Cosaint idirnáisiúnta – cúnamh éigeandála don Iodáil agus don Ghréig

ACHOIMRE AR:

Cinneadh (AE) 2015/1523 lena mbunaítear bearta sealadacha i réimse na cosanta idirnáisiúnta ar mhaithe leis an Iodáil agus leis an nGréig

Cinneadh (AE) 2015/1601 lena mbunaítear bearta sealadacha um thearmann ar mhaithe leis an Iodáil agus leis an nGréig

CAD IS AIDHM LEIS NA CINNTÍ?

• Bunaítear bearta sealadacha leo chun cuidiú leis an Iodáil agus leis an nGréig déileáil le plódú iarrthóirí tearmainn ó áiteanna lasmuigh den Aontas Eorpach ar aon dul le prionsabal na dlúthpháirtíochta agus na comhroinnte córa freagrachta.
• Mar thoradh air sin, ba cheart go n-athshocrófaí 160,000 duine a dteastaíonn tearmann uatha ón nGréig agus ón Iodáil go tíortha AE eile thar an tréimhse 2015-2017.

PRÍOMHPHOINTÍ

• Faoi Chinneadh (AE) 2015/1523, déanfar 24,000 iarrthóir tearmainn a athshocrú ón Iodáil agus 16,000 iarrthóir tearmainn a athshocrú ón nGréig go tíortha eile AE.
• Faoi Chinneadh (AE) 2015/1601, déanfar 15,600 iarrthóir tearmainn a athshocrú ón Iodáil; déanfar 50,400 iarrthóir tearmainn a athshocrú ón nGréig; agus bliain ina dhiaidh sin, déanfar 54,000 iarrthóir tearmainn a athshocrú go comhréireach go tíortha AE eile ón Iodáil agus ón nGréig (bunaithe ar Iarscríbhinní I agus II a ghabhann leis an gcinneadh seo). Má tharlaíonn cásanna éigeandála cosúil leis na cinn a tharla san Iodáil agus sa Ghréig i dtíortha AE eile sa tréimhse idirghabhála, áfach, eiseoidh an Coimisiún Eorpach tograí chun na hiarrthóirí tearmainn a ath-leithdháileadh go comhréireach ar na tíortha AE eile. Níorbh amhlaidh a bhí.
• Maidir leis an gcéad Chinneadh ón gComhairle, ní dhearnadh thart ar 8,000 áit a athdháileadh ar Bhallstát ar bith. Faoin dara Cinneadh ón gComhairle, féadfaidh Ballstáit a n-oibleagáidí a chomhlíonadh maidir leis an líon 54,000 duine chomh maith trí iontráil dhlíthiúil Siriach ón Tuirc.
• Mura bhfuil tír AE um athshocrú ábalta cóiríocht a chur ar fáil dá sciar d’iarrthóirí, ní mór di cúiseanna a bhfuil údar leo a sholáthar (e.g. barraíocht brú ar a córas tearmainn) don Choimisiún agus do Chomhairle AE. Nuair a bheidh measúnú déanta ag an gCoimisiún ar an gcás, féadfaidh sé fionraí sealadach suas le 30 % ar an bpróiseas a dheonú don tír AE.
• Is iad na daoine atá incháilithe le haghaidh athshocraithe iarrthóirí ar chosaint idirnáisiúnta a sainaithníodh agus a cláraíodh go cuí agus ar tógadh a méarloirg go cuí a bhaineann le náisiúntacht ag a bhfuil ráta aitheantais ar fud AE de 75% i gcomhréir le sonraí Eurostat sa cheathrú comhfhreagrach agus a tháinig chun na hIodáile agus chun na Gréige san achar ama atá tuartha sna Cinntí ón gComhairle.
• Féadfaidh tír AE diúltú glacadh le hiarrthóir tearmainn ar na forais go bhfuil siad ina mbagairt ar a slándáil náisiúnta, ar an ord poiblí nó sa chás go bhfuil cúiseanna tromchúiseacha ann le forálacha eisiaimh na Treorach um Cháiliú a chur i bhfeidhm.

Próiseas athshocraithe

• Bunaítear leis na Cinntí ón gComhairle córas éigeantach ar mhaithe leis an Iodáil agus leis an nGréig, rud a chiallaíonn nach bhfuil rogha ar bith san nós imeachta ag an tír athshocraithe AE nó ag an iarrthóir tearmainn.
• Ní mór do gach tír AE:
  • pointe náisiúnta teagmhála a bhunú chun faisnéis a mhalartú le tíortha AE eile agus leis an Oifig Tacaíochta Eorpach do Chúrsaí Tearmainn (EASO);
  • oifigigh idirchaidrimh a cheapadh le hoibriú leis an Iodáil agus leis an nGréig;
  • an líon iarratasóirí is féidir a athlonnú go tapa go dtí a gcríoch a léiriú ag eatraimh rialta, agus gach 3 mhí ar a laghad (gealltanais fhoirmiúla).
• Is é sa Ghréig nó san Iodáil a dhéantar iarrthóirí tearmainn a aithint agus a chlárú, a thógtar a méarloirg agus a chuirtear agallamh orthu. Dréachtaítear a bpróifílí le cúnamh ón EASO. Sanntar iad ansin chuig an tír AE is oiriúnaí dá bpróifíl. Féadfaidh tíortha AE roghanna a léiriú d’iarrthóirí áirithe chun imeascadh a éascú, ach níl siad sin ina gceangal dlíthiúil ar an Iodáil nó ar an nGréig. Agus an comhoiriúnú á dhéanamh acu, cuirfidh údaráis na Gréige agus na hIodáile san áireamh na roghanna sin agus naisc theaghlaigh, theangeolaíocha, shóisialta, chultúrtha agus naisc ar bith eile a d’fhéadfadh bheith idir an t-iarrthóir aonair agus an tír athshocraithe ionchasach AE.
• Nuair a bheidh sé formheasta ag an tír ghlactha, déanfar aistriú an iarrthóra tearmainn a luaithe agus is féidir.
• Ní mór nach nglacfaidh an nós imeachta um athshocrú níos mó ná 2 mhí, cé go bhféadfadh sé suas le 3.5 mí a ghlacadh, ón nóiméad a ndéanann an tír AE gealltanas foirmiúil go dtí teacht isteach an iarrthóra tearmainn sa tír AE um athshocrú.
• Faoin dá chinneadh, gheobhaidh an tír AE um athshocrú EUR 6,000 in aghaidh an duine athshocraithe.
• Faoi Chinneadh (AE) 2015/1601 gheobhaidh an Iodáil agus an Ghréig EUR 500 chomh maith do gach duine a athshocrófar chun costais iompair chuig an tír AE um athshocrú a chumhdach.
• Áirítear leis an dá chinneadh díolúine theoranta agus shealadach ó Rialachán (AE) Uimh. 604/2013 (ar a dtugtar Rialachán Bhaile Átha Cliath III chomh maith) lena gcinntear an tír AE a bheidh freagrach as scrúdú a dhéanamh ar iarratais ar thearmann).
• Ní mór don Iodáil agus don Ghréig treochláir a dhréachtú chun dul i ngleic le heasnaimh struchtúrtha ina gcóras tearmainn, fáiltithe agus fillte.
• Tá tuairiscí á dtabhairt ag an gCoimisiún ar bhonn rialta maidir le cur chun feidhme na gCinntí ón gComhairle maidir le hathshocrú ina sainaithnítear baic agus réitigh.

CÉN UAIR ATÁ TOSACH FEIDHME NA GCINNTÍ?

• Tháinig Cinneadh (AE) 2015/1523 i bhfeidhm an 16 Meán Fómhair 2015 agus tá feidhm aige maidir le daoine a thiocfaidh isteach ar chríoch na hIodáile agus na Gréige ón 16 Meán Fómhair 2015 go dtí an 17 Meán Fómhair 2017, agus maidir le hiarrthóirí a tháinig isteach ar chríoch na hIodáile agus na Gréige ón 15 Lúnasa 2015 i leith.
• Tháinig Cinneadh (AE) 2015/1601 i bhfeidhm an 25 Meán Fómhair 2015 agus tá feidhm aige maidir le daoine a thiocfaidh isteach ar chríoch na hIodáile agus na Gréige ón 25 Meán Fómhair 2015 go dtí an 26 Meán Fómhair 2017, agus maidir le hiarrthóirí a tháinig isteach ar chríoch na hIodáile agus na Gréige ón 24 Márta 2015 i leith.

CÚLRA

• Tháinig plódú an-mhór iarrthóirí tearmainn isteach san Iodáil agus sa Ghréig, ón tSiria, ón Iaráic agus ón Eiritré den chuid is mó. Chuir sé sin strus suntasach ar chórais tearmainn an dá thír.
• Is é Airteagal 78(3) den Chonradh ar Fheidhmiú an Aontais Eorpaigh an bonn dlíthiúil maidir leis na cinntí sin, ina sonraítear: “I gcás [tír AE] amháin nó níos mó a bheith i láthair staid éigeandála arb é a príomhthréith rabharta tobann de náisiúnaigh tríú tíortha as [tíortha neamh-AE], féadfaidh an Chomhairle [AE], ar thogra ón gCoimisiún, bearta sealadacha a ghlacadh ar mhaithe leis na [tíortha AE] lena mbaineann. Gníomhóidh sí tar éis di dul i gcomhairle le Parlaimint na hEorpa.”
• Le haghaidh breis faisnéise, féach:
  • Comhchóras Eorpach Tearmainn (An Coimisiún Eorpach);
  • Maidir Linn (An Oifig Tacaíochta Eorpach do Chúrsaí Tearmainn).

PRÍOMHDHOICIMÉID

Cinneadh (AE) 2015/1523 ón gComhairle an 14 Meán Fómhair 2015 lena mbunaítear bearta sealadacha i réimse na cosanta idirnáisiúnta ar mhaithe leis an Iodáil agus leis an nGréig (IO L 239, 15.9.2015, lgh. 146-156)

Cinneadh (AE) 2015/1601 ón gComhairle an 22 Meán Fómhair 2015 lena mbunaítear bearta sealadacha i réimse na cosanta idirnáisiúnta ar mhaithe leis an Iodáil agus leis an nGréig (IO L 248, 24.9.2015, lgh. 80-94)

Rinneadh leasuithe comhleanúnacha ar Chinneadh (AE) 2015/1601 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

DOICIMÉID GHAOLMHARA

Tuarascáil ón gCoimisiún chuig Parlaimint na hEorpa, chuig an gComhairle Eorpach agus chuig an gComhairle — An cúigiú tuarascáil déag ar athshocrú agus athlonnú (COM(2017) 465 final, 6.9.2017).

Tuarascálacha roimhe seo ón gCoimisiún maidir le cur chun feidhme scéimeanna um athshocrú agus um athlonnú: COM(2016) 165 final; COM(2016) 222 final; COM(2016) 360 final; COM(2016) 416 final; COM(2016) 480 final; COM(2016) 636 final; COM(2016) 720 final; COM(2016) 791 final; COM(2017) 74 final; COM(2017) 202 final; COM(2017) 212 final; COM(2017) 260 final; COM(2017) 330 final; COM(2017) 405 final.

Rialachán (AE) Uimh. 603/2013 ó Pharlaimint na hEorpa agus ón gComhairle an 26 Meitheamh 2013 maidir le bunú “Eurodac” chun méarloirg a chur i gcomparáid lena chéile ar mhaithe le cur i bhfeidhm éifeachtach Rialachán (AE) Uimh. 604/2013 ón gComhairle lena mbunaítear na critéir agus na sásraí lena gcinntear cé acu Ballstát atá freagrach as scrúdú a dhéanamh ar iarratas ar chosaint idirnáisiúnta arna thaisceadh i gceann de na Ballstáit ag náisiúnach tríú tír nó ag duine gan stát agus maidir le hiarrataí ó údaráis forghníomhaithe dlí thíortha AE agus ó Europol ar chomparáidí le sonraí Eurodac chun críocha forghníomhaithe dlí agus lena leasaítear Rialachán (AE) Uimh. 1077/2011 lena mbunaítear Gníomhaireacht Eorpach le haghaidh bainistiú oibríochtúil córas TF ar mhórscála sa réimse saoirse, slándála agus ceartais (IO L 180, 29.6.2013, lgh. 1-30)

Rialachán (AE) Uimh. 604/2013 ó Pharlaimint na hEorpa agus ón gComhairle an 26 Meitheamh 2013 lena mbunaítear na critéir agus na sásraí lena gcinntear cé acu tír AE atá freagrach as scrúdú a dhéanamh ar iarratas ar chosaint idirnáisiúnta arna thaisceadh i gceann de thíortha AE ag náisiúnach tríú tír nó ag duine gan stát (IO L 180, 29.6.2013, lgh. 31-59)

Nuashonraithe 17.11.2016