CAD A DHÉANTAR SA RIALACHÁN SEO?

Leagtar síos rialacha ann faoi conas a dhéantar údarú agus maoirseacht ar orgánaigh ghéinmhodhnaithe (OGManna), agus conas a dhéantar bia agus beatha ainmhithe atá géinmhodhnaithe a lipéadú.

Tá sé ina chuspóir leis iad seo a leanas a chosaint:

beatha agus sláinte an duine;
sláinte agus leas ainmhithe;
leasanna an chomhshaoil agus na dtomhaltóirí.

PRÍOMHPHOINTÍ

Tá feidhm ag an rialachán maidir leo seo a leanas:

OGManna arna n-úsáid i mbiabeatha ainmhithe; nó i mbeatha ainmhithe;

bia nó beatha ainmhithe ina bhfuil OGManna;

bia nó beatha atá déanta le nó ina bhfuilcomhábhair atá déanta le OGManna.

Iarratas a dhéanamh ar údarú

Cuireann tairgeoirí isteach iarratas amháin lena gclúdaítear gach úsáid: bia, beatha ainmhithe agus saothrú.

Laistigh de 2 sheachtain, admhaíonn an t-údarás inniúil sa tír AE ábhartha go bhfuarthas é agus cuireann sí an tÚdarás Eorpach um Shábháilteacht Bia (EFSA) ar an eolas.

Tá 6 mhí ag EFSA chun measúnacht a dhéanamh ar an iarratas.

Bainistíocht riosca

Is é an Coimisiún Eorpach atá freagrach as bainistíocht riosca.

Ar bhonn mheasúnacht de chuid EFSA, dréachtaíonn an Coimisiún moladh i dtaobh glacadh leis an iarratas nó diúltú dó.

Cuirtear an togra go dtí an Buanchoiste um an mBiashlabhra agus um Shláinte Ainmhithe.

Má ghlacann an coiste leis an togra, déanann an Coimisiún é a ghlacadh. Mura nglacann sé leis, déanann an Chomhairle measúnacht ar an dréachtchinneadh, agus cinneann sí cibé ar chóir don Choimisiún é a ghlacadh nó nár chóir.

Lipéadú

Ba chóir bia agus beatha ina bhfuil OGManna a bheith lipéadaithe go soiléir.

Ach, más rud é gur lú ná 0.9 % céatadán na OGManna i mbia nó i mbeatha, ní gá é nó í a lipéadú — ar an gcoinníoll go bhfuil an t-ábhar OGM dosheachanta go teicniúil.

CÚLRA

PRÍOMHTHÉARMA

* Orgánach géinmhodhnaithe: orgánach ar athraíodh an t-ábhar géiniteach atá ann trí innealtóireacht ghéiniteach ionas go n-áireofar ann géinte nach mbeadh ann de ghnáth.

GNÍOMH

Rialachán (CE) Uimh. 1829/2003 ó Pharlaimint na hEorpa agus ón gComhairle an22 Meán Fómhair 2003 maidir le bia agus beatha atá géinmhodhnaithe (IO L 268, 18.10.2003, lgh. 1-23)

Rinneadh leasuithe comhleanúnacha ar Rialachán (CE) Uimh. 1829/2003 a ionchorprú sa bhuntéacs. Is fiúntas faisnéiseach amháin atá ag an leagan comhdhlúite seo.

GNÍOMHARTHA GAOLMHARA

Rialachán Cur Chun Feidhme (AE) Uimh. 503/2013 ón gCoimisiún an 3 Aibreán 2013 maidir le hiarratais ar údarú bia agus beatha atá géinmhodhnaithe i gcomhréir le Rialachán (CE) Uimh. 1829/2003 ó Pharlaimint na hEorpa agus ón gComhairle agus lena leasaítear Rialachán (CE) Uimh. 641/2004 agus Rialachán (CE) Uimh. 1981/2006 ón gCoimisiún (IO L 157, 8.6.2013, lgh. 1-48)

Treoir (AE) 2015/412 ó Pharlaimint na hEorpa agus ón gComhairle an 11 Márta 2015 lena leasaítear Treoir 2001/18/CE maidir leis an bhféidearthacht atá ann do na Ballstáit saothrú orgánach géinmhodhnaithe ina gcríoch a shrianadh nó a thoirmeasc (IO L 68, 13.3.2015, lgh. 1-8)

Bia agus beatha atá géinmhodhnaithe