Fógra Folúntais CONS/AD/150/19

FAISNÉIS GHINEARÁLTA

Roinn	LIFE 3 Ceisteanna Sláinte Tréidliachta agus Plandaí, Bia agus Foraoiseacht
Áit oibre	An Bhruiséil, Áras Justus Lipsius
Teideal an phoist	An Stiúrthóir
Grúpa feidhme agus grád	AD 14
An t-imréiteach slándála atá riachtanach	SECRET UE/EU SECRET
SPRIOCDHÁTA LE hAGHAIDH IARRATAS	3 Eanáir 2020 — 12.00 meán lae (am na Bruiséile)

CÉ MUIDE

Cuidíonn Ardrúnaíocht na Comhairle (ARC) leis an gComhairle Eorpach, le Comhairle an Aontais Eorpaigh agus lena gcomhlachtaí ullmhúcháin i ngach réimse a bhaineann lena ngníomhaíochtaí. Cuireann sí comhairle agus tacaíocht ar fáil do chomhaltaí na Comhairle Eorpaí agus don Chomhairle agus dá nUachtaráin i ngach réimse gníomhaíochta, lena n-áirítear comhairle faoi bheartais agus comhairle dhlíthiúil, comhordú le hinstitiúidí eile, comhréitigh a fhorbairt, dréachtú chomh maith leis na nithe uile is gá chun dea-ullmhúchán a dhéanamh don Chomhairle Eorpach agus don Chomhairle agus chun go mbeidh siad á reáchtáil mar is cuí.

Ón 1 Eanáir 2020 amach, is éard a bheidh in Ard-Stiúrthóireacht LIFE, 4 Stiúrthóireacht, agus díreoidh gach Stiúrthóireacht ar réimsí sonracha beartais.

Beidh Stiúrthóireacht LIFE 3 freagrach as Ceisteanna Sláinte Tréidliachta agus Plandaí, Bia agus Foraoiseacht.

Comhordóidh an Stiúrthóireacht eagrú chruinnithe na Comhairle Talmhaíochta agus Iascaigh, a thionóltar de ghnáth 11 uair sa bhliain agus a ullmhaítear i roinnt meithleacha a láimhseálann comhaid reachtacha agus neamhreachtacha araon, Coiste na mBuanionadaithe (Coreper) ina measc, chomh maith leis an gcaidreamh idirnáisiúnta a bhaineann leis na comhaid sin.

Ár dtairiscint

Post Stiúrthóir na Stiúrthóireachta LIFE 3 i dtimpeallacht spéisiúil ó thaobh na polaitíochta de ina mbeidh foireann 12 bhall foirne ardcháilithe ag plé le gnéithe oibríochtúla agus straitéiseacha na gcomhad a láimhseálann siad.

Faoi údarás an Ard-Stiúrthóra, déanfaidh tú an Stiúrthóireacht agus acmhainní na Stiúrthóireachta a bhainistiú ar bhealach gairmiúil, eagróidh tú gníomhaíochtaí na Stiúrthóireachta agus tacóidh tú leis an bhfoireann agus spreagfaidh tú iad agus iad i mbun a gcuid oibre. Cinnteoidh tú go mbeidh na seirbhísí agus na táirgí a chuirfidh an Stiúrthóireacht ar fáil ar ardcháilíocht, agus go mbeidh cumarsáid agus comhar éifeachtach sa Stiúrthóireacht féin agus idir an Stiúrthóireacht agus Stiúrthóireachtaí eile, agus seirbhísí eile de chuid ARC.

Cuirfidh tú comhairle ardleibhéil i ndáil le beartais agus nósanna imeachta ar fáil, ó bhéal agus i scríbhinn, don Chomhairle Eorpach, don Chomhairle, do Coreper agus dá nUachtaránachtaí agus don Ardrúnaí faoi ghnéithe uile na sainchomhad a thagann faoi chuimsiú na Stiúrthóireachta, beidh tú rannpháirteach i gcruinnithe agus, i gcás inarb iomchuí, i seisiúin eolais agus/nó i gcaibidlíocht d’fhonn teacht ar chomhréitigh agus réitigh a aimsiú. Sa chomhthéacs sin, tabharfaidh tú cúnamh don Uachtaránacht sa chaibidlíocht agus áiritheoidh tú go mbeidh cumarsáid agus comhar éifeachtach ann le hinstitiúidí, gníomhaireachtaí agus comhlachtaí eile de chuid an Aontais i réimsí atá faoi chuimsiú shainordú na Stiúrthóireachta.

Is tusa a shaineoidh na cuspóirí nach mór a chomhlíonadh agus a chabhróidh le hiad a bhaint amach trí chlár oibre na Stiúrthóireachta a bhunú agus a áirithiú go ndéanfar faireachán iomchuí ar chur chun feidhme an chláir oibre.

Beidh tú freagrach freisin as gníomhaíochtaí anailíse beartais a thionscnamh agus a mhaoirsiú d’fhonn comhairle a chur ar fáil maidir le cinntí a dhéanamh sna réimsí atá faoi shainchúram na Stiúrthóireachta.

Beidh tú in ann obair a phleanáil agus a eagrú ar bhealach solúbtha, faoi réir uaireanta oibre agus sceideal chruinnithe Coreper agus na Comhairle i réimse gníomhaíochta na Stiúrthóireachta. Beidh tú féin is an fhoireann in ann leas a bhaint as socruithe oibre Ardrúnaíocht na Comhairle, lena n-áirítear teilea-oibriú. Beidh gá le misin thar lear ó am go chéile, laistigh den Aontas de ghnáth e.g. go Lucsamburg agus Strasbourg (tuairim is 8 n-uaire sa bhliain).

Táimid ag lorg

Táimid ag lorg bainisteoir a bhfuil taithí aige nó aici ar cheapadh beartais an Aontais agus ar phróiseas reachtach an Aontais chomh maith le heolas fairsing ar shaincheisteanna institiúideacha an Aontais. Bheadh eolas ar na réimsí atá faoi chumhdach na Stiúrthóireachta ina bhuntáiste.

Mar bhainisteoir de chuid Ardrúnaíocht na Comhairle, beifear ag súil go gcuirfidh tú comhairle orthu siúd atá i gceannas agus ar na geallsealbhóirí, go ndéanfaidh tú an fhoireann agus na hacmhainní airgeadais a bhainistiú agus go ndéanfaidh tú ionadaíocht ar Ardrúnaíocht na Comhairle. Leagtar amach an méid sin i bpróifíl Ardrúnaíocht na Comhairle do bhainisteoirí cothrománacha, in Iarscríbhinn I.

Ina theannta sin, beidh an méid a leanas ag teastáil ón té a cheapfar:

—	an cumas smaoineamh agus pleanáil go straitéiseach, fadhbanna a d’fhéadfadh teacht chun cinn a thuar agus a shainaithint, agus réitigh agus comhréitigh inoibrithe a mholadh;

—	scileanna ceannaireachta agus a bheith in ann treoir a thabhairt, foireann a spreagadh agus a chumhachtú i dtimpeallacht idirnáisiúnta agus ilchultúrtha, agus béim láidir á leagan ar fhorbairt na foirne;

—	sárscileanna cumarsáide, lena n-áirítear scileanna cumarsáide idirphearsanta; cumas spiorad foirne láidir a chur chun cinn agus dea-chaidrimh oibre a chothabháil le réimse idirghabhálaithe inmheánacha agus seachtracha agus scileanna taidhleoireachta;

—	an cumas athrú a bhainistiú agus tacaíocht a thabhairt don fhoireann nuair atá athrú i gceist;

—	cumas láidir obair fhoriomlán na stiúrthóireachta a phleanáil agus a eagrú d’fhonn spriocdhátaí tábhachtacha a chomhlíonadh agus ualach oibre cothrom a áirithiú i measc na foirne agus pleanáil comharbais;

—	an cumas chun comhaontuithe comhchoiteanna nó spriocanna comhchoiteanna a bhaint amach trí chomhairle spriocdhírithe a chur ar fáil do gheallsealbhóirí agus trí éascú éifeachtach agus cuiditheach a dhéanamh ar an bplé i dtreo torthaí atá le leas gach duine.

Molann Ardrúnaíocht na Comhairle cultúr na soghluaisteachta dá bainisteoirí le go mbeidh taithí leathan acu, agus ba cheart go mbeadh na hiarrthóirí toilteanach agus ábalta dul i mbun oibre i réimsí éagsúla gníomhaíochta le linn a ngairmréime in Ardrúnaíocht na Comhairle.

BEARTAS EARCAÍOCHTA

Caithfidh na coinníollacha iontrála a leanas a bheith á gcomhlíonadh ag na hiarratasóirí tráth a mbeidh an t-iarratas á dhéanamh:

a)

Coinníollacha ginearálta — caithfidh siad a bheith ina náisiúnach de cheann de Bhallstáit an Aontais Eorpaigh; — caithfidh a gcearta iomlána mar shaoránaigh a bheith á dteachtadh acu; — caithfidh gach oibleagáid a chuirtear orthu faoi na dlíthe a bhaineann le seirbhís mhíleata a bheith comhlíonta acu.

b)

Coinníollacha sonracha — is gá céim ollscoile a bheith agat (1); — taithí ghairmiúil ábhartha 15 bliana ar a laghad agus freagrachtaí bainistithe agus eagrúcháin á bhfeidhmiú go hiarbhír acu ar feadh 3 bliana ar a laghad as sin. Mheasfaí 3 bliana a bheith caite i bpost a raibh freagrachtaí suntasacha comhordúcháin ag dul leis a bheith coibhéiseach leis an taithí thuasluaite bainistíochta; — ós rud é gurb iad an Béarla agus an Fhraincis a úsáidtear go forleathan don chumarsáid in Ardrúnaíocht na Comhairle agus le hinstitiúidí eile, tá eolas sármhaith ar cheann den dá teanga sin agus eolas maith ar an gceann eile ag teastáil. Is buntáiste é freisin go mbeadh teanga oifigiúil eile nó teangacha oifigiúla eile de chuid an Aontais acu.

NB:

1)

Tá gá le himréiteach slándála don phost seo, lena gceadaítear rochtain ar dhoiciméid rúnaicmithe (go dtí leibhéal EU SECRET). Caithfidh na hiarrthóirí a chuirfidh isteach ar an bpost seo a bheith toilteanach dul faoi scagadh slándála faoi Chinneadh 2013/488/AE ón gComhairle (2). Ní chuirfear ceapachán chun an phoist i bhfeidhm ach ar choinníoll go bhfuair an t-iarrthóir a roghnófar deimhniú bailí imréitigh slándála. Déanfar conradh sealadach a thairiscint d’iarrthóir gan imréiteach slándála go dtí go bhfaighfear toradh an nós imeachta um imréiteach slándála.

2)	Ní mór don iarratasóir a n-éireoidh leis nó léi a bheith sásta páirt a ghlacadh in oiliúint Ardrúnaíocht na Comhairle do bhainisteoirí.

NÓS IMEACHTA ROGHNÚCHÁIN

Agus an t-iarrthóir rathúil á roghnú, cabhróidh bord comhairleach roghnúcháin leis an Údarás Ceapacháin. Beidh ionad measúnaithe ag an gcoiste comhairleach roghnúcháin, a bheidh á reáchtáil ag comhairleoirí seachtracha earcaíochta. Scoirfidh na tuarascálacha a chuirfidh an t-ionad measúnaithe le chéile de bheith bailí 2 bhliain tar éis an dáta a ndearnadh na cleachtaí ábhartha nó ar críochnaíodh an creatchonradh idir Ardrúnanaíocht na Comhairle agus an t-ionad measúnaithe atá i gceist — cibé dáta is luaithe.

Déanfaidh an bord comhairleach roghnúcháin cáilíochtaí, taithí agus spreagthacht na n-iarratasóirí go léir a mheas agus a chur i gcomparáid le chéile ar dtús, ar bhonn a n-iarratas. Bunaithe ar an measúnú comparáideach sin, déanfaidh an bord comhairleach roghnúcháin gearrliosta de na hiarrthóirí is oiriúnaí, dar leis, chun cuireadh a fháil chuig an gcéad agallamh. Toisc gur ar mheasúnú comparáideach na n-iarratas a bhíonn an chéad roghnú sin bunaithe, ní hionann ceanglais an fholúntais seo a chomhlíonadh agus ráthaíocht go bhfaighfear cuireadh chuig an gcéad agallamh. As measc na n-iarrthóirí a chuirfear faoi agallamh, déanfaidh an coiste comhairleach roghnúcháin na hiarrthóirí a réamhroghnú a fhreastalóidh ar ionad measúnaithe agus a fhreastalóidh ina dhiaidh sin ar an dara hagallamh leis an gcoiste comhairleach roghnúcháin.

Seo a leanas an phleanáil shealadach maidir le hiarrthóirí a roghnú:

—	táthar ag súil go gcuirfear na hiarrthóirí a roghnófar chun agallaimh ar an eolas faoi dheireadh mhí Eanáir 2020;

—	beartaítear go mbeidh na hagallaimh thosaigh ar siúl faoi lár mhí Feabhra 2020;

—	meastar go gcuirfear i gcrích imeachtaí an ionaid measúnaithe faoi thús mhí an Mhárta 2020;

—	beartaítear go mbeidh an dara babhta agallamh ar siúl faoi dheireadh mhí an Mhárta 2020.

BUNÚS DLÍI

gcomhréir le hAirteagal 29(2) de Rialacháin Foirne Oifigigh an Aontais Eorpaigh (3)(post bainistíochta sinsearaí) a fhoilsítear an post seo.

Foilsíodh an post seo in institiúidí uile an Aontais Eorpaigh agus lasmuigh de na hinstitiúidí.

CONAS IARRATAS A DHÉANAMH

Is é an 3 Eanáir 2020, 12.00 meán lae (am na Bruiséile), an dáta deiridh chun iarratais a chur isteach.

Glacfar le hiarratais trí ríomhphost amháin agus ní mór iad a sheoladh chuig:applications.management@consilium.europa.eu (4) tráth nach déanaí ná an dáta deiridh. Ní chuirfear aon iarratas mall san áireamh.

Ní mór an seoladh ríomhphoist thuasluaite a úsáid i gcás aon chomhfhreagras a bhaineann leis an nós imeachta roghnúcháin (ní mór an teideal seo a leanas a bheith luaite sa bhosca ina luaitear ábhar an ríomhphoist: CONS/AD/150/19 LIFE 3).

Sula gcuirfear an t-iarratas isteach, ba cheart do na hiarrthóirí a sheiceáil go grinn an gcomhlíonann siad na critéir incháilitheachta go léir chun nach n-eiseofar as an nós imeachta roghnúcháin go huathoibríoch iad.

Ní mór na nithe seo a leanas a áireamh sna hiarratais chun go mbeidh siad bailí:

a)	an fhoirm iarratais (Iarscríbhinn V) agus í comhlíonta mar is cuí agus dátaithe; is féidir teacht ar an bhfoirm iarratais leictreonach ar shuíomh gréasáin na Comhairle faoin nasc seo a leanas: http://www.consilium.europa.eu/en/general-secretariat/jobs/job-opportunities/

b)

curriculum vitae (5) mionsonraithe, agus litir inspreagtha ag gabháil leis, i mBéarla nó i bhFraincis, de rogha i bhformáid an Europass (http://europass.cedefop.europa.eu), lena gcumhdófar gairmréim iomlán an iarratasóra agus ina sonrófar, inter alia, cáilíochtaí an iarratasóra, cur amach an iarratasóra ar theangacha, taithí an iarratasóra, na cúraimí atá faoi láthair ar an iarratasóir; agus

c)	cóipeanna de dhioplómaí lena ndeimhnítear oideachas, agus cóipeanna na gcáilíochtaí agus na dteastas maidir leis an taithí ghairmiúil. Caithfidh doiciméid tacaíochta teacht ó thríú páirtí agus ní leor an CV a luaitear in (b) amháin a sheoladh.

Is i dtéacs Word, i bhformáid pdf nó i bhformáid jpg a chaithfidh na doiciméid tacaíochta uile a ghabhann leis an iarratas a bheith agus caithfidh teideal (as Béarla nó as Fraincis) agus uimhir a bheith orthu i seicheamh (Iarscríbhinn I, Iarscríbhinn II, etc.). Ní mór liosta de na hiarscríbhinní ar fad a chur i gceangal freisin. Ní fhéachfar ar aon iarratas a gheofar tríd an bpost, nó trí réitigh stóráil sonraí néalbhunaithe nó trí chórais chomhchomhad.

Na hiarrthóirí a chuirfear ar an ngearrliosta, iarrfar orthu bundoiciméid na gcóipeanna thuasluaite a thabhairt ar láimh.

Cuirfear ríomhphost chugat lena dheimhniú go bhfuarthas d’iarratas. Tabhair faoi deara, le do thoil, nach féidir deacrachtaí teicniúla a bhaineann le tarchur ríomhphost a chur as an áireamh go hiomlán choíche. Dá bhrí sin, mura bhfaigheann tú ríomhphost lena n-aithnítear go bhfuarthas d’iarratas, déan deimhin de go bhfuil sé faighte ag Ardrúnaíocht na Comhairle trí theagmháil a dhéanamh le applications.management@consilium.europa.eu Ós rud é go dtosóidh an bord comhairleach roghnúcháin ar a chuid oibre go luath i ndiaidh an dáta deiridh le haghaidh iarratais, moltar duit aon fhíorú riachtanach a dhéanamh sa tseachtain tar éis an dáta sin.

COMHIONANNAS DEISEANNA

Tá Ardrúnaíocht na Comhairle tiomanta do chomhionannas deiseanna dá fostaithe agus do gach duine a dhéanfaidh iarratas ar phost (féach IarscríbhinnII). Mar fhostóir, tá Ardrúnaíocht na Comhairle tiomanta comhionannas inscne a chinntiú agus an t-idirdhealú, ar aon fhoras, a chosc. Is díol sásaimh di iarratais ó iarrthóirí cáilithe ó chúlraí éagsúla, lena gcuimsítear gach saghas cumas, arb as an raon geografach is leithne is féidir dóibh as measc Bhallstáit an Aontais Eorpaigh.

Féadfar cúnamh a chur ar fáil le linn an nós imeachta earcaíochta do dhaoine faoi mhíchumas. Más mian leat tuilleadh faisnéise a fháil, cuir ríomhphost chuig equal.opportunities@consilium.europa.eu

ATHSCRÚDÚ AR IARRATAIS

Leagtar amach na nósanna imeachta maidir le hiarratais le haghaidh athbhreithnithe, achomhairc agus tarchur chuig an Ombudsman Eorpach in Iarscríbhinn III a ghabhann leis an bhfógra folúntais seo.

COSAINT SONRAÍ

Leagtar amach na rialacha lena rialaítear próiseáil sonraí pearsanta a bhaineann leis an nós imeachta roghnúcháin seo in Iarscríbhinn IV a ghabhann leis an bhfógra folúntais seo.

---

(1)  Ceanglaítear le hAirteagal 5(3)(c) de Rialacháin Foirne Oifigigh an Aontais Eorpaigh (na Rialacháin Foirne) nach mór do na hiarratasóirí an méid seo a leanas a bheith acu ar a laghad:

i)	leibhéal oideachais arb ionann é agus cúrsa ollscoile críochnaithe acu agus sin á fhianú ag dioplóma nuair is 4 bliana nó níos mó atá sa ghnáth-thréimhse oideachais ollscoile; nó

ii)	leibhéal oideachais arb ionann é agus cúrsa ollscoile críochnaithe acu agus sin á fhianú ag dioplóma agus taithí ghairmiúil iomchuí bliana ar a laghad nuair is 3 bliana ar a laghad atá sa ghnáth-thréimhse oideachais ollscoile.

(2)  Cinneadh 2013/488/AE ón gComhairle an 23 Meán Fómhair 2013 maidir leis na rialacha slándála chun faisnéis rúnaicmithe AE a chosaint (IO L 274, 15.10.2013, lch. 1).

(3)  Rialachán (CEE, Euratom, CEGC) Uimh. 259/68 ón gComhairle an 29 Feabhra 1968 lena leagtar síos Rialacháin Foirne Oifigigh an Aontais agus Coinníollacha Fostaíochta Sheirbhísigh Eile an Aontais agus lena dtionscnaítear bearta speisialta is infheidhme ar bhonn sealadach maidir le hoifigigh an Choimisiúin, agus a leasaíodh go deireanach le Rialachán (AE, Euratom) Uimh. 1023/2013 ó Pharlaimint na hEorpa agus ón gComhairle (IO L 287,29.10.2013, lch. 15).

(4)  Tá an seoladh ríomhphoist nasctha le bosca ríomhphoist feidhmiúil nach féidir leis ach teachtaireachtaí ag a bhfuil “Gnáthrogha” íogaireachta a phróiseáil; ní féidir ríomhphoist a sheoltar, ag a bhfuil roghanna eile íogaireachta (e.g. “Pearsanta”, “Príobháideach”, “Rúnda”), a phróiseáil. Dá bhrí sin, roghnaigh “Gnáthrogha” íogaireachta. Ní féidir le ríomhphost a bheith níos mó ná 25MB. Má sháraíonn do ríomhphost, mar aon leis na ceangaltáin, an t-uasmhéid sin, roinn do cheangaltáin ar roinnt ríomhphost le do thoil.

(5)  Iarrtar ar na hiarrthóirí gan grianghraif a chur i gceangal lena CV.