Srian a chur le húsáid substaintí áirithe guaiseacha i dtrealamh leictreach agus leictreonach

ACHOIMRE AR:

Treoir 2011/65/AE — srian ar shubstaintí guaiseacha áirithe a úsáid i dtrealamh leictreach agus leictreonach

CAD IS AIDHM LEIS AN TREOIR?

Déantar na rialacha atá ann cheana a threisiú léi maidir le húsáid substaintí guaiseacha, amhail luaidhe, mearcair agus caidmiam, i dtrealamh leictreach agus leictreonach (TLL) chun sláinte an duine agus an comhshaol a chosaint, go háirithe trí aisghabháil atá neamhdhíobhálach don chomhshaol agus cóireáil dramhaíola maidir le TLL.

PRÍOMHPHOINTÍ

Nuashonraítear faoin reachtaíocht athmhúnlaithe Treoir 2002/95/CE lena gcuirtear srian le substaintí áirithe guaiseacha i dtrealamh leictreach agus leictreonach (TLL) trí, i measc rudaí eile, na srianta ar úsáid substaintí guaiseacha a shíneadh go dtí raon níos leithne TLL.

Raon feidhme

• In Iarscríbhinn a ghabhann leis an treoir leagtar amach na catagóirí TLL atá cumhdaithe faoin reachtaíocht. Airítear orthu sin raon ó fhearais tí go trealamh faisnéise agus teicneolaíochta (TF), agus catagóir oscailte uileghabhálach (ó Iúil 2019 i leith).
• Tá an toirmeasc seo i bhfeidhm anois maidir le gach TLL agus maidir le cáblaí agus páirteanna spártha. Tá liosta gairid eisiamh tugtha i leith cásanna speisialta áirithe.
• Tugadh an toirmeasc isteach de réir a chéile i gcás táirgí áirithe. Beidh sé i bhfeidhm:
  • an 22 Iúil 2014 maidir le gléasanna monatóireachta agus rialaithe agus le feistí leighis;
  • an 22 Iúil 2016 maidir le feistí leighis in vitro;
  • an 22 Iúil 2017 maidir le gléasanna monatóireachta agus rialaithe tionsclaíocha; agus
  • an 22 Iúil 2019 maidir le grúpaí táirgí eile.

Eisiaimh

Níl feidhm ag na srianta maidir le raon earraí amhail airm, trealamh spáis, uirlisí tionsclaíocha do-aistrithe mórscála (mar shampla clóphreasanna agus meaisíní muilleála agus druileála) agus fearais dhaingnithe (mar shampla gineadóirí leictreachais). Ní chuirtear san áireamh a oiread painéil fhótavoltacha.

Le Treoir (AE) 2017/2102 leasaítear Treoir 2011/65/AE chun plé le roinnt saincheisteanna, chun iarmhairtí neamhbheartaithe na reachtaíochta de thoradh ar an raon feidhme oscailte a tugadh isteach in 2011 a sheachaint.

Ní áirítear píborgán agus roinnt innealra soghluaiste nach innealra bóthair é ina raon feidhme.

Féachtar léi freisin borradh a chur faoin ngeilleagar ciorclach tríd an toirmeasc ar oibríochtaí sa mhargadh tánaisteach (lena gcuimsítear deisiú, athsholáthar páirteanna spártha, athchóiriú agus athúsáid, agus iarfheistiú) le haghaidh TLL a bhí lasmuigh de raon feidhme Threoir 2002/95/CE a bhí ann roimhe sin, ach nach mbeadh i gcomhréir le Treoir 2011/65/AE.

Féadfar páirteanna spártha a athúsáidtear, arna n-aisghabháil ó TLL, a dhíolmhú ar an gcoinníoll go n-athúsáidtear iad i gcórais fillte lúbiata gnó le gnó atá so-iniúchta, agus go bhfógraítear athúsáid na bpáirteanna spártha don tomhaltóir.

Díolúintí

• Má chomhlíontar critéir áirithe, ní bheidh feidhm ag na srianta ar feadh tréimhse shealadach maidir le húsáidí díolmhaithe áirithe, amhail úsáid luaidhe i sádair le haghaidh trealamh leictreach agus leictreonach.
• Tá díolúintí ó na srianta liostaithe in dhá iarscríbhinn. Cuireadh roinnt eisceachtaí eile leis ó foilsíodh an treoir agus d’éag roinnt eile agus níl feidhm acu a thuilleadh; tugtar na liostaí díolúintí cothrom le dáta ar bhonn leanúnach ar aon dul leis an dul chun cinn teicniúil.

Oibleagáidí

• Cuirtear d’oibleagáid ar mhonaróirí faoin treoir a áirithiú go ndéanfaidh siad TLL ar bith a chuireann siad ar an margadh a dhearadh agus a tháirgeadh de réir na gceanglas atá leagtha amach sa reachtaíocht.
• Ní mór d’allmhaireoirí a sheiceáil go ndearnadh an trealamh a fhaomhadh maidir leis na caighdeáin riachtanacha a chomhlíonadh.
• Ní mór do dháileoirí a áirithiú go gcomhlíontar na caighdeáin chomh maith.

Oiriúnú agus athbhreithniú

• Déanfar athbhreithniú go rialta ar na hiarscríbhinní éagsúla, lena n-áirítear liosta na substaintí srianta agus a gcion fulaingthe. Déanfar iad a nuashonrú bunaithe ar an dul chun cinn eolaíoch agus teicniúil agus cuirfear na rioscaí do shláinte an duine agus don chomhshaol san áireamh.
• Sheol an Coimisiún Eorpach athbhreithniú ar an treoir in 2020 chun í a mheas agus chun í a oiriúnú más gá.

CÉN UAIR ATÁ TOSACH FEIDHME NA TREORACH?

Tá feidhm léi ón 21 Iúil 2011. Le Treoir 2011/65/AE rinneadh Treoir 2002/95/CE a athbhreithniú (agus na leasuithe uirthi ina dhiaidh sin) agus cuireadh an treoir sin ina hionad, arb éigean dlí a dhéanamh di i dtíortha AE faoin mbliain 2004. B’éigean dlí a dhéanamh de na rialacha nua atá i dTreoir 2011/65/AE i dtíortha AE faoin mbliain 2013.

CÚLRA

Le haghaidh tuilleadh faisnéise, féach:

• Srianadh Substaintí Guaiseacha i dTrealamh Leictreach agus Leictreonach (RoHS) (An Coimisiún Eorpach).

PRÍOMHDHOICIMÉAD

Treoir 2011/65/AE ó Pharlaimint na hEorpa agus ón gComhairle an 8 Meitheamh 2011 maidir le srian a chur le húsáid substaintí áirithe guaiseacha i dtrealamh leictreach agus leictreonach (athmhúnlú) (IO L 174, 1.7.2011, lgh. 88-110)

Rinneadh leasuithe comhleanúnacha ar Threoir 2011/65/AE a chorprú sa bhundoiciméad. Níl de luach ar an leagan comhdhlúite seo ach luach doiciméadach amháin.

Nuashonraithe 01.09.2023