Ciste Forbraíochta Réigiúnaí na hEorpa (2014-2020)

ACHOIMRE AR:

Rialachán (AE) Uimh. 1301/2013 maidir le Ciste Forbraíochta Réigiúnaí na hEorpa agus maidir le rialacha sonracha a bhaineann le sprioc na hinfheistíochta le haghaidh fáis agus post

CAD IS AIDHM LEIS AN RIALACHÁN?

Bunaítear leis Ciste Forbraíochta Réigiúnaí na hEorpa (CFRE) le haghaidh na tréimhse 2014-2020. Féachtar le CFRE forbairt chomhchuí, chothromúil agus inbhuanaithe an Aontais Eorpaigh a chur chun cinn trí roinnt de na difríochtaí sna leibhéil forbartha idir a réigiúin a cheartú.
Leasaíodh an rialachán trí uair trí:
- Rialachán leasaitheach (AE, Euratom) 2018/1046 — rialachán airgeadais AE (féach an achoimre) lena leagtar amach na rialacha maidir le buiséad AE a dhréachtú agus a chur chun feidhme; agus
- Rialachán leasaitheach (AE) 2020/460, a glacadh i ndiaidh ráig COVID-19, ina bhfuil bearta sonracha maidir le hinfheistíochtaí a shlógadh i gcórais cúraim sláinte thíortha AE agus in earnálacha eile dá ngeilleagair (An Tionscnamh Infheistíochta mar Fhreagairt ar an gCoróinvíreas), agus
- Rialachán leasaitheach (AE) 2020/558, a glacadh i ndiaidh ráig COVID-19, agus ina bhfuil solúbthacht eisceachtúil maidir le húsáid a bhaint as Cistí Struchtúracha agus Infheistíochta na hEorpa (Cistí SIE).

PRÍOMHPHOINTÍ

Cáilitheacht

Tá gach réigiún i dtíortha AE incháilithe ach braithfidh an chabhair ar thosaíochtaí AE agus ar an gcineál réigiúin.

Príomhthéamaí

Díreofar infheistíochtaí CFRE ar cheithre phríomhthéama:

nuálaíocht agus taighde;
teicneolaíochtaí faisnéise agus cumarsáide (TFC);
tacaíocht d’fhiontair bheaga agus mheánmhéide (FBManna);
geilleagar ísealcharbóin a chur chun cinn.

Cineálacha infheistíochta

in FBManna chun poist inbhuanaithe a chruthú agus a chosaint,
i ngach cineál fiontair i réimsí na nuálaíochta agus an taighde, an gheilleagair ísealcharbóin, chomh maith le TFC, réimse a bhfuil baint ag FBManna leis,
i mbonneagar a sholáthraíonn seirbhísí bunúsacha sna réimsí fuinnimh, comhshaoil, iompair agus TFC, agus i mbonneagar sóisialta, sláinte agus oideachasúil chomh maith,
caipiteal oibre in FBManna más gá mar bheart sealadach chun freagairt éifeachtach a sholáthar ar ghéarchéim sláinte poiblí (i ndiaidh ráig phaindéim COVID-19), agus
i bhforbairt acmhainne inginiúla.

Buiséad foriomlán

Is é breis agus EUR 185 billiún an buiséad don tréimhse 2014-2020.

Tosaíochtaí beartais agus buiséid

Tá na ceithre phríomhthéama atá liostaithe thuas fíorthábhachtach ó thaobh leithdháileadh chistiú CFRE de, rud a bhraithfidh ar chatagóir an réigiúin.
Aicmítear na réigiúin bunaithe ar a n–olltáirgeacht intíre (OTI) curtha in iúl mar chéatadán de mheánmhéid AE:
- réigiúin níos forbartha: OTI os cionn 90 %
- réigiúin trasdula: OTI 75 %-90 %
- réigiúin bheagfhorbartha: OTI faoi bhun 75 %
Sna réigiúin níos forbartha, (réigiúin trasdula), (réigiúin bheagfhorbartha), ní mór 80 % (60 %) (50 %) ar a laghad de chistí iomlána CFRE i ngach tír a leithdháileadh ar dhá phríomhthéama nó níos mó de na ceithre phríomhthéama, eadhon nuálaíocht agus taighde, FBManna, TFC agus geilleagar ísealcharbóin; ní mór 20 % (15 %) (12 %) ar a laghad de chistí iomlána CFRE i ngach tír a dhíriú go sonrach ar thionscadail geilleagar ísealcharbóin mar gheall ar an tábhacht a bhaineann leis.
Tá 5 % ar a laghad de chistiú CFRE curtha in áirithe d’fhorbraíocht inbhuanaithe uirbeach. Bunófar líonrú maidir le forbairt uirbeach ar leibhéal AE chun líonrú agus malartú taithí maidir le forbraíocht inbhuanaithe uirbeach a chur chun cinn.

Cur chun feidhme

Cuirtear CFRE chun feidhme ar an leibhéal náisiúnta trí chláir 7 mbliana mar chuid de Chomhaontú Comhpháirtíochta idir tír AE agus AE lena mbaineann cúig Chiste Struchtúracha agus Infheistíochta na hEorpa (Cistí SIE):
Ullmhaíonn gach tír AE an comhaontú seo agus le rannpháirtíocht comhpháirtithe a dhéanann ionadaíocht d’údaráis phoiblí réigiúnacha agus áitiúla, mar aon le raon leathan lucht leasa sóisialta, eacnamaíoch, comhshaoil agus eile.

An Tionscnamh Infheistíochta mar Fhreagairt ar an gCoróinvíreas

Leis an Tionscnamh Infheistíochta mar Fhreagairt ar an gCoróinvíreas, a tugadh isteach le Rialachán (AE) 2020/460, tairgtear rochtain do thíortha AE ar EUR 37 billiún ó chistí SIE chun córais sláinte a neartú agus tacú le fiontair bheaga agus mheánmhéide, scéimeanna oibre gearr-ama agus seirbhísí pobalbhunaithe.

Bearta speisialta maidir leis an gCoróinvíreas: níos mó solúbthachta in úsáid chiste SIE

Le Rialachán leasaitheach (AE) 2020/558 féadfaidh tíortha AE acmhainní a aistriú idir Ciste Forbraíochta Réigiúnaí na hEorpa, Ciste Sóisialta na hEorpa agus an Ciste Comhtháthaithe, idir na catagóirí éagsúla réigiún agus idir réimsí tosaíochta sonracha na dtrí chiste.

Ón 1 Iúil 2020 go dtí an 30 Meitheamh 2021, féadfar cláir um beartas comhtháthaithe a bhaineann le COVID-19 a mhaoiniú ar bhonn eisceachtúil trí 100 % de mhaoiniú AE le linn na bliana cuntasaíochta. Déantar faomhadh an chláir a shimpliú leis na bearta chomh maith, chun dlús a chur leis an gcur chun feidhme, chun ionstraimí airgeadais a dhéanamh níos éasca agus chun iniúchtaí a shimplí.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 21 Nollaig 2013.

CÚLRA

Le haghaidh faisnéise breise, féach:

Ciste Forbraíochta Réigiúnaí na hEorpa (An Coimisiún Eorpach)
Gníomh an bheartais chomhtháthaithe i gcoinne an choróinvíris (An Coimisiún Eorpach).

PRÍOMHDHOICIMÉAD

Rialachán (AE) Uimh. 1301/2013 ó Pharlaimint na hEorpa agus ón gComhairle an 17 Nollaig 2013 maidir le Ciste Forbraíochta Réigiúnaí na hEorpa agus maidir le forálacha sonracha i ndáil le sprioc na hInfheistíochta le haghaidh fáis agus post agus lena n–aisghairtear Rialachán (CE) Uimh. 1080/2006 (IO L 347, 20.12.2013, lgh. 289-302)

Rinneadh leasuithe comhleanúnacha ar Rialachán (CE) Uimh. 1301/2013 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Rialachán Tarmligthe (AE) 2017/2056 ón gCoimisiún an 22 Lúnasa 2017 lena leasaítear Rialachán Tarmligthe (AE) Uimh. 522/2014 lena bhforlíontar Rialachán (AE) Uimh. 1301/2013 ó Pharlaimint na hEorpa agus ón gComhairle maidir leis na rialacha mionsonraithe i dtaca leis na prionsabail i gcomhair roghnú agus bainistiú gníomhaíochtaí nuálacha i réimse na forbartha uirbí inbhuanaithe lena dtacófar faoi Chiste Forbraíochta Réigiúnaí na hEorpa (IO L 294, 11.11.2017, lch. 26)

Rialachán Tarmligthe (AE) Uimh. 522/2014 ón gCoimisiún an 11 Márta 2014 lena bhforlíontar Rialachán (AE) Uimh. 1301/2013 ó Pharlaimint na hEorpa agus ón gComhairle maidir leis na rialacha mionsonraithe i dtaca leis na prionsabail i gcomhair roghnú agus bainistiú gníomhaíochtaí nuálacha i réimse na forbartha uirbí inbhuanaithe lena dtacófar faoi Chiste Forbraíochta Réigiúnaí na hEorpa (IO L 148, 20.5.2014, lgh. 1-3)

Féach an leagan comhdhlúite.

Cinneadh Cur Chun Feidhme 2014/99/AE ón gCoimisiún an 18 Feabhra 2014 lena leagtar síos liosta na réigiún atá incháilithe chun cistiú a fháil ó Chiste Forbraíochta Réigiúnaí na hEorpa agus ó Chiste Sóisialta na hEorpa, agus liosta na mBallstát atá incháilithe chun cistiú a fháil ón gCiste Comhtháthaithe don tréimhse 2014-2020 (IO L 50, 20.2.2014, lgh. 22-34)

Féach an leagan comhdhlúite.

Nuashonraithe 07.07.2020