an leibhéal in ithir Vallegarcía ag 57,8 g•kg-1. Saintréith d’fhíonta Vallegarcía is ea cion cailciam íseal na hithreach agus tugann sé saintréith dhifriúil le fíonta eile Castile-La Mancha dóibh. Is fiú trácht ar an mheán-chainníocht ard dúl a aicmítear mar dhúile tearcithreach (ceiriam, lantanam agus neoidimiam) in ithir Vallegarcía (83,5, 44,5 agus 36,5 mg•kg-1 faoi seach) i gcomparáid leis na meán-leibhéil go réigiúnach (57,7, 23,5 agus 21,6 mg•kg-1 faoi seach) agus go domhanda (55, 35,5 agus 30,5 mg•kg-1 faoi seach). Go ginearálta, bíonn leibhéil na ndúl sin níos airde in ithreacha aigéadacha ná in ithreacha aolchloiche (Amorós et al., 2012a).

b)

Tionchar abhainn Bullaque agus na sruthanna a théann isteach ann, a théann timpeall ar an limistéar críochaithe, úire na ngleannta agus an chosaint ar na gaoithe aduaidh a thugann na sléibhte – cruthaíonn siad sin miocraeráid don fhíonghort a mhaolaíonn an adhaimsir sa gheimhreadh agus sa samhradh araon. Téann sé sin chun leasa d’aibíocht cheart agus iomlán na bhfíonchaor.

c)

An raon leathan teochta atá ann idir lá agus oíche, de bharr airde Vallegarcía os cionn leibhéal na farraige, i gcomhar leis an líon ard báistí sa limistéar i gcomparáid le háiteanna eile sa réigiún, cuidíonn siad le struchtúr tainneach iontach a thabhairt do na fíonchaora a mhéadaíonn oiriúnacht na bhfíonta lena dtabhairt chun cineáil sa bhairille agus sa bhuidéal.

8.2.   Tuairisc ar an bhfíon

Saintréith d’fhíonta Vallegarcía is ea a gcruinne agus a n-easpa imeall. Tá struchtúr tainneach iontach acu freisin a thugann inniúlacht eisceachtúil dóibh chun athrú agus fanacht úr le himeacht ama. Féadann siad luachanna polaifeanóil níos nó ná 50 meq/l agus déine datha níos mó ná 10 AU a fháil.

Sainítear déine agus cáilíocht dea-bholaidh na bhfíonta atá ag scrobarnach dhian Mheánmhara (rós carraige, fraoch) agus dea-bholaithe balsamacha (tím, marós, labhandar), chomh maith le hardleibhéal mianraí (scláta dubh, grianchloichít). Fágann siad athbhlas searbh ar chúl na scornaí a fhadaíonn blas an fhíona.

8.3.   Nasc

A) An tsubstráit gheografach ar a bhfuil an fíonghort curtha, ar a dtugtar raña, is foirmíocht í atá uathúil sa domhan. Tá aigéadacht ard agus pH íseal ithreacha an limistéir chríochaithe neamhghnách freisin. Fágann an meascán sin athbhlas searbh ar chúl na scornaí a fhadaíonn blas an fhíona.

Úire na ngleannta agus an chosaint ar na gaoithe aduaidh a thugann na sléibhte, bíonn tionchar maolaithe acu agus cuidíonn siad le cruinne agus easpa imeall a thabhairt do na fíonta. An raon leathan teochta atá ann idir lá agus oíche, de bharr airde an limistéir chríochaithe os cionn leibhéal na farraige, i gcomhar leis an líon ard báistí, cuidíonn siad le struchtúr tainneach iontach a thabhairt do na fíonchaora trína féidir leis na fíonta luachanna polaifeanóil a fháil atá níos mó ná 50 meq/l agus déine datha atá níos mó ná 10 AU.

Cé go bhfuil limistéar “Castilla” PGI timpeall ar an limistéar críochaithe, tá a shaintréithe an-difriúil leis an limistéar críochaithe in aice láimhe dá mbarr seo a leanas:

TOSCA NÁDÚRTHA:

An tsubstráit gheografach ar a dtugtar raña, atá uathúil sa domhan agus a bhfuil a haigéadacht ard agus pH íseal mar shaintréith di, chomh maith le húire na ngleannta, an líon ard báistí agus an chosaint a thugann na sléibhte ar na gaoithe aduaidh – cruthaíonn siad miocraeráid atá an-difriúil leis an limistéar in aice láimhe.

An éagsúlacht leathan in pH na sraitheanna barrithreach agus fo-ithreach, le héagsúlacht uasta de 4,1 pointe i bpróifíl 2 (pH = 8,9 in Ap agus pH = 4,8 in Btg1), chomh maith leis an gcion cailciam íseal, an cion ard silice, iarainn agus alúmanaim, agus láithreacht cainníochta móra de dhúile tearcithreach, sin a dhéanann Vallegarcía difriúil leis an gcuid eile de Castile-La Mancha.

TOSCA DAONNA:

Is iad seo a leanas na difríochtaí is soiléire idir an modh táirgthe d’fhíonta “Vallegarcía” agus iad siúd a úsáidtear sna limistéir in aice láimhe, atá cumhdaithe ag TGFC “Castilla”:

“CASTILLA” PGI	VALLEGARCÍA	DÍFRÍOCHTAÍ
Fíonta bána: ≥ 9 % toirte	≥ 12 % toirte	Ábhar alcóil níos airde
Fíonta dearga: ≥ 10 % toirte	≥ 12 % toirte	Ábhar alcóil níos airde
Fíonta dearga: ≤ 18 meq/l	≤ 20 meq/l	Aigéadacht luaineach níos airde
Fíonta bána: ≤ 16 000  kg/ha	≤ 11 500  kg/ha	Táirgeadh níos lú in aghaidh an heicteáir
Fíonta dearga: ≤ 16 000  kg/ha	≤ 14 600  kg/ha	Táirgeadh níos lú in aghaidh an heicteáir
---	> 50 meq/l	Níos mó polaifeanól
---	> 10 AU	Níos mó datha

Rinneadh an limistéar a chríochú ar bhonn a thimpeallachta (an tsubstráit gheografach ar a dtugtar raña, lena haigéadacht ard agus pH íseal, chomh maith leis an gcosaint a fhaightear ó na sléibhte). Tá fíonlann amháin ag táirgeadh fíona sa limistéar, atá faoi úinéireacht an iarratasóra.

Ba cheart a thabhairt san áireamh go gcumhdaíonn an limistéar críochaithe 1 521 heicteár agus gur leis an t-iarratasóir na fíniúnacha agus na fíonlanna ar fad atá ann.

Thairis sin, féadfaidh táirgeoirí eile an t-ainm cláraithe a úsáid má bhunaíonn siad iad féin sa i limistéar críochaithe geografach amach anseo, ar choinníoll go gcomhlíonann siad na coinníollacha a leagtar amach sa tsonraíocht. Tá an cás sin go hiomlán féideartha mar go gcumhdaíonn an limistéar críochaithe 1 521 heicteár agus mar sin de, tá spás ann le haghaidh níos mó fíonlann.

9.   Coinníollacha breise fíor-riachtanacha (pacáistiú, lipéadú, ceanglais eile)

Creat dlíthiúil:

Sa reachtaíocht náisiúnta

Cineál dála breise:

Pacáistiú laistigh den limistéar geografach críochaithe

Tuairisc ar na dálaí:

Caithfear na fíonta a bhuidéalú sa limistéar táirgthe mar i ngach cás tugtar an próiseas i gcrích leis an dara céim den fhíon a thabhairt chun cineáil i mbuidéil. Tarlaíonn próiseas laghdaithe sa tréimhse seo, rud a fheabhsaíonn cáilíocht na bhfíonta agus a chuireann corr ar a mblas. Tá siad réidh le hól nuair atá na saintréithe orgánaileipteacha acu a leagtar amach sna sonraíochtaí le haghaidh gach cineáil fíona.

Nasc chuig an tsonraíocht táirge

http://pagina.jccm.es/agricul/paginas/comercial-industrial/consejos_new/pliegos/AM_01_PC_Vallegarcia_20210820.pdf

---

(1)  IO L 9, 11.1.2019, lch. 2.