Fógra Folúntais CONS/AD/153/19

(2020/C 003 A/01)

Roinn	AS TREE: Iompar, Fuinneamh, Comhshaol, Oideachas
Áit oibre	An Bhruiséil, áras Justus Lipsius
Teideal an phoist	An tArd-Stiúrthóir
Grúpa feidhme agus grád	AD 15
An t-imréiteach slándála atá riachtanach	SECRET UE/EU SECRET
SPRIOCDHÁTA LE hAGHAIDH IARRATAS	3 Feabhra 2020 - 12.00 meán lae (am na Bruiséile)

Cé muidne

Cuidíonn Ardrúnaíocht na Comhairle (ARC) leis an gComhairle Eorpach, le Comhairle an Aontais Eorpaigh agus lena gcomhlachtaí ullmhúcháin i ngach réimse a bhaineann lena ngníomhaíochtaí. Cuireann sí comhairle agus tacaíocht ar fáil do chomhaltaí na Comhairle Eorpaí agus don Chomhairle agus dá nUachtaráin i ngach réimse gníomhaíochta, lena n-áirítear comhairle faoi bheartais agus comhairle dhlíthiúil, comhordú le hinstitiúidí eile, comhréitigh a fhorbairt, dréachtú chomh maith leis na nithe uile is gá chun dea-ullmhúchán a dhéanamh don Chomhairle Eorpach agus don Chomhairle agus chun go mbeidh siad á reáchtáil mar is cuí.

Faoi láthair, tá dhá stiúrthóireacht in Ard-Stiúrthóireacht “Iompar, Fuinneamh, Comhshaol, Oideachas” (AS TREE): TREE.1, bítear ag plé leis an gComhshaol, Oideachas, an Óige, Cultúr, Closamharc agus Spórt; agus TREE 2, ina mbítear ag plé le hIompar, Teileachumarsáid agus Fuinneamh.

Is faoin Ard-Stiúrthóireacht atá sé an t-eagrúchán d'fhoirmíochtaí éagsúla den Chomhairle a chomhordú, “an Comhshaol”, “Iompar, Teileachumarsáid agus Fuinneamh” agus “Oideachas, an Óige, Cultúr agus Spórt”, a thagann le chéile timpeall ceithre huaire in aghaidh na bliana. Is é Coreper agus roinnt meithleacha a bhíonn ag déileáil le comhaid reachtacha agus neamhreachtacha araon, chomh maith le caidreamh idirnáisiúnta, a ullmhaíonn cruinnithe seo na Comhairle.

Ár dtairiscint

Post dúshlánach i dtimpeallacht spéisiúil ó thaobh na polaitíochta de is ea post an Ard-Stiúrthóra in AS TREE, agus bheifí i gceannas ar fhoireann de 51 ball foirne ardcháilithe.

Faoi údarás an Ardrúnaí agus i gcomhar le beirt Stiúrthóirí TREE, déanfaidh tú an Ard-Stiúrthóireacht agus acmhainní na hArd-Stiúrthóireachta a bhainistiú ar bhealach gairmiúil, eagróidh tú a cuid gníomhaíochtaí, tacóidh tú leis an bhfoireann agus spreagfaidh tú iad agus iad i mbun a gcuid oibre. Déanfaidh tú straitéis agus clár oibre na hArd-Stiúrthóireachta a fhorbairt agus a chur i bhfeidhm, saineoidh tú a cuid cuspóirí, agus cinnteoidh tú go mbainfear amach iad de réir pé spriocdhátaí agus caighdeáin cháilíochta a bheidh i gceist. Cothóidh tú cumarsáid éifeachtach agus comhar éifeachtach laistigh den Ard-stiúrthóireacht agus leis na hArd-stiúrthóireachtaí eile agus le seirbhísí eile Ardrúnaíocht na Comhairle chomh maith.

Cuirfidh tú comhairle ardleibhéil i ndáil le beartais agus nósanna imeachta ar fáil, ó bhéal agus i scríbhinn, don Chomhairle Eorpach, don Chomhairle, do Coreper agus dá nUachtaránachtaí agus don Ardrúnaí faoi ghnéithe uile na sainchomhad a thagann faoi chuimsiú na hArd-Stiúrthóireachta, beidh tú rannpháirteach i gcruinnithe agus, i gcás inarb iomchuí, i seisiúin eolais agus/nó i gcaibidlíocht d'fhonn teacht ar chomhréitigh agus réitigh a aimsiú. Sa chomhthéacs sin, tabharfaidh tú cúnamh don Uachtaránacht sa chaibidlíocht agus áiritheoidh tú go mbeidh cumarsáid agus comhar éifeachtach ann le hinstitiúidí, gníomhaireachtaí agus comhlachtaí eile de chuid an Aontais i réimsí atá faoi chuimsiú shainordú na hArd-Stiúrthóireachta.

Cinnteoidh tú go ndéanfar comhordú straitéiseach foriomlán, lena n-áirítear le hArd-stiúrthóireachtaí eile maidir leis na beartais agus na cuspóirí atá le baint amach.

Beidh tú féin agus d'fhoireann bainistíochta in ann obair a phleanáil agus a eagrú ar bhealach solúbtha, faoi réir uaireanta oibre agus sceideal na gcruinnithe i réimsí gníomhaíochta na hArd-Stiúrthóireachta. Beidh tú féin is an fhoireann in ann leas a bhaint as socruithe oibre solúbtha Ardrúnaíocht na Comhairle, lena n-áirítear teilea-oibriú. Rachaidh tú ar mhisin thar lear, misin lasmuigh den Aontas Eorpach san áireamh (caithfear dul ar thuairim is 15 misean sa bhliain ar an meán).

An té atá uainn

Táimid ag lorg bainisteoir a bhfuil taithí shuntasach aige nó aici ar cheapadh beartais an Aontais agus ar phróiseas reachtach an Aontais chomh maith le heolas fairsing ar shaincheisteanna institiúideacha an Aontais. Bheadh eolas ar na réimsí atá faoi chumhdach na hArd-Stiúrthóireachta ina bhuntáiste.

Mar bhainisteoir de chuid Ardrúnaíocht na Comhairle, beifear ag súil go gcuirfidh tú comhairle orthu siúd atá i gceannas agus ar na geallsealbhóirí, go ndéanfaidh tú an fhoireann agus na hacmhainní airgeadais a bhainistiú, agus go ndéanfaidh tú ionadaíocht ar Ardrúnaíocht na Comhairle. Leagtar amach an méid sin i bpróifíl Ardrúnaíocht na Comhairle do bhainisteoirí cothrománacha, in Iarscríbhinn 1.

Ina theannta sin, beidh an méid a leanas ag teastáil ón té a cheapfar:

—	an cumas smaoineamh agus pleanáil go straitéiseach, fadhbanna a d'fhéadfadh teacht chun cinn a thuar agus a shainaithint, agus réitigh agus comhréitigh inoibrithe a mholadh agus réitigh agus comhréitigh inoibrithe a mholadh;

—	scileanna ceannaireachta agus a bheith in ann treoir a thabhairt, foireann a spreagadh agus a chumhachtú i dtimpeallacht idirnáisiúnta ilchultúrtha, agus béim láidir á leagan ar fhorbairt na foirne;

—	sárscileanna cumarsáide, lena n-áirítear scileanna cumarsáide idirphearsanta; an cumas cumas spiorad foirne láidir a chothú agus dea-chaidreamh oibre a chothabháil le réimse idirghabhálaithe inmheánacha agus seachtracha agus scileanna taidhleoireachta a léiriú;

—	an cumas athrú a bhainistiú agus tacaíocht a thabhairt don fhoireann nuair a bhíonn athrú i gceist;

—	cumas láidir obair fhoriomlán na hArd-Stiúrthóireachta a phleanáil agus a eagrú chun spriocdhátaí tábhachtacha a chomhlíonadh agus ualach oibre cothrom a áirithiú i measc na foirne, agus pleanáil comharbais;

—	an cumas comhaontuithe comhchoiteanna nó spriocanna comhchoiteanna a bhaint amach trí chomhairle spriocdhírithe a chur ar fáil do gheallsealbhóirí agus trí éascú éifeachtach agus cuiditheach a dhéanamh ar phléití i dtreo torthaí atá le leas gach duine.

Molann Ardrúnaíocht na Comhairle cultúr na soghluaisteachta dá bainisteoirí le go mbeidh taithí leathan acu, agus ba cheart go mbeadh na hiarrthóirí toilteanach agus ábalta dul i mbun oibre i réimsí éagsúla gníomhaíochta le linn a ngairmréime in Ardrúnaíocht na Comhairle.

BEARTAS EARCAÍOCHTA

Caithfidh na coinníollacha iontrála a leanas a bheith á gcomhlíonadh ag na hiarratasóirí tráth a mbeidh an t-iarratas á dhéanamh:

a)

Coinníollacha ginearálta — caithfidh siad a bheith ina náisiúnach de cheann de Bhallstáit an Aontais Eorpaigh; — caithfidh a gcearta iomlána mar shaoránaigh a bheith á dteachtadh acu; — caithfidh gach oibleagáid a chuirtear orthu faoi na dlíthe a bhaineann le seirbhís mhíleata a bheith comhlíonta acu.

b)

Coinníollacha sonracha — Céim ollscoile a bheith acu, is é is fearr a bhaineann leis an dlí, an eacnamaíocht, nó an eolaíocht pholaitiúil nó Eorpach (1); — taithí ghairmiúil 15 bliana ar a laghad a bheith acu ag tabhairt comhairle faoi bheartas agus leibhéal an-ard freagrachta i gceist; — taithí trí bliana ar a laghad a bheith acu ar ról bainistíochta sinsearaí i réimse bheartais an Aontais Eorpaigh; — ós rud é gurb iad an Béarla agus an Fhraincis a úsáidtear go forleathan don chumarsáid in Ardrúnaíocht na Comhairle agus le hinstitiúidí eile, tá eolas sármhaith ar cheann den dá teanga sin agus eolas maith ar an gceann eile ag teastáil. Is buntáiste é freisin go mbeadh teanga oifigiúil eile nó teangacha oifigiúla eile de chuid an Aontais acu.

NB:

(1)

Tá gá le himréiteach slándála don phost seo, lena gceadaítear rochtain ar dhoiciméid rúnaicmithe (go dtí leibhéal EU SECRET). Caithfidh na hiarrthóirí a chuirfidh isteach ar an bpost seo a bheith toilteanach dul faoi scagadh slándála faoi Chinneadh Uimh. 2013/488/AE ón gComhairle (2). Ní chuirfear ceapachán chun an phoist i bhfeidhm ach ar choinníoll go bhfuair an t-iarrthóir a roghnófar deimhniú bailí imréitigh slándála. Déanfar conradh sealadach a thairiscint d'iarrthóir gan imréiteach slándála go dtí go bhfaighfear toradh an nós imeachta um imréiteach slándála.

(2)	Ní mór don iarratasóir a n-éireoidh leis nó léi a bheith sásta páirt a ghlacadh in oiliúint Ardrúnaíocht na Comhairle do bhainisteoirí.

NÓTA

Ós rud é gur ainmníodh é seo mar phost íogair, d’fhéadfaí oibleagáid a chur ar an mball foirne atá sa phost athrú go post eile, tar éis tréimhse cúig bliana.

NÓS IMEACHTA ROGHNÚCHÁIN

Agus an t-iarrthóir rathúil á roghnú, cabhróidh bord comhairleach roghnúcháin leis an Údarás Ceapacháin. Beidh ionad measúnaithe ag an gcoiste comhairleach roghnúcháin, a bheidh á reáchtáil ag comhairleoirí seachtracha earcaíochta. Scoirfidh na tuarascálacha a chuirfidh an t-ionad measúnaithe le chéile de bheith bailí dhá bhliain tar éis an dáta a ndearnadh na cleachtaí ábhartha nó ar críochnaíodh an creatchonradh idir Ardrúnanaíocht na Comhairle agus an t-ionad measúnaithe atá i gceist – cibé dáta is luaithe.

Déanfaidh an bord comhairleach roghnúcháin cáilíochtaí, taithí agus spreagthacht na n-iarratasóirí go léir a mheas agus a chur i gcomparáid le chéile ar dtús, ar bhonn a n-iarratas. Bunaithe ar an measúnú comparáideach sin, déanfaidh an bord comhairleach roghnúcháin gearrliosta de na hiarrthóirí is oiriúnaí, dar leis, chun cuireadh a fháil chuig an gcéad agallamh. Toisc gur ar mheasúnú comparáideach na n-iarratas a bhíonn an chéad roghnú sin bunaithe, ní hionann ceanglais an fholúntais seo a chomhlíonadh agus ráthaíocht go bhfaighfear cuireadh chuig an gcéad agallamh. As measc na n-iarrthóirí a chuirfear faoi agallamh, déanfaidh an coiste comhairleach roghnúcháin na hiarrthóirí a réamhroghnú a fhreastalóidh ar ionad measúnaithe agus a fhreastalóidh ina dhiaidh sin ar an dara hagallamh leis an gcoiste comhairleach roghnúcháin.

Seo a leanas an phleanáil shealadach maidir le hiarrthóirí a roghnú:

—	táthar ag súil go gcuirfear na hiarrthóirí a roghnófar chun agallaimh ar an eolas sa dara leath de mhí Feabhra 2020;

—	beartaítear go mbeidh na chéad agallaimh ar siúl ag tús mhí an Mhárta 2020;

—	meastar go mbeidh imeachtaí ar siúl san ionad measúnaithe faoi thús mhí an Mhárta 2020;

—	beartaítear go mbeidh an dara babhta agallamh ar siúl faoi dheireadh mhí an Mhárta/tús mhí Aibreáin 2020.

AN BUNÚS DLÍ

I gcomhréir le hAirteagal 29(2) de Rialacháin Foirne Oifigigh an Aontais Eorpaigh (3) (post bainistíochta sinsearaí) a fhoilsítear an post seo.

Foilsíodh an post seo in institiúidí uile an Aontais Eorpaigh agus lasmuigh de na hinstitiúidí.

CONAS IARRATAS A DHÉANAMH

Is é an 3 Feabhra 2020, 12.00 meán lae (am na Bruiséile), an dáta deiridh chun iarratais a chur isteach.

Ní ghlacfar le hiarratais ach le ríomhphost agus ní mór iad a sheoladh chuig:applications.management@consilium.europa.eu (4) tráth nach déanaí ná an dáta deiridh. Ní chuirfear aon iarratas déanach san áireamh.

Ní mór an seoladh ríomhphoist thuasluaite a úsáid i gcás aon chomhfhreagras a bhaineann leis an nós imeachta roghnúcháin (ní mór an teideal seo a leanas a bheith luaite sa bhosca ina luaitear ábhar an ríomhphoist: CONS/AD/153/19 TREE)

Sula gcuirfear an t-iarratas isteach, ba cheart do na hiarrthóirí a sheiceáil go grinn an gcomhlíonann siad na critéir incháilitheachta go léir chun nach n-eiseofar as an nós imeachta roghnúcháin go huathoibríoch iad.

Ní mór na nithe seo a leanas a áireamh sna hiarratais chun go mbeidh siad bailí:

(a)	an fhoirm iarratais (Iarscríbhinn V) agus í comhlíonta mar is cuí agus dátaithe; is féidir teacht ar an bhfoirm iarratais leictreonach ar shuíomh gréasáin na Comhairle faoin nasc seo a leanas: http://www.consilium.europa.eu/en/general-secretariat/jobs/job-opportunities/

(b)

curriculum vitae mionsonraithe (5), agus litir inspreagtha ag gabháil leis, i mBéarla nó i bhFraincis, de rogha i bhformáid an Europass (http://europass.cedefop.europa.eu), lena gcumhdófar gairmréim iomlán an iarratasóra agus ina sonrófar, inter alia, cáilíochtaí an iarratasóra, cur amach an iarratasóra ar theangacha, taithí an iarratasóra agus na cúraimí atá faoi láthair; agus

(c)	cóipeanna de dhioplómaí lena ndeimhnítear oideachas, agus cóipeanna na gcáilíochtaí agus na dteastas maidir leis an taithí ghairmiúil. Caithfidh doiciméid tacaíochta teacht ó thríú páirtí agus ní leor an CV a luaitear in (b) amháin a sheoladh.

Ní mór na doiciméid tacaíochta uile a ghabhann leis an iarratas a bheith i dtéacs Word, i bhformáid pdf nó i bhformáid jpg, agus caithfidh teideal (as Béarla nó as Fraincis) agus uimhir a bheith orthu i seicheamh (Iarscríbhinn 1, Iarscríbhinn 2, etc.). Ní mór liosta de na hiarscríbhinní ar fad a chur i gceangal freisin. Ní fhéachfar ar aon iarratas a gheofar tríd an bpost, nó trí réitigh stórála sonraí néalbhunaithe nó trí chórais chomhchomhad.

Na hiarrthóirí a chuirfear ar an ngearrliosta, iarrfar orthu bundoiciméid na gcóipeanna thuasluaite a thabhairt ar láimh.

Cuirfear ríomhphost chugat lena dheimhniú go bhfuarthas d'iarratas. Tabhair faoi deara, le do thoil, nach féidir deacrachtaí teicniúla a bhaineann le tarchur ríomhphost a chur as an áireamh go hiomlán choíche. Dá bhrí sin, mura bhfaigheann tú ríomhphost lena n-aithnítear go bhfuarthas d'iarratas, déan deimhin de go bhfuil sé faighte ag Ardrúnaíocht na Comhairle trí theagmháil a dhéanamh le applications.management@consilium.europa.eu Ós rud é go dtosóidh an bord comhairleach roghnúcháin ar a chuid oibre go luath i ndiaidh an dáta deiridh le haghaidh iarratas, moltar duit aon fhíorú riachtanach a dhéanamh sa tseachtain tar éis an dáta sin.

COMHIONANNAS DEISEANNA

Tá Ardrúnaíocht na Comhairle tiomanta do chomhionannas deiseanna (féach Iarscríbhinn II). Mar fhostóir, tá Ardrúnaíocht na Comhairle tiomanta comhionannas inscne a chinntiú agus an t-idirdhealú, ar aon fhoras, a chosc. Is díol sásaimh di iarratais ó iarrthóirí cáilithe ó chúlraí éagsúla, lena gcuimsítear gach saghas cumas, arb as an raon geografach is leithne is féidir dóibh as measc Bhallstáit an Aontais Eorpaigh. Chun comhionannas inscne a chur chun cinn, is mór ag an Ardrúnaíocht iarratais ó mhná.

Féadfar cúnamh a chur ar fáil le linn an nós imeachta earcaíochta do dhaoine faoi mhíchumas. Más mian leat tuilleadh faisnéise a fháil, cuir ríomhphost chuig equal.opportunities@consilium.europa.eu.

ATHSCRÚDÚ AR IARRATAIS

Leagtar amach na nósanna imeachta maidir le hiarratais ar athbhreithniú, ar achomhairc agus ar tharchur chuig an Ombudsman Eorpach in Iarscríbhinn III a ghabhann leis an bhfógra folúntais seo.

COSAINT SONRAÍ

Leagtar amach na rialacha lena rialaítear próiseáil sonraí pearsanta a bhaineann leis an nós imeachta roghnúcháin seo in Iarscríbhinn IV a ghabhann leis an bhfógra folúntais seo.

---

(1)  Ceanglaítear le hAirteagal 5(3)(c) de Rialacháin Foirne Oifigigh an Aontais Eorpaigh (na Rialacháin Foirne) nach mór do na hiarratasóirí an méid seo a leanas a bheith acu ar a laghad:

(i)	leibhéal oideachais arb ionann é agus cúrsa ollscoile críochnaithe acu agus sin á fhianú ag dioplóma nuair is ceithre bliana nó níos mó atá sa ghnáth-thréimhse oideachais ollscoile, nó

(ii)	leibhéal oideachais arb ionann é agus cúrsa ollscoile críochnaithe acu agus sin á fhianú ag dioplóma agus taithí ghairmiúil iomchuí bliana ar a laghad nuair is trí bliana ar a laghad atá sa ghnáth-thréimhse oideachais ollscoile.

(2)  IO L 274, 15.10.2013, lch.1

(3)  Rialacháin Foirne Oifigigh an Aontais agus Coinníollacha Fostaíochta Sheirbhísigh Eile an Aontais, a leagtar síos le Rialachán (CEE, Euratom, CEGC) Uimh. 259/68 ón gComhairle (IO L 56, 4.3.1968, lch. 1) agus a leasaíodh go deireanach le Rialachán (AE, Euratom) Uimh. 1023/2013 ó Pharlaimint na hEorpa agus ón gComhairle an (IO L 287, 29.10.2013, lch. 15).

(4)  Tá an seoladh ríomhphoist nasctha le bosca ríomhphoist feidhmiúil nach féidir leis ach teachtaireachtaí ag a bhfuil “Gnáthrogha” íogaireachta a phróiseáil; ní féidir ríomhphoist a sheoltar, ag a bhfuil roghanna eile íogaireachta (e.g. “Pearsanta”, “Príobháideach”, “Rúnda”), a phróiseáil. Dá bhrí sin, roghnaigh “Gnáthrogha” íogaireachta. Ní ceart go rachadh do ríomhphost thar 25MB. Má sháraíonn do ríomhphost, mar aon leis na ceangaltáin, an t-uasmhéid sin, roinn do cheangaltáin ar roinnt ríomhphost, le do thoil.

(5)  Iarrtar ar na hiarrthóirí gan grianghraif a chur ar a CV.